New Testament in a Year

²² En daut Follkj raeajd sikj opp jaeajen an, en dee Rechta jeewe Befael an dee Kjleede fom Liew to riete, en an to feheiwe.

²³ Aus see an seeha feheift haude, schmeete see an em Jefenknes enenn, en befoole daem Jefenkjneswajchta an doa goot to fesechre.

²⁴ En wiel am daut soo befoole wea, schmeet hee an enn daut ennaschte poat fom Jefenknes enenn, en schloot aeare Feet em Klotts enn.

²⁵ Onnjefaea Mednacht baede Paul en Sielas Gott aun, en lowde am met Leeda, en dee aundre Jefangne horchte too.

²⁶ En platslich kjeem en grootet Eadbaebe, so daut daut Gruntloag fonn daut Jefenknes scheddad, en aule Daeare weare platslich opjemoakt, en aulem folle de Kjaede auf.

²⁷ En dee Jefenkneswajchta wuak opp, en aus hee sach daut dee Jefenknes Daeare op weare, jreep hee en Schweat en wull sikj selfst daut Laewe naeme, wiel hee docht daut dee Jefangne weare aula utjeretst.

²⁸ Oba Paul roopt am met ne lude Stem en saed: "Doo die kjeen schode, dan wie sent aula hia!"

²⁹ He foddad en Licht en rand enenn, tsetad en foll Paul en Sielas fere Feet,

³⁰ leid an rut en saed: "Herre, waut mott ekj doone daut ekj kaun Seelich woare?"

³¹ En see saede: "Jleew aun daem Herr Jesus! Dan woascht du en diene Famielje seelich."

³² En see jeewe am en aul daen enn siene Famielje, Gott sien Wuat.

³³ Donn neem hee dee selwje Stund enne Nacht en wosch an aeare Striepe, en leet sikj fuats taufe, hee en siene gaunse Famielje.

³⁴ Hee brocht an no sien Hus en jeef an to aete, en freid sikj seeha daut hee en siene Famielje tom Gloowe jekome weare.

³⁵ Auset nu eascht Dach wea schekjte dee Fraedensrechta dee Stautsdeena en saede: "Lot dise Mana gone."

³⁶ Dee Jefenkneswajchta saed to Paul: "Dee Fraedensrechta ha jeschekjt en jesajcht daut jie kjenne loos jelote woare. Aulso got enn Fraed."

³⁷ Oba Paul saed to an: "Dee ha onns effentlijch feheift wan wie uk onnschuldich weare, dee wie Reema sent, en ha onns em Jefenknes enenn jestoppt; en nu wele see onns heemlich loos lote? Opp kjeen Wajch! Lot an selfst kome en onns rut leide."

³⁸ Donn leete dee Stautsdeena dee Fraedensrechta daut weete. Dee aengste sikj aus see heade daut dise Reema weare,

³⁹ , en kjeeme en prachada an, en brochte an rut, en prachade an daut see de Staut felote wudde.

⁴⁰ See jinje ut daut Jefenknes rut, en jinje bie Liedia em Hus enenn, en aus see dee Breeda jeseene en femont haude, feleete see.