New Testament in a Year

²⁵ Nu pasaead daut aus Peeta enenn kjeem, daut Korneelius am fere Feet foll en baed am aun.

²⁶ Oba Peeta recht am opp en saed: "Sto opp! ekj sie selfst uk en Maun."

²⁷ En aus hee so met am raed, kjeem hee enenn, en funk fael Mensche dee toop jekome weare;

²⁸ en saed to an: "Jie weete dautet jaeajen daut Jesats es daut en Jud sikj sull aun en Framda aunschluete, oda no soonem to kome; oba Gott wees mie daut ekj kjeen Mensch sull jemeen oda onnrein nane.

²⁹ Doaromm kjeem ekj oone Froag aus mie jefoddet wort. Aulso froag ekj nu, waut es dee Uasoak daut jie mie ha haea jefoddat?"

³⁰ En Korneelius saed: "Feeha Doag trig omm dise Tiet, Klok dree no Medach wea ekj hia enn mien Hus en deed baede, en Kjikj! en Maun stunnt fer mie enn dache Kjleeda, en saed: 'Korneelius, diene Jebaed sent jeheat worde, en diene Gow sent fer Gott jekome tom Aunjedenk. 32 Nu schekj no Joppe en fodda Siemoon dee uk Peeta heet; dee es bie Siemoon dee Ladajoawa sien Hus daut biem Maea es.'

³³ Doaromm schekjt ekj fuats no die, en du hast Goot jedone daut du jekome best. Nu sent wie hia aula toop fer Gott omm aules to heare waut de Herr die befoole haft to saje."

³⁴ Donn muak Peeta sien Mul op en said: "Enn Woarheit fenaem ekj daut Gott nich ne Peersoon aunseene deit,

³⁵ oba enn aula Felkja dee, dee am ferchte en Jerachtichkjeit doone, sent am aunjenaem.

³⁶ Daut Wuat daut hee dee Kjinja Iesrael jeschekjt haft daut Fraed praedicht derch Jesus Christus: - disa es Herr aewa aules.

³⁷ Jie weete waut derch gauns Judaea pasead, daut enn Galilaea aunfunk no dee Taufe dee Jehaun praedjd,

³⁸ fonn Jesus fonn Natsaret, woo Gott am ennsaeajend met daem Heilje Jeist, dee rom jinkj en Goodet deed, en heeld aul daen dee fom Diewel bedrekjt weare, wiel Gott met am wea.

³⁹ En wie sent Zeij fonn aules daut hee deed beides enn daut judische Launt uk enn Jerusalem; daem see werklich oppem Kjriets hunge en muake am Doot.

⁴⁰ Daem deed Goot oppwakje aum dredde Dach, en leet am fonn Mensche seene,

⁴¹ nich fonn aulem, oba fonn Zeij dee Gott ferhaea doato jewaelt haud; en to onns, dee met am je-aete en jedrunke haude no daem daut hee fom Doot oppjestone wea.

⁴² En hee befool onns to dee Mensche to praedje, en earnstlich to zeije daut dit es dee Maun daem Gott bestemt haft Rechta to senne aewa Laewendje en Doodje.

⁴³ To disem jaewe aul dee Profeete Zeichness daut waeaemma aun am jleeft, woat derch sien Nome Sinde fejaewunk kjriehe."

⁴⁴ Waearent Peeta raed, foll dee Heilje Jeist opp aul daen dee dise Raed heade.

⁴⁵ En dee fonn dee Beschniedunk dee met Peeta met jekome weare, weare erstaunt doaraewa daut dee Heilje Jeist opp daen utjegote wea;

⁴⁶ dan see heade daen met aundre Sproake raede, en Gott feharliche. Don saed Peeta:

⁴⁷ "Kaun irjend waea Wota febeede daut dise nich sulle jetauft woare, dee daem Heilje Jeist jekraeaje ha jrod soo aus wie?"

⁴⁸ En hee befool an en Jesus Christus sien Nome jetauft to woare. Donn prachada see am en poa Doag doa to bliewe.