M’Cheyne Bible Reading Plan

3 Miene Leefste, dit es nu dee tweeda Breef daen ekj junt schriew, en enn beid wel ekj jun reina Senn oppreaeje en junt denkje halpe,

² daut jie dee Wead behoole dee derch dee heilje Profeete en Apostel jeraet worde, en derch daut Jeboot daut wie, daem Herr Jesus siene Apostel junt jejaeft ha,

³ en daut jie daut easchte weete sele daut enne latste Doag woare doa Spata kome, dee no aeare eajne Losst waundle woare,

⁴ en saje: "Wua es daut Fespraeakje wada to kome? Dan seit onnse Fodasch jestorwe sent, blift aules aewareen soo auset fonn Aunfank Welt es jewast."

⁵ Daut es festoake fonn an, en see wele daut soo, daut de Himels fonn oole Tiet haea weare, en de Ead enn Wota en derch Wota, derch Gott sien Wuat toop jehoole woare;

⁶ en derch woont dee Welt dee donn wea fonn Wota aewaschwamt wea, en doaderch fenicht wort.

⁷ Oba dee Himels en Ead dee nu bestone, sent derch daut naemlijet Wuat bewoat, fa en Fia enn en Jerechtsdach, wan uk dee onnjerajchte Mensche woare fenicht woare.

⁸ Dit eenalei saul oba nich fonn junt festoake senne, miene leefste, daut een Dach bie daem Herr soo es aus dusant Yoa, en dusant Yoa soo aus een Dach.

⁹ De Herr fetrakjt nich met sien Fespraeakje soo aus walkje Fetrakje aunseene, oba es seeha jeduldich onns jaeajenaewa, wiel hee nich wel ha daut irjent waea sull felore gone, oba daut aule sele to Buesse kome.

¹⁰ Oba daem Herr sien Dach woat kome soo aus en Deef, en dee Himels woare dan met en grootet jeruzh feschwinje, en daut waut jeschaufe es, woat met heetet brenne wajch schmelte, en dee Ead en aules waut doabenne es woat utjeforscht woare.

¹¹ Wan dit aules feschwinje woat, waut fonne Mensche sel wie dan senne enn onns Waundel enn Heilichkjeit,

¹² enn daem daut wie no daem Gott sien Dach iewrijch luare, wan dee Himels brenne woare en oppjeleest woare, en waut jeschaufe es woat em Fia schmelte?

¹³ Wie luare oba no en nieha Himel en Ead no sien Fespraeakje, wua Jerajchtichkjeit woat tus senne.

¹⁴ Doaromm, miene leefste, sentamol wie doano luare, wel wie straewe daut wie kjenne rein en faelaloos bie am jefunje woare, enn Fraed;

¹⁵ en doamet raeakjne daut onns Herr siene Jedult de Radunk es, soo aus uk onns leefsta Brooda Paul enn siene Weisheit junt jeschraewe haft,

¹⁶ soo aus enn aul siene Breew, en raet fonn dise Dinje. Doarenn sent walkje Dinje schwoa to festone, en soone dee onnjeleat en nich Staunthauft sent, fedreihe dee, uk aundre Schrefte, to aea eajnet Fedoawness.

¹⁷ Doaromm, miene leefste, wiel jie dit em ferut weete, siet faeasechtich daut jie nich wajch jeliet woare derch dee jesatsloose Faulscheit, en fonn jun Staunthauft auf faule.

¹⁸ Oba waust enn onns Herr en Hailaunt Jesus Christus siene Jnod en Erkjantnes. Am jeheat aule Harlijchkjeit, beides nu, en enn aule Eewijchkjeit. Amen.

15 Nu nodade dee Takskollakjta en Sinda sikj no am, omm am to heare.

² En dee Farisaea en Schreftjeleade murrde seeha en saede: "Dis Maun nemt de Sinda aun en at met an."

³ Donn raed hee dit Jlikjnes en saed: "Waea fonn ju dee hunndat Schop haft, wan hee eent felist, lat nich dee naeajen-en-naeajentich enne Wiltnes en jeit daut felorne Schop to seakje bott hee daut finjt?

⁵ En wan hee daut finjt lajcht hee sikj daut oppe Schulre en freit sikj;

⁶ en kjemt enn sien Hus enenn en roopt siene Frind en Nobasch toop en sajcht to daen: 'Freit junt met mie met, dan ekj ha mien Schop jefunje daut felore wea.'

⁷ Ekj saj ju daut jrod so es meeha Freid em Himel aewa een Sinda dee Buesse deit aus aewa naeajen-en-naeajentich Jerachte daen de Buesse nich faelt.

⁸ Oda ne Fru dee dree Selwastekje haft en eent felist, wudd dee nich ne Laump aunstekje en faeaje daut Hus ut, en seakje flietich bott see daut finjt?

⁹ En wan see daut finjt, roopt see aeare Frind en Nobasch topp, en sajcht: 'Freit junt met mie, dan ekj ha daut Selwastekj jefunje daut ekj felore haud.'

¹⁰ Jrod so, saj ekj ju, es doa Freid fer Gott siene Enjel aewa een Sinda dee Buesse deit."

¹¹ En hee saed to an: "En jewessa Maun haud twee Saens.

¹² En dee jinjra saed to sien Foda: 'Foda, jeff mie daut Poat fonn daut Hab en Goot daut mient es.' En hee deeld an sien Hab en Goot enn.

¹³ Korts no daem pakt dee jinjsta Saen aul sien Goot toop en reisd aewa Launt, wiet auf, en febrocht doa sien Goot derch wilet Laewe.

¹⁴ Oba aus hee aules februckt haud, kjeem doa ne groote Hungaschnoot enn daut gaunse Launt, en am faeldet aun aules.

¹⁵ Donn jinkj hee en femeed sikj bie eena fonn dee Laundesbirja, en dee schekjt am oppe Stap de Schwien to foodre.

¹⁶ Am felangd aul seeha siene Moag met dee Schluwe to felle dee de Schwien aute, oba kjeena jeef am waut.

¹⁷ Aus hee oba too Besennunk kjeem, saed hee to sikj selfst: 'Woo fael fonn dee Deena dee mien Foda jemeet haft, ha jenuach Broot to aete, oba ekj fekom hia enn dise Hungaschnot.

¹⁸ Ekj woa mie oppmoake en gone no mien Foda, en woa to am saje: 'Foda, ekj ha jaeajen Himel en fer die jesindicht.

¹⁹ Ekj sie nich meeha weat dien Saen jenant to woare; moak mie so aus eena fonn diene aunjenomne Deena.'

²⁰ En hee muak sikj opp en kjeem no sien Foda. Oba aus hee noch en langet Enj auf wea, sach sien Foda am, en am jaumad daut aewa am. Hee rand en foot am omm en jeef am en Kuss.

²¹ Sien Saen saed to am: 'Foda, ekj ha jaeajen Himel en fer die jesindicht, en sie nich meeha weat dien Saen to heete.'

²² Oba sien Foda saed to siene Sklowe: 'Brinjt schwind daen basta Mauntel en trakjt am daen aun, en jaeft am en Rink opp sien Finja, en Schoo fa siene Feet,

²³ en brinjt daut jemastet Kaulf haea en doot daut schlachte; wel wie aeta en onns freihe,

²⁴ dan disa, mien Saen wea Doot en laeft wada; hee wea felore en es jefunje.' En see funje aun sikj to freihe.

²⁵ Oba dee elsta Saen wea oppe Stap; en aus hee dicht biem Hus kjeem, head hee Musikj en Daunse;

²⁶ en roopt eena fonn dee Junjes en fruach waut daut aules to bediede haud.

²⁷ Dee saed to am: 'Dien Brooda es trig jekome, en dien Foda haft daut jemastet Kaulf jeschlacht wiel hee am jesunt trig jekjraeaje haft.'

²⁸ Oba hee wea doll en wull nich enenn gone, aulsoo kjeem dee Foda rut en prachad am.

²⁹ Oba hee saed to sien Foda: 'Kjikj! aul dise Yoare ha ekj die jedeent en sie niemols onnjehuarsaum jewast, en du hast mie niemols ne Kos jejaeft daut ekj kunn met miene Frind toop ne goode Tiet habe;

³⁰ oba nu daut disa, dien Saen, dee dien Hab en Goot met Huare fefraete haft, trig jekome es, deist du am daut jemastet Kaulf schlachte.'

³¹ De Foda saed to am: 'Mien Saen, du best emma bie mie, en aules waut ekj ha es dient.

³² Daut es gauns rajcht daut wie onns freihe en ne goode Tiet ha, dan disa, dien Brooda, wea Doot, en es tom Laewe jekome; hee wea feloare, en es jefunje.'"