◀ All Reading Plans / M’Cheyne Bible Reading Plan / Family: 1 Chronicles 7–8; Hebrews 11. Secret: Amos 5; Luke 1:1–38. (Awadhi Bible: Easy-to-Read Version)

Prev Day

November 16, 2025

Next Day

Use the calendar to view readings from this devotional.

November 2025
Su	Mo	Tu	We	Th	Fr	Sa
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30

Return to today's reading

M’Cheyne Bible Reading Plan

The classic M'Cheyne plan--read the Old Testament, New Testament, and Psalms or Gospels every day.

Duration: 365 days

1 इतिहास 7-8

इस्साकार क सन्तान

7 इस्साकार क चार पूत रहेन। ओनकर नाउँ तोला, पूआ, यासूब, अउ सिम्रोन रहेन।

²तोला क पूत उज्जी, रपयाह, यरीएल, यहमै, यिबसाम अउर समूएल रहेन। उ पचे सबहिं अपने परिवारन क प्रमुख रहेन। उ पचे मनसेधू अउ ओनकर सन्तान जोधा रहेन। ओनकर परिवार बाढ़त रहेन अउ जब दाऊद राजा भवा, तब हुवाँ बाईस हजार छ: सौ मनई जुद्ध बरे तइयार रहेन।

³उज्जी क पूत यिज़ह्याह रहा। यिज़ह्याह क पूत मीकाएल, ओबद्याह, योएल, यिस्सिय्याह, रहेन। उ पचे सबहिं पाँचहु अपने परिवारन क प्रमुख रहेन। ⁴ओनके परिवार क इतिहास इ बतावत ह कि ओनके लगे छत्तीस हजार जोधा जुद्ध क बरे तइयार रहेन। ओनकर बड़ा परिवार रहा। काहेकि ओनकर बहोत स मेहरारुअन अउ बच्चन रहेन।

⁵परिवार इतिहास इ बतावत ह कि इस्सकार क सबहिं परिवार समूहन मँ सत्तासी हजार सक्तीसाली फउजी रहेन।

बिन्यामीन क सन्तान

⁶बिन्यामीन क तीन पूत रहेन। ओनकर नाउँ बेला, बेकेर अउ यदीएल रहेन।

⁷बेला क पाँच पूत रहेन। ओनकर नाउँ एसबोन, उज्जी, उज्जीएल, यरीमोत, अउ इरी रहेन। उ पचे अपने परिवारन क प्रमुखन रहेन। ओनकर परिवार इतिहास बतावत ह कि ओनके लगे बाईस हजार चौंतीस फउजी रहेन।

⁸बेकेर क पूत जमीरा, योआस, एतीएजेर, एल्योएनै, ओम्री, यरेमोत, अबिय्याह, अनातोत अउ आलेमेत रहेन। उ पचे सबहिं बेकेर क बच्चा रहेन। ⁹ओनकर परिवार इतिहास बतावत ह कि परिवार प्रमुख कउन रहेन अउर ओनकर परिवार इतिहास इ भी कहत ह ओनकर बीस हजार दुइ सौ फउजी रहेन।

¹⁰यदीएल क पूत बिल्हान रहा। बिल्लन क पूत यूस, बिन्यामीन, एहद, कनान, जेतान, तर्सीस अउ अहीसहर रहेन। ¹¹यदीएल क सबहिं पूत अपने परिवार क प्रमुख रहेन। ओनकर सतरह हजार दुइ सौ फउजी जुद्ध बरे तइयार रहेन।

¹²सुप्पीम अउ हुप्पीम ईर सन्तान रहेन। हूसी अहेर क पूत रहा।

नप्ताली क सन्तान

¹³नप्ताली क पूत एसीएल, गूनी, येसेर अउ सल्लूम रहेन।

अउर इ सबइ बिल्हा क सन्तान रहेन।

मनस्से क सन्तान

¹⁴इ सबइ मनस्से क सन्तान अहइँ। मनस्से क उसीएल नाउँ क पूत रहा। जउन ओकर अरामी रखैल स रहा। ओनकर माकीर भी रहा। माकीर गिलाद क बाप रहा। ¹⁵माकीर हुप्पीम अउर सुप्पीम लोगन क एक मेहरारु स बियाह किहस। माका क दूसर मेहरारु क नाउँ सलोफाद रहा। सलोफाद क सिरिफ बिटियन रहिन। माकीर क बहिन क नाउँ भी माका रहा। ¹⁶माकीर क मेहरारु माका क एक पूत भवा। माका अपने पूत क नाउँ पेरेस धरेस। पेरेस क भाई क नाउँ सेरेस रहा। सेरेस क पूत ऊलाम अउ राकेम रहेन।

¹⁷ऊलाम क पूत बदान रहा।

इ सबइ गिलाद क सन्तान रहेन। गिलाद माकीर क पूत रहा। माकीर मनस्से क पूत रहा। ¹⁸माकीर क बहिन हम्मोलेकेत क पूत ईसहोद, अबीएजेर, अउर महला रहेन।

¹⁹समीदा क पूत अहयान, सेकेम लिखी अउर अनीआम रहेन।

एप्रैम क सन्तान

²⁰एप्रैम क सन्तानन क इ सबइ नाउँ रहेन। एप्रैम क पूत सूतेलह रहा। सूतेलह क पूत बेरेद रहा। बेरेद क पूत तहत रहा। तहत क पूत एलाद रहा। ²¹एलाद क पूत तहत रहा। तहत क पूत जाबाद रहा। जाबाद क पूत सूतेलह रहा।

कछू मनइयन जउन गत नगर मँ बड़े भए रहेन, येजेर अउ एलाद क मार डाएन। इ एह बरे भवा कि येजेर अउ एलाद ओन लोगन क गइयन अउ भेड़िन चोरावइ गत गए रहेन। ²²एप्रैम एजेर अउ एलाद क बाप रहा। उ कइउ दिनन तलक रोवत रहा। काहेकि येजेर अउर एलाद मर गए रहेन। एप्रैम क परिवार ओका सांत्वना देइ आवा। ²³तब एप्रैम अपनी मेहरारु क संग तने क सम्बंध किहस। एप्रैम क मेहरारु गर्भवती भइ अउ उ एक पूत क जन्म दिहस। एप्रैम अपने नवे पूत क नाउँ बरीआ धरेस काहेकि ओकरे परिवार क संग कछू बुरा भवा रहा। ²⁴एप्रैम क बिटिया सेरा रही। सेरा नीच बेथोरान अउ ऊँच बेथोरान अउर नीच उज्जेनसेरा अउ ऊँच उज्जेनसेरा बसाएस।

²⁵रेपा एप्रैम क पूत रहा। रेसेप रेपा क पूत रहा। तेलह रेसेप क पूत रहा। तहन तेलह क पूत रहा। ²⁶लादान तहन क पूत रहा अम्मीहूद लादान क पूत रहा। एलीसाम अम्मीहूद क पूत रहा। ²⁷नून एलीसामा क पूत रहा। यहोसू नून क पूत रहा।

²⁸इ सबइ उ नगर अउ प्रदेस अहइँ जहाँ एप्रैम क सन्तान रहत रहेन। बेतेल अउ एकरे नगिचे क गाँव पूरब मँ नारान, गेजेर अउ पच्छिम मँ एकरे निअरे क गावँ, अउ सेकम अउ अज्जा क रास्ते तलक क निअरवाले गांँव। ²⁹मनस्से क भुइँया क चउहद्दी पइ बेतसान, मगिदो अउ दोर नगर अउर ओनका नजिक सक सबहिं गाँव रहेन। इस्राएल क पूत यूसुफ क सन्तान एन नगरन मँ रहत रहिन।

आसेर क सन्तान

³⁰आसेर क पूत यिम्ना, यिस्वा, यिस्वी अउ बरीआ रहेन। ओनकर बहिन क नाउँ सरेह रहा।

³¹बरीआ क पूत हेबरे अउ मलकीएल रहेन। मलकीएल बिर्जोत क बाप रहा।

³²हेबेर यपलेत, सोमेर होताम अउर ओनकर बहिन सू्आ क बाप रहा।

³³यपलेत क पूत पासक, बिम्हाल अउ अस्नात रहेन। इ सबइ यपलेत क बच्चन रहेन।

³⁴सेमरे क पूत अही, रोहगा, यहुब्बा अउ अराम रहेन।

³⁵सेमेर क भाई क नाउँ हेलेम रहा। हेलेम क पूत सो पह, यिम्ना, सेलेस अउ आमाल रहेन।

³⁶सोपह क पूत सूह, हर्नेपे, सूआल, बेरी, इम्रा, ³⁷बेसेर, होद, सम्मा, सिलसा, यित्रान अउ बेरा रहेन।

³⁸येतेर क पूत यपुन्ने, पिस्पा अउ अरा रहेन।

³⁹उल्ला क पूत आरह, हन्नीएल, अउ रिस्चा रहेन।

⁴⁰इ सबइ मनई आसेर क सन्तान रहिन। उ पचे अपने परिवारन क प्रमुख रहेन। उ पचे उत्तिम पुरुख रहेन। उ पचे योद्धा अउ महान प्रमुख रहेन। ओनके परिवारे क इतिहास बतावत ह कि छब्बीस हजार फउजी जुद्ध बरे तइयार रहेन।

राजा साऊल क परिवार इतिहास

8 बिन्यामीन बेला क बाप रहा। बेला बिन्यामीन क पहिला पूत रहा। अबेल बिन्यामीन क दूसर पूत रहा। अहरह बिन्यामीन क तीसर पूत रहा। ²नोहा बिन्यामीन क चउथा पूत रहा अउर रापा बिन्यामीन क पाँचवाँ पूत रहा।

³बेला क पूत अद्दार, गेरा, अबीहूद, ⁴अबीसू, नामान, अहोह, ⁵गेरा, सपूपान अउ हूराम रहेन।

⁶एहूद क सन्तान इ सबइ रहेन। इ सबइ गेबा मँ अपने परिवारन क प्रमुख रहेन। उ पचे आपन घर तजइ अउर मानहत मँ रहइ क मजबूर कीन्ह गए रहेन। ⁷एहूद क सन्तान नामान, अहिय्याह, अउर गेरा रहेन। गेरा ओनका घर तजइ क मजबूर किहस। गेरा उज्जा अउ अहीलूद क बाप रहा।

⁸सहरैम आपन पत्नियन हसीम अउ बारा क मोआब मँ तलाक दिहस। इ करइ क पाछे, ओकर कछू दूसर गदेलन दूसर पत्नी स पइदा भएन। ^9-10सहर्रेम क योआब, सिब्या, मेसा, मल्काम, यूस, सोक्या, अउर मिर्मा ओकर मेहरारु होदेस स भएन। उ पचे अपने परिवारन क प्रमुख रहेन। ¹¹सहरेर्म अउर हसीम क दुइ पूत अबीतूब अउ एल्पाल रहेन।

^12-13एल्पाल क पूत एबेर, मिसाम, सेमेद, बरीआ अउ सेमा रहेन। सेमेद ओनो अउ लोद नगर अउ लोद क चारिहुँ कइँती नान्ह नगर बनाएस। बरीआ अउ सेमा अय्यालोन मँ रहइवाले परिवारन क प्रमुख रहेन। ओन पूतन गत मँ रहइवालन क ओका तजइ क मजबूर किहन।

¹⁴बरीआ क पूत सासक अउर यरमोत, ¹⁵जबद्याह, अराद, एदेर, ¹⁶मीकाएल, यिस्पा अउ योहा रहेन। ¹⁷एल्पाल क पूत जबद्याह, मुसुल्लाम, हिजकी, हेबर, ¹⁸यिसमरै, थिजलीआ अउ योबाब रहेन।

¹⁹सिमी क पूत याकीम, जिवी, जब्दी, ²⁰एलीएनै, सिल्लतै, एलीएल, ²¹अदायाह, बरायाह अउ सिम्रात रहेन।

²²सासक क पूत यिसपान, यबेर, एलीएल, ²³अब्दोन जिक्री, हानान, ²⁴हनन्याह, एलाम, अन्तोतिय्याह, ²⁵यिपदयाह, अउर पनूएल रहेन।

²⁶यरोहाम क पूत समसैरे, सहर्याह, अतल्याह, ²⁷योरेस्याह, एलिय्याह, अउर जिवी रहेन।

²⁸इ सबइ सबहिं मनई अपने परिवारन क प्रमुख रहेन। उ पचे अपने परिवार क इतिहास मँ प्रमुख क रूप मँ अंकित रहेन। उ पचे यरूसलेम मँ रहत रहेन।

²⁹येयील गिबोन क बाप रहा। उ गिबोन नगर मं रहत रहा। ययील क मेहरारु क नाउँ माका रहा। ³⁰योयील क सबस बड़का पूत अब्दोन रहा। दूसर पूत सूर, कीस, बाल, नेर, नादाब, ³¹गदोर, अह्यो, जेकेर अउर मिकोत रहेन, ³²मिकोत सिमा क बाप रहा। इ सबइ पूत भी यरूसलेम मँ अपने सम्बन्धियन क नगिचे रहत रहेन।

³³नेर, कीस, क बाप रहा कीस साऊल क बाप रहा। अउर साऊल योनातान, मल्कीसू, अबीनादाब अउर एसबाल क बाप रहा।

³⁴योनातान क पूत मरीब्बाल रहा। मरीब्बाल मीका क बाप रहा।

³⁵मीका क पूत पीतोन, मेलेक, तारे अउ आहाज रहेन।

³⁶आहाज यहोअद्दा क बाप रहा। यहोअद्दा आलेमेत, अजमावेत अउ जिम्री क बाप रहा। जिम्री मोसा क बाप रहा। ³⁷मोसा बिना क बाप रहा। रापा बिना क पूत रहा। एलासा रापा क पूत रहा अउर आसेल एलासा क पूत रहा।

³⁸आसेल क छ: पूत रहेन। ओनकर नाउँ अज्रीकाम, बोकरु, यिस्माएल, सार्याह, ओबद्याह अउर हानान रहेन। इ सबइ सबहिं पूत आसेल क सन्तान रहेन।

³⁹आसेल क भाई एसेक रहा। एसेक क कछू पूत रहेन। एसेक क इ सबइ पूत रहेन: ऊलाम एसेक क सब स बड़का पूत रहा। यूसा एसेक क दूसर पूत रहा। एलीपेलेत एसेक क तीसर पूत रहा। ⁴⁰ऊलाम क पूत बलवान जोधा अउर धनुस-बाण क प्रयोग मँ वुसल रहेन। ओनकर बहोत स पूत अउ पोता रहेन। सब मिलाइके डेढ़ सौ पूत अउ पोता रहेन। सब मिलाइके डेढ़ सौ पूत अउ पोता रहेन।

इ सबइ सबहिं मनई बिन्यामीन क सन्तान रहिन।

इब्रनियन 11

बिसवास क महिमा

11 बिसवास क मतलब बा, जेकर हम आसा करित ह, ओकरे बरे सुनिस्चित होब। अउर बिसवास क मतलब बा कि हम चाहे कउनो चीज क देखत न अही मुला ओकरे अस्तित्व क बारे मँ सुनिस्चित होब कि उ बा। ²इही कारण पुरानन क परमेस्सर क आदर मिला भआ रहा।

³बिसवास क आधार पर ही हम इ जानित ह कि परमेस्सर क आदेस स जगत क रचना भइ रही। इही बरे जउन दृस्य बा, उ दृस्य स नाहीं बना बा।

⁴हाबिल तउ बिसवास क कारण ही परमेस्सर क कैन स अच्छी बलि चढ़ाए रहा। बिसवास क कारण ही ओका एक धर्मी मनई क रूप मँ तब सम्मान मिला रहा जब परमेस्सर त ओकरी भेंटन क प्रसंसा किहे रहा। अउर बिसवास क कारण उ आजऊ बोल थीं जद्यपि उ मरी चुका अहइ।

⁵बिसवास क कारण ही हनोक क एह जीवन स उप्पर उठाइ लिहा गवा रहा ताकि ओका मउत क अनुभव न होइ। परमेस्सर तउ काहेकि ओका दूर हटाइ दिहे रहा इही बरे उ पावा नाहीं गवा। काहेकि ओका उठावा जाइ स पहिले परमेस्सर क प्रसन्न करइवाले क रूप मँ ओका सम्मान मिल चुका रहा। ⁶बिसवास के बिना परमेस्सर क खुस करब असम्मभव रहा। काहेकि हरएक उ जउन ओकरे लगे आवत ह, ओकरे बरे इ जरूरी बा कि उ एह बात क बिसवास करइ कि परमेस्सर क अस्तित्व बा अउर उ जउन ओका सच्चाई क साथ खोजत ह, उ ओन्हे ओकर प्रतिफल देत ह।

⁷बिसवास क कारण ही नूह क जब ओन्हन बातन क चेतावनी दीन्ह गइ जउन उ देखे तक नाहीं रहा तउ उ पवित्तर भय स भरा आपन परिवार क बचावइ क बरे एक नाव क निर्माण किहे रहा। अपने बिसवासे स ही उ एह संसार क दोसपूर्ण मानेस अउर ओह धार्मिकता क उतराधिकारी बना जउन बिसवास स आवत ह।

⁸बिसवास क कारण ही, जब इब्राहीम क अइसेन स्थान प जाइके बरे बोलावा गवा रहा, जेका बाद मँ उतराधिकार क रुप मँ ओका पावइ क रहा, जदि उ इ जानत तक नाहीं रहा कि उ कहाँ जात बा, फिन भी उ आज्ञा मानेस अउर उ चला गवा। ⁹बिसवास क कारण ही जउने धरती क देइ क ओका बचन दीन्ह गवा रहा, ओह प उ एका अनाजान परदेसी क समान आपन घरे बनाइके निवास किहेस। उ तम्बुवन मँ वइसेन रहा जइसेन इसहाक अउर याकूब रहत रहेन जउन ओकरे संग परमेस्सर क ओह प्रतिज्ञा क उतराधिकारी रहेन। ¹⁰उ मजबूत आधारवाली उ नगरी क बाट जोहत रहा जेकर सिल्पी अउर निर्माण कर्ता परमेस्सर अहइ।

¹¹बिसवास क कारण ही, इब्राहीम जउन बूढ़ा होइ चुका रहा अउर सारा जउन खुद बाँझ रही, जे बचन दिहे रहा, ओका बिसवासनीय समझिके गर्भवती भइ अउर इब्राहीम क बाप बनाइ दिहेस। ¹²अउर एह तरह इ एक्कइ मनई स जउन मरियल स रहा, अकास क तारन जेतनी असंख्य अउर सागर-तट क रेत-कणन जेतनी अनगिनत संतान भइन।

¹³बिसवास क अपने मन मँ लिए भए इ लोग मरि गएन। जिन चीजन क प्रतिज्ञा दीन्ह गइ रही, उ ओ चीजन क नाहीं पाएन। उ पचे बस ओनका दुर स ही देखेन अउर ओनकर स्वागत किहेन अउर उ इ मानि लिहेन कि ओ पचे इ धरती प परदेसी अउर अनजान अहइँ। ¹⁴उ लोग जउन अइसेन बात कहत हीं, उ इ देखावत हीं कि उ पचे एक अइसेन देस क खोज मँ अहइँ जउन ओनकर आपन अहइ। ¹⁵अगर उ पचे ओह देस क बारे मँ सोचतेन जेका उ छोड़ि चुका अहइँ तउ ओनके फिन स लउटइ क अवसर रहत। ¹⁶मुला ओन्हे तउ सरगे क एक अच्छा प्रदेस क उत्कट अभिलासा बा। इही बरे परमेस्सर क ओनकर परमेस्सर कहवावइ मँ संकोच नाहीं होत काहेकि उ तउ ओनके बरे एक नगर तइयार कइ रखे अहइ।

^17-18बिसवास क कारण ही इब्राहीम तउ, जब परमेस्सर ओकर परीच्छा लेत रहा, इसहाक क बलिदान चढ़ाएस। उहइ जेका प्रतिज्ञा मिली भइ रही, अपने एक मात्र बेटवा क जब बलिदान देई बाला रहा। तउ जद्यपि परमस्सर त ओसे कहे रहा, “इसहाक क द्वारा ही तोहरा वंस बाढ़ी।” ¹⁹मुला इब्राहीम तउ सोचेस क परमेस्सर मरे भएन क भी जियाइ सकत ह अउर अगर अलंकारित भाखा मँ कहा जाइ तउ उ इसहाक क मउत स फिन वापस पाइ लिहेस।

²⁰बिसवास क कारण ही इसहाक तउ याकूब अउर एसाब क ओनके भविस्स क बारे मँ आसीर्बाद दिहेस। ²¹बिसवास क कारण ही याकूब तउ जब उ मरत रहा।

²²यूसुफ जब ओकर अंत निकट रहा हर बेटवा क आसीर्बाद दिहेस अउर लाठी क उपर सिरे झुकि के सहरा लेत परमेस्सर क आराधना किहेस।

²³बिसवास क अधार पर ही, मूसा क महतारी-बाप तउ, मूसा क जनम क बाद ओनका तीन महिना तक छुपाये रखेन काहेकि ओ देखि लिहे रहेन कि उ कउनो सामान्य बालक नाहीं रहा अउर उ राजा क आज्ञा स नाहीं डरेन।

^24-25बिसवास स ही, मूसा जब बड़ा भवा तउ फिरौन क बिटिया क बेटवा कहवावइ स इन्कार कइ दिहेस। उ पाप क छणिक सुक भोगन क अपेच्छा परमेस्सर क लोगन क साथे दुर्व्यवहार झेलबइ ही चुनेस। ²⁶उ मसीह क बरे अपमान झेलइ क मिस्र क धन भंडारन क अपेच्छा जियादा मूल्यवान मानेस काहेकि उ आपन प्रतिफल पावइ क बाट जोहत रहा।

²⁷बिसवास क कारण ही, राजा क क्रोध स न डरत भए उ मिस्र क परित्याग कइ दिहेस। उ डटा रहा, मान ओका अदृस्य परमेस्सर देखात अहइ। ²⁸बिसवास स ही, उ फसह क त्यौहार अउर लहू छिड़कइ क पालन किहेस, ताकि पहिलौठा क बिनास करइवाला इस्राएल क पहिलौठा क छू तक न पावइ।

²⁹बिसवास क कारण ही, लोग लाल-सागर स अइसेन पार होइ गएन जइसेन उ कउनो सूखी जमीन होइ। मुला जब मिस्र क लोगन अइसेन करइ चाहेन तउ उ पचे डूबि गएन।

³⁰बिसवास क कारण ही, यहीहो क नगर-परकोट लोगन क सात दिन तलक ओकरे चारिहुँ कइँती परिक्रमा कइ लेइके बाद ढह गवा।

³¹बिसवास क कारण ही, राहाब नाउँ क बेस्या आज्ञा क उल्लंघन करइवालन क साथे नाहीं मारी गइ रही काहेकि उ गुप्तचरन क स्वागत सत्कार किहे रही।

³²अब मइँ अउर जियादा का कही। गिदोन, बाराक, सिमसोन, यिफतह, दाऊद, समूएल अउर ओन्हन नबियन क चर्चा करइ क मोरे लगे समइ नाहीं बाटइ। ³³जे बिसवास स, राज्यन क जीत लिहेस, निआवपूर्ण काम किहेस अउर परमेस्सर जउन देइ क बचन दिहे रहा, ओका पाएस। जे सिंहन क मुँह बन्द कइ दिहेस, ³⁴लपलपात लपटन क क्रोध क सान्त किहेस अउर तलवार क धार स बच निकलेन, जेकरे कमजोरी इ सकित मँ बदल गइ, अउर युद्ध मँ जउन सक्तिसाली बनेन अउर जे बिदेसी सेनन क छिन्न-भिन्न कइ डाएन।

³⁵स्त्रियन तउ अपने मरन हुवन क फिन स जिन्दा पाएन। बहुतन क सतावा गवा, मुला उ छुटकारा पावइ स मना कइ दिहेन ताकि ओनका एक अउर अच्छा जीवन मँ पुनरूत्थान मिलि सकइ। ³⁶कछू क उपहासन अउर कोड़न क सामना करइ पड़ा जबकि कछू क जंजीरन स जकड़िके बन्दी घरे मँ डालि दीन्ह गवा। ³⁷कछू पइ पथराऊ कीन्ह गवा। ओनका आरा स चीरके दुइ फाँक कइ दीन्ह गवा, ओनका तलवार स मउत क घाट उतारि दीन्ह गवा। उ पचे गरीब रहेन, ओनका जातना दीन्ही गइ अउर ओनके साथे बुरा व्यवहार कीन्ह गवा! उ पचे भेड़ बकरियन क खाल ओढ़े रहेन अउर एहर ओहर भटकत रहेन। ³⁸इ संसार ओनके योग्य नाहीं रहा। उ पचे रेगिस्तानन अउर पहाड़न मँ घूमत रहेन अउर सबइ गुफा अउर धरती मँ बने भए बिलन मँ छुपत-छुपावत फिरेन।

³⁹अपने बिसवासे क कारण ही इ लोग सब स सराहा गएन। फिन भी परमेस्सर क जेकर महान बचन ओनका दीन्ह गवा रहा, ओका एनमाँ स कउनो नाहीं पाइ सका। ⁴⁰परमेस्सर क लगे आपन योजना क अनुसार हमरे बरे कूछ अउर जियादा अच्छा रहा जइसेन ओनहूँ बस हमरे साथे ही पूरा सिद्ध कीन्ह जाइ।

आमोस 5

इस्राएल बरे सोक संदेसा

5 इस्राएल क लोगो, इ सँदेसा क सुना, इ सोक सँदेसा तोहेर पचन्क बारे मँ अहइ।

²इस्राएल क कुँवारी गिर गइ अहइ।
उ अब कबहुँ नाहीं उठी।
उ धूरि मँ पड़ी अकेल्ली तजि दीन्ह ग अहइ।
ओका उठावइवाला कउनो मनई नाहीं अहइ।

³मोर सुआमी यहोवा इ कहत ह:

“हजार फउजियन क संग सहर स जाइवाले अफसर
सिरिफ सउ फउजियन क संग लउटिहीं।
सउ फउजियन क संग सहर तजइवाले अफसर सिरिफ
दस फउजियन क संग लउटिहीं।”

यहोवा इस्राएल क अपने लगे लउटइ बरे बढ़ावा देत ह

⁴यहोवा इस्राएल क घराने स इ कहत ह:
“मोर खोज करत आवा अउ जिअत रहा।
⁵    मुला बेतेल मँ न खोजा।
गिल्गाल जिन जा।
    सीमा क पार न करा अउर बेर्सेबा न जा।
गिल्गाल क लोग बन्दी क रूप मँ लइ जावा जइहीं
    अउर बेतेल नस्ट कीन्ह जाइ।
⁶यहोवा क लगे जा अउर जिअत रहा।
    अगर तू पचे यहोवा हिआँ नाहीं जाब्या, तउ यूसुफ क घरे मँ आगी लगी।
    आगी यूसुफ क परिवारे क नस्ट करी अउर बेतेल मँ कउनो भी रोक नाहीं पाई।
^7-9तू पचन्क मदद बरे यहोवा क लगे जाइ चाही।
    इ उहइ अहइ जउन कचपचिया अउ मृगसिरा क बनाएस।
उ अँधियारा क भिंसोर प्रकास मँ बदल दत ह।
    उ दिन क अँधेरी रात मँ बदल देत ह।
उ समुद्दर द जल क उठाइके ओका पृथ्वी पइ बरसावत ह।
    ओकर नाउँ यहोवा अहइ
उ सक्तीवाले सहरन क
    मजबूत किलन क ढहाइ देत ह।”

इस्राएलियन क जरिये कीन्ह गए बुरे करम

लोगो, तू पचन्क बरे इ बहोतइ बुरा होइ।
    तू पचे अच्छाई क कड़ुवाहट मँ बदल दिहा।
    तू पचे अच्छाई क मार डाया अउर एका धूरि मँ मिलाइ दिहा।
¹⁰नबी समाज क ठउरन पइ जात हीं अउर ओन बुरे करमन क खिलाफ बोलत हीं जेनका लोग करत रहत हीं।
    मुला लोग ओन नबियन स घिना करत हीं।
    नबी फुरइ कहत हीं, मुला लोग ओन नबियन स घिना करत हीं।
¹¹तू पचे गरीबन स गैर मुनासिब कर वसूलत अहा।
    तू पचे ओनसे ढेर क गोहूँ लेत ह
अउ इ धने क उपयोग तू पचे तरासे भए पाथरन स सुन्नर महल बनावइ मँ करत अहा।
    मुला तू पचे ओन महलन मँ नाहीं रहब्या।
तू पचे अंगूरन क बेलन क सुन्नर खेत बनावत अहा।
    मुला तू पचे ओनसे पाई दाखरस क नाहीं पीब्या।
¹²कहेकि मइँ तू पचन्क अनेक पापन्क जानत हउँ।
    तू पचे, फुरइ ही, कछू बुरे करम किह्या ह।
तू पचे मुनासिब काम करइवालन क चोट पहोंचाया।
    तू पचे घूस क रूप मँ धन लिहा।
    गरीब लोगन क संग अनेक मुकदमन मँ तू पचे निआव नाहीं किह्या।
¹³उ समइ बुद्धिमान चुप रइहीं।
    काहे काहेकि इ बुरा समइ अहइ।
¹⁴तू पचे कहत अहा कि परमेस्सर मोरे संग अहइ।
    एह बरे नीक करम करा, बुरा नाहीं।
तब तू पचे जिअन रहब्या
    अउ सर्वसक्तीमान परमेस्सर यहोवा फुरइ ही तोहेर सबन्क संग होइ।
¹⁵बुराई स घिन करा।
अच्छाई स पिरेम करा।
    कचहरी मँ निआव वापस लिआवा
अउ तब संभव अहइ कि सर्वसक्तीमान परमेस्सर यहोवा
    यूसुफ परिवारे क बचे भए लोगन पइ दयालु होइ।

बड़के सोक क समइ आवत अहइ

¹⁶इहइ कारण अहइ कि मोर सुआमी सर्वसक्तीमान परमेस्सर इ कहत अहइ,
“लोग सबहिं समाज क ठहरन मँ रोइहीं,
    लोग सड़कियन पइ रोइहीं।
    लोग पेसेवर रोवइवालन क भाड़ा पइ रखिहीं।
¹⁷लोग अंगूरे क सबहिं खेतन मँ रोइहीं।
    काहेकि मइँ हुआँ स निकरब अउर तू पचन्क सजा देबउँ।”
    यहोवा इ सब कहेस ह।
¹⁸तू पचन मँ स कछू यहोवा क
    निआव क खास दिन क लखइ चाहत हीं।
तू पचे उ दिन क काहे लखइ चाहत अहा?
    यहोवा क खास दिन तोहरे पचन्क बरे अँधियारा लिआई उजियारा नाहीं।
¹⁹तू पचे कउनो सेरे क समन्वा स बचिके पराइ निकरइवाले अइसे मनई क नाईं होब्या
    जेह पइ भागत समइ रीछ हमला कइ देत ह
अउर फुन जब उ रीछ स भी बचिके निकरिके कउनो घरे मँ जाइ घुसत ह
    तउ हुआँ देवारे पइ हथवा धरत ही,
    साँप डसि लेत ह।
²⁰एह बरे यहोवा क खास दिन अँधियारा लिआई, उजियारा नाहीं,
    इ सोक क समइ होइ उल्लास क नाहीं।

यहोवा इस्राएलियन क आराधना क अंगीकार नाहीं करत अहइ

²¹“मइँ तोहार पचन्क पवित्तर दिनन स घिना करत हउँ।
    मइँ ओनका कबूल नाहीं करब।
    मइँ तोहार पचन्क धर्म क सभन क आनन्द नाहीं लेतेउँ।
²²अगर तू पचे होमबलि अउ अन्नबलि अउ भी देब्या
    तउ मइँ अँगीकार नाहीं करब।
तू पचे जउन मोटवार जनावरन क सान्ति-भेंट क रूप मँ देब्या
    ओनका मइँ भी लखब भी नाहीं।
²³तू पचे हिआँ स सोरगुलवाले गीतन क दूर करा।
    मइँ तोहरी पचन्क वीणा क संगीत क नाहीं सुनब।
²⁴तू पचन्क आपन सोर देस मँ निआव क नदी क तरह बहइ देइ चाही।
    अच्छाई क सदा नदी क धारा क नाई बहइ द्या जउन कबहुँ झुरात नाहीं।
²⁵इस्राएल, तू पचे चालीस बरिस तलक रोगिस्ताने मँ
    मोका बलि अउ भेंट नाहीं चढ़ाया।
²⁶तू पचे आपन देवता सक्कुथ अउ नछत्र देवता कैवन क मूर्तियन क लइके चल्या।
    एन देवतन क मूर्तियन क तू पचे अपने बरे बनाये रह्या।
²⁷एह बरे मइँ तू पचन्क बन्दी बनाइके दमिस्क क पार पहोंचाउब।”
    इ सब यहोवा कहत ह।
    ओकर नाउँ सर्वसक्तीमान परमेस्सर अहइ।

लूका 1:1-38

लूका ईसू क जीवन क बरे मँ लिखस

1 बहोत स मनई हमरे बीच होइजाइ वाली घाटना क ब्यौरा लिखइ क कोसिस करेन ह। ²उहइ बातन हमका उ सबइ मनइयन क जरिये जान पड़िन जउन उ पचे सुरुआत स घटत देखेन अउर जउन सुसमासार क प्रचार करत रहेन। ³हे मान्यवर थियुफिलुस! काहेकि मइँ सुरुआत स सब कछू होसियारी स पढ़ेउँ ह। एह बरे मोका इ नीक जान पड़त ह कि तोहरे बरे एक ठु एक क बाद एक एक घटना क लिखेउँ। ⁴जेसे तू सब इन बातन क बेफिकिर होइके जान ल्या जउन तोहका सिखाइ ग अहइँ।

जकरयाह अउर इलीसिबा

⁵उ समइया मँ जब यहूदिया प हेरोदेस क राज्य रहा। हुवाँ जकरयाह नाउँ क एक याजक रहत रहा। जउन याजकन क अबिय्याह दल^[a] क रहा अउर ओकर पत्नी इलीसिबा हारून बंस क रही। ⁶उ दुइनउँ परमेस्सर क निगाह मँ धर्मी रहेन। उ पचे बिना कउनो दोख क पर्भू क सबइ हुकुमन अउर बिधानन क पालन करत रहेन। ⁷मुला ओनके कउनो संतान नाहीं रही, काहेकि इलीसिबा बाँझ रही अउर उ दुइनउँ बहोत बुढ़वा होइ ग रहेन।

⁸जब जकरयाह क आपन दले क मन्दिर मँ याजक क काम खातिर बारी आइ, अउर उ परमेस्सर क समन्वा आराधना बरे हाजिर भवा। ⁹तउ याजकन मँ चली भइ रीति रिवाजे क तरह पर्ची डाइके ओका चुना गवा कि उ पर्भू क मन्दिर मँ जाइके धूप जरावइ। ¹⁰जब धूप जरावइ क समइ आइ तउ बाहेर ऍकट्ठा भवा मनई पराथना करत रहेन।

¹¹उहइ समइया जकरयाह क समन्वा एक ठु पर्भू का दूत परगट भवा। उ दूत धूप क वेदी क दाहिन कइँती खड़ा रहा। ¹²जकरयाह जइसे उ दूत क निहारेस तउ उ घबराइ गवा अउर डर जइसे ओका जकड़ि लिहस। ¹³फिन सरगदूत ओसे कहेस, “जकरयाह जिन डेराअ, तोहार पराथना सुनि लीन्ह गइ अहइ। एह बरे तोहार पत्नी इलीसिबा एक बेटवा क जनम देई, अउर तू ओकर नाउँ यूहन्ना धर्या। ¹⁴उ तोहका आनंद अउर खुसी देइ, साथे ओकरे जनम स अउर भी बहोत स मनइयन क खुसी होई। ¹⁵काहेकि उ पर्भू क निगाहे मँ महान होई। उ कबहुँ कउनो दाखरस या कउनो मदिरा क न पिई। आपन जन्म स पवित्तर आतिमा स भरपूर होई।

¹⁶“उ इस्राएल क बहोतन मनइयन क ओनकइ पर्भू परमेस्सर कइँती लौटइ बरे फेरी। ¹⁷उ एलिय्याह क आतिमा अउर सामर्थ मँ होइके परभू क अगवा अगवा चली। उ बापन क हिरदय ओनके संताने कइँती मोड़ देइ अउर आज्ञा न मानइवालन क मने क बदल देइ जेहसे उ पचे धर्मी मनइयन क नाई सोचइ लागइ। इ सबइ, उ मनइयन क पर्भू बरे तइयार करइ क करी।”

¹⁸तबहीं जकरयाह दूत स कहेस, “मइँ इ कइसे जान लेउँ कि इ सच अहइ? काहेकि मइँ एक बुढ़वा हउँ अउर मोर पत्नी बुढ़िया होइ ग अहइ।”

¹⁹तबहिं सरगदूत जवाब देत ओसे कहेस, “मइँ जिब्राईल हउँ। मइँ उहइ हउँ जउन परमेस्सर क अगवा खड़ा रहत हउँ। मोका तोसे बात करइ अउर इ सुसमाचार क बतावइ बरे पठवा ग अहइ। ²⁰मुला देखा, काहेकि तू मोरे सब्दन प, जउन निस्चित समइ क आइ प सच सिद्ध होइहीं, बिसवास नाहीं किहा, यह बरे तू गूँगा होइ जाब्या अउर उ दिना तलक नाहीं बोल पउब्या जबहिं ताई इ घटित न होइ जाइ।”

²¹ओहर बाहेर मनई जकरयाह क इंतजार करत रहेन। ओकना अचरज भवा कि उ ऍतनी देर मन्दिर मँ काहे ठहर गवा। ²²फिन जब उ बाहेर आवा अहइ तउ उ ओनसे बोल नाहीं पावत रहा। ओनका इ लाग कि जइसे मन्दिर क भीतर कउनो दर्सन होइ गवा अहइ। उ गूँगा होइ ग अउर सिरिफ इसारा करत रहा। ²³अउर फिन अइसा भवा कि जब ओकर आराधना क काम होइ गवा तउ जकरयाह वापस आपन घर लौटि गवा।

²⁴थोड़े दिना बाद ओकर पत्नी इलीसिबा गर्भवती भइ। पाँच महीना तलक उ सबन स अलगइ रही। उ कहेस, ²⁵“अब आखिर मँ जाइके इ तरह पर्भू मोर मदद करेस ह। मनइयन क बीच मोर लाज राखइ बरे उ मोर सुधि लिहस ह।”

कुँवारी मरियम

^26-27इलीसिबा क छठा महीना चलत रहा, गलील क एक सहर नासरत मँ परमेस्सर क दूत जिब्राईल क एक कुँवारी कन्या क लगे पठएस जेकर यूसुफ नाउँ क एक मनई स गोदी भरि दीन्ह गइ। उ दाऊद क बंस मँ जनमा रहा अउर उ कुँवारी कन्या क नाउँ मरियम रहा। ²⁸जिब्राईल ओकरे लगे आइ अउर कहेस, “तोह पइ अनुग्रह भइ अहइ, तोहार जय होइ। पर्भू तोहरे संग बा।”

²⁹इ बचन सुनिके उ बहोत घबरान, उ सोच मँ पड़ि गइ, “एकर का अरथ होइ सकत ह?”

³⁰तब सरगदूत ओसे कहेस, “मरियम तू जिन डेराअ, तोसे परमेस्सर खुस अहइ। ³¹सुना! तू गोड़वा स भारी होब्या अउर एक पूत क जनम देबू अउर ओकर नाउँ ईसू रखबिउ। ³²उ महान होई अउर उ सबन त सर्वोच्च (परमेस्सर) क पूत कहवावा जाई। पर्भू परमेस्सर ओका ओकरे बाप दाऊद क सिंहासन दइ देई। ³³उ अनन्त समइया ताई याकूब क घराने प राज करी। ओकर राज्य क नास कबहुँ न होई।”

³⁴एह पइ मरियम सरगदूत स कहेस, “इ सच कइसे होइ सकत ह? काहेकि मइँ तउ अबहुँ कुँवारी हउँ।”

³⁵जवाबे मँ सरगदूत ओसे कहेस, “तोहरे लगे पवित्तर आतिमा आई अउर सर्वोच्च (परमेस्सर) क सक्ती तोहका आपन परिछाहीं मँ लइ लेई। इ तरह उ जनम लेइवाला पवित्तर पूत परमेस्सर क पूत कहवावा जाई। ³⁶अउर इ भी सुनि ल्या कि तोहरे कुनबा क इलीसिबा क कुनबे मँ बुढ़ौती क गरभ मँ एक बेटवा अहइ अउर ओकरे कोखी क इ छठा महीना चलत बा। लोग कहत रहेन कि उ बाँझ बा! ³⁷मुला परमेस्सर बरे कछू न होइ सकइ, अइसा नाहीं!”

³⁸मरियम कहेस, “मइँ पर्भू क दासी हउँ जइसा तू मोरे बरे कह्या ह, वइसा ही होइ!” अउर तब उ सरगदूत ओकरे लगे स चला गवा।

Awadhi Bible: Easy-to-Read Version (ERV-AWA)