M’Cheyne Bible Reading Plan
आदम स नूह तलक परिवारे क इतिहास
1 1-3 आदम, सेत, एनोस, केनान, महललेल, येरेद, हनोक, मतूसेलह, लेमेक, नूह।
4 नूह क पूत सेम, हाम अउ येपेत रहेन।
येपेत क सन्तानन
5 येपेत क पूत गोमेर, मागोग, मादै, याबान, तूबल मेसेक अउर तीरास रहेन।
6 गोमेर क पूत असकनज, दीपत अउ तोगर्मा रहेन।
7 यावान क पूत एलीसा, तर्सीस, कित्ती अउर रोदानी रहेन।
हाम क सन्तानन
8 हाम क पूत कूस (मिस्रम), पूत अउ कनान रहेन।
9 कूस क पूत सबा, हबीला, सबाता, रामा अउर राब्तका रहेन।
रामा क पूत सबा अउ ददान रहेन।
10 कूस क संतान निम्रोद संसार मँ सब स जियादा सक्तीसाली बीर जोधा भवा।
11 मिस्र लूदी, अनामी, लहावी, नप्तही, 12 पत्रूसी, कसलूही अउ कप्तोरी क बाप रहा। (पलिस्ती क लोग कसलूही क संतान रहेन।)
13 कनान सीदोन क बाप रहा। सीदोन ओकर पहिला पूत रहा। कनान, हित्तियन, 14 यबूसी एमोरी, गिर्गासी, 15 हिव्वी, अर्की, सीनी, 16 अर्वदी, समारी अउ हमाती क लोगन क भी बाप रहा।
सेम क सन्तानन
17 सेम क पूतन एलाम, अस्सूर, अर्पच्छद, लूद अउर अराम रहेन। अराम क पूत ऊस, हूल, गेतेर अउ मेसेक रहेन।
18 अर्पच्छद सेलह क बाप रहा। सेलह एबेर क पिता रहा।
19 एबेर क दुइ पूत रहेन। एक ठु पूत क नाउँ पेलेग रहा, काहेकि धरती क मनई ओकरे जीवनकाल मँ कइउ भाखन मँ बटे रहेन। पलेग क भाई क नाउँ योक्तान रहा। 20 (योक्तान स पइदा भए अल्मोदाद, सुलेप, हसर्मावेत, येरह, 21 हदोराम, ऊजाल, दिक्ला, 22 एबाल, अबीमाएल, सबा, 23 ओपीर, हवीला अउ योबाब, इ सबइ सब योक्तान क सन्तान रहेन।)
24 सेम, अर्पच्छद, सेलह, 25 एबेर, पेलेग, रु 26 सरूम, नाहोर, तेरह 27 अउर अब्राम (अब्राम क इब्राहीम भी कहा जात ह।)
इब्राहीम क परिवार
28 इब्राहीम क पूत इसहाक अउर इस्माएल रहेन। 29 इ सबइ एकर सन्तान अहइँ: हाजिरा क सन्तानन
इस्माएल क पहिला पूत नबायोत रहा। इस्माएल क दूसर पूत केदार, अदवेल, मिबसाम, 30 मिस्मा, दूमा, मस्सा, हदद, तेमा, 31 यतूर नापीस अउ केदमा रहेन। उ सबइ इस्माएल क पूत रहेन।
32 कतूरा इब्राहीम क रखैल रही। उ जिम्रान, योच्छान, मदान, मिद्यान, यिसबाक अउ सूह क जन्म दिहस।
योच्छान क पूत सबा अउ ददान रहेन।
33 मिद्यान क पूत एपा, एपेर, हनोक, अबीदा अउर एलदा रहेन।
इ सबहिं कतूरा क पूत रहेन।
सारा क पूतन
34 इब्राहीम इसहाक क बाप रहा। इसहाक क पूत एसाव अउ इस्राएल रहेन।
35 एसाव क पूत एलीपज, रुएल, यूस यालाम अउर कोरह रहेन।
36 एलीपज क पूत तेमान, ओमार, सपी, गाताम अउर कनज रहेन। एलीपज अउ तिम्ना क पूत अमोलेक नाउँ क रहा।
37 रूएल क पूत नहत, जेरह, सम्मा अउ मिज्जा रहेन।
सेईर क एदोमी
38 सेईर क पूत लोतान, सोबाल, सिबोन, अना, दीसोन, एसेर अउ दीसान रहेन।
39 लोतान क पूत होरी अउ होमाम रहेन। लोतान क एक बहिन तिम्ना नाउँ क रही।
40 सोबाल क पूत अल्यान, मानहत, एबाल, सपी अउर ओनाम रहेन।
सिबोन क पूत अय्या अउ अना रहेन।
41 अना क पूत दीसोन रहा।
दीसोन क पूत हम्रान, एसबान, यित्रान अउ करान रहेन।
42 एसेर क पूत बिल्हान, जावान अउ याकान रहेन।
दीसोन क पूत ऊस अउ अरान रहेन।
एदोम क राजा
43 इस्राएल मँ राजा लोगन क होइ क बहोत पहिले एदोम मँ राजा रहेन। एदोम क राजा लोगन क नाउँ इ सबइ अहइँ:
ओनकर नाउँ रहेन: बोर क पूत बेला पहिला राजा रहेन। बेला क नगर क नाउँ दिन्हाबा रहा।
44 जब बेला मरा, तब जेरह क पूत योबाब नवा राजा बना। योबाब बोस्रा स आएस।
45 जब योबाब मरा, हूसाम नवा राजा भवा। हूसाम तेमनी लोगन क देस क रहा।
46 जब हूसाम मरा, बदद क पूत हदद नवा राजा बना। हदद मिद्यानियन क मोआब देस मँ हराएस। हदद नगर क नाउँ अवीत रहा।
47 जब हदद मरा, सम्ला नवा राजा भवा। सम्ला मस्रेकाइ क रहा।
48 जब सम्ला मरा, साऊल नवा राजा बना। साऊल महानद क किनारे क रहोबोत क रहा।
49 जब साऊल मरा, अकबोर क पूत बाल्हानान नवा राजा भवा।
50 जब बाल्हानान मरा, हदद नवा राजा बना। हदद क नगर क नाउँ पउ रहा। हदद क मेहरारु क नाउँ महेतबेल रहा। महेतबेल मत्रेद क बिटिया रही। मत्रेद, मेज़ाहाब क बिटिया रही। 51 तब हदद मरा।
एदोम क प्रमुख तिम्ना, अल्या, यतेत, 52 ओहोलीवामा, एला, पीनोन, 53 कनज, तेमान, मिबसार, 54 मग्दीएल अउर ईराम रहेन। इ एदोम क प्रमुखन क एक ठु सूची अहइ।
इस्राएल क पूतन
2 इस्राएल क पूत रुबेन, लेवी, यहूदा, इस्साकार, जबूलून, 2 दान, यूसुफ, बिन्यामीन, नप्ताली, गाद अउर आसेर रहेन।
यहूदा क पूतन
3 यहूदा क पूत एर, ओनान अउ सेला रहेन। बतसू ओनकर महतारी रही। बतसू कनान क मेहरारु रही। यहोवा लखेस कि यहूदा क पहिला पूत एर बुरा अहइ। इहइ कारण रहा। कि यहोवा ओका मार डाएल। 4 यहूदा क पतोहू तामार पेरेस अउ जेरह क जन्म दिहस। इहइ प्रकार यहूदा क पाँच पूत रहेन।
5 पेरेस क पूत हेस्रोन अउ हामूल रहेन।
6 जेरह क पाचँ पूत रहेन। उ पचे जिम्री, एतान हेमान, कलकोल अउ दारा रहेन।
7 जिम्री क पूत कर्मी रहा। कर्मी क पूत आकान रहा। आकान उ मनई रहा जउन इस्राएल मँ बहोत परीसानी लाएस। उ लूट क सामान जउन जुद्ध मँ पाएस रख लिहेस। ओका इ सबहिं चिजियन क परमेस्सर क देइ क रही।
8 एतान क पूत अजर्याह रहा।
9 हेस्रोन क पूत यरहोल राम अउ कालेब रहेन।
राम क सन्तान
10 राम अम्मीनादाब क बाप रहा अउर अम्मीनादाब नहसोन क बाप रहा। नहसोन यहूदा क लोगन क प्रमुख रहा। 11 नहसोन सल्मा क बाप रहा। सल्मा बोअज़ क बाप रहा। 12 बोअज़ ओबेद क बाप रहा। ओबेद यिसै क बाप रहा। 13 यिसै एलीआब क बाप रहा। एलीआब यिसै क पहिला पूत रहा। यिसै क दूसर पूत अबीनादाब रहा। ओकर तीसर पूत सिमा रहा। 14 नतनेल यिसै क चउथा पूत रहा। यिसै क पाँचवा पूत रद्दै रहा। 15 ओसेम यिसै क छठा पूत रहा। अउर दाऊद ओकर सातवाँ पूत रहा। 16 ओनकर बहिनियन सरुयाह अउ अबीगैल रहिन। सरुयाह क तीन पूत अबीसै, योआब अउ असाहेल रहेन। 17 अबीगैल अमासा क महतारी रही। अमासा क बाप येतेर रहा। येतेर इस्माएली लोगन मँ स रहा।
कालेब क सन्तान
18 कालेब हेस्रोन क पूत रहा। कालेब क मेहरारु अजूबा स सन्तानन भइन। अजूबा यरीओत क बिटिया रही। अजूबा क पूत येसेर सोबाब, अउर अर्दोन रहेन। 19 जब अजूबा मरी, कालेब एप्रात स बियाह किहस, कालेब अउ एप्रात क एक पूत रहा। उ पचे ओकर नाउँ हूर रखेन। 20 हूर ऊरी क बाप रहा। ऊरी बसलेल का बापर रहा।
21 जब हेस्रोन साठ बरिस क होइ गवा, उ माकीर क बिटिया क सादी किहस अउर उ सगूब क जन्म दिहस। माकीर गिलाद क पिता रहा। 22 सगूब याईर क बाप रहा। याईर क लगे गिलाद देस मँ तेईस नगरन रहेन। 23 किन्तु गसूर अउ अराम याईर क गाँवन क लइ लिहस। ओनके बीच कनत अउ एकरे चारिहुँ कइँती क नान्ह नगर रहेन। सब मिलाइके साठ नान्ह नगर रहेन। इ सबइ सबहिं नगर गिलाद क बाप माकीर, क पूतन क रहेन।
24 हेस्रोन, एप्राता क कालेब नगर मँ मरा। जब उ मर गवा, ओकर मेहरारु अबिय्याह ओकरे पूत क जन्म दिहस। पूत क नाउँ असहूर रहा। असहूर तको क बाप रहा।
यरहोल क सन्तान
25 यरहोल हेस्रोन क पहिला पूत रहा। यरहोल क पूत राम, बूना, ओरेन, ओसेम, अउ अहिय्याह रहेन। राम यरहोल क पहिला पूत रहा। 26 यरहोल क दूसर मेहरारु अतारा रही। अतारा ओनाम क महतारी रही।
27 यरहोल क पहिला पूत, राम क पूत मास, यामीन अउ एकेर रहेन।
28 ओनाम क पूत सम्मै अउ यादा रहेन। सम्मै क पूत नदाब अउ अबीसूर रहेन।
29 अबीसूर क मेहरारु क नाउँ अबीहैल रहा। ओनकर दुइ पूत रहेन। ओनकर नाउँ अहबान अउर मोलीद रहेन।
30 नादाब क पूत सेलेद अउ अप्पैम रहेन। सेलेद बिना सन्तान मरा।
31 अप्पैम क पूत यिसी रहा। यिसी क पूत सेसान रहा। सेसान क पूत अहलै रहा।
32 यादा सम्मै क भाई रहा। यादा क पूत येतेर अउ योनातान रहेन। येतेर बिना सन्तान मरा।
33 योनातान क पूत पेलेत अउ जाजा रहेन। इ यरहोल क सन्तानन क सूची रही।
34 सेसान क पूत नाहीं रहेन। ओका सिरिप बिटियन रहिन। सेसान क लगे यर्हा नाउँ क एक ठु मिस्री सेवक रहा। 35 सेसान अपनी बिटिया क बियाह यर्हा क संग होइ दिहस। ओनकर एक पूत रहा। ओकर नाउँ अत्तै रहा।
36 अतै, नातान क बाप रहा। नातान जाबाद क बाप रहा। 37 जाबाद एपलाल क बाप रहा। एपलाल ओवेद क बाप रहा। 38 ओबेद येहू क बाप रहा। येहू अजर्याह क बाप रहा। 39 अजर्याह हेलैस क बाप रहा। हेलैस एलासा क बाप रहा। 40 एलासा सिस्मै क बाप रहा। सिस्मै सल्लूम क बाप रहा। 41 सल्लूम यकम्याह क बाप रहा अउ यकम्याह एलीसामा क बाप रहा।
कालेब क परिवार
42 कालेब यरहोल क भाई रहा। कालेब क कछू पूत रहेन। ओकर पहिला पूत मेसा रहा। मेसा जीप क बाप रहा। मारेसा हेब्रोन क बाप रहा।
43 हेब्रोन क पूत कोरह, तप्पूह, रेकेम अउर सेमा रहेन। 44 सेमा, रहम योर्काम क बाप रहा। रहम योर्काम क बाप रहा। रेकेम सम्मै क बाप रहा। 45 सम्मै क पूत माओन रहा। माओन बेत्सूर क बाप रहा।
46 कालेब क रखैल क नाउँ एपा रहा। एपा हारान, मोसा अउर गाजेज़ क महतारी रही। हारान, गाजेज़ क बाप रहा।
47 याहदै क पूत रेगेम, योताम, गेसान, पेलेत, एपा अउर साप रहेन।
48 माका, कालेब क दूसर रखैल रही। माका, सेबेर अउ तिर्हाना क महतारी रही। 49 माका, साप अउ सबा क भी महतारी रही। साप, मदमन्ना क बाप रहा। सबा, मकबेना अउर गिबा क बाप रहा। कालेब क बिटिया अकसा रही।
50 इ कालेब सन्तान न क सूची अहइ: हूर कालेब क पहिला पूत रहा। उ एप्राता क जन्म दिहेस। हूर क पूत सोबाल जउन किर्र्यत्यारीम क संस्थापक रहा, 51 सल्मा, जउन बेतलेहेम क संस्थापक रहा। अउर हारेप बेतगादेर क संस्थापक रहा।
52 सोबाल किर्यत्यारीम क संस्थापक रहा। इ सोबाल क सन्तानन क सूची अहइ: हारोए, मनुहोत क आधे लोग, 53 अउर किर्यत्यारीम क परिवार समूह। इ सबइ यित्री, पूती, सूमाती अउर मिस्राई लोग अहइँ। सोराई अउ एस्ताओली लोग मिस्राई लोगन स निकरेन।
54 इ सल्मा क सन्तानन क सूची अहइ: बेतलेहेम क लोग, नतोपाई, अत्रोत, बेत्योआब, ममाहत क आधे लोग, सोरी लोग, 55 अउर ओन सास्त्रियन क परिवार जउन याबेस, तिराती, सिमाती अउर सूकाती मँ रहत रहेन। इ सबइ सास्त्री, उ सबइ कनानी लोग अहइँ जउन हम्मत स आएन। हम्मत बेतरेकाब क संस्थापक रहा।
नवा करार क महाजायक
8 जउन कछू हम कहत अही कि, ओकर मुख्य बात इ बाः निस्चय ही हमरे लगे एक अइसा महायाजक बा जउन सरगे मँ ओह महा महिमावान क सिंहासन क दहिने हाथ बिराजमान अहइ 2 उ ओह पवित्तर गर्भ गृह मँ यानी स्वर्गिक रावटी, मँ जेका परमेस्सर तउ स्थापित किहे रहा, न कि मनई, सेवा क काम करत ह।
3 हर एक महायाजक क एह बरे नियुक्त कीन्ह जात ह उ भेंटन अउर बलिदानन-दुन्नऊ क ही अर्पित करइ। अउर इही बरे एह महायाजक क बरे भी जरूरी रहा कि ओकरे लगे भी चढ़ावा क बरे कछू होइ। 4 अगर उ धरती प होत तउ उ याजक नाहीं होइ पावत काहेकि उहाँ पहिलेन स ही अइसेन मनई अहइँ जउन व्यवस्था क अनुसार भेंट-चढ़ावत हीं। 5 पवित्तर आराधना स्थान मँ ओनकर सेवा-आराधना सरगे क यथार्थ क एक छाया नकल अहइ। इही बरे जब मूसा पवित्तर रावटी क निर्माण करइवाला रहा, तबइ ओका चेतावनी दइ दीन्ह गइ रहीः “ध्यान रहइ कि तू हर चीज ठीक उही प्रतिरूप क अनुसार बनावा जउन तोहका पर्वत प देखावा गवा रहा।” 6 मुला जउन सेवा काम ईसू क मिला बा, उ ओनके सेवा काम स स्रेस्ठ बा। काहेकि उ जेह करार क मध्यस्थ अहइ उ पुरान करार स भी उत्तिम अहइ अउर उत्तिम चीजन क सबइ प्रतिज्ञा प अधारित बा।
7 काहेकि अगर पहिला करार मँ कउनउ खोट नाहीं होत तउ दुसरे करार क बरे कउनउ स्थान इ नाहीं रही जात। 8 मुला परमेस्सर क ओन्हन लोगन मँ खोट मिला उ कहेसः
“पर्भू घोसित करत ह, आवत अहइ उ समइ करबइ,
जब मइँ इस्राएल क घराना स
यहूदा क घराना स एक नवा करार
9 इ करार होई न वइसेन
जइसेन किहे रहेउँ मइँ ओनके पूर्वजन क साथ
ओह समइ जब मइँ ओनकर हाथ
मिस्र स निकाल लइयावइ बरे पकड़े रहेउँ
काहेकि पर्भू कहत ह, उ मोरे करार मँ बिसवास नाहीं रखत
मइँ ओनसे मुहँ फेर लिहेउँ।
10 इ बा उ करार जेका मइँ इस्राएल क घराना स करबइ।
अउर फिन ओनके बाद पर्भू घोसित करत ह
ओनके मन मँ निज व्यवस्था बसउबइ मइँ
ओनके हिरदय प लिखि देबइ मइँ
ओनका परमेस्सर बनबइ
अउर उ मोर जन होइहीं।
11 फिन तउ कबहुँ कउनो जन अपने पड़ोसी क, अइसेन न सिखावइ या
कउनो जन न अपने भाइयन स कबहुँ कही तू पर्भू क पहचाना।
काहेकि तब त ओ सभन छोट से लइ के बड़न से बड़न मोका जनिहीं तलक।
12 काहेकि मइँ ओनके दुस्ट करमन क छमा करबइ
अउर कबहुँ ओनके पापन क याद न रखबइ।” (A)
13 एह करार क नवा कहिके उ ओनसे पहिले क व्यवहार क अयोग्य ठहरायेस। अउर जउन पुरान पड़त अहइ अउर व्यवहार क अयोग्य अहइ, उ त फिन जल्दी ही लुप्त होइ जाई।
पुराने करार क आराधना
मोआब क सजा
2 यहोवा इ सब कहत ह: “मइँ मोआब क लोगन क एनके जरिये कीन्ह गए अपराधन क जरूर सजा देबउँ। काहेकि मोआब एदोम क राजा क हड़्डियन क बारिके चूना बनाएस। 2 एह बरे मइँ मोआब मँ आगी लगाउब अउर उ आगी करिय्योत क ऊँच किलन क नस्ट करी। हुआँ खउफनाक चिचियाहट अउ तुर्रही क अवाज होइ, अउर मोआब मरि जाइ। 3 एह बरे मइँ मोआब क राजा लोगन क समाप्त कइ देबउँ अउर मोआब क सबहिं प्रमुखन क मारि डाउब।” यहोवा उ सबइ कहेस।
यहूदा क सजा
4 यहूदा इ कहत ह: “मइँ यहूदा क ओकरे जरिये कीन्ह गए अनेक अपराधन बरे जरूर सजा देबउँ। काहेकि उ पचे यहोवा क आदेसन क माइन स इन्कार किहन। उ पचे ओनके आदेसन क नाहीं मानेन। ओनकर पुरखन झूठ पइ बिसवास किहेन अउर ओन लबार बातन यहूदा क लोगन स परमेस्सर क अनुसरण करब छोड़ाएन। 5 एह बरे मइँ यहूदा मँ आगी लगाउब अउर इ आगी यरूसलेम क ऊँच किलन क नस्ट कइ देइ।”
इस्राएल क सजा
6 यहोवा इ कहत ह: “मइँ इस्राएल क ओनके जरिये कीन्ह गए अपराधन बरे सजा जरूर देबउँ। काहेकि उ पचे चाँदी क टूकन बरे नीक अउ भोले-भाले लोगन क दास क रूप मँ बेचेस। उ पचे एक जोड़ी जूता खातिर गरीब लोगन क बेचेन। 7 उ पचे गरीब लोगन क धक्का दइके मुँहे क बले गिराएन अउर उ पचे ओनका कुचरत भए गएन। उ पचे कस्ट भोगन भए लोगन क एक ठु नाहीं सुनेन। पिता लोगन अउ पूतन एक ही जवान मेहरारु क संग तने स संबंध कायम किहेन, उ पचे मोरे पवित्तर नाउँ क अपवित्तर किहेन ह। 8 उ पचे गरीब लोगन क ओढ़नन क लिहन अउ उ पचे ओन पइ गलीचन क तरह तब तलक बइठेन जब तलक उ पचे वेदी पइ पूजा करत रहेन। उ पचे गरिबन क ओनकर ओढ़नन क रेहन रखिके सिक्कन उधार दिहन। उ पचे लोगन क जुर्माना देइ क मजबूर किहन अउर उ जुर्माने क रकम स आपन परमेस्सर क मन्दिर मँ पिअइ बरे दाखरस खरीदेन।
9 “मुला मइँ ही ओनकर पहिले एमोरियन क नस्ट किहे रहेउँ। एमोरी लोग ऊँच बरगदे क बृच्छ क नाई रहेन। उ पचे ओतने सक्तिवाले रहेन जेतने बांज क बृच्छ। मुला मइँ ओनके ऊपरे क फल अउ ओनके खाने क जड़न क नस्ट किहेउँ।
10 “उ मइँ ही रहेउँ जउन तू पचन्क मिस्र देस स निकारिके वाएउँ। चालीस बरिस तलक मइँ तू पचन्क रेगिस्ताने स होइके लाएउँ। मइँ तू पचन्क एमोरियन क भुइँया पइ कब्जा कइ लेइ मँ मदद दिहेउँ। 11 मइँ तू पचन्क कछू पूतन क नबी बनाएउँ। मइँ तोहरे सबन्क नउजवानन मँ स कछू क नाज़ीर बनाएउँ। इस्राएल क लोगो, इ फुरइ अहइ।” यहोवा इ सबइ कहेस। 12 “मुला तू लोग नाज़ीर लोगन क दाखरस पियाया। तू पचे नबियन क भविस्सवानी करइ स रोक्या। 13 तू लोग मोरे बरे भारी बोझा क नाई अहा। मइँ उ गाड़ी क तरह हउँ जउन बहोतइ जियादा अनाजे से लदी होइके कारण निहुरी होइ। 14 कउनो भी मनई बचिके नाहीं निकरि पाइ, हिआँ तलक कि सब स जियादा दौड़इवाला भी। सक्तिवाले मनसेधू भी काफी सक्तिवाला नाहीं रहिहीं। फउजियन आपन क बचाइ नाहीं पइहीं। 15 धनुस अउ बानवाले भी नाहीं बचि पइहीं। तेज दउड़इवाले भी नाहीं बचि पइहीं। घुडसवार भी जिअत पराइ नाहीं पइहीं, 16 उ समइ, बहोतइ बीर जोधा भी नंगे हाथन भाग खड़ा होइहीं। ओनका आपन ओढ़ना तलक पहिरइ तलक क समइ भी नाहीं मिली।” यहोवा इ सबइ कहेस ह।
दाऊद क एक ठु स्तुति गीत।
1 हे मोरे परमेस्सर, हे मोरे राजा, मइँ तोहार गुण गावत हउँ।
मइँ सदा-सदा तोहरे नाउँ क धन्य कहत हउँ।
2 मइँ हर दिन तोहका सराहत हउँ।
मइँ तोहरे नाउँ क सदा-सदा बड़कई करत हउँ।
3 यहोवा महान अहइ।
ओकर बहोत स्तुति होइ चाही।
मइँ उ सबइ चिजियन क पता नाहीं लगाइ सकब जउन उ करत ह।
4 पीढ़ी दर पीढ़ क ओन बातन क गरिमा क बखानइ द्या जेनका तू सदा-सर्वदा करत ह।
अउर ओनका तोहार सक्तिसाली करमन क घोसणा करइ द्या।
5 तोहरे महिमामय प्रताप सुन्नर अहइ।
मइँ तोहरे अचरज भरे करमन क बखानब।
6 लोगन क ओन अचरज भरा सक्ती क बारे मँ कहइ द्या जेनका तू करत ह।
मइँ ओन महान करमन क बखानब जेनका तू करत ह।
7 लोगन क उ बहोत सारी नीक बातन क बारे मँ कहइ द्या जउन तू किहा ह।
उ पचे तोहार सच्चाई क बारे मँ कहिहीं।
8 यहोवा दयालु अहइ अउर करुणा स पूर्ण अहइ,
उ धीरज अउ पिरेम स पूर्ण अहइ।
9 यहोवा सब क बरे भला अहइ।
उ जउन सबइ कछू रचेस ह ओकरे प्रति करुणा प्रगट करत ह।
10 हे यहोवा, ओनका जेका तू रच्या ह तोहार बड़कई करइ द्या।
तोहका तोहार भगत धन्य कहत हीं।
11 उ सबइ लोग तोहरे महिमा स भरा राज्ज क बखान करत रहत हीं।
ओनका तोहरी सक्ति क बारे मँ कहइ द्या।
12 ताकि सबइ मानव जाति ओकरे सक्तिसाली करमन बारे मँ
अउर ओकरे राज्ज क महिमामय प्रताप क बारे मँ जानइँ।
13 हे यहोवा, तोहार राज्ज सदा सदा बना रही।
तू सर्वदा राज्ज करब्या।
14 यहोवा गिरे भए लोगन क उठावत ह।
यहोवा ओन लोगन क उठावत ह जउन बोझन क ढोवत ह।
15 सबहिं प्राणी तोहरी कइँती खाना पावइ बरे लखत हीं।
तू ओनका ठीक समइ पइ खइया क देत रहत ह।
16 तू आपन मूठी खोलत ह,
अउर तू सबहिं प्राणियन क ओकरे जरूरत क चिजियन स संतुट्ठ करत अहा।
17 जउन कछू यहोवा करत ह उ नीक बाटइ।
यहोवा जउन भी करत ओहमाँ निज बिस्ससनीय पिरेम प्रकट करत ह।
18 यहोवा हमेसा ओन लोगन क निचके रहत ह
जउन इमानदारी क संग यहोवा स मदद क बिनती करत ह।
19 यहोवा क भगत जउन ओहसे चाहत हीं, उ ओन बातन क करत ह।
यहोवा आपन भगतन क सुनत ह।
उ ओनकर पराथनन क जवाब देत ह अउर ओनकर रच्छा करत ह।
20 यहोवा ओन सबइ क जउन ओह स पिरेम करत ह, क रच्छा करत ह।
किन्तु उ हर टुट्ठ क नस्ट करत ह।
21 मइँ यहोवा क गुण गाउब।
हर कउनो ओकर पवित्तर नाउँ क सदा अउ सर्वदा स्तुति करइ द्या।
Awadhi Bible: Easy-to-Read Version. Copyright © 2005 Bible League International.