M’Cheyne Bible Reading Plan

1 Gott, dee to feschiedenste Tiede, en enn fael Waeaj, yoare trig to onnse Fodasch jeraet haft derch dee Profeete,

² haft nu enn dise latste Doag to onns jeraet derch sien Saen, daem hee bestemt haft aules to oawe, derch daem hee de Welt jemoakt haft;

³ dee daut Aufglauns es fonn siene Harlichkjeit, en jeneiwet Faeastalinj fonn siene Werkjlichkjeit, dee aules derch sien kjraftjet Wuat drajcht; en aus hee ne Reinjunk fonn Sinde jemoakt haud, sad sikj dol aune rachte Haunt fonne Majestaet em Himel,

⁴ en es so fael hecha jestalt aus dee Enjel aus hee en fael fetraflije Nome je-orwe haft aus dee.

⁵ Dan to woone Enjel saed hee jemols: "Du best mien Saen, fonndoag sie ekj dien Foda jeworde?" en wada: "Ekj woa fa am en Foda senne, en hee saul fa mie en Saen senne?"

⁶ En uk wada, aus hee daen Easchtjebuarne Saen enne Welt enenn brinjt, sajcht hee: "Lot aule Enjel am aunbaede."

⁷ En fonn dee Enjel sajcht hee: "Hee moakt siene Enjel Jeista, en siene Deena to ne Fiaflaum."

⁸ Oba fonn daem Saen: "Dien Troon, Gott, es fa emma en emma, en daut Zepta fonn dien Kjeenichrikj es en Zepta fonn Jerachtichkjeit.

⁹ Du hast Jerachtichkjeit leef jehaut, en Jesatsloosichkjeit hast du jehaust; doaromm haft dien Gott die met Freid-eelj jesaulft, Gott, meeha aus diene Poatna.

¹⁰ En, du Herr, deetst em Aunfank de Ead jrinde, en de Himel bestone derch diene Henj aeara Oabeit;

¹¹ Dee woare fegone, oba du woascht bliewe; dee woare aule soo aus en Auntsuch oolt woare, en so aus en Mauntel woascht du daen opprolle, en dee woare je-endat woare; oba du blifst soo aus du best, en diene Yoare woare nich en Enj habe."

¹³ Oba to woone fonn dee Enjel haft hee jemols jesajcht: "Set hia bie meine rachte Haunt bott ekj diene Fiend die to ne Footbenkj moake woa?"

¹⁴ Sent dee nich aula deenende Jeista dee jeschekjt sent to deene waeajen daen dee boolt Seelichkjeit oawe woare?

Dee 135 Psalm

¹ Pries däm Herr Gott! Preis däm Herr Gott sien Nome, aul jie dee däm Herr Gott deene, enn dee Fäaleew fonn onns Gott sien Hus;

³ Preis däm Herr Gott! Dan dee Herr Gott es Goot! Sinjt Preise to sien Nome, dan daut es foll Freid!

⁴ Dan dee Herr Gott haft Joakopp jewält fa sikj selfst – Iesrael fa sien Schats.

⁵ Dan ekj weet daut dee Herr Gott groot es, un onns Herr es bowe aule Jetta.

⁶ Aules daut dee Herr Gott welle deed to doone, haft Hee jedone enne Himmels un enne Ead, un enn dän See un dee deepe Städe.

⁷ Hee moakt dän Donnst nehejcht to gone fonn daut Enj fonn dee Ead; Hee moakt dän Blitz fa dän Räajen, Hee brinjt dän Wint ut sien Schats Koma;

⁸ Hee schluach dee Iejipte äare Easchtjebuarna, fonn Mensch bott Tiare;

⁹ Dee Teakjens un Wunda schekjt enn diene Med, O Iejipte, opp Farao un aul siene Deena;

¹⁰ dee groote Nazione schluach, un muak majchtje Kjeenije Doot;

¹¹ Sihon dee Amorieta Kjeenijch; un Og dee Baschan Kjeenijch; un aul dee Kanaanieta Kjeenijchs.

¹² Un Hee jeef äa Launt aus en Oafgoot, en Oafgoot to sien Folkj Iesrael.

¹³ O Herr Gott, dien Nome blift eewijch; O Herr Gott, dien Aunjedenkj es fonn Jennerazion to Jennerazion.

¹⁴ Dan dee Herr Gott woat sien Folkj rejchte; un Hee woat Metleet ha opp siene Deene.

¹⁵ Dee Nazione äare Jetta sent Selwa un Golt, dee Mensche äare Oabeit;

¹⁶ Dee ha Miela oba dee saje nuscht; dee ha Uage, oba dee seene nuscht;

¹⁷ dee ha Uare, oba dee kjenne nijch heare; jo, doa es kjeen Odem enn äare Miela.

¹⁸ Soone dee dee moake sent soo aus dee sent, jieda eena dee enn dän fetrühe.

¹⁹ Säajen däm Herr Gott, O Iesrael Jeschlajcht; säajen däm Herr Gott, O Oant Jeschlajcht;

²⁰ säajen däm Herr Gott, O Leefie Jeschlajcht; jie dee jie däm Herr Gott ferjchte, säajent däm Herr Gott.

²¹ Jesäajent es dee Herr Gott ut Zion, dee enn Jerusalem wont, Preis däm Herr Gott!

Dee 136 Psalm

¹ O jäft Dank to däm Herr Gott, dan Hee es goot; dan sien Erboarme es duarhauft fa emma.

² O jäft Dank to däm äwa aule Jetta; dan sien Erboarme es duarhauft fa emma.

³ O jäft Dank to däm Herr äwa aule Herre; dan sien Erboarme es duarhauft fa emma;

⁴ to Däm dee auleen groote Wundasch deit; dan sien Erboarme es duarhauft fa emma;

⁵ to Däm dee derjch Weisheit dee Himmels jemoakt haft; dan sien Erboarme es duarhauft fa emma;

⁶ to Däm dee de Welt utspreede deed opp dee Wotasch; dan sien Erboarme es duarhauft fa emma;

⁷ to Däm dee dee groote Lijchte muak; dan sien Erboarme es duarhauft fa emma;

⁸ dee Sonn to rejeare bie Dach; dan sien Erboarme es duarhauft fa emma;

⁹ dee Mon un dee Stearns to rejeare bie Nacht; dan sien Erboarme es duarhauft fa emma;

¹⁰ to Däm dee Iejipte schluach enn äare Easchtjebuarne; dan sien Erboarme es duarhauft fa emma;

¹¹ un brocht Iesrael rut fonn mank an; dan sien Erboarme es duarhauft fa emma;

¹² met ne stoakje Haunt un en utjestrakjta Oarm; dan sien Erboarme es duarhauft fa emma;

¹³  dee dän Rooda See utaneen deeld enn Poat; dan sien Erboarme es duarhauft fa emma;

¹⁴ un muak Iesrael derjch dee Med gone doafonn; dan sien Erboarme es duarhauft fa emma;

¹⁵ oba scheddad Farao un siene Armee enn dän Rooda See; dan sien Erboarme es duarhauft fa emma;

¹⁶ Dee sien Folkj enn dee Wiltnes leid; dan sien Erboarme es duarhauft fa emma;

¹⁷ to Däm dee groote Kjeenijchs schluach; dan sien Erboarme es duarhauft fa emma;

¹⁸ un muak madastijchkjeit Kjeenije doot; dan sien Erboarme es duarhauft fa emma;

¹⁹ Sihon dee Amorieta Kjeenijch; dan sien Erboarme es duarhauft fa emma;

²⁰ un Og, dee Baschan Kjeenijch; dan sien Erboarme es duarhauft fa emma;

²¹ un jeef äa Launt aus en Oafgoot; dan sien Erboarme es duarhauft fa emma;

²² en Oafgoot to sien Deena Iesrael; dan sien Erboarme es duarhauft fa emma;

²³ Dee aun onns docht enn onns läaja Toostaunt; dan sien Erboarme es duarhauft fa emma;

²⁴ en haft onns jerat fonn onnse Fiend; dan sien Erboarme es duarhauft fa emma;

²⁵ Dee Äte jeef to aulet Fleesch; dan sien Erboarme es duarhauft fa emma;

²⁶ O jäft Dank to däm Gott emm Himmel; dan sien Erboarme es duarhauft fa emma;