M’Cheyne Bible Reading Plan

एलीसा जुवा नबी क येहू क अभिसेक करइ क कहत ह

9 एलीसा नबी नबियन क समूह मँ स एक क बोलाएस। एलीसा इ मनई स कहेस, “तइयार होइ जा अउर अपने हाथे मँ तेल क इ नान्ह बोतल क ल्या। गिलाद क रामोत क जा। ² जब तू हुवाँ पहोंचा तउ निमसी क पौत अर्थात यहोसापात क पूत येहू स मिला। तब अन्दर जा अउर ओकर भाइयन मँ स ओका उठावा। ओका कउनो भीतरी कमराँ मँ लइजा। ³ तेल छोटी बोतल लइ जा अउर येहू क मूँड़ पइ उ तेल क डावा। इ कहा, ‘यहोवा कहत ह: मइँ तोहार अभिसेक इस्राएल क राजा होइ बरे किहेउँ ह।’ तब दरवाजा खोला अउ भाग चला। हुवाँ प्रतीच्छा न करा।”

⁴ एह बरे इ जुवा नबी गिलाद क रामोत गवा। ⁵ जब जुवक नबी हुवाँ पहोंचा, उ फउज क सेनापतियन क बइठे लखेस। जुवक कहेस, “सेनापति, मइँ तोहार क बरे एक सँदेसा लिआएउँ ह।” येहू कहेस, “हम सबहिं हिआँ अही। हम लोगन मँ स केकरे बरे सँदेस अहइ?”

जुवक कहेस, “सेनापति, सँदेस तोहार बरे अहइ।”

⁶ येहू उठा अउर अन्दर गवा। तब जुवा नबी उ तेल क येहू क मँड़ पइ डाइ दिहस। जुवा नबी येहू स कहेस, “इस्राएल क परमेस्सर, यहोवा कहत ह, ‘मइँ यहोवा क लोगन, इस्राएलियन पइ नवा राजा होइ क बरे तोहार अभिसेक करत हउँ? ⁷ तोहका अपने राजा अहाब क परिवार क नस्ट कइ देइ चाही। इ प्रकार मइँ ईजेबेल क अपने सेवकन, नबियन तथा दूसर ओन सबहिं जउन मोर सेवा किहेन जेका उ मार डाएस क मउत क बरे दण्डित करब। ⁸ इ तरह अहब क सारा परिवार मरि जाइ। मइँ अहाब क परिवार क कउनो मर्द क जिअत नाहीं रहइ देब। एकर कउनो महत्व नाहीं होइ कि उ मर्द दास अहइ या स्वतंत्र मनई अहइ। ⁹ मइँ अहाब क परिवार क, नबात पूत क यारोबाम या अहिययाह क पूत बासा क परिवार जइसा कइ देब। ¹⁰ यिज्रैल क छेत्र मँ ईजेबेल क कूकुरन खइहीं। ईजेबेल क दफनावा नाहीं जाइ।’”

तब जुवक नबी दरवाजा खोलेस अउ भाग गवा।

सेवक येहू क राजा घोसित करत हीं

¹¹ येहू अपने राजा क अधिकारियन क लगे लउटा। अधिकारियन मँ स एक येहू स कहेस, “का सब कुसल अहइ? इ पागल मनई तोहरे लगे काहे आवा रहा?”

येहू अपने अधिकारियन क उत्तर दिहस, “तू उ पागल मनई क अउर जउन बातन उ कहत ह, जानत अहा।”

¹² अधिकारियन कहेस, “नाहीं! हमका सच्ची बात बतावा। उ का कहत ह?” येहू अधिकारियन क उ बताएस जउन जुवक नबी कहे रहा। येहू कहेस, “उ कहेस, ‘यहोवा इ कहत ह: मइँ इस्राएल क नवा राजा होइ क बरे तोहार अभिसेक किहेउँ ह।’”

¹³ तब हर एक अधिकारी हाली स आपन चो़गा उतारेन अउर येहू क समन्वा पइड़ियन पइ ओनका धरेन। तब उ पचे तुरही बजाएन अउर इ घोसणा किहन, “येहू राजा अहइ।”

येहू यिज्रैल जात ह

¹⁴ एह बरे येहू, जउन निमसी क पोता अउर यहोसापात क पूत रहा योराम क खिलाफ जोजना बनाएस।

उ समइ योराम अउ इस्राएली, अराम क राजा हजाएल स, गिलाद क रामोत क रच्छा क जतन करत रहेन। ¹⁵ मुला राजा योराम आपन घाव स ठीक होइ बरे यिज्रैल क गवा। अरामियन योराम क तब घायल किहे रहेन जब उ अराम क राजा हजाएल क खिलाफ जुद्ध किहे रहा।

एह बरे येहू अधिकारियन स कहेस, “जदि तू लोग स्वीकार करत अहा कि मइँ नवा राजा हउँ तउ नगर क कउनो मनई क यिज्रैल मँ सूचना देइ बरे बचिके निकरइ न द्या।”

¹⁶ योराम यिज्रैल मँ अराम करत रहा। एह बरे येहू रथ मँ सवार भवा अउर यिज्रैल गवा। यहूदा क राजा अहज्याह भी योराम क लखइ यिज्रैल गवा।

¹⁷ एक ठु रच्छक यिज्रैल मँ रच्छक खम्भा पइ खड़ा रहा। उ येहू क बिसाल दल क आवत लखेस। उ कहेस, “मइँ लोगन क एक ठु बिसाल दल क लखत हउँ।”

योराम कहेस, “कउनो क ओनसे भेंटइ घोड़ा पइ पठवा। इ मनई स इ कहइ बरे कहा, ‘का आप सान्ति क इच्छा स आए अहइँ?’”

¹⁸ एह बरे एक सँदेसवाहक येहू स मिलइ बरे घोड़ा पइ सवार होइके गवा। सँदेसवाहक कहेस, “राजा योराम पूछत हीं, ‘का तू सान्ति स आए अहइँ?’”

येहू कहेस, “तोहका सान्ति स कछू लेब-देब नाहीं। आवा अउ मोरे पाछे चला।”

रच्छक योराम स कहेस, “उ दल क लगे सँदेसवाहक गवा, किन्तु उ अब तलक लउटिके नाहीं आवा।”

¹⁹ तब योराम एक दूसरे मनई क घोड़ा पइ पठएस। उ मनई येहू क दल क लगे आवा अउर उ कहेस, “राजा योराम कहत हीं, ‘सान्ति।’”

येहू जवाब दिहस, “तोहका सान्ति स कछू भी लेब-देब नाहीं। आवा अउर मोरे पाछे चला।”

²⁰ रच्छक योराम स कहेस, “दूसर मनई उ दल क लगे गवा, किन्तु उ अबहिं लउटिके नाहीं आवा। रथचालक रथे क निमसी पोता येहू क तरह चलावत बाटइ। उ पागलन जइसा चलावत अहइ।”

²¹ योराम कहेस, “मोरे रथे क तइयार करा।”

एह बरे सेवक योराम क रथे क तइयार किहन। इस्राएल क राजा योराम अउ यहूदा क राजा अहज्याह निकर गएन। हर एक राजा अपने-अपने रथे स येहू स मिलइ गएन। उ पचे येहू स यिज्रैली नाबोत क भुइँया पइ भेंटन।

²² योराम येहू क लखेस अउर ओहसे पूछेस, “येहू का तू सान्ति क इरादे स आए अहा?”

येहू जवाब दिहेस, “जब तलक तोहार महतारी ईज़ेबेल रण्डीबाजी अउर जादू टोना करति रही तब तलक सान्ति नाहीं होइ सकी।”

²³ योराम भाग निकरइ बरे अपने घोड़न क बाग मोड़ेस। योराम अहज्याह स कहेस, “अहज्याह! इ एक ठु चाल अहइ।”

²⁴ किन्तु येहू अपनी पूरी ताकत स अपने धनुस क हींचेस अउर योराम क पीठ मँ बाण चलाइ दिहस। बाण योराम क हिरदइ क बेधत भवा पार होइ गवा। योराम अपने रथे मँ मरि गवा।

²⁵ येहू अपने सारथी बिदकर स कहेस, “योराम क ल्हास क उठावा अउर यिज़्रैली नाबोत क खेत मँ लोकाइ द्या। याद करा, जब हम अउर तू योराम क बाप अहाव क संग चले रहे। तब यहोवा कहे रहा कि एकरे संग अइसा ही होइ। ²⁶ यहोवा कहे रहा, ‘कल मइँ नाबोत अउ ओकरे पूतन क खून लखे रहेउँ। एह बरे मइँ अहाब क इहइ मइदान मँ सजा देब।’ यहोवा अइसा कहे रहा। एह बरे योराम क ल्हास क इहई मइदान मँ लोकाइ द्या जइसा यहोवा कहेस।”

²⁷ यहूदा क राजा अहज्याह इ लखेस, एह बरे उ भाग निकरा। उ बारी क भवन क रास्ते स होइके भागा। येहू ओकर पाछा किहस। येहू कहेस, “अहज्याह क भी ओकरे रथे मँ मार डावा।”

एह बरे येहू क लोग यिबलाम क लगे गूर क जाइ वाली सड़क पइ अहज्याह पइ प्रहार किहस। अहज्याह मगिद्दो तलक भागा, किन्तु हुवाँ उ मर गवा। ²⁸ अहज्याह क सेवक अहज्याह क ल्हास क रथे मँ यरूसलेम लइ गएन। उ पचे अहज्याह क, ओकरी कब्र मँ ओकरे पुरखन क संग दाऊद नगर मँ दफनाएन।

²⁹ अहज्याह इस्राएल पइ योराम क राज्जकाल क गियारहवें बरिस मँ यहूदा क राजा बना रहा।

ईज़ेबेल क भयंकर मउत

³⁰ येहू यिज्रैल गवा अउर ईज़ेबेल क इ खबर मिली। उ अपने क सजाएस अउर अपने बारन क बाँधेस। तब उ खिड़की क सहारे खड़ी भइ अउर बाहेर क लखइ लाग। ³¹ येहू नगर मँ प्रवेस किहस। ईज़ेबेल कहेस, “जिम्री जउन आपन ही सुआमी क मार डाएस, का तू सान्ति मँ आवा ह?”

³² येहू ऊपर खिड़की कइँती लखेस। उ कहेस, “मोरी कइँती कउन अहइ? कउन?”

दुइ या तीन खोजन खिड़की स येहू क लखेन, ³³ येहू ओनसे कहेस, “ईज़ेबेल क खाले लोकावा।”

तब खोजन ईज़ेबेल क खाले लोकाएन। ईज़ेबेल क तनिक खून देवार अउर घोड़न पइ छिटक गवा। घोड़न ईज़ेबेल क तने क कुचरि डाएस। ³⁴ येहू महल मँ घुसा अउर उ खाएस अउर पिएस। तब उ कहेस, “अब इ सरापित मेहरारू क बारे मँ इ करा। ओका दफनाइ द्या काहेकि उ राजा क बिटिया अहइ।”

³⁵ कछू लोग जउन ईज़ेबेल क दफनाए गएन रहेन। ओकरे ल्हास क न पाइ सकेन। उ पचे सिरिफ ओकर खोपड़ी, ओकर गोड़ अउ ओकरे हाथन क हथेलियन पाइ सकेन। ³⁶ एह बरे उ पचे लोग लउटेन अउर उ पचे येहू स कहेन। तब येहू कहेस, “यहोवा अपने सेवक तिसबी एलिय्याह स इ सँदेसा देइ क कहे रहा। एलिय्याह कहे रहा: ‘यिज्रैल क पहँटा मँ ईज़ेबेल क ल्हासे क कूकुर खइहीं। ³⁷ ईज़ेबेल क ल्हास यिज्रैल क पहँटा मँ खेत क गोबर क तरह होइ। लोग ईज़ेबेल क ल्हास क पहिचान नाहीं पइहीं।’”

दासन क बरे बिसेस निर्देस

6 जउन लोग अंधबिसवासी क जुए क नीचे क दास बना अहइँ, ओन्हे अपने स्वामियन क सम्मान क जोग्ग समझइ चाही ताकि परमेस्सर क नाउँ अउर हमरे उपदेसन क निन्दा न होइ। ² अउर अइसेन दासन के भी जेनकर स्वामी बिसवासी हयेन, बस इही बरे कि उ पचे ओनकर धरमभाई अहइँ, ओनके बरे कम सम्मान न देखॉवइ चाही, बल्कि ओनका तउ अपने स्वामियन क अउर अधिक सेवा करइ चाही काहेकि जेनका एकर लाभ मिलत बा, उ पचे बिसवासी अहइँ, जेनसे उ पचे पिरेम करत हीं।

इन बातन क सिखावत रहा अउर एनकर प्रचार करत रहा।

झूठइ उपदेस अउर सच्चइ धन

³ अगर केउ एनमाँ स अलग बात सिखावत ह अउर हमारा पर्भू ईसू मसीह क ओन्हन सदबचनन क नाहीं मानत ह अउर परमेस्सर क सही तरीके स सेवा करे की सिच्छा स सहमत नाहीं होत ह ⁴ तउ उ अहंकार मँ फूला बा अउर कुछ भी नाहीं जानत ह। उ तउ कुतर्क करइ अउर सब्दन क लेइके झगड़इ क रोग स घिरा बाटइ। इन बातन स त ईर्सा, बैर, निन्दा-भाव अउर गाली-गलौज ⁵ अउर ओन लोगन क बीच जेकर बुद्धि बिगड़ गइ बा, कबहुँ न खत्म होइवाला मतभेद पैदा होत ह अउर भ्रष्ट दिमाग क अहइ, जउन सत्य क खोइ चुका अहइ। अइसेन लोगन क बिचार बा कि परमेस्सर क सेवा धन कमाइ क ही एक साधन अहइ।

⁶ निस्चय ही परमेस्सर क सेवा-भक्ति स ही आदमी बहुत सम्पन्न बनत ह। पर ई ओन्हीं क बरे सत्य बा जउन ओसे संतुस्ट होइ जात ह, जउन ओका मिलत ह। ⁷ काहेकि हम संसारे मँ न तउ कछू लइके आइ रहे अउर न ही इहाँ स कछु लइके जाइ पाउब। ⁸ तउन अगर हमरे लगे रोटी अउर कपड़ा बा त हम उही मँ सन्तुस्ट हई। ⁹ मुला जउन धनवान बनइ चाहत हीं, जे प्रलोभन मँ पड़िके जाल मँ फँसि जात हीं ओनका अइसेन ढेर मूर्खपना अउर बिनास करइवाली इच्छन घेरि लेत हीं जउन ओनकर पतन अउर बिनास होय जात ह। ¹⁰ काहेकि धन क पिरेम सब तरह क बुराइ क जनम देत ह। कछू लोग आपन इच्छन क कारण ही बिसवास स भटकि गवा हयेन अउर अपने क पीड़ित कइके कस्टमय समस्याआ का झेलत बाटेन।

याद रखइ जोग्ग बातन

¹¹ मुला हे परमेस्सर क लोग, तू इन बातन स दूर रहा अउर नेकी, परमेस्सर क सेवा, बिसवास, पिरेम धीरझ, अउर सज्जनता मँ लगा रहा। ¹² हमार बिसवास जउन उत्तिम स्पर्धा क अपेच्छा करत ह, तू उही क बरे संघर्ष करत रहा अउर अपने बरे अनन्त जीवन क अर्जित कइ ल्या। तोहका उही क बरे बोलावा गवा अहा। तू बहुत स लोगन क सामने उस परम सत्य का (ईसू मसीह का) बहुत अच्छे तरह स अंगीकार किहे अहा। ¹³ परमेस्सर क सामने, जउन सब क जीवन देत ह अउर ईसू मसीह क सामने जे पुन्तियुस पिलातुस क सामने बहुत अच्छी साच्छी दिहे रहा, मइँ तोहका इ हुकुम देत हउँ कि ¹⁴ जब तलक हमार पर्भू ईसू मसीह परगट होत ह, जब तलक तोहे जउन हुकुम दीन्ह गवा बा, तू उही पर बिना कउनउ कबहुँ छोड़े निर्दोस भाव स चलत रहा। ¹⁵ उ ओह पइ धन्य, एक छत्र, राजा लोगन क राजा अउर सम्राटन क पर्भू क उचित समइ आए पइ घटित करी। ¹⁶ उ अगम प्रकास क निवासी अहइ। ओका न केउ देखे बा, न केउ देखि सकत ह। ओकर सम्मान अउर ओकर अनन्त सक्ति क बिस्तार होत रहइ। आमीन।

¹⁷ वर्तमान युग क चीजन क कारण जउन लोग अमीर बने भए अहइँ, ओन्हे आज्ञा द्या कि उ पचे अभिमान न करइँ। अउर ओह धने स जउन जल्दी चला आई कउनउ आसा न रखइँ। परमेस्सर पर ही आपन आसा टिकावइँ जउन हमका हमार आनन्द क बरे सब कछू भरपूर देत ह। ¹⁸ ओनका आज्ञा देइँ कि उ पचे अच्छा अच्छा काम करइँ। अच्छा कामन स ही धनी बनइँ। उदार रहइँ अउर दूसरन क साथे आपन चीजे बाँटइँ। ¹⁹ अइसेन करई स ही उ पचे एक सरगे क खजाना क संयच करिहीं जउन भविस्य क बरे मजबूत नींव सिद्ध होई। इहीं स उ सच्चा जीवन क थामे रइहीं।

²⁰ तीमुथियुस! तोहे जउन सँउपा गवा बा, तू ओकर रच्छा करा। बेकार क संसारी बातन स बचा रहा। अउर जउन “झूठा गियान” स सम्बन्धित बेकार क विरोधी बिसवासी हयेन, ओनसे दूर रहा काहेकि ²¹ कछू लोग यह दावा करत हीं कि वे इसे “गियान” क जानत अहा, पर उ वास्तव मँ बिसवासे स दूर चला जात हीं।

परमेस्सर क अनुग्रह तोहरे साथे रहई।

होसे क जरिये यहोवा परमेस्सर क सन्देस

1 इ यहोवा क उ सन्देस अहइ, जउन बेरी क पूत होसे क जरिये मिला रहा। इ सन्देस उ समइ आवा रहा जब यहूदा मँ उज्जियाह, योताम, आहाज अउ हिजकिय्याह क राज्ज रहा। इ ओन दिनन क बात अहइ जब इस्राएल क राजा योआस क पूत यारोबाम क समइ रहा।

² होसे बरे इ यहोवा क पहिला सन्देस रहा। यहोवा कहेस, “जा, अउर एक रण्डी स बियाह कइ ल्या जउन आपन रण्डीबाजी स संतान रखेस ह। काहेकि इ देस क लोग रण्डी क तरह बेउहार करत अहइँ। उ पचे यहोवा बरे अबिस्सासी रहेन ह।”

यिज्रेल क जनम

³ तउ होसे दिबलैम क बिटिया गोमेर स बियाह कइ लिहस। गोमेर गर्भवती भइ अउर उ होसे बरे एक ठु पूत क जनम दिहस। ⁴ यहोवा होसे स कहेस, “एकर नाउँ यिज्रेल राखा। काहे? काहेकि मइँ हाली ही यिज्रेल घाटी मँ कीन्ह गइन हत्या बरे येहू क परिवार क सजा देब फिन एकरे पाछे इस्राएल क बंस क राज्ज क खतम कइ देबउँ। ⁵ उहइ समइ यिज्रेल घाटी मँ, मइँ इस्राएल क धनुस क तोड़ देब।”

लोरुहामा क जनम

⁶ एकरे पाछे गोमेर फुन गर्भवती भइ अउर एक ठु कन्या क जन्म दिहस। यहोवा होसे स कहेस, “इ कन्या क नाउँ लोरुहामा राखा। काहेकि मइँ अब इस्राएल क लोगन पइ अउर जियादा दाया नाहीं देखाउब। मइँ ओनका छिमा नाहीं करब। ⁷ मुला मइँ तउ यहोवा क राज्ज पइ दाया देखाउब। मइँ यहूदा क लोगन क रच्छा करब। मुला ओकरी रच्छा बरे मइँ न तउ धनुस अउर तरवार क प्रयोग करब अउर न ही जुद्ध क घोड़न अउर फउजियन क। मइँ, यहोवा, खुद आपन सक्ती स ओनका बचाउब।”

लोअम्मी क जनम

⁸ गोमेर अबहीं लोरुहामा क दूध पिआउब तजे ही रही कि उ फुन गर्भवती होइ गइ। तउ उ एक ठु पूत क जनम दिहस। ⁹ एकरे पाछे यहोवा कहेस, “एकर नाउँ लोअम्मी धरा। काहेकि तू पचे मोर प्रजा नाहीं अहा अउर मइँ तोहार परमेस्सर नाहीं अहउँ।”

परमेस्सर यहोवा क बचन: इस्राएली बेगिनती क होइहीं

¹⁰ “तउ पइ भी, भविस्स मँ, इस्राएल मँ अनगिनत लोग होइहीं जइसा सागरे क रेत क कन जउन न तउ नापी जाइ सकत ह अउर न ही जेकर गनती कीन्ह जाइ सकत ह। अउर उहइ जगह पइ जहाँ ओनसे इ कहा ग रहा, ‘तू पचे मोर लोग नाहीं अहा।’ उ पचन्क कहा जाईहीं, ‘तू पचे जिअत परमेस्सर क संतान अहा।’

¹¹ “तउ फुन यहूदा अउ इस्राएल क लोग एक संग ऍकट्ठा होइ जइहीं। उ पचे आपन खातिर एक सासक क चुनाव करिहीं अउर ओकरे लगे आपन पहँटा होइहीं। यिज़्रेल क दिन असल मँ एक महान दिन होइ।”

योध

काफ़

लामेध