◀ All Reading Plans / M’Cheyne Bible Reading Plan / Family: 1 Kings 11; Philippians 2. Secret: Ezekiel 41; Psalms 92–93. (Awadhi Bible: Easy-to-Read Version)

Prev Day

October 8, 2025

Next Day

Use the calendar to view readings from this devotional.

October 2025
Su	Mo	Tu	We	Th	Fr	Sa
			1	2	3	4
5	6	7	8	9	10	11
12	13	14	15	16	17	18
19	20	21	22	23	24	25
26	27	28	29	30	31

Return to today's reading

M’Cheyne Bible Reading Plan

The classic M'Cheyne plan--read the Old Testament, New Testament, and Psalms or Gospels every day.

Duration: 365 days

1 राजा 11

सुलैमान अउ ओकर बहोत स मेहररुअन

11 राजा सुलैमान बहोत सारे गैर इस्राएली मेहररूअन स पिरेम किहे रहा। एनमाँ फिरौन क बिटिया, हित्ति, मोआबी, अम्मोनी, एदोमी अउर सीदोनी मेहररुअन रहिन। ²बीते समइ मँ यहोवा इस्राएल क लोगन स कहे रहा, “तोहका दूसर रास्ट्रन क मेहररुअन स बियाह नाहीं करइ चाही। जदि तू अइसा करब्या तउ उ सबइ लोग तोहार हिरदय क आपन देवतन क अनुसरण करइ बरे फिराइ लेइ।” किन्तु सुलैमान ओन मेहररुअन क पिरेम पासा मँ पड़ा। ³सुलैमान क सात सौ पत्नियन रहिन। (इ सबइ राजकुमारी रहिन।) ओकरे पास तीन सौ दासियन भी रहिन, जउन ओकर रखैल रहिन। ओकरी पत्नियन ओकरे हिरदय क परमेस्सर स दूर हटाइ दिहेन। ⁴जब सुलैमान बुढ़वा भवा तउ ओकर पत्नियन ओहसे दूसर देवतन क अनुसरण करइ बरे मज़बूर किहेन। सुलैमान पूरी हिरदय स यहोवा क अनुसरण नाहीं किहेस जउने तरह ओकर बाप दाऊद किहे रहा। ⁵सुलैमान सीदोन क देवी, असतोरेत क पूजा किहस। उ अम्मोनियन क भयानक देवमूरति, मिलकोम क भी पूजा किहेन। ⁶इ तरह सुलैमान यहोवा क बरे अपराध किहस। सुलैमान यहोवा क अनुसरण पूरी तरह उहइ प्रकार नाहीं किहस जउने प्रकार ओकर बाप दाऊद किहे रहा।

⁷सुलैमान कमोस क पूजा बरे ऊँच ठउर बनाएस। कमोस मोआबी लोगन क भयानक देवमूरति रही। सुलैमान कामोस क ऊँच ठउर क यरूसलेम क अगली पहाड़ी पइ बनवाएस। सुलैमान उहइ पहाड़ी पइ मोलेक क ऊँच ठउर भी बनाएस। मोलेक अम्मोनी लोगन क भयानक देवमूरति रही। ⁸तब सुलैमान दूसर देसन क अपनी सबहिं मेहररुअन क बरे उहइ किहस। ओकर मेहररुअन सुगन्धि बारत रहिन अउर अपने देवतन क बलि भेंट करत रहिन।

⁹सुलैमान यहोवा, इस्राएल क परमेस्सर क अनुसरण करइ स दूर हट गवा। ओकरे पाछे यहोवा सुलैमान क लगे दुइ दाई प्रगट भवा रहा। एह बरे यहोवा सुलैमान पइ कोहाइ गवा। ¹⁰यहोवा सुलैमान स कहेस कि तोहका दूसर देवतन क अनुसरण नाहीं करइ चाही। किन्तु सुलैमान यहोवा क आदेस क पालन नाहीं किहस। ¹¹एह बरे यहोवा सुलैमान स कहेस, “तू मोरे सँग कीन्ह गइ आपन करार क तोड़ब पसन्द किहा ह। तू मोरे आदेसन क पालन नाहीं किहा ह। एह बरे मइँ प्रतिग्या करत हउँ कि मइँ तोहसे तोहार राज्ज लइ लेब। मइँ प्रतिग्या करत हउँ कि मइँ तोहसे तोहार राज्ज धोर लेब। मइँ एका तोहरे सेवकन मँ स एक क देब। ¹²मुला मइँ तोहरे बाप दाऊद स पिरेम करत रहेउँ। एह बरे जब तलक तू जिअत अहा तब तलक मइँ तोहार राज्ज नाहीं लेब। मइँ तब तलक प्रतीच्छा करब जब तलक तोहार पूत राजा नाहीं बन जात। तब मइँ ओहसे एका लेब। ¹³तउ भी मइँ तोहरे पूत स सारा राज्ज नाहीं लेब। मइँ ओका एक परिवार समूह पइ हुकूमत करइ देब। इ मइँ दाऊद बरे करब। उ एक ठु नीक सेवक रहा। अउर इ मइँ अपने चुने भए नगर यरूसलेम बरे भी करब।”

सुलैमान क दुस्मन

¹⁴उ समइ यहोवा एदोमी हदद क सुलैमान क दुस्मन बनाएस। हदद एदोम क राजा परिवार क रहा। ¹⁵इ इ तरह घटित भवा। कुछ समइ पहिले दाऊद एदोम क हराएस। योआब दाऊद क सेना क सेनापति रहा। योआब एदोम मँ मरे मनइयन क दफनावइ गवा। तब योआब हुवाँ जिअत सबहिं मनइयन क मार डाएस। ¹⁶योआब अउ सारे इस्राएली एदोम मँ छ: महीने तलक ठहरेन। उ समइ क बीच उ पचे एदोम क सबहिं मनईयन क मार डाएन। ¹⁷मुला उ समइ हदोद अबहिं एक ठु किसोर ही रहा। एह बरे हदद मिस्र क पराइ निकरा। ओकरे बाप क कछू सेवक ओकरे संग गएन। ¹⁸उ पचे मिद्यान क तजेन अउर उ पचे परान क गएन। हुवाँ दूसर लोग भी ओकरे संग सामिल भएन। अउर पूरा समूह मिस्र गएन। उ पचे मिस्र क राजा फिरौन क लगे गएन अउर ओहसे मदद माँगेन। फिरौन हदद क एक ठु घर अउर कछू भुइँया दिहस। फिरौन ओका मदद भी दिहस अउर ओका खाइ क बरे भोजन भी दिहस।

¹⁹फिरौन हदद क बहोत पसन्द किहस यह बरे उ ओका एक ठु पत्नी भी दिहस। मेहरारु फिरौन क पत्नी तहपनेस क बहिन रहिन। ²⁰एह बरे तहपनेस क बहिन हदद स बीही गइ। ओकर एक ठु पूत गनूबत नाउँ क भवा। रानी तहपनेस गनूबत क अपने बच्चन क संग फिरौन क महल मँ बड़ा होइ दिहस।

²¹मिस्र मँ हदद सुनेस कि दाऊद मर गवा। उ इ भी सुनेस कि सेनापित योआब मर गवा। एह बरे हदद फिरौन स कहेस, “मोका अपने देस मँ अपने घर वापस लउट जाइ द्या।”

²²किन्तु फिरौन जवाब दिहेस, “मइ तोहका सारी चीच, जेनकर हिआँ जरुरत अहइ, दीन्ह ह। तू अपने देस मँ वापस काहे जाइ चाहत अहा?”

हदद जवाब दिहेस, “मेहरबानी कइके मोका घरे लउटइ द्या।”

²³यहोवा दूसरे मनई क भी सुलैमान क खिलाफ दुस्मन बनाएस। इ मनई एल्यादा क पूत रजोन रहा। रजोन अपने सुआमी क हिआँ स पराइ गवा रहा। ओकर सुआमी सोबा क राजा हददेजेर रहा। ²⁴दाऊद जब सोबा क सेना क हराइ दिहस तब ओकरे पाछे रजोन कछू मनइयन क बटोरेस अउर एक ठु नान्ह सेना क प्रमुख बन गवा। रजोन दमिस्क गवा अउर हुवइँ ठहरा। रजोन दमिस्क क राजा होइ गवा। ²⁵रजोन अराम पइ हुकूमत करत रहा। रजोन इस्राएल स घिना करत रहा, एह बरे सुलैमान जब तलक जिअत रहा उ पूरे समइ इस्राएल क दुस्मन बना रहा। रजोन अउ हदद इस्राएल बरे बड़की परेसानियन पइदा किहन।

²⁶नबात क पूत यारोबाम सुलैमान क सेवकन मँ स एक रहा। यारोबाम एप्रैम परिवार समूह स रहा। उ सरेदा नगर क रहा। यारोबाम क महतारी क नाउँ सरुयाह रहा। ओकर बाप मर चुका रहा। उ राजा क खिलाफ होइ गवा।

²⁷यारोबाम राजा क खिलाफ कइसे भवा। एकर कहानी इ अहइ। सुलैमान मिल्लो बनावत रहा अउर आपन बाप दाऊद क नगर क देवार क मजबूत करत रहा। ²⁸यारोबाम एक ठु बलवान मनई रहा। सुलैमान लखेस कि इ जवान एक ठु नीक स्रमिक अहइ। एह बरे सुलैमान ओका यूसुफ परिवार समूह क स्रमिकन क अधिकारी बनाइ दिहस। ²⁹एक दिन यारोबाम यरूसलेम क बाहेर जात्रा करत रहा। सीलो क अहिय्याह नबी ओहसे सड़किया पइ मिला। अहिय्याह एक ठु नवा अंगरखा पहिरे रहा। इ दुइनउँ मनई देस मँ अकेले रहेन।

³⁰अहिय्याह आपन नवा अंगरखा लिहस अउर एका बाहर टूकन मँ फार डाएस। ³¹तब अहिय्याह यारोबाम स कहेस, “इ अंगरखा क दस टूकन तू अपने बरे लइ ल्या। यहोवा इस्राएल क परमेस्सर कहत ह, ‘मइँ सुलैमान स राज्ज क छीन लेब अउर मइँ परिवार समूहन मँ स दस क तोहका देब। ³²अउर मइँ दाऊद क परिवार क सिरिफ एक परिवार समूह पइ हुकूमत करइ देब। मइँ ओनका सिरिफ इ समूह क लेइ देब। मइँ इ अपने दाऊद अउ यरूसलेम बरे अइसा करइ देब। यरूसलेम उ नगर अहइ जेका मइँ सारे इस्राएल के परिवार समूह स चुनेउँ ह। ³³मइँ सुलैमान स राज्ज लइ लेब काहेकि उ मोर अनुसरण करब तजि दिहस। उ सीदोनी देवमूरति अस्तोरेत, मोआबी देवता कमोस अउ अम्मोनी देवता मिल्कोम क पूजा करत ह। सुलैमान उ नाहीं करत ह जउन मोरे नजर मँ नीक अहइ। उ मोरे नेमन अउ आदेसन क पालन नाहीं करत। उ उ मारग मँ नाहीं रहत जेह पइ ओकर बाप दाऊद रहत रहा। ³⁴एह बरे मइँ राज्ज क सुलैमान क परिवार स लइ लेब। किन्तु मइँ सुलैमान क ओकरे बाकी जिन्नगी भइ ओनकर सासक रहइ देब। इ मइँ अपने सेवक दाऊद बरे करब। मइँ दाऊद क एह बरे चुने रहेउँ कि उ मोर सबहिं आदेसन व नेमन क पालन करत रहा। ³⁵मुला मइँ ओकरे पूत स राज्ज लइ लेब। अउर मइँ तोहका दस परिवार समूहन पइ हुकूमत करइ क अनुमति देब। ³⁶मइँ सुलैमान क पूत क एक परिवार समूह पइ हुकूमत करत भए रहइ देब। मइँ एका एह बरे करब कि मोर सेवक दाऊद क हुकूमत यरूसलेम मँ मोर समन्वा सदा ही रही। यरूसलेम उ नगर अहइ जेका मइँ आपन निजी नगर चुनेउँ ह। ³⁷मुला मइँ तोहका ओन सबहिं पइ हुकूमत करइ देब जेका तू चाहत अहा। तू पूरे इस्राएल पइ हुकूमत करब्या। ³⁸अगर तू उ करब्या जेका मइँ आदेस दिहेउँ ह अउर तू सच्चाई क संग रहब्या अउर अउर तू मोरे सारे नेमन अउ आदेसन क पालन करब्या जइसा मोर सेवक दाऊद किहे रहा, तउ मइँ तोहरे संग रहब। मइँ तोहरे परिवार क राजा लोगन क परिवार वइसे ही बनाइ देब जइसे मइँ दाऊद क बनाएउँ। मइँ तोहका इस्राएल देब। ³⁹मइँ दाऊद क सन्तानन क ओकर सजा देब जउन सुलैमान किहस। किन्तु मइँ हमेसा क बरे ओनका सजा नाहीं देब।’”

सुलैमान क मउत

⁴⁰सुलैमान यारोबाम क मार डावइ क जतन किहस। मुला यारोबाम मिस्र पराइ गवा। उ मिस्र क राजा सीसक क लगे गवा। यारोबाम हुँवा सुलैमान क मरि तलक रहा।

⁴¹सुलैमान अपने सासन-काल मँ बहोत बड़के अउर बुद्धिमानी स पूर्ण काम किहस। जेनकर विवरण सुलैमान क इतिहास-ग्रन्थ मँ लिखा अहइ। ⁴²सुलैमान यरूसलेम मँ पूरे इस्राएल पइ चालीस बरिस तलक हुकूमत किहस। ⁴³तब सुलैमान मरा अउ अपने पुरखन क संग दफनावा गवा। उ अपने बाप क दाऊद नगर मँ दफनावा गवा, अउर ओकर पूत रहूबियाम ओकरे जगह पइ राजा बना।

फिलिप्पियन 2

एक होइके एक दुसरे क धियान रखा

2 फिन तू लोगन मँ अगर मसीह मँ कउनउ उत्साह बा, पिरेम स पैदा भई कउनउ धीरज बा, अगर आतिमा मँ केउ भागेदारी क, सिहेन क भावना अउर सहानुभूति बा ²तउ मोका पूरी तरह स खुस करा। मइँ चाहत हउँ, तू पचे एक तरह स सोचा, परस्पर एक जइसा पिरेम करा आतिमा मँ एका रखा अउर एक जइसेन लच्छ रखा। ³ईर्सा अउर मिथ्या अभिमान स कछू न करा। बल्कि नरम बना अउर दुसरेउ क आपने स उत्तिम समझा। ⁴तोहमे स हर एक्के चाही कि केवल अपनई नाहीं, बल्कि दुसरेउ क हिते क धियान रखइ।

ईसू स निस्वारथ होइ सीखा

⁵आपन चिंतन ठीक वइसा ही रखा जइसे मसीह ईसू क रहा।

⁶जउन परमेस्सर क सरूप मँ होत भए भी
    उ परमेस्सर क साथे अपने ऍह बराबरी का
    अधिकार की वस्तु न समझेस।
⁷बल्कि उ तउ आपन सब्ब कछू तियागके
    एक सेवक क रूप ग्रहण कइ लिहेस अउर मनई क समान बनि गवा।
अउर जब उ अपने बाहरी रूप मँ मनई जइसेन बनि गवा।
⁸    त उ अपने आप क नवाइ लिहेस अउर परमेस्सर का ऍतना आज्ञाकारी बन गवा कि
    आपन प्राण तक न्योछोवर कइ दिहेस अउर उहउ क्रुस पर।
⁹इही बरे परमेस्सर भी ओका ऊँचा स ऊँचा स्थान पर उठाएस
    अउर ओका उ नाम दिहेस जउन सब नामन स ऊप्पर बा
¹⁰ताकि सब केऊ जब ईसू क नाउँ क उच्चारण होत सुनइ, तउ नीचे निहुरि जाइ।
    चाहे उ सरगे क होइ, धरती पइ क होइ अउर चाहे धरती क नीचे क होइ।
¹¹अउर सब जीभ परमपिता परमेस्सर क
    महिमा बरे मजूर करइ कि “ईसू मसीह ही पर्भू अहइ।”

परमेस्सर क इच्छा क अनुसार बना

¹²एह बरे मोर पिआरे दोस्तो, तू पचे मोरे निर्देशन क जइसेन ओह समइ पालन किहा करत रह्या जब मइँ तू पचन क साथे रहेउँ, अब जब कि मइँ तू पचन क साथे नाहीं हउँ तब तू अउर अधिक लगन स ओकर पालन करा। परमेस्सर बरे पूरा आदर एवं भय क साथे अपने उद्धार क पूरा करइ बरे तू सभे काम करत जा। ¹³काहेकि उ परमेस्सर ही अहइ जउन उ कामना क इच्छा अउर ओन्हे पूरा कररइ क करम, जउन परमेस्सर क भावत ह, तोहमें पइदा करत ह।

¹⁴बिना कउनउ सिकायत या लड़ाई-झगड़ा किहे सब काम करत रहा। ¹⁵ताकि तू भोले-भोले अउर पवित्तर बनि जा। अउर इ कुटिल अउर पथभ्रस्ट पीढ़ी क लोगन क बीच परमेस्सर क निहकलंक बालक बनि जा। ओनके बीच अँधियारी दुनिया मं तू पचे ओह समइ तारा बनिके चमका ¹⁶जब तू ओनका जीवनदायी उपदेस सुनावत ह। तू अइसा ही करत रहा ताकि मसीह क फिन स लउटइ क दिन मइँ इ देखिके कि मोरे जीवन क भाग दौड़ बेकार नाहीं भइ। तू पचन गरब कइ सकी।

¹⁷तोहार सबन क बिसवास परमेस्सर क सेवा मँ एक बलि क रूप मँ बा अउर अगर मोर लहू तोहरे बलि प दाखरस क समान उँड़ेल दीहा भी जाइ तउ मोका खुसी अहइ। तोहरे सबन क खुसी मँ हमरउ सहभाग बा। ¹⁸उही तरह तूहउ खुस रहा अउर मोरे साथे आनन्द मनावा।

तीमुथियुस अउर इपफ्रुदीतुस

¹⁹पर्भू ईसू क सहायता स मोका तीमुथियुस क तू लोगन क लगे जल्दी भेज देइ क आसा बा ताकि तोहरे समाचारन स मोर भी उत्साह बढ़ सकइ। ²⁰काहेकि मोरे पास दुसर कउनउ तीमुथियुस अइसा मनई नाहीं बा जेकर भावना मोरी जइसी होइ अउर जउन तोहरे कल्यान क बरे सच्चे मने स चिंतित होइ। ²¹काहेकि अउर सभन अपने अपने कामन मँ लगा बाटेन। ईसू मसीह क कामन मँ केऊ नाहीं लाग बा। ²²तू पचे ओकरे चरित्र क जानत अहा कि सुसमाचार क प्रचार मँ मोरे साथ उ वइसे ही सेवा क किहे अहइ, जइसे एक बेटवा अपने बापे क साथे करत रहत ह। ²³तउ मोका जइसेन इ पता चली कि मोरे साथे का कछू होइ जात बा। मइँ ओका तू सबन क लगे भेज देइ क आसा रखत अहउँ। ²⁴अउर मोर बिसवास बा कि पर्भु क सहायता स मइँ भी जल्दी ही अउबइ।

²⁵मइँ इ जरूरी समझत हउँ कि इपफ्रुदीतुस क तोहरे लगे पठवउँ, जउन मोर भाई अहइ, अउर साथ ही काम करइवाला बा अउर सहयोगी कर्म-वीर अहइ अउर मोका जरूरत पड़इ पइ मोर सहायता बरे तोहार प्रतिनिधि रहा, ²⁶काहेकि उ तोहे सबन क बरे बियाकुल रहा करत रहा अउर ऍहसे बहुत खिन्न रहा कि तू इ सुने रह्या कि उ बेमार पड़ि गवा रहा। ²⁷हाँ, उ बेमार तउ रहा अउर उहउ ऍतना कि जइसे मरि ही जाई। परन्तु परमेस्सर ओह पर अनुग्रह किहेस (न सिरिफ ओह पइ बल्कि मोपे प भी) ताकि मोका दुखे पर दुख न मिलइ। ²⁸इही बरे मइँ ओक अउर उ लगन स पठवत हउँ ताकि जब तू ओका देखा तउ एक बार फिन खुस होइ जा अउर तोहरे बारे मँ चिन्ता करब छोड़ देउँ। ²⁹इही बरे पर्भू मँ बड़ी खुसी क साथे ओकर सुवागत करा अउर अइसेन लोगन क जियादा स जियादा आदर करत रहा। ³⁰काहेकि मसीह क काम क बरे उ लगभग मरि गवा रहा ताकि तोहरे द्वारा कीन्ह गइ मोर सेवा मँ जउन कमी रही गइ रही, ओका उ पूरा कइ देइ, एकरे बरे उ अपने प्राण क बाजी लगाइ दिहेस।

यहेजकेल 41

मन्दिर क पवित्तर ठउर

41 उ मनई मोका मन्दिर क बीच क कमरा मँ लिआवा। उ कमरा क दुइनउँ कइँती क देवारन क नापेस। उ सबइ मँ स हर एक, हर कइँती छ: हाथ मोटा रहेन। ²दरवाजा दस हाथ चउड़ा रहा। दुआर क बगलन पाँच हाथ हर कइँती रहिन। उ मनई बाहरी पवित्तर ठउरे क नापेस। इ चालीस हाथ लम्बा अउर बीस हाथ चउड़ा रहा।

मन्दिर क परम पवित्तर ठउर

³तब उ मनई अन्दर गवा अउर हर एक दुआर खम्भा क नापेस। हर एक दु आर खम्भा दुइ हाथ मोटा रहा। इ छ: हाथ ऊँचा रहा। दुआर सात हाथ चउड़ा रहा। ⁴तब उ मनई कमरा क लम्बाई नापेस। इ बीस हाथ लम्बा अउर बीस हाथ चउड़ा रहा। इ (प्रथम) परिसुद्ध कमरे क बाद रहा। उ मनई कहेस, “इ परम पवित्तर ठउर अहइ।”

मन्दिर क चारिहुँ कइँती क बाकी कमरें

⁵तब उ मनई मन्दिर क देवार नापेस। इ छ: हाथ चउड़ी रही। बगल क कमरन चार हाथ चउड़न मन्दिर क चारिहुँ कइँती रहेन। ⁶बगल क कमरन तीन अलग-अलग मंजिलन पइ रहेन। उ सबइ एक दूसर क ऊपर रहेन। हर एक मंजिल पइ तीस कमरन रहेन। बगल क कमरन चारिहुँ कइँती क देवार पइ टिके भए रहेन। एह बरे मन्दिर क देवार खुद कमरन क टेकाए भए नाहीं रहिन। ⁷मन्दिर क चारिहुँ ओर क कमरन क मंजिल क खाले क मंजिल स अधिक चउड़ी रहिन। मन्दिर क चारिहुँ ओर ऊँच चबूतरा हर मंजिल पइ मन्दिर क हर एक कइँती फइला भवा रहा। एह बरे सब स ऊपर क मंजिल पइ कमरन अधिक चउड़ा रहेन। दूसर मंजिल स होइके एक सीढ़ी सब स नीचे क मंजिल स सब स ऊँच मंजिल तलक गइ रही।

⁸मइँ इ भी लखेउँ कि मन्दिर क चारिहुँ कइँती उठा भवा चबूतरा रहा। बगल क कमरन क नेंव एक समन्वा छड़ अरर्थात छ: हाथ क पूरे छड़ क रहा। ⁹बगल क कमरन क बाहरी देवार पाँच हाथ मोटी रही। मन्दिर क बगल क कमरन ¹⁰अउर याजक क कमरन क बीच खुला छेत्र मन्दिर क चारिहुँ ओर रहा। इ खुला छेत्र मन्दिर क चारिहुँ कइँती बीस हाथ रहा। ¹¹बगल क कमरन क दरवाजन खुला छेत्र क नेंव पइ खुलत रहेन जउन देवार क हींसा नाहीं रहिन। एक दरवाजा क मुँह उत्तर कइँती रहा अउर दूसर क दक्खिन कइँती। खुला छेत्र चारिहुँ कइँती स पाँच हाथ चउड़ी रहिन।

¹²पच्छिमी कइँती मन्दिर क आँगन क सामने क भवन सत्तर हाथ रहा। भवन क देवार चारिहुँ ओर पाँच हाथ मोटी रही। इ नब्बे हाथ लम्बी रही। ¹³तब उ मनई मन्दिर क नापेस। इ सौ हाथ लम्बा रहा। भवन अउ एकर देवार क संग आँगन भी सौ हाथ लम्बे रहेन। ¹⁴मन्दिर क पूर्वी मुँह अउर आँगन सौ हाथ चउड़ा रहा।

¹⁵उ मनई उ भवन क लम्बाई क नापेस जेकर सामना मन्दिर क पाछे क आँगन कइँती रहा तथा जेकर देवारन दुइनउँ कइँती रहिन। इ सौ हाथ लम्बा रहा।

बीच क कमरे क भीतरी कमरे (सबन त पवित्तर ठउर) ¹⁶अउ आँगन क प्रवेस कच्छ पइ तखता लगी रहिन। तीनहुँ पइ ही चारिहुँ कइँती जालीदार खिड़कियन रहिन। मन्दिर क चारिहूँ कइँती डेवढ़ी स लगे, फर्स स खिड़कियन तलक काठे क तखता जड़ी भइ रहिन। खिड़कियन ढकी भइ रहिन। ¹⁷दुआरे क ऊपर क देवार,

भीतरी कमरन अउर बाहेर तलक, सारी लकड़ी क चौखटन स मढ़ी गइ रहिन। मन्दिर क भीतरी कमरन तथा बाहरी कमरन क सबहिं देवारन पइ ¹⁸करूब सरगदूतन अउर खजूर बृच्छन क नक्कासी कीन्ह गइ रही। करूब सरगदूतन क बीच एक खजूर क बृच्छ रहा। अउर हर एक करूब क दुइ मुख रहेन। ¹⁹एक मुँह मनई क रहा जउन एक कइँती खजूरे क बृच्छ क लखत रहा। दूसर मुँह सेर क रहा जउन दूसर कइँती खजूर क बृच्छक लखत रहा। उ पचे मन्दिर क चारिहुँ कइँती उकेरा ग रहेन। ²⁰बीच क कमरन पवित्तर ठउर क सबहिं देवारन पइ करूब सरगदूत अउर खजूरे क बृच्छ उकेरे ग रहेन।

²¹पवित्तर स्थान क दुआर ज ढाँचा वर्गाकार रहेन। सब स जियादा पवित्तर ठउरे क समन्वा अइसा कछू रहा जउन ²²वेदी क नाई काठे क बना देखात रहा। इ तीन हाथ ऊँच अउर दुइ हाथ लम्बा रहा। एकर कोनन, नेंव अउ पच्छ काठे क रहेन। उ मनई मोहसे कहेस, “इ मेज अहइ जउन यहोवा क समन्वा अहइ।”

²³बीच क कमरा (पवित्तर ठउर) अउर परम पवित्तर ठउर दुइ दरवाजनवाला रहेन। ²⁴एक दरवाजा दुइ नान्ह दरवाजन स बना रहा। हर एक दरवाजा फुरइ दुइ हिलत भए दरवाजन स रहा। ²⁵बीच क कमरन (पवित्तर ठउर) क दरवाजन पइ करूब सरगदूत अउ खजूर क बृच्छ उकेरे ग रहेन। उ सबइ वइसे ही रहेन जइसे देवारन पइ उकेरे गवा रहेन। बाहेर कइँती प्रवेस कच्छ क बाहरी हीसें पइ काठे क नक्कासी रही। ²⁶बाहेर तंग खिड़कियन अउर अन्दर चउड़ी खिड़कियन रहेन। अउर प्रवेस कच्छ क दुइनउँ कइँती, मन्दिर क बगल कमरन अउर देहली पइ खजूर क बृच्छ क तस्बीरन रहेन।

भजन संहिता 92-93

सबित क दिन बरे एक ठु स्तुति गीत।

¹यहोवा क महिमा क स्तुति करइ नीक अहइ।
    हे सर्वोच्च परमेस्सर, तोहरे नाउँ क गुणगान बरे नीक अहइ।
²भोर मँ तोहरे पिरेम क गीत गाउब
    अउ राति मँ तोहरे बिस्सास क गीत गाउब नीक अहइ,
³हे यहोवा तोहरे बरे दस तार वाद्य यंत्रन, सारंगियन
    अउ वीणन पइ संगीत बजाउब नीक बाटइ।
⁴हे यहोवा, तू फुरइ हमका आपन कीन्ह कामन स आनन्दित करत ह।
    हम आनन्द स भरिके ओन गीतन क गाइत ह, जउन काम तू किहा ह।
⁵हे यहोवा, तू महान कारज किहा ह।
    तोहार सोच-बिचार हमरे बरे समुझि पावइ आसान नाहीं अहइँ।
⁶लोग मूरख गोरुअन क जइसे अहइँ।
    मूरख जइसे तोहार सोच-बिचार क नाहीं समुझ पाइत।
⁷दुट्ठ जन घास क नाई पनपत हीं।
    उ पचन्क दुआरा कीन्ह भवा सबइ बेकार अबहीं फलत-फूलत हीं,
    किन्तु सदा-सदा बरे खतम होइ जइहीं।
⁸मुला हे यहोवा, अनन्त काल तलक तोहार आदर रही।

⁹हे यहोवा, तोहार दुस्मनन बर्बाद कइ दीन्ह जइहीं।
    उ सबहिं मनई जउन बुरा काम करत हीं, तितर-बितर कइ दीन्ह जइहीं।
¹⁰मुला तू मोका जंगली बर्धा क नाईं मज़बूत बनाया ह।
    हम बरियार भेड़ा स बन जाब जेकर कर्रे सींग होत हीं तू मोह पइ खास तेल उड़ेर्या ह जउन ठंडापन देत ह।
¹¹मइँ लखेउँ ह कि मोर दुस्मन मोका लखत हीं;
    मइँ सुनेउँ ह कि दुट्ठ लोग मोह पइ हमला करइ बरे तइयार बाटेन।

¹²नीक मनइयन लबानोन क बड़वार देवदार बृच्छ क तरह अहइँ
    जउन यहोवा क मन्दिर मँ रोपा ग अहइँ।
¹³नीक मनइयन बाढ़त भए ताड़ क बृच्छ क नाई अहइँ,
    जउन हमार परमेस्सर क मन्दिर क आँगन मँ फलदार होत अहइँ।
¹⁴उ पचे जब तलक बुढ़वा होइहीं तब तलक उ पचे फल देत रइहीं।
    उ पचे हरे भरे मोटा बृच्छ जइसे होइहीं।
¹⁵उ पचे हर कउनो क इ देखाँवइ बरे हुआँ अहइँ कि यहोवा बिस्सास योग्य अहइ।
    उ मोर चट्टान अहइ।
    ओहमाँ कछू बुराइ नाहीं बाटइ।

¹यहोवा सासन करत ह!
    उ महिमा अउर सक्ति क पहिर लिहस
ताकि धरती स्थिर रहइ
    अउर गिरे नाहीं।
²हे परमेस्सर, तोहार साम्राज्य अनादि काल स टिका भवा अहइ।
    तू सदा जिअत अहा।
³हे यहोवा, नदियन क गर्जन बहोत तीव्र बा।
    ओनकर लहरन क
    नस्ट करइया अहइ।
⁴समुद्र क पछारा खात भइ लहरन गरजत हीं, अउर उ सबइ सक्तिसाली अहइँ।
    मुला ऊपर वाला यहोवा जियादा सक्तिसाली अहइ।
⁵हे यहोवा, तोहार कानून बहोत स्थिर अहइ।
    तोहार पवित्तर मन्दिर लम्बी समई तलक खड़ा रही।

Awadhi Bible: Easy-to-Read Version (ERV-AWA)