M’Cheyne Bible Reading Plan

सुलैमान क महल

7 राजा सुलैमान अपने बरे एक महल भी बनवाएस। सुलैमान क महल क निर्माण क पूरा करइ मँ तेरह बरिस लगेन। ² उ उ इमारत क भी बनाएस जेका, “लबानोन क बन” कहा जात ह। इ सौ हाथ लम्बा, पचास हाथ चौड़ा, अउर तीस हाथ ऊँच रहा। एहमाँ देवदारु क खम्भन क चार कतारन रहिन। हर एक कतारे क सिरे पइ देवदारु क सीर्स रहा। ³ खम्भन क कतारन क आर पार जात भइ देवदारु क सहतीरन रहिन। उ पचे देवदारु क पल्लन क छते क बरे एन सहतीरन पइ धरे रहेन। खम्भन क हर एक विभाग क बरे पन्द्रह सहतीरन रहिन। सब निलाइके पैंतालीस सहतीरन रहिन। ⁴ बगल क हर एक देवारे मँ खिड़कियन क तीन कतारन रहिन। खिड़कियन परस्पर आमने-सामने रहिन। ⁵ हर एक क आखिर मँ तीन दरवाजन रहेन। सबहिं दरवाजन क दुआर अउ चौखटन वर्गाकार रहेन।

⁶ सुलैमान “खम्भन क प्रवेस दुआर मण्डप” भी बनाएस। इ पचास हाथ लम्बा अउ तीस हाथ चौड़ा रहा। प्रवेस दुआर मण्डप क अगला भाग क संग-संग खम्भन पइ टिकी एक ठु छत रही।

⁷ सुलैमान एक ठु सिंहासन कच्छ बनाएस जहाँ उ लोगन क निआउ करत रहा। उ एका “निआव कच्छ” कहत रहा। कच्छ भूइँया स लइके छते तलक देवदारु स मढ़ा रहा।

⁸ जउन भवन मँ सुलैमान रहत रहा, उ निआव महाकच्छ क पाछे दूसर आँगन मँ रहा। इ महल वइसे ही बना रहा जइसा निआव महाकच्छ बना रहा। उ अपनी मेहरारु स जउन मिस्र क राजा क बिटिया रही, क बरे बइसा ही महल बनाएस।

⁹ इ सबहिं इमारतन महंगा पाथर क ठुकन स बनी रहिन। इ सबइ पाथर समुचित आकार मँ आरे स काटे ग रहेन। उ सबइ सामने अउ पाछे कइँती स कटे रहेन। इ सबइ महंगा पाथर नेंव स लइके देवार क ऊपरी तहे तलक लगे रहेन। अँगने क चारिहुँ कइँती क देवार भी महंगा पाथर टूकन स बनी रहिन। ¹⁰ नेव बिसाल महंगा पाथरन स बनी रही। कछू पाथर दस हाथ लम्बे रहेन अउर दूसर बारह फुट लम्बे रहेन। ¹¹ ओन पाथरन क सीर्स पइ दूसर महंगा पाथर अउ देवदारु क सहतीरन रहिन। ¹² महल क आँगन, मन्दिर क आँगन अउ मन्दिर क प्रवेस दुआर मण्डप क चारिहुँ कइँती देवारन रहिन। उ सबइ देवारन पाथर क तीन कतारन अउ देवदारु काठे क एक कतार स बनी रहिन।

¹³ राजा सुलैमान हीराम नाउँ क मनई क लगे सोर मँ सँदेसा पठएस। सुलैमान हीराम क यरूसलेम लिआवा। ¹⁴ हीराम क महतारी नप्ताली परिवार समूह स इस्राएली रही। ओकर मरा बाप सोर क रहा जउन काँसा क काम मँ कुसल रहा। हीराम काँसे स चिजियन बनावत रहा। उ बहोत कुसल अउ अनुभवी कारीगर रहा। एह बरे राजा सुलैमान ओका आवइ बरे कहेस अउर हीराम ओका स्वीकार किहस। एह बरे राजा सुलैमान हीराम क काँसे स निर्मित सबहिं चिजियन क बनाएस।

¹⁵ हीराम काँसा क दुइ खम्भा बनाएस। हर एक खम्भा अठारह हाथ लम्बा अउ बारह हाथ गोलाईवाला रहा। खम्भा खोखले रहेन अउर धातु तीन इन्च मोटी रही। ¹⁶ हीराम दुइ काँसा क सीर्स भी बनाएस जउन पाँच हाथ ऊँचे रहेन। हीराम एन सीर्सन क खम्भन क सिरन पइ रखेस। ¹⁷ तब उ दुइनउँ खम्भन क ऊपर क सीर्सन क ढाँपइ बरे जंजीरन क दुइ जाल बनाएस। ¹⁸ तब उ अलंकरन क दुइ कतारन बनाएस जउन अनार क तरह देखात रहेन। उ पचे एन काँसन क अनारन क हर एक खम्भा क जालन मँ, खम्भन क सिरन क सीर्सन क ढाँपइ बरे रखेस। ¹⁹ पाँच हाथ ऊँच खम्भन क सिरन क सीर्स फूल क आकार क बना रहेन। ²⁰ सीर्स खम्भन क सिरन पइ रहेन। उ सबइ कटोरन क आकार क जाल क ऊपर रहेन। उ ठउरे पइ सीर्सन क चारिहुँ कइँती कतारन मँ दुई सौ अनार रहेन। ²¹ हीराम एन दुइनउँ काँसा क खम्भन क मन्दिर क प्रवेस दुआर पइ खड़ा किहस। दुआर क दक्खिन कइँती एक खम्भा अउ दुआर क उत्तर कइँती दूसर खम्भा खड़ा कीन्ह गवा। दक्खिन क खम्भा क नाउँ याकीन रखा गवा। उत्तर क खम्भा क नाउँ बोआज़ रखा गवा। ²² उ पचे फूल क आकार क सीर्सन क खम्भन क ऊपर रखेन। इ तरह दुइनउँ खम्भन पइ काम पूरा भवा।

²³ तब हीराम काँसा क एक गोल हौज बनाएस। उ पचे इ हउज क “सागर” कहेन। हौज लगभग तीस हाथ गोलाई मँ रहा। इ आर-पार दस हाथ अउर पाँच हाथ गहिर रहा। ²⁴ हौज क बाहरी सिरे पइ एक ठु बारी रही। इ बारी क खाले काँसा क कद्दुअन क दुइ कतारन हौज क घेरे भए रहिन। काँसे क कद्दू हौज क हींसा क रूप मँ एक ठु इकाई मँ बने रहेन। ²⁵ हौज बारह काँसे क बर्धन क पीठन पइ टिका रहा। इ सबइ बारँहु बर्धा तालाब स दूर बाहेर क लखत रहेन। तीन ठु उत्तर कइँती, तीन दक्खिन क अउ तीन पच्छिम कइँती लखत रहेन। ²⁶ हौज क देवारन तीन इन्च मोट रहिन। तालाब क चारिहुँ कइँती क किनारी एक पयाले क किनारी या फूल क पुंखड़ियन क तरह रहिन। तालाब क छमता लगभग गियारह हजार पाँस सौ गैलन रही।

²⁷ तब हीराम दस काँसे क गाड़ियन बनाएस। हर एक चार हाथ लम्बी, चार हाथ चौड़ी अउ पाँच हाथ ऊँच रही। ²⁸ गाड़ियन वर्गाकार पल्लन क चउखटन मँ मढ़िके बनाई गइ रहिन। ²⁹ पल्लन अउ चउखटन पइ काँसे क सिंह, बर्धा अउ करूब सरगदूत रहेन। सिंह अउ बर्धन क ऊपर अउ खाले फूलन क कलाकारी हथौड़ा स पीट-पीट के काँसे मँ बनावा ग रहेन। ³⁰ हर एक गाड़ी मँ चार काँसे क पहियन काँसे क धुरी क संग रहेन। कोनन पइ काँसे क टेकन बिसाल कटोरा बरे बने रहेन। टेकन पइ हथौड़न स पीट-पीट के फूलन क कलाकारी काँसे मँ बनावा ग रहेन। ³¹ कटोरा बरे ऊपरी सिरे पइ एक ढाँचा बना रहा। इ कटोरन स ऊपर स एक हाथ ऊँच रहा। कटोरा क खुल भवा गोल हींसा डेढ़ हाथ व्यास वाला रहा। काँसे क ढाँचे पइ जउन कलाकारी खोदा गए रहेन इ चौकोर रहेन, गोल नाहीं। ³² ढाँचा क खाले चार पहियन रहेन पहिये डेढ़ हाथ व्यासवाले रहेन। पहिये क बीच धुरे गाड़ी क संग एक इकाई क रूप मँ बने रहेन। ³³ पहियन रथे क पहियन क नाईं रहेन। पहियन क हर एक चीज-धुरे, परिधि, तीलियन अउ नाभी काँसे क बनी रही।

³⁴ हर एक गाड़ी क चारिहुँ कोनन पइ चार आधार रहेन। उ सबइ गाड़ी क संग एक इकाई क रुप मँ बने रहेन। ³⁵ हर एक गाड़ी क ऊपरी सिरे क चारिहुँ कइँती एक काँसा क आधा हाथ गहिरा पट्टी रही। टेकन अउर पटरियन एक इकाई मँ बन के गाड़ी क साथ जुड़े रहेन। ³⁶ इ गाड़ी बगल अउ ढाँचे पइ करूब सरगदूतन, सिंहन अउ ताड़ क बृच्छन क चित्र काँसा मँ गाड़ी क बगल अउर ढाँचे पइ खोदे गए रहेन। इ सबइ चित्र गाड़ियन पइ जहाँ भी जगह रही, उकेरे गए रहेन अउर गाड़ी क चारिहुँ कइँती क ढाँचे पइ फूल उकेरे गए रहेन। ³⁷ हीराम दस गाड़ियन बनाएस अउर उ सबइ सबहिं एक जइसी रहिन। हर एक गाड़ी काँसा क बनी रही। काँसा क गलावा गवा रहा अउर साँचा मँ ढाला गवा रहा। एह बरे सबहिं गाड़ियन एक ही आकार अउर एक ही रूप क रहिन।

³⁸ हीराम दस कटोरन भी बनाएस। एक कटोरा दस गाड़ियन मँ स हर एक बरे रहा। हर एक कटोरा चार हाथ व्यास वाला रहा अउर हर एक कटोरे मँ दुइ सौ तीस गैलन आइ सकत रहा। ³⁹ हीराम पाँच गाड़ियन क मन्दिर क दक्खिन अउ दूसर पाँच गाड़ियन क मन्दिर क उत्तर मँ धरेस। उ बिसाल तालाब क मन्दिर क दक्खिन पूर्व कोने मँ धरेस। ^40-45 हीराम बर्तन, नान्ह बेलचन अउ नान्ह कटोरन भी बनाएस। हीराम ओन सारी चिजियन क बनाउब पूरा किहस जेनका राजा सुलैमान ओहसे बनावावइ चाहत रहा। हीराम यहोवा क मन्दिर बरे जउन कछू बनाएस ओकर सूची इ अहइ:

हीराम उ सबहिं चिजियन बनाइन जेनका राजा सुलैमान चाहत रहा। उ सबइ सबहिं झलकाए भए काँसा स बनी रहिन। ^46-47 सुलैमान उ काँसे क कबहुँ नाहीं तौलेस जेकर उपयोग एन चिजियन क बनावइ बरे भवा रहा। उ ऍतना जियादा रहा कि एकर तउलब संभव नाहीं रहा। एह बरे सारे काँसे क तौल क कुल योग कबहुँ मालूम नाहीं भवा। राजा ऍन चिजियन क सुक्कोत अउ सारतान क बीच यरदन नदी क निचके बनावइ क आदेस दिहस। उ पचे ऍन चिजियन क, काँसा क गलाइके अउर जमीन मँ बने साँचन मँ ढालिके, बनाएस।

^48-50 सुलैमान इ भी आदेस दिहस कि मन्दिर बरे सोने क बहोत स चिजियन बनाई जाइँ। सुलैमान मन्दिर बरे सोना स जउन चिजियन बनाएस, उ सबइ इ अहइँ।

⁵¹ इ तरह सुलैमान, यहोवा क मन्दिर बरे जउन काम उ करइ चाहत रहा, पूरा किहस। तब सुलैमान उ सबइ सबहिं चिजियन लिहस जेनका ओकर पिता दाऊद इ उद्देस्य क बरे सुरच्छित रखे रहिन। उ एन चिजियन क मन्दिर मँ लिआवा। उ चाँदी अउ सोना यहोवा क मन्दिर क खजानन मँ धरेस।

एक देह

4 तउन मइँ, जउन पर्भू क होई कारण बन्दी बना भवा हउँ। तू लोगन स पराथना करत हउँ कि तू सबन क आपन जीवन वइसे ही जिअइ चाही जइसे न कि सन्तन क अनुकूल होत ह। ² हमेसा नम्रता अउर कोमलता क साथे, धीरज क साथ आचरण। अउर एक दूसरे क पिरेम स कहत रहा। ³ उ सान्ति, जउन तू पचन क आपस मँ बाँधत ह, ओसे उत्पन्न आतिमा क एकता क बनाए रखइ क बरे हर तरह क यत्न करत रहा। ⁴ देह एक बा अउर पवित्तर आतिमा भी एक्कइ बा। अइसेन ही जब तोहे बोलॉवा गवा त एक्कई आसा मँ भगीदार होइ क बरे ही बोलावा गवा। ⁵ एक्कइ परमेस्सर बा, एक्कइ बिसवास बा अउर बा एक्कइ बपतिस्मा। ⁶ परमेस्सर जउन सबका परमपिता अहइ एक्कइ बा। उहइ सब कछू क स्वामी बा, हर कउनो क द्वारा उहइ क्रियासील बा, अउर हर मँ उहइ समावा बाटई।

⁷ ईसू हममें स हर कउनो क एक विशेष उपहार दिहे अहइ। हर मनई उहइ पाएस जेका ईसू ओका देइ चाहत रहा। ⁸ इही बरे सास्त्रन कहत हीं:

⁹ अब देखा। जब उ कहत ह “ऊँचे चढ़ा” तउ एकर अर्थ एकरे अलावा का बा? कि उ धरती क नीचे हींसा पर उतरा रहा। ¹⁰ जउन नीचे उतरा रहा, उ उहइ अहइ जउन ऊँचे पइ चढ़ा रह ऍतना ऊँचा कि सभन अकासन स उप्पर ताकि उ सब कउनो क आपन संग सम्मूर्ण कइ देइ। ¹¹ उ लोगन क कछू प्रेरितन होइ क वरदान दिहेस तउ कछू क नबियन होई क तउ कछू क सुसमाचार क प्रचारक होइके तउ कछू क परमेस्सर क जनन क रच्छक गड़ेरिया अउर सिच्छा क। ¹² मसीह तउ ओन्हे इ बरदान परमेस्सर क पवित्तर लोगन क सेवा काम क बरे तइयार करइ दिहेस ताकि हम जउन मसीह क देह अही, आतिमा मँ अउर दृढ़ होइ। ¹³ जब तलक कि हम सभन मँ बिसवास मँ अउर परमेस्सर क बेटवा क गियान मँ एकाकार होई क परिपक्क मनई बनई क बरे विकास करत-करत मसीह क पूरा गौरव क ऊँचाई अउर परिपक्कता क न छुइ लेई।

¹⁴ ताकि हम अइसेन गदेलन न बना रहीं जउन हर कउनो क अइसेन नई सिच्छा क हवा स उछली जाई। हम पचे उ जहाजे क तरह मनइयन न बना रही जउन लहर स एक कइँती स दूसरी कइँती चला जात हीं। जउन हमरे रस्ता मँ बहत ह, लोगन क दल स भरा व्यवहार स, अइसेन धूर्तता स, जउन ठगन स भरी सब योजना क प्रेरित करत रही, एहर-ओहर भटकाई दीन्ह जात हीं। ¹⁵ बल्कि हम पिरेम क साथे सच बोलत हर तरह स मसीह क जइसेन बनई क बरे विकास करत जाई। मसीह मस्तक बा अउर हम पचे ओकर देह अही। ¹⁶ जेह पर सबहिं देह निर्भर करत ह। इ देह^[a] सबहिं का ओसे जोड़त ह। हर एक सहायक नस स संयुक्त होत ह अउर जब एकर हर अंग जउन काम ओका करई चाहइ, ओका पूरा करत ह। तउ पिरेम क साथे समूची देह क विकास होत ह अउर इ देह खुद मजबूत होत ह।

अइसन जिआ

¹⁷ मइँ इही बरे इ कहत हउँ अउर पर्भू क साच्छी कइके तोहे चेतावनी देत हउँ कि ओन व्यर्थ क विचारन क साथे अधर्मियन क जइसेन जीवन जीअत रहा। ¹⁸ ओनकर बुद्धि अंधकार स भरी बा। उ परमेस्सर स मिलइ वाले जीवन स पूर अहई। काहेकि उ अबोध बा अउर ओनकर मन जड़ होइ गवा बा। ¹⁹ सरम क भावना ओनमें स जात रही। अउर ओ आपन क इन्द्रियन क बुरे काम मँ लगाई दिहेन। बिना कउनउ बन्धन माने ओ सब तरह क अपवित्रता मँ जुटा हयेन। ²⁰ परन्तु मसीह क बारे मँ तू जउन कछू जाने अहा, उ त अइसेन नाहीं बा। ²¹ (मोका कउनउ सन्देह नाहीं बा कि तू ओकरे बारे मँ सुने अहा, अउर उ सच जउन ईसू मँ निवास करत ह, ओकरे अनुसार तोहे ओकर चेलन क रुप मँ सिच्छित कीन्ह गवा बा।) ²² जहाँ तलक तोहरे पुराने जीवन प्रकार क सम्बन्ध बा, तोहे सिच्छा दीन्ह गइ रही कि तू आपन पुराना व्यत्तित्व जउन जर्जर होइ रहा बाटइ ओका उतारके फेंका जउन ओकर भटकावइवाली इच्छान क कारण भ्रस्ट बना भआ बा। ²³ जेहसे बुद्धि अउर आतिमा मँ तोहे नवा कीन्ह जाइ सकई। ²⁴ अउर तू उ नवा सरूप क धारण कइ सका जउन परमेस्सर क अनुरूप सचमुस नेक अउर पवित्तर बनवइ बरे रचा गवा बा।

²⁵ तउन तू पचे झूठ बोलइ क तियाग कइ द्या। आपस मँ सब कउनो क सच बोलई चाही काहेकि हम सब एक सरीर क अंग अही। ²⁶ जब तू त्रोध करा, तब पाप करइ स बचा। तोर किरोध सूरज अस्त होय तक बना न रहइ। ²⁷ सइतान क आपन पर हावी न होइ द्या। ²⁸ जे चोरी करत आवत, उ आगे चोरी न करइ। बल्कि ओका काम करइ चाही, खुद आपन हाथे स उपयोगी काम। ताकि ओकर पास जेकर आवस्यकता बा ओकर साथे बाटइ क कछू होइ सकइ।

²⁹ तोहरे मुँहे स कउनउ अनुचित शब्द न निकलइ चाही, बल्कि लोगन क विकास क बरे जेकर अपेच्छा बा, अइसेन उतम बातई निकलई चाही, ताकि जे सुनई ओकर ओसे भला होइ। ³⁰ परमेस्सर क पवित्तर आतिमा क दुःखी न करत रहा काहेकि परमेस्सर क सम्पत्ति क रूप मँ तोह पर छुटकारा क दिना क बरे आतिमा क साथे मोहर लगाई दीन्ह गइ बा। ³¹ पूरी कड़वाहट, झुँझलाहट, क्रोध, चीख-चिल्लाहट अउर निन्दा क तू आपन भीतर स सब तरह क बुराई क साथे निकारिके बाहर फेंका। ³² परस्पर एक दूसरे क बरे दयालु अउर करुनावन बना। अउर आपस मँ एक दूसरे क अपराधन क वइसेन ही छमा करा जइसे मसीह क द्वारा तोहका परमेस्सर छमा किहे अहइ।

झुरान हाड़न क दर्सन

37 यहोवा क सक्ति मोह पइ आयी। यहोवा क आतिमा मोका नगर क बाहेर लइ गई अउर खाले एक घाटी क बीच मँ राखेस। घाटी मरे लोगन क हाड़न क भरी रही। ² घाटी मँ अनगिनत हाड़न भुइँया पइ पड़े रहेन। यहोवा मोका हाड़न क चारिहुँ कइँती घुमाएस। मइँ लखेउँ कि हाड़न बहोत झुरान अहइँ।

³ तब मोर सुआमी यहोवा मोहसे कहेस, “मनई क पूत, का इ हाड़न जीवित होइ सकत ही?”

मइँ जवाब दिहेउँ, “मोर सुआमी यहोवा, उ सवाल क जवाब सिरिफ तू जानत अहा।”

⁴ मोर सुआमी यहोवा मोहसे कहेस, “ओन हाड़न स मोरे बरे बातन करा। ओन हाड़न स कहा, ‘झुरान हाड़ो यहोवा क वचन सुना! ⁵ मोर सुआमी यहोवा तू झुरान हाड़न स कहत ह: मइँ तू सबइ क अन्दर साँस दाखिल करब। अउर तू पचे जीवित होइ जाब्या। ⁶ मइँ तोहरे पचन्क ऊपर नसन अउर माँस पेसियन चढ़ाउब अउर मइँ तोहका पचन्क चमड़ी स ढक देब। तब मइँ तोहार अन्दर साँस फूँकब। अउर तू पचे फुन जीवित होइ उठब्या। तब तू पचे समुझब्या कि मइँ यहोवा हउँ।’”

⁷ अत: मइँ यहोवा बरे ओन हाड़न स वइसे ही बातन किहेउँ कि जइसा उ कहेस। जब मइँ अभी बात करत ही रहेउँ तबहिं मइँ प्रचण्ड ध्वनि सुनेउँ। हाड़न खड़खड़ाइ लागिन अउर हाड़न हाड़न स एक संग जुड़िन। ⁸ हुवाँ मोर आँखिन क समन्वा नसन, माँस पेसियन अउर चमड़ी हाड़न क ढकब सुरू किहस। किन्तु ओनमाँ साँस नाहीं रहा।

⁹ तब मोर सुआमी यहोवा मोहसे कहेस, “साँस स मोरे बरे कहा। मनई क पूत, मोरे बरे साँस स बातन करा। साँस स कहा कि सुआमी यहोवा इ कहत अहइ: ‘हे साँस, हर दिसा स आवा अउर एन ल्हासन मँ साँस भरा। ओनमा साँस भरा अउर उ पचे फुन जीवित होइ जाइहीं।’”

¹⁰ इ तरह मइँ यहोवा बरे साँस स बातन किहेउँ जइसा उ कहेस अउर ल्हासन मँ साँस आइन। उ पचे जी उठेन अउर खड़े होइ गएन। हुआँ बहोत स मनसेधू रहेन, उ पचे एक ठु बड़की फउज रहेन।

¹¹ तब मोर सुआमी यहोवा मोहसे कहेस, “मनई क पूत, इ सबइ हाड़न इस्राएल क पूरे परिवार क दर्सावत अहइँ। इस्राएल क लोग कहत हीं, ‘हमार हाड़न झुराइ गइ अहइँ, हमार आसा समाप्त अहइ। हम पूरी तरह नस्ट कीन्ह जाइ चुकी अहइँ।’ ¹² एह बरे ओनसे मोरे बरे बातन करा। ओनसे कहा सुआमी यहोवा इ कहत ह, ‘मोर लोगो, मइँ तोहार पचन्क कब्रन खोलब अउर तू सबइ पचन्क कब्रन क स बाहेर लिआउब। तब मइँ तू पचन्क इस्राएल क भुइँया पइ लिआउब। ¹³ मोरे लोगो, मइँ तोहार पचन्क कब्रन खोलब अउर तोहार पचन्क कब्रन स तू पचन्क बाहेर लिआउब। तब तू पचे समुझब्या कि मइँ यहोवा हउँ। ¹⁴ मइँ आपन साँस तू पचन्मँ डाउब अउर तू पचे फुन स जीवित होइ जाब्या। तब तू पचन्क मइँ तोहरे पचन्क देस मँ वापस लिआउब। तब तू पचे जनब्या कि मइँ यहोवा हउँ। तू पचे जनब्या कि मइँ इ सबइ बातन कहेउँ अउर ओनका घटित कराया।’” यहोवा इ कहे रहा।

यहूदा अउ इस्राएल क फिर एक होब

¹⁵ मोका यहोवा क बचन फुन मिला। उ कहेस, ¹⁶ “हे मनई क पूत, एक कुबरी ल्या अउर ओह पइ इ सँदेसा लिखा: ‘इ कुबरी यहूदा अउर ओकर मीतन, इस्राएल क लोगन क अहइ।’ तब दूसर कुबरी ल्या अउर एह पइ लिखा, ‘एप्रैम क इ कुबरी यूसुफ अउर ओकर मीत, इस्राएल क लोगन क अहइ।’ ¹⁷ तब दुइनउँ कुबरियन क एक संग जोर द्या। तोहरे हाथे मँ उ सबइ एक कुबरी होइ।

¹⁸ “तोहार लोग इ स्पस्ट करइ क कहिहीं, कि एकर अरथ का अहइ। ¹⁹ ओनसे कहा कि सुआमी यहोवा कहत ह, ‘मइँ यूसुफ क कुबरी लेब जउन कि एप्रैम अउर ओकर मीत इस्राएल क काबिल क हाथन मँ अहइ। तब मइँ उ कुबरी क यहूदा क कुबरी क संग रखब अउर एनकर एक ठु कुबरी बनाउब। उ पचे मोरे हाथे मँ एक ठु कुबरी होइ।’

²⁰ “ओनकर आँखिन क समन्वा ओन कुबरियन क आपन हाथन मँ धरा। तू उ सबइ नाउँ पइ ओन कुबरियन पइ लिखे रह्या। ²¹ लोग स कहा कि सुआमी यहोवा इ कहत ह: ‘मइँ इस्राएल क लोगन क ओन रास्ट्रन स लिआउब, जहाँ उ पचे गवा अहइँ। मइँ ओनका चारिहुँ कइँती स बटोरब अउर ओनके अपने देस मँ लिआउब। ²² मइँ ओनका इस्राएल क पर्वतन क प्रदेस मँ एक रास्ट्र बनाउब। ओन सबहिं क सिरिफ एक राजा होइ। उ पचे दुइ रास्ट्र नाहीं बना रहिहीं। उ पचे भविस्स मँ राज्जन मँ नाहीं बाँटा जाइ सकतेन। ²³ उ पचे आपन देवमूरतियन अउ भयंकर मूरतियन या आपन दूसर कउनो पापन स आपन आपका अउर दूसित नाहीं करिहीं। किन्तु मइँ ओन लोगन क ओनकर सबहिं पापन स जउन उ पचे किहे रहा बचाउब, अउर मइँ ओनका सबहिं ठउरन जहाँ उ पाप किहे रहेन एक संग बटोरब। मइँ ओनका पवित्तर बनाउब। उ सबइ मोर लोग होइहीं। अउर मइँ ओनकर परमेस्सर रहब।

²⁴ “‘मोर सेवक दाऊद ओनके ऊपर राजा होइ। ओन सबहिं क सिरिफ एक गड़रिया होइ। उ पचे मोर नेमन क सहारे होइहीं अउर मोरे विधियन क पालन करिहीं। उ पचे उ काम करिहीं जउन मइँ कहब। ²⁵ उ पचे उ भुइँया पइ रहिहीं जउन मइँ आपन सेवक याकूब क दिहेउँ। तोहार पुरखन उ ठउर पइ रहत रहेन अउर मोर लोग हुवाँ रहिहीं। उ पचे, ओनकर गदेलन अउर ओनकर पोतन-पोतियन हुवाँ हमेसा रहिहीं अउर मोर सेवक दाऊद ओनकर प्रमुख सदा रही। ²⁶ मइँ ओनके संग एक सान्ति सन्धि करब। इ सन्धि सदा बनी रही। मइँ ओनका ओनकर देस देब मंजूर करब। मइँ ओनका बहुसंख्यक लोग बनाउब मंजूर करब। मइँ आपन पवित्तर ठउर हुवाँ ओनक संग सदा बरे रखब मजूंर करत हउँ। ²⁷ मोर पवित्तर तम्बू हुवाँ ओनके बीच रही। हाँ, ओनकर परमेस्सर अउर उ पचे मोर लोग होइहीं। ²⁸ तब दूसर रास्ट्र समुझिहीं कि मइँ यहोवा हउँ अउर उ पचे जानिहीं कि मइँ इस्राएल क, ओनके बीच सदा बरे आपन पवित्तर ठउर रखिके, आपन खास लोग बनावत हउँ।’”

कोरह परिवार क एक ठु भजन।

संगीत निर्देसक बरे। कोरह परिवारन एज्रा-बंसी हेमान क एक ठु कलात्मक। “माहलाथ लआन्नोथ” राग पइ।