◀ All Reading Plans / M’Cheyne Bible Reading Plan / Family: 2 Samuel 22; Galatians 2. Secret: Ezekiel 29; Psalm 78:1–37. (Awadhi Bible: Easy-to-Read Version)

Prev Day

September 26, 2025

Next Day

Use the calendar to view readings from this devotional.

September 2025
Su	Mo	Tu	We	Th	Fr	Sa
	1	2	3	4	5	6
7	8	9	10	11	12	13
14	15	16	17	18	19	20
21	22	23	24	25	26	27
28	29	30

Return to today's reading

M’Cheyne Bible Reading Plan

The classic M'Cheyne plan--read the Old Testament, New Testament, and Psalms or Gospels every day.

Duration: 365 days

2 समूएल 22

यहोवा क स्तुति बरे दाऊद क गीत

22 दाऊद यहोवा बरे इ गीत गाएस जब यहोवा ओका साऊल अउर ओकर दूसर दुस्मनन स बचाएस।

²यहोवा मोर चट्टान, मोर गढ़, मोर सरण-ठउर अहइ।
³    मइँ परमेस्सर मोर चट्टान अहइ।
मई सुरच्छा बरे एह पई दउड़ सकत ही।
    परमेस्सर मोर ढाल अहइ।
    ओकर सक्ती मोका बचावत ह।
यहोवा मोर ऊँच गढ़ अहइ, अउर मोर सुरच्छा क जगह अहइ।
    मोर परमेस्सर क्रूर दुस्मन स मोर रच्छा करत ह।
⁴यहोवा जउन अराधना क योग्य अहा!
    मइँ मदद बरे यहोवा क गोहराएउँ।
    यहोवा मोका मोरे दुस्मनन स बचाएस ह।

⁵मोर दुस्मन मोका मारइ चाहत रहेन।
मउत-तरंगन मोका लपेट लिहन।
    मइँ बाढ़ दुआरा पकड़ लीन्ह गवा रहा जउन मोका मृत्यु क जगह पई लइ जात रहा ह।
⁶कब्र क लसुरियन मोरे चारिहुँ ओर लिपटिन,
    मइँ मउत क जालि मँ फँसेउँ।
⁷मइँ बिपत्ति मँ रहा, किन्तु मइँ यहोवा क गोहराएउँ।
    हाँ, मइँ अपने परमेस्सर क गोहराएउँ,
उ अपने उपासना-घरे मँ रहा, उ मोर पुकार सुनेस,
    मोर मदद क पुकार ओकरे काने मँ पड़ी।
⁸तब धरती मँ काँप भइ, धरती डोल उठी,
    अकासे क नीव काँप उठेन।
    काहे? काहेकि यहोवा कोहान रहा।
⁹ओकरी नाक स धुआँ निकरा,
    ओकरे मुँहे स आग क सोला छिटकिन,
    ओहसे दहकत अंगारन निकरि पड़ेन।
¹⁰यहोवा अकासे क फाड़िके खोल डाएस, अउर खाले आवा।
    उ सघन करिया मेघ पइ खड़ा भवा।
¹¹यहोवा करूब दूत पइ बइठा,
    अउर उड़ा, उ हवा क पंखन पइ चढ़िके उड़ गवा।
¹²यहोवा तम्बू क जइसा करिया मेघन क अपने चारिहुँ कइँती लपेट लिहस।
    उ सघन मेघन मँ जल जमा किहेस।
¹³ओकर तेज एतना प्रखर रहा,
    माना बिजुरी क चमक हुवँइ स आई होइ।
¹⁴यहोवा गगन स गरजा।
    परमेस्सर, बहोत ऊँचा, बोला।
¹⁵यहोवा बाण स दुस्मनन क बिखराएस,
    यहोवा बिजुरी पठएस, अउर लोग भय स भागेन।

¹⁶यहोवा तू जोर स बोलेस
अउर जोरदार हवा तोहार नाथुन स निकलेस।
ऍह बरे हुआँ धरती क नेंव
अउ सागर क तल सबइ क लखइ बरे प्रदर्सित कीन्ह गवा रहेन।

¹⁷यहोवा गगन स खाले पहोंचा, यहोवा मोका धइ लिहस,
    उ मोका गहरे जल (बिपत्ति) स निकार लिहस।
¹⁸उ ओन लोगन स बचाएस, जउन घिना करत रहेन,
    मोहसे मोर दुस्मन मोहसे जियादा ताकतवर रहेन, एह बरे उ मोर रच्छा किहस।
¹⁹मइँ बिपत्ति मँ रहा, जब मोरे दुस्मनन क मोह पइ हमला भवा,
    किन्तु मोर यहोवा मोर मदद किहस।
²⁰यहोवा मोका सुरच्छा मँ लइ आवा, उ मोर रच्छा किहस,
    काहेकि उ मोहसे पिरेम करत ह।
²¹यहोवा इमानदारी क अनुसार मोका पुरस्कार देत ह।
    यहोवा मोका पुरस्कार देत ह काहेकि मोर हाथ पाप रहित अहइँ।
²²काहे? काहेकि मइँ यहोवा क नेमन क पालन किहेउँ।
    मइँ अपने परमेस्सर क खिलाफ पाप नाहीं किहेउँ।
²³मइँ सदा याद करत हउँ यहोवा क निर्णय,
    मइँ ओकरे नेमन क मानत हउँ।
²⁴यहोवा जानत ह-मइँ अपराधी नाहीं अहउँ,
    मइँ अपने क पापन स दूर रखत हउँ।
²⁵इहइ कारण अहइ कि यहोवा मोका मोर ईमानदारी क अनुसार पुरस्कार देत ह, मइँ निआव मँ उचित रहत हउँ।
    यहोवा लखत ह, कि मइँ स्वच्छ जिन्नगी बितावत हउँ।

²⁶जदि कउनो मनई तोहसे पिरेम करी तउ तू, आपन पिरेम स पूर्ण दाया ओह पइ करब्या।
    जदि कउनो तोहरे बरे सच्चा अहइ, तब तू भी ओकरे बरे सच्चा होब्या।
²⁷जदि कउनो तोहरे बरे अच्छी जिन्नगी बितावत ह, तब तू ओकरे बरे अच्छा बनब्या।
    किन्तु जदि कउनो मनई तोहरे खिलाफ होत ह, तब तू भी ओकरे बिरुद्ध होब्या।
²⁸तू बिनम्र लोगन मदद करत ह।
    किन्तु तू घमण्डी लोगन क अपमानित करत ह।
²⁹यहोवा तू मोर दीपक अहा,
    यहोवा मोरे चारिहुँ ओर क अँधेरे क प्रकास मँ बदलत ह।
³⁰तू फउजिन क दल क हराबइ मँ मोर मदद करत ह।
    परमेस्सर क सक्ती स मइँ देवार क ऊपर चढ़ सकत हउँ।

³¹परमेस्सर क सक्ती पूर्ण अहइ।
    यहोवा क बचन क जाँच होइ चुकी अहइ।
    यहोवा रच्छा बरे, अपने लगे पराइवाले हर मनई क ढाल अहइ।
³²यहोवा क अलावा कउनो दूसर परमेस्सर नाहीं,
    हमरे परमेस्सर क अलावा दूसर कउनो आस्रय-सिला नाहीं।
³³परमेस्सर मोर मजबूत गढ़ अहइ।
    उ सुद्ध आतिमन क ओकर राह पइ रहइ बरे मदद करत ह।
³⁴यहोवा मोरे गोड़न क हिरन क गोड़न-स तेज बनावत ह,
    उ उच्च ठउरन पइ मोका मजबूत करत ह।
³⁵यहोवा मोका जुद्ध बरे सिच्छा देत ह।
    अउर मोर भुजा पीतर क धनुस क चलाइ सकत हीं।

³⁶परमेस्सर तू मोर रच्छा करत ह अउर जीत मँ मोर मदद करत ह।
    तू दुस्मन क हराइ बरे मोर मदद किहेस ह।
³⁷मोर गोड़न अउ टख़नन क मज़बूत करा,
    जेहसे मोर गोड़ फिसलइ नाहीं।
³⁸मइँ अपने दुस्मनन क पाछा, ओनका नस्ट करइ तलक किहेउँ।
    मइँ तब तलक नाहीं लउट सकत हउँ, जब तलक दुस्मन नस्ट नाहीं भएन।
³⁹मइँ अपने दुस्मनन क नस्ट किहेउँ ह,
    मइँ ओनका पूरी तरह नस्ट किहेउँ ह,
उ पचे फुन उठ नाहीं सकतेन,
    हाँ मोर दुस्मन मोरे गोड़न क तले गिरेन।

⁴⁰परमेस्सर तू मोका जुद्ध बरे, ताकतवर बनाया।
    तू मोरे दुस्मनन क हराया ह।
⁴¹तू मोरे दुस्मनन क भगाया ह,
    एह बरे मइँ ओन लोगन क हराइ सकत हउँ, जउन मोहसे घिना करत हीं।
⁴²मोर दुस्मनन मदद बरे लखेन,
    किन्तु ओनकर रच्छक कउनो नाहीं रहा।
उ पचे यहोवा स मदद माँगेन,
    मुला उ ओनका जवाब नाहीं दिहस।
⁴³मइँ अपने दुस्मनन क कूटिके टूकन-टूकन करत हउँ,
    उ पचे भुइँया पइ धूरि स होइ जात हीं।
    मइँ ओनका सड़क क कींच क तरह रौंद दिहेउँ।

⁴⁴तू तब मोका उ लोगन स बचाएस ह जउन मोरे बिरुद्ध लड़ाई किहन।
    तू मोका रास्ट्रन क सासक बनाए रख्या।
    लोग मोर सेवा करिहीं, जेनका मइँ अबहुँ तलक नाहीं जानत हउँ!
⁴⁵दूसर भूइँया क लोग मोर आग्या मानत हीं,
    जइसे ही सुनत हीं, तउ हाली ही मोर आग्या मानत हीं।
⁴⁶दूसर देसन क लोग भयभीत होइहीं,
    उ पचे अपने छिपइ क जगहियन स भय स काँपत निकरिहीं।

⁴⁷यहोवा जीवित अहइ।
    मइँ आपन चट्टान क स्तुति करत हउँ।
    परमेस्सर महान अहइ, उ चट्टान अहइ जउन मोर रच्छा करत ह।
⁴⁸उ परमेस्सर अहइ, जउन मोरे दुस्मनन क मोरे बरे सजा देत ह।
    उ लोगन क मोरे अधीन करत ह।
⁴⁹यहोवा तू मोका मोरे दुस्मनन स बचाएस ह।

हाँ, तू उ लोगन क हराइ मँ मदद किहेस ह जउन मोरे खिलाफ उठेस।
तू मोका क्रूर लोगन स बचाएस ह।
⁵⁰हे यहोवा, इहइ कारण अहइ कि मइँ रास्ट्रन क बीच मँ तोहका धन्यवाद दिहेउँ,
इहइ कारण अहइ कि मइँ तोरे नाउँ क स्तुति गीत गावत हउँ।

⁵¹यहोवा अपने राजा क मदद, बहोत स जुद्ध मँ बिजय पावइ मँ करत ह,
यहोवा अपने अभिसिक्त भवा राजा पइ सच्चा पिरेम अउ दाया दिखावत ह।
उ दाऊद अउ ओकर सन्तान पइ सदा दयालु रहब।

गलातियन 2

पौलुस क प्रेरितन क मान्यता

2 चौदह साल बाद मइँ फिन स यरूसलेम गएऊँ बरनाबास मोरे साथे रहा अउर तीतुस क मइँ अपने साथे लइ लिहे रहेउँ। ²मइँ परमेस्सर क दर्सन क कारण उहाँ गवा रहेउँ। मइँ गैर यहूदियन क बीच सुसमाचार क उपदेस देत रहत हउँ, उहइ सुसमाचार क आपन निजी सभा क बीच कलीसिया क मुखियन क सुनाएउँ। मइँ उहाँ ऍह बरे गए रहेउँ कि परमेस्सर खुद मोका दर्साये रहा कि मोका उहाँ जाइ चाही। ताकि जउन काम मइँ पिछले दिनन किहे रहेउँ, या जेका मइँ करत हउँ, उ बेकार न चला जाइ।

³परिनाम सरूप तीतुस तक क, जउन हमरे साथे रहा, जद्यपि उ यूनानी अहइ फिन ओका खतना करावइ बरे विवस नाहीं कीन्ह गवा रहा। ⁴मुला ओन झूठे भाइयन क कारण जउन लुके छिपा हमरे बीच गुप्तचर क रूप मँ मसीह ईसू मँ हमार स्वतन्त्रता क पता लगावइ बरे घुस आइ रहेन कि हमका दास बनाइ सकइँ, इ बात उठी। ⁵मुला हम ओनकइ गुलामी मँ एक छन बरे घुटना नाहीं टेका ताकि उ सच जउन सुसमाचार मँ निवास करत ह, तोहरे भित्तर बना रहइ।

⁶मुला जाना-माना सम्मानित लोगन स मोका कछू नाहीं मिला। उ कइसनेउ भी रहेन, मोका अइसेन कउनउ अन्तर नाहीं पड़त। बिना कउनउ भेद भाऊ क सबन मनई परमेस्सर क सामने एक जइसेन अहइँ। मुला ओन सम्मानित लोगन स मोका या मोरे सुसमाचार मँ कछू जोड़ावाइ गवा कउनउ लाभ नाहीं भवा। ⁷मुला एन मुखियन देखेन कि परमेस्सर मोका वइसे ही एक विसेस काम सौंपे अहइ जइसे पतरस क परमेस्सर यहूदियन क सुसमाचार सुनावइ क काम दिहे रहा। मुला परमेस्सर गैर यहूदियन क सुसमाचार सुनावइ क काम मोका दिहे रहा। ⁸परमेस्सर पतरस क एक प्रेरित क रूप मँ काम करइ क सक्ती दिहे रहा। पतरस गैर यहूदियन क बरे एक प्रेरित बा। परमेस्सर मोका भी एक प्रेरित क रूप मँ काम करइ क सक्ती दिहे बाटइ। मुला मइँ ओन मनइयन क प्रेरित अहउँ जउन यहूदी नाहीं अहइँ। ⁹इही तरह उ पचे मोह पइ परमेस्सर क ओह अनुग्रह क समझ लिहेन अउर कलिसिया क स्तम्भ समछइ जाइ वाला याकूब, पतरस अउर यूहन्ना बरनाबस अउर मोसे साझेदारी क चिन्ह क रूप मँ हाथे मिलाए रहा। अउर उ पचे सहमत होइ गएन कि हम विधर्मियन क बीच उपदेस देत रही अउर उ सबइ यहूदियन क बीच। ¹⁰ओ सबइ हमसे बस ऍतनई कहेन कि हम ओनके गरीबन क धियान रखी। अउर मइँ इही कामँ क न केवल करइ चाहत रहेउँ बल्कि एकरे बरे लालयित रहेउँ।

पौलुस क दिस्टि मँ पतरस अनुचित

¹¹मुला जब पतरस अन्ताकिया आवा तब मइँ खुलकेओकर विरोध किहेउँ काहेकि उ ठीक नाहीं रहा। ¹²काहेकि याकूब द्वारा भेजा गवा कछू लोगन क इहाँ पहुँचे स पहिले उ गैर यहूदियन क साथे खात पियत रहा। मुला उन लोगन क आवइ क बाद उ गैर यहुदियन स अलग कइ लिहेस। उ ओन्हेन क डर स अइसेन किहेस जउन चाहत रहेन कि गैर यहूदियन क खतना होइ चाही। ¹³दूसरे यहूदियन पतरस क इ देखावा मँ साथ दिहेन। इहाँ तक कि इ देखॉवइ क कारण बरनाबस तक भटक गवा। ¹⁴मइँ जब इ देखेउँ कि सुसमाचार मँ छिपा हुआ सच क अनुसार उ पचे सीधे रस्ता पर नाहीं चलत रहेन तब सबक सामने पतरस स कहेन, “जब तू यहूदी होइ क भी गैर यहूदियन क जिन्नगी जिअत अहा। तउ गैर यहूदियन क यहूदियन क रीति पर चलइ क बरे विवस कइसे कइ सकत ह?”

¹⁵हम तउ जनम स यहूदी अही। अउर हमार पापी गैर यहूदीयन स कउनउ सम्बन्ध नाहीं बा। ¹⁶तबऊ हम इ जानित ह कि कउनो मनई क व्यवस्था क बिसय क पालन करइ क कारण नाहीं बल्कि ईसू मसीह मँ बिसवास क कारण नेक ठहरावा जात ह। मइँ इही बरे मसीह ईसू क बिसवास धारण किहे हई, ताकि इ बिसवासे क कारण हम नेक ठहरावा जाइ, न कि व्यवस्था क पालइ क कारण। काहेकि ओका पालई स तउ केऊ मनई धर्मी नाहीं होत।

¹⁷मुला अगर हम जउन ईसू मसीह मँ अपने स्थित क कारण धर्मी ठहरावा जाइ चाहित ह। हमहूँ बिधर्मीयन क समान पापी पावा जाइ तउ एकर मतलब का इ नाहीं ना कि मसीह पापे क बढ़ावा देत ह। निस्चय ही नाहीं। ¹⁸अगर जेकर तियाग मइँ कइ चुका हउँ उ व्यवसथा क फिन स उपदेस देइ लागउँ, तब तउ मइँ आज्ञा क उल्लंघन करइवाला अपराधी बन जाब। ¹⁹काहेकि व्यवस्था क विधान स मइँ मर गएउँ ह ताकि परमेस्सर क बरे मइँ फिन स जी जाउँ मसीह क साथे मोका क्रूस पर चढ़ाइ दिहा गवा।

²⁰इही स अब आगे मइँ जिन्दा नाहीं अहउँ। मुला मसीह मोहमाँ जिन्दा अहइ। तउन एह सरीर मँ अब मइँ जउन जिन्नगी जिअत हउँ, उ हमार जिन्नगी नाहीं अहइ, उ तउ बिसवासे पइ टिका बा। परमेस्सर क ओह पूत (ईसू) बरे बिसवासे पर जउन मोसे पिरेम करत ह। अउर जे अपने आप क मोरे बरे अर्पित कइ दिहेस। ²¹मइँ परमेस्सर क अनुग्रह क नाहीं नकारित ह, मुला अगर धार्मिक व्यवस्था क कारण परमेस्सर स नाता जोडाइ पाउत तउ मसीह बेकारइ आपन जान काहे देत।

यहेजकेल 29

मिस्र क बिरूद्ध सँदेसा

29 देस निकारे क दसएँ बरिस क दसएँ महीने क बारहवें दिन मोर सुआमी यहोवा क बचन मोका मिला। उ कहेस, ²“मनई क पूत, मिस्र क राजा फिरौन कइँती धियान द्या, मोरे बरे ओकर तथा मिस्र क बिरूद्ध कछू कहा। ³कहा, ‘मोर सुआमी यहोवा इ कहत ह:

“‘हे मिस्र क राजा फिरौन, मइँ तोहरे खिलाफ हउँ।
तू नील-नदी क किनारे विस्राम करत भए बिसाल मगरमच्छ अहा।
तू कहत रह्या, “इ मोर नदी अहइ।
मइँ इ नदी बनाएउँ ह।”

⁴“‘किन्तु मइँ तोहरे जबड़न मँ हुक डालउब।
    नील नदी क मछरियन तोहरी चमड़ी स चिपक जइहीं।
मइँ तोहका तोहार मछरियन क तोहरी नदियन स
बाहेर कइके झुरान भुइँया पइ लोकाइ देब, ⁵    तू धरती पइ गिरब्या,
    अउर कउनो न तोहका उठाई, न ही दफनाई।
मइँ तोहका जंगली जनावरन अउ पंछियन क देब,
    तू ओनकर भोजन बनब्या।
⁶तब मिस्र मँ रहइवाले सबहिं लोग जनिहीं
    कि मइँ यहोवा हउँ।

“‘मइँ एन कामन क काहे करब?
काहेकि इस्राएल क लोग सहारे बरे मिस्र पइ भरोसा किहस।
    किन्तु मिस्र सिरिफ दुर्बल घास क तिनका निकरा।
⁷इस्राएल क लोग सहारे बरे मिस्र पइ आस्रित रहेन
    अउर मिस्र सिरिफ ओनके हाथन अउ काँधन क छेद किहेस।
उ पचे सहारे बरे तोह पइ आस्रित रहेन।
    किन्तु तू ओनकर पीठ क तोड़्या अउर मरोड़ दिहा।’”

⁸एह बरे मोर सुआमी यहोवा इ कहत ह:
“मइँ तोहरे खिलाफ तरवार लिआउब।
मइँ तोहरे सबहिं लोगन अउर जनावरन क नस्ट करब।
⁹मिस्र खाली अउ नस्ट होइ जाई।
तब उ पचे समुझिहीं कि मइँ यहोवा हउँ।”

परमेस्सर कहेस, “मइँ उ सबइ काम काहे करब? काहेकि तू कहया, ‘इ मोर नदी अहइ। मइँ इ नदी क बनाएउँ।’ ¹⁰एह बरे मइँ तोहरे विरूद्ध हउँ। मइँ तोहार नील नदी कइउ साखन क विरूद्ध हउँ। मइँ मिस्र क पूरी तरह नस्ट करब। मिग्दोल स सवेन तलक तथा जहाँ तलक कूस क सीमा अहइ, हुवाँ तलक नगर खाली होइहीं। ¹¹कउनो मनई या जनावर मिस्र स नाहीं गुजरी। कउनो मनई या जनावर मिस्र मँ चालीस बरिस तलक नाहीं रही। ¹²मइँ मिस्र देस क उजाड़ कइ देब अउर ओकर नगर चालीस बरिस तलक उजाड़ रहिहीं। मइँ मिस्रियन क रास्ट्रन मँ बिखेर देब। मइँ ओनका बिदेस मँ बसाइ देब।”

¹³मोर सुआमी यहोवा इ कहत ह, “मइँ मिस्र क लोगन क कइउ रास्ट्रन मँ बिखेरब। किन्तु चालीस बरिस क अन्त मँ फिर मइँ ओन लोगन क एक संग बटोरब। ¹⁴मइँ मिस्र क बंदियन क वापस लिआउब। मइँ मिस्रियन क पत्रास क प्रदेस मँ, जहाँ उ पचे पइदा भए रहेन, वापस लिआउब। किन्तु ओनकर राज्ज महत्वपूर्ण नाहीं होइ। ¹⁵इ सबसे कम महत्वपूर्ण राज्ज होइ। मइँ एका फुन दूसर रास्ट्रन स ऊपर कबहुँ नाहीं उठाउब। मइँ ओनका एतना घोटका कइ देब कि उ पचे रास्ट्रन पइ सासन नाहीं कइ सकिहीं। ¹⁶अउर इस्राएल क परिवार फुन कबहुँ मिस्र पइ आस्रित नाहीं रही। इस्राएली आपन पापन क याद रखिहीं। उ पचे याद रखिहीं कि उ पचे मदद बरे मिस्र कइँती मुड़ेन, परमेस्सर कइँती नाहीं अउर उ पचे समुझिहीं कि मइँ यहोवा अउ सुआमी अहउँ।”

बाबुल मिस्र क लेइ

¹⁷देस निकारे क सत्ताइसवें बरिस क पहिले महीने क पहिले दिन यहोवा क बचन मोका मिला। उ कहेस, ¹⁸“मनई क पूत, बाबुल क राजा नबूकदनेस्सर सोर क खिलाफ आपन फउज क भीसण जुद्ध मँ लगाएस। उ पचे हर एक फउजी क बार कटवाइ दिहेन। भारी वजन ढोवइ क कारण हर एक वंधा रगड़ स नंगा होइ गवा। नबूकदनेस्सर अउर ओकर फउज सोर क हरावइ बरे कठिन जतन किहस। किन्तु उ पचे ओन कठिन जतनन स कछू पाइ न सकेन।” ¹⁹एह बरे मोर सुआमी यहोवा कहत ह, “मइँ बाबुल क राजा नबूकदनेस्सर क मिस्र देस देब अउर नबूकदनेस्सर मिस्र क लोगन क लइ जाइ। नबूकदनेस्सर मिस्र क कीमती चिजियन क लइ जाइ। इ नबूकदनेस्सर क फउज क मजदूरी होइ। ²⁰मइँ नबूकदनेस्सर क मिस्र देस ओकर कठिन जतन के पुरस्कार क रूप मँ दिहेउँ ह। काहेकि उ पचे मोरे बरे काम किहन।” मोर सुआमी यहोवा इ कहेस।

²¹“उ दिन मइँ इस्राएल क परिवार क सक्तीसाली बनाउब अउर मइँ तोहका ओन लोगन क बीच मँ बोलइ क अवसर देब। तब उ पचे जानिहीं कि मइँ यहोवा हउँ।”

भजन संहिता 78:1-37

आसाफ क एक कलात्मक।

¹मोर मनवइयो, तू पचे मोरे उपदेसन क सुना।
    ओन बातन पइ कान द्या जेनका मइँ बतावत हउँ।
²मइँ तू पचन्क इ कथा सुनाउब।
    मइँ तू पचन्क पुरान कथा सुनाउब।
³हम पचे इ कहानी सुना ह, अउर ऍका अच्छी तरह जानित ह।
    हम लोगन क पुरखन इ कहानी कहेन ह।
⁴हम लोग ऍन बातन क आपन सन्तानन स नाहीं छुपाउब।
    हम लोग ऍन बातन क आपन अगवा पीढ़ी क बताउब।
हम लोग ओनसे यहोवा क सक्ति अउर ओकरे अद्भुत कामन क बारे मँ बताउब।
    हम पचे ओनका ओन कामन बरे जेनका उ किहस ह बखान करब।
⁵यहोवा याकूब स वाचा किहस।
    परमेस्सर इस्राएल क व्यवस्था क विधान दिहस,
अउर हमार परमेस्सर हमरे पुरखन क हुकूम दिहन।
    उ हमरे पुरखन क व्यवस्था क विधान आपन संतानन क सिखावइ क किहेस।
⁶इ तरह अगवा पीढ़ी ऍन बातन क बरे मँ जानिहीं।
    अउर हर एक पीढ़ी मँ गदेलन पइदा होइ अउर बढ़ीइ अउर फुन उ पचे इ कहानी क आपन गदेलन क बतइहीं।
⁷ऍह बरे उ सबहिं लोग यहोवा पइ भरोसा करिहीं।
    उ पचे ओन सक्ति स भरा कामम क नाहीं बिसरिहीं।
    जेन्का परमेस्सर किहे रहा।
    उ पचे धियान स रखवारी करिहीं अउर परमेस्सर क हुकूम क मनिहीं,
⁸एह बरे उ पचे आपन पुरखन क नाई नाहीं होइ।
    ओनकर पुरखन परमेस्सर क अनसुनी किहे रहेन
अउर ओकर अनुसरण करइ स इन्कार किहे रहेन उ पचे हठी रहेन।
    उ पचे बिस्सासी होइ क परमेस्सर क अनुसरण नाहीं किहेन।

⁹ओन मुड़ी भइ कमान की तरह जेका उ पचे लइ रहेन
    एप्रैम क लोग जुद्ध स पीठ दिखाइ गए।
¹⁰उ पचे ओन करार क नाहीं मानेन जउन उ पचे यहोवा स किहे रहेन।
    उ पचे उ नाहीं किहे जउन उ ओन लोगन क करइ क हुकूम दिहे रहा।
¹¹एप्रैम क उ सबइ लोग ओन बड़की बातन क बिसरि गएन जेनका परमेस्सर किहे रहा।
    उ पचे ओन अद्भुत बातन क बिसरि गएन जेनका उ ओनका देखाँए रहा।
¹²परमेस्सर ओनकर पुरखन क
    मिस्र क भुइयाँ सोअन मँ निज महासक्ति देखाँइस।
¹³परमेस्सर लाल सागर क चीरिके दुइ भाग कइके लोगन क पार उतार दिहस।
    उ पानी क मजबूत देवार क तरह दुइनउँ कइँती खड़ा कइ दिहस रहा।
¹⁴परमेस्सर ओन लोगन क दिन क समइ मँ महा बादर स अगुवाई किहस।
    अउर रात क समइ मँ चमकत भवा आगी स राह देखाँएस।
¹⁵उ चट्टान क फारेस अउर पानी तेजी स बाहर निकर आवा
    वइसे ही जइसे झड़ना स निकरत ह।
¹⁶परमेस्सर चट्टान स पानी क धारा
    नदी क नाईं निकारे रहा।
¹⁷मुला लोग रेगिस्तान मँ सर्वोच्च परमेस्सर क खिलाफ
    पाप करत जारी रखे रहेन।
¹⁸फिन ओन लोग परमेस्सर क परखइ क पक्का इरादा किहन।
    उ पचे बस आपन भूख मिटावइ बरे परमेस्सर स खइया क माँगेन।
¹⁹परमेस्सर क खिलाफ उ पचे बतियाइ लागेन, उ पचे कहइ लागेन,
    “का रेगिस्ताने मँ परमेस्सर हमका खाइ क दइ सकत ह?
²⁰लोगन ने कहा, जब परमेस्सर चट्टाने पइ चोट किहस तउ पानी क एक ठु रेला फूटि पड़ा।
    किन्तु का उ हमका कछू रोटी अउ गोस भी दइ सकत ह?”
²¹जब यहोवा इ सुनि लिहस जउन लोग कहे रहेन
    तउ ओकर किरोध इस्राएल क रास्ट्र
    याकूब क खिलाफ भड़क गवा।
²²काहेकि लोग ओह पइ भरोसा नाहीं रखे रहेन, ओनका भरोसा नाहीं रहा,
    कि परमेस्सर ओनका बचाइ सकत ह।
^23-24तब भी परमेस्सर ओन पइ बादर क खोल दिहस।
    ओनका खाइ बरे खाले मन्ना बरसाइ दिहस।
इ ठीक वइसेन ही भवा जइसे कि उ अकासे क दुआर खोल दिहस ह
    अउर ओनसे अनाज बाहेर उड़ेर दिहस ह।
²⁵लोग उ भोजन खाएन अउर उ पचे बहोत ताकतवर होइ गएन।
    परमेस्सर ओन लोगन क तृप्त करइ बरे भर पूर भोजन पठएस।
²⁶फिन परमेस्सर पूरब स तेज हवा चलाएस
    अउर ओन लोगन बरे बटेर क बर्खा बरसात क नाई बरसाएस।
²⁷परमेस्सर क महासक्ति तैमान कइँती स एक ठु आँधी उठाएस
    अउर नीला अकास करिआ होइ गवा काहेकि हुवाँ अनगिनत पंछी छाइ ग रहेन।
²⁸उ सबइ पंछी क ठीक ओनकर डेरे क बीच मँ
    खेमन क चारिहुँ कइँती गिरा दिहे रहेन।
²⁹ओनके लगे खाइ बरे भरपूर भोजन रहा।
    उ ओनका उहइ दिहस जउन उ पचन्क इच्छा रहेन।
³⁰उ पचे उ भोजन अबहुँ तलक खाइ क खतम नाहीं किहे रहेन जेन्का इच्छा उ पचन्क रहेन
    अउर गोस अबहुँ तलक ओनकर मुँह मँ ही रहेन।
³¹तउ ओन लोगन पइ परमेस्सर बहोत कोहाइ गवा अउर ओनमाँ स सबन्क नीक क मारि दिहस।
    उ बरिआर जवानन क मउत दइ दिहस।
³²फिन भी लोग पाप करत जारी राखे रहेन!
    उ पचे परमेस्सर क अद्भुत करमन पइ भरोसे नाहीं किहेन।
³³तउ परमेस्सर ओनकर जिन्नगी क बियर्था मँ
    अउर बरिसन क डर मँ खतम किहस।
³⁴जब कबहुँ परमेस्सर ओनमाँ स कउनो क मारेस
    ओनमाँ स बाकी लोग परमेस्सर कइँती लउटि गएन।
³⁵उ सबइ लोग याद किहेन कि परमेस्सर ओनकर चट्टान रहत रहा।
    उ पचे याद किहन कि परमेस्सर ओनकर मदद किहे रहा।
³⁶किन्तु ओकर पाछे उ पचे अइस किहेन जइसे उ पचे ओन पइ बिस्सास करत हीं, किन्तु असल मँ उ पचे झूट बोले रहेन।
    उ पचे ओकर बिस्सासी नाहीं रहेन।
³⁷उ पचे फुरइ मनवा स यहोवा क संग नाहीं रहेन।
    उ पचे आपन करार बरे सच्चा नाहीं रहेन।

Awadhi Bible: Easy-to-Read Version (ERV-AWA)