M’Cheyne Bible Reading Plan

9 Nu waut daen Deenst fa dee Heilje aunbelangt, eset tom aewrije fa mie junt to schriewe;

² Dan ekj weet fonn jun Iewa, fonn daut ekj to dee Jemeente enn Matsedoonian puche doo, daut Achaja en Yoa trig aul haud reed jemoakt, en jun Iewa haft doa noch meeha aunjespornt.

³ En ekj schekjt dee Breeda daut onns puche fonn junt nich met eemol sull emsonst senne jewast waeajen dit, soo aus ekj saed, daut jie reed weare.

⁴ Dan, wan dee fonn Matsedoonia met mie kjeeme, en sage daut jie nich reed weare, wie onns schaeme sulle, nich to saje: JIE!, enn onns Toofetruehe.

⁵ Doaromm docht ekj daut needich to senne dee Breeda to femone daut see feropp reisde, en jun Saeajen ferhaea reed to moake daen jie fesproake haude, dautet en Saeajen kunn senne, en nich aus jedwunje.

⁶ Dit saj ekj: Waea spoasaum seit, woat uk spoasaum arnte; en waea fa en Saeajen seit, woat uk Saeajen arnte.

⁷ En jieda oba soo aus hee sikj enn sien Hoat faeanemt, nich enn Trua oda jedwunje; dan de Herr haft soone leef dee en schaftja Jaewa es.

⁸ En Gott kaun junt em folle Jnod jaewe, soo daut jie emma enn aules jenuach ha, en kjenne faeich senne to en jiedet goodet Woakj,

⁹ soo auset jeschraewe steit: "Hee haft utjestreit, hee haft dee Oame jejaeft, siene Jerachtichkjeit woat enn Eewichkjeit bliewe."

¹⁰ Nu dee, dee daem Seimaun daut Sot hanreakjt, jeft beides Broot tom Aete, en femeat jun Sot, en moakt jun Jerachtichkjeits Frucht to wause.

¹¹ Jie woare enn aulem Rikj jemoakt, daut jie fael jaewe kjenne, daut derch onns Dankboakjeit to Gott wirkjt;

¹² dan dee fesorjunk fa dis Deenst halpt nich bloos dee Heilje daut to jaewe waut an faelt, oba uk daut doaderch Gott fonn fael jedankt woat.

¹³ En doaderch daut jie junt enn disen Deenst ha Tru bewaese, feharliche see Gott daut jie Tru sent enn jun Bekjantnes to Christus sien Evanjeelium, uk enn jun rikje Jemeenschofft em jaewe to an, uk to aulamaun.

¹⁴ En uk em Jebaed fa junt, en ha en Felange no junt waeajen dee groote Jnod dee Gott junt bewaese haft.

¹⁵ Gott sie jedankt fa siene Gow dee nich to beschriewe jeit.

Dee 70 Psalm

To dän Haupt Musikaunt, en Psalm fonn Doft, tom aunjedenkj.

¹ O Gott rad mie! O Herr Gott, spood die mie to halpe!

² Lot dän dee no miene Seel seakje sikj schäme un blauss senne; lot dän trigj jedreit woare un to schaund jemoakt woare dee mie Beeset wensche.

³ Lot dän trigj jedreit woare dee Aha! Aha! saje, aus ne Loon fa äare Schaund.

⁴ Lot aul dän sikj freihe dee die seakje, un froo sent enn die; un dee, dee diene Radunk Leef ha emma saje: "Gott saul feharlijcht woare!"

⁵ Oba ekj sie oam un bederftijch, komm schwind no mie, O Gott; du best miene Help un mien Rada; O Herr Gott, doo nijch lenja luare.

Dee 71 Psalm

¹ Ekj ha mine fetruehe enn die, O Herr Gott, lot mie nijch to Schaunde jemoakt woare opp emma.

² Doo mie aufleewre un rade enn diene Jerajchtijchkjeit; horjch no mie un rad mie.

³ Sie en groota Steen fa mie no woont ekj emma gone kaun; du hast en aunkommendeare jejäft mie to rade; dan du best mien groota Steen un miene Fastinj.

⁴ O mien Gott, doo mie aufleewre ut däm Fient siene Haunt, un ut daem Onnjerjachta siene Bennehaunt, un fonn dee Ruchloose.

⁵ Dan du best miene Hopninj, O Gott Herr Gott, mien Toofetruehe fonn miene Jugent.

⁶ Ekj ha enn die jerüt fonn miene Muttalief; du best dee, dee mie ut miene Mutta aea Muttalief rut neem; mien Preis saul emma fonn die senne.

⁷ Ekj sie soo aus en Wunnda to Fäle, oba du best mien stoakja Torm.

⁸ Mien Mul es jefelt met dien Preis, met diene Harlijchkjeit dän Dach äwa.

⁹ Doo mie nijch auntsied schmiete nu enn mien oolet Ella. Doo mie nijch felote nu daut ekj Schwak sie.

¹⁰ Dan mien Fiend Fiend räde jäajen mie, un soone dee no miene Seel schuloarijch laure doone toop plone.

¹¹ Un see saje: "Gott haft am felote; joag am hinjaraun un nämt am, dan doa es kjeene dee am aufleewre kaun."

¹² O Gott, sie nijch wiet auf fonn mie; O mien Gott, komm schwind mie to halpe.

¹³ Lot daen sikj schäme; lot dän dee miene Seel äare Fiend sent fenijcht woare.; lot dän met Schaund bedakjt senne; un lot dän dee Beeset seakje jäajen mie, to Schaund jemoakt woare;

¹⁴ En ekj woa emma Hopninj ha, un ekj woa meeha toolaje to dien Preis.

¹⁵ Mien Mul saul fonn diene Jerajchtijchkjeit un diene Radunk dän dachäwa räde; dan ekj weet nijch dee Nummasch.

¹⁶ Ekj woa enn däm Aulmajchtja Herr Gott siene Macht kome; ekj woa fonn diene Jerajchtijchkjeit räde, en diene auleen.

¹⁷ O Gott, du hast mie ennjeleat fonn miene Jugent, un bott nu ha ekj diene Wunndasch bekaunt jemoakt.

¹⁸ En nu daut ekj Oolt un greiwkoppijch sie, O Gott, doo mie nijch felote; bott ekj diene Krauft bekaunt jemoakt ha to dit Jeschlajcht, diene Macht to en jieda dee noch kome woat.

¹⁹ Un nu, O Gott, diene Jerajchtijchkjeit es seeha huach, dan du hast groote Dinje jedone; O Gott, wäa es soo aus Du best?

²⁰ Dee mie groote un beese Trubbels jewäse haft, du woascht mie dreihe; du woascht mie aum läwe hoole, un du woascht fonn daut Deepet enne Ead oppdreihe; Du woascht mie enopp brinje.

²¹ Du woascht mien Grootet femeare, un mie aun aule Siede treeste.

²² Ekj woa die uk met ne Hoap danke; O mien Gott, ekj woa to die sinje met dee Jittoa, O du Heilje enn Iesrael.

²³ Miene Leppe sele fa Freid juble, ekj woa Preis to die sinje; un uk miene Seel dee Du jerat hast.

²⁴ En miene Tunj saul enn Jedanke dreeme fonn diene Jerjachtijchkjeit dän dachäwa; wiels dee, dee Beeset fonn mie sochte sent to Schaund jemoakt, dee motte sikj schäme.