M’Cheyne Bible Reading Plan
गोलियत इस्राएल क ललकारत ह
17 पलिस्तियन आपन फउज लड़ाई बरे बटोरेन। उ पचे यहूदा मँ बसा सोको मँ जुद्ध बरे एकट्ठा भएन। ओनकइ डेरा। सोको अउ अजेका क बीच एपेसदम्मीन नाउँ क सहर मँ रहा।
2 साऊल अउ इस्राएली सिपाही भी हुवाँ एक संग जमा भएन। ओनकइ डेरा एला क घाटी मँ रहा। साऊल क फउजी मोर्चा प तैनात पलिस्ती स जुद्ध करइ बरे तैयार रहेन 3 पलिस्ती एक पहाड़ी प रहेन अउ इस्राएली दूसर पहाड़ी प अउर ओकर क बीच मँ घाटी रही।
4 पलिस्तियन मँ एक बरिआर जोध्दा रहा। गोलियत गत से रहा। गोलियत लगभग नौ फीट ऊँचा रहा। गोलियत पलिस्ती डेरा स बाहेर आवा। 5 ओकरे मूँड़े प काँसा का टोपा रहा। उ पट्टीधारी कवच क कोट पहिरे रहा। इ कवच काँसे क बना रहा अउर एकर तौल करीब एक सौ पच्चीस पौण्ड रहा। 6 गोलियत आपन गोड़े मँ काँसा क रच्छा कवच पहिरे रहा। ओकरे लगे काँसा का भाला रहा जउन ओकरी पीठी प बाँधा रहा। 7 गोलियत क भाला क फाल जुलाहे क छड़ क तरह रहा। भाला क फाल क तौल पन्द्रह पौण्ड रही। गोलियत क सहायक गोलियत क ढाल क धरे भए ओकरे आगे आगे चलत रहा।
8 गोलियत रोज रोज बाहेर निकरत रहा अउ उ इस्राएली फउजियन कइँती गोहराइके कहत रहा, “तोहार सब फउजी लड़ाई बरे मोर्चा काहे लगाए बाटेन? तू पचे साऊल क सेवक अहा। मइँ एक पलिस्ती हउँ। ऍह बरे कउनो एक मनई क चुना अउ ओका मोसे लड़इ क पठवा। 9 जदि उ मनई मोका मारि डावत ह तउ हम पलिस्ती तोहार गुलाम होइ जाब। मुला जदि मइँ ओका जीत लिहेउँ अउ तोहरे मनई क मारि डावउँ तउ तू सबइ हमार दास होइ जाया। तब तू पचे हमार सेवा करब्या।”
10 पलिस्ती इ भी कहेस, “आजु मइँ खड़ा हउँ अउ इस्राएल क फउज क मसखरी उड़ावत हउँ। मोका आपन मँ स एक क संग लड़इ द्या।”
11 गोलियत जउन कहे रहा ओका साऊल अउ इस्राएली फउजी सुनेन अउर उ पचे बहोत ससाइ गएन।
दाऊद क लड़ाई क मैदान जाब
12 दाऊद यिसै क पूत रहा। यिसै एप्राती परिवार स यहूदा बेतलेहम स रहा। यिसै क आठ पूत रहेन। साऊल क टेम मँ यिसै एक बुढ़वा मनई रहा। 13 यिसै क तीन बड़का पूत साऊल क संग जुद्ध मँ गवा रहेन। पहिला पूत एलीआब रहा। दूसर पूत अबिनादाब रहा। अउर तीसर पूत सम्मा रहा। 14 दाऊद सबसे छोटा बेटवा रहा। तीनउँ बड़े बेटवन साऊल क फउज मँ रहेन। 15 मुला दाऊद कबहुँ कबहुँ बेतलेहेम मँ आपन पिता क भेड़ी क रखवारी करइ बरे साऊल क लगे स चला जात रहा।
16 पलिस्ती गोलियत हर रोज भिन्सारे-साँझ क बाहेर आवत रहा अउ इस्राएल क फउज क समन्वा खड़ा होइ जात रहा। गोलियत चालीस दिन तलक इ तरह इस्राएल क मसखरी उड़ावत रहा।
17 एक दिना यिसै आपन पूत दाऊद स कहेस, “पका भवा दाना क इ टोपा अउ इ दस रोटी क डेरा मँ आपन भाई लोगन क लगे लइ जा। 18 पनीर क इ दस लोंदा क भी एक हजार सिपाहियन वाली आपन भाई क टुकड़ी क नायक अफसर क लगे लइ जा। लखा कि तोहार भाई कइसे अहइँ। कछू अइसा साच्छी लावा जेसे मोका पता लागइ कि तोहार भाई ठीक-ठाक बाटेन। 19 तोहार भाई साऊल क संग अहइँ अउ इस्राएल क सब फउजी एला घाटी मँ जमा अहइँ। उ पचे पलिस्ती क खिलाफ लड़त अहइँ।”
20 भोर होत भिन्सारे दाऊद भेड़ी क रखवारी दूसर गड़रिया क सौंपेस। दाऊद खइया क खाएस अउ हुवाँ बरे चल पड़ा जहाँ खातिर यिसै कहे रहा। दाऊद आपन गाड़ी क डेरा मँ लइ गवा। उ समइया फउजी आपन लड़ाइ मँ मोर्चा थामइ जात रहेन जब दाऊद हुवाँ पहुँचा। फउजी आपन जुद्ध क बिगुल बजावइ लागेन। 21 इस्राएल अउ पलिस्ती आपन-आपन मनइयन क जुद्ध मँ एक दूसर स भिड़इ बरे पंक्ती-बध करत रहेन।
22 दाऊद भोजन अउ चीजन क उ मनई क लगे तजि दिहेस जउन सामान क बाँटत रहा। दाऊद पराइके उ ठउरे प पहोंचा जहाँ इस्राएली फउजी रहेन। दाऊद आपन भाइयन क बारे मँ पूछेस। 23 दाऊद आपन भाइयन क संग बात करब सुरु किहेस। उहइ टेम पलिस्ती सबन त बरिआर जोधा जेकर नाउँ गोलियत रहा अउर जउन गथ क बसइया रहा, पलिस्ती फउज स बाहेर आवा। पहिले क तरह गोलियत इस्राएल क खिलाफ उहइ बात नरियाइके कहेस।
24 इस्राएली फउजी गोलियत क लखेन अउर पराइ गएन काहेकि उ लोगन बहोत डरे भवा रहा। 25 इस्राएली मनइयन मँ स एक कहेस, “अरे देसबासियो! तोहमाँ स कउनो लखेस ह जउन बार-बार इस्राएल क हँसी उड़ावत ह। जउन कउनो उ मनई क मार देइ धनी होइ जाइ। राजा साऊल ओका बहोत धन देइ। साऊल आपन बिटिया क उ मनई स बीहि देइ जउन गोलियत क मार देइ। अउर साऊल उ व्यक्ति क परिवार क इस्राएल मँ अजाद कइ देइ।”
26 दाऊद आपन बगली खड़ा मनई स पूछेस, “उ का कहेस? इ पलिस्ती क मारइ अउ इस्राएल क इ बेज्जती क दूर करइ क इनाम का अहइ? आखिर मँ इ गोलियत बाटइ का? सिरिफ इ एक बिदेसिया बा। गोलियत एक पलिस्ती स जियादा कछू नाहीं। उ काहे सोचत ह कि उ सोझइ परमेस्सर क फउज क खिलाफ बोल सकत ह?”
27 ऍह बरे इस्राएलियन गोलियत क मारइ क इनाम क बारे मँ बताएन। 28 दाऊद क बड़ा भाई एलीआब दाऊद क फउजी स बात करत सुनेस। एलीआब दाऊद प कोहाइ गवा। एलीआब दाऊद स पूछेस, “तू हिआँ काहे आया? रेगिस्तान मँ उ थोड़ी स भेड़ी क केकरे लगे तजिके आया ह? मइँ जानत हउँ कि तू हिआँ काहे आया ह? तू उ करब नाहीं चाहत्या जउन तोहसे करइ क कहा गवा रहा। तू सिरिफ हिआँ जुद्ध लखइ बरे आवइ चाहत बाट्या।”
29 दाऊद कहेस, “अइसा मइँ का किहेउँ ह? मइँ कउनो गलती नाहीं किहेउँ ह। मइँ सिरिफ बात करत रहेउँ।” 30 दाऊद दूसर मनइयन कइँती मुड़ा अउ ओनसे उ सबइ सवाल किहेस। उ पचे दाऊद वइसे ही जवाब दिहेन।
31 कछू मनइयन दाऊद स बात करत सुनेन। उ पचे दाऊद क बारे मँ साऊल स कहेस। साऊल हुकुम दिहेस कि उ पचे दाऊद क ओकरे लगे लइ आवइँ। 32 दाऊद साऊल स कहेस, “कउनो मनई क ओकरे कारण हिम्मत हारइ जिन द्या। मइँ आपक सेवक हउँ। मइँ इ पलिस्ती स लड़इ जाब।”
33 साऊल जवाब दिहेस, “तू फिलिस्तीन क खिलाफ जुद्ध मँ नाहीं जाइ सकत्या। तू अबहुँ छोटा बच्चा बाट्या। गोलियत जब बच्चा रहा, तबहिं स जुद्ध मँ लड़त रहा।”
34 मुला दाऊद साऊल स कहेस, “मइँ आपक सेवक अहउँ। अउर मइँ आपन बाप क भेड़ी क रखवारी भी करत रहेउँ ह। जदि कउनो सेर या रीछ आवत अउ झुण्ड स कउनो भेड़ी क उठाइ लइ जात। 35 तउ मइँ ओकर पाछा करत रहेउँ। मइँ आपन भेड़ी क बचावइ बरे उ जंगली जनावर प हमला करत रहेउँ अउ ओका मारत रहेउँ। अउर जदि उ मोर तरफ मुड़तेन अउर मोह पइ हमला करतेन तउ मइँ ओकर गरदन क नीचे क बार पकड़तेन अउर मातेन अउर ओका मरि डालतेन। 36 मइँ एक सेर अउ एक ठु रीछ क मारेउँ ह। मइँ इ विदेसी गोलियत क वइसे मार डाउब। गोलियत मरी, काहेकि उ साच्छात परमेस्सर क फउज क मसखरी किहेस ह। 37 यहोवा मोका सेर अउ रीछ स बचाएस ह। यहोवा इ पलिस्ती गोलियत स भी मोर रच्छा करिहीं।”
साऊल दाऊद स कहेस, “जा यहोवा तोहरे संग होइँ।” 38 साऊल आपन ओढ़ना दाऊद क पहिराएस। साऊल एक काँसा क टोप दाऊद क सिर प धरेस अउ ओकरे तन प कवच पहिराएस। 39 दाऊद तरवार क लिहेस अउ ओका कवच पइ बाँधेस अउर चलइ क कोसिस किहेस, मुला उ ओकर भारी भरकम कवच क लेकर चल नाहीं सकत काहेकि उ ओन भारी चीजन क पहिरइ क आदत नाहीं रही।
दाऊद साऊल स कहेस, “मइँ इ चीजन्क संग नाहीं लड़ सकत्या। मोर आदत ओनके बरे नाहीं बा।” ऍह बरे दाऊद ओन सबन क उतार दिहस। 40 दाऊद आपन टहरइ क छड़ी आपन हाथे मँ लिहस। नदी क तले स दाऊद पाँच चीकन पाथर चुनेस। उ ओन पाथरन क आपन गड़रियावाला झोरी मँ राखेस। उ आपन गोफना (गुलेल) आपन हाथे मँ लिहस अउर उ पलिस्ती गोलियत स मिलइ चल पड़ा।
दाऊद गोलियत क मारत डावत ह
41 पलिस्ती गोलियत धीमे धीमे दाऊद क नगिचे अउर नगिचे स नगिचे होत गवा। गोलियत क सहायक ओकर ढाल लइके ओकरे आगे चलत रहा। 42 गोलियत दाऊद क निहारेस अउ हँसा। गोलियत लखेस कि दाऊद फउजी नाहीं बा। उ सिरिफ लाल बारेवाला जवान लरिका अहइ। 43 गोलियत दाऊद स कहेस, “इ छड़ी काहे बरे बाटइ? का तू कूकुर क नाई मोर पाछा कइके मोका भगावइ आवा बाट्या।” तब गोलियत आपन देवतन क नाउँ लइके दाऊद क खिलाफ सरापेस। 44 गोलियत दाऊद स कहेस, “हिआँ आवा, मइँ तोहरे तने क पंछी अउ पसू क खियाइ देब।”
45 दाऊद पलिस्ती गोलियत स कहेस, “तू मोरे लगे तरवार, बर्छी अउ भाला चलावइ आवा अहा। मुला मइँ तोहरे लगे इस्राएल क फउज क परमेस्सर सर्वसक्तीमान यहोवा क नाउँ प आवा हउँ। तू ओनके खिलाफ बुरी बात कहया ह। 46 आजु यहोवा तोहका मोसे हराइ देइहीं। मइँ तोहका मारि डइहउँ। आजु मइँ तोहार मूँड़ कटिहउँ अउ तोहरे देह क पंछी अउ जंगली जनावर क खियाइ देइहउँ। हम पचे दूसर पलिस्तियन क संग हिअँइ करब। तब्बइ समूचइ संसार जानी कि इस्राएल मँ परमेस्सर बा। 47 हिआँ बटुरा सबहिं मनइयन जनिहइँ कि मनइयन क रच्छा बरे यहोवा क तरवार अउ भाला क सरोकार नाहीं। जुद्ध यहोवा क बा। अउर यहोवा तू सबहिं पलिस्तियन क हरावइ मँ हमार मदद करी।”
48 पलिस्ती गोलियत दाऊद प हमला करइ ओकरे लगे आवा। दाऊद गोलियत स भिड़इ तेजी स दउड़ा।
49 दाऊद एक पाथर आपन झोरी स निकारेस। उ ओका आपन गोफना प चढ़ाएस अउ ओका चलाएस अउ उ गोलियत क कपाल प चोट किहेस। पाथर ओकरे कपाल मँ गहिर घुसि गवा अउ गोलियत मुँहे क बल गिर पड़ा।
50 इ तरह दाऊद एक गोफना अउ एक पाथर स पलिस्ती क हराइ दिहस। उ पलिस्ती प चोट किहेस अउ ओका मार डाएस। दाऊद क लगे कउनो तरवार नाहीं रही। 51 ऍह बरे, दाऊद दउड़ा अउ पलिस्ती क बगल मँ खड़ा होइ गवा। दाऊद ओका खुद क तरवार ओकरी मियान स निकारेस अउर ओसे गोलियत क मूँड़ क ओकर सरीर स अलग कइ दिहस। इ तरह उ ओका मारेस।
जब दूसर पलिस्तियन लखेन कि ओनकइ फउज क प्रमुख मारा गवा अहइ तउ उ पचे मुड़ेन अउ भाग गएन। 52 इस्राएल अउ यहूदा क फउजी सिपाही चिचियाएन अउ पलिस्तियन क पाछा पलिस्तियन क गत सहर क चउहद्दी तलक अउ एक्रोन क फटके तलक किहेस। उ पचे ढेर पलिस्तियन क मारेन। ओनकइ ल्हास सारैंम सड़क प गत अउर एक्रोन कइँती बिछ गएन। 53 पलिस्तियन क पाछा करइ क पाछे इस्राएली पलिस्तियन क डेरा मँ लौटेन। इस्राएली उ डेरा स बहोत स चीज ढोइ लइ गएन।
54 दाऊद पलिस्ती प्रमुख गोलियत क मूँड़ यरूसलेम लइ गवा। दाऊद पलिस्तियन क औजार क अपने लगे तम्बू मँ राखेस।
साऊल दाऊद स डेराइ लाग
55 साऊल दाऊद क गोलियत स लड़इ बरे जात निहारे रहा। साऊल सेनापति अब्नेर स बात किहेस, “अब्नेर, उ नउजवान क बाप कउन अहइ?”
अब्नेर जवाब दिहेस, “महाराज, मइँ किरिया खाइके कहत हउँ-मइँ नाहीं जानत।”
56 राजा साऊल स कहेस, “पता लगावा कि उ नउ जवान क पिता कउन अहइ।”
57 जब दाऊद गोलियत क मारे क पाछे लउटा तउ अब्नेर ओका साऊल क लगे लइ आवा। दाऊद तब भी फिलिस्तीनी क मूँड़ हाथे मँ धरे रहा।
58 साऊल ओसे पूछेस, “जवान मनई तोहार पिता के अहइँ?”
दाऊद जवाब दिहस, “मइँ आप क सेवक बेतलेहेम क यिसै क पूत हउँ।”
15 हम जउन आत्मिक रूप स सक्तिसाली अही, ओन्हे ओनकर कमजोरी सहइ चाही जउन सक्तिसाली नाहीं अहइँ। हम बस अपने आपके उ खुस ना करी। 2 हम पचन मँ स हर एक, दूसरे क अच्छाइयन बरे इ भावना क साथे कि ओनके समुदाय क आत्मिक बढ़ोत्तरी होइ, ओन्हे खुस करी। 3 इहाँ तक कि मसीह तउ खुद क खुस नाहीं किहे रहा। बल्कि जइसेन कि मसीह क बारे मँ पवित्तर सास्तरन कहत ह, “ओनकर अपमान जे तोहर अपमान किहे अहइँ, मोह पइ आइ पड़ा बा।” 4 सब उ बात जउन पवित्तर सास्तरन मँ पहिले लिखी गइ रहिन, हमका उपदेस देइ क बरे रहिन ताकि जउन धीरज अउ बढ़ावा सास्तरन स मिलत ह, हम ओसे आसा पाइ सकी। 5 अउर समूचा धीरज अउर बढ़ावा क स्रोत परमेस्सर तोहे बरदान देइ कि तू पचे एक दूसरे क साथे ईसू मसीह क इच्छा पे चलत-चलत आपस मँ मिलि-जुलिके क रहा। 6 ताकि तू सब एक साथे मँ एक सुर स हमरे पर्भू ईसू मसीह क परमपिता, परमेस्सर क महिमा प्रदान करा। 7 इही बरे एक दूसरे क अपनावा जइसे तोहे मसीह अपनाएस। इ परमेस्सर क महिमा क बरे करा। 8 मइँ तोहे लोगन क बतावत अही कि इ परगट करइ कि परमेस्सर बिसवासनीय बा ओकरे पूर्वजन क दीन्ह गवा परमेस्सर क बचन क मजबूत करइ क मसीह यहूदियन क सेवक बना। 9 ताकि गैर यहूदियन उ परमेस्सर क ओकरी दया बरे महिमा प्रदान करइँ। पवित्तर सास्तरन कहत ह:
“इही बरे मइँ गैर यहूदियन क बीच तोहे पहिचनबइ
अउर तोहरे नाउँ क स्तुति गाउबइ।” (A)
10 अउर फिन पवित्तर सास्तर इहउ कहत ह,
“गैर यहूदियन परमेस्सर क लोगन क साथे खुस रहा।” (B)
11 अउर फिन पवित्तर सास्तर इहउ कहत ह,
“गैर यहूदियन, तू पर्भू क स्तुति करा।
अउर सभन लोगन परमेस्सर क स्तुति करा।” (C)
12 अउर फिन यसायाह भी कहत ह,
“यिसै क एक बंजस परगट होई जउन
गैर यहूदियन क सासक क रूप मँ उभरी!
गैर यहूदी ओहपे आपन आसा लगइहीं।” (D)
13 सभन आसा का दाता परमेस्सर, तोहे पूरा आनन्द अउर सान्ति स भरि देइ। जइसेन कि ओहमे तोहार बिसवास बा। ताकि पवित्तर आतिमा क सक्ति स तू आसा स भरपूर होइ जा।
पौलुस द्वारा अपने पत्र अउर कारज क चर्चा
14 मोरे भाइयो तथा बहिनियो, मोका खुदइ तोह पे भरोसा बा कि तू नेकी स भरा अहा अउर ज्ञान स परिपूर्ण अहा। तू एक दूसरे क उपदेस दइ सकत ह। 15 परन्तु तोहे फिन स याद देवावइ क बरे मइँ कछू विषय क बारे मँ साफ साफ लिखे हउँ। मइँ परमेस्सर क जउन अनुग्रह पाएउँ ह, ओकरे कारण इ किहेउँ ह। 16 काहेकि मइँ गैर यहूदियन क बरे मसीह ईसू क सेवक बनिके परमेस्सर क सुसमाचार क उपदेस क याजक क रूप मँ काम करउँ ताकि गैर यहूदियन परमेस्सर क आगे स्वीकार करइ योग्य भेंट बन सकइँ अउर पवित्तर आतिमा क द्वारा परमेस्सर क बरे पूरी तरह पवित्तर बनइँ।
17 तउन मसीह ईसू मँ एक मनई क रूप मँ परमेस्सर क बरे आपन सेवा क मोका गर्व बा। 18 काहेकि मइँ बस ओन्हीन बातन क कहइ क साहस रखित ह जेका मसीह तउ गैर यहूदियन क परमेस्सर क आज्ञा मानइ क रस्ता देखावइ क काम मोर बचनन, मोर कामन, 19 अचरज अउ अद्भुत कारजन क सक्ति अउर परमेस्सर क आतिमा क सामर्थ स, मोरे जरिये पूरा कीन्ह गवा। तउन यरुसलेम स लइके इल्लुरिकुम क चारउ ओर मसीह क सुसमाचार क उपदेस क काम मइँ पूरा किहेउँ। 20 मोरे मने मँ हमेसा इ अभिलासा रही बा कि मइँ सुसमाचार क उपदेस उहाँ देउँ जहाँ क लोग मसीह क नाम नाहीं जानतेन, ताकि मइँ कउनो दूसरे मनइ क नींव पे निर्माण न करउँ। 21 परन्तु पवित्तर सास्तरन कहत ह:
“जेनका ओनके बारे मँ नाहीं बतावा गवा बा, उ पचे देखिहीं।
अउर जे सुने तलक नाहीं बा, उ पचे समझिहीं।” (E)
पौलुस क रोम जाइ क योजना
22 मोर इ सबइ कर्त्तव्य मोका तोहरे पास आबइ स बार बार रोकत रहेन।
23 परन्तु काहेकि अब इस प्रदेसन मँ कउनउ स्थान नाहीं बचा बा अउ बहुत बरसन स मइँ तोहसे मिलइ का उत्कंठित हउँ। 24 तउन मइँ जब स्पेन जाब तउ आसा करत हउँ तोहसे मिलबइ। मोका उम्मीद बा कि स्पेन जात तोहसे भेंट होई। तोहरे साथे कछू दिन ठहरइ क आनन्द लेइ क बाद मोका आसा बा कि उहाँ क जात्रा क बरे मोका तोहार मदद मिली।
25 परन्तु अब मइँ परमेस्सर क पवित्तर लोगन क सेवा मँ यरुसलेम जात हउँ। 26 काहेकि मैसीडोनिया अउ अखया क कलीसिया क लोगन यरुसलेम मँ परमेस्सर क पवित्तर लोगन मँ स जउन दरिद्र अहइँ, ओनके बरे कछू देइ क निस्चय किहे अहइ। 27 हाँ, ओनके बरे ओनकइ कर्तव्य इ बनत ह काहेकि अगर गैर यहूदियन यरुसलेम क यहूदियन क आत्मिक कामन मँ हिस्सा बाँटत हीं तउ गैर यहूदियन क भी ओनके बरे भौतिक सुख जुटावइ चाही। 28 तउन आपन इ काम पूरा कइके अउर इकट्ठा कीन्ह गवा इ धने क सुरच्छा क साथे ओनके हाथे सौंपी क मइँ स्पेन जाब, अउर रस्ते मँ तोहसे मिलब। 29 अउर मइँ जानित ह कि जब मइँ तोहरे लगे अउबइ तउ तोहरे बरे मसीह क पूरा आसीर्वादन समेत अउबइ।
30 भाइयो तथा बहिनियो, तोहमाँ स मइँ पर्भू ईसू मसीह कइँती स आतिमा स जउन पिरेम हम पाइत ह, ओकर साच्छी दइ क पराथना करित ह कि तू मोरे कइँती स परमेस्सर क बरे सच्ची पराथना मँ मोर साथे रहब्या। 31 कि मइँ यहूदिया मँ अबिसबासियन स बचा रहउँ। अउ यरुसलेम क बरे मोरी सेवा क परमेस्सर क पवित्तर लोग स्वीकार करइँ। 32 ताकि परमेस्सर क इच्छा क अनुसार मइँ खुसी क साथ तोहरे लगे आइके तोहरे साथे आराम करउँ। 33 पूरी सान्ति क धाम परमेस्सर तोहरे साथे रहइ। आमीन।
यहोवा क जरिये यरूसलेम क बिनास
2 लखा यहोवा सिय्योन क बिटिया क
कइसे बादर मँ ढाँपि दिहेस ह।
उ इस्राएल क महिमा
स्वर्ग स धरती पइ लोकाइ दिहेस ह।
यहोवा आपन किरोध क दिन मँ आपन धरती पइ
निवास स्थान बरे कउनो परवाह नाहीं किहेस।
2 यहोवा याकूब क चिरागाह क
बिना दया क लील लिहेस।
उ आपन प्रिय यहूदा क सबहिं गढ़ियन क भरिके किरोध मँ मेटेस।
यहोवा यहूदा क राज्ज क धरती पइ पटक दिहेस
अउर ओकरे नेता लोगन क बर्बाद कइ दिहस।
3 यहोवा किरोध मँ भरिके
इस्राएल क सारी सक्ति उखाड़ फेंकेस।
उ ओका ओकर दुस्मन स अउर सुरच्छा नाहीं किहेस।
उ याकूब मँ धधकत भइ आगी स भड़की।
उ एक अइसी आगी रहो
जउन आस-पास क सब कछू चट कइ जात ह।
4 यहोवा सत्रु क नाई आपन धनुस खींचे रहा।
ओकरे दाहिन हाथे मँ ओकरे तरवारे क मूठा रहा।
उ आपन दुस्मन पइ वार करइ बरे तैयार रहा।
उ यहूदा क सबहिं आकर्सक लोगन क मारि डाएस।
यहोवा आपन किरोध क जंगल क आगी क नाईं
सिय्योन क खेमन पइ बरसाएस।
5 यहोवा दुस्मन होइ गवा रहा
अउर उ इस्राएल क लील लिहस।
ओकर सबहिं महलन क उ लील लिहस
ओकर सबहिं गढ़ियन क लील लिहे रहा।
उ आपन प्रिय यहूदा बरे बहोत जियादा रुलाएस
अउर बहोत विलाप कराएस।
6 यहोवा आपन ही मन्दिर नस्ट किहे रहा
जइसे उ कउनो उपवन होइ,
उ उ ठाँव क नस्ट किहेस
जहाँ लोग ओकर उपासना करइ बरे जमा होत रहेन।
यहोवा लोगन क अइसा बनाइ दिहस
कि उ पचे सिय्योन मँ खास मिलन अउर आराम क खास दिनन क बिसरि जाइँ।
यहोवा याजक अउ राजा क नकार दिहस।
उ बड़े किरोध मँ भरिके ओनका नकारेस।
7 यहोवा आपन ही वेदी क नकार दिहस
अउर उ आपन उपासना क पवित्तर ठउरे क नकार दिहे रहा।
यरूसलेम क महलन क देवारन क उ दुस्मन क सौंपि दिहस।
यहोवा क मन्दिर मँ दुस्मन सोर करत रहा।
उ पचे अइसे सोर करत रहेन
जइसे कउनो छूट्टी क दिन होइ।
8 उ सिय्योन क बिटिया क
देवार नस्ट करब सोचेस ह।
उ कउनो नापइ क डोरी स ओह पइ निसान डाएस ह।
उ खुद क इका बिनास करइ स नाहीं रोकस।
उ दुःख मँ भरिके फसीलन
अउर देवार क रोवाइ दिहस।
9 यरूसलेम क दरवाजन टुटिके धरती पइ बइठ गएन।
फाटक क सलाखन क तोड़िके ओका तहस-नहस कइ दिहस।
सिय्यन क राजा अउर नेता लोगन
दुसर देसन मँ बिखेर दीन्ह गएन।
ओनके बरे आजु कउनो धार्मिक सिच्छा ही नाहीं रही।
नबी भी यहोवा स कउनो दिव्य दर्सन नहीं पउतेन।
10 सिय्योन क बुजुर्ग अब धरती पइ बइठत हीं।
उ पचे धरती पइ बइठत हीं अउर चुप रहत हीं।
आपन माथन पइ फूल मलत हीं
अउर सोक वस्त्र पहिरत हीं।
यरुसलेम क जुवतियन दुःख मँ
आपन माथा धरती पइ नवावत हीं।
11 जब मइँ रोवत हउँ तउ मोर नैन मँ दर्द होत ह।
मोर अंतरंग बियाकुल अहइ।
मोरे लोगन क बिनास क कारण
मोर मन क अइसा लागत ह जइसे
उ बाहर निकरिके धरती पइ गिरा होइ।
गदेलन अउर दूध पइ वाले बच्चे गलियन मँ बेहोस पड़ा अहइँ।
12 उ पचे बिलाखत भए आपन महतरियन स पुछत हीं,
“कहाँ बाटइ महतारी, कछू क खइया अउर पिअइ क?”
उ पचे इ सवाल अइसे पूछत हीं जइसे जख्मी सिपाही सहर क गलियन मँ गिरत प्राणन क तजत, उ पचे इ सवाल पूछत हीं।
उ पचे आपन महतरियन क गोदी मँ लोटत भए प्राणन क तजत हीं।
13 हे यरूसलेम क बिटिया, मइँ केहसे तोहार तुलना करउँ?
तोहका केकरे समान कहउँ?
हे सिय्योन क कुवाँरी कन्या,
तोहका केहसे तुलना करउँ?
तोहका कइसे ढाढ़स बँधावउँ? तोहार जख्म सगरे जइसा बिसाल अहइ।
अइसा कउनो भी नाहीं जउन तोहार उपचार करइ।
14 तोहार नबियन तोहरे बरे दिब्ब दर्सन लिहे रहेन।
किन्तु उ पचे सबहिं बियर्थ अउर लबार सिद्ध भएन।
उ पचन्क तोहका बिनास स दूर रखइ बरे,
तोहरे पापन क खिलाफ उपदेस दिन्ह चाही रहेन।
किन्तु उ पचे अइसा नाहीं किहन।
उ पचे तोहका झूटे चिजियन क सिच्छा दिहन जउन कि तोहका भटकइ दिहेस।
15 बटोही राह स गुजरत भए
स्तब्ध होइके तोह पइ ताली बजावत हीं।
यरूसलेम क बिदिया पइ उ पचे सीटियन बजावत
अउर माथा नयावत हीं।
उ सबइ लोग पुछत हीं, “का इहइ उ नगरी अहइ जेका लोग कहा करत रहेन,
‘एक संपूर्ण सुन्नर नगर’ तथा
‘समुचइ संसार क आनन्द’?”
16 तोहार सबहिं दुस्मन तोह पइ आपन मुँह खोलत हीं।
तोह पइ सीटियन बजावत हीं अउर तोह पइ दाँत पीसत हीं।
उ पचे कहा करत हीं, “हम ओनका लील लीन्ह।
फुरइ इहइ उ दिन अहइ जेकर हमका प्रतीच्छा रही।
अउर अब हम पचे एँका घटत भए लाखि लीन्ह।”
17 यहोवा वइसा ही किहस जइसी ओकर जोजना रही।
उ वइसा ही किहस जइसा उ करइ बरे कहे रहा।
बहोत दिनन पहिले जइसा उ आदेस दिहे रहा, वइसा ही कइ दिहस।
उ बर्बाद किहस, ओहका दाया तलक नाहीं आइ।
उ तोहरे दुस्मनन क खुस किहस कि तोहारे संग अइसा घटा।
उ तोहारे दुस्मनन क ताकत बढ़ाइ दिहस।
18 ओनका दिल यहोवा क पुकारेस।
सिय्योन क देवार आँसुअन क
नदी क नाई बहइ दया।
दिन अउर रात आपन आँसुअन क गिरइ द्या।
तू ओनका जिन रोका।
19 जाग उठा।
राति मँ विलाप करा।
राति क हर पहर क सुर मँ विलाप करा।
आँसुअन मँ आपन मन बाहेर निकार द्या जइसा उ पानी होइ।
आपन मन यहोवा क समन्वा निकार राख।
यहोवा क पराथना मँ आपन हाथ ऊपर उठावा।
ओहसे आपन संतानन क जीवन माँगा।
ओहसे तू ओन संतानन क जीवन माँग ल्या जउन भूख स हर कुचे गली मँ बेहोस होइके गिर जात ह।
20 हे यहोवा, मोह पइ निगाह करा।
लखा कउन अहइ उ जेकर संग तू अइसा किहा।
तू मोहका इ सवाल पूछइ दया: का महतारी क ओन गदेलन क खाइ जा नीक अहइ
जेनका उ जनत ह का महतारी क ओन गदेलन क खाइ जा नीक अहइ
जेनका उ पोसत रही ह का यहोवा क मन्दिर मँ याजक
अउ नबियन क प्राणन क लीन्ह जा नीक अहइ?
21 लरिकन अउ बुजुर्गन
नगर क गलियन मँ धरती पइ पड़ा रहइँ।
मोर जवान मेहररुअन अउर जवान मनसेधू
तरवारे क धार उतारे गए रहेन।
हे यहोवा, तू आपन किरोध क दिन पइ ओनकर बध किहा ह।
तू ओनका बगैर कउनो करुणा क मारा ह।
22 तू मोह पइ हर एक जगह स दुःख व मुसीबत अइसे बोलाया जइसे इ पर्व क दिन होइ।
ओह दिन जब यहोवा किरोध किहस
अइसा कउनो मनई नाहीं रहा जउन बचिके भाग पाया होइ।
जेनका मइँ बढ़ाए रहेउँ अउर मइँ पालेउँ, पोसेउँ ओनका मोर दुस्मनन मारि डाएन ह।
1 हे सज्जन लोगो, यहोवा मँ आनन्द मनावा!
सज्जनो सत मनइयो, ओकर स्तुति करा।
2 वीणा बजावा अउर ओकर स्तुति करा।
यहोवा बरे दस तार वाले सारंगी बजावा।
3 अब ओकरे बरे नवा गीत गावा।
खुसी क धुन सुन्दरता स बजावा!
4 परमेस्सर क वचन सत्य अहइ।
जउन भी उ करत ह ओकर तू पचे भरोसा कइ सकत ह।
5 नेकी अउ निस्पच्छता परमेस्सर क भावत ह।
यहोवा आपन खुद क करुणा स इ धरती क भरि दिहेस।
6 यहोवा आदेस दिहस अउ सृस्टि फउरन पइदा होइ गइ।
परमेस्सर क साँस स धरती पइ हर चीज बनी।
7 परमेस्सर सागर मँ एक ही जगहिया पइ जल बटोरेस।
उ सागर क आपन जगह पइ रखत ह।
8 धरती क हर मनई क यहोवा क आदर करइ अउ डेराइ चाही।
इ संसार मँ जउन भी मनई बसा अहइँ, ओनका चाही कि उ पचे ओसे डेराइँ।
9 काहेकि परमेस्सर क सिरिफ बात भइ कहब अहइ, अउर उ बात तुरंत घटि जात ह।
अगर उ कउनो क “रुकइ” क आदेस देइ, तउ उ तुरंत थम जात ह।
10 परमेस्सर चाहइ तउ सबहिं सुझाव बिअर्थ करइ।
उ कउनो भी मनई क सब कुचक्रन क बिअर्थ कइ सकत ह।
11 मुला यहोवा क उपदेस सदा ही खरे होत हीं।
ओकर सब जोजना पीढ़ी दर पीढ़ी खरी होत हीं।
12 धन्न अहइँ उ सबइ मनई जेनकर परमेस्सर यहोवा अहइ।
परमेस्सर ओनका आपन ही मनई होइ क चुनेस ह।
13 यहोवा सरग स खाली लखत रहत ह।
उ सबहिं लोगन क लखत रहत ह।
14 उ ऊपर ऊँचे पइ बनाए भए आसन स
धरती पइ रहइवाले सब मनइयन क लखत रहत ह।
15 परमेस्सर हर कउनो क मन रचेस ह।
तउ कउनो का सोचत अहइ उ समुझत ह।
16 राजा क रच्छा ओकरे बड़की सक्ती स नाहीं होत ह,
अउर कउनो सिपाही आपन निज सक्ती स सुरच्छित नाहीं रहत।
17 जुद्ध मँ फुरइ अस्वबल नाहीं जितावत।
सचमुच तू ओकरी सक्ती स नाहीं बचि सकत्या।
18 जउन लोग यहोवा क अनुसरण करत हीं, ओनका यहोवा लखत ह अउ रखवारी करत ह।
जउन मनई ओकर आराधना करत हीं, ओनका ओकर महान पिरेम बचावत ह।
19 परमेस्सर ओन लोगन क मउत स बचावत ह।
उ सबइ जब भुखान होतेन तब उ ओनका सक्ती देत ह।
20 एह बरे हम यहोवा क बाट जोहब।
उ हमार मदद अउर हमार ढाल अहइ।
21 परमेस्सर मोका आनन्दित करत ह।
मोका फुरइ ओकरे पवित्तर नाउँ पइ भरोसा अहइ।
22 हे यहोवा, हम सचमुच तोहार आराधना करित ह।
तउ तू हम पइ आपन महान पिरेम देखावा।
Awadhi Bible: Easy-to-Read Version. Copyright © 2005 Bible League International.