◀ All Reading Plans / M’Cheyne Bible Reading Plan / Family: 1 Samuel 13; Romans 11. Secret: Jeremiah 50; Psalms 28–29. (Awadhi Bible: Easy-to-Read Version)

Prev Day

August 21, 2025

Next Day

Use the calendar to view readings from this devotional.

August 2025
Su	Mo	Tu	We	Th	Fr	Sa
					1	2
3	4	5	6	7	8	9
10	11	12	13	14	15	16
17	18	19	20	21	22	23
24	25	26	27	28	29	30
31

Return to today's reading

M’Cheyne Bible Reading Plan

The classic M'Cheyne plan--read the Old Testament, New Testament, and Psalms or Gospels every day.

Duration: 365 days

1 समूएल 13

साऊल पहली गल्ती करत ह

13 अब ताई साऊल एक बरिस तलक राज कइ चुका रहा। अउर फुन जब साऊल इस्राएल प दुइ बरिस राज कइ चुका, ²उ इस्राएल स तीन हजार मनई चुनेस। ओहमाँ दुइ हजार उ पचे रहेन जउन बेतेल क पहाड़ी पहँटा क मिकमास मँ ओकरे संग ठहरा रहेन। अउर एक हजार उ मनई रहेन जउन बिन्यामीन क अंदर गिबा मँ योनातान क संग ठहरा रहेन। साऊल फउज क दूसर सिपाहियन क ओनकइ आपन घर पठइ दिहस।

³योनातान गिबा मँ जाइके पलिस्तियन क ओनकइ सिबिर पइ हमला किहस। पलिस्तियन एकरे बारे मँ सुनेन। उ पचे कहेन, “हिब्रू लोग बगावत किहे अहइ।”

साऊल कहेस, “हिब्रू मनइयन क जउन कछू भवा अहइ ओका सुनावा।” ऍह बरे साऊल लोगन्स कहेस कि उ पचे समूचइ इस्राएल देस मँ तुरही बजावइँ। ⁴सबइ इस्राएलियन इ खबर सुनेन। उ पचे कहेन, “साऊल पलिस्ती फउज प्रमुख क मारि डाएस। अब पलिस्तियन फुरे इस्राएलियन स घिना करत हीं।”

इस्राएली लोगन्क साऊल स भेंटइ बरे गिलगाल मँ बोलावा गवा। ⁵पलिस्ती इस्राएल स लड़इ बरे बटुर गएन। पलिस्तियन क लगे तीन हजार रथ अउ छ: हजार घुड़सवार ओकरे फउज मँ रहेन। हुवाँ ऍतना जिआदा पलिस्ती फउजी रहेन जेतँना समुद्दर क किनारे बालू क कन। पलिस्तियन मिकमास मँ सिबिर डाएन। मिकमास बेतावेन क पूरब मँ बाटइ।

⁶इस्राएलियन लखेन कि उ पचे विपत्ति मँ अहइँ। उ पचे आपन क जालि मँ अरझा पाएन। उ पचे गुफा अउ चट्टान क खोदंरे मँ छुप जाइ बरे परानेन। उ सबइ चट्टान, कुआँ अउ भुइयाँ क गड़हा मँ छुप गएन। ⁷कछू हिब्रू यरदन नदी पार कइके गाद अउ गिलाद प्रदेस मँ पराइ गएन। साऊल गिलगाल मँ रहा। ओकरी फउज क सबइ फउजी सिपाहियन डर स थरथरात रहेन।

⁸समूएल कहेस कि उ साऊल स गिलगाल मँ मिली। साऊल हुवाँ सात दिनाँ तलक ओकर प्रतीच्छा किहस। मुला समूएल तब भी गिलगाल नाहीं पहोंचा। सिपाहियन साऊल क तजि देइ लागेन। ⁹ऍह बरे साऊल कहेस, “मोरे बरे होमबलि अउ मेलबलि लइ आवा।” तब साऊल होमबलि चढ़ाएस। ¹⁰जइसन साऊल बलि-भेंट चढ़ाउब खतम किहेस, समूएल आइ गवा। साऊल ओसे भेंटइ गवा।

¹¹समूएल पूछेस, “इ तू का कइ दिहे अहा?”

साऊल जवाब दिहेस, “मइँ सिपाहिन क आपन क तजत लखा अउर तू तब तलक हियाँ नाहीं रह्या, अउर पलिस्ती मिकमास मँ ऍकट्ठा होत रहेन। ¹²मइँ आपन मने मँ सोचेउँ, ‘पलिस्ती हियाँ गिलगाल मँ आइके मोह प हमला करिहीं। अउर मइँ अबहुँ तलक यहोवा स मदद करइ बरे बिनती नाहीं किहेउँ ह। ऍह बरे मइँ आपन क दबाइ दिहेउँ अउ होमबलि चढ़ाएउँ।’”

¹³समूएल कहेस, “तू मूरख क काम किहे ह। तू आपन परमेस्सर यहोवा क हुकुम क नाहीं मान्या। जदि तू परमेस्सर क हुकुम क माने होत्या तउ परमेस्सर तोहरे परिवार क सदा इस्राएल प राज करइ देत। ¹⁴मुला अब तोहार पहँटा लगातार नाही रहीं। यहोवा अइसे मनई क खोज मँ रहेन जउन ओकरे हुकुम क मानइ चाहत होइ। उ उ मनई क पाइ लिहेस ह अउर उ ओका आपन मनइयन क नवा प्रमुख चुनिहीं। तू सबइ यहोवा क हुकुम क मान्या नाहीं। ऍह बरे यहोवा नवा प्रमुख चुनिहीं।” ¹⁵तब समूएल उठा अउर उ गिलगाल क तजि दिहेस।

मिकमास क जुद्ध

साऊल अउ ओकर बची भइ फउज गिलगाल क तजि दिहेस। उ पचे बिन्यामीन मँ गिबा क गएन। साऊल उ मनइयन क गनेस जउन ओकरे संग रहेन। हुवाँ करीब छ: सौ मनसेधू रहेन। ¹⁶साऊल, ओकर पूत योनातान अउ फउजी बिन्यामीन मँ गिबा क गएन।

पलिस्तियन मिकमास मँ डेरा डाएन। ¹⁷पलिस्तियन उ पहँटा मँ रहइवालन इस्राएलियन क सजा देइ क ठान लिहेन। ऍह बरे ओनकइ सबन्ते बरिआर फउज हमला करइ खातिर आपन ठउर तजि दिहेस। पलिस्ती फउज तीन हींसा मँ बँट गइ रहिन। एक टुकड़ी उत्तर मँ ओप्रा क जाइवाली सड़क स समूएल क पहँटा मँ गइ। ¹⁸दूसर टुकड़ी दक्खिन पूरब बेथोरोन क जाइवाली सड़के प गइ। अउ तीसर टुकड़ी पूरब मँ चौहद्दी तलक जाइवाली सड़क स गइ। इ सड़क सबोईम क घाटी मँ रेगिस्तान कइँती खुलत रही।

¹⁹इस्राएली मनइयन मँ स कउनो लोहा क सामान नाहीं बनाइ सकत रहा। ओन दिन इस्राएल मँ लोहार नाहीं रहेन। पलिस्ती इस्राएलियन क लोहा क सामान बनवइ नाहीं सिखात रहेन काहेकि पलिस्ती डेरात रहेन कि इस्राएलियन कहूँ लोहा क तरवार अउ भाला न बनावइ लग जाइँ। ²⁰सिरिफ पलिस्ती लोहा क औजारे प धार चढ़ाइ सकत रहेन। ऍह बरे जदि इस्राएली आपन हरे क फार कुदार अउ कुल्हाड़ी या दराती प धार चढ़ावइ चाहतेन तउ ओनका पलिस्तियन क लगे जाइ क पड़त रहा ²¹पलिस्ती लुहार एक तिहाइ औसे चाँदी क हरे क फार अउ कुदाल पइ धार चढ़ावइ बरे लेत रहेन। अउर एक छटा औंस चाँदी क फरुआ, कुल्हड़ी अउ बैल क साँटी क लोहा क सिरे प धार चढ़ावइ बरे लेत रहेन। ²²ऍह बरे जुद्ध क दिन इस्राएलियन फउजी मँ स कउनो क लगे लोहा क तरवार या भाला नाहीं रहा। सिरिफ साऊल अउ ओकर पूत योनातान क लगे लोहा क औजार रहेन।

²³पलिस्ती सिपाहियन क एक ठु टुकड़ी मिकमास क दर्रा क रच्छा करत रही।

रोमियन 11

परमेस्सर अपने लोगन क नाहीं भूला

11 तउ मइँ पूछित हउँ, “का परमेस्सर अपने ही लोगन क नकार नाहीं दिहेस?” निस्चय ही नाहीं। काहेकि मइँ भी एक इस्राएली हउँ, इब्राहीम क बंस स अउर बिन्यामीन क परिवार स हउँ। ²परमेस्सर अपने लोगन क नाहीं नकारेस जेनका उ पहिलेन स ही चुने रहा। या अउर का तू नाहीं जानत अहा कि एलिय्याह क बारे मँ पवित्तर सास्तर का कहत ह। जब एलिय्याह परमेस्सर स इस्राएल क लोगन क विरोध मँ पराथना करत रहा, ³“हे पर्भू, उ पचे नबियन क मार डाएन। तोहरे वेदियन क तोड़ी क गिराइ दिहेन। केवल एक नबी मइँ ही बचा हउँ अउर उ पचे मोका भी मारि डावइ क जतन करत अहइँ।”^(A) ⁴परन्तु तब परमेस्सर ओन्हे कइसेन उत्तर दिहे रहा, “मइँ अपने बरे 7,000 लोग बचाइ रखे हउँ जउन लोग बाल क आगे माथा नाहीं टेकेन।”^(B)

⁵तउन वइसेन ही आजु काल्हिउ कछू अइसेन लोग बचा बाटेन जउन ओनके अनुग्रह क कारण चुना भआ अहइँ। ⁶अउर अगर इ परमेस्सर क अनुग्रह क परिणाम अहइ तउ लोग जउन करम करत हीं, इ ओन्हन करमन क परिणाम नाहीं बा। नाहीं तउ परमेस्सर क अनुग्रह, अनुग्रह ही नाहीं ठहरत।

⁷तउ ऐहसे का इस्राएल क लोग जेका खोजत रहन, उ सबइ ओका नाहीं पाइ सकेन? परन्तु चुना हुवन क उ मिलि गवा। जब कि बाकी सब क जड़ बनाइ दीन्ह गवा। ⁸पवित्तर सास्तरन कहत ह:

“परमेस्सर तउ ओन्हे एक चेतन सून्य कइ दिहेस आतिमा प्रदान किहेस।” ^(C)

“अइसेन आँखी दिहेस जउन देखि नाहीं सकत रहिन
अउ अइसेन कान दिहेस जउन सुन नाहीं सकत रहेन।
अउर इहइ दसा ठीक आजु तलक बनी भई बा।” ^(D)

⁹दाऊद कहत ह:

“अपनेन भोगन मँ फंसके उ बन्दी बन जाइँ
ओनकर पतन होइ अउ ओनका दण्ड मिलइ।
¹⁰ओनकर आँखी धुँधली होइ जाइँ ताकि उ पचे देख न सकइँ
अउ तू ओनकर सब पीड़ाके तले, ओनकर करिहाउँ हमेसा-हमेसा निहुराए रखइ।” ^(E)

¹¹तउ मइँ कहत हउँ का ओ पचे इही बरे ठोकर खाइके उ सब भहराइके नस्ट होइ जाइँ? निस्चय ही नाहीं। बल्कि ओनकर गलती करइ स गैर यहूदियन क छुटकारा मिला ताकि यहूदियन मँ स्पर्द्धा पैदा होइ। ¹²इही तरह अगर ओनकर गलती करइ क मतलब समूचइ संसार क बड़ा लाभ अहइ अउ अगर ओनके भटकइ स गैर यहूदियन क लाभ अहइ तउ ओनकइ पूरी तरह स संपूर्ण होए स बहुत कछू होइ।

¹³इ अब मइँ तोहसे कहत हउँ, जउन यहूदियन नाहीं होइँ काहेकि मइँ विसेस रूप स गैर यहूदियन क बरे प्रेरित हउँ, मइँ अपने काम क बरे पूरा प्रयत्नसील हउँ। ¹⁴एह आसा स कि मइँ अपने लोगन मँ भी स्पर्द्धा जगाइ सकउँ अउ ओहमाँ स कछू क उद्धार करउँ। ¹⁵काहेकि अगर परमेस्सर क द्वार ओनके नकार दिहे जाइ स जगत मँ परमेस्सर क साथे मेलमिलाप पैदा होत ह तउ फिन ओनकर अपनावा जाब का मरा हुवन मँ स जियावा जाब न होइ? ¹⁶अगर हमरी भेंट का एक पहला हिस्सा पवित्तर बा तउ का उ समूचइ पवित्तर नाहीं बा? अगर पेड़ का जड़ पवित्तर बा तउ ओकर सबइ साखा भी पवित्तर बाटिन।

¹⁷परन्तु अगर कछू साखा तोड़िके फेक दीन्ह गइन अउ तू जउन एक जंगली जैतून क टहनी अहा ओह पे पेबन्द चढ़ाइ दीन्ह जाइ अउ उ जैतून क अच्छा पेड़ का खुराक अउर आधार क हिस्सा बाँटइ लगइ। तू सबइ गैर यहूदियन जंगली साखा क तरह अहा अउर तू पचे पहिले पेड़ (यहूदी) क खुराक अउर जीवन बाँटत अहा। ¹⁸तउ तोहे ओन्हन टहनियन क आगे, जउन तोड़ी क फेंक दीन्ह गइन, अभिमान न करइ चाही। अउर अगर तू अभिमान करत ह तउ इ याद रखा इ तू नाहीं अहा जे जड़न क पालत बा, बल्कि इ तउ उ जड़ ही अहइ जउन तोहे पालत बाटइ। ¹⁹अब तू कहब्या, “हाँ परन्तु सबइ साखा एह बरे तोड़ी गई कि मोर पेबन्द चढ़इ।” ²⁰इ सत्य अहइ, उ सबइ अपने अबिसवास क कारण तोड़िके फेंक गइन परन्तु तु अपने बिसवास क बल पे आपन जगह टिका रह्या। इही बरे एकर गर्ब न करा बल्कि डेरात रहा। ²¹अगर परमेस्सर प्राकृतिक डारन नाहीं रहइ दिहेस तउ उ तोहका भी न रहइ देइ।

²²इही बरे तू परमेस्सर क कोमलता क देखा, अउर ओकरे कठोरता प धियान द्या। इ कठोरता ओनके बरे बा जउन गिर गएन परन्तु ओकर करुणा तोहरे बरे बा अगर तू अपने पे ओकर अनुग्रह बना रहइ द्या। नाहीं तउ पेंड़े स तुहउँ काटिके फेंका जाब्या। ²³अउर अगर उ पचे अपने अबिसवास मँ नाहीं रहेन तउ ओनहूँ फिन पेड़ स जोड़ लीन्ह जाइ काहेकि परमेस्सर समर्थ अहइ कि ओनका फिन स जोड़ देइ। ²⁴जब तोहे प्राकृतिक रूप स जंगली जैतून क पेड़े स एक साखा क तरह कटके प्रकृति क विरुद्ध एक अच्छा जैतून क पेड़े स जोड़ दीन्ह गवा, तउ उ जउन ओह पेड़े क अपना डारिन बाटिन, अपनेन ही पेड़ मँ आसानी स, फिन स काहे नाहीं जोड़ दीन्ह जा इहीं।

²⁵भाइयो तथा बहिनियो, मइँ तोहे इ छुपा हुआ सत्य स अंजान नाही रखइ चाहित। कि तू अपने आप क बुद्धिमान समझइ लागा। कि इस्राएल क कछू लोग अइसेन ही कठोर बनाइ दीन्ह गवा बाटेन। अउर अइसेनइ ही कठोर बना रइहीं जब तलक कि काफी गैर यहूदी लोग परमेस्सर क परिवार क अंग नाहीं बन जातेन। ²⁶अउर एह तरह समूचा इस्राएल क उद्धार होइ जइसेन कि पवित्तर सास्तरन कहत ह:

“उद्धारकर्ता सिय्योन स आइ।
उ याकूब क परिवार स सबहिन बुराइयन क दूर करी।
²⁷मोर इ करार ओकरे साथे तब होइ
जब मइँ ओनके पापन के हर लेब।” ^(F)

²⁸जहाँ तलक सुसमाचार क सम्बन्ध बा, उ तोहरे हिते मँ परमेस्सर क सत्रु अहइँ। परन्तु जहाँ तलक परमेस्सर क जरिये ओनके चुना जाइ क सम्बन्ध अहइ, उ पचे ओनके पूर्वजन क दिए भए बचन क अनुसार परमेस्सर क पियारा अहइँ। ²⁹काहेकि परमेस्सर जेका बोलावत ह अउर जेका उ देत ह, ओकरे तरफ स अपन मन कभउँ नाहीं बदलत। ³⁰काहेकि जइसेन तू लोग पहिले कभउँ परमेस्सर क आज्ञा नाहीं मानत रह्या परन्तु अब तोहे ओकर अवज्ञा क कारण परमेस्सर क द्या मिली बा। ³¹वइसेन ही अब उ पचे ओकर आज्ञा नाहीं मानतेन काहेकि परमेस्सर क द्या तोहे पे बा ताकि अब ओन्हे भी परमेस्सर क दया मिलइ। ³²काहेकि परमेस्सर सब जने के अवज्ञा क कारागार मँ इही बरे डारि रखे अहइ कि उ ओन सब पर दया देखॉय सकइ।

परमेस्सर धन्य अहइ

³³परमेस्सर क करुणा, बुद्धि अउर ज्ञान केतॅना अपरम्पार अहइ। ओकरे निआव केतॅना गहन बा, ओकर रस्ता केतना गूढ़ बा। ³⁴पवित्तर सास्तर कहत ह:

“पर्भू क मने क कउन जानत ह?
अउर ओका सलाह देइवाला कउन होइ सकत ह?” ^(G)

³⁵“परमेस्सर क केऊ का दिहे अहइ कि
उ कउनो क ओकरे बदले कछू देइ।” ^(H)

³⁶काहेकि सब क रचनावाला उहइ बा। उही स सब स्थिर बाटेन अउर उ उही क बरे बा। ओकर हमेसा महिमा होइ। आमीन।

यिर्मयाह 50

बाबुल क बारे मँ सँदेसा

50 इ सँदेसा यहोवा क अहइ जेका उ बाबुल रास्ट्र अउ बाबुल क लोगन बरे दिहस। यहोवा इ सँदेसा यिर्मयाह क जरिये दिहस।

²“हर एक रास्ट्र क इ घोसित कइ द्या।
    झण्डा उठावा अउर सँदेसा सुनावा।
पूरा सँदेसा सुनावा अउर कहा,
    ‘बाबुल रास्ट्र पइ अधिकार कीन्ह जाइ।
बेल देवता लज्जा क पात्र बनी।
    मरोदेक देवता बहोत डेराइ जाइ।
बाबुल क देवमूरतियन लज्जा क पात्र बनहीं
    ओकर मूर्ति देवता भयभीत होइ जइहीं।’
³उत्तर स एक रास्ट्र बाबुल पइ हमला करी।
    उ रास्ट्र बाबुल क सूना रेगिस्तान स बनाइ देइ।
कउनो मनई हुआँ नाहीं रही।
    मनई अउ पसु दुइनउँ हुआँ स पराइ जइहीं।”
⁴यहोवा कहत ह, “उ समइ,
    इस्राएल क अउर यहूदा क लोग एक संग होइहीं।
उ पचे एक संग बराबर रोवत रहिहीं
    अउर एक संग ही उ पचे आपन यहोवा परमेस्सर क खोजइ जइहीं।
⁵उ सबइ लोग पूछिहीं सिय्योन कइसे जाइँ
    उ पचे उ दिसा मँ चलब सुरू करिहीं।
लोग कहिहीं, ‘आवा, हम यहोवा स जाइ मिलइँ,
    हम एक अइसी करार करी जउन सदा ही रहइ।
    हम लोग एक ठु अइसी करार करी जेका हम कबहुँ न बिसरी।’

⁶“मोर लोग हेरान भेड़िन क तरह होइ ग अहइँ।
    ओनकर गड़रियन ओनका गलत राहे पइ लइ गवा अहइँ।
ओनकर मार्गदर्सकन ओनका पहाड़न अउर पहाड़ियन मँ चारिहुँ कइँती भटकाएन ह।
    उ पचे बिसरि गएन कि ओनकर बिस्राम क ठउर कहाँ अहइ।
⁷जउन भी मोरे लोगन क पाएस,
    चोट पहोंचाएस अउर ओन कहेन,
‘हम कछू गलत नाहीं कीन्ह।
    वे लोग ही यहोवा क खिलाफ पाप किहेन।
यहोवा ओनकर बिस्राम क ठउर अहइ।
    अउर परमेस्सर जेह पइ ओकर पुरखन पतियानेन।’

⁸“बाबुल स पराइ निकरा।
    कसदी लोगन क देस क तजि द्या।
    ओन बोकरन क तरह बना जउन झूण्ड क राह देखावत हीं।
⁹मइँ बहोत स रास्ट्रन क उत्तर स एक संग लिआउब।
    रास्ट्रन क इ समूह बाबुल क बिरुद्ध जुद्ध बरे तइयार होइ।
बाबुल उत्तर क लोगन क जरिये अधिकार मँ लिआवा जाइ।
    उ सबइ रास्ट्र बाबुल पइ अनेक बाण चलइहीं
अउर उ सबइ बाण ओन फउजियन क समान होइहीं
    जउन जुद्ध भूइँया स खाली हाथ नाहीं लउटेन।
¹⁰दुस्मन कसदी लोगन स सारा धन लेइ।
    उ सबइ दुस्मन फउजी जउन चहिहीं, लेइहीं।”
इ सबइ यहोवा कहत ह।

¹¹“बाबुल, तू उत्तेजित अउ खुस ह्वा।
    तू मोर देस लिहा।
तू अनाज क चारिहुँ कइँती
    गइया क तरह नाचत अहा।
तोहार हँसी घोड़न क
    हिनहिनाहट जइसी अहइ।
¹²अब तोहार महतारी बहित लजाइ
    तोहका जन्म देइवाली महतारी क ग्लानि होइ
बाबुल सबहिं रास्ट्रन क तुलना मँ सब स कम महत्व क होइ।
    उ एक सूना रेगिस्तान होइ।
¹³यहोवा आपन किरोध परगट करी।
    एह बरे कउनो मनई हुआँ नाहीं रही।
    बाबुल नगर पूरी तरह खाली रही।
बाबुल स गुजरइवाला हर एक मनई डेराइ।
    उ पचे आपन मूँड़ हिलइहीं जब उ पचे लखिहीं कि इ कउने बुरी तरह नस्ट भवा ह।

¹⁴“बाबुल क खिलाफ जुद्ध क तइयारी करा।
    सबहिं फउजियन आपन धनुस स बाबुल पइ बाण चलावा।
आपन बाणन क न बचावा।
    बाबुल यहोवा क खिलाफ पाप किहस ह।
¹⁵बाबुल क चारिहुँ ओर क फउजियो, जुद्ध क उद्घोस करा।
    अब बाबुल आत्म समर्पण किहेस ह।
    ओकर दीवारन अउर गुम्बदन क गिराइ दीन्ह ग अहइ।
यहोवा ओन लोगन क उ सजा देत अहइ जउन ओनका मिलइ चाही।
    रास्ट्रो तू बाबुल क उ सजा द्या जउन मिलइ चाही।
    ओकर संग उ करा जउन उ दूसर रास्ट्रन क संग किहस ह।
¹⁶बाबुल क लोगन क ओनकर फसलन न उगावइ द्या।
    ओनका फसलन न काटइ द्या।
बाबुल क फउजी आपन नगर मँ अनेकन कैदी लियाएन ह।
    अब दुस्मन क फउजी आइ गवा अहइँ,
    एह बरे उ पचे कैदी आपन घर लउटत अहइँ।
    उ सबइ कैदी आपन देसन क वापस परात अहइँ।

¹⁷“इस्राएल भेड़ी क तरह अहइ जेका
    सेरन पाछा कइके भगाइ दिहन ह।
ओका खाइवाला पहिला सेर अस्सूर क राजा रहा।
    ओकर हाड़न क चूर करइवाला आखिरी सेर बाबुल क राजा नबूकदनेस्सर रहा।
¹⁸एह बरे सर्वसक्तीमान यहोवा, इस्राएल क परमेस्सर कहत ह:
‘मइँ हाली ही बाबुल क राजा अउर ओकर देस क सजा देब।
    मइँ ओका वइसे ही सजा देब जइसे मइँ अस्सूर क राजा क सजा दिहेउँ।

¹⁹“‘मुला इस्राएल क मइँ ओकरे खेतन मँ वापस लिआउब।
    उ उहइ भोजन करी जउन कर्मेल पर्वत अउर बासान क भुइँया क उपज अहइ।
उ भोजन करी अउर भरा पूरा होइ।
    उ एप्रैम अउर गिलाद भुइँया मँ पहाड़ियन पइ खाइ।’”
²⁰यहोवा कहत ह, “उ समइ लोग इस्राएल क अपराध क जानइ चहिहीं।
    किन्तु कउनो अपराध नाहीं होइ।
लोग यहूदा क पापन क जानइ चहिहीं
    किन्तु कउनो पाप नाहीं मिली।
काहेकि मइँ इस्राएल अउ यहूदा क कछू बचे भएन क बचावत अहउँ
    अउर मइँ ओनकर सबहिं पापन बरे ओनका छिमा करत हउँ।”

²¹यहोवा कहत ह, “मरातैम देस पइ हमला करा।
    पकोद क पहँटा क निवासियन पइ हमला करा।
ओन पइ हमला करा,
    ओनका मार डावा अउर ओनका पूरी तरह नस्ट कइ द्या।
    उ सब करा जेकरे बरे मइँ आदेस देत हउँ।

²²“जुद्ध क घोस समूचइ देस मँ सुना जाइ सकत ह।
    इ बहोत जियादा बिध्वंस क सोर अहइ।
²³बाबुल ‘पूरी भुइँया क हथौड़ा’ रहा।
    किन्तु अब हथौड़ा टूट गवा बिखराइ गवा अहइ।
बाबुल सबन मँ सब स जियादा
    बर्बाद रास्ट्रन मँ स एक अहइ।
²⁴बाबुल, तू एक जाल बिछाएउँ,
    किन्तु खुद ही तू एहमाँ आइ फँसा अउर तू लख भी नाहीं पाएस कि उ आवत रहा।
तू यहोवा क खिलाफ लड़्या,
    एह बरे तू मिल गया अउर धरा गया।
²⁵यहोवा आपन भण्डार खोल दिहस ह।
    अउर आपन किरोध क अस्त्र-सस्त्र निकारेस ह।
सर्वसक्तीमान परमेस्सर यहोवा ओन अस्त्र-सस्त्र क निकारेस ह
    काहेकि ओका कसदी लोगन क देस मँ काम करब अहइ।

²⁶“बहोत दूर स बाबुल क खिलाफ आवा,
    ओकर अन्न भण्डार घरन क तोड़िके खोला।
बाबुल क पूरी तरह नस्ट करा
    अउर कउनो क जिअत न छोड़ा।
    ओनकर ल्हासन क अनाजे क बड़के ढेर क तरह एक ढेर मँ लगावा।
²⁷बाबुल क सबहिं नउ जवानन क मार डावा।
    ओनकर नरसंहार होइ द्या।
ओनकर पराजय क समय आइ गवा अहइ।
    एह बरे ओनके बरे बहोत बुरा होइ।
    इ ओनके बरे दण्डित होइ क समइ अहइ।
²⁸लोग बाबुल देस स परात अहइँ,
    उ पचे उ देस स बच निकरत अहइँ।
उ सबइ लोग सिय्योन क आवत अहइँ अउर उ पचे सबहिं स उ सब कहत अहइँ जउन यहोवा करत अहइ।
    उ सबइ कहत अहइँ कि बाबुल क, जउन सजा मिलइ चाही यहोवा ओका देत अहइ।
    बाबुल यहोवा क मन्दिर क नस्ट किहस, एह बरे अब यहोवा बाबुल क नस्ट करत अहइ।

²⁹“धनुर्धारियन क बाबुल क खिलाफ बोलावा।
    ओन लोगन स नगर पइ हमला करइ क कहा।
कउनो क बच निकरइ जिन द्या।
    जउन उ किहस ह ओकर उल्टा भुगतान करा।
ओकरे संग उहइ करा
    जउन उ दूसर रास्ट्रन क संग किहेस ह।
बाबुल यहोवा क सम्मान नाहीं किहेस।
    बाबुल इस्राएल क पवित्तरतम क बरे बड़ा घमण्डी रहा।
    एह बरे बाबुल क सजा द्या।
³⁰बाबुल क नउ जवान सड़कन पइ मारा जइहीं,
    ओह दिन सबहिं फउजी मर जइहीं।”
इ सबइ यहोवा कहत ह।

³¹“बाबुल, तू बहोत गर्वीला अहा,
    अउर मइँ तोहरे खिलाफ हउँ।”
    हमार सुआमी सर्वसक्तीमान यहोवा इ सब कहत ह।
“मइँ तोहरे खिलाफ हउँ
    अउर तोहरे दण्डित होइ क समइ आइ गवा ह।
³²गर्वीला बाबुल ठोकर खाइ अउ गिरी
    अउर कउनो मनई ओका उठावइ मँ मदद नाहीं करी।
मइँ ओकरे नगरन मँ आगी लगाउब,
    उ आगी ओकरे चारिहुँ कइँती क सबहिं क पुरी तरह बारि देइ।”

³³सर्वसक्तीमान यहोवा कहत ह,
“इस्राएल अउ यहूदा क लोग दास अहइँ।
    दुस्मन ओनका लइ गवा अउर दुस्मन इस्राएल क निकरि जाइ नाहीं देइ।
³⁴मुला परमेस्सर ओन लोगन क वापस लिआइ।
    ओकर नाउँ सर्वसक्तिमान परमेस्सर यहोवा अहइ।
उ दृढ़ सक्ति स ओन लोगन क रच्छा करी।
    उ ओनकर रच्छा करी जेहसे उ पृथ्वी क बिस्राम दइ सकइ।
    किन्तु उ बाबुल क लोगन क बिस्राम नाहीं देइ।”

³⁵यहोवा कहत ह,
“बाबुल क लोगन क तरवार स मार द्या।
    बाबुल क राजकीय अधिकारियन
    अउ ग्यानियन क भी तरवार स मर जाइ द्या।
³⁶बाबुल क याजकन क तरवार स मार द्या।
    उ सबइ याजक मूरख लोगन क तरह होइहीं।
बाबुल क फउजियन क तरवार स मर जाइ द्या,
    उ सबइ फउजी त्रास स भरि जइहीं।
³⁷बाबुल क घोड़न अउर रथन क तरवार क घाट उतरइ द्या।
    दूसर देसन क भाड़े क फउजियन क तरवार स कट जाइ द्या।
    उ सबइ फउजी भयभीत अबला होइहीं।
बाबुल क खजाने क खिलाफ तरवार उठइ द्या,
    उ सबइ खजानन लइ लीन्ह जइहीं।
³⁸बाबुल क नदियन सूख जाइँ।
    उ सबइ नदियन सूख जइहीं।
बाबुल देस मँ असंख्य देवमूरतियन अहइँ।
    उ सबइ मूरतियन परगट करत हीं कि बाबुल क लोग मूरख अहइँ।
    एह बरे ओन लोगन क संग बुरी घटनन घटिहीं।
³⁹बाबुल फुन लोगन स नाहीं भरी
    जंगली कुकुरन, सुतुरमुर्ग अउर दूसर रेगिस्तान क जनावर हुआँ रहिहीं।
    किन्तु हुआँ कबहुँ कउनो मनई नाहीं रही।
⁴⁰परमेस्सर सदोम, अमोरा अउ ओनके चारिहुँ कइँती क नगरन
    क पूरी तरह स नस्ट किहे रहा
अउर जब ओन नगरन मँ कउनो नाहीं रहत।
    इहइ तरह बाबुल मँ कउनों नाहीं रही
अउर कउनो मनई हुआँ रहइ कबहुँ नाहीं जाइ।

⁴¹“लखा, उत्तर स लोग आवत अहइँ,
    उ पचे एक सक्तीसाली रास्ट्र स आवत अहइँ।
    पूरे संसार क चारिहुँ ओर स एक संग बहोत स राजा आवत अहइँ।
⁴²ओनकी फउज क लगे धनुस अउर भालन अहइँ,
    फउजी कूर अहइँ,
    ओनमाँ दाया नाहीं अहइ।
फउजी आपन घोड़न पइ सवार आवत अहइँ,
    ओकर दोड़इ क आवाज समुद्दर क गरजन क तरह अहइ।
उ पचे आपन जगहियन पइ जुद्ध बरे तइयार अहइँ।
    बाबुल नगर उ पचे तोह पइ हमला करइ क तत्पर अहइँ।
⁴³बाबुल क राजा ओन फउजन क बारे मँ सुनेस,
    अउर उ आतंकित होइ गवा।
उ एतना डर गवा ह कि ओकर हाथ हल नाहीं सकतेन।
    ओकरे डर स ओकरे पेट मँ अइसी पीरा होत अहइ, जइसे उ बच्चा पइदा करइवाली मेहरारू होइ।”

⁴⁴यहोवा कहत ह, “कबहुँ यरदन नदी क निचके क
    घनी झाड़ियन स एक ठु सेर निकरी।
उ सेर ओन खेतन मँ आइ
    जहाँ लोग आपन जनावरन रखत हीं
अउर सब जनावर पराइ जइहीं।
    मइँ उ सेर क तरह होब।
मइँ बाबुल, स ओकर देस छोड़ाउब।
    इ करइ बरे मइँ केका चुनब?
    मइँ जेका चाहब चुनब।
काहेकि अइसा कउनो मनई नाहीं जउन मोका चुनौती दइ सकइ।
    कउनो गड़रिया मोर समन्वा खड़ा नाहीं होइ सकत।”

⁴⁵बाबुल क संग यहोवा जउन कछू करइ क
    जोजना बनाएस ह, ओका सुना।
“बाबुल लोगन बरे यहोवा जउन करइ क निर्णय लिहस ह ओका सुना।
    दुस्मन बाबुल क लोगन क खींच लेइ जाब्या
जइसा एक बछड़ा क झुण्ड स खींच लइ जाइ जात ह।
    उ बाबुल क एक खाली खेत मँ बदल देब।
⁴⁶बाबुल क पतन होइ,
    अउर उ पतन पृथ्वी क कँपकँपाइ देइ।
सबहिं रास्ट्रन क लोग
    बाबुल क बिध्वंस होइ क बारे मँ सुनिहीं।”

भजन संहिता 28-29

दाऊद क समपिर्त।

¹हे यहोवा, तू मोर चट्टान अहा,
    मइँ तोहका मदद पावइ क गोहरावत हउँ।
    मोरा पराथनन स आपन कान जिन मूँदा,
अगर तू मोर मदद क पुकार क जवाब नाहीं देब्या,
    तउ लोग मोका कब्र मँ मरा भवा जइसा पइहीं।
²हे यहोवा, आपन पवित्तर तम्बू कइँती बढ़्या, मइँ तोहार पराथना बरे आपन हाथ उठाए हउँ।
    जब मइँ तोहका पुकारउँ, तू मोर सुना।
    तू मोहे पइ आपन करुणा देखाँवा।
³हे यहोवा, मोका ओन बुरे मनइयन क तरह जिन सोचा
    जउन बुरा काम करत हीं।
जउन आपन पड़ोसियन स सान्ति करत हीं,
    मुला आपन हिरदइ मँ आपन पड़ोसियन क बारे मँ कुचक्र रचत हीं।
⁴हे यहोवा, उ सबइ मनइयन दूसर लोगन क बुरा करत हीं।
    तउ तू ओनकी संग बुरी घटना क घटावा
    ओन दुर्जनन क तू वइसेन ही दण्ड द्या जइसे ओनका देइ चाही।
⁵दुर्जन ओन उत्तिम बातन क जउन यहोवा करत ओका नाहीं समुझतेन।
    उ पचे परमेस्सर क उत्तिम कारजन क नाहीं लखतेन।
उ पचे ओकर भलाई क नाहीं समुझतेन।
    उ पचे तउ सिरिफ कउनो क नास करइ क जतन करत हीं।

⁶यहोवा क स्तुति करा!
    उ मोहे पइ करुणा करइ क बिनती सुनेस।
⁷यहोवा मोर सक्ति अहइ, उ मोर ढार अहइ।
    मोका ओकर भरोसा रहा।
उ मोर मदद किहेस।
    मइँ बहोतइ खुस हउँ, अउ ओकर खुसी क गीत गावत हउँ।
⁸यहोवा आपन चुना राजा क रच्छा करत ह।
    उ ओका हर पल बचावत ह।
    यहोवा ही ओकर सक्ती अहइ।

⁹हे परमेस्सर, आपन लोगन क रच्छा करा।
जउन तोहार अहइँ ओनका आसीस द्या।
ओनका धियान रखा अउर हमेसा ओनका लइके चला।

दाऊद क एक गीत।

¹परमेस्सर क पूत लोगो, यहोवा क स्तुति करा।
    ओकर महिमा अउ सक्ती क प्रसंसा गीत गावा।
²यहोवा क प्रसंसा करा अउ ओकरे नाउँ क आदर करा।
    पवित्तर ओढ़ना पहिरिके यहोवा क आराधना करा।
³समुद्र क ऊपर यहोवा क वाणी खुद क गरजत ह।
    परमेस्सर क वाणी महासागर क ऊपर मेघ क गरजन क तरह गरजत ह।
⁴यहोवा क वाणी ओकर सक्ती क देखाँवत ह।
    ओकर ध्वनि ओकर महिमा क परगट करत ह।
⁵यहोवा क वाणी देवदार बृच्छन क तोड़के चकनाचूर कइ देत ह।
    यहोवा लबानोन क विसाल देवदार बृच्छन क तोड़ देत ह।
⁶यहोवा लबानोन क पहाड़न क कपाँइ देत ह।
    उ नाचत भए बछवा क तरह देखाँइ लागत ह।
    हेर्मोन क पहाड़ काँप उठत ह अउर उछरत जवान बकरी क तरह देखाँत ह।
⁷यहोवा क वाणी बिजली क कौंध स टकरात ह।
⁸यहोवा क वाणी मरुस्थल क कँपाइ देत ह।
    यहोवा क स्वर स कादेस क मरुस्थल काँप उठत ह।
⁹यहोवा क वाणी स हिरन डेराइ जात हीं।
    यहोवा दुर्गम जंगलन क नस्ट कइ देत ह।
मुला ओकरे मन्दिर मँ लोग ओकर प्रसंसा क गीत गावत हीं।

¹⁰जल प्रलय क समय यहोवा राजा रहा।
उ सदा बरे राजा रही।
¹¹यहोवा आपन भगतन क रच्छा सदा करी,
अउर आपन जनन क सांति क आसीस देइ।

Awadhi Bible: Easy-to-Read Version (ERV-AWA)