◀ All Reading Plans / M’Cheyne Bible Reading Plan / Family: 1 Samuel 11; Romans 9. Secret: Jeremiah 48; Psalm 25. (Awadhi Bible: Easy-to-Read Version)

Prev Day

August 19, 2025

Next Day

Use the calendar to view readings from this devotional.

August 2025
Su	Mo	Tu	We	Th	Fr	Sa
					1	2
3	4	5	6	7	8	9
10	11	12	13	14	15	16
17	18	19	20	21	22	23
24	25	26	27	28	29	30
31

Return to today's reading

M’Cheyne Bible Reading Plan

The classic M'Cheyne plan--read the Old Testament, New Testament, and Psalms or Gospels every day.

Duration: 365 days

1 समूएल 11

11 अउर अम्मोनी नाहास अउ ओकर फउज याबेस गिलाद क घेर लिहस। याबेस क सबहिं मनइयन नाहास स कहेस, “अगर तू हमरे संग मेल करब्या, तउ हम पचे तोहार सेवकन बन जाब।”

²मुला अम्मोनी नाहास स जवाब दिहेस, “मइँ तू पचन क संग तब मेल करब जब मइँ हर कउनो मनई क दाहिन आँखी निकारि लेब। ऍहसे सबहिं इस्राएलियन लजाइ जइहीं।”

³याबेस क बुजुर्गन नाहास स कहेन, “हम पचे सात दिना क टेमॅ लेब। हम समूचइ इस्राएल मँ दूत पठउब। जदि कउनो मदद बरे न आई तउ हम पचे तोहरे लगे आउब अउर आपन क अर्पण कइ देब।”

साऊल याबेस गिलाद क रच्छा करत ह

⁴तउ उ सबइ दूतन गिबा मँ आएन जहाँ साऊल रहत रहा। उ पचे मनइयन क खबर दिहेन। लोग जोर स रोवत रहेन। ⁵साऊल आपन गइयन क संग खेते गवा रहा। साऊल खेते स लौटा अउर उ मनइयन क रोउब सुनेस। साऊल पूछेस, “मनइयन क का कस्ट अहइ? उ पचे काहे रोवत अहइ?”

तब मनइयन याबेस क दूतन जउन कहे रहेन साऊल क बताएन। ⁶साऊल ओनकइ बातन क सुनेस। तब्बइ परमेस्सर क आतिमा साऊल प बड़ी जल्दी स उतरी। साऊल जिआदा कोहाइ गवा। ⁷साऊल गाय क जोड़ी लिहेस अउ ओनकइ बोटी बोटी कइ डाएस। तब उ गइयन क बोटी क ओन दूतन क दिहस। उ दूतन क हुकुम दिहेस कि उ पचे इस्राएल क समूचइ देस मँ लइ जाइँ। उ ओनसे इस्राएल क मनइयन क इ संदेसा देइ बरे कहेस, “आवा, साऊल अउ समूएल क अनुसरण करा। जदि कउनो मनई नाहीं आवत अउर ओकर मदद नाहीं करत तउ ओकरी गाय क संग इहइ होई।”

लोगन मँ यहोवा क डर छाइ गवा। उ पचे एक ठु इकाई क तरह एक संग बटुर गएन। ⁸साऊल सबहिं मनइयन क बजक स एक संग बटोरेस। हुवाँ इस्राएल क तीन लाख मनसेधू अउ यहूदा स तीस हजार मनसेधू रहेन।

⁹साऊल अउ ओकर फउज याबेस क दूतन स कहेन, “गिलाद मँ याबेस क मनइयन स कहा कि भियान दुपहरे तलक तू पचन क रच्छा होइ जाइ।”

दूतन साऊल क संदेसा याबेस क मनइयन क दिहेन। याबेस क मनई बहोत खुस भएन। ¹⁰तबहिं याबेस क मनइयन अम्मोनी नाहास स कहेन, “हम पचे भियान तोहरे लगे आउब। तब तू हम सबन क संग जउन चाहा कइ सकत ह।”

¹¹दूसर दिन भिन्सारे साऊल आपन फउज क तीन हींसा मँ बांटेस। जइसे ही सूरज निकरत साऊल अउ ओकर फउज अम्मोनी डेरा मँ हमला किहेन। साऊल उ टेम मँ हमला किहेस, जब उ पचे भिन्सारे रच्छक क बदलत रहेन। साऊल अउ ओकर फउज दुपहर स पहिले ओनका हराइ दिहेन। अम्मोनी फउज अलग-अलग दिसा मँ पराइ गएन यहाँ तलक कि दुइ सिपाही भी एक संग नाहीं जम सकेन।

¹²तब मनइयन समूएल स कहेन, “उ पचे कहाँ बाटेन जउन कहत हीं कि हम साऊल क राजा क रुप मँ हुकुम करइ देब नाहीं चाहित? उ मनइयन क लइ आवा हम ओनका मारि डाउब।”

¹³मुला साऊल कहेस, “नाहीं आज कउनो क जीन मारा। आज यहोवा इस्राएल क रच्छा किहेस ह।”

¹⁴तब साऊल मनइयन स कहेस, “आवा हम पचे गिलगाल चली। हम पचे साऊल क राजा क तोर पर फुन अनुमोदन करब।”

¹⁵तउ सबहिं मनइयन गिलगाल चला गएन। हुवाँ यहोवा क समन्वा मनइयन साऊल क राजा बनाएन। उ पचे यहोवा क मेलबलि चढ़ाएन। अउर सबइ इस्राएलियन खुसी मनाएन।

रोमियन 9

परमेस्सर अउर यहूदियन

9 मसीह मँ मइँ सही कहत हउँ। मइँ झूठ नाही कहित अउर मोर चेतना जउन पवित्तर आतिमा क जरिये प्रकासित बा, मोरे साथ मोरे साच्छी देत ह ²कि मोका गहिर दुःख बा अउर मोरे मने मँ मइँ पीड़ा बा। ³कास मइँ चाहि सक्ति कि आपन भाइ-बन्धुवन अउर दुनियाबी सम्बन्धन क बरे मइँ मसीह क साप अपने ऊप्पर लइ लेइत अउर ओसे अलग होइ जाइत। ⁴जउन इस्राएली बाटेन अउर जेनका परमेस्सर संपालित संतान होइ क अधिकार बा, जउन परमेस्सर क महिमा क दरसन कइ चुका बाटेन, जउन परमेस्सर क करार क भागीदारे अहइँ। जेनका मूसा क व्यवस्था, सच्ची आराधना अउर बचन प्रदान कीन्ह गवा बा। ⁵पूर्वजन उहीं स सम्बन्ध रखत ह अउर मनई सरीर क दिस्टी स मसीह उहीं मँ पइदा भवा जउन सबक परमेस्सर अहइ अउर हमेसा धन्य बा। आमीन!

⁶अइसेन नाहीं बा कि परमेस्सर आपन बचन पूरा नाहीं किहे बा काहेकि जउन इस्राएल क बंसज बाटेन उ सभन इस्राएली नाहीं अहइँ। ⁷अउर न तउ इब्राहीम क बंसज होइ क कारण उ सब सच्चाइ-मुच्चइ इब्राहीम क संतान अहइँ। बल्कि (जइसेन परमेस्सर कहेस) “तोहार बंसज इसहाक क द्वारा आपन परम्परा बढ़ावइँ।”^(A) ⁸मतलब इ नाहीं अहइ कि प्राकृतिक तउर पे सरीर स पैदा होइवाला बच्चा परमेस्सर क बंसज अहइ, बल्कि परमेस्सर क बचन स प्रेरित होइवाले ओनकर बंसज माना जात हीं। ⁹बचन एह तरह कहा गवा रहा: “निस्चित समइ पे मइँ लउटब अउर सारा पुत्रवती होई।”^(B)

¹⁰ऍतनइ नाहीं जब रिबका भी एक मनई, हमार पहिले क पिता इसहाक स गर्भवती भइ ^11-12त बेटवन क पैदा होइ स पहिले अउर ओकरे कछू भला बुरा करइ स पहिले कहा गवा रहा जेहसे परमेस्सर क उ प्रयोजन सिद्ध होइ जउन चुनाव स सिद्ध होइ। अउर जउन मनईक क करमन पे नाहीं टिका बल्कि उ परमेस्सर पे टिका बा जउन बोलावइवाला अहइ। रिबका स कहा गवा बा, “बड़का बेटवा छोटे बेटवा क सेवा करी।”^(C) ¹³पवित्तर सास्तर कहत ह, “मइँ याकूब क चुनउँ अउर एसाव क नकार दिहेउँ।”^(D)

¹⁴तउ फिन हम का कही? का परमेस्सर अन्यायी बा? ¹⁵निस्चय ही नाहीं। काहेकि परमेस्सर मूसा स कहे रहा, “मइँ जउन कउनो पे उ दया करइ क सोचब, दया देखाउब। अउ जउन कउनो पे उ अनुग्रह करइ चाहब, अनुग्रह करब।”^(E) ¹⁶इही बरे न तउ कउनउ क इच्छा अउर प्रयास बल्कि दयालु परमेस्सर पे निर्भर करत ह। ¹⁷काहेकि सास्तर मँ परमेस्सर तउ फिरौन स कहे रहा: “मइँ तोहका इही बरे खड़ा किहे रहेउँ कि मइँ आपन सक्ति तोहमाँ देखाइ सकी। अउर मोर नाउँ समूची धरती पे घोसित कीन्ह जाइ।”^(F)

¹⁸तउ परमेस्सर जेहका चाहत ह दया करत ह अउ जेका चाहत ह कठोर बनाइ देत ह।

¹⁹तउ फिन तू सायद मोसे कह्या, “अगर हमरे करमन क नियन्त्रण करइवाला परमेस्सर बा त फिन उ ओहमाँ हमार दोस काहे समझत ह?” आखिरकार ओकरी इच्छा क विरोध कउन कइ सकत ह? ²⁰अरे मनई तू कउन होत अहा जे परमेस्सर क उलटि के उत्तर देइ? का कउनउ रचना अपने रचइवालन स पूछ सकत ह कि “तू मोका अइसेन काहे बनाया?” ²¹का कीहीउ कोहार क मिट्टी पे इ अधिकार नाहीं बा कि उ कीहीऊँ एक लँऊदा स एक भाँड़ बिसेस प्रयोजन बरे अउ दूसर हीन प्रयोजन बरे बनावइ?

²²परन्तु एहमाँ का बा अगर परमेस्सर त आपन किरोध देखॉवइ अउर आपन सक्ति जतावइ क बरे ओन्हन भाँडन क जउन किरोध क पात्र रहेन अउर जेकरे बिनास होइ क रहा, बड़ा धीरज क साथे सही, ²³उ ओनकइ सहेस ताकि उ भाँडन क लाभ बरे जउन दया क पात्र रहेन अउर जे उ आपन महिमा पावइ बरे बनाए रहा, ओह पे आपन महिमा परगट कइ सकइ। ²⁴मतलब हम जेका उ न केवल यहूदियन मँ स बोलाएस बल्कि गैर यहूदीयन मँ स भी ²⁵जइसेन कि होसे क किताबे मँ लिखा बा:

“जउन लोग मोर लोग नाहीं रहे
ओन्हे मइँ आपन कहबइ।
अउर उ स्त्री जउन पिआरी नाहीं कही गइ
मइँ ओका प्रिया कहबइ।” ^(G)

²⁶अउर

“इ उहइ घटी जउने स्थान पे ओनसे कहा गवा रहा,
‘तू पचे मोर परजा नाहीं अहा।’
उहइ उ जिन्दा परमेस्सर क सन्तान कहवइहीं।” ^(H)

²⁷अउर यसायाह इस्राएल क बारे मँ पुकार क कहत ह।

“यद्यपि इस्राएल क सन्तान
समुद्र क बालू क कणन क समान असंख्या अहइँ
तऊँ ओहमाँ स केवल थोड़ क ही बच पइहीं।
²⁸ काहेकि पर्भू पृथ्वी पे आपन निआव क पूरी तरह स अउ जल्दी ही पूरा करी।”^(I)

²⁹अउ जइसेन कि यसायाह त भविस्सबाणी किहे रहा:

“अगर सर्वसक्तिमान पर्भू
हमरे बरे बंसज न छोड़तेन
त हम सदोम जइसे
अउर अमोरा जइसे ही होइ जाइत।”^(J)

³⁰त फिन हम का कही? हम इ नतीजा पे पहुँच अही कि गौर यहूदियन क लोग जउन धार्मिकता क खोज मँ नाहीं रहेन, उ धार्मिकता क पाइ गएन। उ पचे जउन बिसवास क कारण ही धार्मिक ठहरावा गएन। ³¹परन्तु इस्राएल क लोग तउ जउन जइसेन व्यवस्था पे चलइ चाहत रहेन जउन ओनका धार्मिक ठहरावत ओकरे अनुसार नाहीं जी सकेन। ³²काहे नाहीं? काहेकि उ पचे एकर पालन बिसवास स नाहीं, बल्कि अपने करमन स धर्मी बना चाहत रहेन, उ सबइ ओह चट्टान पे ठोकर खाइ गएन, जउन ठोकर दियावत रही। ³³जइसेन कि पवित्तर सास्तर कहत ह:

“देखा, मइँ सिय्योन मँ एक पत्थर रखत हउँ जउन ठोकर दियावत ह
अउर एक चट्टान जउन पाप करावत ह।
परन्तु उ जउन ओहमाँ बिसवास करत ह,
ओका कभउँ निरास न होइ क होई।” ^(K)

यिर्मयाह 48

मोआब क बारे मँ सँदेसा

48 इ सँदेसा मोआब देस क बारे मँ अहइ। इस्राएल क लोगन क परमेस्सर सर्वसक्तीमान यहोवा जउन कहेस, उ इ अहइ:

“नबो पहाड़ क बुरा होइ,
    नबो पहाड़ नस्ट होइ।
किर्यातैम नगर लज्जित होइ।
    एह पइ अधिकार होइ।
सक्तीसाली जगह लज्जित होइ।
    इ बिखरि जाइ।
²मोआब क पुन: तारीफ नाहीं होइ।
    हेसबोन नगर क लोग मोआब क पराजय क जोजना बनइहीं।
    उ पचे कहिहीं, ‘आवा हम उ रास्ट्र क अन्त कइ देइ।’
मदमेन तू भी चुप कीन्ह जाब्या,
    तरवार तोहार पाछा करी।
³होरोनौम नगर स रूदन अनका,
    उ पचे बहोत घबराहट अउर बिनास क चीखेन ह।
⁴मोआब नस्ट कीन्ह जाइ।
    ओकर नान्ह बच्चन मदद क पुकार करिहीं।
⁵मोआब क लोगो लूहीत क मारग तलक जा।
    उ पचे जात भए फूटि फूटिके रोवत अहइँ।
हेरोनौम नगर तलक जाइवाली सड़किया स पीरा
    अउर कस्ट क रूदन सुना जाइ सकत ह।
⁶पराइ चला, जिन्नगी बरे पराअ।
    जइसा झाड़ी रेगिस्ताने मँ उड़त ह वइसा उड़ा।

⁷“तू आपन बनाई चिजियन अउर आपन धन पइ बिस्सास करत अहा।
    एह बरे तू बन्दी बनाई लीन्ह जाब्या।
कमोस देवता कैदी बनावा जाइ
    अउर ओकर याजक अउर पदाधिकारी ओकरे संग जइहीं।
⁸बिध्वंसक हर एक नगर क खिलाफ आइ,
    कउनो नगर नाहीं बची।
घाटी बर्बाद होइ।
    उच्च मैदान नस्ट होइ।
यहोवा इ कहेस ह,
    एह बरे इ होइ।
⁹मोआब क खेतन मँ नमक फइलावा।
    देस सूना रेगिस्तान बनी।
मोआब क नगर खाली होइहीं।
    ओनमाँ कउनो भी मनई न रही।
¹⁰जदि मनई उ नाहीं करत जेका यहोवा कहत ह
    जदि उ आपन तरवार क उपयोग ओन लोगन क मारइ बरे नाहीं करत, तउ उ मनई क बुरा होइ।

¹¹मोआब क कबहुँ बिपत्ति स पाला नाहीं पड़ी।
    मोआब सान्त होइ बरे छोड़ी गइ दाखरस सा बाटइ।
मोआब एक गगरी स दूसर गगरी मँ डाला नाहीं गवा।
    उ कबहुँ कैदी नाहीं बनावा गवा।
एह बरे ओकर सुआद पहिले क नाई अहइ
    अउर ओकर गन्ध बदली नाहीं अहइ।”
¹²यहोवा इ सब कहत ह,
“किन्तु मइँ लोगन क हाली ही
    तोहका तोहरी गगरी स ढालइ पठउब।
उ सबइ लोग मोआब क गगरी क छूँछ कइ देइहीं
    अउर तब उ पचे ओन गगरियन क चकनाचूर कइ देइहीं।”

¹³तब मोआब क लोग आपन असत्य देवता कमोस क बरे लज्जित होइहीं। इस्राएल क लोगन बेतेल मँ लबार देवतन पइ बिस्सास किहे रहेन अउर इस्राएल क लोगन क उ समइ ग्लानि भइ रही जब उ लबार देवता ओनकर मदद नाहीं किहे रहा। मोआब वइसा ही होइ।

¹⁴“तू कइसे कह सकत ह, ‘हम बढ़िया फउजी अही।
    हम जुद्ध मँ बहादूर मनसेधू अहइ?’
¹⁵दुस्मन मोआब पइ हमला करी।
    दुस्मन ओन नगरन मँ आइ अउर ओनका नस्ट करी।
नरसंहार मँ ओकर स्रेस्ठ जुवक मारा जइहीं।”
    इ सँदेसा राजा क अहइ।
    उ राजा क नाउँ सर्वसक्तीमान यहोवा अहइ।
¹⁶“मोआब क अन्त निचके अहइ।
    मोआब हाली ही नस्ट कइ दीन्ह जाइ।
¹⁷मोआब क चारिहुँ कइँती बसइया लोगो, तू सबहिं उ देस बरे रोउब्या।
    तू लोग जानत ह कि मोआब केतना प्रसिद्ध अहइ। एह बरे एकरे बरे रोआ।
कहा, ‘सासक क ताकत भंग होइ गइ।
    मोआब क ताकत अउ प्रतिस्ठा चली गइ।’

¹⁸“दीबोन मँ रहइवाले लोगो
आपन प्रतिस्ठा क जगह स बाहेर निकरा।
धूरि मँ जमीन पइ बइठा।
काहेकि मोआब क बिध्वंसक आवत अहइ
अउर उ तोहरे मजबूत नगरन क नस्ट कइ देइ।

¹⁹“अरोएर क बसइया लोगो,
    सड़क क सहारे खड़ा ह्वा अउर सावधानी स रहा।
मनई क परात लखा,
    मेहरारू क परात लखा,
    ओनसे पूछा क भवा ह

²⁰“मोआब बर्बाद होइ अउर लज्जा स गड़ि जाइ।
    मोआब रोइ अउर रोइ।
अनोर्न नदी पइ घोसित करा
    कि मोआब नस्ट होइ गवा।
²¹ऊँच मैदान क लोग सजा पाइ चुके होलोन,
    यहसा अउर मेपात नगरन क निआव होइ चुका।
²²दीबोन, नबो
    अउर बेतदिबलातैम,
²³किर्य्यातैम, बेतगामूल
    अउर बेतमोन।
²⁴करिय्योत बोस्रा
    अउ मोआब क निचके
अउ दूर क सबहिं नगरन क संग
    निआउ होइ चुका।
²⁵मोआब क ताकत काट दीन्ह गइ,
    मोआब क बाँहन टूट गइ।”
यहोवा इ सब कहेस।

²⁶“मोआब समझे रहा उ यहोवा स भी जियादा महान अहइ।
एह बरे मोआब क सख्त पागल जइसा सजा द्या।
मोआब गिरी अउ आपन उलटी मँ चारिहुँ कइँती लउटी।
लोग मोआब क मजाक उड़इहीं।

²⁷“मोआब तू आपन इस्राएल क मजाक उड़ाए रह्या।
    इस्राएल चोरन क गिरोह क जरिये धरा गवा।
हर दाई तू इस्राएल क बारे मँ कहत रह्या।
    तू आपन मूँड़ हिलावत रह्या अइसा अभिनय करत रह्या माना तू इस्राएल स स्रेस्ठ अहा।
²⁸मोआब क लोगो, आपन नगरन क तजा।
    जा अउर पहाड़ियन पइ रहा,
उ कबूतर क तरह रहा
    जउन आपन झोंझ गुफा क मुँहे पइ बनवत ह।”

²⁹“हम मोआब क गर्व क सुनि चुका अही,
    उ बहोत घमण्डी रहा।
उ समुझे रहा कि उ बहोत बड़ा अहइ।
    उ हमेसा आपन मुँह मियाँ मिटठू बनत रहा।
    उ बहोत जियादा घमण्डी रहा।”

³⁰यहोवा कहत ह, “मइँ जानत हउँ कि मोआब हाली ही कोहाइ जात ह अउर आपन तारीफ क गीत गावत ह।
    मुला ओकर सेखी झूठ अहइँ।
    उ जउन करइ क कहत ह, कइ नाहीं सकत।
³¹एह बरे मइँ मोआब बरे रोवत हउँ।
    मइँ मोआब मँ हर एक बरे रोवत हउँ।
    मइँ कीर्हेरेस क लोगन बरे रोवत हउँ।
³²मइँ सिबमा क लोगन बरे याजेर स लोगन स जियादा रोवत हउँ।
    सिबमा पुराने जमाना मँ तोहार अंगूर क बेलन
सागर तलक याजेर जेतनी दूर तलक फइली रहिन।
    मुला बिध्वंसक तोहार फल अउर अंगूर लइ लिहन।
³³मोआब क बिसाल अंगूर क बगियन स सुख अउर आनन्द बिदा होइ गएन।
    मइँ दाखरस निकारइ वाली जगहन स दाखरस क बहब रोक दिहे हउँ।
अब दाखरस बनावइ बरे अंगूरन पइ चलइवालन क नाच-गाना नाहीं रहि गवा अहइँ।
    खुसी क सोर गुल सबहिं खतम होइ गवा अहइ।

³⁴“हेसबोन अउ एलाले नगरन क लोग रोवत अहइँ। ओनकर रूदन दूर यहस क नगर मँ भी सुनाई पड़त अहइ। ओनकर रूदन सोआर नगर स सुनाई पड़त अहइ अउर हेरोनैम अउ सेलिसिया क दूर नगरन तलक पहोंचत अहइ। हिआँ तलक कि निम्रीम क भी पानी झुराइ गवा ह। ³⁵मइँ मोआब क उच्च ठउरन पइ होमबलि चढ़ावइ स रोक देब। मइँ ओनका आपन देवतन क बलि चढ़ावइ स रोकब।” यहोवा इ सब कहेस।

³⁶“मोका मोआब बरे बहोत दुःख अहइ। सोक गीत छेड़इवाली बाँसूरी क धुन क तरह मोर हिरदय रूदन कइ रहा अहइ। मइँ कीर्हेरेस क लोगन बरे दुःखी हउँ। ओनकर धन अउ सम्पत्ति सबहिं लइ लीन्ह ग अहइँ। ³⁷हर एक आपन मूँड़ मुड़ाए अहइ। हर एक स दाढ़ी साफ होइ ग अहइ। हर एक क हाथ कटा अहइँ अउ ओनसे रक्त निकरत अहइ। हर एक आपन कमर मँ सोक स ओढ़ना लपेटे अहइ। ³⁸मोआब मँ लोग घरन क छतन अउर हर एक सार्वजनिक चउराहन मँ सर्वत्र मरे भएन बरे रोवत अहइँ। हुआँ सोक अहइ काहेकि मइँ मोआब क छूँछ गगरी क तरह फोड़ डाएउँ ह।” यहोवा इ सब कहेस।

³⁹“मोआब बिखरि गवा अहइ। लोग रोवत अहइँ। मोआब आत्मसमर्पण किहेस ह। अब मोआब लजान अहइ। लोग मोआब क मजाक उड़ावत हीं, किन्तु जउन कछू भवा ह उ ओनका भयभीत कइ देत ह।”

⁴⁰यहोवा कहत ह, “लखा, एक उकाब अकासे मँ खाले टूट पड़त अहइ।
    इ आपन परन क मोआब पइ फइलावत अहइ।
⁴¹मोआब क नगरन पइ अधिकार होइ।
    छुपइ क सुरच्छित ठउर पराजित होइहीं।
उ समइ मोआब क फउजी वइसे ही आतंकित होइहीं
    जइसे प्रसव करत मेहरारू।
⁴²मोआब क रास्ट्र नस्ट कइ दीन्ह जाइ।
    काहेकि उ पचे समुझत रहेन कि उ पचे यहोवा स भी जियादा महत्वपूर्ण अहइँ।”

⁴³यहोवा इ सब कहत ह:
    “मोआब क लोगो, भय गहिर गड़हन अउर जाल तोहरी प्रतीच्छा मँ अहइँ।
⁴⁴लोग डेरइहीं अउर भाग खड़ा होइहीं,
    अउर उ पचे गड़हन मँ गिरिहीं।
जदि कउनो गहिर गड़हा स निकरी
    तउ उ जाल मँ फँसी।
मइँ मोआब पइ सजा क बरिस लिआउब।”
    यहोवा इ सब कहेस।

⁴⁵“ताकतवर दुस्मन स लोग भाग चला अहइँ।
    उ पचे सुरच्छा बरे हेसबोन नगर मँ परातेन।
किन्तु हुआँ सुरच्छा नाहीं रही।
    सिहोन (हेसबोन) क नगर मोआबियन क बिरुद्ध होइ गवा
अउर उ मोआब क प्रमुखन क नस्ट करइ लाग।
    इ ओन घमण्डी लोगन क नस्ट करइ लाग।
⁴⁶मोआब इ तोहरे बरे, बहोत बुरा होइ।
    कमोस क लोग नस्ट कीन्ह जात अहइँ।
तोहार पूत अउ बिटियन बन्दी
    अउ कैदी क रूप मँ लइ जावा जात अहइँ।
⁴⁷मोआब क लोग कैदी क रूप मँ दूर पहोंचावा जइहीं।
    किन्तु आवइवाले दिनन मँ मइँ मोआब क लोगन क वापस लिआउब।”
    इ सँदेसा यहोवा क अहइ।

हिआँ मोआब क संग निआव खतम होत ह।

भजन संहिता 25

दाऊद क समर्पित।

¹हे यहोवा, मइँ खुद क तोहका समर्पित करत हउँ।
²    मोरे परमेस्सर, मोर सिरिफ तोह पइ बिस्सास बाटइ।
मोका अपमानित होइ क अनुमति जिन द्या;
    मोर दुस्मनन क मोह पइ हँसी उड़ावइ क अनुमति जिन द्या।
³अइसा मनई, जउन तोहमाँ बिस्सास धरत ह, उ निरास नाहीं होइ।
    मुला बिस्सासघाती निरास होइहीं अउर,
    उ पचे कबहुँ भी कछू नाहीं प्राप्त करिहीं।

⁴हे यहोवा, मोर मदद करा कि मइँ तोहरी राहन क सीखउँ!
    तू आपन मार्गन क मोका सिच्छा द्या।
⁵आपन सच्ची राह तू मोका देखाँवा अउर ओकर उपदेस मोका द्या।
    तू मोर परमेस्सर तू मोर उद्धारकर्त्ता अहा।
    मोका हर दिन तोहार भरोसा अहइ।
⁶हे यहोवा, मोह पइ आपन दाया राखा
    अउर उ ममता क मोह पइ परगट करा, जेका तू हरदम राखत ह।
⁷आपन जवानी मँ जउन पाप अउर कुकर्म मइँ किहेउँ, ओनका जिन याद राखा।
    हे यहोवा आपन निज नाउँ निमित्त, मोका आपन करुणा स सुमिर ल्या।

⁸हे यहोवा, सचमुच उत्तिम अहइ,
    उ पापियन क जिन्नगी क नेक राह देखाँवत ह।
⁹उ दीन लोगन क आपन राहन क सीख देत ह।
    बिना पच्छपात क उ ओनका मारग देखाँवत ह।
¹⁰यहोवा क राहन ओन लोगन बरे छिमा स भरी अउ सच अहइँ,
    जउन ओकर करार अउर कानून क अनुसरण करत हीं।

¹¹हे यहोवा, मइँ बहुतेरा पाप किहेउँ ह,
मुला तू आपन नाउँ बरे मोर हर पापे क दयालुता स छिमा कइ दिहा।

¹²जदि कउनो मनई यहोवा क अनुसरण करइ चाहइ,
    तउ ओका परमेस्सर जिन्नगी क उत्तिम राह देखाँइ।
¹³उ मनई उत्तिम वस्तुअन क सुख भोगी,
    अउर उ मनई क सन्तानन उ धरती क जेका परमेस्सर वचन दिहे रहा स्थायी रइहीं।
¹⁴यहोवा आपन भक्तन पइ आपन भेद खोलत ह।
    उ आपन निज भक्तन क आपन करार क सिच्छा देत ह।
¹⁵मोर आँखिन मदद पावइ क यहोवा पइ सदा टिकी रहत हीं।
    मोका मोरी बिपत्ति स उ सदा छोड़ावत ह।

¹⁶हे यहोवा, मइँ पीड़ित अउ अकेल्ला अहउँ।
    मोरी कइँती मूड़ अउ मोह पइ दाया देखाँवा।
¹⁷मोरी बिपत्तियन स मोका अजाद करा।
    मोर समस्या सुलझाने क मदद करा।
¹⁸हे यहोवा, मोका परखा अउर मोरी बिपत्तियन पइ निगाह डावा।
    मोका जउन पाप मइँ किहे हउँ, ओन सबहिं बरे छिमा करा।
¹⁹लखा मोर केतॅना दुस्मनन अहइँ,
    अउ लखा उ मोहसे केतॅना नफ़रत करत हीं।
²⁰हे परमेस्सर, मोर रच्छा करा अउर मोका बचाइ ल्या।
    मइँ तोहार भरोसा राखत हउँ।
    तउ मोका निरास जिन करा।
²¹हे परमेस्सर, तू सचमुच उत्तिम अहा।
    मोका तोहार भरोसा अहइ, तउ मोर रच्छा करा।
²²हे परमेस्सर, इस्राएल क लोगन क
    ओनकर सबहिं दुस्मनन स रच्छा करा।

Awadhi Bible: Easy-to-Read Version (ERV-AWA)