M’Cheyne Bible Reading Plan

एल्काना अउ ओकर परिवार सीलो मँ आराधना करत ह

1 एल्काना नाउँ क एक मनई रहा। उ एप्रैम क पहाड़ी पहँटा क रामातैसोपीम क बसइया रहा। एल्काना जुफ परिवार स रहा। एल्काना यरोहाम क पूत रहा। यरोहाम एलीहू क पूत रहा। एलीहू तोहू क पूत रहा। अउर तोहू सूप क पूत रहा जउन एप्रैम क परिवार कबीला स रहा।

² एल्काना क दुइ मेहरारू रहीं। एक क नाउँ हन्ना रहा अउ दूसरी क नाउँ पनिन्ना रहा। पनिन्ना लड़कोर रहिन, मुला हन्ना क कउनो अउलाद नाहीं रही।

³ एल्काना हर बरिस आपन सहर रामातैसोपीम क तजि देत रहा अउ सीलो नगर जात रहा। एल्काना सर्वसक्तीमान यहोवा क आराधना सीलो मँ करत रहा अउ हुवँ यहोवा क बलि भेंट^[a] चढ़ावत रहा। सीलो उ जगह रही जहाँ होप्नी अउ पीनहास यहोवा क याजक क तरह सेवा करत रहेन। होप्नी अउ पीनहास एली क पूत रहेन। ⁴ जब कबहुँ एल्काना आपन बलि भेंट चढ़ावत रहा, उ गोस क एक हींसा आपन मेहरारू पनिन्ना क देत रहा। एल्काना गोस क भाग पनिन्ना क लरिकन क भी देत रहा। ⁵ एल्काना गोस क हींसा क बराबर हन्ना क भी हमेसा दइ देत रहा। एल्कना इ तब भी करत रहा जब यहोवा हन्ना क कउनो अउलाद नाहीं दिहे रहेन। एल्काना इ ऍह बरे करत रहा कि हन्ना ओकर इ मेहरारु रही जेसे उ सच्चा पिरेम करत रहा।

पनिन्ना हन्ना क परेसान करत रही

⁶ पनिन्ना हन्ना क हमेसा चिढ़ाइके खिसियावत रही अउ ओका परेसान करत रही। पनिन्ना इ ऍह बरे करत रही काहेकि हन्ना कउनो बच्चा क कोख स पइदा नाहीं कइ सकत रही। ⁷ हर बरिस जब ओकर परिवार सीलो मँ यहोवा क घरे मँ जात पनिन्ना हन्ना क परेसान करत अउर उ रोवत अउर कछू भी नाहीं खावत। ⁸ ओकर भतार, एल्काना, उ से कहेस, “हन्ना, तू काहे रोवति अहा? तू काहे नाहीं खाइया? तू दुःखी काहे अहा? का मइँ तोहार बरे दस बेटवन स बेहतर नाहीं अहइ?”

हन्ना क बिनती

⁹ खाए अउ पिए क पाछे हन्ना चुपचाप उठी अउ यहोवा स पराथना करइ गइ। यहोवा क पवित्तर आराधनालय क दुआरे क निअरे कुर्सी प याजक एलि बइठा रहा। ¹⁰ हन्ना बहोत दुखी रही। उ फूट-फूट कर रोवत रही। उ यहोवा स बिनती करेस। ¹¹ उ परमेस्सर स खास प्रतिग्या किहेस। उ कहेस, “सर्वसक्तीमान यहोवा, लखा मइँ केतना जिआदा दुखी हउँ। मोका याद राखा। मोका बिसरा नाहीं। जदि आप मोका एक पूत देब्या तउ मइँ पूरी जिन्नगी भइ ओका आपका अर्पण कइ देब। उ नाज़ीर होइ जाब। उ दाखरस या कउनो नसीला दाखरस न पिइ। अउ कउनो ओकर बार नाहीं काटी।”

¹² जब तलक हन्ना यहोवा क समन्वा आराधना करत रही, एली ओकर मुँह निहारत रहेस। ¹³ हन्ना हिरदय स बिनती करत रही। ओकर ओंठ हीलत रहेन, मुला कउनो अवाज नाहीं निकरत रही। एली समझेस कि हन्ना दाखरसे स मदमस्त बा। ¹⁴ एली हन्ना स कहेस, “तोहरे लगे पिअइ क बहोत जियादा रहा। अब समइ आ गवा कि दाखरस पिअइ छोड़ देइ चाही।”

¹⁵ हन्ना जवाब दिहेस, “मइँ सराब या जौ क दाखरस नाहीं पिएउँ ह। मइँ बहोत जिआदा मसीबत म अहउँ। मइँ यहोवा क आपन सब समस्या क बतावत रहेउँ ह। ¹⁶ जिन सोचा कि मइँ बुरी अउरत हउँ। मइँ ऍतनी देर ताई ऍह बरे पराथना करत रहेउँ ह कि मोका ढेर परेसानी अहइ अउ मइँ जिआदा दुखी अहउँ।”

¹⁷ एली जवाब दिहेस, “सान्ति स जा। इस्राएल क परमेस्सर तोहका उ देइँ जउन तू मांग्या ह।”

¹⁸ हन्ना कहेस, “मोका आसा अहइ कि आप मोसे खुस अहइँ।” तब्बइ हन्ना गइ अउ तनिक खाएस। उ अब तनिकउ दुखी नाहीं रही।

¹⁹ दूसर दिन भिन्सारे एल्काना क परिवार उठा। उ सबइ परमेस्सर क आराधना किहेन अउर उ पचे आपन घर रामा क लउटि आएन।

समूएल क जन्म

एल्काना आपन मेहरारु क लगे सोएस। यहोवा हन्ना क याद राखेस। ²⁰ तब उस समइ निम्नलिखित साल मँ हन्ना गोड़ स भारी भइ अउ ओसे एक बेटवा भवा। हन्ना ओकर नाउँ समूएल राखेस। उ कहेस, “एकर नाउँ समूएल अहइ काहेकि मइँ एक यहोवा स माँगा ह।”

²¹ उ बरिस एल्काना बलि भेंट देइ अउ परमेस्सर क समन्वा कीन्ह गइ प्रण क पूरा करइ सीलो गवा। उ आपन परिवारे क आपन संग लइ गवा ह। ²² मुला हन्ना नाहीं गइ। उ एल्काना स कहेस, “जब लरिका कछू ठोस चीज खाइ लागी तबहिं मइँ ऍका सीलो लइ जाब। मइँ ओका यहोवा क देब। उ एक नाजीर बनी। उ सीलो मँ रही।”

²³ हन्ना क भतार एल्काना ओसे कहेस, “उहइ करा जउन तू उत्तिम समझत ह। तू तब ताई घर मँ रहि सकत ह जब तलक लरिका कछू ठोस खइया क खाइ के जोग्गा बाढ़ नाहीं जात। जउन तू कहया ह यहोवा उहइ करइँ।” ऍह बरे आपन बचवा क पालब पोसब बरे तब ताई घरे प रहि गइ जब ताई उ ठोस खइया क खाइ बरे बाढ़ नाहीं जात।

हन्ना समूएल क सीलो मँ एली क लगे लइ जात ह

²⁴ जब लरिका ठोस खइया खाइ बरे बाढ़ गवा तब हन्ना सीलो मँ यहोवा क आराधनालय लइ गइ। हन्ना आपन संग तीन बरिस क एक बछवा, बीस पौण्ड आटा अउ एक मसक दाखरस भी लइ गइ।

²⁵ उ पचे यहोवा क समन्वा गएन। एल्काना यहोवा क बलि क रुप मँ, जइसा उ अक्सर करत रहा, बर्धा क मारेस। तबहिं हन्ना बचवा क एली क लगे लइ गइ। ²⁶ हन्ना एली स कहेस, “महोदय, छिमा करइँ। मइँ उहइ मेहरारु हउँ जउन परमेस्सर क पराथना करत आप क बगल मँ खड़ी रही। मइँ बचन दिए रहेउँ कि मइँ फुरइ कहत हउँ। ²⁷ मइँ इ बचवा बरे पराथना किहे रहेउँ। यहोवा मोका इ बचवा दिहेस ह। ²⁸ अउर अब मइँ इ बचवा क यहोवा क दइ देत हउँ। इ पूरी जिन्नगी यहोवा क रही।”

तबहिं हन्ना बचवा क उहइँ छोड़ेस अउ यहोवा क आराधना किहेस।

1 पौलुस जउन मसीह ईसू क दास अहइ,

जेका परमेस्सर प्रेरित होइ बरे बोलाएस, अउर उहइ क परमेस्सर क सुसमाचार लोगन क सुनावइ बरे चुना गवा। ² इ बात क घोसना नबियन दुआरा पवित्तर सास्तरन मँ पहिलेन स करि दीन्ह ग रही। ^3-4 इ सुसमाचार परमेस्सर क पूत ईसू मसीह क अहइ। जउन तने स दाऊद क बंसज अहइ। अउर उहइ हमार पर्भू अहइ। सरीर स तो उ दाऊद क बंस मँ जनम लिहे रहा मूला पवित्तर आतिमा स तो उ परमेस्सर क पूत रहा। ओका परमेस्सर क पूत इहइ बरे माना जात रहा। जउन ओकरे भीतर मरि क फिन जी उठइ क समरथ रहा।

⁵ इहइ क जरिये मोका अनुग्रह अउर पेरित होइ क मिला बा जेहसे सबहिं यहूदियन मँ, ओकरे नाउँ स, उ आस्था जउन बिसवास स जनम लेत ह ओहमाँ पइदा कीन्ह जाइ सकइ। ⁶ परमेस्सर क जरिये ईसू मसीह क होइ बरे तू पचे बोलावा ग अहा।

⁷ उ पत्र मइँ, तू सबन बरे, जउऩ रोम मँ अहइँ अउर परमेस्सर क पियारा अहा, जउन परमेस्सर क पवित्तर जन होइ बरे बोलावा ग अहा, लिखत अहउँ।

अब हम इ चाहित ह कि तू लोगन क परमेस्सर अउर हमरे पर्भू ईसू मसीह क अनुग्रह अउर सान्ति मिलइ।

धन्यबाद बरे पराथना

⁸ सबसे पहिले तो मइँ ईसू मसीह क जरिये परमेस्सर क धन्यबाद करइ चाहित ह। इ सब तोहरे सब क बरे अहइ काहेकि दुनिया क सब मनई तोहरे सब के बिसवास क बारे मँ बतियात हीं। ⁹ पर्भू जेकरे सेवा मइँ जी जान स करित हउँ काहेकि मइँ ओकरे पूत क सुसमाचार क लोगन क सुनावत हउँ। पर्भू मेरा साच्छी दिहा जउन मइँ तोहका हर दम याद करत अहउँ। ¹⁰ अपने पराथना मँ इ मइँ हर दम मनाइत हउँ कि परमेस्सर की चाह स मोर तोहरे लगे आवइ क यात्रा पूरी होइ। ¹¹ मइँ बहुत दिल स इ चाहित ह कि तू लोगन स मिली अउर तोहका कछू आत्मिक उपहार देइ जइसे तू पचे खूब सक्तिसाली होइ जा। ¹² या मोका कहइ चाही कि जब मइँ तोहरे बीच मँ होब तउ एक दूसर क बिसवास स आपुस मँ प्रोत्साहित होब।

¹³ भाइयो अउर बहिनियो! मइँ इ चाहित हउँ कि तू पचे क इ तउ मालूम होइ जाइ कि मइँ तोहरे लगे बार-बार आवइ क योजना बनाइत हउँ। एकर इ कारन इ अहइ कि गैर यहूदियन मँ जइसा फल मोका मिला ह इ उहइ तू लोगन स भी मिलइ। लेकिन अब तलक-न-कउनो बाधा पड़त रही।

¹⁴ अब इ जान ल्या कि जे यूनानियन अहइँ उनके अउर जे गैर यूनानियन अहइँ ओनहूँ क, जे होसियार अहइँ उनके अउर जे बेउकूफ अहइँ ओनहूँ क सबइ क हमरे ऊपर सेवा करइ क रिन अहइ। ¹⁵ यही बरे तू लोगन क जे रोम मँ रहत ह्या ओनका मइँ इ सुसमाचार सुनावइ क तैयार हउँ।

¹⁶ इ सुसमाचार क सुनावइ क मइँ सरमाइत नाहीं काहेकि जउन भी ओहमाँ बिसवास रखत अहइँ ओनके उद्धार बरे परमेस्सर क सामर्थ्य अहइ। ओहमाँ पहिले यहूदियन अउर फिन गैर यहूदियन क। ¹⁷ काहेकि सुसमाचार मँ इ बतावा ग बाटइ कि परमेस्सर मनइयन क अपने ठेकाने कइसे लगावत ह। इ सब कुल बिसवास प अहइ, सास्तरन मँ इ लिखा अहइ, “धर्मी मनई स सदैव जिअत अहइँ”^[a]

सबहिं तउ पाप किहे अहइँ

¹⁸ सरग स परमेस्सर का कोप लोगन क न कहइवालन अउर अधार्मिक काम पइ परगट होत ह जे सत्य का अधरम स दबावत हीं अउर जे बुरे करम करत हीं। ¹⁹ इ बात नाहीं अहइ कि केउ ऐका जानत नाहीं परमेस्सर का सबइ जानत ह काहेकि परमेस्सर सबका जनाइ देत ह।

²⁰ इ संसार जब स देखाइ पड़ा तबइ स परमेस्सर क अनन्त सक्ति परमेस्सर क साफ देखात ह उहउ क ऍक एहसे जाना जाइ सकत ह जेका परमेस्सर खुदइ बनाइस ह। एहसे लोगन क पास कउनो बहाना नहीं बाटइ उ बुरा काम बरे जेका उ करत ह।

²¹ अगर इ सबइ परमेस्सर क जानत हीं तबउ उ पचे परमेस्सर क महिमा क इज्जत नाहीं करत हीं। उनके विचार गलत कामन मँ लग गएन अउर मन मँ अँधियारा छाइ गवा। ²² उ पचे अपने क बहुत बुद्धिवाला समझत रहेन मुला सब क सब बज्र मूरख रहेन। ²³ अउइ जउऩ परमेस्सर अहइ उ क कबहुँ मर नाहीं सकत मुला इ सबइ ओका मरइवाले लोगन चिरिया, गोरू, अउर साँप क मूरत मँ देखेन अउर समझइ लागेन।

²⁴ एह बरे परमेस्सर ओनन्ह क बदनियती क हाथे सौंप दिहेस अउर उ पचे दुराचार मँ पड़ि क एक दूसरे क सरीर क साथ खिलवाड़ करइ लागेन। ²⁵ उ लोगन झूठ क साथे परमेस्सर क सत्य क सौदा किहन अउर वे सृस्टि क बनावइवाले को तजिके अउरन क आराधना करइ लागेन। परमेस्सर धन्य अहइ। आमीन!

²⁶ इहइ बरे परमेस्सर ओनन्ह का नीच वासना क हाथें सौंप दिहेस। ओनन्ह क स्त्रियन सहज यौनाचार क बजाय अप्राकृतिक यौन करइ लागिन। ²⁷ एहइ तरह पुरूसन भी सहज सम्भोग छोड़ि क समलैगिकता क चक्कर मँ पड़ि गएन। अउर पुरूस परस्पर एक दूसरे क साथ बुरे करम करइ लागेन। अउर इ सब कुकरमन क फल भी मिलब सुरु होइ गवा।

²⁸ कारन इ रहा कि ओन्हन परमेस्सर का पहिचानब बन्द कइ दिहेन तो परमेस्सर ओनन्ह का कुबुद्धि क हाथ सौंप दिहेस। अउर उ सब ओनन्ह क करइ सुरु दिहेन जउन ना करइ क चाही। ²⁹ लोग कुल अधरम दुस्टता, लालच अउर द्वेस स तथा सारी ईर्स्या, हत्या, झगड़े, छल, अउर डाह स भर गएन। बे बकवादी, अउर कहानियन क गढ़त रहेन। ³⁰ उ सबइ निन्दक अहइँ। परमेस्सर स घिना करत रहत उदण्ड अउर घमण्डी अहइँ, बढ़-बढ़ क बोलत हीं। कुलिन्ह बुराइन का जनम दाता अहइँ। अपने महतारी बाप क कहब नहीं मानत रहेन। ³¹ उ पचे मूरख, वचन तोरइ वाले निरदयी अउर वगैर पिरेम क बाटेन। ³² उ सब परमेस्सर क व्यवस्था क जानत हीं कि इ सब बातन स मउत क जोग्ग अहइँ तउनो पइ ओ सबइ न सिरफ इ सब कुकरम करत हीं बरन अइसा करइवालेन क समर्थन भी करत हीं।

यरूसलेम क पतन

39 यरूसलेम पइ जउने तरह अधिकार भवा उ इ अहइ: यहूदा क राजा सिदकिय्याह क राज्जकाल क नवे बरिस क दसएँ महीने मँ बाबुल क राजा नबूकदनेस्सर आपन पूरी फउज क साथ यरूसलेम क खिलाफ वूच किहस। ² उ हरावइ बरे नगर क डेरा डाएस अउ सिदकिय्याह क ग्यारहवे बरिस क चउथे महीने क नौंवे दिन यरूसलम क चहरदीवारी टूटी। ³ तब बाबुल क राजा क सबहिं राजकीय अधिकारी यरूसलेम नगर मँ घुस आएन। उ पचे अन्दर आएन अउर बीच वाले दुआर पइ बइठ गएन। ओन अधिकारियन क इ सबइ नाम अहइँ: समगर जिले प्रसासक नेर्गलसरेसेर एक बहोत उच्च अधिकारी नेबो-सर्सकीम दूसर उच्च अधिकारी अउर बहोत स दूसर बड़के अधिकारी भी हुवाँ रहेन।

⁴ यहूदा क राजा सिदकिय्याह बाबुल क ओन पदाधिकारियन क लखेस, एह बरे उ अउर ओकर फउजी हुवाँ स पराइ गएन। उ पचे रात मँ यरूसलेम क तजेन अउर राजा क बाग स होइके बाहेर निकरेन। उ पचे उ दुआर स गएन जउन दुइ दीवारन क बीच रहा। तब उ पचे रेगिस्तान कइँती बढ़ेन। ⁵ मुला बाबुल क फउज सिदकिय्याह अउर ओकरे साथ क फउज क पाछा किहस। कसदियन क फउज यरीहे क मइदान मँ सिदकिय्याह क जाइ धरेस उ पचे सिदकिय्याह क धरेन अउर मोका बाबुल क राजा नबूकदनेस्सर क लगे लइ गएन। नबूकदनेस्सर हमात प्रदेस क रिबला नगर मँ रहा। उ ठउरे पइ नबूकदनेस्सर सिदकिय्याह क बरे निर्णय सुनाएस। ⁶ हुवाँ रिबला नगर मँ बाबुल क राजा सिदकिय्याह क पूतन क ओकरे सामने मार डाएस अउर सिदकिय्याह क समन्वा ही नबूकदनेस्सर यहूदा क सबहिं राजकीय अधिकारियन क मार डाएस। ⁷ तब नबूकदनेस्सर सिदकिय्याह क आँखिन निकार लिहस। उ सिदकिय्याह क काँसा क जंजीर स बाँधेस अउर ओका बाबुल लइ गवा।

⁸ बाबुल क सेना राजमहल अउर यरूसलेम क लोगन क घरन मँ आगी लगाइ दिहस अउर उ पचे यरूसलेम क दीवारन गिराइ दिहन। ⁹ नबूजरदन नाउँ क एक मनई बाबुल क राजा क बिसेस रच्छकन क अधिनायक रहा। उ ओन लोगन क लिहस जउन यरूसलेम मँ बचि ग रहेन अउर ओनका कैदी बनाइ लिहस। नबूजरदन ओन लोगन क लिहेस जउन यरूसलेम मँ रहत रहेन ओन लोगन क भी लिहस जउन पहिले ही ओका आत्मसमर्पण कइ चुके रहेन। अउर ओकर पाछे उ ओन सबइ क बन्दी बनाइके बाबुल भेज दिहेस। ¹⁰ मुला बिसेस रचच्छकन क अधिनायक नबूजरदान यहूदा क कछू गरीब लोगन क आपन पाछे छोड़ दिहस। उ पचे अइसे लोग रहेन जेनके लगे कछू नाहीं रहा। इ तरह उ दिन नबूजरदान ओन यहूदा क गरीब लोगन क अंगूर क बाग अउर खेत दिहस।

¹¹ किन्तु नबूकदनेस्सर नबूजरदान क यिर्मयाह क बारे मँ कछू आदेस दिहस। नबूजरदान, नबूकदनेस्सर क बिसेस रच्छकन क अधिनायक रहा। आदेस इ सबइ रहेन: ¹² “यिर्मयाह क हेरा अउर ओकर देख-रेख करा। ओका चोट न पहोंचावा। ओका उ सब द्या, जउन उ माँगइ।”

¹³ एह बरे राजा क बिसेस रच्छकन क अधिनायक नबूनरदान बाबुल क फउज क एक मुख्य पदाधिकारी नबूसजबान एक ऊँचा अधिकारी नेर्गलसरेसेर अउर बाबुल क फउज क दूसर सबहिं अधिकारी यिर्मयाह क खोज मँ पठए गएन। ¹⁴ ओन लोग यिर्मयाह क आँगन स निकारेन जहाँ उ यहूदा क राजा क रच्छकन क संरच्छन मँ पड़ा रहा। कसदी सेना क ओन अधिकारी लोग यिर्मयाह क सपान क पूत अहीकाम, अहीकाम क पूत गदल्याह क सुपुर्द किहन। गदल्याह क आदेस रहा कि उ यिर्मयाह क ओकरे घर वापस लइ जाइ। एह बरे यिर्मयाह आपन घरे पहोंचाइ दीन्ह गवा अउर उ आपन लोगन मँ रहइ लाग।

एबेदमेलेक क यहोवा स सँदेसा

¹⁵ जउने समइ यिर्मयाह रच्छकन क संरच्छन मन्दिर क आँगन मँ रहा, ओका यहोवा क एक सँदेसा मिला। सँदेसा इ रहा: ¹⁶ “यिर्मयाह, जा अउर कूस क एबेदमेलेक क इ सँदेसा द्या: इ उ सँदेसा अहइ, जेका सर्वसक्तीमान यहोवा इस्राएल क लोगन क परमेस्सर देत ह: ‘बहोत हाली ही मइँ इ यरूसलेम नगर सम्बन्धी आपन सँदेसन क फुरइ घटित करब। मोर सँदेसा बिनास लाइके फुर होइ। नीक बातन क लाइके नाहीं। तू सबहिं इ फुरइ क घटित होत भवा आपन आँखिन स देखब्या। ¹⁷ किन्तु एबेदमेलेक उ दिन मइँ तोहका बचाउब।’ इ यहोवा क सँदेसा अहइ। ‘तू ओन लोगन क नाहीं दीन्ह जाब्या जेनसे तोहका डर अहइ। ¹⁸ एबेदमेलेक मइँ तोहका बचाउब। तू तरवारे क घाट नाहीं उतारा जाब्या, अपितु बच निकरब्या अउर जिअत रह्ब्या। अइसा होइ, काहेकि तू मोह पइ बिस्सास किहा ह।’” इ सँदेसा यहोवा क अहइ।

संगीत निर्देसक बरे दाऊद क एक ठु पद।

संगीत निर्देसक बरे दाऊद क पद।