M’Cheyne Bible Reading Plan
6) Павле проповеда во Коринт
18 Потоа Павле отпатува од Атина за Коринт[a]. 2 Таму се сретна со еден Евреин по име Акила, родум од Понт. Тој, заедно со својата жена Присцила, неодамна беше пристигнал од Италија, бидејќи императорот Клавдиј беше наредил сите Евреи да го напуштат Рим. Павле отиде кај нив, 3 и бидејќи го знаеше нивниот занает - изработка на шатори[b] - тој остана кај нив и заедно работеа.
4 Секоја сабота Павле одеше во тамошната синагога и им проповедаше и на Евреите и на Грците.
5 Кога Сила и Тимотеј пристигнаа од Македонија, Павле уште поревносно им проповедаше на Евреите дека Исус е Месијата што Го чекаат. 6 Но кога тие се свртеа против него и почнаа да го навредуваат, тој им го врати и правот од наметката и им рече: „По своја вина ќе загинете! Јас немам вина за тоа[c]! Отсега ќе одам да им проповедам на другите народи!“
7 Си замина оттаму и се пресели во куќата на Тициј Јуст, побожен човек чија куќа беше веднаш до синагогата. 8 Управник на синагогата беше Крисп. Тој и сите негови домашни поверуваа во Господ. Поверуваа и многу други жители на Коринт, кои ја слушнаа пораката, а откако поверуваа, потоа и се крстија.
9 Една ноќ, Господ му порача на Павле преку видение: „Не плаши се! Немој да молчиш, туку зборувај! 10 Јас сум со тебе и никој нема да ти направи никакво зло! Има многу Мои луѓе во овој град!“ 11 Така Павле остана во Коринт една година и шест месеци, проповедајќи им ја на луѓето Божјата порака.
12 Но кога Галио стана управник на Ахаја, извесен број Евреи се здружија и се кренаа против Павле. Го изведоа на суд пред Галио, 13 изнесувајќи го против него следново обвинение: „Овој човек ги наговара луѓето да Му пристапуваат на Бог на начин што е спротивен на нашиот верски Закон!“ 14 Пред Павле уста да отвори, Галио се сврте накај Евреите и им рече: „Евреи, ако се работеше за злосторство или за некаков престап, ќе бев должен да ве ислушам; 15 но со оглед на тоа што се работи за учења, за личности и за вашиот верски Закон, тоа расчистете си го самите меѓу себе. Јас немам намера да ви пресудувам за такви нешта!“ 16 Потоа ги избрка од судницата. 17 А тие го фатија Состен, кој беше управник на синагогата и го тепаа пред судот, но Галио воопшто не интервенираше.
Второто мисионерско патување завршува:
Павле се враќа во сириска Антиохија
18 Павле остана во Коринт уште извесно време, а потоа се збогува со тамошните христијани и отплови за Сирија. Со него отпатуваа и Присцила и Акила. (Претходно, во Кенкреја, согласно со еврејските обичаи, Павле си ја беше избричил главата, зашто имаше дадено таков завет.)
19 Кога пристигнаа во пристаништето Ефес, Павле се раздели од своите придружници. Додека беше во Ефес, отиде во синагогата и им проповедаше на Евреите. 20 Тие го замолија да остане кај нив подолго време, но тој не прифати, 21 туку, збогувајќи се со нив, им рече: „Ако даде Бог, пак ќе се вратам кај вас[d].“ Потоа отплови од Ефес.
22 Дојде до пристаништето Цезареја, се поздрави со луѓето од црквата[e], па замина за Антиохија. 23 Откако остана извесно време во сириска Антиохија, Павле одново тргна на пат, посетувајќи ги редум христијаните во областите на Галатија и Фригија, за да ги охрабри.
Аполос проповеда во Ефес и Ахаја
24 Во меѓувреме, во Ефес пристигна еден Евреин по име Аполос. Тој беше родум од градот Александрија, во Египет. Беше вешт говорник и добро ги познаваше Божјите книги. 25 Веќе беше упатен на Патот Господов и многу ревносно и точно проповедаше за Исус, иако знаеше само за крштавањето на Јован Крстител. 26 Тој почна смело да зборува во синагогата. Кога го слушнаа Присцила и Акила, го зедоа кај нив и уште подобро му го објаснија Божјиот Пат.
27 Аполос реши да замине за Ахаја[f]. Христијаните од Ефес го охрабрија и им напишаа писма на христијаните во Ахаја, со препорака да го прифатат. Кога пристигна во Ахаја, Аполос многу им помогна на новообратените христијани кои поверуваа благодарение на Божјата дарежлива благонаклоност. 28 Тој на јавни дебати ги побиваше Евреите со силни аргументи, докажувајќи им преку Божјите книги дека Исус е Месијата што им беше предвестен.
ИСУС ГОВОРИ ЗА ИДНИНАТА
1) За разорувањето на ерусалимскиот храм
(Мт. 24:1-2; Лк. 21:5-6) 13 Кога Исус излегуваше од храмот еден од Неговите ученици Му рече: „Учителе, погледни ги овие прекрасни камења - колку убава зграда е храмот!“ 2 Во одговор, Исус му рече: „Ги гледаш ли овие големи градби? Сето тоа ќе биде разурнато и камен врз камен нема да остане!“
2) Почеток на неволите
(Мт. 24:3-14; Лк. 21:7-19) 3 Подоцна, кога Исус седеше на падините од Маслиновата Гора, спроти храмот, Му пристапија насамо Петар, Јаков, Јован и Андреј, и Го прашаа: 4 „Кажи ни, кога ќе се случат сите овие нешта и кој ќе биде знакот што ќе го навести нивното исполнување?“
5 Тогаш Исус почна да им кажува:
„Внимавајте да не бидете заведени! 6 Мнозина ќе доаѓаат под Моето име, ќе тврдат дека Сум тоа Јас и ќе успеат да заведат мнозина!
7 Кога ќе слушате за војни и за повици на војни - не вознемирувајте се! Тоа мора најпрво да се случува, но тоа сe уште не е крајот. 8 Ќе се крене еден народ против друг народ на војна и едно царство против друго царство. Ќе има земјотреси на разни места, и појави на глад меѓу луѓето. Ова ќе бидат почетоците на неволите.“
3) Прогонства на вистинските христијани
(Мт. 24:9-14; Лк. 21:12-19) 9 Исус продолжи: „Внимавајте на себе! Ќе ве тужат на судови и ќе ве тепаат во храмовите[a]. Поради вашата вера во Мене, ќе ве изведуваат пред управници и пред владетели. Но тоа ќе биде за да им се посведочи и ним. 10 А пред да дојде крајот, Радосната вест[b] ќе им се проповеда на сите народи.
11 Кога ќе ве притвораат, не грижете се однапред што ќе зборувате. Во тие моменти Бог ќе ви ги даде вистинските зборови што ќе треба да ги кажете. Зашто вашата одбрана нема да доаѓа од вас, туку од Светиот Дух.
12 Браќа ќе се предаваат еден со друг и родители ќе ги предаваат своите деца на смрт. Децата ќе се креваат против родителите и ќе ги убиваат. 13 Сите ќе ве мразат поради вашата вера во Мене. Само тие што ќе останат верни докрај ќе бидат спасени.“
4) Последните неволи
(Мт. 24:15-21; Лк. 21:20-24) 14 Во продолжение Исус рече: „Кога ќе видите дека ,богохулникот[c] што пустоши‘ се сместува таму каде што не би смеел (секој што го чита ова, треба да го разбере!), тогаш тие што живеат во Јудеја нека бегаат во планините! 15 Кој ќе се најде искачен на покрив, нека не слегува во куќата за да земе нешто, 16 а кој ќе се најде во полето, нека не се враќа дома по облека. 17 Тоа време ќе биде страшно за бремените жени и за доилките! 18 Молете се тоа да не се случи зиме! 19 Тоа ќе биде време на такви страдања какви што немало од почетокот на Божјото создавање досега, ниту пак другпат ќе ги има! 20 Кога Господ не би го скратил времетраењето на тие страдања, никој не би преживеал! Но заради избраниците Свои, Господ ќе го скрати тоа време.
21 Ако тогаш некој ви рече: ,Еве Го Месијата овде!‘ или ,Ене Го онде!‘ - не верувајте му! 22 Ќе се појават лажни месии и лажни пророци и ќе извршуваат чуда за да ги заведат по можност и Божјите избраници! 23 Бидете внимателни! Ете, сe ви кажав однапред!“
5) Враќањето на Месијата
(Мт. 24:29-31; Лк. 21:25-28) 24 Во тоа време, веднаш по тие неволи „Сонцето ќе потемни и Месечината ќе престане да свети. 25 Ѕвезди ќе паѓаат од небото и небесните сили ќе се разнишаат[d].“ 26 Тогаш ќе Ме видат Мене, Синот Човечки, како доаѓам на облаците со величествена моќ и слава. 27 Тогаш ќе ги испратам Своите ангели да ги соберат Моите избраници од сите четири страни на светот, од крајот на Земјата, до крајот на небото.“
6) Повик на духовна будност
(Мт. 24:32-44; Лк. 21:29-33) 28 „Научете се од примерот со смоквата: кога гранките ќе и распупат и ќе и разлистаат, знаете дека наближува летото. 29 Така, кога ќе забележите дека овие случки што ви ги опишав се одигруваат, знајте дека враќањето на Месијата е на прагот. 30 Ве уверувам дека некои луѓе од оваа генерација[e] сe уште ќе бидат живи, кога сите тие случки ќе се одиграат! 31 Небото и Земјата ќе ги снема, но Моите зборови ќе останат!
32 А што се однесува до точното време и час - тоа никој не го знае, дури ни ангелите на небото, па ни Синот Човечки, туку само небесниот Татко! 33 Затоа, бидете духовно будни и подготвени, бидејќи не знаете кога точно ќе настапи тоа време!
34 Враќањето на Месијата може да се спореди со човек кој заминува на пат и им ја предава грижата за куќата на своите слуги. На секој од нив му дава задолжение, а на чуварот му наредува да бдее. 35 Значи, бидете будни, зашто не знаете во кој час ќе се врати господарот на куќата! Тој може да се врати навечер или на полноќ или во раните мугри кога петлите пеат! 36 Да не ве изненади и затекне на спиење! 37 Тоа што ви го велам вам, им го кажувам на сите: Бидете духовно будни!“
Copyright 1999 by HBC Radosna Vest