M’Cheyne Bible Reading Plan
सुरच्छा क सहर
20 तब यहोवा यहोसू स कहेस: 2 “मइँ मूसा क उपयोग तू लोगन क हुकुम देइ बरे किहेउँ ह। मूसा तू लोगन स सुरच्छा क विसेस सहर बनवइ बरे कहे रहा। तउ सुरच्छा बरे ओन सहरन क चुनाव करा। 3 अगर कउनो मनई कउनो मनई क मार डावत ह, मुला अइसा संजोग क कारण होत ह अउर ओकर इरादा ओका मार डावइ क नाहीं होत तउ उ मरे मनई क ओन रिस्तेदारन स जउन बदला लेइ बरे ओका मारि डावइ चाहत हीं, आत्मरच्छा बरे सुरच्छा नगर मँ सरण लइ सकत ह।
4 “उ मनई क इ करइ चाही। जब उ पराइ अउर ओन सहरन मँ कउनो एक मँ पहोंचइ तउ ओकर सहर दुआर पइ रुकइ चाही। ओका सहर दुआरे पइ खड़ा रहइ चाही अउर नगर प्रमुखन क बतावइ चाही कि का घटा अहइ। तब नगर प्रमुख ओका सहर मँ प्रवेस करइ दइ सकत हीं। उ सबइ ओका आपन बीच मँ रहइ क जगहिया देइहीं। 5 मुला उ मनई जउन ओकर पाछा करत अहइ उ सहर तलक ओकर पाछा कइ सकत ह। अगर अइसा होत ह तउ नगर प्रमुखन क ओका यो ही नाहीं तजि देइ चाही, बल्कि ओनका उ मनई क रच्छा करइ चाही जउन ओनके लगे सुरच्छा बरे आवा अहइ। उ सबइ उ मनई क रच्छा ऍह बरे करिहीं कि उ जेका मार डाएस ह, ओका मारि डावइ क ओकर इरादा नाहीं रहा। इ संजोग क कारण होइ गवा। उ कोहान नाहीं रहा अउर उ मनई क मारइ क निहचय नाहीं किहे रहा। इ कछू अइसा रहा, जउन होइ ही गवा। 6 उ मनई क तब तलक सहर मँ रहइ चाही जब तलक उ सहर क निआव क कचहरी क जरिये ओकरे मोकदमा क निर्णय नाहीं होइ जात अउर ओका तब तलक उहइ सहर मँ रहइ चाही जब तलक महा याजक नाहीं मर जात। तब उ आपन घर मँ उ सहर मँ लउटि सकत ह, जहाँ स उ भागत भवा आवा रहा।”
7 ऍह बरे इस्राएल क लोग “सुरच्छा सहर” नाउँ क सहरन क चुनेन। उ सबइ सहर इ सबइ सहर रहेन: नप्ताली क पहाड़ी प्रदेस मँ गलील क केदेस; एप्रैम क पहाड़ी प्रदेस मँ सकेम; किर्य्यतर्बा जउन यहूदा क पहाड़ी प्रदेस मँ रहा। 8 रूबेन क प्रदेस क रेगिस्तान मँ, यरीहो क निअरे यरदन नदी क पूरब मँ बेसेर; गाद क प्रदेस मँ गिलाद मँ रमोत; मनस्से क प्रदेस मँ बासान मँ गोलान।
9 कउनो इस्राएली मनई या ओनके बीच रहइवाला कउना भी विदेसी, अगर कउनो क मार डावत ह, मुला इ संजोग क कारण होइ जात ह, तउ उ ओन सुरच्छा नगरन मँ स कउनो एक मँ सुरच्छा बरे पराइके जाइ सकत रहा। तब उ मनई हुआँ सुरच्छित होइ सकत रहा अउर पाछा करइवाला कउनो क जरिये मारा नाहीं जाइ सकत रहा। उ सहर मँ उ मनई क मोकदमा क निबटारा उ सहर क निआव क कचहरी क जरिये होइ।
याजकन अउ लेबी बंसियन क सहर
21 लेवी परिवार समूह क सासक लोग याजक एलीआज़ार, नून क पूत यहोसू अउ इस्राएल क दूसर परिवार समूहन क सासक लोगन स बात किहेस। 2 इ कनान देसा मँ सीलो सहर मँ भवा। लेवी परिवार समूह क सासक लोग ओनसे कहेन, “यहोवा मूसा क आदेस दिहे रहा कि तू हम लोगन क रहइ बरे सहर देब्या अउर तू हम लोगन क मइदान देब्या जेहमाँ हमार जनावर चरि सकिहीं।” 3 ऍह बरे उ पचे यहोवा क आदेस क माना। उ पचे लेवी परिवार समूह क इ सबइ सहर अउर ओनके गोरुअन बरे खेत दिहेन:
4 पहिला पाँसा कोहात कबीला बरे जउन लेवी परिवार समूह स रहा। कछू कोहात कबिलन क एक हींसा स तेरह सहर दीन्ह ग रहेन। इ सबइ सहर उ प्रदेस मँ रहेन जउन यहूदा, सिमोन अउ बिन्यामीन क होत रहा। इ सबइ सहर ओन कोहातियन क दीन्ह ग रहेन जउन महा याजक हारून क संतान रहिन।
5 कोहात कबीला क दूसर सारे सदस्य क दस सहर दीन्ह ग रहेन। इ सबइ दस सहर एप्रैम, दान अउर मनस्से क आधा परिवार क समूहन क प्रदेसा मँ स रहेन।
6 गेर्सोन कबीला क तेरह सहर दीन्ह ग रहेन। इ सबइ सहर उ प्रदेस मँ रहेन जउन इस्साकार, आसेर, नप्ताली अउर बासान मँ मनस्से क आधा परिवार समूह क भुइँया मँ रहेन।
7 मरारी कबीला क बारह सहर दीन्ह ग रहेन। इ सबइ सहर ओन प्रदेसन मँ रहेन जउन रूबेन, गाद अउ जबूलून क रहेन।
8 इ तरह इस्राएल क लोग लेवी परिवार समूह क इ सबइ सहर अउर ओनके चारिहुँ ओर क खेत दिहन। उ पचे इ मूसा क आदेस क अनुसार यहोवा क हुकूम क मानइ बरे किहन।
9 यहूदा अउ सिमोन परिवार समूहन क प्रदेस क सहरन जेका कि लेवी परिवार समूह क दीन्ह ग रहेन इ सबइ रहेन। 10 इ सहरन कोहात कबीला क सदस्य क रहेन जउन कि लेवी परिवार समूह स हारून क संतानन रहेन। 11 उ पचे ओनका किर्यत-अर्बा जेका नाउँ अनाक क पिता अरबा क नाउँ पाइ धरा गवा रहेन, एकर चारिहुँ कइँती क खेतन क संग दिहेस। इ कसबा क यहुदा क पहाड़ी देस मँ हेब्रोन स भी जाना जात ह। 12 मुला खेत अउर किर्यत-अर्बा सहर क चारिहुँ कइँती क छोटकन सहर यपुन्ने क पूत कालेब क रहेन।
13 इ तरह उ पचे हेब्रोन सहर क हारून क संतानन क सुरच्छा क सहर क रूप मँ अउ लिब्ना अउर ऍकर चारिहुँ कइँती क घास क मइदान दइ दिहस। 14 उ पचे यत्तीर, एसतमो अउर ओनकर घास क मइदान, 15 होलोन, दबीर, 16 ऐन, युत्ता अउर बेतसेमेस भी ओनकइ चारिहुँ कइँती क घास क मइदान समेत पाएन। ऍन दुइनउँ समूहन क यहूदा अउ सिम्मोन क जरिये नौ सहर दीन्ह गएन।
17 उ पचे हारून क संतानन क उ सबइ सहर भी दिहन जउन बिन्यामीन परिवार समूह क रहेन। इ सबइ सहर गिबोन, गेबा अउर ओनकर घास क मइदान, 18 अनातोत अउ अल्मोन रहेन। उ पचे इ सबइ चार सहर अउर ऍनकइ चारिहुँ कइँती क सब खेत दिहन। 19 इ तरह इ सबइ सहर याजकन क दीन्ह गएन। (इ सबइ याजक, याजक लोग हारून क संतान रहेन।) सब मिलाइके तेरह सहर अउ ओनकइ सब खेत ओनके जनावरन क दीन्ह गएन।
20 कोहाती कबीला क दूसर लोगन क इ सहर दीन्ह गएन, जउन कि एप्रैम परिवार समूह क रहेन: 21 उ पचे ओनका एप्रैम क पहाड़ी मुल्क मँ सेकेम सहर जउन कि सुरच्छा क सहर रहा एकर चारिहुँ कइँती क घास क मइदान क संग दिहन। उ पचे गेजरे, 22 किबसैम अउर, बेथोहरोन भी ओनका दिहन। सब मिलाइके उ पचे चार सहर अउ ओनकर चारिहुँ कइँती क सारा खेत ओनका दिहन।
23 दान क परिवार समूह ओनका एलतके, गिब्बतोन, 24 अय्यालोन अउ गत्रिम्मोन दिहन। सब मिलाइके इ सबइ चार सहर अउ ओनकर सारा खेत ओनके जनावरन क बरे रहेन।
25 मनस्से क आधा परिवार समूह ओनका तानाक अउ गत्रिम्मोन दिहन। ओनका उ सबइ सारा खेत भी दीन्ह गएन जउन ऍन दुइनउँ सहरन क चारिहुँ ओर रहेन।
26 इ तरह इ सबइ दस जियादा सहर अउ ऍन सहरन क चारिहुँ कइँती क भुइँया ओनकर जनावरन बरे कोहाती समूह क दिन्ह गइ रही।
27 लेवी परिवार समूह क गेर्सोनी कबीला क इ सबइ सहर दीन्ह ग रहेन।
मनस्से परिवार समूह क आधा परिवार ओनका बासान मँ गोलान दिहस। (गोलान एक सुरच्छा सहर रहा।) मनस्से ओनका बे-एसतरा भी दिहस। उ पचे इ दुइनउँ सहरन क चारिहुँ ओर क घास क मइदान भी पाएन।
28 इस्साकार क परिवार समूह ओनका किस्योन, दाबरत, 29 यरमूत अउ एनगन्नीम अउर ओनकर घास क मइदान दिहेस। कुल मिलाइके चार सहर।
30 आसेर क परिवार समूह ओनका मिसाल, अब्दोन, 31 हेल्कात अउ रहोब दिहस। एन चारिहुँ सहरन क चारिहुँ कइँती क भुइँया भी ओनका ओनकर जनावरन बरे दीन्ह गइ।
32 नप्ताली क परिवार समूह ओनका गलील मँ केदेस क सुरच्छा क सहर क रूप मँ दिहस। नप्ताली क परिवार समूह ओनका हम्मोतदोर अउ कर्तान भी दिहस। ओनकर घास क मइदान क संग तीन सहर।
33 सब मिलाइके गेर्सोनी कबीला तेरह सहर अउ ओनकर चारिहुँ ओर क खेतन पाएस।
34-39 दूसर लेवी कबीला मरारी कबीला रहा। मरारी लोगन क इ सहर दीन्ह ग रहेन: जबूलून क परिवार समूह ओनका योक्नाम, कर्ताह, अउर ओनकर घास क मइदान, दिम्ना अउ नहलाल अउर ओनकर घास क मइदान – चार सहर दिहेन। रूबेन क परिवार समूह ओनका यरदन क पूरब मँ बेसेर, यहसा, केदमोत अउ मेपात सहर दिहन। सारी भुइँया, जउन ऍन चारिहुँ सहरन क चारिहुँ कइँती रही, मरारी लोगन क ओनकर जनावरन बरे दीन्ह गइ। गाद क परिवार समूह ओनका गिलाद मँ सुरच्छा क सहर रामोत अउर एकर घास क मइदान दिहस। उ पचे ओनका महनैम अउर एकर घास क मइदान, हेस्बोन अउ याजेर भी दिहन। गाद ऍन चारिहुँ सहरन क चारिहुँ कइँती क सारी भुइँया भी ओनकर जनावरन बरे दिहन।
40 सब मिलाइके मरारी कबीला जउन कि आखिरी लेवी कबीला रहा क बारह सहर दीन्ह गएन।
41 सब मिलाइके लेवी परिवार समूह अड़तालीस सहर अउर ओकर संग ऍन सहरन क चारिहुँ कइँती क खेत पाएन। इ सबइ सहर उ प्रदेसन मँ रहेन, जउन इस्राएल क दूसर परिवार समूह क लोगन क कबजा मँ रहेन। 42 हर एक सहर क साथ ओनकइ चारिहुँ कइँती क अइसी भुइँया अउर खेत रहेन। जेन पइ जनावरन जिन्नगी बिताइ सकत रहेन। इहइ बात हर सहर क साथे रही।
43 इ तरह यहोवा इस्राएल क लोगन क जउन वचन दिहे रहा, ओका पूरा किहस। उ ओनका सारा प्रदेसन दइ दिहस जेका देइ क उ ओनकर पुरखन क वचन दिहे रहा। लोग उ प्रदेसन क लिहन अउर ओहमाँ रहइ लागेन। 44 अउर यहोवा ओनकर प्रदेस क चारिहुँ कइँती सान्ति स्थापित होइ दिहस काहेकि उ ओनकइ संतानन स वचन दइ रहा। ओनकर कउनो दुस्मन ओनका नाहीं हराएन। यहोवा इस्राएल क लोगन क हर एक दुस्मन क हरावइ दिहस। 45 यहोवा इस्राएलियन क दीन्ह गए आपन सबहीं वचनन क पूरा किहस। कउनो अइसा वचन नाहीं रहा, जउन पूरा न भवा होइ। हर एक वचन पूरा भवा।
लूका क लिखी भइ दूसर किताबे क जानकारी
1 हे थियुफिलुस,
मइँ आपन पहिली किताबे मँ ओन सबइ कामे क बारे मँ लिखेउँ ह जेका सुरू स ईसू किहेस ह अउर 2 उ दिना तलक उ प्रेरितन[a] क जेनका उ चुनेस जब ताई उ पवित्तर आतिमा क आदेस क अऩुसार उ सरगे मँ ऊपर नाहीं उठाइ लीन्ह गवा। 3 आपन मउत क पाछे उ आपन क ठोस प्रमाण लइ के ओनके समन्वा परगट भवा कि उ जिअत बा। उ चालीस दिना तलक ओनके अगवा परगट होत रहा अउर परमेस्सर क राज्य क बारे मँ ओनका बतावत रहा। 4 फिन एक दाई ओनके संग खइया क खात रहा तउ उ ओनका हुकुम दिहेस, “यरूसलेम क जिन तजा अउर मुला जेकरे बारे मँ तोसे कह्यों कि, परमपिता क सपथ पूरा होइ तलक जोहत रहा। 5 काहेकि यूहन्ना तउ पानी स बपतिस्मा दिहेस, मुला अब तनिक दिना क पाछे पवित्तर आतिमा स बपतिस्मा दीन्ह जाइ।”
ईसू क सरगे मँ लइ जावा जाब
6 तउ जब उ प्रेरितन आपुस मँ भेंटेन, उ पचे पूछेन, “पर्भू! का तू इहइ समइ प इस्राएल क राज्य क फिनस लिआइ देब्या?”
7 उ ओनसे कहेस, “उ बेलन या तिथियन क जानब तोहार काम नाहीं, जेका परमपिता खुद आपन अधिकार स तय किहे अहइ। 8 मुला जब पवित्तर आतिमा तोह प आइ, तोहका सक्ती मिलि जाइ। अउर यरुसलेम मँ, समूचइ यहूदिया अउर सामरिया मँ अउर धरती क छोर तलक तू पचे मोर साच्छी होब्या।”
9 ऍतना कहे क पाछे ओनकइ लखत लखत ओका सरगे मँ ऊपर उठाइ लीन्ह गवा अउर फिन एक बादर ओका आँखी स ओझल कइ दिहेस। 10 जब उ जात रहा तउ पचे आँखी पसारि के ओका निहारत रहेन। तबहिं फउरन सफेद कपड़ा पहिरिके दुइ मनई ओकरे समन्वा आइके ठाड़ भएन। 11 अउर बोलेन, “अरे गलीली मनइयो। तू पचे हुवाँ ठाड़ भवा टकटकी काहे लगाए बाट्या? इ ईसू तोहरे बीच स सरगे मँ ऊपर उठाइ लीन्ह गवा, जइसे तू ओका सरगे मँ जात देख्या, वइसे ही उ फिन वापिस लौटि आई।”
एक नवा प्रेरित क चुनाव
12 फिन उ प्रेरितन जैतून नाउँ क पर्वत स, यरूसलेम लौटि आएन जउन यरुसलेम स कउनो एक किलोमीटर दूर रहा। 13 अउर हुवाँ पहुँचिके ऊपर क उ कमरा मँ गएन जहाँ उ पचे ठहरा रहेन। इ पचे रहेन-पतरस, यूहन्ना, याकूब, अन्द्रियास, फिलिप्पुस, थोमा, बरतुलमै अउर मत्ती, हलफई क बेटवा याकूब, समौन जेलोतेस अउर याकूब क बेटवा यहूदा।
14 ऍनके संग कछू स्त्रियन, ईसू क महतारी मरियम अउर ईसू क भाई भी रहेन। इ सबइ आपन क एक संग पराथना मँ चित लगाए राखत रहेन।
15 फिन इ दिनन मँ पतरस भाई-बन्द क बीच खड़ा होइके, जेकर गनती कउनो एक सउ बीस रही, कहेस, 16-17 “मोरे भाइयो, ईसू क गिरफतार करावइ वाले मनइयन क अगुआ यहूदा क बारे मँ, पवित्तर सास्तर कउ लेख जेका दाऊद आपन मुँहे स पवित्तर आतिमा बहोत पहिले ही कहे रही, ओकर पूर होब जरूरी रहा। उ हम पचन मँ गना गवा रहा अउर इ सेवा मँ ओकर हाथ रहा।”
18 (इ मनई जउन धन ओका ओकरे नीचपना क कामे बरे मिला रहा, उ धने स एक ठु खेत मोल लिहेस मुला उ पहिले तउ मूँड़े क बल भहरान अउर फिन बदन फाटि गवा अउर ओकर अँतड़ी बाहेर निकरि आइ। 19 अउर सबइ यरूसलेम क बसइयन क एकर पता लग गवा। य़ह बरे ओनकइ भाखा मँ उ खेत क हक्लदमा कहा गवा जेकर अरथ अहइ “लहू क खेत।”)
20 पतरस कहेस, “काहेकि भजन संहिता मँ इ लिखा बा,
‘ओकर घर उजरि जाइ
अउर ओहमाँ रहइ क कउनो नाँ बचइ।’ (A)
अउर,
‘ओकर, मुखियई कउनो दूसर मनई लइ लेइ।’ (B)
21-22 “यह बरे इ जरुरी अहइ कि जब पर्भू ईसू हमरे बीच रहा तउ जउन मनइयन हमरे संग सदा रहेन, ओहमाँ स कउनो एक क चुना जाए। कहइ क मतलब उ समइ स लइके जब स यूहन्ना मनइयन क बपतिस्मा देब सरू किहेस अउर जब तलक ईसू क हमरे बीच स उठइ लीन्ह गवा रहा। इ मनइयन मँ स कउनो एक क ओकरे फिन स जी उठइ क महरे संग साच्छी होइ चाही।”
23 यह बरे उ पचे दुइ मनई न नाउँ दिहेन। एक यूसुफ जेका बरसबा कहा जात रहा। (यूसतुस ऩाउँ स जाना जात रहा) अउर दूसर मत्तियाह। 24 फिन उ पचे इ कहत भवा पराथना करइ लागेन, “पर्भू! तू सबहि क मनवा क जानत ह, हमका बतावा कि इ दुइनउँ मँ स तू केका चुन्या ह। 25 जउऩ एक प्रेरित क तरह सेवा करइ बरे इ ओहदा क लइ लेई जेका आपन ठउर पर जाइ बरे ओहदा छोड़िके चला गवा रहा!” 26 फिन उ पचे एकरे बरे पर्ची नाएन अउर पर्ची मत्तियाह क नाउँ क निकरी। इ तरह गियारह प्रेरितन क दल मँ गना गवा।
यहोवा अउर देव मूरतियन
10 इस्राएल क परिवार, यहोवा क सुना। 2 जउन यहोवा कहत ह, उ इ अहइ:
“अन्य रास्ट्रन क लोगन क तरह जिन रहा।
अकासे क खास संकेतन स जिन डेराअ।
दूसर रास्ट्र ओन संकेतन स डेरात हीं जेनका उ पचे अकासे मँ लखत हीं।
किन्तु तू पचन्क ओन चीजन स नाहीं डेराइ चाही।
3 दूसर लोगन क रीति रिवाज ब्यर्थ अहइँ।
ओनकर देव मूरतियन जंगल क लकड़ी क अलावा कछू नाहीं।
ओनकर देव मूरतियन कारीगर क छैनी स बनी अहइँ।
4 उ पचे आपन देव मूरतियन क सोना चाँदी स सुन्नर बनावत हीं।
उ पचे आपन देव मूरतियन क हथौड़न
अउर कीलन स लटकावत हीं जेहसे उ सबइ लटके रहइँ, गिर न पड़इँ।
5 दूसर देसन क देव मूरतियो,
ककड़ी क खेते मँ खड़े फूस क पुतले क समान अहइँ।
उ सबइ न बोल सकत हीं,
अउर न चल सकत हीं।
ओनका उठाइके लइ जाब पड़त ह
काहेकि उ सबइ चल नाहीं सकतिन।
ओनसे जिन डेराअ।
उ सबइ न तउ तू पचन्क चोट पहुँचाइ सकत हीं
अउर न ही कउनो लाभ।”
6 यहोवा तू जइसा कउनो दूसर नाहीं अहइ।
तू महान अहा।
तोहार नाउँ महान अउर सक्तितपूर्ण अहइ।
7 परमेस्सर, हर एक मनई क तोहार सम्मान करना चाही।
तू सबहिं रास्ट्रन क राजा अहा।
तू ओनके सम्मान क पात्र अहा।
रास्ट्रन मँ अनेक बुद्धिमान मनई अहइँ।
किन्तु कउनो मनई तोहरे समान बुद्धिमान नाहीं अहइ।
8 दूसर रास्ट्रन क सबहिं लोग बेहुदा अउर मूरख अहइँ।
ओनकर देवतन क सिच्छा केवल लकड़ी क टुकड़ा अहइँ।
9 उ पचे आपन मूरतियन क तर्सीस नगर क चाँदी
अउर उफाज नगर क सोने क उपयोग कइके बनावत हीं।
उ सबइ देव मूरतियन बढ़इयन अउ सुनारन क जरिये बनाई जात हीं।
उ पचे ओन देव मूरतियन क अच्छा किसिम क कीमती नीले अउर बैंगनी वस्त्र पहिरावत हीं।
इ सबइ “कुसल कारीगरन” दुआरा बनाए गए रहेन।
10 किन्तु केवल यहोवा ही सच्चा परमेस्सर अहइ।
उ एकमात्र परमेस्सर अहइ जउन चेतन अहइ।
उ सास्वत सासक अहइ।
जब परमेस्सर किरोध करत ह तउ धरती काँप जात ह।
रास्ट्रन क लोग ओकरे किरोध क रोक नाहीं सकतेन।
11 यहोवा कहत ह, “ओन लोगन क इ सँदेसा द्या:
‘ओन लबार देवतन पृथ्वी अउ सरग नाहीं बनाएन
अउर उ पचे देवता नस्ट कइ दीन्ह जइहीं,
अउर पृथ्वी अउर सरग स लुप्त होइ जइही।’”
12 उ परमेस्सर एक ही अहइ जउन आपन सक्ति स पृथ्वी बनाएस।
परमेस्सर आपन बुद्धि क उपयोग किहस अउर संसार क रचना कइ डाएस।
आपन समुझ क अनुसार परमेस्सर पृथ्वी क ऊपर अकास क फइलाएस।
13 परमेस्सर कड़कत बिजली बनावत ह
अउर उ अकास स बड़े जल क बाढ़ क सिरावत ह।
उ पृथ्वी क हर एक स्थान पइ, अकासे मँ मेघ क उठावत ह।
उ बिजली क बर्खा क साथ पठवत ह।
उ आपन गोदामन स पवन क निकारत ह।
14 लोग एतना बेवकूफ अहइँ।
सुनार ओन देव मूरतियन स मूरख बनावा गएन ह जेनका उ पचे खुद बनाएन ह।
इ सबइ मूरतियन झूठ क अलावा कछू नाहीं अहइँ,
उ सबइ निस्कृय अहइँ।
15 उ सबइ देव मूरतियन कउनो काम क नाहीं।
उ सबइ कछू अइसी अहइँ जेनकर मजाक उड़ावा जाइ सकइ।
निआउ क समइ आवइ पइ उ सबइ देव मूरतियन नस्ट कइ दीन्ह जइहीं।
16 किन्तु याकूब क परमेस्सर ओन देव मूरतियन क समान नाहीं अहइ।
परमेस्सर सबहिं वस्तुअन क सृस्टि किहस,
अउर इस्राएल उ परिवार अहइ जेका परमेस्सर आपन लोग क रूप मँ चुनेस।
परमेस्सर क नाउँ, “सर्वसक्तिमान यहोवा” अहइ।
बिनास आवत अहइ
17 तू पचे जउन कि सहर रहत ह आपन सबहिं चिजियन जमा कइ ल्या
अउर जाइ क तइयार हो जा।
18 यहोवा कहत ह,
“इ समय मइँ यहूदा क लोगन क इ देस स बाहेर लोकाइ देब।
मइँ ओनका पीड़ा अउ परेसानी देब।
मइँ अइसा करब जेहसे उ सबइ पाठ सीख सकइँ।”
19 ओह, मइँ बुरी तरह घायल अहउँ।
मइँ ठीक नाहीं होइ सकत।
तउ भी मइँ खुद स कहेउँ,
“इ मोर बेरामी अहइ, मोका एहसे पीड़ित होइ चाही।”
20 मोर डेरा बर्बाद होइ गवा।
डेरे क सारी रस्सियन टूट गइन ह।
मोर बच्चन मोका तजि गएन।
उ पचे चला गएन।
कउनो मनई मोर डेरा लगावइ क नाहीं बचा ह।
कउनो मनई मोरे बरे सरण ठउर बनावइ क नाहीं बचा ह।
21 गड़रियन (प्रमुख) मूर्ख अहइँ।
उ पचे यहोवा क पावइ क जतन नाहीं करतेन।
उ पचे बुद्धिमान नाहीं अहइँ,
एह बरे ओनकर रेवड़न (लोग) बिखर गइन अउर नस्ट होइ गइन ह।
22 धियान स सुना।
एक कोलाहल, कोलाहल उत्तर स आवत अहइ।
इ यहूदा क नगरन क नस्ट कइ देइ।
यहूदा एक सुनसान रेगिस्तान बन जाइ।
इ गीदड़न क माँद बन जाइ।
23 हे यहोवा, मइँ जानत हउँ कि मनई फुरइ आपन जिन्नगी क मालिक नाहीं अहइ।
लोग फुरइ आपन भविस्स क जोजना नाहीं बनाइ सकत हीं।
लोग फुरइ नाहीं जानतेन कि कइसे ठीक जिअत रहा जाइ।
24 हे यहोवा, हमार अनुसान करा,
किन्तु निआव स।
किरोध मँ हमका सजा जिन द्या।
नाहीं तउ तू मोका नस्ट कइ देब्या।
25 जदि तू कोहान अहा तउ दूसर रास्ट्रन क सजा द्या।
उ पचे, न तोहका जानत हीं न ही तोहार सम्मान करत हीं।
उ सबइ लोग तोहार आराधना नाहीं करतेन।
ओन रास्ट्रन याकूब क परिवारे क नस्ट किहन।
उ पचे इस्राएल क पूरी तरह बर्बाद कइ दिहन।
उ पचे इस्राएल क जन्मभूमि क नस्ट किहन।
ईसू मंदिरे क बिनास क भविस्सबाणी किहेस
(मरकुस 13:1-31; लूका 21:5-33)
24 मंदिर क छोड़िके ईसू जब हुवाँ स होइके जात रहा तउ ओकर चेलन ओका मँदिर क इमारत देखॉवइ ओकरे लगे आएन। 2 एह प ईसू ओनसे कहेस, “तू पचे इ इमारतन क सोझ खड़ी देखत अहा? मइँ तोहका सच सच कहत हउँ, हिआँ तलक एक पाथर प दूसर पाथर टिक नाहीं पाई। एक एक गिराइ दीन्ह जाई।”
3 ईसू जब जैतून पहाड़ प बइठा रहा तउ अकेल्ले मँ ओकर चेलन लगे आएन अउर बोलेन, “हमका बतावा इ कब होई? जब तू लउटि अउब्या अउर इ संसारे क अंत होई तउ कइसे संकेत परगट होइहीं?”
4 जवाबे मँ ईसू ओनसे कहेस, “होसियार! तू पचन क कउनो भरमाइ न पावइ। 5 मइँ इ यह बरे कहत हउँ कि अइसे बहोतन अहइँ जउन मोरे नाउँ स अइहीं अउर कइहीं, ‘मइँ मसीह हउँ’ अउर उ सबइ बहोतन क भरमइहीं। 6 तू सबइ नगीचे क जुद्ध क बातन या दूरि क जुद्ध क अफवाह सुनब्या पर देखा तू घबराया जिन। अइसा तउ होइ मुला अबहिं अंत नाहीं आवा अहइ। 7 हर रास्ट्र दूसर रास्ट्र क खिलाफ अउर एक राज्य दूसर राज्य क खिलाफ खड़ा होई। अकाल पड़ी। हर कतहूँ भुँइडोल आई। 8 मुला इ सब बातन उहइ तरह अहइ जइसे नया पइदा होय क पहले की सुरुआती पीडा।
9 “उ समइ उ पचे तोहका सजा देवॉवइ बरे पकड़वइहीं अउर उ पचे तोहका मरवाइ देइहीं। काहेकि तू सबइ मोर चेलन अहा। सबहिं रास्ट्र क लोग तोहसे घिना करिहीं। 10 उ समइ बहोत मनइयन क मोह टूटी जाई अउर ओहहि समइ बहुत स बिसवासियन क बिसवास डिग जाई। उ पचे एक दूसर क अधिकारियन क हाथे मँ दइ देइहीं अउ आपस मँ घिना करिहीं। 11 बहोत स झूठे नबियन खड़ा होइ जइहीं, अउर मनइयन क ठगिहीं। 12 काहेकि बुराई क बाढ़ आइ जाए स पिरेम घटि जाई। 13 मुला जउन अंत तक टिका रही ओकर उद्धार होई। 14 सरगे क राज्य क इ सुसमाचार समूचे संसार मँ साच्छी रूप मँ प्रचार कीन्ह जाई। ऍसे सब राजन क साच्छी रही अउर तबहीं अंत होइ जाई।
15 “एह बरे जबहिं तू लोग ‘खौफनाक बिनास करइवाली चीज’[a] क पवित्तर स्थान प खड़ा होइके देखा, जेकरे बारे मँ दानिय्येल नबी बताएन ह, (पढ़इया खुद समुझ जाई कि एकर अरथ का बाएइ।) 16 तब जउन मनई यहूदिया मँ होइँ, ओनका पहाड़े प भाग जाइ चाही। 17 जउन आपन घरे क छत प होईं, उ घरवा स बाहेर कछू भी लइ जाइके तर खाले न आवइँ। 18 अउ जउन बाहेर खेतन मँ काम करत होइँ, उ पाछे मुड़िके आपन ओढ़ना तक न लेइँ।
19 “ओन स्त्रियन बरे जेकरे कोखे मँ गरभ होइ या जेकर लरिकन दूध पिअत होइँ, उ दिनन कस्टे क होइहीं। 20 पराथना करा कि तोहका जाड़े क दिनन मँ या सबित क दिन पराइ क न पड़इ। 21 उ दिनन मँ अइसी बिपत आई जइसी जबते परमेस्सर सृस्टि रचेस ह, आजु तक कबहुँ नाहीं आइ अउ न कबहुँ आई।
22 “अउर जदि परमेस्सर उ दिनन क घटावइ क पक्का इरादा न कइ लिहे होत तउ कउनो भी न बच पावत किन्तु चुना भएन क कारण उ दिनन मँ कमती कइ देइ।
23 “उ दिनन मँ जदि कउनो तू पचन स कहइ, देखा, इ रहा मसीह या उ राह मसीह। तउ ओकर बिसवास जिन किहा। 24 मइँ इ कहत हउँ काहेकि कपटी मसीह अउप कपटी नबी खड़ा होइहीं अउर अइसे अचरज कारजन देखइहीं अउर अद्भुत कारजन करिहइँ कि बन पड़इ तउ चुने भएन क भी चकमा दइ देइँ। 25 देखा, मइँ तोहका पहिले ही चेतावनी दइ चुका अहउँ।
26 “तउ जदि उ सबइ तोहसे कहइँ, ‘देखा, मसीह जंगल मँ बा!’ फन हुवाँ जिन जाया अउर जदि उ कहइँ, ‘देखा उ पचे कोठरी मँ छुपा बाटइ!’ तउ ओनकइ बिसवास जिन कर्या। 27 मइँ इ कहत हउँ काहेकि जइसे बिजुली पुरब मँ सुरू होइके पच्छिम क अकासे तक चमक जात इ वइसे ही मनई क पूत भी परगट होई। 28 जहाँ कहूँ ल्हास होई हुआँ गिद्ध एकट्ठा होइहीं।
29 “उ दिनन जउन मुसीबत पड़ी, ओकरे फउरन बाद:
‘सूरज करिया पड़ि जाई,
चन्दा स चाँदनी न निकसी,
अकासे स तारा टुटिहीं,
अउ अकास मँ आसमानी सक्ति झकझोर दीन्ह जइहीं।’[b]
30 “उ समइ मनई क पूत क आवइ क चीन्हा अकास मँ परगट होई। तबहिं भुइयाँ प सब जातिन क मनइयन फूटि फूटि क रोइहीं अउर उ सबइ मनई क पूत क सक्ती अउर महिमा क संग सरग क बदरन मँ परगट होत देखिहीं। 31 उ ऊँच सुर क तुरूही क संग आपन दूतन क पठइ। फिन उ पचे सरग क एक छोर स दूसर छोर तलक सब कहूँ स आपन चुना भवा मनइयन क ऍकट्ठा करी।
32 “अंजीरे क बृच्छ स उपदेस ल्या। जइसे ही ओकर टहनियन सुऋुवार होइ जात हीं अउर कोंपर फूटइ लागत हीं। तू लोग जान जात ह कि गर्मी आवइ क अहइ। 33 वइसे ही जब तू इ सब घटत देख्या तउ समुझ लिहा कि उ समइ नगिचे आइ ग बाटइ, मुला ठीक दुआर तलक। 34 मइँ तू लोगन्स सच कहत हउँ कि इ पीढ़ी क खतम होइ क पहिले इ सब बातन होइ जइहीं। 35 धरती अउर अकास तउ मिट सकत हीं मुला मोर बचन कबहुँ न मिटी।”
सिरिफ परमेस्सर जानत ह कि उ समइ कब आई
(मरकुस 13:32-37; लूका 17:26-30,34-36)
36 “उ दिना या घड़ी क बारे मँ कउनो कछू न जानत! न सरगे क दूतन अउर न खुद पूत। सिरिफ परमपिता जानत ह।
37 “जइसे नूह क दिना मँ भवा, वइसे ही मनई क पूत क अवाई भी होई। 38 वइसे ही जइसे मनई जल बाढ आवइ स पहिले क दिनन ताईं खात पिअत रहेन, बियाह सादी करावत रहेन जब तलक नूह नाउ प नाहीं चढ़ गवा। 39 ओनका तब ताईं कछू पता नाहीं लगि सका जब ताईं प्रलय नाहीं आइ गइ अउर ओन सबन क बहाइके नाहीं लइ गइ।
“मनई क पूत क अवाई भी अइसे ही होई। 40 उ समइ खेते मँ काम करत दुइ मनइयन मँ स एक क लइ लीन्ह जाई अउर एक क हुवँइ छोड़ि दीन्ह जाई। 41 चकरी पीसत दुइ स्त्रियन मँ एक क धइ लीन्ह जाई अउ एक हुवँइ पाछे छोड़ि दीन्ह जाई।
42 “तउ तू लोग होसियार रहा काहेकि तू नाहीं जनत्या कि तोहार स्वामी कब आई। 43 याद राखा अगर घरे क स्वामी जानत होत कि राति क कउनो घड़ी मँ चोर आइ जाई तउ उ जागत रहत अउर चोरे क आपन घरवा मँ सेंध नाही लगावइ देत। 44 एह बरे तू भी तइयार रहा काहेकि जब तू पचे सोच भी नाहीं रहब होब्या, मनई क पूत आइ जाई।
निक अउर खराब सेवक
(लूका 12:41-48)
45 “तब सोचा उ भरोसामंद अउ समझदार सेवक कउन बाटइ, जेका स्वामी आपन घरवा क सेवक क ऊपर ठीक समइ प ओनका खइया क देइ बरे लगाएस ह। 46 धन्य अहइ उ सेवक जेका ओकर स्वामी जब आवत ह तउ ओका दियाभया काज करत पावत ह। 47 मइँ तोहसे सच कहत हउँ उ स्वामी ओका आपन समूचे धन दौलत क अधिकारी बनाईं देई।
48 “दूसर कइँती सोचा एक ठु बुरा सेवक अहइ, जउन अपना मनवा मँ कहत ह मोर स्वामी बहोत दिना स लुटि क नाहीं आवत ह। 49 अइसे उ आपन संगी साथी सेवकन स मारपीट करइ लागत ह अउर सराबियन क संग खाब पिअब सुरू कइ देत ह। 50 तउ ओकर स्वामी अइसे दिन आइ जाई जउने दिन उ ओकरे अवाई क सोचत तलक नाहीं अउ जेकर ओका पत तलक नाहीं। 51 अउर ओकर स्वामी ओका बुरे ढंग स सजा देई अउर कपटियन क बीचउबीच ओकर ठउर ठहराई जहाँ लोग रोवत होइहीं अउर दँतवन क किड़किड़ावत रइहीं।
Awadhi Bible: Easy-to-Read Version. Copyright © 2005 Bible League International.