◀ All Reading Plans / M’Cheyne Bible Reading Plan / Family: Joshua 18–19; Psalms 149–150. Secret: Jeremiah 9; Matthew 23. (Awadhi Bible: Easy-to-Read Version)

Prev Day

July 13, 2025

Next Day

Use the calendar to view readings from this devotional.

July 2025
Su	Mo	Tu	We	Th	Fr	Sa
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31

Return to today's reading

M’Cheyne Bible Reading Plan

The classic M'Cheyne plan--read the Old Testament, New Testament, and Psalms or Gospels every day.

Duration: 365 days

यहोसू 18-19

बचे भए प्रदेस क बँटवारा

18 इस्राएल क सबहिं लोग सीलो नाउँ क ठउर पइ बटुर गएन। उ ठउरे पइ उ पचे मिलापवाला तम्बू खड़ा किहन। इस्राएल क लोग उ प्रदेस क सबहिं दुस्मन क हराए रहेन अउर उ प्रदेस ओनके अघिकार मँ रहेन। ²मुला उ समइ भी इस्राएल क सात परिवार समूह अइसेन रहेन, जेनका परमेस्सर क जरिये वचन दीन्ह जाइ पइ भी ओनका दीन्ह गइ भुइँया नाहीं मिली रही।

³ऍह बरे यहोसू इस्राएल क लोगन स कहेस, “तू लोग आपन प्रदेस लेइ मँ ऍतनी देर काहे जोहत अहा? यहोवा, तू पचन्क परमेस्सर इ प्रदेस तू पचन्क दिहे अहइ। ⁴ऍह बरे तेाहरे सबन्क हर एक परिवार समूह क तीन मनई चुनइ चाही? मइँ ओन मनइयान क ओन प्रदेसन क जाँच बरे पठउब। उ सबइ उ पूरे प्रदेस स होइ क जाब अउर उ प्रदेस क विवरन तइयार करिहीं तब उ सबइ मोरे लगे लउटिहीं। ⁵उ पचे देस क सात ठु हींसा मँ बँटि देइहीं। यहूदा क लोग आपन प्रदेस दक्खिन मँ रखिहीं। यूसुफ क लोग आपन प्रदेस उत्तर मँ रखिहीं। ⁶मुला तू लोगन क भुइँया क उल्लेख करत भवा विवरण तइयार करइ चाही अउ प्रदेस क सात ठु हींसन मँ बाँटि देइ चाही। विवरण मोरे लगे लिआवा। अउर मइँ हिआँ यहोवा हमार परमेस्सर क मौजूदगी मँ तोहार बरे पाँसा (लोटरी) डालब। ⁷मुला लेवी परिवार समूह ऍन प्रदेसन क कउनो हींसा नाहीं पइहीं। उ सबइ याजक अहइँ अउर ओनकर कारज यहोवा क सेवा करब अहइ। गाद अउर रूबेन क परिवार समूह अउ मनस्से क आधा क परिवार समूहन क लोग पहले वचन क अनुसार दीन्ह गवा आपन प्रदेस पाइ चुका अहइँ। इ सबइ प्रदेस यरदन नदी क पूरब मँ अहइँ। यहोवा क सेवक मूसा उ प्रदेस क पहिले ही दइ दिहे रहा।”

⁸ऍह बरे चुने भए मनई उ भुइँया क लखइ अउ ओकर नक्सा बनावइ बरे चला गएन। यहोसू ओनसे कहेस, “जा, अउर उ प्रदेस क जाँच करा अउर ओकर नक्सा तइयार करा। तब मोरे लगे लउटि आवा। उ समइ मइँ यहोवा स कहबउँ कि जउन देस तू पचन्क मिली ओका चुनइ मँ उ पचे मोर मदद करइँ।”

⁹ऍह बरे ओन मनसेधुअन उ जगह तजेन अउर उ देस मँ उ पचे चला गएन। उ पचे देस क जाँच किहेन अउर यहोसू बरे नक्सा तइयार किहेन। उ पचे हर सहर क जाँच किहेन अउर पाएन कि प्रदेस क सात ठु हींसा अहइँ। उ पचे आपन नकसा क तइयार किहन अउर यहोसू क लगे गएन। यहोसू तबहुँ सीलो क डेरा मँ रहा। ¹⁰उ समइ यहोसू यहोवा स मदद माँगेस। यहोसू हर एक परिवार समूह क देइ बरे एक ठु प्रदेस चुनेस। यहोसू प्रदेस क बाँटेस अउर हर एक परिवार समूह क ओकरे हींसा क प्रदेस दिहस।

बिन्यामीन बरे प्रदेस

¹¹तब बिन्यामीन क परिवार समूह अउर ओनकइ कबीलन बरे पाँसा डावा गवा रहा अउर पाँसा यहोदा अउर यूसुफ क परिवार समूहन क भुइँया क बीच पड़ेन। ¹²ऍकर उत्तरी चउहद्दी यरदन नदी स सुरु भइ। इ चउहद्दी यरीहो क उत्तरी छोरे स गइ रही। तब इ चउहद्दी पच्छिम क पहाड़ी प्रदेस मँ गइ रही। इ चउहद्दी लगातार बेतावेन क ठीक पूरबी ढलान तलक रही। ¹³तब इ चउहद्दी लूज़ (यानी बेतेल) क दक्खिनी ढलान तलक गइ। फिन इ चउहद्दी अत्रोद्दार तलक खाले गइ। अत्रोतद्दार खाले बेथोरोन क दक्खिनी पहाड़ी क ढलान पइ अहइ। ¹⁴चउहद्दी दक्खिन कइँती मड़ी अउर बैथ-हेरोन क लगे उ पहाड़ी क पच्छिमी कइँती क निचके स गइ। इ चउहद्दी आगे किर्यत बाल (जउन किर्यत-यारीम भी कहलावत ह) तलक गएन। इ एक सहर रही जहाँ यहूदा क लोग रहत रहेन। इ पच्छिमी चउहद्दी रही।

¹⁵दक्खिन क चउहद्दी किर्यत्यारीम स सुरु भइ अउर नेप्तोह क पानी क चसमा तलक गइ। ¹⁶तब चउहद्दी हिन्नोम क घाटी क निचके पहाड़ी क तलहटी मँ गइ। इ रपाईम घाटी क उत्तरी छोर रहा। इ चउहद्दी यबूसी सहर क ठीक दक्खिन हिन्नोम घाटी मँ चलत भइ चली गइ। तब चउहद्दी एनरोगेल तलक चली गइ। ¹⁷हुआँ, चउहद्दी उत्तर कइँती मुड़ी अउर एन सेमेस क गइ। इ चउहद्दी लगातार गलीलोत तलक जात ह। (गलीलोत, पहाड़न मँ अदुम्मीम दर्रे क निअरे अहइ।) इ चउहद्दी उ बड़की चट्टान तलक गइ जेकर नाउँ रूबेन क पूत, बोहन बरे धरा गवा रहा। ¹⁸इ चउहद्दी बेतअरबा क उत्तरी भाग तलक लगातार चली गइ। ¹⁹तब इ बेथोग्ला क उत्तरी भाग क जाइके, लवण सागर क उत्तरी तट पइ खतम भइ। इ उहइ जगह अहइ जहाँ यरदन नदी समुद्र मँ गिरत ह। इ दक्खिनी चउहद्दी रही।

²⁰पूरब कइँती यरदन नदी क चउहद्दी रही। इ तरह इ भुइँया रही जउन बिन्यामीन क परिवार समूह क दीन्ह गइ। इ सबइ चारिहुँ कइँती क चउहद्दी रहीन। ²¹बिन्यामीन क हर एक परिवार समूह क, इ तरह, इ भुइँया मिली। ओनके कब्जा मँ इ सबइ सहर रहेन। यरीहो, बेथोग्ला, एमेक्कसीस, ²²बेतराबा, समारैम, बेतेल, ²³अव्वीम, पारा, ओप्रा, ²⁴कपरम्मोनी, ओप्नी अउ गेबा। इ सबइ बारहु सहर, उस छोटके छेत्र मँ, ओनके आसपास खेतन क साये रहेन।

²⁵बिन्यामीन क परिवार समूह क लगे गिबोन, रामाबेरोत, ²⁶मिस्पा, कपीरा, मोसा, ²⁷रेकेम, र्पेर्ल, तरला, ²⁸सेला, एलेप, यबूस सहर (यरुसलेम), गिबत अउर किर्यत-यरीम सहर भी रहेन। इ सबइ चउदह सहर, उ छोटके छेत्र मँ ओनके आसपास क खेतन क साथे रहेन। इ सबइ पहाँटा बिन्यामीन क परिवार समूह पाए रहा।

सिमोन बरे प्रदेस

19 सिमोन क परिवार बरे दूसर पाँसा डावा गवा रहा। जउन ओनका मिली, यहूदा क अधिकार-छेत्र क भीतर रही। ²इ उ भुइँया क विवरण रही जउन ओनका मिली: बेर्सबा जउन सेबा भी कहलावत ह। मोलादा, ³हसर्सूआल, बाला, एसेम, ⁴एलन्तोलद, बतूल, होर्मा, ⁵सिक्लग, बेत्मर्काबोत, हसर्सूसा, ⁶बेतलबाओत अउ सारुहने, इ सबइ तेरह सहर अउर ओनकर सारा खेत सिमोन क रहेन।

⁷ओनका ऐन, रिम्मोन, एतेर अउ आसान सहर भी एकर खेतन क साथ पाए रहेन। ⁸उ पचे उ सबइ सारा खेत सहरन क साथे पाएन जउन बालत्बेर तलक फइला रहेन। (इ नेगव छेत्र मँ रामा ही अहइ।) इ तरह इ उ प्रदेस रहा, जउन सिमोनी लोगन क परिवार समूह क दीन्ह गवा। हर एक इ भुइँया क पाएस। ⁹सिमोनी लोगन क भुइँया यहूदा क प्रदेस क भाग स लीन्ह गइ रही। यहूदा क लगे ओनँ लोगन क जरुरत स जियादा भुइँया रही। ऍह बरे सिमोनी लोगन क ओनकी भुइँया क हींसा मिला।

जबूलूनी बरे प्रदेस

¹⁰जबूलून क परिवार समूह अउर ओकरे कबीलन बरे तीसर पाँसा डावा गवा रहा। जबूलून क प्रदेस सारीद तलक जात रही। ¹¹फिन उ पच्छिम मँ दब्बेसेत स होत भइ मरला क छेत्र क निचके तलक पहोंचत रहा। तब इ चउहद्दी संकरी घाटी स होत भए योकनाम क छेत्र तलक जात रही। ¹²तब इ चउहद्दी पूरब कइँती मुड़ी रही। इ सारीद स किसलोत्ताबोर क छेत्र तलक पहोंचत रही। तब इ चउहद्दी दाबरत अउ यापी तलक चलत गइ रही। ¹³तब चउहद्दी पूरब मँ गथेपेर अउर इत्कासीन तलक लगातार रही। इ चउहद्दी रिम्मोन पइ खतम भइ। तब चउहद्दी मुड़ी अउर नेआ तलक गइ। ¹⁴नेआ पइ फिन चउहद्दी मुड़ी अउ उत्तर कइँती गइ। इ चउहद्दी हन्नातोन तलक पहोंची अउर लगातार यिप्तहेल क घाटी तलक गइ। ¹⁵इ चउहद्दी क भीतर कत्तात, नहलाल, सिम्रोन यिदला अउर बेतलेहेम सहर रहेन। सब मिलाइके इ सबइ बारह सहर आपन खेतन क साथे रहेन।

¹⁶ऍह बरे इ सबइ सहर अउ छेत्र अहइँ जउन जबूलून क कबीलन क दीन्ह गएन।

इस्साकार बरे प्रदेस

¹⁷चउथा पाँसा इस्साकार क परिवार समूह क कबिलन बरे डावा गवा रहा। ¹⁸उ परिवार समूह क जउन भुइँया दीन्ह गइ रही उ इ अहइ: यिज्रेल, कसुल्लोत, सूनेम ¹⁹हपारैम, सीओन, अनाहरत, ²⁰रब्बीत, किस्योन, एबेस, ²¹रेमेत, एनगन्नीम, एन हददा अउर बेतपस्सेस।

²²ओनकर प्रदेस क चउहद्दी ताबोरसहसूसा अउर बेतसेमेस क छुअत रही। इ चउहद्दी यरदन छेत्र पइ खतम होत रही। सब मिलाइके सोहाह सहर अउर ओनकर खेत रहेन। ²³इ सबइ सहर अउर कस्बा इस्साकार परिवार समूह अउर ओनकइ कबीलन क दीन्ह गएन प्रदेस क हींसा रहेन।

आसेर बरे प्रदेस

²⁴पाँचवाँ पाँसा आसेर क परिवार समूह अउर ओनकइ कबीलन बरे डावा गवा रहेन। ²⁵उ परिवार समूह क जउन भुइँया दीन्ह गइ उ इ अहइ: हेल्कत, हली, बेतेन, अच्छाप, ²⁶अलाम्मेल्लेक, अमाद अउ मिसाल।

पच्छिमी चउहद्दी लगातार कर्मेल पहाड़ अउ सीहोलिब्नात तलक रही। ²⁷तब चउहद्दी पूरब कइँती मुड़ी। इ चउहद्दी बेतदागोन तलक गइ। इ चउहद्दी जबूलून अउ यिप्तहेल क घाटी क छुअत रही। तब इ चउहद्दी बेतेमेक अउ नीएल क उत्तर क गइ। इ चउहद्दी काबुल क उत्तर स गइ रही। ²⁸तब इ चउहद्दी एब्रोन, रहोब अउर हम्मोन होत भइ काना तलक गइ रही। इ प्रदेस लगातार एक सक्तीसाली सहर सिदोन तलक गइ रही। ²⁹इ चउह्ददी रामा कइँती मुड़ी अउर फुन किलाबन्द सहर सूर तलक गइ। तब फुन मुड़ी अउर होसा तलक गइ। इ चउहद्दी अकज़ीब, ³⁰उम्मा, अपेक अउर रहोब क छेत्र मँ समुद्दर पइ खतम होत रही।

सब मिलाइके हुआँ बाईस सहर अउ ओनकर खेत रहेन। ³¹इ सबइ सहर अउ ओनके खेत आसेर परिवार समूह क दीन्ह गए भुइँया क हींसा रहेन। उ परिवार समूह क हर एक कबिला इ भुइँया क कछू हींसा पाएस।

नप्ताली बरे प्रदेस

³²छठा पाँसा नप्ताली क परिवार समूह अउर ओनकर कबीलन बरे डावा गवा रहेन। ³³ओनकर प्रदेस क चउहद्दी सानन्नीम क छेत्र मँ बिसाल बृच्छ स सुरू भइ। इ हेलेप क निअरे रहा। तब इ चउहद्दी अदानीमेकेब अउ यब्नेल स होइके गइ। इ चउहद्दी लक्कूम पइ खतम भइ। ³⁴तब इ चउहद्दी पच्छिम क अजनोत्ताबोर होइके गइ। इ चउहद्दी हुक्कोक पइ खतम भइ। इ चउहद्दी दक्खिन क जबूलून छेत्र तलक गइ। इ चउहद्दी पच्छिम मँ आसेर क छेत्र तलक पहोंचत रही। इ चउहद्दी पूरब मँ यरदन नदी पइ यहूदा क जात रही। ³⁵इ चउहद्दी क भीतर कछू बहोत सक्तीसाली सहर रहेन। इ सबइ सहर सिद्दीम, सेर, हम्मत, रक्कत, किन्नेरेत, ³⁶अदामा, रामा, हासोर, ³⁷केदेस, एद्रेइ, अन्हासेर, ³⁸यिरोन, मिगदलेल, होरेम, बेतनात अउ बेतसेमेस रहेन, सब मिलाइके हुआँ उन्नीस सहर अउर ओनकर खेत रहेन।

³⁹इ सबइ सहर अउर ओनकर चारिहुँ कइँती क कस्बन उ प्रदेस क हींसा रहेन, जउन नप्ताली क परिवार समूह क ओनकइ कबीलन क अनुसार दीन्ह ग रहेन।

दान बरे प्रदेस

⁴⁰तब सताएँ पाँसा दान क परिवार समूह अउर ओनकर कबीलन बरे डावा गवा रहेन। ⁴¹ओनका जउन कछू प्रदेस दीन्ह गवा उ इ अहइ: सोरा, एस्ताओल, ईरसेमेस, ⁴²सालब्बीन, अय्यालोन, यितला, ⁴³एलोन, तिम्ना, एकोन, ⁴⁴एलतके, गिब्बतोन, बालात, ⁴⁵यहूद, बेनेबराक, गत्रिम्मोन, ⁴⁶मेयर्कोन, रक्कोन अउ यापो क निचके क छेत्र।

⁴⁷मुला दान क लोगन क आपन प्रदेस लेइ मँ परेसानी उठावइ क पड़ी। हुआँ सक्तीवाला दुस्मन रहेन अउर दान क लोग ओनका आसानी स हराइ नाहीं सकत रहेन। ऍह बरे दान क लोग गएन अउर लेसेम क खिलाफ लड़ेन। उ पचे लेसेम क हराएन अउ जउन लोग हुआँ रहत रहेन, ओनका मार डाएन। ऍह बरे दान क लोग लेसेम सहर मँ रहेन। उ पचे ओकर नाउँ बदलिके दान कइ दिहन काहेकि इ नाउँ ओनके परिवार समूह क पुरखा क रहा। ⁴⁸इ सबइ सबहिं सहरन अउर खेत उ भुइँया मँ रहेन जउन दान क परिवार समूह क ओनकर कबीलन क अनुसार दीन्ह ग रहेन।

यहोसू बरे प्रदेस

⁴⁹इ तरह प्रदेसन क बँटवारा करब अउर अलग-अलग परिवार समूहन क ओनका देब पूरा किहन। तब इस्राएल क सब लोग नून क पूत यहोसू क भी कछू प्रदेस देइ क निहचय किहन। ⁵⁰यहोवा हुकुम दिहस कि ओका उ भुइँया मिलइ। ऍह बरे उ पचे एप्रैम क पहाड़ी प्रदेस मँ यहोसू क विम्नत्सेरह सहर दिहन। इहइ उ सहर रहा, जेकरे बरे यहोसू कहे रहा कि मइँ ओका चाहत हउँ। यहोसू उ सहर क फुन: बनाएस अउर उ ओहमाँ रहइ लाग।

⁵¹इ तरह इ सबइ प्रदेस इस्राएल क अलग-अलग परिवार समूहन क दीन्ह गएन। याजक एलीआजार, नून क पूत यहोसू अउ हर एक परिवार समूह क नेता लोग सिलोह मँ मिलापवाला तम्बू क दुआर पइ यहोवा क मौजूदगी मँ बटुरा रहेन। इ तरह उ पचे प्रदेस क बँटवारा पूरा कइ लिहन।

भजन संहिता 149-150

¹यहोवा बरे एक ठु नवा गीत,

ओन नई बातन क बारे मँ गावा जेनका यहोवा किहस ह।
    ओकरे भगतन क मण्डली मँ ओकर गुणगान करा।
²इस्राएलियन क आपन रचनाकर्ता मँ खुसी मनावइ द्या।
    सिय्योन क लोगन आपन राजा क संग आनन्द मनावइ द्या।
³उ सबन क ओकरे नाउँ क स्तुति नाच क संग करइ द्या
    अउर उ पचन क तंबूरा अउ वीणन क ओकरे पराथना बरे बजावइ द्या।
⁴यहोवा आपन लोगन स खुस अहइ।
    उ पीड़ितन क बचावइ स
    उद्धार किहस।
⁵परमेस्सर क भगतन क विजय उत्सव मनावइ द्या।
    हिआँ तलक कि बिछोना पइ जाए क पाछे भी उ पचन क खुसी मनावइ द्या।

⁶ओनका परमेस्सर क विजय क जयजयकार करइ द्या।
    ओनका आपन मँ तेज तरवारन क धारण करइ द्या।
⁷तउ उ पचे दूसर रास्ट्रन स बदला लेइ सकइँ
    अउर ओन लोगन क सजा देइ सकइँ।
⁸परमेस्सर क लोग ओन राजा लोगन क बाँधेइँ,
    ओकर सज्जन लोगन क जंजीरे स बाँधेइँ।
⁹परमेस्सर क लोग ओनकर निआव परमेस्सर क आदेसन क अनुसार करिहीं।
    ओकरे सबहिं बिस्सासी भगतन क ओका सम्मान देइ क बिसेस अधिकार प्राप्त अहइ।

यहोवा क स्तुति करा।

¹यहोवा क बड़कई करा।

परमेस्सर क मन्दिर मँ ओकर गुणगान करा।
    आकासे मँ ओकर बड़कई करा जउन ओकर सक्ति दिखावत ह।
²ओकर ओन बड़के कारजन बरे ओकर बड़कई करा।
    ओकर सबहिं महानता बरे ओकर स्तुति करा।
³तुरही फूँकत अउ नरसिंहा बजावत भए ओकर स्तुति करा।
    ओकर गुणगान वीणा अउ सारंगी बजावत भए करा।
⁴तम्बूरन बजाइके अउ नाचिके ओकर स्तुति करा।
    तारवाला यंत्रन अउर बाँसुरियन बजाइके ओकर गुण गावा।
⁵तू परमेस्सर क जस झंकारत भए झाँझन क बजावत गावा।
    ओकर बड़कई करा।

⁶सबइ जिअत पराणियन यहोवा क स्तुति करइँ।

यहोवा क बड़कई करा!

यिर्मयाह 9

9 कास मोर सिर पानी मँ डूबा होत,
अउर मोर आँखिन आँसू क झरना होतिन
तउ मइँ आपन नस्ट कीन्ह गए लोगन बरे दिन रात रोवत रहत।

²कास मोका रेगिस्तान मँ जगहिया मिल गइ होत
    जहाँ कउनो घरे मँ यात्री रात बितउतेन,
तउ मइँ आपन लोगन क छोड़ सकत रहेउँ।
    मइँ ओन लोगन स दूर चला जाइ सकत रहेउँ।
काहेकि उ पचे सबहिं परमेस्सर क बिस्सासघाती
    व बिभिचारी होइ गवा अहइँ।

³“उ सबइ लोग आपन जीभ क उपयोग धनुस जइसा करत हीं,
    ओनकर मूँह स झूठ बाण क समान छूटत हीं।
उ पचे पूरा देस मँ प्रबल होत ह,
    उ सबइ लोग एक क बाद दूसर करम करत हीं।
उ पचे मोका नाहीं जानतेन।”
    यहोवा कहत ह।

⁴“आपन पड़ोसियन स सतर्क रहा,
    आपन निज भाइयन पइ भी बिस्सास जिन करा।
काहेकि हर एक भाई ठग होइ गवा अहइ।
    हर पड़ोसी तोहरे पीठ पाछे बात करत ह।
⁵हर एक मनई आपन पड़ोसी स झूठ बोलत ह।
    कउनो मनई फुरइ नाहीं बोलत।
यहूदा क लोग जीभ क झूठ बोलइ क सिच्छा दिहन ह।
    उ पचे तब तलक पाप किहन
जब तलक कि उ पचे एतने थकेन
    कि लउट नाहीं सकेन।
⁶तू धोखा क बीच मँ निवास करत ह।
    लोग मोका अपनावइ स इन्कार कइ दिहन।”
    यहोवा कहत ह।

⁷एह बरे सर्वसक्तीमान यहोवा कहत ह,
“मइँ यहूदा क लोगन क परीच्छा वइसे ही करब
    जइसे कउनो मनई आगी मँ तपाइके कउनो धातु क परीच्छा करत ह।
मोरे लगे दूसर विकल्प नाहीं अहइ।
    मोर लोग पाप किहन ह।
⁸यहूदा क लोगन क जीभ तेज बाणन क तरह अहइँ।
    ओनकर मुँहे स झूठ बरसत ह।
हर एक मनई आपन पड़ोसी स अच्छा बोलत ह।
    किन्तु उ छुपे आपन पड़ोसी पइ हमला करइ क जोजना बनावत ह।
⁹का मोका यहूदा क लोगन क एन कामन क करइ बरे सजा नाहीं देइ चाही?”
    इ सँदेसा यहोवा क अहइ।
“तू जानत ह कि मोका इ प्रकार क लोगन क सजा देइ चाही।
    मइँ ओनका उ दण्ड देब जेकर उ पचे पात्र अहइँ।”

¹⁰मइँ पर्वतन बरे फूटि फूटिके रोउब।
    मइँ खाली खेतन बरे सोक गीत गाउब।
    काहेकि जिअत बस्तुअन छोर लीन्ह गइन।
कउनो मनई हुआँ जात्रा नाहीं करत।
    उ जगह पइ कउनो जनावर क ध्वनि नाहीं सुनाई पड़ सकत।
पंछी उड़ गवा अहइँ
    अउर जनावर चला गवा अहइँ।

¹¹“मइँ (यहोवा) यरूसलेम नगर क कूड़े क ढेर बनाइ देब।
इ सियारन क माँदन बनी।
मइँ यहूदा देस क सहरन क बरबाद करब
एह बरे हुआँ कउनो भी नाहीं रही।”

¹²का कउनो मनई अइसा बुदद्धिमान अहइ जउन एन बातन क समुझ सकइ? का कउनो मनई अहइ जेका यहोवा स सिच्छा मिली अहइ? का कउनो यहोवा क सँदेसा क व्याख्या कइ सकत ह? देस काहे नस्ट भवा? इ एक ठू सूने रेगिस्ताने क तरह काहे कइ दीन्ह गवा जहाँ कउनो भी नाहीं जात?

¹³यहोवा एन सवालन क जवाब दिहस। उ कहेस, “इ एह बरे भवा कि यहूदा क लोग मोर सिच्छा पइ चलब तजि दिहन। मइँ ओनका आपन सिच्छा दिहेउँ, किन्तु उ पचे मोर सुनइ स इन्कार किहन। उ पचे मोर उपदेसन क अनुसरण नाहीं किहन। ¹⁴यहूदा क लोग आपन राह चलेन, उ पचे हठी रहेन। उ पचे लबार देवता बाल क अनुसरण किहन। ओनकर पुरखन ओनका लबार देवतन क अनुसरण करइ क सिच्छा दिहन।”

¹⁵एह बरे इस्राएल क परमेस्सर सर्वसक्तिमान यहोवा कहत ह, “मइँ हाली ही यहूदा क लोगन क कड़ुवा फल चखाउब। मइँ ओनका जहरीला पानी पिआउब। ¹⁶मइँ यहूदा क लोगन क दूसर रास्ट्रन मँ छितराइ देब। उ पचे अजनबी रास्ट्रन मँ रहिहीं। उ पचे अउर ओनकर पुरखन ओन देसन क कबहुँ नाहीं जानेन। हवाँ भी मइँ तरवार लिए मनइयन क ओन लोगन क मारि डावइ बरे पठाब। जब तलक उ पचे नस्ट नाहीं होइ जइहीं।”

¹⁷सर्वसक्तिमान यहोवा जउन कहत ह,
    “उ इ अहइ: अब एन सबन्क बारे मँ सोचा।
अन्त्येस्टि क समइ भाड़ा पइ रोवइवाली मेहररूअन क बोलावा।
    ओन मेहररूअन क बोलावा जउन बिलाप करइ मँ चतुर होइँ।
¹⁸लोग कहत हीं,
‘ओन मेहररूअन क हाली स आवइ
    अउर हमरे बरे रोवइ द्या,
तब हमार आँखिन आँसू स भरिहीं
    अउर पानी क धारा हमरी आँखिन स फूट पड़ी।’

¹⁹“जोर स रोवइ क अवाजन सिय्योन स सुनी जाति अहइँ।
‘हम फुरइ बर्बाद होइ गए।
    हम फुरइ लज्जित अही।
काहेकि हम अपने देस क तजइ दिहे ह,
    काहेकि हमार घर नस्ट
    अउर बर्बाद होइ ग अहइँ।’”

²⁰यहूदा क मेहररूओ, अब यहोवा क सँदेसा सुना।
    यहोवा क मुँहे स निकरे सब्दन क सुनइ बरे आपन कान खोल ल्या।
यहोवा कहत ह, “आपन बिटियन क जोर स रोउब सिखाया।
    हर एक मेहरारू क इ सोक गीत क सीख लेब चाही।”
²¹“मउत हमरी खिड़कियन स चढ़िके आई अहइ।
    मउत हमरे महलत मँ घुसि गइ अहइ।
सड़क पइ खेलइवाले हमरे बच्चन क मउत आइ गइ अहइ।
    सामाजिक ठउरन मँ मिलइवाले युवकन क मउत होइ गइ अहइ।”

²²“ओन लोगन स कहा,
‘जउन यहोवा कहत ह, उ इ अहइ:
मनइयन क ल्हास खेतन मँ गोबर स पड़ा रहिहीं।
ओनकर ल्हास जमीन पइ उ फसल स पड़ा रहिहीं जेनका किसान काट डाएन ह।
किन्तु ओनका बटोरइवाला कउनो नाहीं होइ।’”

²³यहोवा कहत ह,
“बुद्धिमान क आपन बुद्धिमान क डींग नाहीं मारइ चाही।
    ताकतवर क आपन ताकत क बखान नाहीं करइ चाही।
    धनवान क आपन धने क हवा नाहीं बाँधइ चाही।
²⁴किन्तु जदि कउनो डींग मारइ ही चाहत ह तउ ओका एन चीजन क डींग मारइ द्या:
    ओका इ बात क डींग मारइ द्या कि उ मोका समुझत अउर जानत ह।
ओका इ बात क डींग हाँकइ द्या कि उ इ समुझत ह कि मइँ यहोवा हउँ।
    एका इ बात क हवा बाँधइ द्या कि मइँ कृपालु अउर न्यायी हउँ।
ओका इ बात क ढिंढोरा पीटइ द्या कि मइँ पृथ्वी पइ अच्छे काम करत हउँ।
    मोका एन कामन क करइ स पिरेम अहइ।”
इ सँदेसा यहोवा क अहइ।

²⁵यहोवा कहत ह, “समइ आवत अहइ, जब मइँ ओन लोगन क सजा देब जउन सिरिफ तने स खतना कराए अहइँ। ²⁶मइँ मिस्र, यहूदा, एदोम, अम्मोन अउ मोआब क रास्ट्रन क अउर ओन सबहिं लोगन क बारे मँ बातन करत अहइँ जउन रेगिस्ताने मँ रहत हीं जउन दाढ़ी क किनारन क बालन क काटत हीं। ओन सबहिं देसन क लोग आपन सरीर क खतना नाहीं करवाएन ह। किन्तु इस्राएल क परिवार क लोग हिरदइ स खतना क नाहीं ग्रहण किहन ह, जइसे कि परमेस्सर क लोगन क करइ चाही।”

मत्ती 23

ईसू यहूदी धरम नेतन क नुक्ताचीनी किहेस

(मरकुस 12:38-40; लूका 11:37-52; 20:45-47)

23 ईसू फिन आपन चेलन अउर भीड़ स कहेस। ²उ कहेस, “धरम सास्तिरियन अउर फरीसियन मूसा क व्यवस्था क अरथ बतावइ क हकदार अहइँ। ³एह बरे जउन कछू उ सबइ कहइँ ओह प चलत रहा अउर ओनका मानके करत रहा। मइँ इ कहत हउँ काहेकि उ पचे बस कहत रहत हीं मुला करतेन नाहीं। ⁴उ पचे मनई क काँधे प एतना बोझा लादि देत हीं कि उ सबइ ओका उठाइके चल न सकइँ अउर लोगन्प दबाव डारत हीं कि ओका लइके चलइँ। मुला उ सबइ खुद ओहमाँ स कउनो प भी चलइ बरे आपन अंगुरी तलक नाहीं हिलउतेन।

⁵“उ सबइ नीक काम यह बरे करत हीं कि लोग ओनका लखइँ। असिल मँ उ सबइ आपन ताबीज अउर पोसाक क झलरे क यह बरे बड़ा स बड़कवा करत रहत हीं कि लोग ओनका धर्मात्मा समझइँ। ⁶उ सबइ जेवनार मँ सबते जिआदा खास जगह पावा चाहत हीं। आराधनालयन मँ ओनका प्रमुख आसन चाही। ⁷बजारे मँ उ पचे मान क साथ पैलगी करावा चाहत ही। अउ चाहत हीं कि लोग ओनका ‘गुरु’ कहिके पुकारइँ।

⁸“मुला तू पचे मनइयन स आपन क ‘गुरु’ जिन कहवावा काहेकि तोहार सच्चा गुरु तउ बस एक अहइ। अउर तू सबइ सिरिफ भाई बहिन अहा। ⁹धरती प मनइयन क आपन मँ स कउनो क भी ‘पिता’ जिन कहइ द्या। काहेकि तोहार ‘पिता’ तउ बस एक ही अहइ, अउ उ सरगे मँ बा। ¹⁰न ही तू मनइयन क आपन बरे ‘स्वामी’ कहइ द्या काहेकि तोहार स्वामी तउ बस एक ठु बाटइ अउ उ अहइ मसीह। ¹¹तोहमाँ सब ते बड़कवा मनई उहइ होई जउन तोहार नउकर बनी। ¹²जउन आपन खुद क ऊँचा उठाई ओका नंवई क होई। अउर जउन आपन खुद नवाई ओका ऊँचा उठाइ जाइ।

¹³“हे कपटी धरम सास्तिरियो अउ फरीसियो! तोहका धिक्कार अहइ। तू सबइ सरगे क राज्य क दुआर ढाँपि दिहा ह। न तउ तू पचे ओहमाँ घुसि पउब्या अउर न ही ओनका जाइ देब्या जउन घुसइ बरे जतन करत हीं। ¹⁴अरे कपटा धरम सास्तिरियन अउ फरीसियन तू पचे विधवा क धन दौलत हड़पत ह। देखाँवा बरे बड़ी बड़ी पराथना करत ह। एकरे बरे तोहका करर् सजा मिली।

¹⁵“अरे कपटी धरम सास्तिरियो अउ फरीसियो! तोहका धिक्कार अहइ। तू कउनो क आपन मत मँ लइ आवइ बरे धरती अउर समुद्दर पार कइ जात ह। अउ उ तोहरे नेम धरम मँ आइ जात ह तउ तू ओका आपन स भी दुइ गुना नरक क काबिल बनाइ देत ह।

¹⁶“अरे कपटी धरम सास्तिरियो अउ फरीसियो! तोहका धिक्कार अहइ। तोहका धिक्कार अहइ जउन कहत ह, ‘जदि कउनो मन्दिर क सपथ खात ह तउ ओका सपथ क खाब जरूरी नाहीं मुला अगर कउनो मन्दिरे क सोने सपथ खात ह तउ ओका सपथ क मानब जरूरी अहइ!’ ¹⁷अरे आँधर मूर्ख लोगो! बड़का कउन अहइ? मन्दिर क सोना या उ मन्दिर जउन उ सोना क पवित्तर बनएस।

¹⁸“तू सबइ इ भी कहत ह, ‘जदि कउनो वेदी क सपथ खात ह तउ कछू नाहीं, मुला जदि कउनो वेदी प धरा चढ़ावा क सपथ खात ह तउ आपन सपथ स बँधा भवा अहइ।’ ¹⁹अरे आँधर लोगो! कउन बड़कवा अहइ? वेदी प धरा चढ़ावा या उ वेदी जेसे उ चढ़ावा पवित्तर बनत ह ²⁰यह बरे जदि कउनो वेदी क सपथ लेत ह तउ उ वेदी क साथे वेदी प जउन धरा बाटइ, उ सबन क सपथ खात ह। ²¹उ जउन मन्दिर अहइ, ओकर भी सपथ लेत ह उ मंदिर क संग जउन मंदिर क भितरे बा, ओकर भी सपथ खात ह। ²²अउर उ जउन सरगे क सपथ खात ह, उ परमेस्सर क सिंहासने क संग जउन उ सिंहासने प बिराजत बा ओकर भी सपथ खात ह।

²³“अरे कपटी धरम सास्तिरियो अउ फरीसियो! तोहका धिक्कार अहइ। तोहरे लगे जउन कछू अहइ, तू ओकर दसवाँ, हींसा, हीयाँ तलक कि आपन पुदीना, सौंफ अउर जीरा तक क दसवाँ हींसा परमेस्सर क देत ह। फिन भी तू व्यवस्था क खास बातन, निआव, दाया अउर बिसवास क धकियाइ दिहा। तोहका इ चाहत रहा कि ओन बातन क बगैर छोड़े भए इन बातन क करत जात्या। ²⁴अरे आँधर अगुवा लोगो! तू आपन पिअइ क पानी स मच्छर तउ छान लेत ह पर ऊँटे क लील जात ह।

²⁵“अरे कपटी धरम सास्तिरियो अउ फरीसियो! तोहका धिक्कार अहइ। तू आपन खोरा अउर टाठी बाहेर स धोइके फर्छइ करत ह पर ओकरे भितरे तू जउन चाल चपेट या आपन बरे रियायत मँ पाया ह, भरा बाटइ। ²⁶अरे आँधर फरीसियो! पहिले आपन खोरा क भितरे स माँज ल्या जेसे भितरे क साथ साथ उ बाहेर स भी चमकइ लगाइ।

²⁷“अरे कपटी धरम सास्तिरियो अउ फरीसियो! तोहका धिक्कार अहइ। तू लीपी पोती भई समाधि क नाईं अहा जउन बाहेर स तउ सुन्नर देखाति अहइ मुला भितरे स मरे हुअन क हाड़ अउर हर किसिम क मलिनता स ठूँसी रहत ह। ²⁸अइसे ही बाहेर स तउ धर्मी देखॉइ देत ह मुला भितरे स चाल चपेट अउर अनभले स बुरा अहा।

²⁹“अरे कपटी धरम सास्तिरियो अउ फरीसियो! तोहका धिक्कार अहइ। तू नबियन क बरे मकबरा बनावत ह अउर धर्मीयन क कब्र क सिंगार करत ह। ³⁰अउ कहत बाट्या, ‘जदि तू आपन पूर्वजन क समइ मँ पइदा होत्या तउ नबियन क मरवावइ मँ ओनकइ साथ न देत्या।’ ³¹अइसे प तू खुद ही साच्छी देत अहा, कि तू मानत बाट्या कि तू ओनकइ बाल-बच्चा अहा जउन नबियन क हत्यारन रहेन। ³²तउ तू जउन तोहार पुरखन सुरु करेन, ओका पूरा कइ द्या।

³³“अरे कीरा अउर नाग संतान। तू सबइ कइसे सोच लिहा कि तू नरक भोगइ स छूट जाब्या। ³⁴यह बरे मइँ तोहका बतावत हउँ कि मइँ तोहरे लगे नबियन, बुद्धिमानन अउर गुरुअन क पठवत हउँ। तू पचे ओनमाँ स बहोतन क मार डउब्या अउर बहोतन क क्रूसे प चढ़उब्या। कछू मनइयन क तू सबइ आपन आराधनालयन मँ कोड़न स पिटवउब्या अउर एक सहर स दूसर सहरे ताईं ओनकइ पाछा करत खदरेब्या।

³⁵“आखिर निरीह हाबिल स लइके बिरिक्याह क बेटवा जकरयाह ताईं जेका तू मन्दिरे क गरभ घर अउर वेदी क बीच मारि डाए रह्या हर धर्मी मनई क कतल क सजा तोह प होई। ³⁶मइँ तोहसे सच कहत हउँ कि इ सब कछू बरे इ पीढ़ी क मनइयन क सजा भोगे होई।

यरूसलेम क मनइयन प ईसू क दुःख

(लूका 13:34-35)

³⁷“यरूसलेम, ओ यरूसलेम! तू उ अहा जउन नबियन क कतल करत ह अउर परमेस्सर क पठए गए दूतन क पाथर मारत ह। मइँ केतनी दाईं चाह्यो ह कि जइसे कउनो मुर्गी आपन चूजन क आपन पंखा तरे बटोर लेत ह वइसे ही तोहरे गदेलन क बटोर लेउँ। मुला तू पचन नाहीं चाह्या। ³⁸तोहार घर समूचइ उजड़ जाई। ³⁹मइँ तोहका सच बतावत हउँ तू मोका तब ताईं फिन नाहीं देखब्या जब ताईं तू नाहीं कहब्या, ‘धन्य अहइ उ जउन पर्भू क नाउँ मँ आवत ह।’^(A)”

Awadhi Bible: Easy-to-Read Version (ERV-AWA)