M’Cheyne Bible Reading Plan

Dee 91 Psalm

¹ Wäa enn däm Aulahechsta siene jeheeme Städ wont, woat enn däm Aulmajchtja sien Schaute bliewe.

² Ekj woa to däm Herr Gott saje: Miene Tooflucht un miene Fastinj, mien Gott; ekj woa enn Am fetrühe.

³ Dan hee deit mie rade fonn däm Fient siene Faul, fonn dee fenijchtenda Ploag.

⁴ Hee woat die bedakje met siene Fadre, un unja siene Flichte woascht du Schutz finje; siene Woarheit es en Schilt un Schnal.

⁵ Du woascht dee Nacht Schrakj nich ferchte, ooda dee Fiel dee äwadach flicht;

⁶ ooda dee Ploag dee em Diestra wankt; fonn daut Fenichte daut opp Meddach febrinje deit.

⁷ Dusent woare bie diene Sied faule, un teandusent aun diene rajchte Haunt; oba daut woat nich dijcht bie die kome.

⁸ Du saust blooss met diene Uage kjikje, un daut Loon fa dee Gottloose seene.

⁹ Wiels Do, O Herr Gott, best miene Tooflucht; du deist däm Aulahechsta diene Wonstäd moake.

¹⁰ Die saul kjeen Beeset befaule, un kjeene Ploag saul dijcht bie dien Zelt kome.

¹¹ Dan Hee woat siene Enjel Befäl jäwe äwa die, die enn aul diene Wäaj to bewoare.

¹² Dee woare die opphäwe opp äare Henj soo daut du dien Foot nich aun en Steen steete woascht.

¹³ Du woascht opp dän Leiw un dee Schlang staupe; du woascht däm junga Leiw un dee Schlang unja diene Feet traumple.

¹⁴ Wiels hee siene Leew opp mie jesat haft, woa ekj am rade; ekj woa am opp daut Huaget sate, wiels hee mien Nome jekjant haft.

¹⁵ Hee woat mie aunroope, un ekj woa am auntwuate; ekj woa met am senne enn sien Trubbel; ekj woa am rade, un am eare.

¹⁶ Ekj woa am met en langet Läwe tofräd moake, un woa am miene Radunk seene moake.

6 En ekj sach aus daut Laum eent fonn dee Saeajle opmuak, en head eena fonn dee laewendje Teare met ne Stem soo aus en Donnaschlach saje: "Komm!"

² En ekj sach, en kjikj! en wittet Peat, en dee, dee doa bowe saut haud en Boage, en am wort ne Kroon jejaeft, en hee reet erut soo aus en Jewenna, soo daut hee jewenne sull.

³ En aus hee daut tweede Saeajel opmuak, head ekj daut tweede laewendje Tia saje: "Komm!"

⁴ Donn kjeem noch een Peat rut, en roodet, en dee doabowe saut wortet jejaeft daut hee Fraed fonne Ead naeme sull, en daut de Mensche sikj unjarenaunda sulle doot moake, en am wort en grootet Schweat jejaeft.

⁵ En aus hee daut dredde Saeajel opjemoakt haud, head ekj daut dredde laewendje Tia saje: "Komm!" En ekj sach, en kjikj! en schwoatet Peat; en dee doabowe saut haud ne Wichtschol enn siene Haunt.

⁶ Donn head ekj ne Stem fonne Medd mank dee feeha laewendje Teare saje: "Eene Mot Weit fa een Doagesloon, en dree Mot Joascht fa een Doagesloon, en doo daen Eelj en Wien kjeen Schode!"

⁷ En aus hee daut feade Saeajel opmuak, head ekj daut feade laewendje Tia saje: "Komm!"

⁸ En ekj sach, en kjikj! en blauss jreenet Peat, en dee doabowe saut heet 'Doot', en daut Doodesrikj kjeem am hinjaraun, en am wort Macht jejaeft aewa daut feadet Poat fonne Ead, doot to moake derch Schweat, en Hungaschnoot, en daen Doot, en wille Teare oppe Ead.

⁹ En aus hee daut fefte Saeajel opmuak, sach ekj unja daut Aultoa dee Seele fonn daen dee doot jemoakt weare waeajen Gott sien Wuat, en daut Zeichness daut see haude jehaut.

¹⁰ En see schreaje met ne lude Stem en saede: "Heilje en truehe Meista, woo lang eeha du daen dee opp dise Ead wone, rechte woascht, en Rach eewe waeajen onns Bloot?"

¹¹ An wort jieda en witte Rok jejaeft, en an wort jesajcht daut see noch en stoot ruhe sulle, bott dee Tiet fa aeare Metsklowe en Breeda, dee uk sulle Doot jemoakt woare soo aus see, erfelt wea.

¹² En ekj sach aus hee daut saste Saeajel opmuak, en doa wea en grootet Eadbaeabe, en dee Sonn wort soo Schwoat aus Saktseich daut fonn Hoa jemoakt es, en dee gaunse Mon wort Blootroot,

¹³ en dee Stearns folle fomm Himel no de Ead soo aus en Fiejeboom aeare jreene Fieje felist wan dee fonn en groota wint jescheddat woat.

¹⁴ En de Himelt feleet soo aus wan en Buak oppjerollt woat, en jeida Boajch en Insel wort fonn aeare Staed wajch jestat.

¹⁵ En dee Kjeenije oppe Ead, en dee Groote, en dee Rejeara, en dee Rikje, en dee stoakje Mana, en jieda Sklow en dee, dee Frie weare, festuake sikj enn dee Heele, en mank dee Steena enne Boaj,

¹⁶ en saede to dee Boaj en Steena: "Faullt opp onns enopp, en festaeakjt onns fonn daem sien Jesecht dee opp daen Troon set, en fonn daem Laum sien Oaja!

¹⁷ dan dee groote Dach fonn aea Rach es jekome, en waea kaun dan bestone?"