M’Cheyne Bible Reading Plan

इस्राएल क लोग रेगिस्तान मँ भटकत हीं

2 “तब हम पचे घूमि गए अउ लाल सागर क सड़क होइके रेगिस्तान क जात्रा किहेस इ उहइ अहइ जइसा यहोवा मोका आदेस दिहे रहेन। हम पचे सेईर क पहाड़ी पहँटा क चारिहुँ कइँती अनेक दिना तलक चलत रहेन। ² तब यहोवा मोसे कहेस, ³ ‘तू पचे इ पहाड़ी क चारिहुँ कइँती बहोत जियादा भटक चुका बाट्या। अब उत्तर कइँती घूमा। ⁴ उ मोसे तोसे इ कहइ क कहेस, तू पचे सेईर प्रदेस स होइके जाब्या। इ प्रदेस तू लोगन्क रिस्तेदारन एसाव क सन्तानन क अहइ। उ पचे तोहसे डेराइ जइहीं। बहोत सावधान रहा। ⁵ ओनसे जुद्ध जिन करा। मइँ ओकर एक फुट भुइँया तलक तोहका नाहीं देबउँ। काहेकि मइँ एसाव क सेईर क पहाड़ी प्रदेस ओनके कब्जे मँ दइ दीन्हेउँ। ⁶ तू पचन्क एसाव क लोगन्क हुआँ पइ भोजन करइ या पानी पिअइ क मूल्य चुकावइ चाही। ⁷ इ याद राखा कि यहोवा तोहार परमेस्सर, तोहका तू सबइ जउन कछू भी किह्या ओन सबहिं बरे आसीर्बाद दिहस। उ इ लम्बे चौड़े रेगिस्ताने स तोहार जात्रा जानत ह। यहोवा तोहार परमेस्सर इ सबइ चालीस बरिसन मँ तोहरे संग रहा ह। तू पचन्क कउनो भी चीजन क कमी नाहीं रही।’

⁸ “एह बरे, हम लोग सेईर मँ रहइवालन आपन रिस्तेदारन क लगे स अगवा बढ़ गए। हम पचे यरदन घाटी स एलत अउ एस्योनगेबेर सहरन क जाइवालिन स़ड़क क पाछे तजि दिहेन। तब हम पचे उ सड़क पइ घूमि गए जउन मोआब क रेगिस्तान कइँती जात अहइ।

आर प्रदेस मँ इस्राएल

⁹ “यहोवा मोसे कहेस, ‘मोआब क लोगन्क परेसान जिन करा। ओनके खिलाफ जंग जिन छेड़ा। मइँ ओनकइ कउनो भी भुइँया तू पचन्क नाहीं देब। उ पचे लूत क सन्तानन^[a] अहइँ, अउर मइँ ओनका आर प्रदेस दिहे अहउँ।’”

¹⁰ (पहिले, आर मँ एमी लोग रहत रहेन। उ पचे सक्तीसाली मनई रहेन अउर हुआँ ओनमाँ बहोत स रहेन। उ पचे अनाकी लोगन क तरह बहोत लम्बा रहेन। ¹¹ अनाकी लोगन क तरह, एमी रपाई लोगन क एक ठु हींसा समुझा जात रहेन। मुला मोआबी लोग ओनका एमी कहत रहेन। ¹² पहिले होरी लोग भी सेईर मँ रहत रहेन। मुला एसाव क सन्तानन ओनकर भुइँया लइ लिहन। एसाव क सन्तानन होरी लोगन क नास कइ दिहन। तब एसाव क सन्तानन हुआँ रहइ लागेन। इ वइसा ही किहेन जइसा इस्राएल उ भुइँया क कब्जा करइ मँ किहेन जउन यहोवा ओनका दिहे रहेन।)

¹³ “यहोवा मोसे कहेस, ‘अब तइयार होइ जा अउर जेरेद घाटी क पार जा।’ एह बरे हम जेरेद घाटी क पार किहेन। ¹⁴ कादेसबर्ने क तजइ अउ जेरेद घाटी क पार करइ मँ अड़तीस बरिस क समइ बीता रहा। उ पीढ़ी क सबहिं जोधा मरि चुका रहेन। यहोवा सपथ लिहेस कि अइसा ही होई। ¹⁵ यहोवा ओन लोगन क खिलाफ तब तलक करत रहेन जब तलक उ सबइ सिबिर स न नस्ट होइ गएन।

¹⁶ “जब सबहिं जोधन मरि गए रहेन अउर चला गए रहेन। ¹⁷ तब यहोवा मोसे कहेस, ¹⁸ ‘आजु तू पचन्क आर सहर क सीमा क पार कइके मोआब क इलाका मँ लइ जाबइ। ¹⁹ जब तू लोग ओकर भुइँया स होइके गुजरब्या तउ ओनका तंग जिन कर्या। ओनसे जिन लड़्या काहेकि मइँ तू पचन्क ओनकर भुइँया न देब। काहेकि मइँ उ भुइँया लूत क संतानन क नियन्त्रण करइ बरे दिहेउँ ह।’”

²⁰ (उ प्रदेस रपाइ लोगन्क देस भी कहा जात ह। उ सबइ ही मनइयन पहिले हुआँ रहत रहेन। अम्मोनी क लोग ओनका “जमजुम्मी लोग” कहत रहेन। ²¹ जमजुम्मी लोग बहोत सक्तीसाली रहेन अउर ओनमाँ स बहोत स हुआँ रहेन। उ पचे अनाकी लोगन क नाई लम्बा रहेन। मुला यहोवा जमजुम्मी लोगन क अम्मोनी लोगन बरे नास कइ दिहस। अम्मोनी लोग जमजुम्मी लोगन्क प्रदेस छीन लिहन अउ अब उ पचे हुआँ रहत रहेन। ²² परमेस्सर इहइ काम एसाव क सन्तानन बरे किहस जउन सेईर मँ रहत रहेन। उ पचे हुआँ रहइवालन होरी लोगन्क नास कइ दिहन। अब एसाव क सन्तानन हुआँ रहत अहइँ जहाँ पहिले होरी लोग रहत रहेन। ²³ अव्वियन गाँवन मँ गाजा तलक रहत रहेन। मुला कछू लोगन कप्तोरी स आएन अउर ओका नस्ट कइ दिहेन। अबहिं कप्तोरियन ओकर जगह मँ रहत अहइँ।)

एमोरी लोगन क खिलाफ जुद्ध करइ क हुकुम

²⁴ “यहोवा मोसे कहेस, ‘जात्रा बरे तइयार होइ जा। अर्नोर्न नदी क घाटी से होइके जा। मइँ तू पचन्क हेसबोन क राजा सीहोन पइ विजय पावइ क सक्ती देत हउँ। मइँ तोहका सबन्क उ देस जीतइ क सक्ती देत हउँ। एह बरे ओकरे खिलाफ लड़ा अउ ओकरे देस पइ कब्जा करब सुरु करा। ²⁵ आजु मइँ तू पचन्क समूचइ संसार क लोगन क डेरावइवाला बनाउब सुरु करत अहउँ। उ पचे तोहरे बारे मँ खबर पइहीं अउ उ पचे भय स काँप उठीहीं। जब उ पचे तोहरे बारे मँ सोचिहीं तब उ पचे घबराइ जइहीं।’

²⁶ “कदेमोत क रेगिस्तान स मइँ हेसबोन क राजा सीहोन क लगे दूतन क पठएउँ। दूतन सीहोन क समन्वा सान्ति-सन्धि राखेस। उ पचे कहेन, ²⁷ ‘आपन देस स होइके हम पचन्क जाइ द्या। हम लोग सड़क पइ ठहरब। हम पचे सड़किया क दाहिन या बाएँ कइँती न मुड़ि जाब। ²⁸ हम पचे जउन खइया क खाब या जउन पानी पिअब ओकर बरे पैसा चुकाउब। हम पचे सिरिफ तोहरे देस स पइदल जात्रा करइ क अनुमति चाहित ह। ²⁹ आपन देस स होइके तू पचे हम पचन्क यरदन नदी क पार कइके ओह देस मँ पहोंच तलक जाई जेका यहोवा हमार परमेस्सर हमका दइ देत बाटइ। एसाव क सन्तानन अउर आर मँ बसइया मोआबी लोग आपन देस स हमका जाइ अनुमति दइ दिहन ह।’

³⁰ “मुला हेसबोन क राजा सीहोन, आपन देस स हमका जाइ नाहीं दिहस। यहोवा, तोहार परमेस्सर, ओका बहोत जिद्दी बनाइ दिहस। यहोवा इ एह बरे किहस कि उ सीहोन क तोहरे कब्जा मँ दइ सकइ अउ उ अब इ कइ दिहेस ह।

³¹ “यहोवा मोसे कहेस, ‘मइँ राजा सीहोन अउ ओकरे देस क तोहका सबन्क देत अहउँ। भुइँया लेब सुरु करा। इ तब तोहार होई।’

³² “तब राजा सिहोन अउ ओकर सब लोग हम पचन्स यहस मँ जुद्ध करइ बाहेर निकरेन। ³³ मुला यहोवा हमार परमेस्सर ओका हमका दइ दिहस। हम पचे ओका, ओकरे बेटवन क, अउ ओकरे सब लोगन क हराएन। ³⁴ हम पचे ओन सबइ सहरन पइ कब्जा कइ लीन्ह। तउ हम पचे सहर क सबइ मनइयन, मेहरारु अउ गदेलन क पूरी तरह नास कइ दीन्ह। हम पचे कउनो क जिअत नाहीं तजा। ³⁵ हम पचे जउन सहरन क जीत लीन्ह ओनमाँ स सिरिफ जनावॅरन अउ कीमती चीजन्क लइ लीन्ह। ³⁶ हम पचे अरोएर सहर क जउन अर्नोर्न क घाटी मँ बाटइ अउ उ घाटी क बीच दूसर सहर क भी हरावा। यहोवा हमार परमेस्सर हमका अर्नोर्न घाटी अउ गिलाद क बीच क सबहिं सहरन क हार जाइ दीन्ह। कउनो सहर हम लोग बरे एतनॉ जियादा मज़बूत नाहीं रहेन। ³⁷ मुला उ प्रदेस क निचके नाहीं गए, जउन अम्मोनी लोगन्क रहा। तू पचे यब्बोक नदी क किनारे या पहाड़ी प्रदेसन क सहरन क निअरे नाहीं गया। तू पचे अइसे कउनो ठउरे क निअरे नाहीं गया जेका यहोवा हमार परमेस्सर तोहका आदेस दिहस रहा।

आसाफ क एक ठु भजन।

गित्तिथ क वाद्य यंत्र क संग संगीत निर्देसक बरे कोरह क पूरन बरे भजन गीत।

इस्राएल क परमेस्सर पइ बिस्सास रखइ चाही

30 यहोवा कहेस, “मोरे एन बच्चन क लखा, इ सबइ मोर बात नाहीं मानतेन। इ सबइ जोजनन बनावत हीं मुला मोर मदद नाहीं लेइ चाहतेन। इ सबइ दूसर जातियन क साथ समझौता करत हीं जबकि मोर आतिमा ओन समझौतन क नाहीं चाहत। इ सबइ लोग आपन मूँड़े पइ पाप क बोझ बढ़ावत चला जात बाटेन। ² इ सबइ बच्चन मोहसे कछू नाहीं पूछतेन कि का अइसा करब उचित अहइ। ओनका उम्मीद अहइ कि फिरौन ओनका बचाइ लेइ। उ पचे चाहत हीं कि मिस्र ओनका बचाइ लेइ।

³ “मुला मइँ तू पचन्क बतावत हउँ कि मिस्र मँ सरण लेइ स तोहार पचन्क बचाव नाहीं होइ। मिस्र तोहार सबन्क रच्छा करइ मँ सफल नाहीं होइ। ⁴ तोहार पचन्क अगुअन सोअन मँ गवा अहइँ अउर तोहार पचन्क राजदूत हानेस क चला गवा अहइँ। ⁵ किन्तु ओनका निरासा ही हाथे लागी। उ पचे एक अइसे रास्ट्र पइ बिस्सास करत अहइँ जउन ओनका नाहीं बचाइ पाइ। मिस्र बेकार अहइ, मिस्र कउनो मदद नाहीं देइ। मिस्र क कारण ओनका अपमानित अउ लज्जित होइ पड़ी।”

यहूदा क परमेस्सर क सँदेसा

⁶ दक्खिन क गोरूअन बरे दुःखद सँदेसा:

नेगव बिपत्तियन अउर खतरन स भरा एक ठु देस अहइ। इ पहँटा सेरन, नागन अउर उड़इवाले साँपन स भरा पड़ा अहइ। किन्तु कछू लोग नेगव स होत भए जात्रा करत अहइँ उ पचे मिस्र कइँती जात अहइँ। ओन लोग गदहन क पीठन पइ आपन धन-दौलत लादे भए अहइँ। ओन लोग आपन खजाना ऊँटन क पीठन पइ लाद रखे अहइँ अर्थात् इ सबइ लोग एक अइसे देस पइ भरोसा रखे अहइँ जउन ओनका नाहीं बचाइ सकत। ⁷ मिस्र ही उ बेकार क देस अहइ। मिस्र क मदद बेकार अहइ। एह बरे मइँ मिस्र क एक ठु अइसा रहाब कहत हउँ जउन निठल्ला पड़ा रहत ह।

⁸ अब एका एक चिह्न पइ लिख द्या ताकि सबहिं लोग एका लखि सकइँ। एका एक ठु किताबे मँ लिख द्या। एनका अन्तिम दिनन बरे लिख द्या। इ सबइ बातन सुदूर भविस्स क साच्छी होइही।

⁹ इ सबइ लोग ओन बच्चन क जइसे अहइँ जउन आपन महतारी-बाप क बात नाहीं मानतेन। उ सबइ लबार अहइँ अउर यहोवा क सिच्छन क सुनइ तलक नाहीं चाहतेन। ¹⁰ उ पचे नबियन स कहा करत हीं, “हम क जउन कछू ठीक बातन करइ चाही ओनके बारे मँ दर्सन जिन किया करा। हम क सच्चाई जिन बतावा। हम स अइसी अच्छी बातन कहा, जउन हम क नीक लाग सकत। हमरे बरे केवल अच्छी बातन ही लखा। ¹¹ जउन बातन फुरइ घटइ क अहइँ, ओनका लखब बन्द करा। हमरे राहे स हटि जा। इस्राएल क उ पवित्तर परमेस्सर क बारे मँ हम का बताउब बन्द करा।”

यहूदा क मदद केवल परमेस्सर स आवत ह

¹² इस्राएल क पवित्तर परमेस्सर कहत ह, “तू लोग यहोवा स इ सँदेसा क मानइ स मना कइ दिहा ह। तू लोग सहायता बरे लड़ाई-झगड़न अउर झूठ पइ निर्भर रहइ चाहत अहा। ¹³ तू पचे काहेकि एन बातन बरे अपराधी अहा, एह बरे तू पचे एक ठु अइसी ऊँच देवार क समान अहा जेहमाँ दरारन आइ चुकी अहइँ। उ देवार ढह जाइ अउर नान्ह नान्ह टूकन मँ टूटिके ढेर होइ जाइ। ¹⁴ तू पचे माटी क उ बड़के बर्तन क समान होइ जाब्या जउन टूटि टूटिके नान्ह नान्ह टूकन मँ बिखरि जात ह। इ सबइ टूकन बेकार होत हँ। एन टूकन मँ स तू पचे न तउ आगी स बरत कोयला ही उठाइ सकत ह अउर न ही क उनो जोहड़ स पानी।”

¹⁵ इस्राएल क उ पवित्तर, मोर सुआमी यहोवा कहत ह, “जदि तू पचे मोरी कइँती लउट आवा तउ तू पचे बचि जाब्या। जदि तू पचे मोहे पइ भरोसा रखब्या तबहिं तू पचन्क तोहार सबन्क बल मिली मुला तू पचन्क सान्त रहब होइ।”

मुला तू पचे तउ वइसा करइ ही नाहीं चाहत्या। ¹⁶ तू पचे कहत अहा, “नाहीं, हम पचन्क घोड़न क जरूरत अहइ जेन पइ चढ़िके हम पचे दूर पलाइ जाइ।” इ फुरइ अहइ तू पचे घोड़न पइ चढ़िके दूर पलाइ जाब्या मुला दुस्मन तोहार सबन्क पाछा करी अउर उ तोहारे सबन्क घोड़न स जियादा तेज होइ। ¹⁷ एक दुस्मन ललकारी अउर तोहार पचन्क सबहिं लोग ओकरे समन्ना स भाग खड़ा होइ जइहीं। हुवाँ तू पचे अइसे अकेल्ले बचा रहि जाब्या, जइसे पहाड़ी पइ लगा तोहार पचन्क झण्डे क डण्डा।

परमेस्सर आपन लोगन क मदद करी

¹⁸ यहोवा तू पचन्पइ आपन करूणा दर्सावत ह। यहोवा बाट जोहत ह। यहोवा तू पचन्क सुख चैन देइ बरे तइयार खड़ा अहइ। यहोवा खरा परमेस्सर अहइ अउर हर उ मनई जउन यहोवा क मदद क इंतजार मँ अहइ, धन्न (आनन्दित) होइ।

¹⁹ हाँ, हे सिय्योन पर्वत पइ रहइ वालो, हे यरूसलेम क बसइयो, तू लोग रोवत बिलखत नाहीं रहब्या। यहोवा तोहरे पचन्क रोवइ क सुनी अउर उ तू पचन्पइ दाया करी। यहोवा तोहार पचन्क सुनी अउर उ तोहार पचन्क मदद करी।

²⁰ जदपि मोर यहोवा परमेस्सर तू पचन्क दुःख अउ कस्ट दइ सकत ह अइसे ही जइसे माना उ अइसा रोटी-पानी होइ, जेका तू पचे हर दिन खात-पिअत ह्वा। किन्तु असल मँ परमेस्सर तउ तोहार पचन्क सिच्छक अहइ, अउर उ तू पचन्स छिपा नाहीं रही। तू पचे खुद आपन आँखिन स आपन उ सिच्छक क लखब्या। ²¹ तब अगर तू पचे बुरे काम करब्या अउर बुरी जिन्नगी जीब्या (दाहिन कइँती या बाई कइँती) तउ तू पचे आपन पाछे एक आवाज क कहत सुनब्या, “खरी राह इ अहइ। तू पचन्क इहइ राहे मँ चलब अहइ।”

²² तोहरे पचन्क लगे चाँदी सोने स मढ़ी मूरतियन अहइँ। ओन झूठे देवतन तू पचन्क (पाप पूर्ण) बनाइ दिहेन ह। लेकिन तू पचे ओन झूठे देवतन क सेवा करब तजि देब्या। तू पचे ओन देवतन क कूड़े कचरे अउर मइले चिथड़न क समान दूर लोकउब्या।

²³ उ समय, यहोवा तोहरे पचन्बरे बर्खा पठइ। तू पचे खेतन मँ बिआ बोउब्या, अउर धरती तोहरे पचन्बरे भोजन उपजाइ। तू सबन्क भरपूर उपज मिली। तोहार पचन्क पसुअन बरे खेतन मँ भरपूर चारा होइ। तोहरे पचन्क पसुअन बरे हुवाँ बड़ी-बड़ी चरागाहन होइहीं। ²⁴ तोहरे पचन्क मवेसियन अउ तोहरे सबन्क गदहन क जइसे चारा क जरूरत होइ, उ सब ओनका मिली। खइया क ऍतना इफरात होइ कि तू पचन्क आपन पसुअन क खाइ बरे भी फावड़न अउर पंजन स चारा क फइलाउव होइ। ²⁵ हर पर्वत अउर पहाड़ियन पइ पानी स भरी जल धारन होइहीं। इ सबइ बातन तब घटिहीं जब बहोत स लोग मरि चुकिहीं अउर मीनारन ढहि चुकिहीं।

²⁶ उ समय चाँद क चाँदनी सूरज क धूप जइसी उज्जर होइ जाइ। सूरज क रोसनी आज स सात गुना जियादा उज्जर होइ जाइ। सूरज एक दिन मँ ऍतनी रोसनी देइ लागी जितनी उ पूरे सप्ताह मँ देत ह। इ सबइ बातन उ समय घटिहीं जब यहोवा आपन टूटे लोगन क मरहम पट्टी करी अउर सजा क कारण जउन चोटन ओनका आई अहइँ, ओनका चंगा करी।

²⁷ लखा! बहोत दूर स यहोवा क नाउँ आवत अहइ। उ बहोत किरोधित अहइ। उ सँदेसा जउन उ लावत ह भाड़ी वजन क नाईं अहइ। ओकर होंठ क सब्द रूखा अहइ, ओकर जीभ एक बरत भए आग जइसी अहइ। ²⁸ यहोवा क साँस (आतिमा) एक अइसी बिसाल नदी क तरह अहइ जउन तब तलक चढ़त रहत ह, जब तलक उ गटइ तलक नाहीं पहुँच जात। यहोवा सबहिं रास्ट्रन क निआव करी। इ वइसा ही होइ जइसे उ ओनका बिनासे क छलनी स छान डावइ। इ नियंत्रन वइसा होइ जइसे घोड़सवार लगाम क जरिया स घोड़ा क नियंत्रन करत ह, यहोवा रास्ट्रन क नियंत्रन करब अउर ओनकर अगुवाइ उ जगह तलक करब जहाँ उ ओनका लेइ जाइ चाहत ह।

²⁹ उ समय, तू पचे खुसी क गीत गउब्या। उ समय ओन रातिन क जइसा होइ जब तू पचे आपन उत्सव मनाउब सुरू करत अहा। तू पचे ओन मनइयन क समान खुस होब्या जउन इस्राएल क चट्टान यहोवा क पर्वत पइ जात समय बाँसुरी क सुनत भए प्रसन्न होत हीं।

³⁰ यहोवा सबहिं लोगन क आपन महान वाणी सुनइ क मजबूर करी। यहोवा लोगन क किरोध क संग खाले आवत भइ आपन सक्तिसाली भुजा लखइ क मजबूर करी। इ भुजा उ महा आगी क नाई होइ जउन सब कछू भसम कइ डावत ह। यहोवा क सक्ति उ आँधी क जइसी होइ जउन तेज बर्खा अउ ओलन क संग आवत ह। ³¹ अस्सूर जब यहोवा क अवाज सुनी तउ उ डेराइ जाइ। यहोवा लाठी स अस्सूर पइ वार करी। ³² यहोवा अस्सूर क पीटी अउर इ पिटाई अइसी होइ जइसे कउनो नगाड़न अउ वीणन पइ संगीत बजावत हउँ। यहोवा आपन सक्तीसाली भुजा (सक्ति) स अस्सूर क हराई।

³³ तोपेत क बहोत पहिले स ही तइयार कइ लीन्ह गवा अहइ। राजा बरे इ तइयार अहइ। इ भट्टी बहोत गहिर अउर बहोत चौड़ी बनाई गइ अहइ। हुवाँ काठे क एक बहोत बड़का ढेर अउ आगी मौजूद अहइ। यहोवा क आतिमा बरत भइ गंधक क नदी क रूप मँ आइ अउर एका भसम कइके नस्ट कइ देइ।

¹ ईसू मसीह क नउकर अउर याकूब क भाई यहूदा कइँती स,

तोहरे ओन बोलाए भएन क नाउँ, जे परमेस्सर क पिता मँ प्रिय अउर ईसू मसीह क बरे सुरच्छित अहइ!

² तोहका दाया, सान्ति अउर पिरेम बहुतियात स मिलत रहइ।

पापी क दण्ड मिली

³ पिआरे दोस्तो! मइँ बहोत चाहत रहे कि तोहका उ उद्धार क बावत लिखउँ, जेकर हम सबे भागीदर अही। मइँ तोहका लिखइ क अउर प्रोत्साहित करइ क आवस्यकता क अनुभव किहेउँ जइसेन कि तू उ बिसवास बरे संघर्स करत रहा जेका परमेस्सर पवित्तर मनइयन क हमेसा हमेसा बरे दिहे अहइ। ⁴ काहेकि हमरे सबके बीचे मँ कछू मनई चोरी स आइ ग अहइँ। एनके अपराध क बावत सास्तर मँ पहिलेन स आगाह कइ दीन्ह गवा अहइ। इ सबइ परमेस्सर क विरोध मँ अहइँ. इ पचे परमेस्सर क अनुग्रह क लुच्चापन मँ बदल डावत हीं अहइ अउर हमार एक ही पर्भू अउर स्वामी ईसू मसीह मँ नाहीं बिसवास करतेन।

⁵ मइँ तोहका इ याद दियावा चाहत हउँ कि जउन पर्भू अपने लोगन क मिस्त्र क धरती स बचाइ क निकार लिहे रहा। अउर जउ उ बिसवास नाहीं करत रहेन, ओनका कउने तरह स नस्ट कइ दिहे रहा। ⁶ अउर याद राखा कि जउन सरगदूतन अपने पद क स्थिर नाहीं रख सकेन आपन अउर निज निवास क छोड़ दिहे रहेन, उ ओनका अनन्त बन्धनन मँ जकडिके उस भीषन दिन क निआव बरे अन्धकार मँ रखे बाटइ। ⁷ इही तरह स मइँ तोहका इहउ याद दिआवा चाहत अहउँ कि सदोम अउर अमोरा अउर ओनके लगे पास क नगरन ऍनही दूतन क तरह यौन अनाचार किहेन तथा अप्राकृतिक यौन सम्बन्ध क पाछे छावत रहेन। ओनका कबहूँ न बुझइवाली आगी मँ झोक देइ क दण्ड दीन्ह गवा। हम सबन क अइसे उदाहरण स सीख लेइ चाही।

⁸ ठीक इही तरह हमरे समहू मँ घुसइवाले इ सब मनई अपने सपना क पीछे दउड़त अपने सरीर क असुद्ध करत अहइँ। इ सबइ पर्भू क तुच्छ जानत हीं अउर महिमावान सरगदूतन क निन्दा करत हीं। ⁹ प्रमुख सरगदूत मीकाईल जउ सइतान क साथ विवाद करत भवा मूसा क ल्हास क बावत बहस करत रहा तउ उ ओकरे खिलाफ अपमानजनक आरोप लगावइ क हिम्मत नाहीं जुटाइ सका। उ सिरिफ एतना कहेस, “प्रर्भू तोहका डाटइ अउर फटकारइ।”

¹⁰ मुला इ लोग तउ ओन बातन क निन्दा करत हीं अउर इ पचे ओनका नाहीं समझतेन। अउर इ पचे अविवेकी जानवरन क नाई जउन जिन बातन स सहज रुप स परिचित अहइँ, इ बातन उहइ बाटिन ओनही क द्वारा नास होइ जात ह। ¹¹ ओनके सबके बरे इ बहुत खराब अहइ, काहेकि उ पचे कैन क रास्ता चुनेन्ह। धन कमाय बरे उ पचे खुद क वइसेन गलती क हवाले कइ दिहेन जइसेन बिलाम किहे रहा। इ बरे ओनही क नास होई जइसेन कोरह क विद्रोह मँ भाग लेइवालेन मर-बिला ग रहेन।

¹² इ पचे तोहरे प्रीतिभोजन मँ छिपी समुद्र तल की चट्टानन क तरह अहइँ जउन कि घातक अहइँ। इ पचे बिना डरे तोहरे साथे खात हीं, पिअत हीं मुला ओनका अपने स्वार्थ क फिकिर रहत ह। उ बिना पानी क बादर अही। उ पचे पतझड़ क अइसेन पेड़ अहिन जउने प फल नाहीं होत। उ दुइ दाई मरा अहइ। ओनका उखाड़ा जाइ चुका अहइ। ¹³ उ पचे समुद्दर क अइसी भयानक लहर अहइँ, जउन अपने लज्जाजनक करमन क झाग उगलत रहत हीं। उ सब इधर उधर भटकत अइसे तारा अहइँ जेनके बरे अनन्त घनघोर अंधेर सुनिस्चित कइ दीन्ह ग अहइ।

¹⁴ आदम स सातवी पीढ़ी क हनोक भी एनके बावत अइसेन सब्दन मँ भविस्सबाणी किहे रहा, “देखा, उ प्रर्भू अपने हजारन हजार पवित्तर सरगदूतन क साथ ¹⁵ प्रर्भू हर मनई क निआव करी। उ सब मनइयन क परखइ आवत अहइ अउर जउन ओकरे खिलाफ अहइँ ओन सबनक दण्ड देई। परमेस्सर एन सब मनइयन क सजा देइ जउन बरा करम किहे बाटेन। उ इ सबइ पापी लोगन क सजा देइ जउन परमेस्सर क खिलाफ रहेन। उ ओन बुरी बातन बरे सजा देई जउन परमेस्सर क खिलाफ किहे बाटेन।”

¹⁶ इ पचे चुगुलखोर अहीं अउर दोख ढूढइवाले अहीं। इ सबेन्ह अपनी इच्छा क गुलाम अही अउर अपने मुँहे स घमंडभरी बात बोलत हीं। अपने फायदे क बरे इ सबेन्ह दूसरे क चापलूसी करत हीं।

जतन करत रहइ बरे चेतावनी

¹⁷ मुला पिआरे दोस्तो, ओन सब्दन क याद करा जउन हमार प्रर्भू ईसू मसीह क प्रेरितन पहिलेन कहि चुका अहइँ। ¹⁸ उ पचे तोहसे कहत रहेन, “आखिरी समइ मँ अइसे मनई रइहीं जउन परमेस्सर स जुड़ी बातन क मजाक उडइहीं।” उ पचे गन्दी इच्छा क पाछे पाछे चलिहइँ। ¹⁹ इ पचे ओनही अहीं जउन फूट डावत ही। इ सबइ संसारिक अउर आतिमा रहित अहइँ।

²⁰ मुला पिआरे दोस्तो, तू पचे एक दूसरे क बिसवास स आध्यात्मिक रुप स आपन क पवित्तर बिस्सास मँ मजबूत करत रहा। पवित्तर आतिमा क साथ पराथना करा। ²¹ अपने आप क परमेस्सर क पिरेम मँ बनाए रख्या अउर अनन्त जीवन बरे उत्सुकता स हमरे पर्भू ईसू मसीह की द्या क बाट जोहत रहा।

²² जे संदेह करत हय, ओनके ऊपर द्या करा। ²³ दूसर मनइयन क आगे बढ़िके आग स निकार ल्या। अउर दूसर मनइयन क बचावा। मुला दया देखावत सावधान रह्या लेकिन ओनके कपरन तलक स नफरत कर्या जउने प ओनके सांसारिक तरह स जीवन यापन पइ पाप क धब्बा लगा अहइ।

परमेस्सर क स्तुति

²⁴ उ (परमेस्सर) मजबूत अहइ अउर तू सबन क ठोकर खाइ स बचाइ सकत ह। अउर अपनी महिमा क उपस्थिती मँ तू पचन क निर्दोस अउर आनन्दित कइके खड़ा कइ सकत ह। ²⁵ उ एकइ परमेस्सर बा। उ सिरिफ एक अहइ जउन उद्धार कइ सकत ह। हमरे पर्भू ईसू मसीह क द्वारा हमरे उद्धार करइवाले एकही परमेस्सर क महिमा, वैभव, पराक्रम अउर अधिकार हमेसा हमेसा स अब तलक भूतकाल मँ, अब अउर भविस्स मँ अउर जुग जुग तक बना रहइ। आमीन।