◀ All Reading Plans / M’Cheyne Bible Reading Plan / Family: Numbers 32; Psalm 77. Secret: Isaiah 24; 1 John 2. (Awadhi Bible: Easy-to-Read Version)

Prev Day

May 23, 2025

Next Day

Use the calendar to view readings from this devotional.

May 2025
Su	Mo	Tu	We	Th	Fr	Sa
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30	31

Return to today's reading

M’Cheyne Bible Reading Plan

The classic M'Cheyne plan--read the Old Testament, New Testament, and Psalms or Gospels every day.

Duration: 365 days

गनती 32

यरदन नदी क पूरब क परिवार समूहन

32 रूबेन अउ गाद परिवार समूहन क लगे ढेर तदाद मँ मवेसियन रहेन। ओनॅ मनइयन याजेर अउ गिलाद क निचके क धरती लखेन। उ पचे बिचारेन कि उ धरती ओनके गोरु बरे ठीक अहइ। ²एह बरे रूबेन अउ गद परिवार समूहन क लोग मूसा क निअरे आएन। उ पचे मूसा, याजक एलीआज़ार अउ मनइयन क नेता लोगन स बात किहेन। ^3-4उ पचे कहेन, “आपक सेवक हम सबन क लगे भारी तदाद मँ गोरु अहइँ। अउर उ भुइयाँ जेका परमेस्सर हम लोगन क जीतइ अउर कब्जा करइ क दिहस, गोरूअन बरे एक ठू बाढ़ियाँ चरागाह अहइ। इ पहँटा मँ अतारोत, दीबोन, याजेर, हेसबोन, एलाले सबाम, नबो, बोन सामिल अहइँ। ⁵अगर आप लोगन क रजामन्दी होइ तउ हम पचे चाहब कि इ पहँटा हम पचन क दीन्ह जाइ। हम लोगन क यरदन नदी क दूसर कइँती न लइ जाइँ।”

⁶मूसा रूबेन अउ गाद क परिवार समूहन स पूछेस, “का तू पचे हिआँ बसब्या अउ आपन भाइयन क हिआँ स जाइ अउ जुद्ध करइ देब्या? ⁷तू पचे इस्राएल क लोगन क उत्साह काहे भंग करइ चाहत बाट्या? होइ सकत ह उ पचे यरदन नदी क पार जउन पहँटा यहोवा ओनका दिसह ह नाहीं लेइ चाहीं। ⁸तोहार बाप अउ दादा मोरे संग अइसा ही किहन। जब मइँ कादेसबनेर् स जासूसन क प्रदेस क छान-बीन करइ पठएउँ रहेउँ। ⁹उ पचे ऍस्कोल घाटी तलक गएन। उ सबइ प्रदेस क लखेन। अउर उ सबइ इस्राएल क लोगन क उ धरती प जाइ क उत्साह भंग कइ दिहस। उ पचे इस्राएल क लोगन क उ पहँटा मँ जाइ क इच्छा नाहीं करइ दिहन जेहसे यहोवा ओनका दइ दिहे रहा। ¹⁰यहोवा मनइयन प बहोतइ कोहान। यहोवा इ कठोर निसेध अग्या क बनाएस: ¹¹‘मिस्र स आवइ वालन लोगन अउ बीस बरिस या जियादा उमर क कउनो भी मनई क उ भूइँया क जेकरे बरे मइँ इब्राहीम, इसहाक अउ याकूब क बचन दिहेउँ रहा। लखइ क आग्यिा नाहीं होब्या। मइँ इ भूइँया क लोगन क देइ क बचन दिहेउँ रहा। मुला उ पचे मोर ठीक तरह नाहीं मानेन। एह बरे उ पचे इ भूइँया क न पइहीं। ¹²सिरिफ कनजी यपुन्ने क पूत कालेब अउर नून क पूत यहोसू यहोवा क पूरी तरह मानेस।’

¹³“यहोवा इस्राएल क लोगन क खिलाफ बहोतइ कोहान रहा। एह बरे यहोवा मनइयन क 40 बरिस तलक रेगिस्तान मँ रोके रहा। यहोवा ओनका तब तलक रोके रहा, जब ताई उ पचे यहोवा क खिलाफ पाप किहे रहेन, मर नाहीं गएन। ¹⁴अउर अब तू पचे उहइ करत अहा जउन तोहार पुरखन किहन ह। अरे पापियो! का तू चाहत ह कि यहोवा इस्राएल क लोग क खिलाफ अउ जियादा कोहाइ जाइ? ¹⁵अगर तू पचे ओकर पाछा करइ स मुड़ि जाब्या तउ यहोवा इस्राएल क अउर जियादा समइ तलक रेगिस्ताने मँ ठहराइ देइ। तब तू इ सब मनइयन क नास कइ देब्या।”

¹⁶मुला रूबेन अउ गाद परिवार समूहन क लोग मूसा क लाग गएन। उ सबइ कहेन, “हिआँ हम पचे आपन गदेलन बरे सहर अउ आपन गोरुअन बरे बाड़ा बनउबइ। ¹⁷तब हमार गदेलन दूसर लोगन स सुरच्छित रइहीं जउन इ प्रदेस मँ रहत हीं। मुला ह पचे खुसी स अगवा बढ़िके इस्राएल क लोगन क मदद करब। हम लोग ओनका ओनके देस मँ लइ जाब। ¹⁸हम पचे तब तलक घर नाहीं लउटब जब तलक हर एक मनई इस्राएल मँ आपन धरती क हींसा पाइ जात। ¹⁹हम लोग यरदन नदी क पच्छिम मँ कउनो धरती नाहीं लेब, हम सबन क धरती क हींसा यरदन नदी क पूरब ही बाटइ।”

²⁰तउ मूसा ओनसे कहेस, “जदि तू पचे इ सब करब्या तउ इ रेगिस्तान तू पचन क होइ। मुला तोहरे फउजियन क यहोवा क समन्वा जुद्ध मँ जाइ चाही। ²¹तोहरे सिपाहियन क यरदन नदिया पार करइ चाही अउ दुस्मनन क उ देस तजि देइ बरे मजबूर करइ चाही। ²²जब हम सबन क धरती पावइ मँ यहोवा मदद कइ चुकइँ तब तू सबइ घर जाइ सकत ह। तब यहोवा अउ इस्राएल तोहका अपराधी नाहीं मनिहीं। तब यहोवा तू पचन क इ पहँटा लइ लेइ देइहीं। ²³मुला अगर तू सबइ इ बातन पूरी नाहीं करत्या तउ तू लोग यहोवा क खिलाफ पाप करब्या। अउर उ गाँठ बाँधा कि तू आपन पाप खातिर सजा पउब्या। ²⁴आपन गदेलन बरे सहर अउ गोरुअन बरे बाड़ा बनावा। मुला ओकरे पाछे ओका पूरा करा जेका करइ क तू पचे बचन दिहे अहा।”

²⁵तब गाद अउ रूबेन परिवार समूहन क लोग मूसा स कहेन, “हम पचे आप क सेवक अही। आप हमार सुआमी अहइँ। एह बरे हम लोग उहइ करब जउन आप कहत हीं। ²⁶हमार मेहरारु, गदेलन अउ हमार गोरुअन गिलाद नगर मँ रइहीं। ²⁷मुला आपक सेवक हम यरदन नदी क पार करब। मुला हम पचे यहोवा क समन्वा आपन सुआमी क कहे क मुताबिक जुद्ध मँ कूदि पड़ब।”

²⁸मूसा याजक एलीआज़ार, नून क पूत यहोसू अउ इस्राएल क परिवार समूहन क सबहिं नेतागणन क ओकरे बारे मँ हुकुम दिहस। ²⁹मूसा ओनसे कहेस, “गाद अउ रूबेन क मनई यरदन नदी क पार करिहीं। उ पचे यहोवा क अगवा जुद्ध मँ धावा बोलिहीं। उ सबइ देस जीतइ मँ तोहार मदद करिहीं। अउर तू पचे गिलाद क प्रदेस ओनके हींसा क रूप मँ ओनका दोब्या। ³⁰मुला जदि उ पचे आपन सिपाहियन क तोहार संग पार नाहीं भेजइ तउ होइ सकत ह कि उ कनान प्रदेस मँ तोहार लोगन क बीच सिरिफ पैतृक सम्पत्ति ही पाइ।”

³¹गाद अउ रूबेन क लोग जवाब दिहन, “हम पचे उहइ करइ क बचन देत अही जउन यहोवा क हुकुम अहइ। ³²हम पचे यरदन नदी पार करब अउ कनान देस प यहोवा क समन्वा धावा बोलब। अउ हमरे देस क हींसा यरदन नदी क पूरब क धरती होइ।”

³³इ तरह मूसा उ प्रदेस क कछू भाग गाद क लोगन, रूबेन क लोगन अउ मनस्से परिवार समूहन क आधे लोगन क दिहस। (मनस्से यूसुफ क पूत रहा।) उ प्रदेस मँ एमोरियन क राजा सिहोन क राज्ज अउ बसान क राजा ओग क राज्ज मिला रहा। उ प्रदेस मँ उ इलाका क चारहों कइँती क सहर भी मिला रहेन।

³⁴गाद क मनइयन दीबोन, अतारोत, अरोएर, ³⁵अत्रौत, सोपान, याजेर, योगबहा, ³⁶बेतनिम्रा अउ बेथारान सहरन क बनाएन। उ पचे मजबूत चहर-देवार क संग सहरन क बनाएस अउ आपन गोरुअन क बाड़ा बनाएन।

³⁷रूबेन क मनइयन हसबोन, एलाले, किर्यातैन, ³⁸नबो, बालमोन अउर तित्पा सहर। उ दूसर सहरन क नाउँ दिहस जेका उ बनाए। मुला नेबो अउ बाल मिआँन क नवा नाम स पुकारेस।

³⁹मनस्से परिवार समूह क सन्तान माकीर स जन्मा लोग गिलाद क गएन। उ पचे सहर क हराएन। उ पचे ओन एमोरी क हराएन जउन हुवाँ रहत रहेन। ⁴⁰एह बरे मनस्से क परिवार समूह क माकीर बरे मूसा गिलाद दिहस। एह बरे ओकर परिवार हुवाँ बस गवा। ⁴¹मनस्से क परिवार समूह क यैर नान्ह-नान्ह सहरन जेका हेवोल याईर कहा जात ह क जीत लिहस ह। ⁴²तउ नोबह कनात अउ ओकरे लगे क नान्ह-नान्ह सहरन क हराएस। तब उ उ ठउर क नाउँ आपन नाउँ प नोबह धरेस।

भजन संहिता 77

“यदूतन” राग पइ संगीत निर्देसक बरे आसाफ क भजन।

¹मइँ मदद पावइ बरे परमेस्सर क गोहराउब।
    मइँ परमेस्सर क गोहराउब अउर उ मोका सुनी।
²जब मइँ दुःख मँ रहेउँ तउ मइँ यहोवा क सरण मँ आवा।
    मइँ सारी रात तोह तलक पहोंचइ जूझा हउँ।
    मइँ एका नाहीं छोड़ा अउर आराम तलक नाहीं किहेउँ।
³मइँ परमेस्सर क याद करत हउँ किन्तु मइँ बेचेन हउँ।
    अउर ओका बतावा कि मइँ कइसा अनुभव करत हउँ।
किन्तु फुन भी मइँ अइसा नाहीं कइ सकत हउँ।
    मइँ बोलन चाहता रहेउँ, किन्तु मइँ बहोत उदास रहेउँ। (सेला)
⁴तू मोका सोवइ नाहीं दिहा।
    मइँ उदास रहेउँ, ऍह बरे मइँ कछू नाहीं कह सकत हउँ।
⁵मइँ अतीत क बातन बरे सोचेउँ।
    बहोत दिना पहिले जउन बातन घटी भइ रहिन ओन घटनन क बारे मँ मइँ सोचेउँ।
⁶राति मँ, मइँ आपन गीतन क बारे मँ सोचा करत रहेउँ।
    मइँ आपन आप स बातन किहेउँ।
    मइँ समुझइ बरे जतन किहेउँ।
⁷मोका इ हैरानी अहइ कि “का मोर सुआमी मोका सदा बरे तजि दिहे अहइ?
    का उ हमका फुन नाहीं चाही?
⁸का परमेस्सर क पिरेम हमेसा बरे खतम होइ गवा अहा?
    का उ मोहे स फिन कबहुँ बात नाहीं करी?
⁹का परमेस्सर दाया दिखावइ भूल गवा ह?
    का ओकर करुणा किरोध में बदल गइ बाटइ?”

¹⁰मइँ फुन इ सोचा करत हउँ, “उ सोच जउन मोका दर्द देत अहइ:
‘का सर्वोच्च परमेस्सर आपन निज सक्ति दिखावइ बन्द कइ दिहस ह?’”

¹¹सक्ति भरा उ काम जेनका यहोवा किहस ह ओका याद रखा।
    हाँ उ कामन जेनका तू पहिले किहा ह मोका याद बाटइ।
¹²मइँ ओन सबहिं कामन क जेनका तू किहा ह सोचे हउँ।
    जेन कामन क तू किहा मइँ धियान देत हउँ।
¹³हे परमेस्सर, तोहार निवास स्थान पवित्तर अहइँ।
    कउनो भी अइसा महान नाहीं अहइ जइसा तू अहा।
¹⁴तू ही उ परमेस्सर अहा जउन अद्भुत काम किहा।
    तू रास्ट्रन क आपन निज महासक्ति देखाँया।
¹⁵तू आपन सक्ति क प्रयोग किहा अउर आपन लोगन क बचाइ लिहा।
    तू याकूब अउ यूसुफ क संतानन क बचाइ लिहा।

¹⁶हे परमेस्सर, सागर तोहका लखेस अउर जब उ तोहका लखेस तउ डेराइ गवा।
    गहिर समुद्दर डर स थर-थर काँप उठा।
¹⁷घनघोर बादरन स ओनकर पानी छूट पड़ा रहा।
    ऊँच बादरन स जोर क गर्जब लोग सुनेन।
    फुन ओन बादरन स बिजुरी क तोहार बाण नीचे चलेन।
¹⁸तोहार बिजुरी क गर्जन आंधी भरे हवा मँ फुन गर्जेस,
    तोहार बिजुरी चमचमात भवा जगत पइ चमक उठी।
    धरती हिल गइ अउर थर-थर काँपि गइ।
¹⁹हे परमेस्सर, तू गहिर समुद्दर मँ पैदर चल्या।
    तू चलिके ही सागर पार किहा।
    मुला तू कउनो पद चीन्हा नाहीं छोड़्या।
²⁰तू मूसा अउ हारून क उपयोग
    आपन मनवइयन क अगुआई भेड़िन क झुण्ड क नाई करइ मँ किहा।

यसायाह 24

परमेस्सर इस्राएल क सजा देइ

24 लखा! यहोवा इ धरती क बर्बाद करी। यहोवा भूचालन क जरिये इ धरती क मरोड़ देइ। यहोवा लोगन क कहूँ दूर जाइ क मजबूर करी। ²उ समय, हर कउनो क संग एक जइसी घटनन घटिहीं, साधारण मनई अउ याजक एक जइसे होइ जइहीं। सुआमी अउर सेवक एक जइसे होइ जइहीं। दासियन अउर ओनकर सुआमियन एक समान होइ जइहीं। मोल लेइवाले अउर बेसइवाले एक जइसे होइ जइहीं। कर्जा लेइवालन अउर कर्जा देइवालन लोग एक जइसे होइ जइहीं। धनवान अउर दीन लोग एक जइसे होइ जइहीं। ³सबहिं लोगन क हुवाँ स ढकेल बाहेर कीन्ह जाइ। सारी धन दौलत छोरी लीन्ह जइहीं। अइसा एह बरे घटी काहेकि यहोवा अइसा ही आदेस दिहस ह। ⁴देस उजड़ जाइ अउर दुःखी होइ। दुनिया खाली होइ जाइ अउर उ दुर्बल होइ जाइ। इ धरती क महान नेता सक्तिहीन होइ जइहीं।

⁵इ धरती उ लोगन दुआरा दूसित कइ दीन्ह ग अहइ जउन एह पइ रहत हीं। अइसा कइसा होइ गवा? लोग परमेस्सर क सिच्छा क विरोध मँ गलत काम किहेन। लोग परमेस्सर क नेमन क पालन नाहीं किहन। बहोत पहिले उहइ लोग परमेस्सर क संग एक करार किहे रहेन। किन्तु परमेस्सर क समन्वा कीन्ह गवा उ करार क उ पचे उल्लंघन किहेस। ⁶इ धरती क रहइवाले लोग अपराधी अहइँ। एह बरे परमेस्सर इ धरती क नस्ट करइ क निहचय किहस। ओन लोगन क सजा दीन्ह जाइ अउर हुवाँ थोड़े स लोग ही बचि पइहीं।

⁷अगूंर क बेलन मुरझात अहइँ। नई दाखरस क कमी पड़ति अहइ। पहिले लोग खुस रहेन। किन्तु अब उ पचे ही लोग दुःखी अहइँ। ⁸लोगन आपन खुसी बियक्त करइ तजि दिहे अहइँ। खुसी क सबहिं ध्वनियन रूकि गइ बाटिन। खँजरियन अउ वीणन क आनन्द स भरा संगीत खतम होइ चुका अहइ। ⁹अब लोग दाखरस पिअत अहइँ, तउ खुसी क गीत नाहीं गउतेन। अब जब मनई दाखरस पिअत हीं, तब उ ओका कड़ुई लागत ह।

¹⁰इ सहर क एक नीक स नाउँ अहइ, “गड़बड़ स भरा”, इ नगर क बिनास कीन्ह गवा। लोग घरन मँ नाहीं घुस सकतेन। दुआर बंद होइ चुका अहइँ। ¹¹गलियन मँ दुकानन पइ लोग अबहुँ भी दाखरस क पूँछत हीं, किन्तु समूची खुसी जाइ चुकी अहइ। आनन्द तउ दूर कइ दीन्ह ग अहइ। ¹²नगर बरे बस बिनास ही बचत अहइ। दुआर तलक चकनाचूर होइ चुका अहइँ।

¹³फसल क समय लोग जइतून क बृच्छ स जइतून क गिरावा करिहीं।
    किन्तु केवल कछू ही जइतून बृच्छन पइ बचिहीं!
    जइसे अंगूरे क फसल उतारइ क पाछे थोड़ा स अंगूर बचे रहि जात हीं,
    अइसा ही इ धरती क रास्ट्रन क संग होइ।
¹⁴बचे भए लोग ऊँची आवाज़ मँ स्तुति करीं।
    दूरगामी देस क लोग यहोवा क महानता क स्तुति करिहीं अउर उ पचे, खुस होइहीं।
¹⁵उ सबइ लोग कहा करिहीं, “पूर्व क लोगो, यहोवा क तारीफ करा।
    दूर देस क लोगो,
    इस्राएल क परमेस्सर यहोवा क नाउँ क गुण गान करा।”
¹⁶इ धरती पइ हर कहूँ हम परमेस्सर क स्तुति क गीत सुनब।
    ऍन गीतन मँ परमेस्सर क स्तुति होइ।
किन्तु मइँ कहत हउँ, “मइँ बरबाद होत रहत हउँ।
    मइँ जउन कछू भी लखत हउँ सब कछू खउफनाक अहइ।
गद्दार लोग, लोगन क विरोधी होत रहत हीं,
    अउर ओनका चोट पहोंचावत हीं।”

¹⁷मइँ धरती क बसइयन पइ खतरा आवत लखत हउँ।
    मइँ ओनके बरे भय, गड़हन अउर फँदन लखत हउँ।
¹⁸लोग खतरे क सुनिके
    डर स काँपि जइहीं।
कछू लोग, पराइ जइहीं
    किन्तु उ सबइ गड़हन अउर फँदन मँ जाइ गिरिहीं
अउर ओन गड़हन स कछू चढ़िके बचि निकरि अइहीं,
    किन्तु उ पचे फुन दूसर फंदन मँ फँसिहीं।
ऊपर अकासे क छाती फटि जाइ जाइसे बाढ़ क दुआर खुलि गवा होइँ।
    बाढ़न आवइ लगिहीं अउर धरती क नेंव डगमग हिलइ लागी।
¹⁹भूचाल आइ
    अउर धरती फट जाइहीं।
²⁰संसार क पाप बहोत भारी अहइँ।
    उ भारे स दबिके इ धरती गहराइ जाइ।
इ धरती कउनो झोपड़ी स काँपी
    अउर नसे मँ धुन्त कउनो मनई क तरह धरती गिर जाइ।
    इ धरती बनी न रही।

²¹उ समय यहोवा सब क निआव करी।
    उ समय यहोवा अकासे मँ सरग क फउजन
    अउर धरती क राजा उ निआव क विषय होइहीं।
²²एन सबन क एक संग एकट्ठा कइ दीन्ह जाइ।
    ओनमाँ स कछू काल कोठरी मँ बन्द होइहीं
अउर कछू कारागार मँ रइहीं।
    किन्तु अंत मँ बहोत समय क पाछे एन सबन्क निआव होइ।
²³यरूसलेम मँ सिय्योन क पहाड़े पइ यहोवा राजा क रूप मँ राज्ज करी।
    अग्रजन क समन्वा ओकर महिमा होइ।
ओकर महिमा ऍतनी भव्व होइ कि चँदा व्याकुल होइ जाइ,
    सूरज लजाइ जाइ।

1 यूहन्ना 2

ईसू हमार सहायक अहइ

2 मोर पिआरे बच्चो, इ सब बात मइँ इ बरे लिखत अहउँ जइसे तू पचे पाप न करा। मुला जउ कउनो मनई पाप करत ह तउ परमेस्सर क सामने हमरे पाप क बचाव करइवाला एक अहइ अउर उ बाटइ न्यायी ईसू। ²उ एक बलिदान बाटइ जउन हमरे पापन क हर लेत ह, उ केवल हमरे पापन क नाहीं हरत उ तउ समूची दुनिया क पाप हर लेत ह।

³जदि हम परमेस्सर क हुकुम क पालन करित ह तउ इ उहइ रास्ता अहइ जउने स हम निस्चय करित ह कि हम सचमुच ओका जान लिहे अही।

⁴जदि कउनो कहत ह, “मइँ परमेस्सर क जानित हउँ!” अउर ओकर हुकुमन क पालन नाहीं करत तउ उ झूठा अहइ। ओकरे मन मँ सच्चाई नाहीं अहइ। ⁵मुला जउ कउनो मनई परमेस्सर क उपदेस क पालन करत ह तउ ओहमाँ परमेस्सर क पिरेम आपन पूर्णता क पावत ह इहइ उ रास्ता अहइ जउने स इ निस्चय होत ह कि हम परमेस्सर मँ अही, ⁶जउन इ कहत ह कि उ परमेस्सर मँ बाटइ, ओका अइसा चलइ चाही जइसन ईसू चलत रहा।

सबसे पिरेम कर

⁷पिआरे बन्धुअन, मइँ तोहका कउनो नई हुकुमन नाहीं लिखत अहउँ, इ तउ एक सनातनी हुकुम अहइ, जउन तोहका सुरूआतइ मँ दइ दीन्ह गइ रही। इ पुरानी हुकुम उ उपदेस अहइ जेका तू सुन चुका अहा। ⁸मइँ तोहका अउर दुसर नया हुकुम लिखत अहउँ। इ बात की सच्चाई ईसू क जीवन मँ अउर तोहरे जिन्दगी मँ उजागर भइ अहइ, काहेकि अँधियारा खतम होत अहइ अउर ज्योति चमकत अहइ।

⁹जउन मनई कहत ह, “उ ज्योति मँ स्थित अहउँ।” अउर तबहूँ अपने भाई स नफरत करत ह, तउ उ अबहिं भी उ अंधेर मँ बना अहइ। ¹⁰जउन अपने भाई स पिरेम करत ह, ज्योति मँ बना रहत ह। ओकरे जिन्दगी मँ अइसी कउनो चीज नाहीं अहइ, जउने स उ ठोकर खाइ। ¹¹मुला जउन मनई अपने भाई स नफरत करत ह, उ अंधेरे मँ अहइ। उ अंधेरे स भरा जीवन जिअत अहइ। ओका पता नाहीं अहइ कि उ कहाँ जात अहइ, काहेकि अंधेरा ओका आंधर बनाइ दिहे अहइ।

¹²पिआरे बच्चो, मइँ तोहका इ बरे लिखत अहउँ,
    काहेकि ईसू मसीह क कारण तोहरे पापन क छमा कइ दीन्ह गवा अहइ।
¹³पिताओ, मइँ तोहका इ बरे लिखत अहउँ,
    काहेकि तू पचे, जउन अनादि काल स बना अहइ, ओका जानत ह्या।
जवानो! मइँ तोहका इ बरे लिखत अहउँ,
    काहेकि तू उ दुस्ट (सइतान) प जीत हासिल कइ लिह्या ह।
¹⁴बच्चो, मइँ तोहका इ बरे लिखत अहउँ,
    काहेकि तू अपने बाप क पहचान लिहे अहा।
ओह बाप लोगो, मइँ तोहका इ बरे लिखत अहउँ,
    काहेकि तू जउन कि संसार क सुरुआतइ स बना अहा, ओका जान लिहे अहा।
जवानो, मइँ तोहका इ बरे लिखत अही,
    काहेकि तू ताकतवर अहा।
परमेस्सर क बचन तोहरे अन्दर निवास करत ह,
    अउर उ दुस्ट (सइतान) पइ जीत हासिल कइ लिये अहा।

¹⁵दुनिया स अउर दुनिया क तमाम चीजन स पिरेम जिन करा। जउ कउनो मनई दुनिया स पिरेम करत ह तउ ओनके हिरदइ मँ परमेस्सर कइँती पिरेम नाहीं रहत, ¹⁶काहेकि इ दुनिया क हर चीज: जउन तोहरे भौतिक मनई सुभाउ क अपनी अउर खींचत ह, तोहरी आँखिन क सोहात अउर इ दुनिया क हर उ चीज जउने प लोग घमंड करत हीं। परमपिता कइँती स नाहीं अहइ मुला उ तउ सांसारिक अहइ। ¹⁷इ दुनिया अपनी चाहत अउर इच्छा सहित खतम होत जात अहइ, मुला जउन मनई परमेस्सर क इच्छा क पालन करत ह, उ हमेसा रहत ह।

मसीह क विरोधिअन क कहा न माना

¹⁸मोरे पिआरे बच्चो, आखिरी घड़ी आइ गइ अहइ जइसेन कि तू पचे सुने अहा, मसीह क विरोधी आवत अहइ। इ बरे अब मसीह क तमाम विरोधी प्रकट होइ गवा अहइँ इही बरे हम जानत अही कि आखिरी वक्त आइ ग अहइ। ¹⁹मसीह क विरोधी हमरेन सबके बीच स निकरा अहइँ, मुला उ सबइ सही हमार सबन क न अही, काहेकि जदि उ पचे सचमुच हमार सबन क होतेन, तउ हमरे सबके साथे रहतेन। मुला उ पचे हम सबक छोड़ दिहेन, जइसेन कि उ दिखाइ सकइँ कि उ हमार सबन्क न अही।

²⁰मुला तोहार अभिसेक तो उस पवित्तर स भवा ह, अउर तू सब जानत ह्या। ²¹मइँ तोहका इ बरे नाहीं लिखे अहउँ कि तू पचे सच्चाई क नाहीं जानत अहा, मुला तू पचे तउ ओका जानत अहा। एका जना ल्या कि सच्चाई स कउनो झूठ नाहीं निकर सकत।

²²मुला जउन मनई कहत ह कि ईसू मसीह नाहीं अहइ, उ मसीह क विरोधी अहइ। उ तउ बाप अउर बेटवा दुइनउ क नकार देत अहइ। ²³जउन मनई बेटवा क नाहीं मानत, ओकरे पास बापउ नाहीं अहइ, मुला जउन मनई बेटवा क मानत ह, उ बापउ क मानत ह।

²⁴जहाँ तलक तोहार बात अहइ, तु सुरुआतइ स जउन सुने अहा, ओका अपने भीतर बनाए राखा। जउन तू आरम्भ स सुने अहा, जउ तोहरे अन्दर बरकरार रहत ह तउ बाप अउर बेटवा दुइनउँ तोहरे अन्दर बरकरार रहत हीं। ²⁵उ हमका अनन्त जीवन देइ क वचन दिहे अहइ।

²⁶मइँ इ सब बात तोहसे ओनके बावत लिखत अहउँ, जउन तोहका ठगइ क जतन करत अहइँ। ²⁷मुला जहाँ तक तोहार बात अहइ, तोहरे मँ तउ उ परम पवित्तर स मिला अभिसेक अहइ, इ बरे तोहका तउ तू जरूरतइ नाहीं अहइ कि कउनो तोहका उपदेस देइ, तोहका तउ उ आतिमा जउने स उ परम पवित्तर तोहार अभिसेक करे अहइ, सब कछू सिखावत अहइ (अउर याद रखा कि उहइ सच्चाई बाटइ, उ झूठ नाहीं बाटइ।) उ तोहका जइसे सिखाए अहइ, वइसेन तू मसीह मँ बना रहा।

²⁸इ बरे पिआरे बच्चो, उही मँ बना रहा जइसेन कि जब हमका ओकर जानकारी होइ तउ हम आतिमा-बिसवास पाइ सकउँ। अउर ओकरे फिन स आवइ क वक्त हमका लज्जित न होइ क पड़इ। ²⁹जदि तू इ जानत अहा कि उ नेक अहइ तउ तू इहइ जान ल्या कि जउन नेकी प चलत ह उ परमेस्सर क सन्तान अहइ।

Awadhi Bible: Easy-to-Read Version (ERV-AWA)