◀ All Reading Plans / M’Cheyne Bible Reading Plan / Family: Numbers 31; Psalms 75–76. Secret: Isaiah 23; 1 John 1. (Awadhi Bible: Easy-to-Read Version)

Prev Day

May 22, 2025

Next Day

Use the calendar to view readings from this devotional.

May 2025
Su	Mo	Tu	We	Th	Fr	Sa
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30	31

Return to today's reading

M’Cheyne Bible Reading Plan

The classic M'Cheyne plan--read the Old Testament, New Testament, and Psalms or Gospels every day.

Duration: 365 days

गनती 31

इस्राएल मिदियनन क खिलाफ फुन हमला किहेस

31 यहोवा मूसा स बात किहेस। उ कहेस, ²“‘मइँ इस्राएल क लोगन क संग मिद्यानी लोग जउन किहे बाटइँ, ओकरे बरे मइँ सजा देब।’ ओकरे पाछे मूसा तू मरि जाब्या।”

³एह बरे मूसा मनइयन स बात किहेस। उ कहेस, “आपन कछू मनइयन क जुद्ध बरे तइयार करा। यहोवा ओन मनइयन क प्रयोग मिदयानी लोगन क सजा देइ मँ करिहीं। ⁴अइसे 1,000 मनइयन क इस्राएल क परिवार समूहन स चुना। ⁵इस्राएल क सबहिं परिवार समूहन स 12,000 सिपाही होइहीं।”

⁶मूसा ओन 12,000 मनइयन क जुद्ध बरे पठाएस। उ याजक एलीआज़ार क पूत पनीहास क ओनके संग पठाएस। पनीहास आपन संग पवित्तर चीजन, सीगं अउ तुरहियन लइ लिहेस। ⁷इस्राएल क लोग मिदियानी लोगन क नरसिंग वइसेन ही लड़ेन जइसा यहोवा मूसा क हुकुम दिहे रहा। उ पचे सबहिं मिद्यानी मनइयन क मारि डाएन। ⁸जउन मनइयन क उ पचे मारि डाएन ओहमाँ एवी, रकैम, सूर, हूर अउ रेबा इ सबइ पाँच मिद्यानी राजा रहेन। उ पचे बेआँर क पूत बिलाम क भी तरवारे स मारि डाएस।

⁹इस्राएल क लोग मिद्यानी मेहररुअन अउ गदेलन, ओनकइ सब भेड़ी, गइयन अउ सब चीजन क बन्दी बनाइ लिहन। ¹⁰तब उ पचे ओनके सब डेरन मँ अउ सहरन मँ आगी लगाइ दिहन जहाँ उ पचे रहत रहेन। ¹¹उ पचे सब मनइयन अउ गोरुअन क लइ लिहन, ¹²अउर ओनका मूसा, याजक एलीआज़ार अउ इस्राएल क सब लोगन क लगे लइ गएन। उ पचे ओन सबहिं इस्राएल क सिबिर मँ लाएन जेनका उ पचे हुवाँ पाइ लिहन। इस्राएल क लोग मोआब क समतल मँ बसा यरदन घाटी मँ सिबिर डाए रहेन। इ यरीहो क निचके यरदन नदी क पूरब कइँती रहा। ¹³तब मूसा, याजक एलीआज़ार अउ मनइयन क नेता, सिपाहियन स मिलइ बरे डेरन स बाहेर गएन।

¹⁴मूसा सेनापति लोगन प बहोत कोहान रहा। उ ओन 1,000 क फउज क संचालक लोगन अउ एक सौ क फउज क संचालक लोगन प कोहान रहा जउन जुद्ध स लौटिके आए रहेन। ¹⁵मूसा ओनसे कहेस, “तू आदमी लोग मेहररुअन क काहे जिअत रहइ दिहा? ¹⁶लखा इ अउरत ही रही जेकरे वजह स बिलाम क घरना मँ इस्राएलियन बरे समस्या पइदा भइन अउ पेऑर मँ यहोवा क खिलाफ होइ गएन जेहसे इस्राएल क मनइयन क महामारी भोगइ क पड़ी। ¹⁷तउ अब मिद्यानी नर गदेलन क मारि डावा। अउर ओन सबहिं मिद्यानी मेहररुअन क मारि डावा जउन कउनो मनई क संग रही होइँ। ओन सब मेहररुअन क मारि डावा जेकर कउनो मनई क संग सारीरिक सम्बंध होइ। ¹⁸तू सिरिफ ओन सबहिं बिटियन क जिअइ द्या जेकर कउनो मनई क संग सारीरिक सम्बंध नाहीं भइ। ¹⁹तब एकर बाद तू सबइ सिपाहियन क जउन लोगन क मारेस या ल्हास क छुएस सात दिना तलक सिबिर क बाहर रहइ क पड़ी। तीसरे अउ सताएँ दिनन तू अउर तोहार बन्दी सुद्ध होब्या। ²⁰तोहका उहइ काम सातवें दिन फिर करइ क होइ। तोहका आपन सबहिं ओढ़ना धोवइ चाही। तोहका चाम क बनी हर चीज ऊनी अउ काठे क बनी चीजन क भी धोवइ चाही। तोहका सुद्ध होइ जाइ चाही।”

²¹तब याजक एलीआज़ार सिपाहियन स कहेस कउन जुद्ध क लउटेस ह। उ कहेस, “इ उहइ नेम बाटेन जेका यहोवा मूसा क दिहे रहा। ^22-23मुला जउन चीजन आगी मँ डाइ जाइ सकत हीं ओकरे बारे मँ अलग-अलग नेमॅ अहइँ। तोहका सोना, चाँदी, काँसा, लोहा, टिन या सीसा क आगी मँ डावइ चाही। जब तू ओनका सुद्धीकरण बरे लाल गाय क राख मिला भवा पानी स धोवा उ सबइ सुद्ध होइ जइहीं। जदि चीजन आगी मँ न नाई जाइ सकइँ तउ तोहका ओनका पानी स धोवइ चाही। ²⁴सतऍ दिन तोहका आपन सारा ओढ़ना धोवइ चाही। जब तू सुद्ध होइ जाब्या। ओकरे बाद तू पचे सिबिर मँ आइ सकत ह।”

²⁵तब यहोवा मूसा स कहेस, ²⁶“मूसा तोहका याजक एलीआज़ार अउ सबहिं नेता लोगन क चाही कि तू पचे ओन बन्दियन, गोरुअन अउ सबहिं चीजन क गना जेनका फउजी लोग जुद्ध स लाए होइँ। ²⁷तब ओन सबहिं चिजियन क जुद्ध मँ भाग लेइ वालन आधा फउजी लोगन अउ बाकी आधा इस्राएल क मनइयन मँ बाँटि देइ चाही। ²⁸जउन सिपाही जुद्ध मँ भाग लेइ ग रहेन ओनसे ओन चीजन क कर ल्या। उ हींसा यहोवा क होइ। हर एक पाँच सौ चीजन मँ स एक यहोवा क हींसा होइ। एहमाँ मनई, गाय, गदहन अउ भेड़ी सामिल अहइँ। ²⁹जउन फउजी जुद्ध मँ जउन चीजन क पाएन ह, ओनका आधी हींसा कर क रूप मँ ल्या। तब ओन चीजन क (प्रति एक पाँच सौ मँ स एक) याजक एलीआज़ार क द्या। तब हींसा यहोवा क होइ। ³⁰अउर तब बाकी लोगन क आधा मँ स हर एक पचास चीजन मँ स एक चीज ल्या। एहमाँ मनई, गाय, गदहन, भेड़ी या दूसर जनावर सामिल बाटेन। इ हींसा लेवी बंसी मनइयन क द्या। काहे? काहेकी लेवी बंसी यहोवा क पवित्तर तम्बू क देखत रेखत हीं।”

³¹इ तरह मूसा अउ एलीआज़ार उहइ किहन जउन मूसा क यहोवा क हुकुम रहा। ³²फउजी सिपाही 6,75,000 भेड़ीन, ³³बहत्तर हजार गोरु, ³⁴इक्सठ हजार गदहन, ³⁵बत्तीस हजार मेहररुअन लूटे रहेन। (इ सबइ अइसी मेहररुअन रहिन जेनकइ कउनो मनई क संग सारीरिक सम्बंध नाहीं रहा।) ³⁶जउन सिपाही जुद्ध मँ गए रहेन उ सबइ आपन हींसा क 3,37,500 भेड़िन क पाइ लिहन। ³⁷फउजियन स लीन्ह ग यहोवा क कर 675 भेंड़ रहा। ³⁸फउजियन क 36,000 गाइयन मिलि गएन। उ पचे बहत्तर यहोवा क दिहेन। ³⁹फउजी 30,500 गदहा पाइ गएन। उ पचे यहोवा क इकसठ दिहेन। ⁴⁰फउजियन क 16,000 मेहरारु मिलिन। उ सबइ यहोवा क बत्तीस दिहेन। ⁴¹यहोवा क हुकुम क मुताबिक मूसा यहोवा बरे दीन्ह गइ ओन सारी भेंटन क याजक एलीआज़ार क दिहस।

⁴²तब मूसा मनइयन स मिला भवा आधा हींसा क गनेस। इ उ हींसा रहा जेका मूसा जुद्ध मँ जाइवालन फउजियन स लिहे रहा। ⁴³मनइयन 3,37,500 भेड़ी, ⁴⁴छत्तीस हजार गाइयन, ⁴⁵तीस हजार पाँच सौ गदहा ⁴⁶अउ 16,000 मेहरारु पाएन। ⁴⁷मूसा हर एक पचास चीजन प एक चीज यहोवा बरे लिहस। एहमा गोरु अउ मनई दुइनऊ सामिल रहेन। तब ओन चीजन क उ लेवी बंसी लोगन क दिहेस। काहेकि उ यहोवा क पवित्तर तम्बू क देखत रेखत रहेन। मूसा इ यहोवा क हुकुम क मुताबिक किहेस।

⁴⁸तब सेना क संचालक (1,000 सिपाहियन क सेनापति अउ एक सौ सिपाहियन क सेनापति) मूसा क निअरे गएन। ⁴⁹उ पचे मूसा स कहेन, “हम पचे आपन फउजियन क गना ह। हम पचन मँ स कउनो भी कम नाहीं अहइ। ⁵⁰एह बरे हम लोग हर एक ठु सिपाही स यहोवा क भेंट लइ आवत अही। हम पचे सोना क चीज बाजूबन्द, कड़ा, मुँदरी, बाली अउ हबेल लइ आवत अही। इ सब भेंट यहोवा क समन्वा हमार पाप बरे प्रायस्चित बरे होइ।”

⁵¹एह बरे मूसा उ सबइ सोना क चीज लिहस अउ याजक एलीआज़ार क ओन चीजन्क दिहस। ⁵²एक हजार फउजियन क सेनापतियन अउ एक सौ मनइ क सेनापातियन जउन सोना बटोरेन ओकर वजन 16,750 सेकेल रहा। ⁵³हर एक फउजी लड़ाई मँ मिली भइ बाकी चीजन क हींसा अपने लगे रख लिहस। ⁵⁴मूसा अउ याजक एलीआज़ार एक हजार फउजियन क सेनापतियन अउर एक सौ मनइयन क सेनापातियन स सोना अंगीकार किहस। तब उ पचे सोना क मिलापवाला तम्बू मँ धरेस। इ भेंट एक यादगार क रूप मँ इस्राएल क लोगन बरे यहोवा क समन्वा रहिन।

भजन संहिता 75-76

“नास जिन करा” नाउँ क धुन पइ संगीत निर्देसक बरे आसाफ क भजन।

¹हे परमेस्सर, हम तोहार बड़कई करत अही।
हम तोहार बड़कई करत अही काहेकि तोहार मौजूदगी निअरे अहइ।
अउर लोग तोहरे ओन अद्भुत करमन क जेनका तू करत अहा, बयान करत हीं।

²परमेस्सर कहत ह, “मइँ निआउ क समइ चुन लिहेउँ,
मइँ निस्पच्छ होइके निआउ करब।
³धरती अउ धरती क हर वस्तु डगमगाइ सकत ह अउर गिरइ क तइयार होइ सकत ह,
किन्तु मइँ ही ओका स्थिर राखत हउँ।

⁴“कछू लोग बहोत ही घमण्डी होत हीं।
    उ पचे सोचत रहत हीं कि उ पचे बहोत मजबूत अउ महत्वपूर्ण बाटेन।
मुला मई उनसे कहत हउँ, ‘घमण्डी जिन बना!
    अइसा बिउहार जिन करा कि तू बहोत मजबूत अउ महत्वपूर्ण अहइ।
⁵अइसा जिन दिखावा कि तू बहोत सक्तीसाली अहइ
    अउर अहंकारी जिन बना।’”

⁶इ फुरइ अहइ कि कउनो भी मनई
    धरती पइ नीच क महान नाहीं बनाइ सकत।
⁷परमेस्सर सासक ह।
    परमेस्सर ऍकर फैसला करत ह कि कउन मनई महान होइ।
परमेस्सर ही कउनो मनई क महत्व स भरा पद पइ बइठावत ह।
    अउर कउनो क महत्वहीन पद पइ उहइ बइठावत ह।
⁸परमेस्सर क पिआला मिलावटी मधु स भरा बाटइ।
    परमेस्सर दण्ड क इ दाखरस क उड़ेरत ह।
अउर दुट्ठ जन ओका
    आखिरी बूँद तलक पिअत हीं।
⁹मइँ इ बातन क घोसना करब जउन परमेस्सर सदा बरे करत ह।
    मइँ इस्राएल क परमेस्सर क महिमा क गुण गाउब।
¹⁰परमेस्सर कहत ह, “मइँ दुट्ठ लोगन क सक्ती क हटाइ देब।
    किन्तु सबइ नीक लोगन क सम्मान सक्ती स कीन्ह जाइ।”

संगीत निर्देसक बरे आसाफ क एक ठु भजन, तार वाद्यन क जरिये गवा भवा एक ठु गीत।

¹यहूदा क लोग परमेस्सर क जानत हीं।
    इस्राएल जानत ह कि फुरइ परमेस्सर क नाउँ बड़का अहइ।
²परमेस्सर क मन्दिर सालेम मँ बना अहइ।
    परमेस्सर क घर सिय्योन क पहाड़े पइ अहइ।
³उ जगह पइ परमेस्सर बारत भवा बाणन, ढालन, तरवारन
    अउ जुद्ध क दूसर सस्त्रन क तोड़ दिहस। (सेला)

⁴हे परमेस्सर, तू प्रकास क संग चमकत ह।
    तू जंगली पहाड़रन स जियादा प्रताप वाला अहइ।
⁵ओन सिपाहियन सोचेन कि उ पचे बरिआर अहइँ।
    मुला उ पचे अब रणछेत्रन मँ मरा पड़ा अहइँ।
    ओनकर ल्हासन क लूट लीन्ह ग ह अउर नंगा पड़ा अहइँ।
    ओन बलवान सिपाहियन मँ कउनो अइसा नाहीं रहा, जउन खुद आपन क रच्छा कइ पावत।
⁶याकूब क परमेस्सर ओन फउजियन पइ फटकारेस।
    अउ उ फउज रथन अउर घोड़न सहित असहा मर गइ।
⁷हे परमेस्सर, तू अद्भुत अहा।
    जब तू कोहाइ जात ह तोहरे समन्वा कउनो मनई टिक नाहीं सकत।
⁸जब परमेस्सर सरग स निआउ किहस
    तउ सारी धरती डर स काँप गइ।
⁹जब परमेस्सर निआवाधीस क रूप मँ
    धरती क विनम्र लोगन क बचावइ बरे करवाई किहस तब इ भवा।
¹⁰हे परमेस्सर, लोगन क उ समइ भी तोहार स्तुति करइ चाही जब उ पचे किरोध मँ होइ।
    जब उ पचे किरोध करइ बंद कइ देइँ तउ उ पचे बरिआर होइ जाइँ।

¹¹योहवा आपन परमेस्सर क संग वाचा करा
    अउर जउन वाचा किहा ओका पूरा करा।
लोग हर कउनो ठउर स लोग परमेस्सर क भेंट लिअइहीं
    जउन सम्मान क जोग्य अहइँ।
¹²परमेस्सर महान नेतन क डरावत ह।
    धरती क सबहिं सासक लोग ओकर रुतबा माना।

यसायाह 23

लबानोन क परमेस्सर क सँदेसा

23 सोर क बारे मँ दुःखद सँदेसा:

हे तर्सीस क जहाजो, दुःख मनावा। तोहार बंदरगाह उजाड़ दीन्ह गवा ह।
एन जहाजन पइ जउन लोग रहेन, ओनका इ समाचार उ समय बतावा ग रहा
जब उ पचे कित्तियन क देस मँ आपन राहे जात रहेन।

²हे सागरे क निचके बसइया लोगो, रूका अउर सोक मनावा!
    हे, सीदोन क सौदागरो सोक मनावा, सीदोन तोहरे सँदेसावाहक समुद्दर पर जावा करत रहेन।
    ओ लोग तोहका धन दौलत स भरि दिहेन।
³उ सबइ लोग अनाजे क तलास मँ समुद्दर मँ जात्रा करत रहेन।
    सोर क उ सबइ लोग नील नदी क आस पास जउन अनाज पैदा होत रहा, ओका मोल लइ लेत रहा करत रहेन
    अउर फुन उ अनाज क दूसर देसन मँ बेचा करत रहेन।

⁴हे सीदोन, तोहका सर्म आवइ चाही।
    काहेकि अब सागर अउर सागर क किला कहत ह:
मइँ सन्तान रहित हउँ।
    मोका जच्चा क बेदना क गियान नाहीं अहइ।
मइँ कउनो बच्चे क जनम नाहीं दिहेउँ।
    मइँ युवती व युवक क पालिके बड़ा नाहीं किहेउँ।

⁵मिस्र सोर क खबर सुनी
    अउर इ खबर मिस्र क दुःख देइ।
⁶तोहार जलयान तर्सीस क लउटि जाइ चाही।
    हे सागरतट वासियो! दुःखे मँ बूड़ जा।
⁷बीते दिनन मँ, तू पचे सोर क महिमा स आनन्द लिहा।
    इ नगरी सुरू स ही विकसित होत रही, उ नगर क लोग नगरन स कहूँ दूर बसइ बरे जात्र किहेन।
⁸सोर क नगर बहोत सारे नेता पैदा किहेस।
    हुवाँ क बइपारी राजपूतन क समान होत हीं
अउर उ सबइ लोग वस्तुअन खरीदत अउ बेचत हीं।
    उ पचे हर कहूँ आदर पावत हीं, तउ कउन सोर क खिलाफ जोजनन रचेस ह।
⁹हाँ, सर्वसक्तीमान यहोवा उ सबइ जोजना बनाए रहा।
    उहइ ही ओनका महत्व स पूर्ण न बनावइ क निहचय किहे रहा।
¹⁰हे तर्सीस क जहाजो तू पचे अपने देस क लउटि जा।
    तू पचे सागरे क अइसे पार करा जइसे उ नान्ह स नदी होइ।
    कउनो भी मनई अब तू सबन्क नाहीं रोकी।
¹¹यहोवा आपन हाथ सागर क ऊपर फइलाएस ह
    अउर राज्जन क कँपाइ दिहस।
यहोवा कनान देस क बारे मँ आदेस दइ दिहस
    कि ओकरे गढ़ियन क नस्ट कइ दीन्ह जाइ।
¹²यहोवा कहत ह, “हे! सीदोन क कुँवारी बिटिया, तोहका बर्बाद कीन्ह जाइ।
    अब तू अउर जियादा आनन्द न मनाइ पाई।”
किन्तु सोर क निवासी कहत हीं, “हमका कित्तीम बचाई।”
    किन्तु अगर तू सागरे क पार कइके कित्तीम जा हुवाँ भी तू चैन क ठउर न पउब्या।
¹³एह बरे सोर क निवासी कहा करत हीं,
    “बाबुल क लोग हम क बचइहीं।”
किन्तु तू बाबुल क लोगन क धरती पइ लखा।
    एक देस क रूप मँ आजु बाबुल क कउनो अस्तित्व नाहीं अहइ।
बाबुल क ऊपर अस्सूर चढ़ाई किहस
    अउर ओकरे चारिहुँ ओर बुर्जियन बनाएस।
फउजियन सुन्नर घरन क सब धन लूट लिहन।
    अस्सूर बाबुल क जँगली पसुअन क घर बनाइ लिहस।
    उ पचे बाबुल क खण्डहरन मँ बदल दिहन।
¹⁴तउ तर्सीस क जलयानो तू पचे बिलाप करा।
    तोहार सबन्क सुरच्छा ठउर (सोर) बर्बाद होइ जाइ।

¹⁵सत्तर बरिस तलक लोग सोर क बिसरि जइहीं। (इ समय, कउनो राजा क सासनकाल क बराबर समय माना जात रहा।) सत्तर बरिस क पाछे, सोर एक रण्डी क नाई होइ जाइ। इ गीत मँ:

¹⁶हे रण्डी! जेका मनसेधूअन बिसराइ दिहन।
    तू आपन वीणा उठावा अउर इ नगर मँ घूमा।
तू आपन गीत क अच्छी तरह बजावा,
    तू अक्सत आपन गीत गावा करा।
    तबहिं तोहका लोग फुन स याद करिहीं।

¹⁷सत्तर बरिस क पाछे, परमेस्सर सोर क समस्या पइ विचार करब। सोर फुन आपन मज़दूरी एक रण्डी क नाई धरती क सबहिं रास्ट्रन क संग बइपार कइके प्राप्त करइ लागी। ¹⁸किन्तु सोर जउने धन क कमाई ओका रख नाहीं पाई। सोर उ लाभ क जउन उ बइपार मँ कमाएस ह, यहोवा बरे सुरच्छित रहीं। सोर ओका ओन लोगन क देइ जउन यहोवा क सेवा करत अहा। एह बरे यहोवा क सेवक भर पेट खइया क खइहीं अउर नीक ओढ़ना पहिरहीं।

1 यूहन्ना 1

1 इ दुनिया क सुरुआत स रहा: हम एका सुने अही अपनी आंखन स देखे अही अउर बहुत धियान स निहारे, एका अपने हाथन स खुदइ छुए अही। हम उ बचन (मसीह) क बावत बतावत अही जउन जीवन अहइ। ²उही जीवन क ज्ञान हमका करावा गवा। हम ओका देखे अही। हम ओकर साच्छी अही अउर अब हम तोहका पचे क उही अनन्त जीवन क घोसणा करत अही जउन परमपिता क साथे रहा अउर जेकर जानकारी हमका कराई गइ। ³हम ओका देखे अउर सुने अही। अब तोहका उही क उपदेस देत अही जइसेन कि तू हमार साथी रहा। हमार इ साथ परमपिता अउर ओनकइ पूत ईसू मसीह क साथे अहइ। ⁴हम इ सब बात तोहरे बरे इ कारण स लिखत अही जइसेन कि तोहार आनन्द पूरा होइ जाइ।

परमेस्सर हमरे पापन क छमा करत ह

⁵हम ईसू मसीह स जउन सुसमाचार सुने अही, उही क हम तोहका सुनावत अही, परमेस्सर ज्योति अहइ अउर ओहमा तनिकउ अँधेरा नाहीं अहइ। ⁶जदि हम कही कि ओके सहित हमार सहभागिता अहइ, अउर पाप क अँधियारे स भरा जीवन जिअत रही तउ हम झूठ बोलत अही अउर सच्चाई प आचरण नाहीं करत अही। ⁷मुला जदि हम ज्योति मँ आगे बढ़ित अही काहेकि ज्याति मँ परमेस्सर अहइ, अउर एक दुसरे क सहभागी अही। अउर परमेस्सर क पूत ईसू क लहू स हमार सब पापन क सुद्ध कइ देत ह।

⁸जदि हम कहित ह कि हमरे मँ कउनो पाप नाहीं अहइ तउ हम खुदइ अपने आपका ठगत अही अउर हमसे परमेस्सर क सत्य नाहीं अहइ। ⁹जदि हम आपन पाप क मान लेइत ह तउ हमरे पापन क परमेस्सर छमा कइ देत ह, परमेस्सर बिसवासनीय अहइ, अउर उ जउन करत ह उ उचित अहइ। अउर उ हमरे गलत कामन स सुद्ध कर देत ह। ¹⁰अगर हम कहित ह कि हम कउनो पाप नाहीं करे अही तउ हम परमेस्सर क झूठा बतावत अही अउर ओकर उपदेस हमरे मँ नाहीं अहइँ।

Awadhi Bible: Easy-to-Read Version (ERV-AWA)