M’Cheyne Bible Reading Plan
फसह त्यौहार
9 यहोवा मूसा स सीनै रेगिस्तान मँ कहेस। उ टेमॅ दूसर बरिस क पहिला महीना रहा। जब इस्राएल क मनइयन मिस्र स निकरा रहेन। यहोवा मूसा स कहेस, 2 “लोगन क तय कीन्ह गवा टेमॅ पइ फसह क दावत जरूर मनावइ चाही। 3 उ तय कीन्ह गवा समइ इ महीना क चउदहवाँ दिन अहइ। ओनका गोधूरि क टेमॅ फसह क भोजन खाइ चाही। ओका इ सबइ कानून अउ नेम क पालन करइ चाही जेका त्यौहार मँ कीन्ह जात ह।”
4 एह बरे मोसा इस्राएल क लोगन क फसह क त्यौहार मनावई बरे कहेस। 5 अउर लोग पहिला महीन क चउदहवाँ दिन वइसा ही किहेन। इस्राएल क मनइयन हर एक काम वइसन किहेन जइसा यहोवा मूसा क हुकुम दिहे रहेन।
6 मुला कछू लोग फसह त्यौहार क भोज उ दिन नाहीं खाइ सकेन। उ पचे एक ल्हास क कारण सुद्ध नाहीं रहेन। एह बरे उ दिन उ पचे मूसा अउ हारून क लगे गएन। 7 उ पचे मूसा स कहेन, “हम पचे एक ल्हासे क छुअइ क कारण असुद्ध भवा अहेन। याजकन लोग तय कीन्ह ग टेमॅ प हमेका यहोवा क चढ़ावा देइ स रोक दिहस। तउ हम पचे इस्राएल क दूसर मनइयन क संग फसह त्यौहार नाहीं मनाइ सकित। हमका का करइ चाही?”
8 मूसा ओनसे कहेस, “मइँ यहोवा स पूछब कि उ एकरे बारे मँ का कहत ह।”
9 तब यहोवा मूसा स कहेस, 10 “इस्राएल क लोगन स इ बातन कहा: इ विधि तोहार अउर तोहारे सन्तानन बरे होब्या। इ होइ सकत ह कि तू ठीक टेमॅ प फसह त्यौहार न मनाइ सका काहे की तू या तोहरे सन्तानन क कउनो मनई ल्हास क छुइ जाइ क कारण असुद्ध होइ या होइ सकत ह कि उ कउनो लम्बी जात्रा प गवा भवा अहा।” 11 उ फसह त्यौहार दूसर महीना क चउदहवाँ दिन गोधूरि क समइ मनावइ। उ मेमना, बे खमीरे क रोटी अउ करुआ सागपात खाइ। 12 दूसर दिन क भिन्सारे तलक ओका ओहमाँ स कउनो भी भोजन नाहीं तजइ चाही। ओका भेड़ी क कउनो हाड़ क भी नाहीं तोड़इ चाही। उ मनई क फसह क नेमॅ क मानइ चाही। 13 कउनो भी व्यक्ति जउन पवित्तर अहइ अउर लम्बी जात्रा पइ नाहीं अहइ तउ फसह त्यौहार ठीक समइ पइ ही मनावइ चाही। जदि उ मनई फसह त्यौहार ठीक समइ पइ नाहीं मनावत ह तउ ओका आपन मनइयन स अलगइ पठइ दीन्ह जाइ। उ अपराधी बा काहे की उ यहोवा क ठीक टेमॅ प भेंट नाहीं चढ़ाएस। तउ ओका जरुर सजा दीन्ह जाइ चाही।
14 “तू सबइ क बीच बसइया गेर इस्राएली फसह त्यौहार मँ आवइ चाहइ तउ तोहरे संग हींसा लइ सकत ह। इ कनून मँ अहइ मुला उ मनई क फसह क सब नेमॅ मानइ चाही। उहइ नेमॅ सब बरे अहइँ।”
बादर अउ आगी
15 जउने दिन पवित्तर तम्बू अउ करार क तम्बू लगावा गवा। यहोवा क बादर ऍका घेरि लिहस। रात मँ, उ बादर आगी क नाईं देखाइ देत रहा। 16 बादर पवित्तर तम्बू प बराबर थमा रहा। अउर राति मँ बादर आगी क तरह देखाँत रहा। 17 जब बादर पवित्तर तम्बू प आपन ठउर स तम्बू प ठहरत रहा, इस्राएलियन ऍकर पाछा करत रहेन। जब बादर थमि जात रहा तब इस्राएल क लोग हुवँइ सिबिर डावत रहेन। 18 इहइ ढर्रा रहा कि यहोवा मनइयन क देखाएस कि कब जात्रा करइँ, कब रुकि जाइँ अउ कब सिबिर डावइँ। अउ जबहिं तबहिं बादर पवित्तर तम्बू क ऊपर ठहरि जात, लोग उहइ ठउर प सिबिर दसाए रहतेन। 19 कबहुँ कबहुँ बादर बहोत दिन तलक पवित्तर तम्बू प जमा रहत। इस्राएलियन यहोवा क हुकुम मनतेन अउ जात्रा नाहीं करत रहेन। 20 कबहुँ कबहुँ बादर पवित्तर तम्बू प कछू दिन बरे ठहरत रहत रहा यहोवा क हुकुम क अनुसार उ ठहरत अउ यहोवा क हुकुम क अनुसार उ चलत। 21 कबहुँ कबहुँ बादर रात मँ ठहरि जात अउ दूसर दिन भिन्सारे चलि पड़त। तउ मनइयन आपन चीजन क बटोरतेन अउ एकर पाछा करतेन। या अगर बादर एक दिन अउ एक रात ठहरत अउर तब इ चलि सुरू करत तउ मनइयन ओकर साथ चलि रहत। 22 जदि बादर तम्बू क ऊपर दुइ दिन, या एक महीना या एक बरिस ठउरत तउ लोग यहोवा क हुकुम मनतेन। उ पचे उहइ सिबिर मँ ठउरतेन अउ तब ताई न चलतेन जब तलक बादर न चलत। जब बादर आपन ठउर स उठत अउ चलत रहत तबहिं लोग चलतेन। 23 इ तरह लोग यहोवा क हुकुम क मनतेन। उ पचे हुवइँ सिबिर जमउतेन जहाँ यहोवा बतावत। उ पचे तब चलतेन जब यहोवा ओनका अइसा बतावत। लोग धियान स निहरतेन अउ यहोवा क हुकुम मूसा क जरिए मनतेन।
संगीत निर्देसक बरे “सोकन्नीम” राग क अनुसार कोरह परिवार क कलात्मक एक ठु पिरेम गीत।
1 सुन्नर सब्द मोरे मनवा मँ भरि जात हीं,
जब मइँ राजा बरे बातन लिखत हउँ।
मोरी जिभिया पइ सब्द अइसे आवइ लागत हीं
जइसे उ पचे कउनो कुसल लेखक क लेखनी स निकरत होइँ।
2 सबइ मनइयन मँ, तू अति सुन्नर अहइ।
तोहार मुँहे स कृपालु सब्द निकलत अहा।
एह बरे परमेस्सर तोहका सदा-सर्वदा आसीस देइ।
3 तू आपन तरवार क जोद्धन क कमर पइ बाँधा।
तू महिमा वाला वस्त्र धारण करा।
4 तू अद्भुत देखाँत अहा।
जा, धरम अउ निआउ क जुद्ध जीत ल्या।
अद्भुत करम क करइ बरे सक्ती स भरी दाहिनी भुजा क प्रयोग करा।
5 तोहार तीर तइयार अहइँ।
तू बहुतेरन क हराइ देब्या।
तू आपन दुस्मनन पइ हुकूमत करब्या।
6 हे परमेस्सर,[a] तोहार सिंहासन हमेसा रहब।
तोहार साही राजदण्ड अच्छाई तोहार राज्ज क मज़बूत बनावत ह।
7 तू नेकी स पिआर अउ बुराई स घिना करत अहा।
एह बरे सक्तीमान निआवाधीस,
तोहार परमेस्सर तोहका तोहार साथियन क ऊपर राजा चुनेस ह।
8 तोहार ओढ़ना महकत अहइँ जइसे गंध रस, अगर अउ तेज पात स मधुर गंध आवति होइ।
हाथी दाँत स जड़ा भवा राजमहलन स तोहका आनन्द मँ भरि देइ क मधुर संगीत क झंकार फइलति अहइँ।
9 राजा लोगन क बिटियन अइसा सेवा किहेन जइसा कि उ राजा क बिवाह मँ दुल्हन क सेविकन अहइँ।
तोहार महरानी ओपीर क सोना स बना मुकुट पहिरे तोहरे दाहिन कइँती विराजति अहइँ।
10 हे राजपुत्री, मोरी बात क सुना।
धियानदइके सुना, तबहिं तू मोरी बात क समझबू।
तू आपन निज लोगन अउर बाप क घराने क बिसरि जा।
11 राजा तोहरे सुन्दरता पइ मोहित अहइ।
इ तोहार नवा सुआमी होइ।
तोहका एकर सम्मान करब अहइ।
12 सूर सहर क लोग तोहरे बरे उपहार[b] लइ अइहीं।
अउर धनी मानी तोहसे मिलइ चइहीं।
13 उ राजकन्या उ मूल्यवान रत्न क नाई अहइ
जेका सुन्नर मूल्यवान सुवर्ण मँ जड़ा गवा होइ।
14 ओका रमणीक वस्त्र पहिराइके लिआवा गवा बाटइ।
ओकरी सखियन क भी जउन ओकरे पाछे अहइँ राजा क समन्वा लावा गवा।
15 उ पचे हिआँ उल्लास मँ आई अहइँ।
उ पचे आनन्द मँ मगन होइके राजमहल मँ प्रवेस करिहीं।
16 राजा, तोहरे पाछे तोहार पूत सासक होइहीं।
तू ओनका समूचे धरती क राजा बनउब्या।
17 मइँ तोहरे नाउँ क प्रचार जुग जुग तलक करब।
तू प्रसिद्ध होब्या, तोहरे जसे क गीतन क लोग सदा सदा ही गावत रइहीं।
मनसेधू क जरिये सुन्दरता क वर्णन
7 हे सज्जन अउरत, तोहार गोड़ पनहियन मँ केतॅना सुन्नर अहइँ!
तोहार जाँघन क गोलाइ कउनो कलाकार क बना गवा गहना क नाईं अहइँ
2 तोहार नाभी क नीचे क भाग गोल कटोरा क समान अहइँ।
होइ सकत ह एहमाँ कभी मिस्रित दाखरस कमी नाहीं होत।
तोहार पेट गोहूँ क ढेरी क समान अहइ
जेकर चउहददी लिलियन क अहइँ।
3 तोहार चूचियन दुई जवान हिरण क जइसा अहइ,
कुरंगी क जुड़वा।
4 तोहार गटइ हाथी दाँत क मीनार क समान अहइँ।
तोहार आँखिन हेसबोन क उ सबइ कुण्ड क समान अहइ
जउन बेत-रब्बीम क फाटक क लगे अहइ।
तोहार नाक लबानोन क मीनार क जइसा लम्बी अहइ
जउन दमिस्क कइँती मुहँ किहे अहइ।
5 तोहार मूँड़ कर्मेल क पहाड़ क जइसा अहइ।
तोहार मूँड़े क बार
राजा क देवारन पइ लहरत भवा
लम्बा वस्त्र क नाईं अहइ।
6 तू केतनी सुन्नर अउ मनमोहक अहा ओ मोर प्रिय!
तू मोका केतॅॅना आनन्द देति अहा।
7 तू खजूरे क बृच्छ जइसी
लम्बी अहा।
तोहार चूचियन अइसे अहइँ
जइसे खजूर क गुच्छन।
8 मइँ खजूर क बृच्छ पइ चढ़ब,
मइँ एकर डारन क धरब,
तू आपन चूचियन क अंगूरे क गुच्छन स बनइ द्या।
तोहार साँस क गंध सेब क जइसा होइ द्या।
9 तोहार मुँहना उत्तिम दाखरस जइसा होइ द्या,
जउन धीरे स मोर प्रियतम मँ बहत होइ,
जउन ओठंन तलक बहत होइ जब हम साथ सोवत ह।
मेहरारू क बचन मनसेधू क बरे
10 मइँ आपन प्रियतम क अहउँ
अउर उ मोका चाहत ह।
11 आवा, मोर प्रियतम, आवा!
हम खेतन मँ निकरी चली,
हम गाँवन मँ राति बिताइ।
12 हम बहोत हाली उठी अउर अंगूरे क बागन मँ निकरी जाइ।
आवा, हम हुआँ लखी का अगूंरे क बेलन पइ कलियन खिलति अहइँ।
आवा, हम लखी का बहारन खिल गइ अहइँ
अउर का अनार क कलियन चटकति अहइँ।
हुवँइ पइ मइँ आपन पिरेम तोहका अर्पण करबउँ।
याजक मलिकिसिदक
7 इ मलिकिसिदक सालेम क राजा रहा अउर सर्वोच्च परमेस्सर क याजक रहा। जब इब्राहीम राजा लोगन क पराजित कइके लउटत रहा त उ इब्राहीम स मिला अउर ओका आसीर्बाद दिहेस। 2 अउर इब्राहीम तउ ओका उ सब कछू मँ स जउन उ युद्ध मँ जीते रहा ओकर दसवाँ भाग प्रदान किहेस।
ओकरे नाउँ क पहिला अर्थ अहइ, “धार्मिकता क राजा” अउर फिन ओकर इ अर्थ अहइ, “सालेम क राजा” मतलब “सान्ति क राजा।” 3 ओकरे पिता या ओकरी महतारी अउर ओकरे पूर्वजन क कउनो इतिहास नाहीं मिलत ह। ओकर जन्म अउर मउत क कहुँ कउनउ उल्लेख नाहीं बा। परमेस्सर क पूत क समान ही उ हमेसा-हमेसा क बरे याजक बना रहत ह।
4 तनिक सोचा, उ केतॅना महान रहा। जेका कुल प्रमुख इब्राहीम तलक तउ अपने प्राप्ति क दसवाँ भाग दिहे रहा। 5 अब देखा व्यवस्था क अनुसार लेवी बंसज जउन याजक बनत हीं लोगन स मतलब अपनी ही भाइयन स दसवाँ भाग लेइँ। जद्यपि ओनकर उ सबइ भाई इब्राहीम क बंसज अहइँ। 6 फिन उ मलिकिसिदक जउन लेवीबंसी भी नाहीं रहा, इब्राहीम स दसवाँ भाग लिहेस। अउर उ इब्राहीम क आसीर्बाद दिहेस जेकरे लगे परमेस्सर क प्रतिज्ञा रही। 7 एहमाँ कउनउ संदेह नाहीं रहा कि जउन आसीर्बाद देत ह उ आसीर्बाद लेइवाला स बड़ा होत ह।
8 जहाँ तलक लेवियन क प्रस्न बा, ओहमाँ दसवाँ भाग ओन्हन मनइयन द्वारा एकट्ठा कीन्ह जात ह, जउन मरणसील हयेन मुला मलिकिसिदक क जहाँ तलुक प्रस्न बा दसवाँ भाग ओकरे दुवारा एकत्र कीहा जात ह, जउन पवित्तर सास्तर क अनुसार अबहुँ जिन्दा अहइँ। 9 तउ फिन कउनो इहाँ तलक कहि सकत ह कि उ लेवी जउ न दसवाँ भाग एकट्ठा करत ह, उ इब्राहीम क जरिये दसवाँ भाग प्रदान कइ दिहेस। 10 काहेकि जब मलिकिसिदक इब्राहीम स मिला रहा, तबउ लेवी अपने पर्वजन क सरीर मँ वर्तमान रहा।
11 अगर लेवी सम्बन्धी याजकता द्वारा पूर्णता पाइ जाइ सकत काहेकि इही क अधार प लोगन क व्यवस्था दीन्ह गवा रहा। त कउनो दुसर याजक क आवइ क जरूरत इ का रही? एक अइसेन याजक क जउन मलिकिसिदक क परम्परा क होइ, न कि हारून क परम्परा क। 12 काहेकि जब याजकता भी बदलत ह, तउ व्यवस्था मँ भी परिवर्तन होइ चाही। 13 जेकरे बिषय मँ इ सबइ बात कही गइ बाटिन, उ कउनो दुसरे गोत्र क अहइ, अउर ओह गोत्र क कउनो मनई कबहुँ वेदी क सेवक नाहीं रहा। 14 काहेकि इ तउ स्पस्ट इ बा कि हमार पर्भू यहूदा क बंसज रहा अउर मूसा तउ ओह-गोत्र क बरे याजकन क बारे मँ कछू नाहीं किहे रहा।
ईसू मलिकिसिदक क जइसनएक याजक हयेन
15 अउर जउन कछू हमहूँ कहे हई अउर उ स्पस्ट बा कि मलिकिसिदक क जइसेन एक दुसर याजक प्रकट होत ह। 16 उ आपन वंसावली क नियम क आधार प नाहीं बल्कि एक अनन्त जीवन क सक्ती क आधार प याजक बना अहइ। 17 काहेकि घोसित कीन्ह गवा रहा, “तू अहा एक याजक सास्वत मलिकिसिदक क जइसा।”(A)
18 पहिला नियम एह बरे रद्द कइ दीन्ह गवा काहेकि उ कमजोर अउर बेकार रहा। 19 काहेकि व्यवस्था तउ कउनो क सम्पूर्ण सिद्ध नाहीं किहेस अउर एक अच्छी आसा क सूत्रपात किन्ह गवा जेकरे द्वारा हम परमेस्सर क लगे खिंचित ह।
20 इ बात भी महत्वपूर्ण बा कि परमेस्सर तउ ईसू क सपथ क द्वारा महायाजक बनाए रहा। जबकि अउरन क बिना सपथ कउनो महायाजक बनावा गवा रहा। 21 मुला ईसू तब एक सपथ स याजक बना रहा, जब परमेस्सर तउ ओसे कहे रहा,
“पर्भू तउ लिहे अहइ सपथ
अउर उ कबहुँ नाहीं बदली निज मत
‘तू अह एक ठु याजक सास्वत।’” (B)
22 इ सपथ क कारण ईसू एक अउर अच्छा करार क जमानत बन गवा बा।
23 अब देखा। अइसेन बहुत स याजक हुआ कतत हीं जेन्हे मउत तउ अपने गोड़े प नाहीं बनइ रहइ दिहेस। 24 मुला काहेकि ईसू अमर अहइ, इही बरे ओकर याजकपन भी हमेसा-हमेसा बना रहइवाला अहइ। 25 अतः जउन लोग ओकरे द्वारा परमेस्सर तक पहुँच हीं, उ ओनकर हमेसा क बरे उद्धार करइ मँ समर्थ अहइ, काहेकि उ ओनकर मध्यस्थता क बरे ही हमेसा जिअत ह।
26 अइसेन ही महायाजक हमार जरूरतन क पूरा कइ सकत ह, जउन पवित्तर होइ, दोस रहित होइ, सुद्ध होइ, पापियन क प्रभाऊ स दूर रहत होइ, सरग से भी जेका ऊँचा उठावा गवा होइ। 27 जेकरे बरे दुसर याजकन क समान इ जरूरी न अहइ कि उ दिन प्रतिदिन पहिले अपने पापन क बरे अउर फिन लोगन क पापन क बरे बलिदान चढ़ावइ। उ तउ हमेसा-हमेसा क बरे ओनके पापन क बरे खुद अपने आप क बलिदान कइ दिहेस। 28 काहेकि व्यवस्था दुबर्ल लोगन क याजक क रूप मँ नियुक्त किहेस। मुला सपथ क बचन व्यवस्था क बाद आवा, उस बचन क द्वारा परमेस्सर बेटवा क महायाजक क रूप मँ नियुक्त किहेस जउन हमेसा हमेसा क बरे पूरा बनि गवा।
Awadhi Bible: Easy-to-Read Version. Copyright © 2005 Bible League International.