M’Cheyne Bible Reading Plan
पवित्तर तम्बू क समर्पण
7 जउने दिन मूसा पवित्तर तम्बू क लगाउब समापन किहेस, उ ऍका यहोवा क अर्पण किहस। मूसा तम्बू अउ एहमाँ प्रयोग मँ आवइवाली चीजन, अउर वेदी अउ एहमाँ प्रयोग आवइवाली चीजन अउर वेदी अउ एहमाँ प्रयोग आवइवाली चिजियन प खास तेल डाएस इ ओन सबइ चीजन क पवित्तर किहेस।
2 तब इस्राएल क नेता लोग भेंट चढ़ाएन। इ पचे आपन-आपन परिवारे क मुखिया रहे रहेन जउन आपन परिवार समूहन क नेता रहेन। इ नेता लोग मनइयन क गनेन। 3 इ सबइ नेता यहोवा बरे भेंट लइ आएन। उ पचे चारिहुँ ओर स ढँकी छ: ठु गाड़ी अउ बारह ठु बर्धा क लइ आएन। (हर एक नेता क जरिये एक ठु बर्धा दीन्ह गइ रही। अउर दुइ नेता क जरिये एक ठू गाड़ी दीन्ह गइ रही) नेता लोग पवित्तर तम्बू मँ यहोवा क इ चीजन क दिहेन।
4 यहोवा मूसा स कहेस, 5 “नेता लोग क इ चीजन क अंगीकार करा। इ चीजन क लेवि-बंस क मनइयन क द्या। इ ओनका मिलापवाला तम्बू प काम करइ मँ सहायक होइ।”
6 एह बरे मूसा चारिहुँ कइँती स ढकी भइ गाड़ियन अउ गइयन क लिहस। उ इ चीजन क लेवी-बंस क लोगन क दिहस। 7 उ दुइ गाड़ी अउ चार ठु गाइ गेर्सोन बंसी लोगन क दिहेस। ओनका आपन काम बरे ओन गाड़ियन अउ गइयन क जरुरत रही। 8 तब मूसा चार ठु गाड़ी अउ आठ ठु गइया मरारी बंस क मनइयन क दिहस। ओनका आपन काम बरे गाड़ी अउ गइयन क जरूरत रही। याजक हारून क पूत ईतामार इ सबहिं मनइयन क काम बरे जिम्मेदार रहा। 9 मूसा कोहात बंसी मनइयन क कउनो गाइ या कउनो गाड़ी नाहीं दिहस। इ मनइयन क पवित्तर चीजन आपन कॉधे प ढोउब रहा इहइ कारज ओनका करइ बरे सौंपा ग रहा।
10 जउन दिन मूसा वेदी प तेल डाएस, उहइ दिन नेता लोग वेदी क अर्पण बरे आपन भेंट चढ़ावइ बरे लइ आएन। उ पचे आपन भेंट वेदी क समन्वा यहोवा क भेंट किहन। 11 यहोवा पहिले स ही मूसा स कहे रहा, “हर दिन एक एक नेता वेदी प भेंट चढ़ावइ लइ जाइ।”
12-83 [a] बारहु-नेतन मँ स हर एक नेता आपन-आपन भेंट लइ आवा।
उ सबइ भेंट इ अहइँ: हर एक नेता चाँदी क एक ठु थाली लइ आवा जेकर वजन एक सौ तीस सेकेल अउर एक चाँदी क खोरा जेकर वजन सत्तर सेकेल रहा। इ दुइनउँ उपहार क पवित्तर स्थान क सेकेल क अनुसार भवा बटखरा स तउला गवा रहा। हर खोरा अउ हर थाली मँ तेल महीन आटा भरा रहा। इ अन्नबलि क रूप मँ प्रयोग मँ लइ जात रहा। हर नेता सोना क एक बड़का कलछुला भी लइ आवा जेकर वजन दस सेकेल रहा। इ कलछुला मँ धूप भरी रही।
हर नेता एक ठु बछवा, एक भेड़ा अउ एक बरिस क नर मेमना भी लइ आवा। इ गोरुअन होमबलि बरे रहेन। हर नेता पापबलि क रूप मँ बइपरइ बरे एक बोकरा भी लावा। हर नेता दुइ गाइ, पाँच भेड़ा, पाँच बोकरा अउ एक-एक बरिस क पाँच मेमना लिआवा। इ सबन क एक मलेबलि बरे बलि दीन्ह गइ।
पहिले दिन अम्मीनादाब क पूत नहसोन, जउन यहूदा क परिवार समूह स रहा, आपन भेंट लिआवा।
दूसर दिन सूआर क बेटवा नतनेल जउन इस्साकार क नेता रहा, आपन भेंट लिआवा।
तीसरे दिन हेलोन क बेटवा एलीआब जउन जबूलून क नेता रहा, आपन भेंट लिआवा।
चउथे दिन सदेऊर क पूत एलीसूर जउन रूबेनियन क नेता रहा, आपन भेंट लिआवा।
पँचए दिन सूरीसद्दै क पूत सलुनीएल जउन सिमोनियन क नेता रहा, आपन भेंट लिआवा।
छठऍ दिन दूएल क बेटा एल्यासाप जउन गादियन क नेता रहा, आपन भेंट लिआवा।
सतऍ दिन अम्मीहूद क बेटवा एलीसामा जउन एप्रैम क नेता रहा, आपन भेंट लिआवा।
अठऍ दिन पदासूर क पूत गम्लीएल जउन मनस्से क मनइयन क नेता रहा, आपन भेंट लिआवा।
नवें दिन गिदोनी क पूत अबीदान जउन बिन्यामीन क मनइयन क नेता रहा, आपन भेंट लिआवा।
दसऍ दिन अम्मीसद्दै क बेटवा अहीयाजर जउन दान क लोगन क नेता रहा, आपन भेंट लिआवा।
ग्यारहवें दिन ओक्रान क बेटवा पजीएल जउन आसेर क लोगन क नेता रहा, आपन भेंट लिआवा।
अउर फिन बारहवें दिन एनान क बेटवा अहीरा जउन नप्ताली मनइयन क नेता रहा, आपन भेंट लइके आवा।
84 इ तरह इ सबहिं चीजन इस्राएली मनइयन क नेता लोगन क भेंट रही। इ चीजन तब लाइ गइन जब मूसा खास तेल वेदी प एका अर्पण बरे डाएस। उ पचे बारह चाँदी क तस्तरी, बारह चाँदी क खोरा अउ बारह सोना क चम्मच लाएन। 85 चाँदी क हर तस्तरी क वजन लग भग एक सौ सेकेल रहा। अउर हरेक खोरा क चाँदी क वजन लगभग सत्तर सेकेल रहा। चाँदी क तस्तरियन अउ चाँदी क खोरन क कुल माना गवा वजन[b] दुइ हजार चार सौ सेकेल रहा। 86 धूप स लबालब सोना क चम्मच मँ स हर एक क माना गवा वजन चार औसं रहा। बारह सोने क चम्मचन क कुल वजन करीब करीब उ पौडं रहा।
87 होमबलि बरे गोरुअन क कुल गनती बारह बर्धा, बारह भेड़ा अउ बारह एक बरिस क भेड़ी क नर बच्चा रहेन। हुवाँ अन्नबलि भी रहा। यहोवा क पापबलि क रूप मँ प्रयोग मँ आवइ वाला कुल बारह बोकरा भी रहेन। 88 नेता लोग मेलबलि क रूप मँ प्रयोग अउ मारा जाइ बरे गोरुअन क दिहन। इ सबइ गोरुअन क एक साथ गनती चौबीस बर्धा, साठ भेड़ा, साठ बोकरा अउ साठ एक बरिस क भेड़ी क नर बच्चा भी रहेन। इ तरह उ पचे वेदी क इ चीजन अर्पण कई बरे भेंट किहेन। इ मूसा वेदी प खास तेल डाइ क पाछे भवा।
89 मूसा मिलापवाला तम्बू मँ यहोवा स बात करइ गवा। उ टेमॅ उ आपन स बात करत भइ यहोवा क वाणी सुनेस। उ वाणी करार क सन्दूखे क ऊपर क बिसेख ढकना क दुइनउँ करूब सरगदूतन क बगल स आवत रही। इ तरह परमेस्सर मूसा स बात किहस।
दूसर भाग
(भजन 42–72)
संगीत निर्देसक बरे कोरह परिवार क एक ठु मस्किल।
1 एक ठु पिआसा हिरन क नाईं जउन धार क पानी पिअइ क इच्छुक अहइ,
वइसे ही, हे परमेस्सर, मोर प्राण तोहरे इच्छा रखत हीं।
2 मोर प्राण जिअत परमेस्सर क पिआसा अहइ।
मइँ ओहसे मिलइ बरे कब आइ सकत हउँ?
3 राति अउ दिन मोर हर दिन क भोजन सिरिफ आँसू बाटइ।
मोर दुस्मन कहत हीं, “तोहार परमेस्सर कहाँ बा?”
4 तउ मोका इ सबइ बातन क सुमिरइ द्या।
मोका आपन हिरदइ बाहेर उड़ेरइ द्या।
मोका सुमिरन अहइ मइँ परमेस्सर क मन्दिर मँ चलेउँ अउ भिड़िया क अगुआई करत रहेउँ।
मोका सुमिरन अहइ उ लोगन क संग आनन्द स भरा बड़कई क गीत गाउब अउर उ उत्सव मनाउब।
5-6 मइँ ऍतना दुःखी काहे हउँ?
मइँ ऍतना बियाकुल काहे हउँ?
“मोका परमेस्सर क सहारे क बाट जोहइ चाही।
मोका अबहुँ ओकर स्तुति क अवसर मिली।
उ मोका बचाई।
हे मोरे परमेस्सर, मइँ बहोतइ दुःखी हउँ।
एह बरे मइँ यरदन नदी क स्रोत मँ, हर्मोन पहाड़ क आधार पइ छोटा पहाड़ी[a] मँ तोहार आराधना किहेउँ ह।”
7 जइसे नदी क लहरन आवत अउ गरजत ह मइँ झरना क कोलाहल करत भए सब्द सुनत हउँ।
वइसे ही मोका विपत्तियन बारम्बार घेरी रहिन।
हे यहोवा, तोहार लहरन एक क बाद दूसरा आवत ह,
मोर चारिहुँ कइँती घेरिके मोका दहबोच रखेन ह।
8 अगर हर दिन यहोवा बिस्ससनीय पिरेम देखाइ।
फुन तउ राति मँ मइँ ओकर गीत गाइ पाउब।
मइँ आपन सजीव परमेस्सर क पराथना कइ सकब।
9 मइँ आपन परमेस्सर, आपन चट्टान स बातन करत हउँ।
मइँ कहा करत हउँ, “हे यहोवा, तू मोका काहे बिसराइ दिहा?
ये यहोवा, तू मोका इ काहे नाहीं देखाँया कि मइँ आपन दुस्मनन स बचिके कइसे निकरउँ?”
10 मोर दुस्मनन मोका मारइ क जतन किहेन।
उ पचे मोहे पइ आपन घिना देखाँवत हीं जब उ पचे कहत हीं, “तोहार परमेस्सर कहाँ अहइ?”
11 मइँ ऍतना दुःखी काहे हउँ?
मइँ काहे ऍतना बियाकुल हउँ?
“मोका परमेस्सर क सहारे क बाट जोहइ चाही?
मोका अब भी ओकर स्तुति करइ क अवसर मिली।
उ मोका बचाइ।”
1 हे परमेस्सर, एक मनई अहइ जउन तोहार अनुसरण नाहीं करत।
उ मनई दुट्ठ अहइ अउ झूठ बोलत ह।
हे परमेस्सर, मोर मोकदमा लड़ा अउर इ निर्णय करा कि कउन सत्य बाटइ।
मोका उ मनई स बचाइ ल्या।
2 हे परमेस्सर, तू ही मोर सरणस्थल अहा!
मोका तू काहे बिसराइ दिहा?
तू मोका इ काहे नाहीं देखाँया
कि मइँ आपन दुस्मनन स कइसे बचिके निकरउँ?
3 हे परमेस्सर, तोहार जोति अउ सच्चाई क मोह पइ चमकइ द्या।
उ मोका तोहार पवित्तर पर्वत पइ तोहार आपन वास-स्थान जाइ मँ अगुवाइ करइ।
4 मइँ तउ परमेस्सर क वेदी क लगे जाब।
परमेस्सर मइँ तोहरे पास आउब।
उ मोका आनन्दित करत ह।
हे परमेस्सर, हे मेरे परमेस्सर, मइँ वीणा पइ तोहार स्तुति करब।
5 मइँ ऍतना दुःखी काहे हउँ?
मइँ काहे ऍतना बियाकुल हउँ?
“मोका परमेस्सर क सहारे क बाट जोहइ चाही।
मोका अब भी ओकर स्तुति क अवसर मिली।
उ मोका बचाई।”
मनसेधू क बचन
5 मोर बहिन, हे मोर दुलहिन, मइँ आपन बा़ग मँ प्रवेस कइ लिहउँ ह।
मइँ आपन गन्धरस क सुगन्धित मसाला बटोरेउँ ह।
मइँ आपन सहद क छत्ता क सहद समेत खाइ चुकेउँ ह;
मइँ आपन दाखरस अउ दुध पी चुकेउँ ह।
मेहररुअन क बचन प्रेमियन बरे
हे मीतो, खा, हे प्रेमियो, पिआ।
पिरेम स मस्त होइ जा।
मेहरारू क बचन
2 मइँ सोवत हउँ
किन्तु मोर दिमाग सपना मँ जागत रहा।
मइँ एक ध्वनि सुनेउँ!
मोर प्रियतम दुआरे पइ दस्तक देत रहा!
“मोरे बरे खोला, मोर बहिन, मोर प्रिये,
मोर फाख़ता, मोर निर्मल!
मोरे सिरे ओस स गीला होइ गवा ह,
मोर केस राति क नमी स भीगा अहइँ।” मेहरारु दबवा देत हीं:
3 मइँ आपन ओढ़ना उतार दिहेउँ ह।
मइँ एक फुन स पहिरइ चाहत हउँ।
मइँ आपन पाँच पखार चुकी हउँ,
फुन स मइँ एका मइला नाहीं करइ चाहत हउँ।
4 मोर प्रियतम किंवाड़ा क चाबी क छेद स हाथ डाएस,
अउर ओकरे बरे मोर प्रेम उमड़ पड़ेस।
5 मइँ आपन प्रियतम बरे दुआर खोलइ बरे उठिउँ।
मोरे हाथन स गन्धरस टपकत ह।
गन्धरस मोर अँगुरियन स
ताल क हत्थे पइ टपकत ह।
6 आपन प्रियतम बरे मइँ दुआर खोल दिहेउँ,
मुला मोर प्रियतम तब तलक जाइ चुका रहा।
जब उ चला गवा
तउ जइसे मोर प्राण निकरि गवा।
मइँ ओका हेरत फिरेउँ
मुला मइँ ओका नाहीं पाएउँ,
मइँ ओका गोहरावत फिरेउँ
किंतु उ मोका जवाब नाहीं दिहस।
7 नगर क पहरेदारन मोका पाएन।
उ पचे मोका मारेन
अउर मोका घायल किहेन।
नगर क परकोटे क पहरेदारन मोहसे
मोर चोगा लइ लिहन।
8 हे यरूसलेम क मेहररुअन, मइँ तू पचन्क आदेस देत हउँ।
अगर तू पचे मोर प्रियतम क पाइ जा तउ तू ओका का बताइ? बताइ द्या कि मइँ ओकरे पिरेम क रोगी हउँ।
यरूसलेम क बिटियन क ओकर जवाब
9 हमका कहा कि तोहार प्रियतम
अउरन स कइसे उत्तिम अहइ।
हे सबन त सुन्नर मेहररुअन, तोहार प्रिय अउरन स उत्तिम काहे अहइ?
तू हम पचन स इ बचन काहे करइ क कहेस?
यरूसलेम क बिटियन क ओकर जवाब
10 मारे प्रियतम तेजस्वी अउ मज़बूत अहइ।
उ दसियउँ हजार मनसेधुअन मँ एक अहइ।
11 ओकर माथा निखालिस सोना जइसा अहइ।
ओकर घुँघराला केस खजूर क गुच्छन क जइसा अहइ अउ कउअन जइसा करिया अहइँ।
12 ओकरी आँखिन जलधारा क किनारे बइठा फ़ाखतन नाईं अहइ।
ओकर आँखिन दूधे क तालाब मँ नहाए फ़ाखतन क जइसी अहइँ
अउर अइसी अहइँ जइसे सही तरीका स रतन जड़ होइँ।
13 ओकरे गाल बाग क नाईं अहइ
जउन गुल महेन्दी क पउधा क खुसबू स भार अहइ।
ओकर ओंठ लिलियन जइसेन अहइँ
जेनसे गंधरस टपकत ह।
14 ओकर बाँहन सोना क छड़न जइसी अहइँ
जेनमाँ हरितमणि जड़ा होइँ।
ओकर देह नक्कासी कीन्ह भवा हाथी दाँत अहइ
जेहमाँ नीलमनियन जड़ा होइँ।
15 ओकर जाँघन संगमरमर क खम्मन जइसी अहइँ
जेनका उत्तिम सुवर्ण पइ बइठावा गवा होइ।
ओकर ऊँचा कद लबनोन क देवदार जइसा अहइ
जउन देवदार बृच्छन मँ उत्तिम अहइ।
16 ओकर मुँह बहोत मीठा अहइ;
ओकर हर चीज चाहनेयोग्य अहइ।
हे यरूसलेम क मेहररुअन,
उ मोर प्रियतम अहइ!
उ मोर प्रेमी अहइ!
5 हर एक महायाजक मनइयन स ही चुना जात ह। अउर परमात्मा सम्बन्धी बिसयन मँ लोगन क प्रतिनिधित्व करइ क बरे नियुक्त कइ जात ह ताकि उ पापन क बरे भेंट य बलिदान चढ़ावइ। 2 काहेकि उ खुद भी कमजोरन क अधीन अहइ, इही बरे उ न समझन अउर भटकन भएन क साथे कोमल व्यवहार कइ सकत ह। 3 इह बरे ओका अपने पापन क बरे अउर वइसेन लोगन क पापन क बरे बलिदान चढ़ावइ पड़त ह।
4 एह सम्मान क कउनो अपने प नाहीं लेत। जइसेन कि हारून क समान परमेस्सर कइँती स ठहरावा न जात। 5 इही तरह मसीह तउ महायाजक बनइ क महिमा क खुद ग्रहण नाहीं किहेस बल्कि परमेस्सर तउ ओसे कहेस,
“तू अहा मोर पूत बना हउँ
आजु, मइँ तोहार पिता।” (A)
6 अउर एक उ स्थान प उहउ कहत ह,
7 ईसू तउ एह धरती पे क जीवन काल मँ जउन ओका मउत स बचाइ सकत ह, ऊँचे सुर मँ पुकारत भए अउर रोबत भए ओसे सबइ पराथना अउर सब बिनती किहे रहा अउर आदरपूर्ण समर्पण क कारण ओकर सुनी गइ। 8 जद्यपि उ ओकर बेटवा रह फिन भी जातना झेलत हुए उ आज्ञा क पालन करइ सीखेस। 9 अउर एक दाई सम्पूर्ण बनि जाइ प उ सब क बरे जउन ओकरी आज्ञा क पालन करत हीं उ अनन्त छुटकारा क स्रोत बनि गवा। 10 अउर परमेस्सर क जरिये मलिकिसिदक क परम्परा मँ ओका महायाजक बनावा गवा।
पतन क बिरूद्ध चेतावनी
11 एकरे बारे मँ हमारे लगे कहइ क बहुत कछू बा, प ओकर ब्याख्या कठिन बा काहेकि तोहार समझ बहुत धीमी बाटइ। 12 सही मँ एह समइ तलक तउ तोहे सबन क सिच्छा देइ वाला बनि जाइ चाही रहा। परन्तु तोहे पचन क तउ अबहिं कउनउ अइसेन मनई क जरूरत बा जउन तोहे सबन क नवा सिरे स परमेस्सर क उपदेस क आरम्भिक बात ही सिखावइ। तोहे सबन क तउ बस अबहिं दूध ही चाही ठोस आहार नाहीं। 13 जउन अबहीं दुध-मुँहा बच्चा ही अहइँ ओका धरम क बचन क पहिचान नाहीं होत।
14 मुला ठोस आहार तउ ओन बड़न क बरे होत ह जे अपने आत्मिक दृस्टि क प्रसिच्छन स भला-बुरा मँ पहिचान करब सीख लिहे अहइँ।
Awadhi Bible: Easy-to-Read Version. Copyright © 2005 Bible League International.