M’Cheyne Bible Reading Plan
कोहात परिवार क सेवा करब
4 यहोवा मूसा अउ हारून स कहेस: 2 “कोहात परिवार समूह क मनसेधुअन क गना। (कोहात परिवार समूह लेवी परिवार समूह क एक हींसा अहइ।) 3 तीस स पचास बरिस क उमर वाले मनइयन क गना जउन फउज मँ सेवा करइ सकत ह। इ मनइयन मिलापवाला तम्बू मँ कामकाज करिहीं।
4 “ओनकइ कामकाज सबन त जियादा पवित्तर ठउर क देखभाल करब अहइ।
5 “जब सिबिर नवा ठउर क जात्रा करइँ। हारून अउ ओनके पूतन क चाही कि उ पचे मिलापवाला तम्बू मँ जरूर जाइँ अउ पर्दा उतारइँ अउ करार क पवित्तर सन्दूखे क ढाँपइँ। 6 तब उ पचे इ सबन्क बढ़िया चाम स बना भवा ढकना स ढाँपि देइँ। तब उ पचे पवित्तर सन्दूखे प बिछा भवा खाल प एक ठु नीला ओढ़ना फइलइहीं अउ पवित्तर सन्दूखे प लगा भवा कड़ा मँ डंडा डइहीं।
7 “तब उ पचे एक ठु नीला ओढ़ना पवित्तर मेजी प फइलइहीं। तब उ सबइ ओह पइ थाली, चम्मच, खोरा अउ पयेबलि बरे गगरी धरिहीं। उ पचे खास रोटी ओकर ऊपर धरइ सकत ह। 8 तब तू पचे इ सबहिं चीजन प एक ठु लाल ओढ़ना डउब्या। तब हर एक चीज क बढ़िया चाम स ढाँपि द्या। तब मेज क छल्ला मँ डंडा डावा।
9 “तब डीबट अउ दिया क नीला ओढ़ना स ढकि द्या अउ साथ ही साथ दिया क गुल काटइवाला कैंची, गुल रखइवाला थाली अउर दिया बरे प्रयोग मँ आवइवाला तेल क मेटिया क ढकि द्या। 10 तब सबहिं चीजन क नीक चाम मँ लपटावा अउ ऍनका ढोवइ बरे प्रयोग मँ आवइवाला डंडन प ऍनका धरा।
11 “सुनहरी वेदी प एक नीला कपड़ा फइलावा। ओका नीक चाम स ढका। तब वेदी क ढोवइ बरे ओहमाँ लगा भवा छल्लन मँ डंडा डावा।
12 “पवित्तर ठउर मँ आराधना क प्रयोग मँ आवइवाली खास चीजन क एक साथे बटोरा। ऍनका एक संग बटोरा अउ ऍनका नीला ओढ़ना मँ बटोरा। तब ऍका बढ़िया चाम स ढका। इ चीजन क लइ जाइ बरे ऍनका एक ढाँचा प धरा जिस प इ लइ जाइ।
13 “काँसावाली वेदी स राख क झार द्या अउ ऍकरे ऊपर एक बैगनी रंग क ओढ़ना फइलावा। 14 तब वेदी प आराधना बरे प्रयोग मँ आवइवाली आगी क गोस्सी, काँटा, बेल्चा अउ खोरा आदी सब चीजन क बटोरा। इ चीजन्क काँसा क वेदी प धरा। तब वेदी क ऊपर नीक चाम क ओढ़ना फइलावा। वेदी मँ लगा कड़न मँ ऍका लइ जाइवाला डंडा डावा।
15 “जब हारून अउ ओकर पूत पवित्तर ठउर क सबहिं पवित्तर चीजन्क ढकना पूरा करि लेइँ तब कोहात परिवार क मनई अन्दर आइ सकत हीं अउर उ चीजन्क लइ जाब सुरु कइ सकत हीं। इ तरह उ पचे पवित्तर चीजन्क छुइहीं नाहीं। तउ उ पचे मरिहीं नाहीं।
16 “याजक हारून क पूत एलीआज़ार पवित्तर तम्बू बरे जिम्मेदार होइ। उ पवित्तर ठउर अउ ऍकर हर चीज बरे जिम्मेदार होइ। उ डीबट क तेल, महकउआ सुगन्धिवाली अगरबत्ती अउ हमेसा दीन्ह जाइवाली भेंट।”[a]
17 यहोवा मूसा अउ हारून स कहेस, 18 “होसियार रहा, इ कोहात बंसी मनइयन क लेवी मनसेधुअन क बीच स बरबाद जिन होइ द्या। 19 तोहका इ एह बरे करइ चाही कि कोहात बंसी महा पवित्तर ठउर ताई जाइँ अउ मरइँ नाहीं। हारून अउ ओकरे पूतन क अन्दर जाइ चाही अउ हरेक कोहात बंसी क बतावइ चाही कि उ का करइ। ओन पचन क हर एक मनई क चीज देइ चाही जउन ओका लइ जाइ क अहइ। 20 जदि तू अइसा नाहीं करत्या तउ कोहात बंसी अन्दर जाइ सकत हीं अउ पवित्तर चीजन क लखि सकत हीं। जदि उ पचे एक छिन बरे भी ओन पवित्तर चीजन कइँती निहारत हीं तउ ओनका मरइ क होइ।”
गेर्सोन परिवार क सेवा
21 यहोवा मूसा स कहेस, 22 “गेर्सोन परिवार क सबहिं मनइयन क गना। ओनकइ सूची परिवार अउ परिवार समूह क मुताबिक बनावा। 23 आपन सेवा क कर्तव्य कइ चुकइवालन तीस बरिस स पचास बरिस तक क मनसेधुअन जउन सबइ सेवा करइ बरे जाइ सकत ह क गना। इ सबइ लोग मिलापवाला तम्बू क देख-भाल करिहीं।
24 “गेर्सोनी परिवार क इहइ करइ चाही अउ इ चीजन क लइ चलइ चाही। 25 ऍनका पवित्तर तम्बू क पर्दा, मिलापवाला तम्बू, एकर ओढ़ावन अउ नीक चाम स बना ओढ़ावन लइ चलइ चाही। ओनका मिलापवाला तम्बू क दुआर क पर्दा भी लइ चलइ चाही। 26 ओनका अंगने क ओन पर्दन क भी जउन पवित्तर तम्बू अउ वेदी क चारिहुँ ओर लगा बाटेन, लइ चलइ चाही। ओनका आंगन क प्रवेस दुआर क पर्दा भी लइ चलइ चाही। ओनका सब लसुरी अउ पर्दा क संग प्रयोग मँ आवइवाली सबहिं चीजन क लइ चलइ चाही। गरसान बंस क मनई उ कउनो भी चीज बरे जिम्मेदार होइहीं जउन इ चीजन स कीन्ह जात हीं। 27 हारून अउ ओकर पूत इ सबहिं कामन क निगरानी करिहीं। गेर्सोनी बंस क मनई जउन कछू लइ जइहीं अउ जउन दूसर काम करिहीं ओकर पइ हारून अउ ओकर पूत नज़र राखिहीं। तोहका ओन लोगन क उ सबइ चीज सोंप देइ चाही जेनका ढोवइ बरे उ पचे जिम्मेदार होइहीं। 28 इहइ काम अहइ जेका गेर्सोन बंस क परिवार समूह क लोगन क मिलापवाला तम्बू बरे करइ क अहइ। हारून क पूत ईतामार याजक ओनके काम बरे जिम्मेदार होइ।”
मरारी परिवार क सेवा
29 “मरारी परिवार समूह क परिवार अउ परिवार समूहन क मनसेधुअन क गना। 30 तीस स पचास बरिस क सबहिं मनसेधुअन क जउन सेवा करइ बरे जाइ सकत ह क गना। उ पचे मनइयन मिलापवाला तम्बू बरे खास काम करिहीं। 31 जब तू जात्रा करब्या तब ओनकइ इ काम अहइ कि मिलापवाला तम्बू क फरेम (ढाँचा) लइ चला। ओनका पट्टी, खाभ्भा अउ आधार क लइ चलइ चाही। ओनका ओन तम्बू क खुँटियन क लइ चाही 32 अउर ओका आँगन क चारिहुँ कइँती क खम्भा, ओका खूँटियन क साथ, आधार अउ रस्सी क लइ चाही। सब नाउँ क सूची बनावा अउ हरेक मनई क बतावा कि ओका का का चीज लइ जाइ क अहइ। 33 इहइ बात अहइँ जेका मरारी बंस क लोग मिलापवाला तम्बू क कामे मँ सेवा बरे करिहीं। हारून क पूत ईतामार याजक ऍनके बरे जिम्मेदार होइ।”
लेवी बंस परिवार
34 मूसा, हारून अउ इस्राएल क मनइयन क अगुआ लोग कोहती-बंस क मनइयन क गनेन। उ पचे ऍनका परिवार अउ परिवार समूहन क मुताबिक गनेन। 35 उ पचे तीस स पचास बरिस क उमर क मनइयन क जउन सेवा करइ बरे जाइ सकत ह गनेन। इ पचन क मिलापवाला तम्बू बरे खास काम करइ बरे दीन्ह गएन।
36 कहात परिवार समूह मँ जउन इ काम करइ क जोग्गता रखत रहेन, 2,750 मनसेधू रहेन। 37 इ तरह कोहात परिवार क इ मनइयन क मिलापवाला तम्बू क खास काम करइ बरे जिम्मेदारी दीन्ह गएन। मूसा अउ हारून ऍका वइसा ही किहेन जइसा यहोवा मूसा स करइ क कहे रहा।
38 गेर्सोनी परिवार समूह क भी ओकर परिवारन अउ ओकर परिवार समूहन क अनुसार गना गवा। 39 तीस स पचास बरिस क उमर क सबहिं मनइयन क जउन सेवा करइ बरे जाइ सकतेन क गना गएन। इ मनइयन क मिलापवाला तम्बू मँ खास काम करइ क सेवा-काम दीन्ह गवा। 40 गेर्सोन परिवार समूह क परिवारन मँ जउन जोग्ग रहेन उ पचे 2,630 मनसेधू रहेन। 41 इ तरह इ मनसेधुअन क जउन गेर्सोन परिवार समूह क रहेन, मिलापवाला तम्बू मँ खास काम करइ क सेवा-काम सौंपा गवा। मूसा अउ हारून ऍका वइसा ही किहेन जइसा यहोवा मूसा क करइ क कहे रहा।
42 मरारी परिवार क परिवार अउ परिवार समूहन क भी गना गवा। 43 तीस स पचास बरिस क उमर क सबहिं मनसेधू जउन सेवा करइ बरे जाइ सकतेन क गना गएन। इ मनइयन क मिलापवाला तम्बू बरे खास काम करइ क सेवा-काम दीन्ह गवा। 44 मरारी परिवार समूह क परिवारन मँ जउन लोग जोग्ग रहेन, उ पचे 3,200 मनई रहेन। 45 इ तरह मरारी परिवार समूह क इ मनइयन क खास काम दीन्ह गवा। मूसा अउ हारून ऍका वइसा ही किहेन जइसा यहोवा मूसा स करइ क कहे रहा।
46 मूसा, हारून अउ इस्राएल क मनइयन क नेता लोग लेवी-बंस क सबहिं निअम्बर क गनेन। उ पचे हर एक परिवार अउ हर एक परिवार समूह क गनेन। 47 सब मनइयन जउन आपन सेवा कर्तव्य क निभाइ चुका रहेन अउर जउन तीस बरिस स पचास बरिस उमर क रहेन, गना गएन। इ मनइयन क मिलापवाला तम्बू बरे खास काम करइ क सेवा-काम दीन्ह गवा। उ पचे मिलापवाला तम्बू क चलइ क काम तब किहेन जब उ पचे जात्रा किहेन। 48 मनसेधुअन क सारी संख्या 8,580 रही। 49 यहोवा इ आदेस मूसा क दिहेन। हर एक मनई क आपन काम दीन्ह ग रहा। अउ हरेक मनसेधू स कहा गवा रहा कि ओका का का लइ चलइ चाही। एह बरे यहोवा जउन हुकुम दिहे रहा उ चीजन क पूरा कीन्ह गवा। सबहिं मनइयन क गना गवा।
दाऊद क समपिर्त।
1 हे यहोवा, जब तू किरोध मँ रहा तउ मोका फटकार जिन लगावा;
जब तू परेसानी मँ रहा मोका जिन सुधारा।
2 हे यहोवा, तू मोका चोट दिहा ह।
तोहार बाण मोहमाँ गहिर उतरा अहइँ।
3 तू मोका सजा दिहा ह अउर मोर पूरी देह दुःखत बाटइ,
मइँ पाप किहेउँ अउ तू मोका सजा दिहा।
एह बरे मोर हाड़ दुःखत अहइ।
4 मइँ बुरा काम करइ क अपराधी हउँ,
अउर उ अपराध एक बड़का बोझा क नाई मोरे काँधे पइ चढ़ा अहइ।
5 मइँ बना रहेउँ मूरख, अब मोर घाव दुर्गन्ध स भरिके रिसत अहइँ,
अउर उ सबइ सड़त अहइँ।
6 मइँ निहुरा अउ दबा भवा अहउँ।
मइँ दिन भइ उदास रहत हउँ।
7 बोखार स मोर गुर्दन दर्द करत ह,
अउर मोर समूचे बदन मँ बेमारी अहइ।
8 मइँ बहोत दुर्बल अउ थका भवा हउँ।
मइँ कराहत हउँ काहेकि मोर हिरदइ कस्ट झेलत अहइ।
9 हे यहोवा, तू मोर कराहब सुनि लिहा।
मोर आह तउ तोहसे छुपी नाहीं।
10 मोर हिरदइ चूर-चूर होइ गवा अहइ अउर मोर सक्ति मोका छोड़ दिहेस ह।
मोरी आँखिन क जोति लगभग जात रही।
11 काहेकि मइँ रोगी हउँ,
एह बरे मोरे मीत अउ मोर पड़ोसी मोसे मिलइ नाहीं अउतेन।
मोरे परिवार क लोग तउ मोरे लगे तलक नाहीं फटकतेन।
12 मोर दुस्मन मोर निन्दा करत हीं।
उ सबइ झूठ बातन अउ प्रतिवादन क फइलावत रहत हीं।
मोरे ही बारे मँ उ सबइ हरदम बातचीत करत रहत हीं।
13 मुला मइँ बहरा बना कछू नाहीं अनकत हउँ।
मइँ गूँगा होइ गवा, जउन कछू नाहीं बोल सकत।
14 मइँ उ मनई क तरह बना हउँ, जउन कछू नाहीं सुन सकत कि लोग ओकरे बारे मँ का कहत अहइँ।
अउर मइँ इ तर्क नाहीं दइ सकत अउर सिद्ध नाहीं कइ सकत कि मोर दुस्मन अपराधी अहइँ।
15 तउ, हे यहोवा, मोका तू ही बचाइ सकत ह।
मोर परमेस्सर अउर मोर सुआमी मोरे दुस्मनन क तू ही फुरइ बताइ द्या।
16 काहेकि मइँ पराथना किहेउँ, “ओनका दुर्जन स प्रसन्न होइ क अनुमति जिन द्या जब मइँ कउनो गलती किहेउँ।
ओनका आपन क बारे मँ सेखी हाँकइ क अनुमति जिन द्या।”
17 मइँ जानत हउँ कि मइँ आपन कुकरमन बरे पापी हउँ।
मइँ आपन पीरा क बिसरि नाहीं सकत हउँ।
18 हे यहोवा, मइँ तोहका आपन कुकरम बताइ दिहेउँ।
मइँ आपन पापन बरे दुःखी हउँ।
19 मोर दुस्मन जिअत अउ पूरी तरह तन्दुरुस्त अहइँ।
उ पचे बहोत-बहोत झूठी बातन बोलेन ह।
20 मोर दुस्मन मोरे संग बुरा बेउहार करत हीं,
जबकि मइँ ओनके बरे भला ही किहेउँ ह।
मइँ बस भला करइ क जतन करत रहेउँ,
मुला उ सबइ लोग मोरे खिलाफ होइ ग अहइँ।
21 हे यहोवा, मोका जिन बिसरा।
मोरे परमेस्सर, मोसे तू दूर जिन रहा।
22 देरी जिन करा, आवा अउर मोर सुधि ल्या।
हे मोर परमेस्सर मोका तू बचाइ ल्या।
2 मइँ सारोन क केसर क पाटल जइसा हउँ।
मइँ घाटियन क कोका बेली हउँ।
मनसेधू क बचन
2 हे मोर प्रिये, दूसर जुवतियन तुलना मँ
तू वइसी ही अहा माना काँटन क झारी क बीच लिली अहा।
मेहरारू क बचन
3 मोर प्रिय, दूसर नउजवानन क बीच तू अइसे लागत अहा
जइसे जंगले क बृच्छन मँ कउनो सेब क पेड़।
मेहरारू क बचन मेहररूअन बरे
मोका आपन प्रियतम क छाया मँ बइठब नीक लागत ह;
ओकर फल मोका खाइ मँ बहोत मीठ लागत ह।
4 मोर प्रिय मोका मधुसाला मँ लइ आवा
अउर मोका आपन पिरेम क बारे मँ एक झण्डा क नाईं लहराइके स्पस्ट किह्या।
5 मइँ पिरेम क रोगी हउँ एह बरे किसमिस स मोका मज़बूत बनावा
अउर मीठा सेबन स मोका ताजा करा।
6 ओकरे बाँया हाथ मोर मुड़ि क पिआर स छुअत हीं,
अउर ओकर दाहिन हाथ सरीर क पिआर स छुअत हीं।
7 यरूसलेम क कुँवरियन कुरंगन अउ जंगली हिरनियन क साच्छी मानिके मोका बचन द्या,
पिरेम क जिन जगावा
अउ उसकावा जब तलक एकर इच्छा न होइ![a]
मेहरारू क बचन
8 मइँ आपन प्रियतम क अवाज अनकत हउँ।
इ पहाड़न स उछरत भइ
अउर पहाड़ियन स कूदत भइ आवत ह।
9 मोर प्रियतम कुरंग या जवान हरिन जइसा सुन्नर अहइ।
लखा, उ हमरी देवारे क पीछे खड़ा अहइ,
खिरकी स लखत अहइ, पर्दा क छेद स झाँकत अहइ।
10 मोर प्रियतम मोसे बोलत ह:
“हे मोर प्रिये, उठा, हे मोर सुन्नरी,
आवा कहूँ चली।
11 लखा, सीत-रितु बीत गइ अहइ।
बर्खा खतम होइ गइ अउ चली गइ अहइ।
12 धरती पइ फूल खिले भए अहइँ।
चिरइयन क गावइ क समइ आइ ग अहइ।
धरती पइ कबूतरे क अवाज गूँजत अहइ।
13 अंजीर क बृच्छन पइ अंजीर, पकइ लागेन हँ।
अंगूरे क बेल फूलत अहइँ अउर ओनकर भीती गन्ध फइलत अहइ।
मोर प्रिय उठा, हे मोर सुन्नर,
आवा कहूँ दूर चली।”
मनसेधू क बचन
14 हे मोर कबूतर, जउन ऊँच चट्टानन क सबइ गुफा मँ अउर पहाड़न मँ लुकान अहा,
मोका आपन मुँह देखावा
मोका आपन आवाज सुनावा काहेकि तोहार आवाज मीठ
अउ तोहार मुँह सुन्नर अहइ।
मेहरारू क बचन मेहररूअन बरे
15 जउन नान्ह लोखरियन दाख क बगियन क बिगाड़त ही
हमरे बरे ओनका धरा।
हमार अंगूर क बगियन अब फूलत अहइँ।
16 मोर प्रिय मोर अहइ
अउर मइँ ओकर हउँ।
मोर प्रिय आपन भेड़ी बोकरियन क
कोकाबेलियन क बीच चरावत ह,
17 हे प्रियतम, कुरंग स या जवान हरिन स रहा,
जब तलक दिन नाहीं ढल जात ह
अउर छाया लम्बी अउर खतम नाहीं होइ जात ह
पहाड़न पइ चला।
सावधान रहइ क चेतावनी
2 एह बरे हमका अउर जियादा सावधानी क साथे, जउन कछू सुने अही, ओह प धियान देइ चाही ताकि हम भटकइ न पाइ। 2 काहेकि अगर सरगदूतन द्वारा दीन्ह गवा उपदेस सत्य होत ह अउर ओकरे हर एक उल्लंघन अउर अवज्ञा क बरे उचित सजा दीन्ह गवा तउन अगर हम अइसेन महान उद्धार क अपेच्छा कइ देत अही तउ हम दण्ड स कइसे बची। 3 एह उद्धार क पहिली घोसना पर्भू क जरिये की गइ रही। अउर फिन जे एका सुने रहेन, उ हमरे बरे एकर पुस्टि किहेस। 4 परमेस्सर तउ अचरजन, अद्भुत चिन्हन तरह-तरह क अद्भुत कारजन उ पवित्तर आतिमा क उन उपहारन द्वारा जउन ओकर इच्छा क अनुसार बाँटा गवा रहा, एका प्रमाणित किहेस।
उद्धारकर्ता मसीह क मानुस देह धारण
5 ओह भावी संसार क, जेकर हम चरचा करत अही उ सरगदूतन क अधीन नाहीं किहेस, 6 बल्कि पवित्तर सास्तरन मँ कउनउ स्थान पर कउनो इ साच्छी दिहे अहइः
“परमेस्सर का बा मनई जउन
तू ओकर सुध लेत अहा?
का अहइ हर मनई क पूत
जेकर बरे अहा चितिंत तू?
7 तू सरगदूतन स किंचित ओका कम कीहा
तनिक स समइ क रख दिहा ओका सिर महिमा अउर सम्मान क राजमुकुट
8 अउर ओकरे चरनन तरे ओकरे अधीनता मँ रख दिहा सभन कछू।” (A)
सब कछू क ओकरे अधीन रखत भए परमेस्सर तउ कछू भी अइसेन नाही छोड़ेस जउन्न ओकरे अधीन न होइ। फिन भी आजकाल हम हर एक चीज क ओकरे अधीन नाहीं देखत हई। 9 मुला हम इ देखित हई कि उ ईसू जेका तनिक समइ क बरे सरगदूतन स नीचे कइ दीन्ह गवा रहा, अब ओका महिमा अउर सम्मान क मुकुट पहिनावा गवा बा काहेकि उ मउत क यातना झेले रहा। जे परमेस्सर क अनुग्रह क कारण उ हर एक लोग क बरे मउत क अनुभव किहेस।
10 परमेस्सर एक ही बाटइ जउन सबहिं चीजन क बनएस। अउर सबहिं चीजन ओकरी महिमा बरे अहइँ। कइयउ बेटवन क महिमा प्रदान करत भवा उ परमेस्सर क बरे जेकर द्वारा अउर जेकरे बरे सब क अस्तित्व बना भवा बा, तउ उ ईसू क पूर्ण बनाएस। ओकरे बेटवन क इ सोभा देत ह कि उ ओनके छुटकारा क विधाता क जातनन क द्वारा पूरा सिद्ध करइ।
11 उ दुइनउँ ही-उ (ईसू) जउन मनई क पवित्तर बनावत ह अउर उ पचे जउन पवित्र बनावा जात हीं, एक्कई परिवार क अहइँ। इहीं बरे उ (ईसू) ओन्हन क भाइयन तथा बहिनियन कहइ मँ लज्जा नाहीं करत ह। 12 ईसू कहेस,
“आपन भाइयन मँ नाउँ क उद्घोस तोहरे मइँ करबइ
सभा क बीच सबके सामने प्रसंसा गीत तोहरे गउबइ मइँ।” (B)
13 अउर फिन,
“मइँ ओकर बिसवास करबइ।” (C)
अउर फिन उ कहत ह:
“मइँ इहाँ हउँ, अउर उ पचे सन्तान जउन हइन साथे मोरे हई दीन्ह जेनका मोरे परमेस्सर।” (D)
14 काहेकि संतान माँस अउर लहू स युक्त रही इही बरे ऊहउ ओनकइ इ मानुसता मँ सहभागी होइ गवा ताकि अपने मउत क जरिये उ ओका मतलब सइतान क खतम कइ सकइ जेकरे लगे मारइ का सक्ती बाटइ। 15 अउर ओन्हन क मुक्त कइ लेइ जेकर सम्पूर्ण जीवन मउत क बरे आपने भय क कारण दासता मँ बीता बा। 16 काहेकि उ निस्चित बा कि उ सरगदूतन नाहीं बल्कि इब्राहीम क बंसजन क सहायता भी करत अहइ। 17 इही बरे उ सब तरह स ओकरे भाइयन क जइसा बनावा गवा ताकि उ परमेस्सर क सेवा मँ दयालु अउर बिसवासी महाजायक बनि सकइ। अउर लोगन क ओनके पापन क छमा देवॉवइ क बरे बलि दइ सकइ। 18 काहेकि उॅ खुदइ ओह समइ, जब ओकर परीच्छा लीन्ह जात रही खूबइ जातना भोगे अहइ। इही बरे जेकर परीच्छा लीन्ह जात बाटइ उ ओकर सहायता करइ मँ समर्थ बा।
Awadhi Bible: Easy-to-Read Version. Copyright © 2005 Bible League International.