M’Cheyne Bible Reading Plan
हारून क याजकन परिवार
3 जउन समइ यहोवा सीनै पहाड़े प मूसा स बात किहस उहइ समइ क हारून अउ मूसा क परिवार क इतिहास इहइ अहइ।
2 हारून क चार पूत रहेन। नादाब पहिलौटा पूत रहा। ओकरे पाछे अबिहू, एलीआज़ार अउ ईतामार रहेन। 3 इ सबइ अभिसेक करा भवा याजकन रहेन। एनका याजकन क रूप मँ यहोवा क सेवा क खास काम सउँपा गवा रहा। 4 मुला नादाब अउ अबीहू यहोवा क सेवा करत टेमॅ प पाप करइ क कारण मर गएन। उ पचे यहोवा क भेंट चढ़ाएन, मुला उ पचे उ आगी क बइपरेन जेकरे बरे यहोवा हुकुम नाहीं दिहे रहेन। इ सीनै क रेगिस्तान मँ भवा। इ तरह नादाब अउ अबिहू हुवाँ मरि गएन। ओनके पूत नाहीं रहेन। एह बरे एलीआज़ार अउ ईतामार याजक बनेन अउर यहोवा क सेवा करइ लागेन। उ पचे उ टेमॅ करत रहेन जब ओनकइ बाप जिअत रहा।
लेवी बंस क याजकन क सहायक
5 यहोवा मूसा स कहेस, 6 “लेवी क परिवार समूह क सबहिं मनइयन क याजक हारून क अगवा लिआवा। उ पचे ओनका सेवा करइ हीं। 7 लेवी बंस क हारून क उ समइ मदद करिहीं जब उ मिलापवाला तम्बू मँ सेवा करी अउर लेवी बंसे क इस्राएल क सब मनइयन क उ टेमॅ मदद करिहीं जउने टेमॅ उ पचे पवित्तर तम्बू मँ आराधना करइ अइहीं। 8 इस्राएल क मनइयन मिलापवाला पवित्तर तम्बू क हर एक चीज क रच्छा करिहीं, इ ओनकइ कर्तव्य अहइ। मुला इ चीजन क देख-भाल कइके ही लेवी बंस क लोग इस्राएल क मनइयन क सेवा करिहीं। पवित्तर तम्बू मँ आराधना करइ क ओनका इहइ तरीका होइ।
9 “इस्राएल क सब मनइयन मँ स लेवी बंसे क मनई चुना गएन। इ पचे लेवी बंस क हारून अउ ओकरे पूतन क मदद बरे चुना ग रहेन।
10 “तू हारून अउ ओकरे पूतन क याजकन तइनात करब्या। उ पचे आपन फरज पूरा करिहीं अउ याजकन क रूप मँ सेवा करिहीं। कउनो दूसर मनई जउन निअरे आवइ क कोसिस करत ह मारि दीन्ह जाइ चाही।”[a]
11 यहोवा मूसा स इहइ कहेस, 12-13 “मइँ तोसे कहेउँ कि इस्राएल क हरेक परिवार आपन पहिलौटी क जन्मा पूत मोका देइ-मुला अब मइँ लेवी बंस क आपन सेवा बरे चुनत हउँ। उ पचे मोर होइहीं। एह बरे इस्राएल क सब मनइयन क दूसर सबहिं लोगन क आपन पहिलौटी क पूत मोका नाहीं देइ क होइ। जब तू मिस्र मँ रह्या, मइँ मिस्र क पहिलौटी क पइदा भवा लरिकन क मार डाए रहा। उ समइ मइँ इस्राएल क सबहिं पहिलौटी क गदेलन क अपने बरे लीन्ह। सबहिं पहिलौटी क पइदा भवा गदेलन अउ सबहिं पहिलौटी क जन्मा गोरु मोर अहइँ। मुला अब मइँ तोहरे पहिलौटी क जन्मा गदेलन क तोहका वापस करत अहउँ अउर लेवी बंसे क आपन बनावत हउँ। मइँ यहोवा अहउँ।”
14 यहोवा फुन सीनै क रेगिस्तान मँ मूसा स बात किहेस। यहोवा कहेस, 15 “लेवी बंस क सबहिं परिवार समूहन अउ परिवार समूह क गना। हरेक मनसेधू या गदेलन जउन एक महीना या ओसे जिआदा क होइँ ओनका गना।” 16 एह बरे मूसा यहोवा क आग्या मानसे। उ ओन सबहिं क गनेस।
17 लेवी क तीन पूत रहेन। ओनकइ नाउँ रहेन: गेर्सोन, कहात अउ मरारी।
18 हरेक पूत परिवार समूहन क प्रधान रहा।
गेर्सोन क परिवार समूहन रहेन लिब्नी अउ सिमी।
19 कहात क परिवार समूहन रहेन: अम्राम, यिसहार, हेब्रोन, उज्जीएल।
20 मरारी क परिवार समूहन रहेन: महली अउ मूसी।
उ सबइ उ कुल परिवार रहेन जउन लेवी क परिवार समूहन स जुड़ा रहेन।
21 लिब्नी अउ सिमियन क परिवार गेर्सोन क परिवार स जुड़ा रहेन। उ सबइ गेर्सोन बंस क परिवार समूहन क रहेन। 22 इ दुइनउँ परिवार समूहन मँ स एक महीना स जिआदा उमर क लरिकन या मनसेधू 7,500 रहेन। 23 गेर्सोन बंस क परिवार समूहन क पच्छिउँ मँ सिबिर डावइ क कहा गवा। उ पचे पवित्तर तम्बू[b] क पाछे आपन सिबिर लगाएन। 24 गेर्सोन बंस क परिवार समूहन क प्रधान लाएल क पूत एल्यासाप रहा। 25 मिलापवाला तम्बू मँ गेर्सोन बंस क लोग पवित्तर तम्बू, बाहरी तम्बू अउ पर्दन क देख-रेख क जिम्मेदार रहेन। उ पचे मिलापवाला तम्बू क प्रवेस दुआर क पर्दा क देख-भाल करत रहेन। 26 उ पचे आँगन क पर्दा क देख-रेख करत रहेन। इ पर्दा जउन पवित्तर तम्बू अउ वेदी क चारिहुँ कइँती फइला रहा। उ पचे रस्सी अउ पर्दा बरे काम मँ बइपरइ वाली हर एक चिजियन क देख-रेख करत रहेन।
27 अम्रामियन, यिसहारियन, हेब्रोनियन अउ उज्जीएल क परिवार कोहात क परिवार स जुड़ा रहेन। उ पचे कोहात बंसी परिवार समूहन क रहेन। 28 इ परिवार समूह मँ एक महीना या ओसे जिआदा उमर क गदेलन अउ मनसेधू 8,600 रहेन। कोहात बंस क मनइयन क पवित्तर ठउर क देख-रेख क काम सउँपा गवा। 29 कोहात बंस क परिवार समूहन क “पवित्तर तम्बू” क दक्खिन पहँटा दीन्ह गवा। इ उ पहँटा रहा जहाँ उ पचे सिबिर लगाएन। 30 कोहात बंस क परिवार समूहन क प्रधान उज्जीएल क पूत एलीसापान रहा। 31 ओनकइ काम पवित्तर सन्दूख, मेज, डीबट, वेदी अउ पवित्तर ठउर क कामे मँ आवइवाला सामान क देख-रेख करब रहा। उ पचे पर्दा अउ ओनके संग प्रयोग मँ आवइवाली सबहिं चीजन क देख-रेख करत रहेन।
32 लेवी बंस क नेता लोगन क मुखिया एलीआज़ार रहा। उ याजक हारून क पूत रहा। एलीआज़ार पवित्तर चीजन क देख-रेख करइवालन सबहिं मनइयन क कोतवाल रहा।
33-34 महली अउ मुसी परिवार समूहन मरारी परिवारे स जुड़ा रहा। एक महीना या ओसे जिआदा उमर क लरिकन अउ मनसेधू परिवार समूह मँ 6,200 रहेन। 35 मरारी समूह क नेता अबीहैल क पूत सूरीएल रहा। इ परिवार समूह क पवित्तर तम्बू क उत्तर क पहँटा दीन्ह ग रहा। इ उहइ पहँटा अहइ जहाँ उ पचे सिबिर लगाए रहेन। 36 मरारी लोगन क पवित्तर तम्बू क ढाँचा क देखभाल क काम सौपं दीन्ह गवा। उ पचे सबहिं छड़न, खंभन अउ आधार अउ पवित्तर तम्बू क ढाँचा मँ जउन कछू लगा रहा उ सब कछू क देख-भाल करत रहेन। 37 पवित्तर तम्बू क चारिहुँ कइँती आंगन क सबहिं खंभन क देखरेख करत रहेन। एहमाँ सबइ आधार, तम्बू क खूँटी अउ रस्सियन जुड़ी रहिन।
38 मूसा, हारून अउ ओकर लरिकन मिलापवाला तम्बू क समन्वा पवित्तर तम्बू क पूरब कइँती सिबिर लगाएन। उ पचन क पवित्तर ठउर क देख-भाल क काम दीन्ह गवा। उ पचे इस्राएल क सबहिं मनइयन बरे इ किहन। कउनो दूसर मनई जउन पवित्तर ठउर क निचके आवत, मार दीन्ह जाइ क रहा।
39 यहोवा लेवी परिवार समूह क एक महीना या ओसे जियादा उमर क गदेलन अउ मनसेधुअन क गनइ क हुकुम दिहस। सब गिनती 22,000 रही।
लेवी बंसी पहिलौउटी क लरिकन क जगह लेत हीं
40 यहोवा मूसा स कहेस, “इस्राएल मँ सब एक महीना या ओसे जियादा उमर क पहिला पइदा भवा लरिकन अउ मनसेधुअन क गना। ओनके नाउँ क एक अनुसार सूची बनावा। 41 अब मइँ इस्राएल क सबहिं पहिलौटी क पइदा भवा लरिकन अउ मनसेधुअन क नाहीं लेबा अब मइँ यानी यहोवा लेवी बंसियन क ही लेब। इस्राएल क दूसर सबहिं मनइयन क पहिलौटी क पइदा भवा जनावरन क लेइ क ठउर प अब मइँ लेवी बंस क मनइयन क पहिलौटी क जनावरन क ही लेब।”
42 इ तरह मूसा उ किहस जउन यहोवा हुकुम दिहस। मूसा इस्राएल क पहिलौटी क सतान क गनेस। 43 मूसा सबहिं पहिलौटी क पइदा भवा एक महीना या ओसे जियादा उमर क लरिकन अउ मनसेधुअन क सूची बनाएस। उ सूची मँ 22,273 नाउँ रहेन।
44 यहोवा मूसा स इ भी कहेस, 45 “मइँ यानी यहोवा इ हुकुम देत हउँ: ‘इस्राएल क दूसर परिवारन क पहिलौटी क पइदा भवा मनसेधुअन क जगह प लेवी बंस क मनइयन क ल्या। अउर मइँ दूसर मनइयन क जनावरन क ठउर प लेवी-बंस क जनावरन क लेब। लेवी बंसी मोरउ अहइँ। 46 लेवी-बंस क मनई 22,000 अहइँ अउर दूसर परिवारन क 22,273 पहिलौटी क पइदा भवा पूत अहइँ। इ तरह सिरिफ 273 पहिलौटी क पइदा पूत लेवी बंस क मनइयन स जियादा बाटेन। 47 दूइ सौ तेहत्तर पहिलौटी मनइयन मँ स हर एक बरे पाँच सेकेल चाँदी जमा करा। (पवित्तर स्थान क सेकेल क अनुसार एक सेकेल बीस गेरा होत ह) 48 उ चाँदी हारून अउ ओकरे पूतन क द्या। इ इस्राएल क 273 मनइयन बरे भुगतान अहइ।’”
49 मूसा 273 जियादा मनइयन बरे रूपिया बटोरेस। इ सबइ उ पचे 273 मनई अहइँ जेनकइ जगह लेवी बंस परिवार समूह नाहीं लइ सका। 50 मूसा इस्राएल क पहिलौटी क पइदा भवा मनइयन स चाँदी बटोरेस। उ 1,365 सेकेल चाँदी पवित्तर स्थान क सेकेल क अनुसार बटोरेस। 51 मूसा यहोवा क आग्या मानेस। मूसा यहोवा क आग्या क मुताबिक उ चाँदी हारून अउ ओकरे पूतन क दिहस।
दाऊद क समर्पित।
1 दुर्जन लोगन स जिन घबरा,
जउन बुरा करत हीं अइसे मनइयन स ईर्स्या जिन राखा।
2 दुर्जन मनई घास अउ हरियर पौधन क नाई हाली पिअराइ जात हीं
अउर मरि जात हीं।
3 अगर तू यहोवा पइ भरोसा रखब्या अउर भला काम करब्या तउ तू जिअत रहब्या
अउ ओन चिजियन क भोग करब्या जउन धरती देत ह।
4 यहोवा क सेवा मँ आनन्द लेत रहा,
अउर यहोवा तोहका तोहार मन चाहा देइ।
5 यहोवा क भरोसे रहा।
ओकर बिस्सास करा।
उ वइसा करी जइसा करइ चाही।
6 दुपहरिया क सूरज जइसा,
यहोवा तोहार नेकी अउ खरेपन क चमकावइ।
7 यहोवा पइ भरोसा धरा अउ ओकरे सहारे क बाट जोहा।
तू दुट्ठन क कामयाबी लखिके घबरावा जिन करा।
तू दुट्ठन क दुट्ठ जोजनन क कामयाब होत लखिके जिन घबरा।
8 तू किरोध जिन करा, तू उन्मादी जिन बना।
ओतना जिन घबराइ जा कि तू बुरा काम करइ चाहा।
9 काहेकि बुरे मनइयन क तउ नास कीन्ह जाइ।
मुला उ सबइ लोग जउन यहोवा पइ भरोसा रखत हीं, उ धरती क पइहीं जेका देइ क परमेस्सर वचन दिहेस ह।
10 तनिक समइ क पाछे कउनो दुर्जन नाहीं बच पाई।
हेरइ स भी तोहका कउनो दुट्ठ नाहीं मिली।
11 नम्र लोग उ धरती पइहीं जेका परमेस्सर देइ क वचन दिहेस ह।
उ सबइ सान्ति क आनन्द लेइहीं।
12 दुट्ठ लोग सज्जनन बरे कुचाल चलत हीं।
दुट्ठ जन सज्जनन क ऊपर दाँत पीसिके देखाँवत हीं कि उ पचे कोहान अहइँ।
13 मुला हमार सुआमी ओन दुर्जनन पइ हँसत ह।
उ ओन बातन क लखत ह जउन ओन पइ पड़इ क अहइ।
14 दुर्जन तउ आपन तरवार उठावत हीं अउर धनुस साधत हीं।
उ पचे दीन लोगन, बेसहारा लोगन क मारइ चाहत हीं।
उ सबइ सच्चे लोगन, सज्जन लोगन क मारइ चाहत हीं।
15 मुला ओनकर धनुस चूर चूर होइ जइहीं।
अउर ओनकर तरवारन ओनकर आपन ही हिरदय मँ उतरिहीं।
16 थोड़ा स भला मनई,
दुर्जनन क भीड़ स भी उत्तिम अहइँ।
17 काहेकि दुर्जनन क तउ नस्ट कीन्ह जाइ।
मुला भले मनइयन क यहोवा धियान रखत ह।
18 सुद्ध सज्जन लोगन क यहोवा ओनकइ जिन्नगी भइ बचावत ह।
ओनकर प्रतिफल सदा बना रही।
19 जबहिं संकट होइ,
सज्जन बरबाद नाहीं होइहीं।
जब अकाल पड़ी,
सज्जन लोगन क लगे खइया क भरपूर होइ।
20 मुला बुरा मनई यहोवा क दुस्मन होत रहत हीं।
तउ ओन बुरे लोगन क नस्ट कइ दीन्ह जाइ,
ओनकर सबइ घाटी झुराइ जइहीं अउर बर जइहीं।
ओनका तउ पूरी तरह स मेट दीन्ह जाई।
21 दुट्ठ तउ फउरन ही धन उधार माँग लेत ह, अउर ओका फुन कबहुँ नाहीं चुकावत।
मुला एक सज्जन अउरन क खुसी स देत रहत ह।
22 अगर कउनो सज्जन कउनो क आसीर्बाद देइ, तउ उ सबइ मनई उ धरती क जेका परमेस्सर देइ क वचन दिहस ह, पइहीं।
मुला अगर उ सराप देइ मनइयन क तउ उ सबइ नास होइ जइहीं।
23 यहोवा, सिपाही क होसियारी स चलइ मँ मदद करत ह।
अउर उ ओका पतन स बचाइ लेत ह।
24 फउजी अगर धावत भए दुस्मन पइ प्रहार करइँ, तउ ओकरे हाथे क यहोवा सहारा देत ह,
अउर ओका गिरइ स बचावत ह।
25 मइँ जुवक भवा रहेउँ पर अबहुँ मइँ बुढ़ाइ ग हउँ।
मइँ कबहुँ यहोवा क सज्जन लोगन क बेसहारा तजत भए नाहीं लखेउँ।
मइँ कबहुँ सज्जन लोगन क संतानन क भीख माँगत नाहीं लखेउँ।
26 सज्जन सदा मुक्त भाव स दान देत ह।
सज्जन लोगन क गदेलन वरदान होत हीं।
27 अगर तू कुकरमन स आपन मुँह मोड़ ल्या, अउर अगर तू नीक करमन क करत रहा,
तउ फिन तू सदा ही जिअत रहब्या।
28 यहोवा खरेपन स पिरेम करत ह,
उ आपन निज मनवइयन क बेसहारा नाहीं तजत।
यहोवा आपन निज मनवइयन क हमेसा रच्छा करत ह,
अउर उ दुट्ठ जन क नस्ट कइ देत ह।
29 सज्जन उ धरती क पइहीं जेका देइ क परमेस्सर वचन दिहस ह,
उ पचे ओहमाँ सदा सदा ही रहा करिहीं।
30 भला मनई तउ खरी सलाह देत ह।
ओकर निआउ सब क बरे निस्पच्छ होत ह।
31 सज्जन क हिरदय मँ यहोवा क उपदेस रहत हीं।
उ सोझ मारग पइ चलब नाहीं तजत।
32 मुला दुर्जन सज्जन क दुःख पहोंचावइ क रस्ता हेरत रहत ह, अउर दुर्जन सज्जन क मारइ क जतन करत हीं।
33 मुला यहोवा दुर्जनन क मुक्त नाहीं तजी।
उ सज्जन क अपराधी नाहीं ठहरइ देइ।
34 यहोवा क मदद क बाट जोहत रहा।
यहोवा क पाछे पाछे चलत रहा, दुर्जन नस्ट होइहीं।
यहोवा तोहका महत्वपूर्ण बनाई।
तू उ धरती पउब्या जेका देइ क यहोवा वचन दिहस ह।
35 मइँ दुट्ठ क बरिआर लखेउँ ह।
मइँ ओका मजबूत अउ तन्दुरुस्त बृच्छ क नाई सक्तीसाली लखेउँ।
36 मुला उ सबइ फुन मिट गएन।
मोरे हेरे पइ ओनकर पता तलक नाहीं मिला।
37 सच्चा अउ खरा बना,
काहेकि इहइ स सान्ति मिलत ह।
38 मुला जउन लोग व्यवस्था नेम तोड़त हीं
नस्ट कइ दीन्ह जइहीं।
39 यहोवा नेक मनइयन क रच्छा करत ह।
उ आपन किला मँ रहा जब विपत्तियन आइन।
40 यहोवा नेक लोगन क सहारा देत ह, अउर ओनकर रच्छा करत ह।
सज्जन यहोवा क सरण मँ आवत हीं अउर यहोवा ओनका दुर्जनन स बचाइ लेत ह।
1 सुलैमान क स्रेस्ठ गीत।
सस्प्रेमिका क आपन प्रेमी क खातिर
2 ओकरे ओंठन क चुम्बनन स मोका ढाँपि लेइ द्या।
तोहार पिरेम दाखरस स भी मीठा अहइ।
3 तोहार इत्र क सुगन्ध मोहक अहइ,
मुला तोहार नाउँ मोरे बरे मूल्यवान इत्र स भी जियादा मोहक अहइ!
इहइ कारण अहइ कि कुँवरियन तोहसे पिरेम करत हीं!
4 हे मोर राजा, तू मोका आपन संग लइ ल्या।
हाली चला!
राजा मोका आपन कमरा मँ लइ आवा ह।
मनसेधू क बरे यरूसलेम क मेहररूअन
हम तोहमाँ आनन्दित अउ मगन अही।
हम मानत अही कि तोहार पिरेम दाखरस स उत्तिम अहइ।
अच्छा कारण क बरे कुँवरियन तोहसे पिरेम करत हीं।
मेहरारु क बचन मेहररुअन बरे
5 हे यरूसलेम क बिटियो,
मइँ करिया हउँ, मुला मइँ सुन्नर हउँ। मइँ केदार क तम्बुअन जइसा अउ सलमोन[a] क तम्बूअन क पर्दा जइसे करिया हउँ।
6 किन्तु मोका करिया मँ सामिल जिन करा।
इ सूरज अहइ जउन मोका करिया कइ दिहस ह।
मोर भइयन एकर कारण अहइँ।
उ मोका आपन अंगूरे क बगीचन क रखवारी करइ बरे मज़बूर किहेन ह।
एह बरे मइँ आपन क धियान नाहीं रखि सकेउँ।
मेहरारू क बचन मनसेधू क बरे
7 मइँ तोहका आपन पूरी आतिमा स पिरेम करत हउँ।
मोर सच्चा पिरेमी, मोका बतावा कि तू आपन भेड़िन क कहाँ चरावत अहा?
दुपहरिया मँ ओनका आराम करइ बरे कहाँ बइठावत अहा?
मोका अइसी एक ठु लड़िकी क लगे काहे होइ चाही
जउन घूँघट डारिके तोहरे मीतन क झुण्डन क रखवारी करत ह।
मनसेधू क बचन मेहरारू बरे
8 हे मेहररुअन सबन त सुन्नरी,
अगर तू नाहीं जानत ह मइँ कहाँ होब,
तउ भेड़ियन क पथ पाछा करा।
तोहार बोकरियन क बच्चन क गड़रियन क तम्बुअन क लगे चरा।
9 हे मोर प्रिय मइँ तोहार तुलना उ घोड़ी स करत हउँ
जउन घो़ड़िन फिरौन क रथ क हींचइवाल घोड़न क आकर्सित करत ह।
10 मइँ तोहार कल्पना चाँदी अउर रतन स सज़ा भवा घोड़ा स कइ सकत हउँ।
तोहार गाल खूबसूरत आभूसण अउर कर्नफूल स भवा अहइ।
तोहार गर्दन पइ माला बहोत सुन्नर लगत अहइँ।
11 जउन सोना अउर चाँदी क पत्तर लागत ह
खास तोहरे बरे बना अहइँ।
मेहरारू क बचन
12 जब राजा गद्दी पइ लेटत अहइ,
मोरे इत्र क सुगन्ध ओह तलक पहोंचत ह।
13 मोर प्रियतम रस गन्ध क कुप्पे जइसा अहइ।
उ मोरे सीते क बीच सारी रात सोइ।
14 मोर प्रिय मोरे बरे मेंहदी क फूलन क गुच्छन जइसा अहइ
जउन एनगदी क अंगूरे क बगीचे मँ फलत ह।
मनसेधू क बचन
15 मोर प्रिये, तू रमणीय अहा।
ओह, तू केतनी सुन्नर अहा।
तोहार आँखिन कबूतरन क जइसी सुन्नर अहइँ।
मेहरारू क बचन
16 हे मोर प्रियतम, तू केतना सुन्नर अहा।
हाँ, तू केतना मनमोहक अहा।
हमार बिछाउन केतना ताज़ा अउर आनन्दित महक प्रदान करत हीं।
17 हमार घरे क छत देवदारू क पउधन स बना अहइँ।
अउर देवारन सनोवर पउधन स बना अहइँ।
परमेस्सर अपने पूत क माध्यम स बोलत ह
1 परमेस्सर त अतीत मँ नबियन क जरिये कइयउ अवसरन प कउनउ तरह स हमरे पूर्वजन स बातचीत किहेस। 2 मुला इन आखिरी दिने मँ उ हमसे अपने पूत क जरिये बातचीत किहेस, जेका ओ सब कछू क उत्तराधिकारी नियुक्त किहेस अउर जेकरे द्वारा उ समूचे ब्रह्माण्ड क रचना किहेस। 3 उ पूत परमेस्सर क महिमा क प्रभा-मण्डल अहइ अउर ओकरे प्रकृति क प्रतिलिपि अहइ। उ अपने समर्थ बचन क द्वारा सब चीजन क स्थिति बनाए रखत ह। सबके पापन क धोअइ क उ सरगे मँ ओह महामहिम क दहिने हाथे बइठि गवा। 4 एह तरह उ सरगदूतन स एतना ही महान बनि गवा जेतॅना कि ओनके उ किहेन। उ सबइ नाउँ स उत्तिम नाउँ बाटइ जउन उ उत्तराधिकार मँ पाए अहइ।
5 काहेकि परमेस्सर तउ कउनो सरगदूतन स कभी अइसेन नाहीं कहेसः
“पूत तू मोर,
आजू तोहार बनि गवा हउँ मइँ पिता।” (A)
अउर न ही कउनो सरगदूत स उ इ कहेस ह,
“पिता ओकर मइँ बनबइ,
अउर होइ पूत उ मोर।” (B)
6 अउर फिन उ जब आपन पहिलौट क लड़का अउर महत्वपूर्ण क संसार मँ लावत ह तउ कहत ह,
“परमेस्सर क सरगदूतन सब ओकर नमन करइँ।”[a]
7 सरगदूतन क बारे मँ बतावत उ कहत ह,
“सरगदूतन उ अपने सब पवन बनावइ
अउर बनावइ आपन सेवक लपट आगी क।” (C)
8 मुला अपने पूत क बारे मँ उ कहत हः
“हे परमेस्सर, सास्वत तोहर सिंहासन बा,
तोहार राजदण्ड बाटइ नेकी;
9 नेकी ही तोहका पिआरी बा, तोहका घृणा रही पापन स
तउन परमेस्सर, तोहर परमेस्सर तउ चुना बा तोहका अउर ओह महान आनन्द दिहेस।
तोहका कहूउँ जियादा तोहरे साथियन स।” (D)
10 उ इहउ कहत ह,
“हे पर्भू सृस्टि क जब होत रहा जन्म मँ तुमने सरग तथा धरती क नींव राख्या
यह तोहरे हाथ का ही कारज अहइँ।
11 अउर इ सब नस्ट होइ जइहीं
मुला रहेगा तू चिरन्तर पुरान कपड़ा स फटि जइहीं इ सबइ
12 अउर तू परिधान जइसेन ओनका लपेटब्या
बदल उ जइहीं फिन कपड़ा जइसेन।
मुला तू तउ अहसेन, जैसा की चाह्या रहब्या
तोहरे समइ का कबहुँ न अन्त होई।” (E)
13 परमेस्सर त कबहूँ कउनो सरगदूत स अइसेन नाहीं कहेसः
“बइठा जा तू दहिने मोरे कि
ब जब तलक मइँ न तोहरे दस्मनन क चरन क चौकी बनाइ देउँ चरन तल तोहरे।” (F)
14 का सबहिं सरगदूत उद्धार पावइवालन क सेवा क बरे पठई गईन सहायक आतिमा नाहीं अहइँ।
Awadhi Bible: Easy-to-Read Version. Copyright © 2005 Bible League International.