M’Cheyne Bible Reading Plan

Dee 33 Psalm

¹ Freit junt enn däm Herr Gott O jie Jerajchte; Preis es aunjenäm fa dän dee Opprajcht sent.

² Jäft dank to däm Herr Gott met ne Hoap; sinjt to am met ne Hoap.

³ Sinjt en niehet Leet to am, spält fäijch met jueble un freid.

⁴ Dan däm Herr Gott sien Wuat es rajcht, un aul siene Woakje sent enn Woarheit.

⁵ Hee haft Jerajchtijchkjeit un Jerejcht leef. Däm Herr Gott sien Erboarme felt dee Ead.

⁶ Dee Himels worde erschauft derjch däm Herr Gott sien Wuat; un aul dee Armeehe derjch sien Odem.

⁷ Dee See Wotasch weare toop jesaumelt soo aus opp en Klommpe, un stalde daut Deepet soo aus en Schatskoma.

⁸ Lot dee gaunse Welt däm Herr Gott ferjchte; lot aul dän dee enn dise Welt wone erstaunt fer am stone.

⁹ Dan hee räd, un daut wea jedone; Hee deed aunkommendeare un daut stunnt faust.

¹⁰ Dee Herr Gott brinjt dee Natsjoone äa Rot to nuscht. Hee festimmelt dee Felkja äa Plone.

¹¹ Däm Herr Gott sien Rot steit fa emma, siene Hoat Jedanke to aule Jeschlajchte.

¹² Jesäajent es dee Natsjoon dee däm Herr Gott aus äa Gott haft, daut Folkj daut hee jewält haft fa sien Oawgoot.

¹³ Dee Herr Gott kjikjt rauf fomm Himel; Hee sit aul dee Mensche Säns.

¹⁴ Fonn siene Wonstäd kjikjt Hee opp aul dee Ead äare Ennwone.

¹⁵ Hee deit daut Hoat forme, hee festeit aul äare Oabeit.

¹⁶ Dee Kjeenijch es nijch jerat derjch ne groote Armee; en majchtja Maun es nijch jerat derjch siene Krauft.

¹⁷ En Peat es nuscht fa Schuts, un hee deit uk nijch rade derjch siene groote Krauft.

¹⁸ See, däm Herr Gott sien Uag es opp dän dee am ferjchte, dän dee enn sien Erboarme hope,

¹⁹ äare Seel to rade fonn dän Doot, un dän aum Laewe hoole enn dee Hungaschnoot.

²⁰ Onnse Seel wacht fa däm Herr Gott, hee es onns Help en Schilt.

²¹ Dan onns Hoat freit sikj enn am wiels wie enn sien heilje Nome fetruehe.

²² Lot dien Erboarme opp onns senne, O Herr Gott, soo aus wie enn die fetruehe.

1 Paul, Gott sien Sklow, en Jesus Christus sien apostel, no Gott siene Uterwaelde aea Gloowe, en dee folle Erkjantnes fonne Woarheit dee no Gottseelichkjeit es;

² enn dee Hopninj fa daut eewjet Laewe, daut Gott, dee nich leaje kaun, fesproake haft fer eewje Tiede,

³ oba to rajchte Tiet sien Wuat je-oppenboat haft derch praedje, daut mie aunfetrut wort derch en Befael fonn Gott onns Heilaunt;

⁴ aun Tietus, mien truehe Saen enn daem aewareena Gloowe: Jnod en Fraed fonn Gott daem Foda en Jesus Christus onns Heilaunt.

⁵ Doraomm leet ekj die enn Kjreeta daut du dee Sache enn Ordninj stale sust wua daut noch faelde, en Eltesta aunstale enn jieda Staut soo aus ekj die befool,

⁶ wan doa soona sent daen nusscht faea to schmiete jeit, dee mau eene Fru ha, en Kjinje dee jleewe, en dee nich onnbandich oda onnjehuarsaum sent.

⁷ Dan en Jemeente Leida, aus Gott sien Fewaulta, mott soona senne daem nusscht faea to schmiete jeit, nich eaejensenich, nich wuttich, nich en Wien Supa, nich soona dee aundra schleit, nich Jeltjearich;

⁸ leewa Gaustfrie, ne Leew ha fa daut Goode, feninftich, heilich, selfst beharscht,

⁹ dee sikj faust helt, aun daut truehe Wuat no dee Lea, soo daut hee aundre derch dee jesunde Lea femone kaun, uk daen aewaraede dee jaejaenaun sent.

¹⁰ Dan doa sent fael wadaspanstje Mensche, dee nutsloose Raed ha, en fefeararische Mensche, besondasch dee fonne Beschniedunk,

¹¹ daen aeare Miela festopt motte, dee gaunse Hiesa ommschmiete, en soont unjarechte waut sikj nich jeziemt, omm onnopprechtja Jewenst to kjriehe.

¹² En jewessa fonn aeare eajna Profeete saed: "Dee Kjreeta sent emma Laeajna, beese, wile Teare, fule Fraeta.

¹³ Dit Zeichnes es woa. Doaromm doo an schoap trajchtwiese, daut see em Gloowe kjenne Jesunt senne,

¹⁴ en nich oobacht jaewe opp judsche Foble en Mensche Jesatse dee de Woarheit fedreihe.

¹⁵ Aules es Rein fa daen dee rein sent; oba fa daen dee Onnrein sent, en nich jleewe, es nusscht Rein, dan sogoa aea Senn en Jewesse es Onnrein.

¹⁶ See jaewe faea daut see Gott kjane, oba aeare Woakje feleaje daut, en see sent oppscheislich, en onnjehuarsaum, en nich faeijch to irjent en goodet Woakj.