M’Cheyne Bible Reading Plan

22 यहोवा परमेस्सर मूसा स कहेस, ² “हारून अउ ओकरे पूतन स कहा: इस्राएल क लोग जउन चिजियन मोका देइहीं, उ सबइ पवित्तर होइ जइहीं। उ सबइ मोर अहइँ। एह बरे तू सबइ याजकन क उ सबइ चीजन नाहीं लेइ चाही। तोहका उ सबइ पवित्तर चिजियन क नाहीं लेइ चाही। ऍह बरे तू मोर नाउँ क अपमान नाहीं करब्या। मइँ यहोवा अहउँ। ³ अगर तोहरे बंसे मँ जन्मइवालन मँ स कउनो व्यक्ति जउन असुद्ध अहइ। ओन चीजन क छुई। तउ उ व्यक्ति क मोसे अलग कइ दीन्ह जाइ। इस्राएल क लोग उ सबइ चीजन क मोका दिहन। मइँ यहोवा अहउँ!

⁴ “अगर हारुन क कउनो बंसे जन्मइ वालन मँ क बुरा चरम रोगन मँ स कउनो रोग होइ या ओका धात स्राव होइ तउ ओका तबहिं तलक कउनो पवित्तर खाना नाहीं खाइ चाही जब तलक उ सुद्ध न होइ जाइ। इ नेम उ सबइ याजक क बरे अहइ जउन असुद्ध होइ। उ याजक कउनो ल्हासे क छुइके या आपन वीर्य क गिरइ स असुद्ध होइ सकत ह। ⁵ उ तब असुद्ध होइ सकत ह। जब उ कउनो रेगंइवाला जनावर क छुअइ। उ तब असुद्ध होइ सकत ह जब उ कउनो असुद्ध मनई क छुअइ। एकर कउनो महत्व नाहीं कि उ मनई क कउन चीज असुद्ध किहे अहइ। ⁶ अगर कउनो मनई ओन चीजन क छुई तउ उ साँझ तलक असुद्ध रही। उ मनई क पवित्तर भोजन मँ स कछु भी नाहीं खाइ चाही! पानी डाइके बगैर नहाए भए उ पवित्तर भोजन नाहीं कइ सकत ह। ⁷ उ सूरज क बूड़इ प इ सुद्ध होइ। तबहुँ उ पवित्तर भोजन कइ सकत ह। काहेकि भोजन ओकर अहइ।

⁸ “अगर याजक क कउनो अइसा जनावर मिलत ह जउन खुद मरि गवा होइ या कउनो जनावर क जरिये मारि दीन्ह ग होइ तउ ओका मरे भए जनावर क नाहीं खाइ चाही। अगर उ मनई जनावर क खाइ लेत ह तउ उ असुद्ध होइ। मइँ यहोवा अहउँ!

⁹ “याजक लोगन क उ काम करइ बरे सावधान होइ चाही जउन मइँ ओका दिहेस ह। ओनका सावधान रहइ क होइ कि उ पचे पवित्तर चिजियन क अपवित्तर न बनावइ। अगर उ पचे सावधान रइहीं तउ मरिहीं नाहीं। मइँ यहोवा ओनका इ खास काम बरे दूसर लोगन स अलगाएउँ ह। ¹⁰ सिरिफ याजक लोगन क परिवार क मनई ही पवित्तर भोजन खाइ सकत हीं। याजक क संग ठहरइवाला अतिथि या मज़दूर पवित्तर भोजन मँ स कछू भी नाहीं खाइ। ¹¹ मुला अगर याजक आपन धन स कउनो दास क बेसहत ह तउ उ पवित्तर चीजन मँ स कछू क खाइ सकत ह अउ याजक क घरे मँ पइदा भवा दास भी उ पवित्तर भोजन मँ स कछू खाइ सकत ह। ¹² कउनो याजक क बिटिया अइसे मनई स बियाह कइ सकत ह जउन याजक न होइ। अगर उ अइसा करत ह तउ पवित्तर भेंट मँ स कछू नाहीं खाइ सकत। ¹³ कउनो याजक क बिटिया विधवा होइ सकत ह, या ओका तलाक दीन्ह जाइ सकत ह। अगर ओकरे भरण पोसण बरे ओकरे लरिकन नाहीं बाटेन अउर उ आपन पिता क हिआँ लउटत ह, जहाँ उ बचपन मँ रही ह तउ उ पिता क भोज़न मँ स कछू खाइ सकत ह। मुला सिरिफ याजक क परिवार क मनइयन ही इ भोजन क खाइ सकत हीं।

¹⁴ “कउनो मनई भूलिके कछू पवित्तर भोजन खाइ सकत ह। उ मनई क उ पवित्तर भोजन याजक क देइ चाही अउ ओकरे अलावा उ भोजन क दाम क पाँचवाँ हींसा ओका अउर देइ क होइ।

¹⁵ “इस्राएल क लोग यहोवा क भेंट चढ़इहीं। उ सबइ भेंटन पवित्तर होइ जात हीं। एह बरे याजक क ओन पवित्तर चीजन क अपवित्तर नाहीं बनावइ चाही। ¹⁶ अगर याजक ओन चीजन क अपवित्तर समझत हीं तउ उ पचे तबहिं आपन पाप क बढ़इहीं जब पवित्तर भोजन क खइहीं। मइँ, यहोवा, ओनका पवित्तर बनावत हउँ।”

¹⁷ यहोवा परमेस्सर मूसा स कहेस, ¹⁸ “हारून अउ ओकरे पूतन, अउर इस्राएल क सबहिं लोगन स कहा: होइ सकत ह कि इस्राएल क कउनो नागरिक या कउनो बिदेसी कउनो भेंट लावइ चाहइ। होइ सकत ह उ कउनो बिसेस बचन दिहे होइ, अउ इ ओकरे बरे होइ। या होइ सकत ह इ उ बिसेस भेंट होइ जेका उ व्यक्ति अर्पित करइ चाहइ। ^19-20 इ सबइ अइसी भेंटन अहइँ जेनका लोग एह बरे लिआवत हीं कि उ पचे यहोवा क भेंट चढ़ावइ चाहत हीं। तोहका सबन्क अइसी भेंट नाहीं कबूल करइ चाही जेहमाँ कउनो दोख होइ। मइँ उ भेंट स खुस नाहीं होब। अगर भेंट एक ठु साँड़ अहइ, या एक ठु भेड़ी अहइ, या एक बोकरा अहइ तउ उ नर होइ चाही अउ एहमाँ कउनो दोख नाहीं होइ चाही।

²¹ “कउनो मनई यहोवा क मेलबलि चढ़ाइ सकत ह। उ मेलबलि उ व्यक्ति क जरिये दीन्ह गए बचन बरे होइ सकत ह या इ कउनो खुद प्रेरित भेंट होइ सकत ह। इ बर्धा या भेड़ी होइ सकत ह। मुला ओका तन्दुरुस्त अउ दोख रहित होइ चाही। ²² तोहका यहोवा क अइसा कउनो गोरु भेंट नाहीं करइ चाही जउन आँधर होइ या जेकर हाड़ टूटा होइ, या जउन लंगड़ा होइ, या जेकर घाव बहत होइ, या चरम रोग वाला होइ। तोहका यहोवा बरे वेदी प कउनो बीमार गोरु क भेंट नाहीं चढ़ावइ चाही।

²³ “कबहुँ कबहुँ कउनो बर्धा या मेमना क गोड़ बहोत जियादा लम्बा होइ सकत हीं या अइसेन गोड़ होइ सकत हीं जेनकर विकास ठीक स न भवा होइ। अगर कउनो मनई अइसे गोरु क यहोवा क खास भेंट क रुप मँ चढ़ावत ह तउ उ स्वीकार कीन्ह जाइ। मुला एका कउनो व्यक्ति क जरिये दीन्ह गए बचन बरे स्वीकार नाहीं कीन्ह जाइ।

²⁴ “अगर कउनो गोरु क अण्ड कोस जख्मी, घाउवाला, फाड़ा भवा या कटा भवा होइँ तउ तोहका उ गोरु क भेंट यहोवा क नाहीं चढ़ावइ चाही। तोहका अइसा गोरुअन आपन भुइँया पइ बलि नाहीं देइ चाही।

²⁵ “तोहका बिदेसियन स बलि बरे अइसे गोरुअन क नाहीं लेइ चाही। काहेकि इ सबइ गोरु कउनो तरह चोट खाए अहइँ। ओनमाँ कछू दोख अहइ। इ सबइ स्वीकार नाहीं कीन्ह जइहीं!”

²⁶ यहोवा मूसा स कहेस, ²⁷ “जब कउनो बछवा, या भेड़ी, या बोकरी जउन नवा पइदा होइ तउ आपन महतारी क संग ओका सात दिन रहइ देइ चाही। तब अठऍ दिन अउ ओकरे पाछे इ यहोवा क दीन्ह जाइवाली बलि क रुप मँ स्वीकार कीन्ह जइहीं। ²⁸ मुला तोहका सबन्क उही दिन उ गोरु अउ ओकरी बच्चन क नाहीं मारइ चाही। इहइ नेम गइया अउ भेड़न बरे अहइ।

²⁹ “अगर तू पचन्क यहोवा बरे कउनो खास कृतग्यता बलि चढ़ावइ क होइ तउ तू पचे उ भेंट क चढ़ावइ मँ अजाद अहा। मुला इ इ तरह करा कि परमेस्सर क खुस करा। ³⁰ तू पचन्क पूरा गोरु उहइ दिन खाइ लेइ चाही। तू पचन्क अगले भिन्सारे बरे कछू भी गोस नाहीं छोड़इ चाही। मइँ यहोवा अहउँ!

³¹ “मोरे आदेसन क याद राखा अउ ओनकइ पालन करा। मइँ यहोवा अहउँ। ³² मोरे पवित्तर नाउँ क अपमान जिन करा। मोका इस्राएल क लोगन बरे बहोत खास होइ चाही। मइँ, यहोवा तू पचन्क आपन बिसेस लोग बनाएउँ ह। ³³ मइँ तू पचन्क मिस्र स लाएउँ। मइँ तोहार परमेस्सर बनेउँ। मइँ यहोवा अहउँ!”

दाऊद क समपिर्त।

दाऊद क एक गीत।

वाचा मानइ मँ सावधानी

5 जब परमेस्सर क उपासना बरे जा तउ बहोत जियादा होसियार रहा। अग्यानियन क नाई बलियन चढ़ावइ क अपेच्छा परमेस्सर क आग्या मानब जियादा उत्तिम अहइ। अज्ञानी लोग अक्सर बुरे करम किया करत हीं अउर ओका जानत तलक नाहीं ही। ² परमेस्सर क वाचा मानत समय होसियार रहा। परमेस्सर स जउन कछू कहा ओन बातन बरे होसियार रहा। भावना क आवेस मँ, जल्दी मँ कछू जिन कहा। परमेस्सर सरग मँ अहइ, अउर तू धरती पइ अहा। एह बरे तोहका परमेस्सर स बहोत तनिक बोलइ क जरूरत अहइ। इ कहतूत फुरइ अहइ

⁴ अगर तू परमेस्सर स कउनो वाचा माँगत ह तउ ओका पूरा करा। जउने बाते क तू वाचा मान्या ह ओका पूरा करइ मँ देर जिन करा। परमेस्सर मूरख मनइयन स खुस नाहीं रहत। तू परमेस्सर क जउन कछू अर्पित करइ क बचन दिहा ह ओका अर्पित करा। ⁵ इ नीक बा कि तू कउनो वाचा माना ही नाहीं बजाय एकरे कि कउनो मनौती माना अउर ओका पूरा न कइ पावा। ⁶ एका नाहीं होइ देइ कि तोहार सब्द तोहार पापे क कारण बनी। याजक स अइसा जिन बोला कि, “जउन कछू मइँ कहे रहेउँ ओकर इ अरथ नाहीं बाटइ।” जदि तू अइसा करब्या तउ परमेस्सर तोहरे सब्दन स रिसियाइके जउन वस्तुअन बरे तू करम किहा ह, ओन सबन्क उ बर्बाद कइ देइ। ⁷ आपन बेकार क सपनन अउर डींग मारइ स मुसीबतन मँ जिन पड़ा। तोहका परमेस्सर क सम्मान करइ चाही।

हर एक अधिकारी क ऊपर एक अधिकारी अहइ

⁸ कछू देसन मँ तू अइसे दीन-हीन लोगन क लखब्या जेनका कड़ी मेहनत करइ क मजबूर कीन्ह जात ह। तू लखि सकत ह कि निर्धन लोगन क संग इ बेउहार उचित नाहीं अहइ। इ गरीब लोगन क अधिकारन क खिलाफ अहइ। मुला अचरज जिन करा। जउन अधिकारी ओन मनइयन क कारज करइ बरे मजबूर करत ह, अउर उ पचे दुइनउँ अधिकारी कउनो दूसर अधिकारी क जरिये मजबूर कीन्ह जात हीं। ⁹ ऍतना होइ पइ भी कउनो खेती क जोग्ग भुइँया पइ एक राजा क होब देस बरे फायदेमंद अहइ।

धने स खुसी नाहीं बेसही जाइ सकत

¹⁰ उ मनई जउन धने स पिरेम करत ह उ उ धने स जउन ओकरे लगे अहइ कबहुँ संतुट्ठ नाहीं होइ। उ मनई जउन धन स पिरेम करत ह, जब जियादा स जियादा धन पाइ जात ह तब भी ओकर मन नाहीं भरत। तउ उ भी बियर्थ अहइ।

¹¹ कउनो मनई क लगे जेतना जियादा धन होइ ओका खरच करइ बरे ओकरे लगे ओतना ही जियादा “मीत” होइहीं। तउ उ धनी मनई क असल मँ प्राप्त कछू नाहीं होत ह। उ आपन धन क बस लखत भर रहि सकत ह।

¹² एक ठु अइसा मनई जउन सारे दिन कड़ी मेहनत करत ह, आपन घर लउटइ पइ चइन क संग सोवत ह। इ महत्व नाहीं रखत ह कि ओकरे लगे खाइ क कमती अहइ या जियादा अहइ। एक धनी मनई आपन धने क चिंता म बूड़ रहत ह अउर सोइ तलक नाहीं पावत।

¹³ बहोत बड़के दुःखे क बात अहइ कि एक ठु जेका मइँ इ जिन्नगी मँ घटत लखेउँ ह। लखा एक मनई भविस्स बरे आपन धन बचाइके रखत ह। ¹⁴ अउर फुन कउनो बुरी बात घटि जात ह अउर ओकर सब कछू जात रहत ह अउर मनई क लगे आपन पूत क देइ बरे कछू भी नाहीं रहत। हम खाली हाथ आइत ह अउर खाली हाथ चला जाइत ह

¹⁵ एक मनई संसार मँ अपनी महतारी क गरभ स आवत ह अउर जब उ मनई क मउत होत ह तउ उ बगैर कछू अपने संग लिए सब हिअँइ छोड़िके चला जात ह। वस्तुअन क पावइ बरे उ कठिन मेहनत करत ह। किन्तु जब उ मरत ह तउ आपन संग कछू नाहीं लइ जात पावत। ¹⁶ इ बड़े दुःखे क बात अहइ। इ संसार ओका उहइ तरह तजइ क होत ह जउने तरह उ आवा रहा। एह बरे “हवा क धरइ क कोसिस” स कउनो मनई क हाथे क लगत ह ¹⁷ ओका अगर कछू मिलत ह तउ उ अहइ दुःख अउर सोक स भरे हुआ दिन। तउ आखिरकार उ हतास, रोगी अउ चिड़चिड़ा होइ जात ह।

आपन जिन्नगी क करम क रस ल्या

¹⁸ मइँ तउ इ लखेउँ ह कि मनई जउन कइ सकत ह ओहमाँ सब स उत्तिम इ अहइ-एक मनई क चाही कि उ खाइ-पिअइ अउर जउने कामे क उ इ धरती पइ आपन छोटी स जिन्नगी क दौरान करत ह ओकर आनन्द लेइ। परमेस्सर इ सबइ तनिक क दिन स दिहेस ह अउर बस इहइ तउ ओकरे लगे अहइ।

¹⁹ अगर परमेस्सर कउनो क धन, सम्पत्ति अउर ओन वस्तुअन का आनन्द लेइ क सक्ति देत ह तउ उ मनई क ओनकर आनन्द लेइ चाही। उ मनई क जउन कछू ओकरे लगे अहइ ओका कबूल करइ चाही अउर आपन कामे क जउन परमेस्सर कइँती स एक उपहार अहइ ओकर रस लेइ चाही। ²⁰ तउ अइसा मनई कबहुँ इ सोचत ही नाहीं कि जिन्नगी केतॅनी छोट स बाटइ। काहेकि परमेस्सर ओहका दिमाग क आनन्द स भरी ही राखी हीं।

1 पौलुस कइँती स जउन परमेस्सर क इच्छा स ईसू मसीह क प्रेरित अहइ। अउर जेका मसीह ईसू मँ जीवन पावइ क प्रतिज्ञा क प्रचार करइ के बरे भेजा गवा बा।

² पियारा बेटवा तीमुथियुस क नाउँ:

परमपिता अउर हमरे पर्भू मसीह ईसू कइँती स तोहे अनुग्रह दया अउर सान्ति मिलइ।

धन्यबाद अउर उत्साह

³ रात दिन आपन पराथनन मँ हमेसा तोहार याद करत भवा, मइँ ओह परमेस्सर क धन्यबाद करत हउँ, अउर ओकर सेवा अपने पूर्वजन क रीति क अनुसार सुद्ध मने स करत हउँ। ⁴ मोरे बरे तू जउन आँसू बहाए अहा, ओकर याद कइके मइँ तोहसे मिलइ क आतुर हउँ, ताकि आनन्द स भर उठउँ! ⁵ मोका तोहार उ सच्चा बिसवास भी याद बा जउन पहिले तोहार नानी लोइस अउर तोहर महतारी यूनीके मँ रहा। मोका भरोसा बा कि उहइ बिसवास तोहरे भी मँ बा। ⁶ इही बरे मइँ तोहे याद देवावत हउँ कि परमेस्सर क भेट क ओह जुवाला क जलाइ राखा जउन तोहे सब क मिली रही जब तोह प मइँ आपन हाथ रखे रहेउँ। ⁷ काहेकि परमेस्सर तउ हमका जउन आतिमा दिहे बाटइ, उ हमका कायर नाहीं बनवत बल्कि हमका सक्ती, पिरेम, अउर आतमसंयम स भरि देत ह।

⁸ इही बरे तू हमरे पर्भू या मोर, जउन ओनके बरे बन्दी बना भवा बा, साच्छी देइ स लजा जिन। बल्कि तोहका परमेस्सर जउन सक्ति बाटइ, ओसे परमेस्सर क सक्ती दुआरा जातना झेलइ मँ मोर साथ द्या।

⁹ उहइ हमका रच्छा किहेस अउर पवित्तर जीवन क बरे हमका बोलाए अहइ-हमार आपन ओह कीन्ह कर्मन क आधार प नाहीं, बल्कि ओकरे आपन ओह प्रयोजन अउर अनुग्रह क अनुसार जउन परमेस्सर द्वारा मसीह ईसू मँ हमका पहिले ही अनादीकाल स सऊँप दीन्ह गवा बा। ¹⁰ परन्तु अब हमार बचावइवाले ईसू मसीह क परगट होइ क साथे-साथे हमरे बरे प्रकासित कीन्ह गवा बा। उ मउत क अन्त कइ दिहेस अउर जीवन अउर अमरता क सुसमाचार क द्वारा प्रकासित किहे बाटइ।

¹¹ इही सुसमाचार क फइलावइ क बरे मोका एक प्रचारक, प्रेरित अउर सिच्छक क रूप मँ नियुक्त कीन्ह गवा बा। ¹² अउर इहइ कारण अहइ जेहसे मइँ एन बातन क दुख उठावत अहउँ। अउर फिन भी लज्जित नाहीं हउँ काहेकि जेह प मइँ बिसवास किहे हउँ, मइँ ओका जानत हउँ अउर मइँ इ मानत हउँ कि उ मोका जउन सँऊपे अहइ, उ ओकर रच्छा करइ मँ समर्थ बाटइ जब तलक उ दिन^[a] आवइ,

¹³ ओह अच्छी सिच्छा क जेका तू मोसे सुने अहा, ओका बिसवास अउर पिरेम मँ, जो मसीह ईसू मँ अहइ ओकर आपन आदर्स सिच्छा बनाए रहा। ¹⁴ हमरे भीतर निवास करइवाली पवित्तर आतिमा क द्वारा तू उ सत्य की रच्छा करा, जउन तोहका सँउप गवा बा।

¹⁵ जइसेन कि तू जानत ह कि उ सभन जउन एसिया मँ रहत हीं, मोका छोड़ ग रहेन। फुगिलुस अउर हिरमुगिनेस ओनहीं मँ स अहइँ। ¹⁶ उनेसिफुरुस क परिवारे प पर्भू दया करइ। काहेकि उ कइयउ अवसरन प मोका सुख पहुँचाए रहा। अउर उ मोरे जेल मँ रहइ स सरमान नाहीं।

¹⁷ बल्कि उ तउ जब रोम आवा रहा, जब तलक मोसे मिल नाहीं लिहेस, जतन स मोका निरन्तर ढूँढ़त रहा। ¹⁸ पर्भू करइ ओका, ओह दिन पर्भू कइँती स दया मिलइ, ओ इफिसुस मँ मोरी तरह-तरह स जउन सेवा किहेस ह कउनो तरह स उ सेवा किहेस ओका तू अच्छी तरह स जानत अहा।