M’Cheyne Bible Reading Plan
16 "Dise Dinje hab ekj junt jesajcht daut jie nich sele beleidicht senne.
2 Dee woare ju ut dee Sienagoog rut stoppe; en doa kjemt ne Stund wan waeaemma ju woat doot moake woat jleewe daut hee doamet Gott en Deenst deit.
3 En daut woare see doone wiel see daem Foda uk mie nich kjanne.
4 Oba ekj hab ju dit jesajcht daut wan dee Stunnd kjemt, jie dan doaraun denke daut ekj ju daut jesajcht hab. Em Aunfank saed ekj ju daut nich wiel ekj bie ju wea.
5 Nu oba go ekj trigj no daem dee mie jeschekjt haft, en kjeena fonn ju fracht mie: Wua jeist du han?
6 Oba wiel ekj ju dit jesajcht hab, es jun Hoat foll Trua.
7 Oba ekj saj ju de Woarheit: fa ju eset baeta daut ekj wajch go; Wiel wan ekj nich wajch go, kjemt dee Treesta nich no ju. Oba wan ekj go, woa ekj daem no ju shekje.
8 En wan hee kjemt woat hee de Welt aewafeare fonn Sind, fonn Jerajchtichkjeit, en fonn Jerecht;
9 Fonn Sind wiel see nich aun mie jleewe;
10 Fonn Jerajchtichkjeit, wiel ekj trigj nom Foda go, en jie mie nich meeha seene woare;
11 Fonn Jerecht wiel de Welt Harscha es jerecht worde.
12 Ekj ha ju noch fael to saje, oba jie kjenne daut nu nich fedroage.
13 Oba wan dee Jeist de Woarheit kome woat, dee woat ju enne Woarheit ennen leide. Hee woat nich fonn sikj selfst raede; oba hee woat daut raede waut hee heat, en hee woat junt bekaunt moake waut noch kome woat.
14 Hee woat mie feharliche, wiel hee woat fonn daut mienje naeme en woat ju daut bekaunt moake.
15 Aules waut de Foda haft es uk mient. Doaromm saed ekj daut hee wudd daut mienje naeme en wudd junt daut bekaunt moake.
16 Noch ne kjleene Tiet en dan woa jie mie nich meeha seene; en wada omm ne kjleene Tiet woa jie mie wada seene."
17 Donn saede eenje fonn siene Jinja eene tom aundre: "Waut es dit waut hee onns sajcht: 'Noch ne kjleene Tiet en dan woa jie mie nich meeha seene,' en wada: 'omm ne kjleene Tiet woa jie mie wada seene'; uk, 'Wiel ekj trig nom Foda go'?"
18 Doaromm saede see: "Waut es dit waut hee sajcht: 'Ne kjleene Tiet'? Wie weete nich waut hee sajcht."
19 Jesus wist duat see am jearen froage wulle, en saed to an: "Froag jie ju unjarenaunda waeajen daut waut ekj saed: Noch ne kjleene Tiet en dan woa jie mie nich seene; en wada, omm ne kjleene Tiet dan woa jie mei seene?
20 Enn Woarheit, enn Woarheit saj ekj ju: Jie woare hiele en jaumareare, en de Welt woat sikj freie; jie woare truare, oba jun Trua woat Freid woare.
21 Wan ne Fru en Kjint to Welt brinjt haft see Trua en Weedoag, wiel aeare Tiet es jekome; oba wan daut Kjint jebuare es, fejat see aeare Not aeawe dee Freid daut en Mensch enne Welt jebuare es.
22 Doawaeajen ha jie nu uk Trua, oba ekj woa ju wada seene, en dan woa jie fonn hoate fro seene, en kjeena woat dee Freid fonn junt wajch naeme.
23 Aun daem Dach woa jie mie kjeene Froag froage. Enn Woarheit, enn Woarheit saj ekj ju: Wautemma jie daem Foda baede woare, daut woat hee ju enn mien Nome jaewe.
24 Bet nu ha jie omm nuscht enn mien Nome jebaet; froagt! en jie woare kjriehe, daut june Freid mucht foll senne.
25 Dit hab ekj junt en Sprechwead jesacht. Doa kjemt ne Tiet wan ekj nich meeha woa enn Sprechwead to ju raede, oba woa ju kloa en dietlich fom Foda fetale.
26 Wan dee Dach kjemt woa jie en mien Nome baede; en ekj saj nich daut ekj enn june Staed daem Foda Baede woa,
27 dan de Foda selfst haft ju doaromm leef wiel jie mie leef habe, en ha jejleeft daut ekj fomm Foda jekome sie.
28 Ekj kjeem fom Foda en sie enn dise Welt enenn jekome; ekj felot wada dise Welt en go trigj nom Foda."
29 Siene Jinja saede to am: "See; nu raedst du kloa en dietlich, en nich en Sprechwead.
30 Nu weet wie daut du aules weetst, en hast nich needich daut die wea utfracht; doaromm jleew wie daut du fonn Gott jekome best."
31 Jesus auntwuad an: "Jleew jie nu?
32 Kjikt! doa kjemt ne Tiet, en es aul hia daut jie woare festreit woare, en jiedra no daut sienje, en woare mie auleen lote, en doch sie ekj nich auleen, dan de Foda es bie mie.
33 Dit ha ekj ju nu jesacht daut jie enn mie Fraed habe. Enn dise Welt woa jie Not habe: oba siet jetroost, ekj hab aewe dise Welt jewonne."
13 En weisa Sän heat sien Foda siene Unjarejchtunj; oba en Spatta horjcht nijch no dodle.
2 En Maun deit Goots äte fonn daut Frucht fonn sien Mul, oba däm Hinjalestja sien Janka es Jewault.
3 Wäa sien Mul bewoat helt sien Läwe; wäa sien Mul groot op moakt es fenijcht.
4 Däm Fula siene Seel jankat, oba hee kjrijcht nijch; oba soone dee schwoa oabeide woare fat jemoakt woare.
5 Dee Jerajchta hausst Leaje, oba dee Gottloosa es stenkjrijch un deit sikj schaundhauft benäme.
6 Jerajchtijchkjeit helt däm Opprajchtja enn dän Wajch; oba Gottloosijchkjeit deit äweschmiete.
7 Doa sent soone dee soo doone aus wan see rikj sent, oba habe äntlijch nuscht; un soone dee soo doone aus wan see Oam sent, oba habe fäl Rikjdom.
8 Daut Betole fa en Maun sien Läwe es sien Rikjdom; oba dee Oame heare nijch Dodle.
9 Dee Jerajchte äa Lijcht freit sikj; oba dee Gottloose äa Lijcht saul ut jemoakt woare.
10 Blooss derjch Stolltheit kjemt Striede; oba Weisheit es bie dän dee Rot aun name.
11 Rikjdom fonn Nutslooset woat weinje woare; oba wäa derjch Oabeit toop saumelt woat meeha kjriehe.
12 Hopninj oppjeschowe moakt daut Hoat krank; oba Janka erfelt es en Läwes Boom.
13 Wäa daut Wuat feacht saul fenijcht woare; oba wäa daut Jeboot ferjchte deit saul beloont woare.
14 Dee Weise äa Jesats es ne Läwes Kjwal, fonn dee Doodes Schlenj wajch to kome.
15 Fäabedocht jeft Jnod; oba dee Äweträde äa Wajch es aunhoolent.
16 Wäa fäabedocht es haundelt met Wissenschoft; oba en Noa deit siene Noarheit op laje.
17 En gottloosa Norejchtdroaga felt enn Beeset enenn; oba en Trua Feträda es Heelsom.
18 Wäa Unjarechte aufsajcht woat Oamoot un Schaund kjriehe; oba wäa Trajcht halpe aun nemt woat je-eat woare.
19 Daut kjriehe waut eenem jankat es seet to dee Seel; oba Noare hausse fonn Beeset wajch to gone.
20 Wäa met dee Weise wankt woat weis senne; oba en Noare Hoad woat jebroake woare.
21 Beeset jajcht Sinda hinjaraun; oba dee Jerajchte woare beloont woare met Goots.
22 En gooda Maun jeft en Oafgoot to siene Säns äare Säns; oba dee Sinda äa Rikjdom es wajch jelajcht fa dee Jerajchte.
23 Dee Ead dee de Oame jeoabeit habe brinjt fäl Äte; oba oone Jerejcht es daut feschwunje.
24 Wäa dän Stock nijch brucke wel, hausst sien Sän; oba waä am leef haft, seakjt am trajcht to halpe.
25 Dee Jerajchta at daut siene Seel tofräd es; oba dee Gottloose äa Buk kjrijcht nijch jenuach.
6 Kjinja, jehorcht june Elre em Herr, dan daut es Rajcht.
2 Jie sele Foda en Mutta eare, daut esset easchte Jeboot daut en Fespraeakje met sikj haud;
3 "soo dautet die goot jeit, en du lang oppe Ead laewe kaust".
4 En jie Fodasch, reitst june Kjinja nich to oajanes, trakjt daen leewa opp enn dee Femoninj em Herr.
5 Sklowe, jehorcht june irdishe Herre met Forcht en tsetre, met en eenseljet Hoat, soo aus to Christus,
6 nich bloos wan see aea Uag opp junt ha, mensche to jefaule, oba soo aus Christus siene Sklowe, enn daem jie Gott sien Wele doone fonn Hoate.
7 Deent gootmeenent, aus daem Herr siene Sklowe, nich aus to Mensche,
8 wiel jie weete daut waut emma Goodet jie doone, woat junt fonn daem Herr beloont woare, eendoont auf Sklow oda Frie.
9 En jie Haresse, doot daut naemlije to an, en doot nich dreiwe, wiel jie weete daut jun Herr, uk aeara, enne Himelswelte es, en doa es kjeen aunseene de Persoon bie am.
10 Fa daut aewrije, woat stoak emm Herr, en enn dee Krauft fonn siene Macht.
11 Lajcht junt daut gaunse Kjriechsjescher fonn Gott opp, soo daut jie stone kjenne jaeajen daem Diewel siene Leste.
12 Dan onns Kaumpf es nich jaeajen Bloot en Fleesch, oba jaeajen Harscha, jaeajen Jewaultje, jaeajen dee Diestanesswelt Harscha, jaeajen dee beese Jeista enne Himelswelte.
13 Aulsoo naemt daut gaunse Kjriechsjescher fonn Gott, soo daut jie wadastone kjenne aun daem beese Dach, en wan jie aules utjerecht ha, daut jie stone bliewe.
14 Doaromm stot faust, en naemt dee Woarheit romm junt soo aus en Gort romm dee Lende, aunjedone met daut Brosstschilt de Jerachtichkjeit,
15 en siet reed daut Fraedensevanjeelium auntonaeme, soo aus Schoo oppe Feet.
16 Enn aules naemt daen Gloowe fa en Schilt, met woont jie aul daem Diewel siene brennende Feile utlasche kjenne;
17 en sat daen Kjriejesmets de Radunk opp, en naemt daem Jeist sien Schweat, dee es Gott sien Wuat;
18 met aulet Jebaed en Aunhoole, en baet to aule Tiet em Jeist, en siet waka doarenn met aulet Aunhoole en Jebaed fa aule Heilje;
19 en uk fa mie, daut mie de Raed mucht jejaeft woare, mien Mul op to moake, brow daut Jeheemnes fomm Evanjeelium bekaunt to moake,
20 fa woont ekj en Deena sie enn Kjaede, daut ekj brow raede mucht, soo aus ekj raede sull.
21 Nu, daut jie uk weete kjenne woo et met mie jeit, en waut ekj doo, ha ekj Tiechikus, en leewa Brooda en truehe Deena em Herr, jeschekjt, dee junt aules fetale woat.
22 Ekj ha am no junt doawaeajen jeschekjt, daut jie omm onnse Sach ommweete, en daut hee june Hoate mucht treeste.
23 Fraed to dee Breeda, en Leew met Gloowe fonn daem Foda en daem Herr Jesus Christus.
24 Jnod met aul daen dee onns Herr Jesus Christus oone oppheare leef ha.
Copyright © 2001 by Elmer Reimer