M’Cheyne Bible Reading Plan
12 Donn sas Doag fer Pasa kjeem Jesus no Betanean, wua Latsarus wea, daem hee haud fomm Doot oppjewakjt.
2 Doa muake see am en Owentkost, en Marta bedeend; oba Latsarus wea eena fonn dee, dee bie am aum Desch saut.
3 Donn neemm Marie een Punt seeha dearet, reinet Nardeneelj en goot daut aewa Jesus siene Feet, en dreajd am de Feet met aere Hoa; en daut gaunse Hus wea foll fonn daem Jeruech.
4 Donn saed eena fonn sien Jinja, Judas Iescharijot, dee am nohaea ferode deed;
5 "Wuaromm wort dise Saulweelj nich fa dartich Punnt fekofft, en daut Jelt dee Oame jejaeft?"
6 Dit saed hee nich daut hee omm dee Oame waut drommjeef, oba wiel hee en Deef wea, en druach de Jelttausch, en neem fa sikj selfst fonn daut waut doa enenn jelajcht wort.
7 Donn saed Jesus, "Lot aea tofraed! Dit haft see to mien Bejrafnesdach jedone.
8 Dan dee Oame ha jie emma bie ju; oba mie woa jie nich emma habe."
9 Doa weare fael Jude waut daut wiste daut hee doa wea, en see kjeeme nich bloos waeajen Jesus, oba uk Latsarus to seene daem hee fomm Doot oppjewakjt haud.
10 Oba dee Huagapriesta worde sikj eenich see wudde Latsarus uk doot moake;
11 wiel waeajen am feleete fael Jude en jleewde aun Jesus.
12 De naeakjste Dach, es fael Follkj dee tom Fast jekome weare, heade daut Jesus no Jeruslaem kjeem,
13 neeme see Palmasta en jinje am entjaeajen en schrieeje: "Hoosauna! Jesaeajent es dee, dee emm Herr sien Nome kjemt! Iesrael aea Kjeenich!"
14 En Jesus funk en Aeseljoalinkj en sad sikj doa enopp; soo auset jeschraewe steit:
15 "Fercht die nich, du Dochta Tsions! Kjikj! dien Kjeenich kjemt no die jeraede opp en Aeseljoalinkj!"
16 Dee Jinja festunnde dit nich emm aunfank, oba aus hee eascht feharlicht wea, dochte see doaraun daut soont fonn am jeschraewe wea, en daut see daut to am jedone haude.
17 Daut Follkj oba daut bie am wea aus hee Latsarus fomm Grauf rut roopt en am oppwakjt fom Doot jeewe am Zeichnes.
18 Doaromm jinkj daut Folkj am to trafe, wiel see haude jeheat daut hee dit Wunndateakjen jedone haud.
19 Donn saede de Farisaea eena tom aundre: "Jie seene daut jie nusscht jewenne; Kjikt; de Welt es am hinjaraun jegone!"
20 Nu weare doa uk waltje Jrieche unja dee, dee nom Fast jinja doa auntobaede.
21 Dee kjeeme no Filip, dee fonn Betseede enn Galilaea wea, en saede to am: "Herr, wie wudde jearen Jesus seene."
22 Filip jinkj en saed Aundrees daut, en Filip en Aundrees jinja en saede Jesus daut.
23 Jesus auntwuad an en saed: "Dee Stunnd es jekome daut de Menschesaen sull feharlicht woare.
24 Enn Woarheit, enn Woarheit saj ekj ju, wan en Weitkuarn nich enne Ead felt en stoaft, bliftet auleen. Wan daut oba stoaft, dan brinjt daut fael Frucht.
25 Waea sien Laewe leef haft woat daut feleare; waea sien Laewe en dise Welt haust, woat daut hoole tom eewjet Laewe.
26 Wan mie waea deent, lot daem mie no folje; en wua ekj sie doa saul mien Deena uk senne. Wan waea mie deent, daem woat mien Foda eare.
27 Nu es miene Seel bedrekjt, en waut kaun ekj saje? Foda, rad mie fonn dise Stund? Oba dit es wuaromm ekj en dise Stuund sie enenn jekome.
28 Foda, doo dien Nome feharliche." Donn kjeem ne Stem fom Himel: "Ekj hab daen aul feharlicht en woa daen wada feharliche."
29 De Mensche dee doaromm stuunde saede donn: "Daut rummelt;" aundre saede: "En Enjel haft met am jeraet."
30 Jesus auntwuad en saed: "Dise stemm kjeem nich weajen mie, oba omm junet haulwe.
31 Nu es Jerecht opp dise Welt; nu saul de Welt Harscha erut jeschmaete woare.
32 En ekj, wan ekj fonn dise Ead woa nehecht jehowe woare, woa ekj aule Mensche no mie trakje."
33 Dit saed hee omm auntodiede waut fa en Doot hee stoawe wudd.
34 De Mensche saede donn to am: "Wie ha utem Jesats jeheat daut dee Christus fa emma bliewe woat; woo sajchst du dan daut de Menschesaen mott nehecht jehowe woare? Waea es dis Menschesaen?"
35 Donn saed Jesus to an: "Noch en kjleenet Stoot es daut Licht bie ju. Waundelt wiel jie daut Licht habe, wan nich, dan woat ju de Diestanes enn hole. Dee waut en Diestanes romm jeit weet nich wua hee hanjeit.
36 Jleeft aun daut Licht soo lang aus jie daut Licht habe, daut jie Lichtkjinja woare kjenne."
Aus hee dit jesajcht haud, jinkj hee wajch en festuak sikj fonn an.
37 Oba wan hee uk so fael Wunndateakjens fer an jedone haud, jleewde see doch nich aun am:
38 daut daut Wuat daut Jesaja saed sull erfelt woare: "Herr, wea jleeft onns Berecht? en waem es daem Herr sien stoakje Oarm jeoppenboat?"
39 Doaromm kunne dee nich jleewe, wiel Jesaja uk saed: "Hee haft aere Uage blint jemoakt, en aea Hoat fehoat, daut see met de Uage nich sulle seene, en nich met aea Hoat festone daut see sikj bekjeade en ekj an heele sull".
41 Dit saed Jesaja es hee siene Harlichtkjet sach en fonn am raed.
42 Oba sogoa faele fonn dee Faeaschte jleewde aun am: Oba omm de Farisaea aearet haulwe bekjande see am nich, daut see nich ute Sienagoog wudde erut jeschtopt woare,
43 wiel see wulle leewa de Mensche Ea habe aus Ea fonn Gott.
44 Jesus schriech donn lud tom Folkj: "Waea aun mie jleeft, jleewt nich aun mie, oba aun daem dee mie jeschekjt haft.
45 En wea mie sit, sit daem dee mie jeschekjt haft.
46 Ekj sie enn dise Welt enenn jekome en Licht to sene, daut en jieda dee aun mie jleeft, nich em Diestre blift.
47 En weaemma mien Wuat heat en nich jleeft, daem woa ekj nich rechte, dan ekj sie nich en dise Welt jekome dee to rechte, oba dee seelich to moake.
48 Dee waut mie aufsajt en miene wead nich aunnemt, haft daut waut am rechte woat - daut Wuat, waut ekj jeraet ha, woat am rechte aum latse Dach.
49 Dan ekj ha nich ut mie selfst jeraet; dan de Foda dee mie jeschekjt haft, dee haft mie en Befael jejaeft, waut ekj saje sull en waut ekj bekaunt moake sull.
50 En ekj weet daut sien Jebot es daut eewje Laewe. Doaromm, waut ekj bekaunt moak, raed ekj so aus de Foda mie daut jesajcht haft.
9 Weisheit haft äa Hus jebut; see haft äare säwen Stendasch utjekjoaft;
2 see haft äa Schlachtfee jeschlacht; see haft äa Wien ennjereat; see haft dän Desch oppjesat.
3 See haft äare Deenstmäakjes rut jeschekjt; see schrijcht fonn dee hejchste Städe enne Staut;
4 Du Eenfeltja, lot am hia enenn dreihe; un see sajcht to däm dee oone Hoat es:
5 Komm un doo fonn mien Broot äte, un drink fonn mien Wien dee ekj ennjereat ha;
6 Felot dee Noare un läw; un go enn dän Festentnis Wajch.
7 Wäa en Spatta femone deit kjrijcht Schaund fa sikj selfst; un wäa en beesa Maun dodle deit, kjrijcht ne Plak opp sikj.
8 Doo en Spatta nijch dodle, sest woat hee die hausse, doo en weisa Maun dodle, un hee woat die leef ha.
9 Jeff to däm weisa Maun, un hee woat noch weisa senne; doo en jerajchta Maun unjarejchte, un hee woat toonäme enn leare.
10 Däm Herr Gott ferjchte es dee Aunfank fonn Weisheit, un däm Heilja kjane es Festentnis.
11 Dan derjch mie sent diene Doag femeat, un dee Joare fonn dien Läwe woare meeha senne.
12 Wan du Weis best, dan woascht fa die selfst Weis senne; oba wan du feachte deist, dan woascht du daut auleen droage.
13 Ne noarische Fru es lud; dee es oonbedocht un weet nuscht.
14 Dan see set bie dee Däa enn äa Hus, enn ne Set enn dee huage Städe enne Staut;
15 dän aun to roope dee doa febie gone; dee jlikj enn äare Wäaj gone;
16 dee Eefeltje, lot däm hia enenn dreihe; en dee, dee nich en Hoat haft, sajcht see to am:
17 Jestolne Wotasch sent seet, un Broot daut emm Jeheeme jeäte woat es auanjenäm.
18 Oba hee weet nijch daut dee Doodje doa sent; siene Jast sent enn daut Deepet fonne Hal.
2 En jie weare enn jun Aewatraede en enn june Sind doot,
2 enn woone jie donn waundelde no dise Welt Sitte, no daem Harscha aewe dee Lofft Follmacht, dee Jeist dee nu enn daen wirkjt dee onnjehuarsaum sent.
3 Unja daen haud wie uk to eene Tiet onns Ommgank no dee Fleeschliche Losst, en laewde so aus daut Fleesch en Jedanke wulle, en weare fonn Natua Oajeness Kinja, jrod so aus dee aundre.
4 Oba Gott, dee rikj es aun Jnod, omm siene groote Leew haulwe met dee hee onns leef haud,
5 sogoa aus wie enne Sind Doot weare, haft onns met Christus tom Laewe jebrocht; - derch jnod sent wie jerat -
6 en haft onns toop oppjerecht, en toop hanjesat met Christus Jesus en dee Himlische Welte,
7 soo daut hee enn dee komende Tiede mucht siene aewatraflich groote, rikje Jnod enn siene Leeftolichkjet onns jaeajenaewe bewiese enn Christus Jesus.
8 Dan derch Jnod sent jie seelich jeworde derch daen Gloowe; en daut nich ut junt selfst, daut es ne Gow fonn Gott;
9 nich derch Woakje, daut kjeena sikj puche wudd kjenne.
10 Dan wie sent sien Jeschaft, enn Christus Jesus erschaufe to goode Woakje, dee Gott ferhaea reed jemoakt haud, so daut wie doarenn waundle sulle.
11 Doaromm denkjt doa aun, daut, aus jie Heide weare no daut Fleesch, dee Onnbeschnaedne jenant weare bie daen dee de Jeschnaedne jenant woare - fonn Mensche Henj jeschnaede em Fleesch,
12 daut jie to dee Tiet oone Christus weare, fonn daut Jeschlacht Iesrael utjeschlote, en Framde to daut Bunt fonn Fespraeakjunje, en haude kjeene Hopninj, en weare oone Gott enn dise Welt.
13 Oba nu enn Christus Jesus se jie, dee jie eascht wiet auf weare, dichtbie jebrocht derch Christus sien Bloot.
14 Dan hee es onnse Fraed, dee fonn beid eent jemoakt haft, en haft dee Meddelwaunt dee tweschen onns wea, doljebroake, en haft enn sien Fleesch
15 daut Jesats en Faeaschrefte auntsied jesat, so daut enn daem daut hee Fraed muak, hee fonn dee twee een nieha Mensch moake kunn,
16 en daut hee mucht derch daut Kjriets beid toop brinje enn een Lief, en doaderch en enj muak fonn dee Fientschofft;
17 en kjeem en praedjd Fraed to junt dee wiet auf weare, uk Fraed to daen dee dicht bie weare;
18 dan derch am ha wie beid en een Jeist Toogank nom Foda.
19 Aulsoo se jie nu nich meeha Framde en Waundra, oba jie sent Metbirja met dee Heilje, en Jliede enn Gott siene Famielje,
20 en sent oppjebut opp daen Grunt fonn dee Apostel en Profeete, wua Jesus Christus selfst dee Akjsteen es.
21 Enn am es daut gaunse Jebied toop jefot, en waust enn en heilje Tempel em Herr enenn,
22 enn waem jie uk toop met jebut woare fa ne Woninj fa Gott em Jeist.
Copyright © 2001 by Elmer Reimer