M’Cheyne Bible Reading Plan

Taakˈen cablaaj t‑xnakˈatz Jesús

9  Attzen jun kˈij e cub tchmoˈn Jesús kej cablaaj t‑xnakˈatzxin. Bix e xiˈ tkˈoˈnxin tipemalxin bix jtoclenxin cye tuˈn tel cyiiˈnxin biman cyiˈ xjal bix tuˈn cykˈanenxin tiˈ cyyabel xjal. ² Bix e xiˈ tchkˈoˈnxin ejeeˈ te kbalte tiˈj tcawbil Dios bix te kˈanlte ke yaab. ³ Bix e xiˈ tkbaˈnxin cye:

―Mintiiˈ cxeˈl cyiiˈna tuj be, mi nuk cybardóna, mi nuk cypay, mi nuk cyway, mi nuk cypwaka, mi nuk chˈixpubl cyiˈja. ⁴ Bix ja tzunj jaaˈ cnetel cyuˈna jaaˈ chi wutaley, hasta ojxe cyiˈya tuj tnom cyjel cykˈoˈna. ⁵ Ka at jun tnom ma tzˈel t‑xooˈn cyyola, cytz̈toncjtzen kuk tiˈ cyxaaba cywitz xjal oj cyiˈya tuj tnom, te yecˈbil min chi kˈumentla tyol Dios cyxol, cuma cycyˈi―tz̈i Jesús cye t‑xnakˈatzxin.

⁶ Bix iyˈke bix ocxkexin cyuj nim tnom. Tuj jaca juun tnom e baj cykˈumenxin jbaˈn tpocbalel tcawbil Dios, bix e kˈanenkexin ke xjal yaab.

Tej t‑xiˈ tkane Herodes alcye toclen Jesús tocse

⁷ Yal tzunj xin gobernador Herodes, cykilj tpocbal niyˈ jnbint tuˈn Jesús e pon tuj twiˈxin, pero min e cnet tumel tuˈnxin alj xin Jesús. Eˈla tuj cywitz juun xjal ka ja Juan Bautista otk jaw itzˈj juntl maj cyxol cyimne. ⁸ Yal cabtl xjal, eˈla tuj cywitz kape ja ktzan tyolel Dios Elías otk tzul jlet juntl maj. Yal cabtl xjal, eˈla tuj cywitz kape jaj juntl tyolel Dios te ootxa otk jaw itzˈj tuj cyamecy juntl maj. ⁹ Tej toc tbiˈn Herodes cyyol xjal, e xiˈ tkbaˈnxin:

―Yaaˈn te Juan, cuma inayena e kˈumente tuˈn tel txˈomet twiˈ Juan. ¿Pero alcyenexin? cuma nim tzin nbiˈna tiˈj nbint tuˈnj xin xjal―tz̈i Herodes tiˈ Jesús. Bix nim e tajbe Herodes tuˈn toc tcyeˈyen jaxin.

Tej cywaaˈn jweˈ mil xjal tuˈn Jesús

¹⁰ Yal tzunj cablaaj t‑xnakˈatz Jesús otk txiˈ tsmaˈnxin, bixsen ul meltzˈajkexin tuya Jesús, bixsen e baj cykbaˈnxin ti otk bint cyuˈnxin cyuj tnom. Bix e xiˈ tiiˈn Jesús ejeeˈxin tuj jun lugar nka ttxaˈn tnom te Betsaida, tuˈntzen cytenxin cyjunalxin. ¹¹ Pero oc cybiˈn xjal jaaˈ e xaˈ Jesús, bix e xiˈ ke xjal jaaˈ e temaxin. Tej cypon xjal, e tiikˈxin ejeeˈ, bix akˈxin kbalte tiˈj tcawbil Dios, bix oc tkˈaˈnexin kej xjal yaab. ¹² Tejtzen chˈitk tex kˈij, bix e xiˈ lkˈej cablaaj t‑xnakˈatz Jesús tuyaxin, bix e xiˈ cykbaˈnxin texin:

―Kˈumenx cye xjal lu tuˈn cyxiˈ jyol cywa bix cyposada tiyˈ cyuj tnom nka tzalu bix tuj cojbil, cuma ja lu tuj tzkij txˈotxˈ, bix mintiiˈ te cye at tuj―tz̈ikexin.

¹³ Pero aj ttzakˈbeˈn Jesús cyexin:

―Ejeeˈx cyey cxeˈl kˈonte cywa xjal―tz̈ixin.

Bix e xiˈ cykbaˈnxin texin:

―Nuk jweˈ pan tuya caˈba quis̈ at kuyena. ¿Tajpey tuˈn kxiˈya lokˈol cywa xjal?―tz̈i ke t‑xnakˈatzxin, ¹⁴ cuma atle jweˈ mil xinak.

Bix e xiˈ tkbaˈn Jesús cye t‑xnakˈatzxin:

―Cykbanx cye xjal tuˈn cycub ke juun cyaˈwnak tuya laaj xjal qˈuelela juun cloj cyuˈna―tz̈i Jesús.

¹⁵ Bix e cycuyaxin bix e xiˈkexin te paˈl cye xjal, bix e cub ke cykil xjal. ¹⁶ Bix e xiˈ ttzyuˈn Jesús jjweˈ pan bix jcaˈba quis̈, bix e jaw tcyeˈyenxin twitz cyaˈj, bix e xiˈ tkˈoˈnxin chjonte te Dios tiˈ waabj. Bix akˈxin piẍlte, bix e xiˈ tkˈoˈnxin cye ke t‑xnakˈatzxin tuˈn t‑xiˈ cypaˈn cyxol xjal. ¹⁷ Bix cykilca xjal e waaˈnke tejxe tnoj cycˈuˈj. Tej cybaj waaˈn xjal, bixsen e jaw chmet ttxˈakan waabj otk cyaj, bix e noj cablaaj chiˈl.

Tej t‑xiˈ tkbaˈn Pedro ka ja Jesús jaj xjal o tscyˈo Dios te cawel tibaj cykilca xjal

¹⁸ At juntl kˈij e ten Jesús tjunalxin cyuya ke t‑xnakˈatzxin. Bix e naˈn Jesús Dios tjunalxin. Tej tbaj naˈnxin Dios, e xiˈ tkanenxin cye:

―Tuj cywitz xjal, ¿al‑le kena?―tz̈ixin.

¹⁹ Aj cytzakˈbeˈn t‑xnakˈatzxin texin:

―At juun xjal tzin cykbaˈn jay Juan Bautista. At juuntl tzin cykbaˈn jay jtyolel Dios Elías. Bix at juuntl tzin cykbaˈn ja loy juntl tyolel Dios te ootxa o jatz meltzˈaj juntl maj tuj cyamecy―tz̈ike.

²⁰ Bix e xiˈ tkbaˈn Jesús cye:

―Yajtzen cyey, ¿al kena tuj cywitza?―tz̈ixin.

Aj ttzakˈbeˈn Pedro:

―Jay jxjal o tscyˈo Dios te cawel tibaj cykilca―tz̈i Pedro.

E tkba Jesús tuˈn tcub byet cyuˈn xjal

²¹ Bix cyiw e xiˈ tkˈumen Jesús cyexin:

―Jax tuˈna, Pedro, pero miˈn txiˈ cykˈumena cye xjal ka inayena Jscyˈoˈn tuˈn Dios. ²² Inayena, Jsmaˈn tuˈn Dios tuˈn ntena cyuya xjal, tuˈn tiyˈx nim qˈuixcˈaj wuˈna, bix tuˈn wel iiqˈuena cyuˈn nintzaj xjal tuj nintzaj tja Dios, bix cyuˈn pala, bix cyuˈn txˈolbal ley. Chin cwel byeta, pero te toxen kˈij oj njaw itzˈjtla juntl maj tuj cyamecy tuˈn Dios―tz̈i Jesús.

²³ Mas yaj, e xiˈ tkbaˈn Jesús cye xjal:

―Ka at juun cyey taj tzˈoc lpe wiˈja, cyjeltzen cykˈoˈna cykilcaj taj cycˈuˈja, bix qˈuelel cyniˈya tiˈj qˈuiyax qˈuixcˈaj cyuˈna nuk tuˈnj lepcheckey wiˈja, ojxe cycyima. Ka jaca kˈij at cyanema tuˈn cyoc lpey wiˈja, amale tuˈnt cycuba nuk wiˈjqˈueya, juˈtzen tten lepcheckey wiˈja. ²⁴ Ja tzunj xjal tcyˈi tzˈoc lpe wiˈja tuˈnj n‑oc tkˈon tiib tiˈj ti taj, cxeˈl t‑xooˈn tchunkˈlal. Pero ja tzunj xjal cyjel tkˈoˈn tchunkˈlal te twitz txˈotxˈ tuˈnj lepchec wiˈja, ctcamantzen tchunkˈlal te junx maj. ²⁵ ¿Ti tajbel cykilca twitz txˈotxˈ te jun xjal oj tcaman tiˈj bix ka otk txiˈ t‑xooˈn tchunkˈlal nuk tiˈj? ²⁶ Jax juˈx jxjal at tchˈixew cywitz xjal wiˈja bix tiˈ nyola, jaxsele juˈx weya at nchˈixewa tiˈj oj wul meltzˈaja twitz txˈotxˈ juntl maj. Inayena, Jsmaˈn tuˈn Dios tuˈn ntena cyuya xjal, chin ul meltzˈaja tuya nimxsen wipemala bix tuya nim woclena tuˈn Nmana Dios, bix cyuya ke jawnex tsanjel Dios tuj cyaˈj. ²⁷ Pero cxeˈl nkbaˈna cyey, tiˈj ja tipemal tcawbil Dios lu, at juun tocx cyxola jaˈlecuwe, tuj cychunkˈlala te jaˈlewe, te ja minaˈx cycyima, cˈoquel cycyeˈyena jun rato ti tten tipemal tcawbil Dios―tz̈i Jesús cye xjal.

Tej tcub meltzˈaj tcyeˈnc Jesús

²⁸ Otk tzˈex junle smant tbajlen tkbaˈn Jesús kej yol at toclel cycyeˈyen juun xjal jun techel ti tten tcawbil Dios, bix e jawxin twiˈ witz te naˈl Dios. Bix e xiˈ tiiˈnxin Pedro bix Juan tuya Jacobo. ²⁹ Maatktzen nnaˈnxin Dios, tej tcub chˈixpet tcyeˈnc twitzxin, bix e cub meltzˈaj tilbil t‑xbalenxin puro sak bix nkoptzˈajxsen. ³⁰ Nuk tisen tiiˈ tej tul caˈba xjal bix akˈke yolel tuyaxin. Ejeeˈtzen Moisés tuya Elías, ³¹ bix tzinxsen chi koptzˈajxin. E yolenkexin tuya Jesús tiˈj tcyamecyxin tuˈn tnimantexin tuj Jerusalén. ³² Bix otk tzaj chˈin cywatl Pedro cyuya ke tuya, pero tej cyjaw qˈuisjxin, e jaw cycyeˈyenxin tzinxsen koptzˈaj tcyeˈnc Jesús tuyaj caˈbatl tuyaxin waˈlcˈa. ³³ Tej chˈitk cycub naj Moisés tuya Elías, e xiˈ tkbaˈn Pedro te Jesús:

―Taat, Xnakˈtzal, ¡axsen tbanel etoˈ tzalu! Cjaweltzen kbinchaˈna oxe niˈ pach, jun te tey, juntl te Moisés, bix juntl te Elías―tz̈i Pedro, pero mintiiˈ oc tcˈuˈjxin tiˈj.

³⁴ Mitknaˈx tbaj yolen Pedro tej tcub jun muj, bix e cyaj baj Pedro bix Juan tuya Jacobo tuj muj, biˈxsen e cub ttz̈i cyibajxin. ³⁵ Tujtzen muj etztzen jun yol. Tz̈i cyjulu:

―Jatzen xinj lu Ncwala, jatzen xjalja o nkbaˈya tuˈn tcawen. Kˈonc cycˈuˈja tiˈ tyol―tz̈i Dios tuj muj.

³⁶ Tej ttzaj baj jyol e xiˈ cybiˈnxin, bix akˈ cywitzxin tiˈ Jesús tjunalxtlxin tcubxin. Min e baj cykbaˈnxin ti otk baj. Otktzen tzˈel nim kˈij bixsen e baj cykbaˈnxin.

Ul tnaabl junkˈa xjal tuˈn Jesús otk tzˈoc biman tiˈjkˈa

³⁷ Tetzen juntl kˈij bixsen e cuˈtzkexin twiˈ witz, bix tej cycˈuˈlxin t‑xeeˈ witz, nimxsen xjal e pon twitz Jesús. ³⁸ Cyxoltzen xjal at junxin e xiˈ tkbaˈnxin te Jesús:

―Taat, cxeˈl ncubsaˈna nwitza tey tuˈn ttzaj tonena ncyˈaala, cuma oˈcxcˈa junx ncyˈaala. ³⁹ O tzˈoc jun biman tiˈj, bix nim maj nbaj tyaaˈn biman jakˈa bix njaw s̈‑inkˈa tuˈn, bix ncub xooˈnkˈa tuˈn twitz txˈotxˈ, bix n‑akˈ eletz plut tuj ttzikˈa. Tcyˈi biman tzˈel tiˈjkˈa, bix ma txiˈ ncyˈaala tuj il tuˈn. ⁴⁰ Xiˈ ncubsaˈna nwitza cye t‑xnakˈatza tuˈn tel cyiiˈn biman tiˈ ncwala, pero mix ma binne cyuˈn―tz̈ixin.

⁴¹ Aj ttzakˈbeˈn Jesús texin:

―¿Mimpatzenal xjal n‑oc ke cycˈuˈj wiˈja? ¿Jaaˈtzen taˈ cyocslabla? ¿Jteˈtltzen maj cxeˈl nyeecˈana wipemala, tuˈntzen toc ke cycˈuˈja wiˈja? ¿Jteˈtltzen maj tuˈn cyiyˈxa wuˈna? Cyiiˈntznej niˈ cwale wuyey―tz̈i Jesús.

⁴² Bix e tzaj cyiiˈnxin niˈ cwal te Jesús, pero mitknaˈx tpon neeˈ twitzxin tej tcub t‑xooˈn biman ja neeˈ twitz txˈotxˈ bix akˈ neeˈ balkˈajel. Bix el tlojoˈn Jesús biman bix e kˈanj neeˈ, bix e xiˈ tkˈoˈn Jesús neeˈ te tman. ⁴³ Bix cykilca xjal e jaw kleeˈ tiˈ tipemal Dios.

Tej t‑xiˈ tkbaˈn Jesús juntl maj tuˈn tcub byet

Nim e yolenke t‑xnakˈatz Jesús cyiˈj jawnex tbinchben Jesús, pero e xiˈ tkbaˈn Jesús cye:

⁴⁴ ―Cykˈonc cycˈuˈja tiˈj cxeˈl nkbaˈna cyey. Inayena, Jsmaˈn tuˈn Dios tuˈn ntena cyuya xjal, chin kˈojela tuj cykˈab xjal tuˈn nbyeta―tz̈i Jesús.

⁴⁵ Pero ke t‑xnakˈatzxin, min el cyniyˈ tiˈ tyolxin tiˈj at tuˈn tbyet‑xin. Te cye, eˈwen taˈ ti japenina cuma min e cyocsla at tuˈn tbyet‑xin, bix at cychˈixew tuˈn t‑xiˈ cykanen ti japenina kej tyolxin.

Kej mas jawnex tuj twitz Dios

⁴⁶ Attzen jun kˈoj e jaw cyxol t‑xnakˈatz Jesús. “Inayena mas jawnex,” tz̈i jun. “Min, inayena,” tz̈i juntl. ⁴⁷ Pero ttzkiˈn Jesús te jaca juun e cub tbisen tuj tanem ka ja mas jawnex. Juˈtzen e tzaaˈ ttxcoˈn Jesús jun neeˈ tuˈn toc weˈ ttxlajxin, ⁴⁸ bix e xiˈ tkbaˈnxin cye:

―Alj ma tzˈoc tkˈon tiib tuˈn tajben te jun xjal yaaˈn jawnex, tisen ja neeˈ lu yaaˈn jawnex, bix tuˈn toc wakˈa cye, ja tzunja najben weya. Bix oj tajben weya, yaaˈn nuk te weya, sino tuyax te Dios, jxjal e tzaj kˈonte weya. Juˈ tzunj, alj cyxola mas najben cye cabtl, ja tzunja mas jawnex tuj twitz Dios―tz̈i Jesús cye t‑xnakˈatz.

Alj min nkˈoj kiˈj, kuya taˈ

⁴⁹ Bix e xiˈ tkbaˈn Juan te Jesús:

―Taat, ejooˈya t‑xnakˈatza e tjoya te kajbela tey. Pero oc kcyeˈyena juntl xjal n‑el tiiˈn biman cyiˈ xjal tuˈn tipemal tey tbi. Pero e xiˈ kkbaˈna texin tuˈn tweˈxin tbinchantexin juˈwa, cuma yaaˈn jaanxin toc te tajlal t‑xnakˈatza kuyena―tz̈i Juan.

⁵⁰ Aj ttzakˈbeˈn Jesús:

―Miˈn txiˈ cymayoˈna. Alj xjal min kˈojl kiˈj, kuya taˈ―tz̈i Jesús.

Tej toc tile Jesús Jacobo bix Juan

⁵¹ At juntl maj e xiˈ tkbaˈn Jesús cye t‑xnakˈatzxin ti ctemela tej cytzpet. Tej chˈitk tpon tumel tuˈn tcyim Jesús bix tuˈn tjaxxin tuj cyaˈj, bix e tnimsaxin tcˈuˈjxin tuˈn t‑xiˈxin tuj Jerusalén tuˈn tbyet‑xin. ⁵² E xiˈ tsmaˈn Jesús cab tsanjelxin nejl twitzxin, tuˈn tcnet cyposadaxin. Ocx ke tsanjelxin tuj jun tnom tuj departamento te Samaria. ⁵³ Pero tej toc cybiˈn kej xjal tej tnom jaaˈ tuˈn tpona posadayin Jesús, cycyˈi xjal tuˈn tponxin, cuma cytzkiˈn xjal nx‑ajxin Jerusalén te iyˈsal Pascua, bix yaaˈn junx jlu tuyaj cyreligión aj Samaria. ⁵⁴ Tej cybinte ke t‑xnakˈatzxin Jacobo bix Juan otk tzˈel cyxooˈn kej xjal tej tnoma ja Jesús, e xiˈ cykbaˈnxin texin:

―Taat, ¿yaaˈmpaxsele baˈn tuj twitza tuˈn t‑xiˈ kkanen kˈakˈ twitz cyaˈj tuˈn cynaj xjal lu?―tz̈ikexin.

⁵⁵ Bix oc tilenxin ejeeˈ, bix e xiˈ tkbaˈnxin:

―Min, yaaˈn juˈwa. Yaaˈn tumel cynaabla. ⁵⁶ Min in ula te xitl cye xjal, sino te coˈplcye―tz̈ixin.

Bix e xiˈkexin posadayil tuj juntl tnom.

Kej cyajbe tuˈn cyoc lpe tiˈj Jesús

⁵⁷ At juntl maj oc noj junxin xjal cywitzxin tuj be, bix e xiˈ tkbaˈn jxin xjal te Jesús:

―Taat, chin xeˈla tuyena nuk jaaˈxja tuˈn t‑xiˈy―tz̈i xjal.

⁵⁸ Pero aj ttzakˈbeˈn Jesús:

―Kej ẍiwel at cyja tuj tjulel xak bix kej chˈit at cykˈuˈsem, pero jatzen tey, ka taja tzˈoc lpey wiˈj, iltzen tiˈj qˈuelel tniˈya tiˈj mintiiˈ njaya bix nchin wutana te koniyan jaaˈ nchin poniya―tz̈i Jesús.

⁵⁹ E xiˈ tkbaˈn Jesús te juntl xjal:

―Lpeˈcˈa wiˈja―tz̈ixin.

Bix aj ttzakˈbeˈn jxin xjal:

―Taat, waja tuˈn woc lpeya tiˈja, pero najsama, waja cuˈx nmakuˈna nmana nejl oj tcyim―tz̈i xjal.

⁶⁰ Pero e xiˈ tkbaˈn Jesús te:

―Ka taja tzˈoc lpeya wiˈja, kˈoncja tuˈn tcuˈx cymakuˈn cyimne cycyimne. Jatzen tey, kˈoˈnc tiiba te kˈumlte tiˈj tcawbil Dios―tz̈i Jesús.

⁶¹ At juntl xjal oc kbante te Jesús:

―Taat, chin oquel lpeya tiˈja. Pero najsama, waja tneel pjel nkˈolbeˈna ke wermaniya ke nmana bix ntxuya―tz̈ixin.

⁶² Bix aj ttzakˈbeˈn Jesús:

―Jun xjal ncjon tuya wacẍ, il tiˈj cxeˈl tcyeˈyen twitz tuˈn t‑xiˈ ttzˈutzˈ jiquen. Mlay txiˈ jiquen ka n‑ajxe tcyeˈyen tiˈjxe. Juˈ tzunj xjal cˈoquel lpe wiˈja. Ka ma tzˈaj tcwent tiˈj ma cyaj tiˈjxe, mintiiˈ cˈajbela tuj taakˈen Dios―tz̈i Jesús.

Jun naabl tuˈn miˈn chi cub maje ke ocslal cywitz ke dios cyimne

10  Key hermano, cycyeˈyenc kej ootxa xjal wiyˈjila te Israel el xeˈtke tuˈn Dios tuˈn cyil. Ejeeˈtzen xjalja e ten tjakˈ t‑xtalbil Dios. Dios e cub kˈonte jun muj cyibajxin te cˈojlal cyexin bix te kˈilx cyexin tuj cybexin. Bix Dios e cub paˈnte tej Cyak Mar tuˈntzen cyiyˈx kej xjal te Israel jlajxe. ² Bix oc cykˈon cyiibxin tuˈn cyxiˈ lpexin tiˈ Moisés, jxin otk takˈ Dios te nenel. ³ Bix Dios e tzaj kˈonte cywaxin etz tz̈itj twitz cyaˈj, bix cykilcakexin e xiˈ waaˈnte. ⁴ Bix Dios e tzaj kˈonte cycˈaˈxin etz itzˈj tiˈ jun xak, bix cykilcakexin e xiˈ wecˈante. Cxeˈl nkˈumena cyey tej xak etz aˈ tuj, jatzen jun techel te te Cristo, cuma e ten tipemalxin cyuya xjal. ⁵ Pero amale nimet e ten ke aj Israel tjakˈ t‑xtalbil Dios, pero chˈixcˈa yaaˈn cykil xjal min el baˈn twitz Dios, bix juˈ tzunj min e ponkexin tuj txˈotxˈ otk tkba Dios, sino e cyimkexin tuj tzkij txˈotxˈ.

⁶ Juˈ tzunj, key hermano, nim cykˈoˈnc cycˈuˈja tiˈj e baj nejl. Nim kaˈ e cyajbe ke ootxa xjal wiyˈjila, bix e xiˈ tzpetkexin tuˈn. Juˈ tzunj cycˈojlam cyiiba tuˈn miˈn chi eˈla juˈxa ⁷ Miˈn chi oc majey twitz sant, tisen e baj cye ke ootxa xjal wiyˈjila. Tz̈i tyol Dios cyjulu: “Tneel e cub keke twitz cysant tisen wacẍ bix akˈke waaˈl bix wcˈal, bix lwewa e jaw weˈke bixel twitz cysant tisen wacẍ,” tz̈i tyol Dios. ⁸ Bix miˈn chi achena tuya pajbaj. Cˈulel tuj cycˈuˈja ke ootxa xjal te Israel wiyˈjila oc ipanke cyiˈ kej xuuj te Moab tuj pajlel, bix juˈ tzunj e tzaj tkˈoj Dios bix e cyim winak ox mil aj Israel te junx kˈij. ⁹ Miˈn tzˈoc cycyakwusaˈna Dios tuya nim cyila. Juˈ e bint cyuˈnj ootxa aj Israel, ¿bix ti e baj cye? Tuˈn nimxsen nchi yaan, e tzaj tkˈoj Dios cyiˈj, bix oc tsmaˈn Dios lbaj te txˈaˈleccye, bix nimxse xjal e cyim. ¹⁰ Bix miˈn nuk chi txololona tiˈ Dios. Juˈ e baj cye wiyˈjila, bix e cyimke tuˈn Dios tuˈn t‑ángel. ¹¹ Cykilj castiwa lu e baj cyiˈj wiyˈjila, amale nimet t‑xtalbil Dios at cyibajxin. O cyaj tzˈiˈbet tuj tyol Dios te yecˈbil te ke jaˈlewe tuj mancˈbil tyem, tuˈntzen toc kcwent tiˈj tuˈntzen miˈn ko tzpet. ¹² Juˈ tzunj, alj cyey tuj cywitza mlay chi cub tzˈaka tuj il, ¡kˈoˈnc cycˈuˈja tiˈj! ¹³ Nuk chˈinnchˈe oj cycub tzˈaka tuˈn niyˈbebl cyiˈja. Pero kej niyˈbebl niyˈ cyxola, cyxol cykilca ocslal niˈya, yaaˈn nuk cyxol ejeeˈy ocslal tuj Corinto. Pero oj toc niyˈbebl tiˈ jun xjal, jatzen xjalja baˈn tuˈn toc ke tcˈuˈj tiˈ Dios te onlte tuˈn tweˈ twitz niyˈbebl. N‑el tniyˈ Dios tiˈj, bix mlay takˈ Dios tuˈn toc niyˈbebl tiˈ jun xjal ka mlay tziyˈx tuˈn xjal oj toc niyˈbebl tiˈj. Oj toc niyˈbebl tiˈ jun xjal, Dios cˈonlte, tuˈntzen miˈn cub tzˈak tuj il. ¹⁴ Entonces, key hermano, e xiˈke wiyˈjila tuj castiwa tuˈn oc majeke cywitz sant. Juˈ tzunj cyxomela sant.

¹⁵ Ejeeˈy xjal n‑el cyey cyniyˈ tiˈj. Juˈ tzunj cxeˈl nkˈumena jun tumel cyey. Cybisenx tiˈj ka tumel nyola bix ka min. ¹⁶ Oj t‑xiˈ kcˈaˈn santa cena te nabbil tetzlen ttz̈qˈuel Cristo tuj t‑xumlal, nko yeecˈantzen at kmojbabl kiib tuyaxin. Juˈx oj t‑xiˈ kwaaˈn juun piẍ pan te nabbilte tcyimlen Cristo, nko yeecˈantzen junx elnina koˈ tiˈ t‑xumlalxin. ¹⁷ Juˈcˈa japenina koˈ tisenj pan te santa cena chˈimacˈa n‑eˈla. Amale nbaj piẍet pero junx pan, jax juˈx ke. Amale nimet kbaj ocslal, pero junx elnina koˈ. Jpan nbaj piẍet pero junx, jatzen jun techel junx elnina koˈ tiˈ Cristo.

¹⁸ Junxitl techel cxeˈl nkˈumena cyey. Cyxol aj Israel nejl e cub cypaten ke pala alimaj te Dios twiˈ altar, bix e xiˈ cychyoˈntlxin cychuˈl alimaj. Tej t‑xiˈ cychyoˈnxin juˈwa, e xiˈ cyyeecˈanxin at cymojbabl cyiibxin tuya Dios. ¹⁹ ¿Titzen nxaˈ nkbaˈna jlu juˈwa? Min tzin nkbaˈna tecˈaxit jchiˈpj nxiˈ oyet cye sant twitzj chiˈpj min txiˈ oyet, bix min tzin nkbaˈna ejeeˈt sant at cyipemal. Jnxiˈ nkbaˈna ja te il tiˈj jaj jaaˈ nxaˈ kkˈoˈn kanem. ²⁰ Jnxiˈ nkbaˈna kej xjal yaaˈn ocslal oj nxiˈ cyoyen jun cyoybil te jun sant, yaaˈn te Dios nxaˈ cyoyen, sino cye biman nxaˈ cyoyen. Juˈ tzunj cykˈoˈnc cycˈuˈja tiˈj tuˈn miˈn txiˈ cychyoˈna chiˈpj oˈyen cye sant, cuma ncyˈiya tuˈn cymojban cyiiba cyuya biman. ²¹ Mlay tuˈn tbaj cysmoˈna cˈaal cyanema tiˈ Dios bix cˈaal cyanema cyiˈ biman, pero juˈ tzin cyseˈna ka nchi nimana santa cena bix ncheˈxtla te nimal cywitz sant. ²² Oj tcub kpaˈn kanem tiˈ Dios, tzultzen tkˈoj Dios kiˈj, bix mlay weˈ tkˈoj Dios kuˈn, cuma at mas tipemalxin twitz ke kipemal. N‑oc juch tcˈuˈj Dios kiˈj, bix tajxin nuk tiˈjxin cˈoquela juch ke kcˈuˈj.

Cykil baˈn tuˈn tbint kuˈn pero yaaˈn cykilca najben

²³ Jax cyuˈna cykil baˈn tuˈn tbint tuˈn jun ocslal, pero nxiˈ nkbaˈna cyey yaaˈn cykilca najben. Jacˈa bint te alcye kaj, pero yaaˈn cykilca jacˈa tzˈajben tuˈn ktz̈ˈiy tuj tyol Dios, ²⁴ bix yaaˈn entera baˈn te yecˈbil te juntl. Cyxiˈmex alcye jun baˈn te juntl ocslal. Yaaˈn nuk chi ximela tiˈj alcye cyaja.

²⁵ Pero oj cypona te lokˈol chiˈpj tuj qˈueybil chiˈpj, mintiiˈ il tiˈj tuˈn tbaj cykanena alcye chiˈpj otk txˈaj oybaj twitz sant. Ka mintiiˈ tumel cyuyey ka oˈyen chiˈpj cye sant bix ka min, mintiiˈ tuˈn tbaj cycˈuˈja tiˈj, ²⁶ cuma cykilca wikan chiˈpj o tzaj tkˈoˈn Dios ke. Tz̈i tyol Dios cyjulu: “Entera twitz txˈotxˈ tuyax cykilca at twitz txˈotxˈ ntzaj tkˈoˈn Dios,” tz̈i tyol Dios.

²⁷ Katzen ma ttxoc jun xjal yaaˈn ocslal ejeeˈy te waaˈl tuya, ka cyaja cheˈxa, baˈn tuˈn cyxiˈy, bix baˈn tuˈn t‑xiˈ cychyoˈna laˈ alcye chiˈpj ctzaal kˈoˈn cyey. Miˈn chi oca te kanlte ka otk txˈaj oyet chiˈpj twitz sant bix ka min. ²⁸ Pero ka ma tkˈumen jun xjal te cyey, “Oˈyen tej chiˈpj lu cye sant,” ka tz̈i juˈwa, miˈn txiˈ cychyoˈna jchiˈpj, tuˈn miˈn cybinchay jun il tuj twitzj xin nkˈumente. ²⁹ Pero n‑el kniyˈ tiˈj nuk te te texin il tuj twitzxin, yaaˈn te cyey.

Pero cxeˈl cykbaˈna yaaˈn tumel tuˈn miˈn txiˈ cychyoˈna chiˈpj nuk tuˈn tyol juntl, ³⁰ bix yaaˈn tumel oj toc ten juntl xjal yolel cyiˈja oj t‑xiˈ cytz̈iybeˈna alcye ntzaj tkˈoˈn Dios cyey bix nxiˈ cykˈoˈna chjonte te Dios tiˈj. ³¹ Jax cyuˈna cykilca chiˈpj baˈn tuˈn t‑xiˈ kchyoˈn. Pero cxeˈl nkbaˈna cyey, amale baˈnt tuˈn t‑xiˈ kchyoˈn cykilca, bix tuˈn t‑xiˈ kcˈaˈn cykilca, bix tuˈn t‑xiˈ kbinchaˈn cykilca, mas il tiˈj tuˈn kajben te Dios twitzj tuˈn tbint cykilca kuˈn. ³² Juˈ tzunj miˈn cub kyeecˈan jun kbinchbil tuˈn tcub tzˈak juntl tuj il kuˈn, mi nuk jun judío bix mi nuk jun yaaˈn judío bix mi nuk jun ocslal. ³³ Juˈ nbint wuˈna. Tiˈj cykilca nbint wuˈna, nchin jyona tuˈntzen wajbena te cykilca xjal. Mintiiˈ nbint wuˈna nuk jaj baˈn te weya, sino jaj baˈn te cykilca, tuˈntzen cyclet.