M’Cheyne Bible Reading Plan

मूसा बरे प्रमाण

4 तब मूसा क जवाब दिहेस, “मुला इस्राएलियन मोहे पइ बिस्सास न करिहीं। उ पचे कइहीं, ‘यहोवा तोह पइ परगट नाहीं भवा।’”

² मुला यहोवा मूसा स कहेस, “तू आपन हथवा मँ का धइके राखे बाट्या?”

मूसा जवाब दिहेस, “इ मोर टहरइ क लाठी अहइ।”

³ यहोवा कहेस, “आपन टहरइवाली लाठी जमीन प फेंकि द्या।”

तउ मूसा आपन टहरइ क लाठी क जमीन प फेंक दिहेस। अउ लाठी साँप बन गवा। मूसा डेरान अउ ऍसे परान। ⁴ मुला यहोवा मूसा स कहेस, “अगवा बढ़ा अउ पूँछ धइके साँप क पकड़ि ल्या।”

ऍह बरे मूसा अगवा कइँती बढ़ा अउ साँप क पूँछ धइ लिहस। जइसेन मूसा अइसा किहेस, साँप फुनि लाठी होइ गवा। ⁵ तब यहोवा कहेस “आपन छड़ी क इ तरह बइपरा अउ मनई बिस्सास करइँ, कि यहोवा ओकर पुरखन क परमेस्सर, इब्राहीम क परमेस्सर, इसहाक क परमेस्सर अउ याकूब क परमेस्सर तोहार समन्वा परगट भवा रहा।”

⁶ तब यहोवा मूसा स कहेस, “मइँ तोहका दूसर परमान देब। आपन हाथ क लबादा क नीचे धरा।”

तउ मूसा आपन हाथ क आपन लबादा क भीतर किहेस। तब मूसा आपन हाथ क लबादा स बाहेर निकारेस अउ उ बदरि गवा। ओकर हाथ बफर् क नाई उज्जर दागे स भरि गवा रहा।

⁷ तब यहोवा कहेस, “अब तू आपन हाथ लबादा क भीतर धरा।” ऍह बरे आपन हाथ फुन आपन लबादा क भितरे धइ द्या। तब मूसा आपन हाथ बाहेर निकारेस अउ टेँम भी ओकर हाथ बदरि गएन। अब ओकर हाथ पहिले क नाई होइ गवा रहा।

⁸ तब यहोवा कहेस, “जदि मनई तोहार बिस्सास छड़ी बइपरे प न करइँ तउ उ पचे तोह प बिस्सास तबहिं करिहिं जबहिं तू इ दूसर चीन्हा क देखउब्या। ⁹ जदि तोहरे दुइनउँ चीन्हा देखाएँ क पाछे तोहार बिस्सास न करिहिँ तउ तू नील नदी स कछू पानी लइ लिहा। पानी क जमीन प गिराउब सुरू कइ दिहा अउ जइसे ही इ जमीन क छुई, रकत बनि जाई।”

¹⁰ मुला मूसा यहोवा स कहेस, “हे यहोवा, मइँ फुरे कहत हउँ, मइँ कुसल बोलवइया नाहीं हउँ। मइँ कबहूँ मनइयन स नीक तौर स बतियाइ काबिल नाहीं भएउँ। अउ आपसे बतियाए क पाछे भी नीक बोलवइया नाहीं हउँ। आप जानत हीं कि मइँ धीमे धीमे बोलत हउँ अउ उत्तिम सब्दन क बइपरत नाहीं हउँ।”

¹¹ तब यहोवा ओसे कहेस, “कउन मनई क मुँहना क बनाएस? अउर कउन मनई क गूँगा या न बोलइ क लाइक बनइ सकत ह? कउन मनई क आँधर बनइ सकत ह? कउन मनई क लखइ क लाइक बनइ सकत ह? मइँ ही हउँ जउन इ सब कइ सकत हउँ, मइँ अहउँ यहोवा। ¹² ऍह बरे अब जा। जबहिं तू बोलब्या, मइँ तोहरे साथे रहब। मइँ बोलइ बरे तोहका सब्दन देब।”

¹³ मुला मूसा कहेस, “मोर यहोवा। मइँ तोहसे बिनती करत हउँ कि दुसरे मनई क पठवा, मोका नाहीं।”

¹⁴ तब्बइ यहोवा मूसा प कोहान। यहोवा कहेस, “नीक अहइ। मइँ तोहका अउर कउनो क मदद बरे देब। मइँ तोहरे भइया हारून जउन लेवी परिवार स अहइ, क बइपरब। उ एक कुसल बोलवइया अहइ। हारून तोह स मिलइ बरे तोहरे लगे आवत आहइ। उ तोहका निहारिके खुस होइ। ¹⁵ उ तोहरे संग फिरौन क लगे जाइ। तोहका का कहइ का बा, मइँ बताउब। तब तू हारून क बतउब्या। जउन हारून फिरौन स बात करइ बरे नीक सब्दन बइपरी। ¹⁶ हारून तोहरे बरे मनइयन स बात करी। तू ओकरे बरे एक बड़का राजा क रूप मँ रहब्या अउर उ तोहरे कइँती स बोलवइया होइ। ¹⁷ अब जा। आपन छड़ी साथे लइ जा। आपन छड़ी क चमत्कार अउ दूसर चमत्कार मनइयन क समन्वा प्रदसिर्त कर्या।”

मूसा मिस्र लउटत ह

¹⁸ तब मूसा आपन ससुर यित्रो क लगे लौटि आवा। मूसा यित्रो स कहेस, “मेहरबानी कइ क मोका मिस्र जाइ द्या। मइँ मिस्र मँ आपन लोगन क लखइ चाहत हउँ कि मोर लोगन अबहुँ जिअत अहइँ।”

यित्रो मूसा स कहेस, “तू सान्ति स जा। इ ठीक अहइ।”

¹⁹ उ समइया जब मूसा मिदियन मँ ही रहा, यहोवा ओसे कहेस, “अब मिस्र वापिस जाइ क तोहारे बरे सुरच्छित टेम अहइ। जउन मनइयन तोहका मारइ चाहत रहेन, उ पचे मरि गएन।”

²⁰ ऍह बरे मूसा आपन मेहरारू अउ आपन बेटवन क लइके गदहा प बइठाएस। अउ मिस्र क वापसी प लौटि गवा। मूसा उ टहरइवाली छड़ी क संग लिहेस जेहमाँ यहोवा क सक्ती रही।

²¹ जउन टेम मूसा मिस्र क लउटत रहा, परमेस्सर ओसे कहेस। “जबहिं तू फिरौन स बतियाबा तउ उ सबहिं चमत्कारे क देखावा जेका देखावइ क सक्ती मइँ तोहका दिहेउँ ह। मुला मइँ फिरौन क बहोत जिद्दी बनाउब। उ लोगन क जाइ न देइ। ²² तब तू फिरौन स कहया: ²³ ‘यहोवा कहत ह, इस्राएल मोर पहिलौटी क बेटवा अहइ। मोरे बेटवा क जाइ द्या अउर मोर आराधना करइ द्या। जदि तू इस्राएल क जाइ स मना करत बाट्या तउ मइँ तोहार पहिलौटी क पूत मारि डाउब।’”

मूसा क पूत क खतना

²⁴ जउन टेम मूसा मिस्र क जात्रा प जात भवा रहा रात काटइ बरे सराय मँ रूका। यहोवा इ जगह प मूसा स भेँटा अउ ओका मारि डावइ क जतन किहेस। ²⁵ मुला सिप्पोरा चकमक पाथर क तेज छूरी लिहेस अउ आपन बेटवा क खतना किहेस। उ आपन बेटवा क बाहरी चाम लिहेस अउ ओकर गोड़वा छुएस। तब उ मूसा स कहेस, “तू मोरे लहू क भतार अहा।” ²⁶ सिप्पोरा इ किहेस काहेकि ओका आपन बेटवा क खतना करइ पड़ा रहा। ऍह बरे यहोवा मूसा क माफ़ कइ दिहेस अउ ओका नाहीं मारेस।^[a]

यहोवा क समन्वा मूसा अउ हारून

²⁷ यहोवा हारून स कहेस। यहोवा ओनका बताएस, “रेगिस्तान मँ जा अउ मूसा स मिला।” तउ हारून गवा अउ यहोवा क पहाड़े प मूसा स मिला। जब हारून मूसा क लखेस, उ ओका चूमेस। ²⁸ मूसा हारून क सब कछू बताएस जउन यहोवा कहे रहा। मूसा हारून क यहोवा क जरिए पठवइ क कारण बताएस। मूसा हारून क उ चमत्कारन अउ उ चीन्हा क समझाएस बुझाएस जेका परमान क वास्ते देखँवइ क रहा।

²⁹ इ तरह मूसा अउ हारून गएन अउ उ पचे इस्राएल क मनइयन मँ स सबहिं बुजुर्गन क बटोरेन। ³⁰ तबहिं हारून मनइयन स कहेस। उ मनइयन क सारी बातन क बताएस जउन यहोवा मूसा स कहेस। तबहिं मूसा सब मनइयन क देखइ बरे सब परमानन क सामने कइके देखाँएस। ³¹ ऍह बरे लोग मूसा पइ बिस्सासेन कि परमेस्सर ओका पठएस ह। इस्राएलियन समझेन कि यहोवा लोगन का मुसिबतन क लखइ क पाछे ओनके मदद बरे आवा रहेन अहइ। तउ उ पचे निहुरि गएन अउ आराधना किहेस।

बिसवास क सक्ती

(मत्ती 8:5-13; यूहन्ना 4:43-54)

7 ईसू मनइयन क जउन सुनावा चाहत रहा, ओका कहि चुकइ क पाछे उ कफरनहूम चला गवा। ² हुवाँ एक फऊजी नायक रहा जेकर नउकर ऍतना बेरमिया रहा कि मरइ के नगीचे रहा। उ नउकर ओकर बहोत पियारा रहा। ³ फऊजी नायक जब ईसू क बारे मँ सुनेस तउ उ कछू बुजुर्ग यहूदी नेतन क इ बिनती करइ क ओकरे लगे पठएस कि उ आइके ओकरे नउकर क प्राण बचाइ लेइ। ⁴ जब उ पचे ईसू क नगीचे पहुँच गएन तउ उ सबइ सच्चे मने स बिनती करत भए कहेन, “उ इ जोग्ग अहइ कि तू ओकरे बरे अइसा करा। ⁵ काहेकि उ हमरे मनइयन स पिरेम करत ह। उ हमरे बरे आराधनालय क बनवाएस ह।”

⁶ ऍह पर ईसू ओनके संग चल दिहेस। अबहिं जब उ घरे स जिआदा दूर नहीं रहा, उ फऊजी नायक ओकरे लगे आपन मीतन क इ कहइ बरे पठएस, “पर्भू आपन क कस्ट जिन द्या काहेकि मइँ ऍतना नीक मनई नाहीं कि तू मोरे घरवा आवा। ⁷ एह बरे मइँ तोहरे लगे आवइ तलक नाहीं सोचेउँ। मुला तू बस कहि भर द्या, मोर नउकर नीक होइ जाई। ⁸ मइँ खुद कउनो अधिकारी क मातहत काम करत हउँ अउर मोरे मातहत भी कछू सिपाही अहइँ। मइँ जब कउनो स कहत हउँ, ‘जा’ तउ उ चला जात ह। अउर जब मइँ आपन नउकर स कहत हउँ, ‘आवा’ तउ उ आइ जात ह अउर जब मइँ आपन नउकर स कहत हउँ, ‘इ करा’ तउ उ ओका करत ह।”

⁹ ईसू जब इ सुनेस तउ ओका ओह प बहोत अचरज भवा। जउन भारी मनइयन क भीड़ ओकरे पाछे चली आवत रही, ओनके कइँती मुड़िके ईसू कहेस, “मइँ तोहका बतावत हउँ अइसा बिसवास मोका इस्राएल मँ भी कहूँ नाहीं मिला।”

¹⁰ फिन पठए भए उ पचे जब वापस घरे पहुँचेन तउ उ सबइ उ नउकरे क बेरामी स जरटुट पाएन।

मुर्दा क जिन्नगी देब

¹¹ फिन अइसा भवा कि ईसू नाइन नाउँ क एक सहर चला गवा। ओकर चेलन अउर भारी आलम ओकरे संग रहा। ¹² उ जइसे ही सहर दुआरे क नगिचे आवा तउ हुवाँ स एक मुर्दा क लइ जात रहेन। उ आपन विधवा महतारी क इकलौता बेटवा रहा। तउ सहर क अनगिनत मनइयन क भीड़ ओकरे संग रही। ¹³ जइसे पर्भू ओका निहारेस तउ ओकर हिरदय दया स भर गवा। उ उससे बोला, “जिन रोवा।” ¹⁴ फिन उ अगवा बढ़ा अउर उ ताबूत क छुइ लिहस उ पचे जउन ताबूते क लइ जात रहेन, हुवँइ ठहर गएन। ईसू कहेस, “नउ जवान! मइँ तोहसे कहत हउँ खड़ा ह्वा!” ¹⁵ तउ उ मुर्दा मनई बइठ गवा अउर बोलइ लाग। ईसू ओका ओकरी महतारी क वापस लौटाएस।

¹⁶ अउर फिन उ सबइ स्त्रद्धा अउर अचरज मँ पड़ि गएन। अउर इ कहत भएन परमेस्सर क महिमा बखनइ लागेन, “हमरे बीच एक महान नबी परगट भवा अहइ!” अउर कहइ लागेन, “परमेस्सर आपन मनइयन क मदद करइ बरे आइ ग अहइ।”

¹⁷ ईसू क समाचार यहूदिया अउर आस-पास क देसन मँ सब कहूँ कइँती फैलि गइ।

यूहन्ना क सवाल

(मत्ती 11:2-19)

¹⁸ इ सबइ बातन क बारे मँ यूहन्ना क मनवइयन ओका सब कछू बताइ दिहन। तउ यूहन्ना आपन दुइ चेलन क बोलाइ के ¹⁹ ओनका पर्भू स इ पूछइ बरे पठएस, “का तू उहइ अहा, जउन आवइवाला अहइ या हम पचे कउनो अउर क बाट जोही?”

²⁰ फिन उ मनइयन ईसू क लगे पहुँचेन तउ उ पचे कहेन, “बपतिस्मा क देवइया यूहन्ना हमका तोहसे इ पूछइ पठएस ह: ‘का तू उहइ अहा जउन आवइवाला अहइ या हम सबइ कउनो अउर क बाट जोही।’”

²¹ उहइ समइ उ बहोत स बेरमिया क नीक किहेन अउर ओनका करुण दुख अउर दुस्ट आतिमन स छुटकारा दियाएस। अउर बहोत स आँधर न क आँखिन दिहेस। ²² फिन उ ओनका जवाब दिहस, “जा अउर यूहन्ना स जउन तू निहार्या ह अउर सुन्या ह, ओका बतावा कि आँधर फिन स लखत अहइँ, लँगड़ा लूला चलत फिरत अहइँ अउर कोढ़ी सुद्ध होइ ग अहइँ। बहिरन सुनि पावत हीं अउर मुरदा फिन जिआवा जात अहइँ। गरीब मनइयन क सुसमाचार सुनाई जात अहइ। ²³ उ मनई धन्य अहइ जेका मोरे क स्वीकार करइ मँ कउनो हिचक नाहीं।”

²⁴ जब यूहन्ना क संदेस लइ आवइवालन चला गएन तउ ईसू भीड़े मँ मनइयन क यूहन्ना क बारे मँ बताउब सुरु किहेस: “तू पचे बियाबान जंगल मँ का लखइ गवा रह्या? का हवा मँ झूलत कउनो सरपत लखे गवा रइया? नाहीं? ²⁵ फिन तू का लखइ गवा रह्या? का कउनो पुरुस क मँहगा ओढ़ना पहिरे क लखइ गवा रह्या? नाहीं, उ पचे जउन उत्तिम ओढ़ना पहिरत हीं अउर जउन भोग बिलास क जिन्नगी मँ जिअत हीं, उ सबइ तउ रजवाड़ा मँ पाइ जात हीं। ²⁶ मुला बतावा तू का देखइ गवा रह्या? का कउनो नबी? हाँ, मइँ तोहका बतावत हउँ कि तू जेका लख्या ह, उ कउनो नबी स कहीं जिआदा बा। ²⁷ इ उहइ अहइ जेकरे बारे मँ लिखा अहइ:

²⁸ मइँ तोहका बतावत हउँ कि कउनो स्त्रियन स पइदा भएन मँ यूहन्ना स महान कउनो नाहीं अहइ। मुला फिन भी परमेस्सर क राज्य क छोटा स छोटा मनई भी ओस बड़का बा।”

²⁹ (तबहिं हर कउनो, हियाँ तलक कि चुंगी (टैक्स) उगहिया भी यूहन्ना क सुनिके ओकर बपतिस्मा लइके इ मान लिहेन कि परमेस्सर क रस्ता सच्चा अहइ। ³⁰ मुला फरीसियन अउर धरम सास्तिरियन ओकर बपतिस्मा न लइके ओनके बारे मँ परमेस्सर क इच्छा क टारि दिहन।)

³¹ “तउ फिन इ पीढ़ी क मनइयन क उपमा मइँ कउने स करउँ कि उ पचे कइसे बाटेन? ³² उ पचे बजारे मँ बइठेन ओन बचवन क नाईं अहइँ जउन एक दूसर क पुकारिके कहत हीं:

³³ काहेकि बपतिस्मा क देवइया यूहन्ना आवा जउन न तउ रोटी खात रहा अउर न ही दाखरस पिअत रहा अउर तू कहत ह, ‘ओहमाँ दुस्ट आतिमा समाइ गइ अहइ।’ ³⁴ फिन खात पिअत भवा मनई क पूत आवा, मुला तू कहत अहा, ‘देखा, इ पेटार अहइ। पियक्कड़ अहइ, चुंगी उगहियन अउर पापी मनइयन क मीत अहइ।’ ³⁵ बुद्धि क उत्तिम होब ओकरे फल स सिद्ध होत ह।”

फरीसी समौन

³⁶ फरीसियन मँ एक ठु फरीसी आपन संग खइया प ओका न्योत दिहस। तउ उ फरीसी क घर गवा अउर ओकरे हियाँ भोजन करइ बइठा।

³⁷ हुवँई सहर मँ एक पापी स्त्री रही, ओक जब इ पता चलि गवा कि उ एक फरीसी क घर भोजन करत अहइ तउ उ स्फटिक क एक पथरी मँ इतर लइके आइ। ³⁸ उ ओकरे पाछे ओकरे गोड़वा क लगे खड़ी रही। उ रोवत रही। आपन आँसुअन स उ ओकर गोड़ भिजवइ लाग। फिन उ गोड़वा क आपन बाले स पोंछेस अउर गोड़वा क चूमिके ओन प इतर उड़ेरेस।

³⁹ उ फरीसी जउन ईसू क आपन घर बोलाएस, इ लखिके मनवा मँ सोचेस, “जदि इ मनई नबी होत तउ जान लेत कि ओका छुवइवाली स्त्री कउन अहइ अउर कइसी अहइ? उ जान लेत कि इ तउ पापिन अहइ।”

⁴⁰ जवाबे मँ ईसू ओसे कहेस, “समौन मोका तोहसे कछू कहइ क अहइ।”

उ बोला, “हे गुरु, कहा।”

⁴¹ ईसू कहेस, “कउनो साहूकारे क दुइ करजदार रहेन। एक प ओकरे पाँचसौ चानी क सिक्का निकरत रहेन अउर दूसर प पचास। ⁴² काहेकि उ दुइनउँ करजा नाहीं पाट पाएन। यह बरे उ दाया कइके दुइनउँ क करजा माफ कइ दिहस। अब बतावा दुइनउँ मँ स ओका जिआदा पिरेम कउन स करी?”

⁴³ समौन जवाब दिहस, “मोर बिचार बा, उहइ जेका उ जिआदा करजा छोड़ दिहस।”

ईसू कहेस, “तू नीक सोच्या ह।” ⁴⁴ फिन उ स्त्री कइँती मुड़िके उ समौन स कहेस, “तू इ स्त्री क लखत अहा? मइँ तोहरे घरवा आवा अही, तू मोड़े गोड़वा धोवइ क पानी नाहीं दिहा मुला इ मोरे गोड़वा क अँसुअन स धोइ दिहस अउर फिन आपन बरवा स पोंछेस। ⁴⁵ तू स्वागत मँ मोका नाहीं चूम्या मुला इ जब तलक मइँ भितरे गवा हउँ, मोरे गोड़वा क लगातार चूमत बाटइ। ⁴⁶ तू मोरे मूड़े प तेल नाहीं मल्या, मुला इ मोरे गोड़वा प इतर छिड़केस। ⁴⁷ एह बरे मइँ तोहका बतावत हउँ कि ऍकर अगाध पिरेम दर्सित करत ह कि ऍकर पाप छमा कइ दीन्ह ग अहइँ। मुला उ जेका तनिक पापन क छमा मिली, उ थोड़ा पिरेम करत ह।”

⁴⁸ तब ईसू उ स्त्री स कहेस, “तोहार पाप छमा कइ दीन्ह ग अहइँ।”

⁴⁹ फिन जउन ओकरे संग जेंवत रहेन, उ सबइ मने मँ सोचइ लागेन, “इ कउन अहइ, जउन पापन क छमा कइ देत ह?”

⁵⁰ तब उ स्त्री स ईसू कहेस, “तोहार बिसवास तोहार रच्छा किहेस ह। सांति स जा।”

अय्यूब क जवाब

21 एह पइ अय्यूब जवाब देत भए कहेस।

चढ़ावइ क भोजन

8 जब मूर्तियन पर चढ़ाइ गइ बलि क बारे मँ: हम इ जानित ह, “हम सबहिं गियानी अही।” “गियान” लोगन क अहंकार स भरि देत ह। मुला पिरेम स मनई अधिक सक्तिसाली बनत ह। ² अगर केऊँ सोचइ कि उ कछू जानत ह तउ जेका जानइ चाही ओकरे बारे मँ तउ ऊ अबहुँ कछू जनबइ नाहीं करत। ³ अगर केउ परमेस्सर क पिरेम करत ह त उ परमेस्सर क जरिये जाना जात ह।

⁴ तउन मूरर्तियन पर चढ़ावा गवा भोजन क बारे मँ हम जानत अही कि एह संसारे मँ मूरति का अस्तित्व नाहीं बा। अउर इ कि “परमेस्सर केवल एक्कइ अहइ।” ⁵ अउर धरती या आकास मँ जद्यपि अइसेन ही देवता बहुत स अहइँ (बहुत स “देवता” हयेन, बहत स “पर्भू” हयेन।) ⁶ मुला हमरे बरे तउ एक्कइ परमेस्सर बा, हमार पिता। उही स सब कछू आवत ही अहइ। अउर ऊही क बरे हम जिअत अही। पर्भू केवल एक अही, ईसू मसीह। उही क द्वारा सब चीजन क आस्तित्व बा अउर ऊही क जरिये हमार जीवन बा।

⁷ मुला इ गियान सब कीहीउ क लगे नाहीं अहइ। कछू लोग जउन अब तलक मूर्ति पूजा क आदी अहइँ, अइसेन चीजन खात हीं अउर सोचत हीं जइसेन माना उ चीज मूर्ति क प्रसाद अहइ। ओनके इ करमे स ओनकर आतिमा कमजोर होइ क कारण दूसित होइ जात ह। ⁸ मुला उ प्रसाद तउ हमका परमेस्सर क लगे न लइ जाइ। अगर हम ओका नहीं खाइ तउ कछू घटी नाहीं जात अउर अगर खाई तउ कछू बढ़ नाहीं जात।

⁹ सावधान रहा। कहूँ तोहर इ अधिकार ओकरे बरे, जउन कमजोर बाटेन, पाप मँ गिरइ क कारण न बन जाइ। ¹⁰ काहेकि कमजोर बिसवास क कउनउ मनई अगर तोहे जइसेन इ बिसय क जानकार क मूर्तिवाला मंदिर मँ खात भआ देखत ह तउ ओकर दुर्बल मन का ओह हद तलक न भटकि जाई कि उ मूर्ति पर बलि चढ़ाइ गइ चीजन क खाइ लागेन। ¹¹ तोहरे गियान स, कमजोर मने क मनई क तउ नास ही होइ जाइ तोहरे उहीं बन्धु क, जेकरे बरे मसीह तउ जान दइ दिहेस। ¹² इही तरह अपने भाइयन अउर बहिनियन क विरुद्ध पाप करत भए अउर ओनके कमजोर मने क चोट पहुचावत भए तू लोग मसीह क विरुद्ध पाप करत अहा। ¹³ ऍह बरे अगर भोजन मोरे भाई क पाप क राह पर बढ़ावत ह तउ मइँ फिन कभउँ माँस न खाबइ ताकि मइँ अपने भाई क बरे, पाप करइ क कारण न बनउँ।