M’Cheyne Bible Reading Plan

आखिर मँ सारा क एक लरिका

21 अब यहोवा सारा लगे आएन काहेकि उ कहेस रहा, अउर उ सारा बरे उहइ किहेस जउन उ करइ क वादा किहे रहा। ² सारा गरभ धरेस अउर इब्राहीम बरे ओकर बुढ़ापे मँ एक लरिका क जन्मेस। सही टेम प जइसा परमेस्सर वचन दिहे रहा वइसा ही भवा। ³ सारा पूत जन्मेस अउ इब्राहीम ओकर नाउँ इसहाक राखेस। ⁴ परमेस्सर क हुकुम क मुताबिक इब्राहीम आठ दिन होए प इसहाक क खतना किहस।

⁵ इब्राहीम सौ बरिस क रहा जब ओकर पूत इसहाक पइदा भवा ⁶ अउ सारा कहेस, “परमेस्सर मोका सुखी बनाइ दिहस ह। हर एक मनई जउन इ बारे मँ सुनी उ मोहसे खुस होइ। ⁷ कउनो भी इ नाही सोचत कि मइँ सारा इब्राहीम बरे पूत देबउँ। मुला मइँ इब्राहीम क ओकरे बुढ़ापे क उमर मँ एक ठु पूत दिहेउँ ह।”

घरे मँ परेसानी

⁸ अब बचवा ऍतना बाढ़ गवा कि महतारी क दूध तजिके ठोस भोजन सुरु करइ। जउने दिन ओकर दूध छोड़वावा गवा उ दिन इब्राहीम एक बहोत बड़का भोज दिहस। ⁹ बीते भए टेम मँ मिस्र क दासी एक ठु पूत क जन्मेस। इब्राहीम उ पूत क बाप रहा। सारा लखेस कि हाजिरा क पूत इसहाक क तंग करत ह। ¹⁰ ऍह बरे सारा इब्राहीम स कहेस, “उ दासी मेहरारु अउ ओकरे पूत क हिआँ पठइ द्या। जब हम पचे मरब हम पचन क सबहिं चिजियन इसहाक क मिलिही। मइँ नाहीं चाहत कि ओकर पूत इसहाक क संग ओन चिजियन मँ हीसा लेइ।”

¹¹ इस्माएल क बरे इ कीन्ह जाना एका सोच इब्राहीम क बहोत ज्यादा दुःखी कइ दिहन। ¹² मुला परमेस्सर इब्राहीम स कहेस, “उ लड़का क बारे मँ दुःखी जिन ह्वा। उ दासी क बारे मँ दुःखी जिन ह्वा। जउन सारा चाहत ह तू उहइ करा। तोहार बंस इसहाक क बंस स चली। ¹³ मुला मइँ तोहरे दासन क पूतन क असीसब। उ तोहार पूत अहइ ऍह बरे मइँ ओकरे परिवार क भी एक बड़ा रास्ट्र बनाउब।”

¹⁴ दूसर दिन बहोत भिन्सारे इब्राहीम कछू भोजन अउ पानी लिहस। इब्राहीम इ चीजन हाजिरा क दइ दिहस। हाजिरा उ सबहि चीजन क लिहस अउ बच्चा क संग दूर चली गइ। हाजिरा उ ठउर तजि दिहस अउर उ बेर्सोबा क रेगिस्तान मँ भटकइ लाग।

¹⁵ कछू टेम पाछे हाजिरा क सारा पानी खतम होइ गवा। पिअइ बरे कछू पानी भी नाहीं बचा। ऍह बरे हाजिरा आपन लरिका क एक झाड़ी तरे राखेस। ¹⁶ हाजिरा हुआँ स कछू दूर गइ। तब उ रुकी अउ बइठि गइ। हाजिरा सोचेस कि ओकर पूत मरि जाइ काहेकि हुआँ पानी नाहीं रहा। उ ओका मरता भवा नाहीं देखइ चाहत रही। उ हुआँ बइठि गइ अउ रोवइ लाग।

¹⁷ यहोवा लरिका क रोउब सुनेस। सरग स एक दूत हाजिरा क लगे आवा। उ पूछेस, “हाजिरा, तोहका का तकलीफ अहइ। डेराउ नाही काहेकि परमेस्सर हुवाँ लरिका क रोउब सुन लिहेस। ¹⁸ जा, अउर आपन पूत क सँभारा। ओकर हाथ धइ ल्या अउ ओका संग लइ चला। मइँ ओका बहोत बड़का रास्ट्र क पिता बनाउब।”

¹⁹ परमेस्सर हाजिरा क आँखी इ तरह खोलेस कि उ एक पानी क कुआँ निहारि सकी। ऍह बरे हाजिरा कुआँ प गइ अउ उ थैला क पानी स भरि लिहस, तब उ बच्चा क पानी पिअइ बरे दिहस।

²⁰ बच्चा जब तक बाढ़ा नाही तब तलक परमेस्सर ओकरे संग रहा। इस्माएल रेगिस्तान मँ रहा अउ एक सिकारी बन गवा। उ बहोत बढ़िया तीर चलाउब सीख लिहस। ²¹ ओकर महतारी मिस्र स ओकरे बरे दुल्हन लइ आइ। उ पचे सबइ पारान रेगिस्तान मँ रहइ लागेन।

इब्राहीम अबीमेलेक स सौदा करत ह

²² तब अबीमेलेक अउ पीकोल इब्राहीम स बात किहन। पीकोल अबीमेलेक क फउज क सेनापति रहा। उ पचे इब्राहीम स कहेन, “तू जउन कछू करत अहा, परमेस्सर तोहार साथ देत ह। ²³ ऍह बरे तू परमेस्सर क समन्वा इ बचन द्या कि तू मोरे अउ मोरे बच्चन बरे भला रहब्या। तू इ बचन द्या कि तू मोरे बरे अउ जहा तू रह्या ह उ देस बरे दयालु रहब्या। तू इ भी बचन द्या कि मइँ तोहरे बरे जेतॅना दयालु रहा ओतॅना तू मोहे प दयालु रहब्या।”

²⁴ इब्राहीम कहेस, “मइँ बचन देत हउँ कि तोहसे मइँ बइसा ही बिउहार करब जइसा तू मोरे संग बिउहार किया ह।” ²⁵ तब इब्राहीम अबीमेलेक क ओराहना दिहस। इब्राहीम ऍह बरे ओराहना दिहस कि अबीमेलेक क नउकरन पानी क कुआँ प कब्जा कइ लिहन।

²⁶ अबीमेलेक कहेस, “ऍकरे बारे मँ मइँ इ बहिली बार सुनेउँ ह। मोका पता नाहीं बाटइ, कि इ के किहेस ह अउर तू भी ऍकर चर्चा मोहसे ऍहसे पहिले कबहु नाहीं किह्या।”

²⁷ ऍह बरे इब्राहीम अउ अबीमेलेक एक समझौता किहन। इब्राहीम समझौता क सबूत क रुप मँ अबीमेलेक क कछू भेड़िन अउ गोरु दिहस। ²⁸ इब्राहीम सात ठु मादा भेड़ी क बच्चा भी अबीमेलेक क समन्वा लावा।

²⁹ अबीमेलेक इब्राहीम स पूछेस, “तू इ सबइ सात ठु भेड़ी क मादा बच्चन क काहे अलगाइ कइ दिह्या?”

³⁰ इब्राहीम कहेस, “जब तू इ सातहु^[a] भेड़ी क बच्चन स मोहसे लेब्या तउ इ सबूत रही कि इ नारा मइ खनेउँ ह।”

³¹ ऍह बरे ऍकरे पाछे उ नारा बेर्सैबा कहवावा गवा। उ पचे नारा क इ नाउँ दिहन काहेकि इ उ ठउर रहा जहाँ उ पचे एक दूसर क बचन दिहे रहेन।

³² इ तरह इब्राहीम अउ अबीमेलेक बेर्सेबा मँ एक समझौता किहन। तब अबीमेलेक अउ सेनापति दुइनउँ पलिस्तियन क पहँटा मँ लौटि गएन।

³³ इब्राहीम बेर्सेबा मँ झाऊ क एक बृच्छ लगाएस। उ ठउरे प इब्राहीम परमेस्सर, जउन हमेसा रहत ह स पराथना किहस। ³⁴ अउर इब्राहीम पलिस्तियन क देस मँ बहोत समइ तलक रहा।

मजूर क दिस्टान्त कथा

20 “सरगे क राज्य एक जमींदार क नाईं बाटइ जउन भिन्सारे आपन अंगूरे क बगीचा बरे मजदूर लइ आवइ निकरा। ² उ चाँदी क एक रुपया प मजदूर क लगाइके ओनके आपन अंगुरे क बगिया मँ काम करइ पठएस।

³ “नौ बजे क करीब जमींदार फिन घरवा स निकरा अउर उ देखेस कि कछू मनई बजारे मँ ऍहर ओहर अइसे ही बेकार खड़ा रहेन। ⁴ तब उ ओनसे कहेस, ‘तू पचे भी मोरे अंगूरे क बगीचा मँ जा, मइँ तोहका जउन कछू ठीक अहइ, देब।’ ⁵ तउ उ पचे भी बगीचा मँ काम करइ गएन।

“फिन करीब बारह बजे अउर दुबारा तीन बजे क करीब, उ वइसा ही किहेस। ⁶ करीब पाँच बजे उ फिन आपन घरवा स गवा अउर कछू मनइयन क बजारे मँ ऍह कइँती ओह कइँती खड़ा देखेस। उ ओनसे पूछेस, ‘तू हियाँ दिन भइ बेकार ही काहे खड़ा होइ रह्या?’

⁷ “उ सबइ ओसे कहेन, ‘काहेकि हम सबन क कउनो मजूरी प नाहीं राखेस।’

“उ ओनसे कहेस, ‘तू भी मोरे अंगूर क बगीचा मँ चला जा।’

⁸ “जब साँझ भइ तउ अंगूर क बगीचा क मालिक आपन प्रधान करमचारी क कहेस, ‘मजूरन क बोलाइके अखिरी मजूरे स सुरू कइके जउन पहिले लगावा ग रहेन ओन सबन क मजूरी दइ द्या।’

⁹ “तउ उ पचे जउन पाँच बजे लगावा रहेन, आएन अउ ओहमाँ स हर एक क बस एक ही चाँदी क रूपया मिला। ¹⁰ फिन जउन पहिले लगावा ग रहेन, उ आएन उ सोचेन ओनका कछू जियादा मिली मुला ओनमा हर कउनो क एक ठु चाँदी क रूपया मिला। ¹¹ रूपया तउ उ सबइ लइ लिहन मुला जमींदारे स सिकाइत करत ¹² उ सबइ कहेन, ‘जउन पाछे लगावा रहेन, उ पचे बस एक ही घंटा भइ काम किहेन अउ तू हम पचेन क ओतॅना ही दिहा जेतॅना ओनका। जब कि हम पचे दिन भइ चिलचिलात धूपे मँ मेहनत कीन्ह।’

¹³ “उ जवाबे मँ ओहमाँ स कउनो एक स जमींदारे कहेस, ‘मीत, मइँ तोहरे साथ कउनो अनिआव नाहीं कर्‌यों ह। का हम पचे तय नाहीं कीन्ह कि मइँ तोहका चाँदी क एक ठु रूपया देब? ¹⁴ जउन तोहार होत ह, ल्या अउर चला जा। मइँ सबते पाछे रखा गवा इ मजदूर क ओतॅना ही मजूरी देइ चाहब जेतॅना तोहका देत अही। ¹⁵ का मोका अधिकार नाहीं कि जउन मइँ आपन धने क चाहूँ, कइ सकउँ? मइँ अच्छा हउँ का तू ऍसे मने मँ जरत ह?’

¹⁶ “इ तरह आखिरी पहिले होइ जइहीं अउर पहिले आखिरी होइ जइहीं।”

ईसू आपन मउत क बारे मँ बताएस

(मरकुस 10:32-34; लूका 18:31-34)

¹⁷ जब ईसू आपन बारहु चेलन क संग यरूसलेम जात रहा तउ उ ओनका एक कइँती लइ गवा अउर चलत चलत ओनसे बोला, ¹⁸ “सुना, हम यरूसलेम पहुँचइ क अही। मनई क पूत हुवाँ मुख्ययाजकन अउर धरम सास्तिरियन क हाथे मँ दइ दीन्ह जाई। उ पचे ओका मृत्युदण्ड क काबिल ठहरइहीं। ¹⁹ फिन ओकर हँसी हँसारत करवावइ अउर कोड़न स पिटवावइ बरे ओका गैर यहूदियन क दइ देइहीं। फिन ओका क्रूस प चढ़ाइ दीन्ह जाई। मुला तिसरे दीन उ फिन जी उठी।”

एक महतारी क गदेलन बरे खास चिरौरी

(मरकुस 10:35-45)

²⁰ फिन जब्दी क पूतन की महतारी आपन पूतन क संग ईसू क नगिचे गई अउर उ निहुरिके पराथना करत ओसे कछू माँगेस।

²¹ ईसू ओसे पूछेस, “तू का चाहति अहा?”

उ बोली, “मोका बचन द्या कि मोर इ दुइनउँ बेटवन तोहरे राज्य मँ एक तोहरे दाहिन अउर दूसर तोहरे बाईं कइँती बइठँइ।”

²² ईसू जबाव दिहस, “तू नाहीं जानत अहा कि तू का माँगत बाट्या? का तू यातनाओं क कटोरा पिउ सकत अहा, जेहका मइँ पिअइवाला हउँ?”

उ सबइ ओसे कहेन, “हाँ पिउ सकित ह।”

²³ ईसू ओनसे बोला, “तू पचे सचमुच उ पिआला पीब्या। मुला मोर दाहिन अउर बाएँ कइँती हक क देवइया मइँ नाहीं हउँ। हियाँ बइठइ क हक तउ ओनही का बा, जेनके बरे इ मोर परमपिता क जारिये रक्खा गवा अहइ।”

²⁴ जब बाकी दसउ चेलन इ सुनेन कि तउ उ पचे दुइनउँ भाइयन प बहोत कोहाय गएन। ²⁵ तब्बइ ईसू ओनका आपन नगिचे बोलाइके कहेस, “तू जानत ह कि गैर यहूदियन राजा, प्रजा प आपन सक्ती देखावा चाहत हीं अउर ओनके खास नेता, मनइयन प आपन हक जमावा चाहत हीं। ²⁶ मुला तोहरे बीच अइसा न होइ चाही। मुला तो हम स जउन बड़वार बनब चाही, तोहार नउकर बनइ। ²⁷ अउ तोहमाँ जउन कउनो पहिला बनब चाही, ओका तोहार गुलाम जरूर बनइ क होई। ²⁸ तोहका मनई क पूत जइसा होइ क चाही जउन आपन सेवा करावइ नाहीं, मुला सेवा करइ अउर बहोतन क छुटौती बरे आपन प्रान क फिरौती देइ आवा अहइ।”

अँधरे क आँखी

(मरकुस 10:46-52; लूका 18:35-43)

²⁹ जब उ सबई यरीहो सहर स जात रहेन भारी भीड़ ईसू क पाछे होइ गइ। ³⁰ हुवाँ सरक क किनारे दुइ आँधर बइठा रहेन। जब उ सबइ सुनेन कि ईसू हुवाँ स जात बाटइ, उ पचे नरियानेन, “पर्भू, दाऊद क पूत! हम प दाया कर!”

³¹ ऍह प भीड़ ओनका धमकावत चुप रहइ क कहेस। पर उ पचे अउ जिआदा चिल्लानेन, “पर्भू, दाऊद क पूत। हम प दाया कर।”

³² फिन ईसू रूकि गवा अउ ओनका बोलाएस। उ कहेस, “तू का चाहत अहा, मइँ तोहरे बरे का करउँ?”

³³ उ पचे ओसे कहेन, “पर्भू, हम चाहित ह कि फिन स निहारइ लागी।”

³⁴ ईसू क ओन प दाया आइ। उ ओनकइ अँखियन क छुएस, अउर तुरंतहि उ पचे फिन लखइ लागेन। उ पचे ओकरे पाछे होइ गएन।

10 मुहर लगी वाचा पइ निम्नलिखित नाउँ लिखे रहेन:

⁹ इ सबइ ओन लेवीबंसियन क नाउँ अहइँ जउन मुहर लगी वाचा पइ आपन नाउँ अंकित किहन:

¹⁴ इ सबइ नाउँ ओन मुखिया लोगन क अहइँ जउन उ मुहर लगी वाचा पइ अपने नाउँ अंकित किहन:

²⁸ तउ अब इ सबइ सबहिं लोग जेनकर नाउँ ऊपर दीन्ह गए अहइँ परमेस्सर क समन्वा इ बिसेस प्रतिग्या लेत हीं। इ बचा भवा लोग भी प्रतिग्या किहेस ह: याजकन, लेवीबंसी, दुआरपाल, गायक, यहोवा क भवन क सेवक, अउर उ सबइ सबहिं लोग जउन आस-पास रहइवाले लोगन स परमेस्सर क नेमन क पालन करइ बरे, अपने आप क अलग कइ लिहे रहा। ओन लोगन क मेहररुअन, पूतन, बिटियन अउर हर उ मनई जउन जान अउर समझ सकत ह कि उ पचे का करत अहा। ²⁹ इ सबइ लोग जउन अपने भाई बंधुअन अउ अपने मुखियन क संग इ प्रतिग्या क अपनावइ मँ सम्मिलित भएन कि उ पचे परमेस्सर क सेवक मूसा क जरिये दीन्ह गए बिधान क पालन करिही। उ पचे सहमत भएन कि जदि आपन प्रतिग्या मँ असफल होइ तउ सराप पाइहीं। परमेस्सर हमका आपन बिधान ओकर सेवक मूसा जरिये दिहेन। इ सबइ लोग प्रतिग्या किहेन कि उ पचे सावधानी क संग अपने यहोवा आपन परमेस्सर क आदेसन, नेमन अउर अध्यादेसन क पालन करिही। उ पचे सुआमी ओकर परमेस्सर क हुकूमन आदेसन अउर फइसलन क अनुसरण करिहीं।

³⁰ “हम प्रतिग्या करित ह कि अपने आस-पास रहइवाले लोगन क संग अपनी बिटियन क बियाह नाहीं करिहीं अउर हम इ प्रतिग्या भी करित ह कि ओनकी बिटियन क संग अपने बेटवन क नाहीं बियाहब।

³¹ “हम इ प्रतिग्या करित ह कि सबित क दिन काम नाहीं करब अउर जदि हमरे आस-पास रहइवाले लोग सबित क दिन बेचइ क अनाज या दूसर चिजियन लिआउब तउ बिस्राम क उ बिसेस दिन या कउनो भी दूसर बिसेस क दिन, ओन चिजियन क नाहीं बेसहिही। हर सतएँ बरिस हम न तउ आपन धरती क जोतब अउर न बोउब, अउ हर सतएँ बरिस मँ हम दूसरे लोगन क कर्ज क माफ कइ देब।

³² “परमेस्सर क भवन क धियान रखइ क बरे ओकरे आदेसन पइ चलइ क जिम्मेदारी क हम ग्रहण करब। हम हर बरिस एक तिहाई सेकेल हमरे परमेस्सर क सम्मान मँ भवन क सेवा, उपासना क बढ़ावा देइ क बरे दिया करब। ³³ इ धन क उपयोग उ बिसेस रोटी बरे कीन्ह जाइ जेका याजक मन्दिर क वेदी पइ अर्पित करत ह। इ धने क उपयोग हर दिन क अन्नबलि अउ होमबलि बरे कीन्ह जाइ। सबित नवे चाँद क त्यौहार अउर दूसरी सभन पइ इहइ धने स खरचा होइ। ओन पवित्तर चढ़ावन अउ पाप बलियन बरे भी इ धन क ही उपयोग कीन्ह जाई जेनसे इस्राएल क लोग अभिसेक होइ। इ धन स ही हर उ काम क खरच चली जउन हमरे परमेस्सर क मन्दिर क बरे जरूरी अहइ।

³⁴ “हम, यानी याजक, लेवीबंसी अउर लोग मिलिके इ निहचित करइ बरे पासे लोकाएन कि हमरे हर परिवार क हर बरिस एक निहचित समइ हमरे परमेस्सर क मन्दिर मँ काठे क उपहार कब लिआउब अहइ। उ काठ जेका हमरे परमेस्सर यहोवा क वेदी पइ बारा जात ह। हम क इ काम क जरूर करइ चाही काहेकि इ हमार व्यवस्था क बिधान मँ लिखा अहइ।

³⁵ “हम क अपने फलन क हर बृच्छ अउर अपनी फसल क पहिले फलन क लिआवइ क जिम्मेदारी भी ग्रहण करित ह। हर बरिस यहोवा क मन्दिर मँ हम उ फसल क लिआइके अर्पित किया करब।

³⁶ “काहेकि ब्यवस्था क विधान मँ इ भी लिखा अहइ एह बरे हम एका भी किया करब: हम अपने पहिलौटे पूत, पहिलौटी गइया क बच्चन, भेड़िन अउर बोकरियन क पहिले छौनन क लइके परमेस्सर क मन्दिर मँ आवा करब। ओन याजकन क लगे हम एन सब क लइ जावा करब जउन हुवाँ मन्दिर मँ सेवा आराधना करत हीं।

³⁷ “हम परमेस्सर क मन्दिर क भण्डार मँ याजकन क लगे इ सबइ चिजियन भी लिआवा करब: पहिला गूंधा भवा आटा, पहली अन्न बलियन, हमरे सबहिं बृच्छन क फल, हमरी नई दाखरस अउर तेल क पहिला भाग। हम लेवीबंसियन बरे अपनी उपज क दसवाँ हींसा भी दिया करब काहेकि हर एक नगर मँ जहाँ हम काम करित ह, लेवीबंसी हम स इ सबइ चिजियन लिया करत हीं।

³⁸ “लेवीबंसी जब उपज क इ भाग एकट्ठा करइँ तउ हारून क परिवार क एक याजक ओनके संग जरुर होइ चाही, अउर फुन एन सबइ चिजियन क दसवे हीसे क हुवाँ स लइके लेवीबंसियन क चाही कि उ पचे ओनका हमरे परमेस्सर क मन्दिर मँ लइ आवइँ अउर ओनका मन्दिर क खजाने क कोठियारन मँ धइ देइँ। ³⁹ इस्राएल क लोग अउर लेवीबंसियन क चाही कि उ पचे अपने उपहारन क कोठियारन मँ लइ आवइँ। उपहार क अन्न, नई दाखरस अउर तेल क ओनका हुवाँ लइ आवइ चाही। मन्दिर मँ काम आवइवाली सबहिं चिजियन ओन कोठियारन मँ रखी जात ही अउर अपने कार्य पइ नियुक्त याजक, गायक अउर दुआरपालन क कमरन भी उहइ रहेन।

“हम सबहिं प्रतिग्या करित ह कि हम अपने परमेस्सर क मन्दिर क देख रेख किया करब।”

पौलुस क मैसीडोनिया अउर यूनान जाब

20 फिन जब हुल्लड क सांत होइ गवा, एकरे पाछे पौलुस ईसू क चेलन क बोलाएस अउर ओनकइ हिम्मत बढ़ाइ दिहे क पाछे ओनसे बिदा लिहेस अउर मैसीडोनिया क चला गवा। ² उ पहँटा स होइके उ जात्रा किहेस अउर हुवाँ क मनइयन क उछाह क बचन बोलेस। फिन उ यूनान आइ गवा।

³ उ हुवाँ तीन महीना रूका अउर काहेकि यहूदी लोग ओकरे खिलाफ एक षडयन्त्र रचे रहेन जब उ पानी क मारग स सीरिया क जाइवाला रहा कि उ निस्चय किहेस कि उ मैसीहोनिया क लौटि जाइ। ⁴ बिरीया क पुर्रूस क बेटवा, थिस्सलूनीकिया क बसइया लोग अरिस्तर्खुस अउर सिकुन्दुस, दिरबे क निवासि गयूस अउर तिमुथियुस अउर एसिया क पहँटा क तुखिकुस अउर त्रुफिमुस ओकर साथ रहेन। ⁵ इ पचे पहिले चला गवा रहेन अउर त्रोआस मँ हमका जोहत रहेन। ⁶ बे खमीर क रोटी क दिनन क पाछे हम पचे फिलिप्पी स ऩाउ स चेलन अउर पाँच दिना क पाछे त्रोआस मँ ओनसे जाइ भेंटन। हुवाँ हम सात दिना तक ठहरेन।

त्रोआस क पौलुस क आखिरी जात्रा

⁷ हपता क पहिले दिना जब हम पचे रोटी क तोड़इ बरे आपुस मँ बटुरेन तउ पौलुस ओनसइ बतियाइ लाग। ओका भियान ही चला जाइ क रहा तउ उ आधी राति तलक बातचीत करत रहा। ⁸ सीढ़ी क ऊपर क खोली मँ जहाँ हम पचे बटुरा रहेन, हुवाँ ढेर क दिया धरा रहेन। ⁹ हुवँइ यूतुखुस नाउँ क एक नौजवान खिड़की प बइठा रहा। ओका गहिर नींद चाँपे रही। काहेकि पौलुस ढेर बेला स बोलतइ चला जात रहा तउ ओका गहिर नींद आइ गइ। ऍहसे उ तीसरी मंजिल स तरखाले भहराइ पड़ा अउर जब ओका उठावा गवा तउ उ गुजर चुका रहा।

¹⁰ पौलूस तरखाले उतरा अउर ओह पइ निहुरा। ओका आपन कोरा मँ लइके उ कहेस, “जिन घबराअ काहेकि ओकर प्राण उहइ मँ बा।” ¹¹ फिन उ ऊपर चला गवा अउर उ रोटी क तोरिके बाँटेस अउर खाएस। उ ओनकइ ढेर देर तलक, भिन्सारे ताई बतियात रहा। फिन उ ओनसे बिदा लिहेस। ¹² उ जिअत मनई क उ पचे घरे लइ आएन। ऍहसे ओनका बहोत चइन मिला।

त्रोस स मिलेतुस क जात्रा

¹³ हम जहाजे प पहिले पहोंचेन अउर अस्सुस कइँती चल दिहेन। हुवाँ पौलुस क हम पचेन क जहाज बइठावइ क रहा। उ अइसी ही योजना बनए रहा। उ खुन पैदर आवइ चाहत रहा। ¹⁴ उ जब अस्सुस मँ हम पचन स भेंटा तउ हम पचा ओका जहाजे प बइठावा अउर हम सबइ मितुलेने कइँती चल पड़ेन। ¹⁵ दूसर दिन हम हुवाँ स चलिके खियूस क समन्वा जाइ पहोंचेन। अउर दूसर दिन ओह पार सामोस आइ गएऩ। फिन ओकरे एक दिन पाछे हम मिलेतुस आइ पहोंचेन। ¹⁶ काहेकि पौलुस जहाँ तलक होइ सका पिन्तेकुस्त क दिन तलक यरूसलेम पहुँच जाइ क हाली करत रहा, तउ उ ठान लिहेस कि उ इफिसुस मँ बे रुके भए अगवा चला जाइ जेहॅसे ओका एसिया मँ समइ जिआदा न बितावइ पड़इ।

पौलुस क इफिसुस क पूर्वजन स बात-चीत

¹⁷ उ मिलेतुस स इफिसुस क बुजुर्ग अउर कलीसिया क संदेसा पठइके आपन लगे बोलाएस।

¹⁸ ओनकइ आए प पौलुस ओनसे कहेस, “इ तू सबइ जानत ह कि एसिया पहुँचइ क बाद पहिले दिन स ही हर समइ मइँ तोहरे संग कइसे रहत हउँ। ¹⁹ अउर बड़ा दीन होइके आँसू टपकाइ टपकाइके यहूदी लोगन्क कुचाल क कारण मोह प कइउ परीच्छा मँ भी मइँ दीनता पूर्वक पर्भू क सेवा करत रहेउँ। ²⁰ तू पचे जानत बाट्या कि मइँ तोहका तोहरे भलाई क कउनो बाते स बतावइ मँ कबहुँ हिचकिचाएउँ नाहीं। अउर मैं तोहका ओन बातन क सबहिं मनइयन क बीच अउर घरे घरे जाइके उपदेस देइ मँ कबहुँ नाहीं झिझक्यों। ²¹ यहूदियन अउर यूनानियन क मइँ बराबर क भाव स मनफिराव बरे, परमेस्सर कइँती मोड़इ बरे मँ कहत रहेउँ ह अउर हमार पर्भू ईसू मँ बिसवास बरे ओनका चिताउनी दिहेउँ ह।

²² “अउर अब पवित्तर आतिमा क अधीन मँ मइँ यरूसलेम जात अहउँ मइँ नाहीं जानत हउँ हुआँ मोरे संग का कछू घटी। ²³ मइँ तउ सिरिफ ऍतना जानत हउँ कि हर सहर मँ पवित्तर आतिमा इ कहत भइ मोका चउकन्ना करत रहत ही कि जेल अउर घोर संकट मोका जोहात बाटेन। ²⁴ मुला मोरे बरे प्राण क कउनो कीमत नाहीं बा। मइँ तउ बस उ दौड़ धूप अउर उ सेवा क पूरा करइ चाहत हउँ जेका मइँ पर्भू ईसू स ग्रहण करेउँ ह, परमेस्सर क अनुग्रह क सुसमाचार क साच्छी देब।

²⁵ “अउर अब मइँ जानत हउँ कि तोहमाँ स कउनो भी, जेनकइ मँ मइँ परमेस्सर क राज्य क प्रचार करत घूमेउँ ह, मोर मुँह अगवा कबहुँ न लखि पाइ। ²⁶ यह बरे आजु मइँ तोहरे समन्वा गोहराइ के कहत हउँ कि तू सबन मँ स कउनो मँ स कोइ खोवाय जाइ त ओकर दोखी मइँ नाहीं अहउँ। ²⁷ काहेकि मइँ परमेस्सर क पूरी इच्छा क तोहका बतावइ क मँ मइ कबहुँ हिचकिचाएउँ नाहीं। ²⁸ आपन अउर आपन जात बिरादरी क देख भाल करत रहा। पवित्तर आतिमा ओहमाँ स तोहका ओन प चउकसी करइ बरे बनएस ह जेहसे तू परमेस्सर क कलीसिया क धियान राखा जेहसे उ आपन रकत क बदले बेसहे रहा। ²⁹ मइँ जानत हउँ कि मोरे बिदा होइ जाए क पाछे सिकारी बिगवा तोहरे बीच अइही अउर उ पचे इ भोला भाला झुंड क न छोरिहीं। ³⁰ हिआँ तलक कि तोहरे आपन बीच मँ स ही अइसेन मनई भी उठि जइहीं, जउन चेलन क पाछे लगाइ लेइ बरे बात क घुमाइ फिराइ क कइहीं। ³¹ यह बरे होसियार रह्या। याद राखा कि मइँ तिन बरिस तलक एक एक क दिन रात रोइ रोइ क चिताउनी देब नाहीं तज्यों रहे।

³² “अब मइँ तोहका परमेस्सर अउर ओकर सुसमाचार क अनुग्रह क हाथे अर्पण करत हउँ। उहइ तोहका बनइ सकत ह् अउर ओन मनइयन क संग जेनका पवित्तर कीन्ह गवा अहइ, तोहका बारिस बनइ सकत ह। ³³ मइँ कबहुँ कउनो क सोना-चाँदी या ओढ़ना क नाहीं ललचाएउँ ह। ³⁴ तू सबइ ही जानत ह मोर इ हथवन ही मोर अउर मोरे संगिन की जरूरत क पूरा किहेस ह। ³⁵ मइँ आपन हर करम स तोहका इ देखॉवा ह कि कर्री मेहनत करत भए हमका निर्बल क मदद कउने तरह करइ चाही अउर हमका पर्भू ईसू क बचन याद रखइ चाही जेहसे उ खुद कहे रहा, ‘लेइ स देइ मँ जिआदा सुख बा।’”

³⁶ इ कहि चुके क पाछे ओन सबन क संग उ घुटना क बल निहुरा अउर उ पराथना किहेस। ³⁷ हर कउनो भोंकारा मारिके रोवत रहा। मिलना मिलत भए उ पचे ओका चूमत रहेन। ³⁸ उ जउन इ कहे रहा कि पचे ओकर मुँहना फिन कबहुँ न लखिहीं, ऍहसे मनई जिआदा दुःखी रहेन। फिन उ पचे ओकर रच्छा करत भए जहाजे तलक पहोंचाइ दिहेन।