M’Cheyne Bible Reading Plan

तीन ठु मेहमान

18 पाछे यहोवा फुन इब्राहीम क समन्वा परगट भवा। इब्राहीम मम्रे क बलूत क बृच्छन क लगे रहत रहा। एक दिन, इब्राहीम दिन क सब स गर्म पहर मँ तम्बू क दुआरे बइठा रहा। ² इब्राहीम आँखि उठाइके लखेस अउ आपन समन्वा तीन मनइयन क खड़ा निहारेस। जबहि इब्राहीम मनइयन क लखेस, उ ओनके लगे गवा अउ ओनका पैलगी किहेस। ³ इब्राहीम कहेस, “साहेब लोगो! आप आपन इ सेवक क संग तनिक देर रुकि जाइँ। ⁴ मइँ आप लोगन बरे गोड़वा पखारइ खातिर पानी लइ आवत अहउँ। आप बृच्छन क खाले सुहताइ लेइँ। ⁵ मइँ आप पचन क कछू खइया के लिआवत अहउँ अउ आप लोग जेतना चाहइँ खाइ लेइँ। ऍकरे पाछे आप सबइ आपन जात्रा प जाब सुरु कइ सकत ही।”

तीनउँ कहेन, “इ बहोतइ बढ़िया बा। तू जइसा कहत बाट्या, करा।”

⁶ इब्राहीम हाली स तम्बू मँ घुसा। इब्राहीम सारा स कहेस, “हाली हाली तीन ठु रोटी बरे आटा साना।” ⁷ तब इब्राहीम आपन गोरुअन कइँती भागा। इब्राहीम सबन त नीक एक ठु जवान बछवा लिहस। इब्राहीम बछवा नउकर क दिहस। इब्राहीम नउकर स कहेस कि तू हाली हाली करा, इ बछवा क मारा अउ खइया खातिर तइयार करा। ⁸ इब्राहीम तीनहुँ क खाइ बरे गोस दिहस। उ दूध अउ माखन भी दिहस। जब तलक तीनहु मनई खात रहेन तब तलक इब्राहीम बृच्छ क खाले ठाड़ रहा।

⁹ उ मनइन इब्राहीम स कहेस, “तोहार मेहरारु सारा कहा बा?”

इब्राहीम कहेस, “उ तम्बू मँ बा।”

¹⁰ तब यहोवा कहेस, “मइँ बसन्त मँ फुन आउब। उ टेम तोहार मेहरिया सारा एक ठु पूत क जन्मी।”

सारा तम्बू मँ अनकत रही अउर उ इ बातन क सुनेस। ¹¹ इब्राहीम अउ सारा बहोत बुढ़ाइ ग रहेन। सारा लड़कोर होइ क उमिर क पार कइ चुकी रही। ¹² सारा आपन आप प हँसी। उ आपन स कहेस, “मइँ अउ मोर भतार दुइनउँ बुढ़ान बाटेन। मइँ लरिका जन्मइ बरे ढेर बुढ़ाइ गइ अहउँ।”

¹³ तब यहोवा इब्राहीम स कहेस, “इ सोचत भवा सारा काहे हँसेन कि, ‘मइँ ऍतना बूढ़ी हउँ कि लरिका नाही पइदा कइ सकत हउँ?’ ¹⁴ का यहोवा बरे कछू भी असंभव बाटइ? नाही, मइँ फुन बसन्त मँ आपन बताए भए टेम प आउब अउ तोहार मेहरारु सारा पूत क जन्म देइ।”

¹⁵ मुला सारा कहेस, “मइँ हसेउँ नाहीं।” (उ अइसा कहेस, काहेकि उ डेरान रही।)

मुला यहोवा कहेस, “नाही, मइँ जानत हउँ कि तोहार कहब सही नाही अहइ। तू जरुर हसिउ ह।”

¹⁶ तब उ मनईयन जाइ बरे उठेन। उ पचे सदोम कइँती लखेन अउ उहइ कइँती चल पड़ेन। इब्राहीम ओनका बिदा करइ बरे कछू दूर तलक ओनके संग गवा।

परमेस्सर क संग इब्राहीम क सौदा

¹⁷ यहोवा मन मँ कहेस, “का मइँ इब्राहीम स कहि देउँ जउन मइँ अबहु करब? ¹⁸ इब्राहीम एक बड़का सकतीवाला रास्ट्र बन जाइ। इ कारण स धरती क सारे मनइयन आसीर्बाद पइही। ¹⁹ मइँ इब्राहीम क संग खास करार किहेउँ ह। मइँ इ ऍह बरे किहेउँ ह कि उ आपन लरिकन अउ आपन संतानन क तरह जिन्नगी बितावइ बरे हुकुम देइ जउने तरह जिन्नगी बिताउब यहोवा चाहत ह। मइँ इ ऍह बरे किहेउँ ह कि उ पचे सच्चाई स रइही अउर इन्साफ पसन्द बनिही। तब मइँ यहोवा प्रण कीन्ह गइ चीजन क देब।”

²⁰ तब यहोवा कहेस, “सदोम अउर गमोरा का चीख-पुकार बहोत जबरदस्त अहइ। ओनका पाप बहोत गम्भीर अहइ। ²¹ एह बरे मइँ हुवा जाब अउर देखब कि जउन कूछ मइँ सुन्या ह, यदि उ सही बा तब मइँ जानब कि उ सही बाटइ या गलत।”

²² तब उ मनइयन घूमेन अउ सदोम कइँती चल पड़ेन। मुला इब्राहीम यहोवा क समन्वा खड़ा रहा। ²³ तब इब्राहीम यहोवा स कहेस, “हे यहोवा, का तू खोट मनइयन क नास करइ क संग भले मनइयन क नास करइ क बात सोचत अहा? ²⁴ जदि उ सहर मँ पचास भला मनई होइ तउ का होइ? का तब भी तू सहर क नास कइ देब्या? फुरइ ही तू हुआ क बसइया पचास भले मनइयन बरे उ सहर क बचाइ लेब्या। ²⁵ फुरइ ही तू उ सहर क नास न करब्या। खोट मनइयन क मारइ बरे तू पचास भले मनइयन क नास न करब्या। अगर अइसा भवा तउ भला अउ खोटा लोग एक ही होइ जइहीं। दुइनउँ क ही सजा मिली। तू समूचइ भुइँया क निआव देइवाला अहा। मइँ जानत अहउँ कि तू निआव करब्या।”

²⁶ फुन यहोवा कहेस, “जदि मोका सदोम सहर मँ पचास भला लोग मिलइँ तउ मइँ समूचइ सहर क बचाइ लेब।”

²⁷ तब इब्राहीम कहेस, “हे यहोवा, तोहरे अगवा, मइँ सिरिफ धूर अउ राख अहउँ। मुला तू मोका फुन तनिक कस्ट देइ क मौका द्या अउ मोका इ प्रस्न पूछइ द्या कि: ²⁸ जदि पाँच नीक लोग कमती होइ तउ का होइ? जदि सहर मँ पैंतालीस ही नीक लोग होइँ तउ का होइ? का तू सिरिफ पाँच लोगन बरे समूचइ सहर क नास करिब्या?”

तब यहोवा कहेस, “जदि मोका हुआँ पैंतालीस नीक लोग मिलइँ तउ मइँ सहर क नास न करब।”

²⁹ इब्राहीम फुन यहोवा स कहेस, “जदि तोहका हुआँ स्रिफ चालीस नीक लोग मिलइँ तउ का तू सहर क नास कइ देब्या?”

यहोवा कहेस, “अगर मोका चालीस बढ़िया लोग हुआँ मिलइँ तउ मइँ सहर क बर्बाद न करब।”

³⁰ तब इब्राहीम कहेस, “हे यहोवा कृपा कइके मोहे प किरोध जिन करा। मोका इ पूछेइ द्या कि अगर सहर मँ सिरिफ तीस नीक लोग होइ तउ का तू सहर क नास कइ देब्या?”

यहोवा कहेस, “जदि मोका तीस नीक लोग मिलइँ तउ मइँ सहर क बर्बाद न करब।”

³¹ तब इब्राहीम कहेस, “हे यहोवा, का मइँ तोहका फुन कष्ट देउँ अउ पूछ लेउँ कि जदि बीस ही सहर मँ नीक लोग हुआँ होइँ तउ?”

यहोवा जवाब दिहस, “अगर मोका बीस बढ़िया लोग मिलइँ तउ भी मइँ सहर क नास न करब।”

³² तब इब्राहीम कहेस, “हे यहोवा तू मोहे प गुस्सा जिन करा। मोका आखिरी दाईं कस्ट देइ क मौका द्या। जदि तोहका हुआँ दस बढ़िया लोग मिलइँ तउ तू का करिब्या?”

यहोवा कहेस, “जदि मोका सहर मँ दस नीक लोग मिलइँ तउ भी मइँ सहर क नास न करब।”

³³ यहोवा इब्राहीम स बोलब बंद कइ दिहस, ऍह बरे यहोवा चला गवा अउ इब्राहीम आपन घर लउटि आवा।

तीन ठु चेलन क मूसा अउर एलिय्याह क संग ईसू क दरसन

(मरकुस 9:2-13; लूका 9:28-36)

17 छः दिना पाछे ईसू, पतरस, याकूब अउर ओकर भाई यूहन्ना क संग लइके अकेल्ले मँ उँचके पहाड़े प गवा। ² हुवाँ ओनके समन्वा ओकर रूप बदल गवा। ओकर मुँहना सूरज क नाई चमचमाइ लाग अउर ओढ़ना अइसे दमकइ लागेन जइसे रोसनी। ³ फिन एकाएक ओनके समन्वा मूसा अउर एलिय्याह परगट गएन अउर ईसू स बतियाइ लागेन।

⁴ इ लखिके पतरस ईसू स बोला, “पर्भू नीक बाटइ कि हम हियाँ अही। अगर तू चाहा तउ मइँ हियाँ तीन तम्बू बनाइ देई एक ठू तोहरे बरे, एक मूसा बरे अउर एक एलिय्याह क।”

⁵ पतरस अबहिं बात करत रहा कि चमचमात बादर आइके ओका ढाकि लिहेस अउर बदरे स अकासबाणी भइ, “इ मोर पिआरा पूत अहइ। जैसे मइँ खूब खुस हउँ। एकर सुना!”

⁶ जब चेलन इ सुनेन तउ उ सबइ ऍतना ससाइ गएन कि धरती प मुँहना उलटि के गिरि गएन। ⁷ तबहिं ईसू ओनके लगे गवा अउर ओनका छुअत भवा बोला, “डेराअ जिन, खड़ा ह्वा।” ⁸ जब उ पचे आँखी क ऊपर करेन तउ हुआँ कहूँ अउर का नाहीं बरन ईसू क पाएन।

⁹ जब उ सबइ पहाड़े स उतरत रहेन तउ ईसू ओनका हुकुम दिहेस, “जउन कछू तू देख्या ह, तब ताईं कउनो क जिन बतावा जब ताईं मनई क पूत क मरा भवा मँ स फिन जी न जाइ।”

¹⁰ फिन ओकर चेलन ओसे पूछेन, “धरम सास्तिरियन फिन काहे कहत हीं कि एलिय्याह क पहिले तू आउब तय अहइ?”

¹¹ जवाब देत भवा ईसू ओनसे कहेस, “एलिय्याह आवत अहइ, उ हर चीज क तरकीबे स ठीक कइ देइ। ¹² मुला मइँ तोहसे कहत हउँ कि एलिय्याह जउन अब तलक आइ चुका अहइ। मुला मनइयन ओका पहिचानेन नाहीं। अउर ओकरे संग जइसा चाहेन वइसा किहेन। ओनके जरिए मनई क पूत क भी वइसे ही सतावइ जाइवाला अहइ।” ¹³ तबहिं ओकर चेलन समुझ पाएन कि उ ओनसे बपतिस्मा क देवइया यूहन्ना क बारे मँ कहे रहा।

बेरमिया लरिका क चंगा कीन्ह जाब

(मरकुस 9:14-29; लूका 9:37-43a)

¹⁴ जब ईसू भीड़ मँ वापस आइ गवा तउ एक मनई ओकरे पास आवा। अउर ओका दंडवत कइके ¹⁵ बोला, “हे पर्भू, मोरे बेटवा प दाया करा। ओका मिर्गी आवत ह। उ बहोत तड़फड़ात ह। उ आगी या पानी मँ अक्सर गिरि पड़त ह। ¹⁶ मइँ ओका तोहरे चेलन क लगे लइ आवा, मुला उ सबइ ओका चंगा नाहीं कइ पाएन।”

¹⁷ जवाबे मँ ईसू कहेस, “अरे भटका भवा अबिसवासी मनइयन! मइँ केतॅना समइ तोहरे संग अउर रहब? केतॅना समइ मइँ अइसे ही तोहार सहब जात रहब? ओका हियाँ मोरे लगे लिआवा।” ¹⁸ फिन ईसू दुस्ट आतिमा क हुकुम दिहेस अउर उ ओहमा स बाहेर निकर आइ अउ उ लरिका फउरन नीक होई गवा।

¹⁹ फिन ओकर चेलन अकेल्ले मँ ईसू क लगे जाइ क पूछेन, “हम इ दुस्ट आतिमा क काहे नाहीं निकार पाए?”

²⁰ ईसू ओनका बताएस, “काहेकि तोहमाँ बिसवास क कमी अहइ। मइँ तोहसे सच कहत हउँ, जदि तोहमाँ सरसों क बिया जेतॅना बिसवास अहइ तउ तू इ पर्वत स कहि सकत ह, ‘हियाँ स हटि के हुवाँ चल जा’ अउर उ चला जाई। तोहरे बरे असंभव कछू भी नाहीं होई।” ²¹ अइसी दुस्ट आतिमा सिरिफ पराथना अउ उपवास करइ स निकरत ह।

ईसू क आपन मउत क बारे मँ बताउब

(मरकुस 9:30-32; लूका 9:43b-45)

²² जब ईसू क चेलन आएन अउर गलील मँ ओकरे साथ मिलेन तउ ईसू ओनसे कहेस, “मनई क पूत, मनइयन क जरिये पकड़वाइ जाइवाला अहइ, ²³ अउर उ ओका मार डइहीं। मुला तीसरे दिना उ फिन जी जाई।” ऍह प ईसू क चेलन बहोत बिआकुल होइ गएन।

चुंगी क भुगतान

²⁴ जब ईसू अउर ओकर चेलन कफरनहूम मँ आएन तउ मन्दिर क दुइ दरम क चुंगी उगहिया वालेन पतरस क लगे आएन अउर बोलेन, “का तोहार गुरु दुइ दरम क मन्दिर क चुंगी नाहीं देत?”

²⁵ पतरस जबाव दिहस, “हाँ, उ देत ह।”

अउर उ घरवा मँ आवा जहाँ ईसू रहा। पतरस क बोलइ स पहिले ईसू बोल उठा, “समौन, तोहार का बिचार अहइ? धरती क राजा केहसे चुंगी लेत हीं? खुद अपने बचवन स, या दूसर क बचवन स?”

²⁶ पतरस जबाव दिहस, “बाहिर क मनइयन स।”

तबहिं ईसू ओसे कहेस, “यानी ओकरे आपन बचवन क छूट मिलत ह। ²⁷ मुला हम पचे ओन मनइयन क कोहाय न देइ। एह बरे झिलिया प जा अउर आपन कटिया फेंक द्या अउर फिन जउन मछरी धरे मँ आइ जाइ ओकर मुँहना खोल द्या। तोहका चारि दरम क सिक्का मिली। ओका लइके मोरे अउ आपन बरे ओनका दइ दिहा।”

7 इ तरह हम देवार बनावइ क काम पूरा कीन्ह। फुन हम देवार पइ दरवाजन लगाए। फुन हम दुआर क पहरेदारन, मन्दिर क गायकन अउ लेबियन क चुनेन। ² एकरे पाछे मइँ अपने भाई हनानी क यरूसलेम क हाकिम नियुक्त कइ दीन्ह। मइँ हनन्याह नाउँ क एक ठु अउर मनई क चुनेउँ अउर ओका किलेदार नियुक्त कइ दिहेउँ। मइँ हनानी क एह बरे चुने रहेउँ कि उ बहोत ईमानदार मनई रहा अउर उ परमेस्सर स आप लोगन स कहूँ जियादा डेरात रहा। ³ तब मइँ हनानी अउर हनन्याह स कहेउँ, “तोहका हर दिन यरूसलेम क दुआर खोलइ स पहिले घंटन सूरज चढ जाइ क पाछे तलक इंतजार करत रहइ चाही अउर सूरज छुपइ स पहिले ही तोहका दरवाजन बन्द कइके ओन पइ ताला लगाइ देइ चाही। यरूसलेम मँ रहइवाले लोगन मँ स तोहका कछू अउर लोग चुनइ चाही अउर ओनका नगर क रच्छा करइ बरे बिसेस जगहन पइ नियुक्त करा अउर कछू लोगन क ओनके घरन क लगे ही पहरे पइ लगाइ द्या।”

लउटे भए बन्दियन क सूची

⁴ अब लखा, उ एक बहोत बडा नगर रहा जहाँ पर्याप्त जगह रही। किन्तु ओनमाँ लोग बहोत कम रहेन अउर मकान अबहिं तलक फुन स नाहीं बनाए गए रहेन। ⁵ एह बरे मोर परमेस्सर मोरे मन मँ एक बात पइदा किहस कि मइँ सबहि लोगन क एक सभा बुलाएउँ तउ मइँ सबहि महत्त्वपूर्ण लोगन क, हाकिमन क अउर सर्वसाधारण क एक संग बोलाएउँ। मइँ इ काम एह बरे किहेउँ कि मइँ ओन सबहि परिवारन क एक सूची तइयार कइ सकउँ। मोका अइसे लोगन क पारिवारिक सूचियन मिली जउन दासता स सब स पहिले छूटइवालन मँ स रहेन। हुवा जउन लिखा भवा मोका मिला, उ इ तरह अहइ।

⁶ इ सबइ पहँटा क उ सबइ लोग अहइँ जउन दासत्व स अजाद होइके लउटेन बाबेल क राजा, नबूकदनेस्सर एन लोगन क बन्दी बनाइके लइ गवा रहा। इ सबइ लोग यरूसलेम अउ यहूदा क लउटेन। हर मनई अपने-अपने नगर मँ चला गवा। ⁷ इ सबइ लोग जरुब्बाबेल, येसू, नहेमायाह, अजर्याह, राम्याह, नहमानी, मोर्दकै, बिलसान, मिस्पेरेत, बिग्वै, नहूम अउर बाना क संग लउटे रहेन।

⁴³ लेवी परिवार समूह क लोगन क सूची:

⁴⁴ गायकन क सूची:

⁴⁵ दुआरपालन क सूची:

⁴⁶ मन्दिर क सेवकन क सूची:

⁵⁷ सुलैमान क सेवकन क संतान:

⁶¹ इ ओन लोगन क सूची अहइ जउन तेलमेलह, तेलहर्सा, करूब अद्दोन अउर इम्मेर नाउँ क नगरन स यरूसलेम आए रहेन। मुला इ सबइ लोग साबित नाहीं कइ सकेन कि ओनकर परिवार असल मँ इस्राएल क लोगन स सम्बन्धित रहेन:

⁶³ इ ओन याजकन क सूची अहइ जउन

⁶⁴ जउन लोग अपने परिवारन क ऐतिहासिक दस्तावेजन क हेरेन अउर उ पचे ओनका पाइ नाहीं सकेन, ओनकर नाउँ याजकन क सूची मँ नाहीं जोरा जाइ सका। उ पचे असफल रहेन एह बरे याजक नाहीं बन सकत रहेन। ⁶⁵ तउ राज्जपाल ओनका एक आदेस दिहस जेकरे तहत उ पचे कउनो भी बहोत पवित्तर भोजन क नाहीं खाइ सकत रहेन। उ भोजन मँ स उ पचे उ समइ तलक कछू भी नाहीं खाइ सकत रहेन जब तलक महायाजक ऊरीम अउर तुम्मीम क उपयोग न कइ लेत रहेन।

⁷⁰ परिवार क कछू नेता लोगन उ कामे क सहारा देइ बरे धन दिहे रहेन। राज्जपाल क जरिये निर्माण कोस मँ 19 पौण्ड सोना दीन्ह गवा रहा। उ याजकन क बरे 50 खोरन अउ 530 जोड़ी ओढ़नन भी दिहे रहेन। ⁷¹ परिवार क मुखिया लोग 375 पौण्ड सोना उ काम क सहारा देइ क बरे निर्माण कोस मँ दिहन अउर 1 1/3 टन चाँदी ओनके जरिये भी दीन्ह गइ। ⁷² दूसर लोग कुल मिलाइके 375 पौण्ड सोना उ काम क सहारा देइ बरे निर्माण कोस क दिहन। उ पचे 1 1/3 टन चाँदी अउर याजकन क बरे 67 जोड़े ओढ़नन भी दिहन।

⁷³ इ तरह याजक लेवी परिवार समूह क लोग, गायक अउर मन्दिर क सेवक अपने-अपने नगरन मँ बस गएन अउर इस्राएल क दूसर लोग भी अपने-अपने नगरन मँ रहइ लागेन अउर फुन साल क सतएँ महीने तलक इस्राएल क सबहि लोग अपने-अपने नगरन मँ बस गएन।

पौलुस अउर सीलास थिस्सलुनीके मँ

17 फिर अम्फिपुलिस अउर अपुल्लोनिया क सफर पूरा कइके उ पचे थिस्सलुनीके पहोंच गएऩ। हुवाँ यहूदियन क एक आराधनालय रहा। ² आपन साधारण सुभाव क अनुसार पौलुस ओनके लगे गवा अउर तीन सबित क दिन तलक ओनकइ संग सास्तरन प बिचार क लेन-देन करत रहा। ³ अउर सास्तरन स लइके ओनका समझावत भवा इ सिद्ध करत रहा कि मसीह क यातनाइँ झेलइ क रहा अउर फिन ओका मरा भवन मँ स जी उठब रहा। उ कहत, “इ ईसू ही, जेकर मइँ तोहार बीच प्रचार करत हउँ, मसीह अहइ।” ⁴ ओहमाँ स कछू जउन ओकरे मते स मेल खाएन, पौलुस अउर सीलास क मत मँ सामिल होइ गएन। परमेस्सर स डेराइवालन अगिनती यूनानी भी ओहमाँ मिलि गहन। एहमाँ ढेर खास खास स्त्रियन भी मिलि गएन।

⁵ मुला यहूदी तउ डाह मँ जरत भूँजत रहेन। उ पचे कछू बाजारू जुण्डन क बटोरेन अउर एक मजमा बनइके सहर मँ दंगा कराइ दिहेन। उ पचे यासोन क घर मँ धावा बोल दिहेन। अउर इ जतन करइ लागेन कि कउनो तरह पौलुस अउर सीलास क मनइयन क समन्वा लइ आवइँ। ⁶ मुला जब उ पचे ओनका नाहीं पाइ सकेन तउ यासोन क अउर कछू दूसर भाइयन क सहर क अधिकारी क समन्वा घेर्राइ के लइ आएन। उ पचे चिचियानेन, “इ मनइयन जउन सारी दुनिया मँ उथर पुथर मचाए बाटेन अब उ पचे हियाँ आइ अहइँ। ⁷ अउर यासोन सम्मान क संग ओऩका आपन घरवा मँ ठहराए बा। अउर उ पचे सबहिं कैसर क आदेसन क खिलाप काम करत बाटेन। अउर कहत हीं एक राजा अउर अहइ जेकर नाउँ अहइ ईसू।”

⁸ जब भीड़ अउर सहर क अधिकारी इ सुनेन तउ उ पचे भड़केन। ⁹ अउर इ तरह उ पचे यासोन अउर दूसर मनइयन क जमानती मुचलका लइके छोड़ दिहेन।

पौलुस अउर सीलास बिरीया मँ

¹⁰ फिन तुरंतहि रातउ रात पौलुस अउर सीलास क बिरीया पठइ दिहेन। हुवाँ पहुँचिके उ सबइ यहूदी, आराधनालय मँ गएन। ¹¹ इ पचे थिस्सलुनीके क मनइयन स जिआदा नीक रहेन। इ मनइयन पूरा चित्त लगाइके बचन क सुनेन अउर हर दिन सास्तरन क उलटत पलटत भएऩ जाँच करत रहेन कि पौलुस जउन बातन क बताएस ह, का उ बातन फुर अहइँ। ¹² एकरे कारण बहोत स यहूदी लोग अउर खास खास यूनानी स्त्री-पुरुसन भी बिसवास धरेन।

¹³ मुला जब थिस्सलुनिके क यहूदियन क इ पता लाग कि पौलुस बिरीया मँ भी परमेस्सर क बचन क प्रचार करत बाटइ तउ उ पचे हुवँई आइ धमकेन। अउर हुवाँ भी गल्बा करइ अउर मनइयन क हुस्कावइ सुरू कइ दिहन। ¹⁴ यह बरे तबहिं भाइयन तुरंत पौलुस क समुद्दर क किनारे जाइ क पठएन। मुला सीलास अउर तीमुथियुस हुवइँ ठहरा रहेन। ¹⁵ पौलुस क लइ जाइवालन मनइयन ओका एथेंस पहुँचाइ दिहेन अउर सीलास अउर तीमुथियुस बरे इ हुकुम दइके कि उ पचे हाली स ओकरे लगे आइ जाइँ, हुवाँ स चल दिहेन।

पौलुस एथेंस मँ

¹⁶ पौलुस एथेंस मँ तीमुथियुस अउर सीलास क जोहत भए सहर क मूरत स भरा भवा लखिके मन ही मने मँ तिलमिलात रहा। ¹⁷ यह बरे हर रोज आराधनालय मँ यहूदियन अउर यूनानी भगतन जउन असली भगवान का पूजत रहेन स बहस-मुबाहसा करत रहा। हुवाँ बजार-हाट मँ जउन कउनो होत उ ओहसे भी हर रोज तर्क करत रहत। ¹⁸ कछू इपीकूरी अउर स्तोईकी दर्सन क ग्यानी भी ओसे सास्तार्थ करइ लागेन।

ओहमाँ स कछू कहेन, “इ अंटसंट बोलवइया कहब क चाहत ह?” दूसर लोग कहेन, “इ तउ बिदेसी देवतन क प्रचारक जान पड़त ह।” उ पचे इ यह बरे कहे रहेन कि उ ईसू क बारे मँ उपदेस देत रहा अउर ओकरे फिन स जी उठइ क प्रचार करत रहा। ¹⁹ उ पचे ओका धइके अरियुपगुस क सभा मँ आपन संग लइ गएऩ अउर बोलेन, “का हम जान सक्ति ह कि तू जउन मनइयन क समन्वा रखत बाट्या, उ नई सिच्छा का अहइ? ²⁰ तू कछू अजूबी बात हमरे काने मँ डावत अहा, तउ हम पचे जानइ चाहित ह कि इ बातन का अरथ का अहइ?”

²¹ हुवाँ रहत भए एथेंस क सबहिं मनइयन अउर परदेसि सिरिफ बिल्कुल नवा सुनइ या ओनही बातन क चर्चा क अलावा कउनो भी अउर बातन मँ आपन समइ न लागावत रहेन।

²² तब पौलुस अरियुपगुस क समन्वा खड़ा होइके कहेस, “हे एथेंस क मनइयन, मइँ लखत हउँ कि तू पचे हर तरह स धार्मिक अहा। ²³ टहरत फिरत तोहार आराधना क चीजन क लखिके मोका एक अइसी वेदी भी मिली जेह पइ लिखा रहा, ‘अनबूझ परमेस्सर बरे’ तउ तू पचे बेजानिके जेकर आराधना करत बाट्या मइँ तोहका उहइ बचन क सुनावत हउँ।

²⁴ “परमेस्सर, जउऩ इ जगत क अउर इ जगत भितरे जउऩ कछू बा, ओकर रचना किहेस, उहइ धरती अउर अकास क पर्भू अहइ। उ हथवा स बनावा गवा मंदिर मँ नाहीं रहत। ²⁵ ओकरे लगे कउऩो चीजे क कमी नाहीं बा। ऍहसे मनई क हथवा स ओकर सेवा नाहीं होइ सकत। उहइ सबन क जिन्नगी, साँस अउर दूसर सब कछू देत रहत ह। ²⁶ एक ही मनई स उ मऩई क सबहिं जातिन क बनएस ताकि उ पसे समूचइ धरती प बसि जाइँ अउर उहइ मनइयन क समइ निश्चय कइ दिहेस अउर उ ठउर क जहाँ उ पचे रहइँ, चउहद्दी बाँधि दिहेस।

²⁷ “ओकर मतलब इ रहा कि मनई परमेस्सर क हेरइँ। होइ सकत ह कि उ पचे ओका ओकरे ताई पहोंचिक पाई सकइँ। ऍतना होए प भी हम सबन मँ कउनो स भी उ दूर नाहीं बा: ²⁸ काहेकि उहइ मँ हम पचे रहित ह, उहइ मँ हमारा चलब फिरब बा अउर उहइ मँ हमार थिर रहब बा! इहइ तरह खुद तोहरे ही कछू लिखवइया भी कहेन ह: ‘काहेकि हम पचे ओकर बचवा अही।’

²⁹ “अउर काहेकि हम परमेस्सर क संतान अही। यह बरे हमका इ कबहुँ नाहीं सोचइ चाही कि उ देउता सोना या चाँदी या पाथर क बनी भइ मानुस कल्पना या कारीगरी स बनी भइ कउनो मूरत जइसी अहइ। ³⁰ अइसे अगियान क जुग क परमेस्सर धियान नाहीं दिहेस अउर अब हर कतहुँ क मनई क मनफिराव क आदेस देत बाटइ। ³¹ उ एक दिन तय किहेस ह जब उ आपन एक मनई क जरिए जेका उ मुकईर किहेस ह निआव स दुनिया क निआव करी। मरे भएन मँ स ओका जिआइके उ हर कउनो क इ बात क परमान दिहेस ह!”

³² जब उ पचे मरे भएऩ मँ स जी उठइ का बात सुनेन तउ ओहमाँ स कछू तउ ओकर हँसी हसारत करइ लागेन मुला कछू कहेन, “हम सबइ इ विसय प फिन कबहुँ तोहार प्रबचन सुनब।” ³³ तब पौलुस ओनका तजिके चल दिहेस। ³⁴ कछू मनइयन बिसवास कइ लिहेन अउर ओकरे संग होइ गएन। एहमाँ अरियुपगुस^[a] क निअम्बर दियुनुसियुस अउर दमरिस नाउँ क स्त्री अउर ओकरे संगे क अउर मिला भी रहेन।