M’Cheyne Bible Reading Plan

खतना करार क सबूत

17 जब अब्राम निन्यानबे बरिस क भवा, यहोवा ओह पइ परगट भवा। यहोवा कहेस, “मइँ सर्वोच्च परमेस्सर अहउँ। मोरे आगे चला अउर इमानदार रहा। ² जदि तू इ करा, तउ मइँ आपन अउ तोहरे बीच एक करार करब। मइँ तोहका बचन देत हउँ कि मइँ तोहका बहोत सारा संतान देबउ।”

³ अब्राम परमेस्सर क समन्वा आपन मुँह जमीन कइँती निहुराएस। तब परमेस्सर ओहसे बात किहस अउ कहेस, ⁴ “हमरे करार क इ हीसा मोर अहइ। मइँ तोहका कइउ रास्ट्र क बाप बनाउब। ⁵ मइँ तोहरे नाउँ क बदल देब। तोहार नाउँ अब्राम नाही होइ। तोहार नाउँ इब्राहीम होइ। मइँ तोहका इ नाउँ ऍह बरे देत अहउँ कि तू बहोत स रास्ट्रन क बाप बनब्या। ⁶ मइँ तोहका बहोत संतानन देब। तोहसे नवा रास्ट्र अउर राजा लोग पइदा होइहीं। ⁷ अउर मइँ आपन अउ तोहरे बीच एक करार करब। इ करार तोहरे सबहिं संतानन बरे होइ। मइँ तोहार अउ तोहरे सबहि संतानन क परमेस्सर रहब। इ करार सदा बनी रही। ⁸ अउर मइँ इ प्रदेस तोहका अउ तोहरे सबहिँ संतानन क देब। मइँ उ प्रदेस तोहका देब जेहसे होइके तू जात्रा करत रहब्या। मइँ तोहका कनान प्रदेस देब। मइँ तोहका इ प्रदेस सदा बरे देब अउर मइँ तोहार परमेस्सर रहब।”

⁹ परमेस्सर इब्राहीम स कहेस, “अब करार क इ हींसा तोहार हींसा अहइ। मोर इ करार क मानब तू अउ तोहार संतानन करिही। ¹⁰ इ उ करार अहइ कि जेका तू मनब्या। इ करार मोरे अउ तोहरे बीच अहइ। इ तोहरे सबहि संतानन बरे अहइ। हर एक लरिका जउन पइदा होइ ओकर खतना जरूर होइ। ¹¹ तू बाहरी चाम क एक निसान बरे कटब्या कि तू आपन अउ मोरे बीच क करार क मानत रहब्या। ¹² जब लरिका आठ दिन क होइ जाइ तब तू ओकर खतना कर्‌या। हर एक लरिका जउन तोहरे मनइबन क बीच पइदा होइ या कउनो लरिका जउन विदेसी स खरीदइ भवा तोहार दास स पइदा होइ, ओकर खतना जरूर होइ। ¹³ इ तरह तोहरे रास्ट्र क हर एक लरिका क खतना होइ। जउन लरिका तोहरे परिवारे मँ पइदा होइ या दास क रुप मँ बसेहा जाइ ओकर खतना होइ। ¹⁴ इहइ मोर नेम अहइ अउर मोरे अउ तोहरे बीच करार अहइ। जउन कउनो मनई क खतना नाही होइ उ आपन मनइयन स अलगाइ दीन्ह जाइ। काहेकि उ मनई मोरे करार क तोड़ दिहस।”

इसहाक प्रण क पूत

¹⁵ परमेस्सर इब्राहीम स कहेस, “मइँ सारै क जउन तोहार मेहरारु अहइ, नवा नाम देब। ओकर नाउँ सारा होइ। ¹⁶ मइँ ओका असीस देब। मइँ ओका पूत देब अउ तू बाप होइ। उ बहोत स नए रास्ट्रन क महतारी होब्या। ओहसे रास्ट्रन क राजा लोग पइदा होइहीं।”

¹⁷ इब्राहीम आपन मूँड़ी परमेस्सर क भगति देखावइ बरे जमीन कइँती निहुराएस। मुला उ हसा अउ आपन स बोला, “मइँ सौ बरिस क होइ ग अहउँ। मइँ पूत नाही पइदा कइ सकत हउँ अउ सारा नब्बे बरिस क बुढ़िया बाटइ। उ लरिकन क जन्म नाही दइ सकत।”

¹⁸ तउ इब्राहीम परमेस्सर स कहेस, “मोका उमीद अहइ कि इस्माएल जिइही अउ तोहार सेवा करइहीं?”

¹⁹ परमेस्सर कहेस, “नाही, मइँ कहेउँ कि तोहार मेहरारु सारा पूत क जन्म देइ। तू ओकर नाउँ इसहाक रखब्या। मइँ ओकरे संग करार करब। इ करार अइसा होइ जउन ओकरे सबहि संतानन क संग सदा बनी रही।

²⁰ “तू इस्माएल क नाउँ लिहस अउर मइँ तोहार बात सुनेउँ। मइँ ओका असीसब। ओकरे बहोत स सन्तानन होइहीं। उ बारह बड़का राजा क बाप होइ। ओकर परिवार एक बहोत बड़ा रास्ट्र बनी। ²¹ मुला मइँ आपन करार इसहाक क संग करब। इसहाक ही उ पूत होइ जेका सारा पइदा करी। इ पूत अगला बरिस मँ इहइ टेम मँ, पइदा होइ।”

²² परमेस्सर जब इब्राहीम स बात करब बन्द किहस, इब्राहीम अकेल्ला रहि गवा। परमेस्सर इब्राहीम क लगे स आकास कइँती उठि गवा। ²³ परमेस्सर कहे रहा कि तू अपने परिवार क सबहि लरिकन अउ मनइयन क खतना कराया। ऍह बरे इब्राहीम इस्माएल अउ आपन घरे मँ पइदा भए सबइ नउकर लोगन क एक संग बोलाएस। इब्राहीम ओन नउकर लोगन क एक संग बोलाएस जउन धने स बेसहा ग रहेन। इब्राहीम क घर क सबहि मनसेधू अउ लरिकन बटुरेन अउ ओन सबहि क खतना उहइ दिन ओनकइ बाहरी चाम काटिके कइ दीन्ह गवा। इब्राहीम ओन लोगन क खतना ठीक उहइ तरह स किहेस जे तरह परमेस्सर कहे रहेन।

²⁴ जब इब्राहीम क खतना भवा उ निन्यानबे बरिस क रहा। ²⁵ अउर ओकर पूत इस्माएल आपन खतना होइके टेम तेरह बरिस क रहा। ²⁶ इब्राहीम अउ ओकरे पूत क खतना उहइ दिन भवा। ²⁷ उहइ दिन इब्राहीम क सबहिं मनइयन क खतना भवा। इब्राहीम क घरे मँ पइदा भए सबहि मनइयन क अउ बेसहा गए सबहि दासन क खतना उहइ दिन भवा।

यहहूदी नेतन क छलावा

(मरकुस 8:11-13; लूका 12:54-56)

16 फिन फरीसियन अउर सदूकियन ईसू क लगे आएन। उ पचे ओका परखा चाहत रहेन तउ उ सबइ ओका कउनो अद्भुत कारज करइ क कहेन, काहेकि मालूम होइ जाइ कि उ परमेस्सर क बाटइ।

² ईसू जवाब दिहेस, “सूरज बूड़इ क समइ तू पचे कहत ह मौसम बढ़िया रही कहेकि अकास ललछउँड़ अहइ। ³ अउर सूरज निकरे प तू कहत ह, ‘आज अँधड़ आई काहेकि अकास धूँधुर अउ ललछउँड़ अहइ।’ त अकासे क लच्छन पढ़इ जानत ह, मुला आपन समइ क लच्छन क नाहीं पढ़ सकत्या। ⁴ अरे दुस्ट अउर पापी पीढ़ी क मनई कउनो अद्भुत चीन्हा देखइ चाहत हीं मुला ओनके बजाय योना क अद्भुत चीन्हा क कउनो अउ दूसर अद्भुत चीन्हा नाहीं देखाइ जाई।” फिन उ ओनका तजि क चला गवा।

ईसू क चिताउनी

(मरकुस 8:14-21)

⁵ ईसू अउर ओनकइ चेलन झीले क पार चला गएन पर उ पचे रोटिया लइ आउब बिसरि गएन। ⁶ ऍह पइ ईसू ओनसे कहेस, “चउकन्ना रह्या अउर फरीसियन अउ सदूकियन क खमीरे स बचि रह्या।”

⁷ उ पचे आपुस मँ तजबीजइ लागेन अउर बोलने, “इ होई कि उ यह बदे कहेस कि हम पचे कउनो रोटी संग नाहीं लइ आएन।”

⁸ उ पचे का बिचारत रहेन, ईसू इ जानत रहा, तउ उ बोला, “अरे कमती बिसवास क मनइयो! तू सबइ आपुस मँ काहे सोचत बिचारत अहा कि तोहरे लगे रोटी नाहीं। ⁹ का तू पचे अबहुँ नाहीं समुझ पाया अउर तोहका याद नाहीं अहइ कि पाँच हजार मनइयन बरे उ पाँच रोटी अउर फिन केतना झउआ भरिके तू सबइ उठाया ह? ¹⁰ अउर का तोहका याद नाहीं चार हजार मनइयन बरे सात रोटी अउर फिन केतना झउआ भरि के तू पचे उठाए रह्या? ¹¹ काहे नाहीं समझत्या कि मइँ तोहसे रोटियन क बारे मँ बात नाहीं कहेउँ? मइँ तउ तोहका फरीसियन अउर सदूकियन क खमीरे^[a] स दूर रहइ को कह्यो ह।”

¹² तबहि उ पचे समुझ गएन कि रोटिया क खमीरे स नाहीं अरथ रहा मुला फरीसियन अउर सदूकियन क सिच्छा स चौकस रहइ क अरथ रहा।

पतरस कहत ह कि ईसू अहइ मसीह

(मरकुस 8:27-30; लूका 9:18-21)

¹³ जबहि ईसू कैसरिया फिलिप्पी क पहँटा मँ आइ तउ उ आपन चेलन स पूछेस, “मनइयन का कहत बाटेन, कि मइँ मनई क पूत कउन हउँ?”

¹⁴ उ पचइ कहेन, “कछू मनइयन कहत हीं तू यूहन्ना अहा बपतिस्मा देइवाला। दूसर मनइयन कहत हीं कि तू एलिय्याह^[b] अहा अउ कछू मिला कहत हीं कि तू यिर्मय्याह^[c] या नबियन मँ स कउनो एक अहा।”

¹⁵ ईसू आपन चेलन स कहेस, “अउर तू का कहत ह कि मइँ कउह हउँ?”

¹⁶ समौन पतरस जबाव दिहस, “तू मसीह अहा, साच्छात परमेस्सर क पूत।”

¹⁷ जवाबे मँ ईसू ओसे कहेन, “योना क पूत समौन। तू धन्य अहा काहेकि तोहका इ बात कउनो मनई नाहीं, मुला सरगे मँ बसा भवा मोर परमपिता देखाएस ह। ¹⁸ मइँ तोहसे कहत हउँ कि तू परतस अहा। अउर इहइ चट्टाने प मइँ आपन कलीसिया बनउव। मउत क सक्ती^[d] ओह प परबल नाहीं होइ। ¹⁹ मइँ तोहका सरगे क राज्य क कुंजी देत हउँ। काहेकि भुइयाँ प जउन कछू तू बँधब्या उ परमेस्सर क जारिये सरग मँ बाँध दीन्ह जाइ अउर धरती पर जेका तू न बंधब्या ओका सरगे मँ भी न बांधा जाई।”

²⁰ फिन उ आपन चेलन क कर्रा हुकुम दिहेस कि उ सबइ कउनो क इ न बतावइँ कि उ मसीह अहइ।

ईसू आपन मउत क भविस्सबाणी

(मरकुस 8:31–9:1; लूका 9:22-27)

²¹ उ समइया ईसू आपन चेलन क बतावइ लाग कि, ओका यरूसलेम जाइ चाही। जहाँ ओका धरम सास्तिरियन, बुजुर्ग यहूदी नेतन अउर मुख्ययाजकन क जरिए यातनायें दइके मरवाइ दीन्ह जाई। फिन तीसर दिन उ मरा भवा मँ जी जाई।

²² तबहि पतरस ओका अलगइ लइ गवा अउर ओकर डांट-डपट करत ओसे कहेस, “ओ पर्भू! परमेस्सर तोह पइ दाया करी। तेरे संग अइसा कबहुँ न होई!”

²³ फिन ईसू ओकरे कइँती मुड़ि गवा अउर बोला, “पतरस मोरे समन्वा स हटि जा, सइतान! तू मोरे बरे एक रोड़ा अहा। काहेकि तू परमेस्सर क नाईं नाहीं मनई क नाईं सोचत बिचारत ह।”

²⁴ फिन ईसू आपन चेलन स कहेस, “जदि कउनो मोरे पाछे आवा चाहत ह, तउ उ आपन क बिसराइ के, आपन क्रूस उठाइ लेइ अउर मोरे पाछे होइ जा। ²⁵ जउन कउनो आपन जिन्नगी क बचावइ चाहत बा, उ ओका हेराइ देइ। मुला जउन कउनो मोरे बरे आपन जिन्नगी तजि देइ, उहइ ओका बचाइ सकत ह। ²⁶ जदि कउनो आपन जिन्नगी दइके समूचा संसार भी पाइ जाइ तउ ओका ओसे कउन फायदा? आपन जिन्नगी क फिन स पावइ बरे कउनो भला का दइ सकत ह ²⁷ मनई क पूत सरगदूतन क संग आपन परमपिता क महिमा क संग आवइवाला अहइ, जउन हर कउनो क ओकर करम क फल देई। ²⁸ मइँ तोहसे सच कहत हउँ, हिआँ कछू अइसे लोग खड़ा अहइँ जउन तब तलक नाहीं मरिहीं जब तलक उ पचे मनई क पूत क ओकरे राज्य मँ आवत न निहारि लेइँ।”

जियादा समस्यन

6 एकरे पाछे सम्बल्लत, तोबियाह, अरब क रहइवाले गेसेम अउर हमार दुस्मनन इ सुनेन कि मइँ देवार क निर्माण कराइ चुका हउँ। हम उ देवार मँ दरवाजन बनाइ चुके रहेन किन्तु तब तलक दरवाजन पइ जोड़ियन नाहीं चढ़ाई गई रहिन। ² तउ सम्बल्लत अउर गेसेम मोरे लगे इ सँदेसा पठएन: “नेहमायाह, तू आइके हम स मिला। हम ओनो क मइदान मँ कैफरीम नाउँ क कस्बे मँ मिल सकत ही।” किन्तु ओनकर जोजना तउ मोका नोस्कान पहोंचावइ क रही।

³ तउ मइँ ओनके लगे इ जवाब क संग सँदेस पठइ दिहेउँ: “मइँ हिआँ महत्त्वपूर्ण काम मँ लगा हउँ। तउ मइँ नीचे तोहरे लगे नाहीं आइ सकत। मइँ सिरिफ एह बरे काम बन्द नाहीं करइ चाहब कि तोहरे लगे आइके तोहसे मिल सकउँ।”

⁴ सम्बल्लत अउ गेमेस मोरे लगे चार दाईँ वइसे ही सँदेसा पठएन अउर हर दाईँ मइँ भी ओनका उहइ जवाब पठवाइ दिहेउँ।

⁵ फुन पाँचवी दाई सम्बल्लत उहइ सँदेसा क संग अपने सहायक क मोरे लगे पठएस। ओकरे हाथ मँ एक पत्र रहा जउने पइ मोहर नाहीं लगी रही। ⁶ उ पत्र मँ लिखा रहा:

“चारिहुँ तरफ एक अफवाह फइली भइ अहइ। हर कहूँ लोग उहइ बात क चर्चा करत अहइँ अउर गेमेस क कहब अहइ कि उ फुरइ अहइ। लोगन क कहब अहइ कि तू अउर यहूदी, राजा स बगावत क जोजना बनावत रहे अहा अउर इहइ बरे तू यरूसलेम क नगर देवार क निर्माण करत अहा। लोगन क इ भी कहब अहइ कि तू ही यहूदियन क नवा राजा बनब्या। ⁷ अउर इ अफवाह भी अहइ कि तू यरूसलेम मँ अपने विसय मँ इ घोसणा करइ बरे भविस्सबक्ता भी चुन लिहा ह: ‘यहूदा मँ एक ठु राजा अहइ।’

“नहेमायाह! अब मइँ तोहका चितउनी देत हउँ। राजा अर्तछत्र इ बिसय क सुनवाई करी तउ हमरे लगे आ अउर हमसे मिलिके इ बारे मँ बातचीत कर।”

⁸ तउ मइँ सम्बल्लत क लगे इ जवाब पठवाइ दिहेउँ, “तू जइसा कहत रह्या ह वइसा कछू नाहीं होत अहइ। इ सब बातन तोहार अपनी खोपड़ी क उपज अहइँ।”

⁹ हमार दुस्मन बस हम क डेरावइ क जतन करत अहइँ। उ पचे अपने मने मँ सोचत रहेन, “यहूदी लोग डेराइ जइही अउर काम क चलत रखइ बरे बहोत निर्बल पड़ जइहीं अउर फुन देवार पूरी नाहीं होइ पाई।”

किन्तु मइँ अपने मन मँ इ बिनती किहेउँ, “परमेस्सर मोका मजबूत बनावा।”

¹⁰ मइँ एक दिन दलायाह क पूत समायाह क घर गएउँ। दलायाह महेतबेल क पूत रहा। समायाह क अपने घरे मँ ही रूकइ पड़त रहा। समायाह कहेस,

“नहेमायाह आवा हम परमेस्सर क मन्दिर क भीतर मिली। आवा चली भीतर हम पवित्तर ठउर क अउर बन्द दुआरन क कइ लेइ आवा, वइसा करी हम काहे काहेकि लोग अहइँ आवत रहे मारइ क तोहका। उ पचे आवत अहइँ आजु रात मार डावइ क तोहका।”

¹¹ किन्तु मइँ समायाह स कहेउँ, “का मोरे जइसे कउनो मनई क पराइ जाइ चाही? तू तउ जानत ही अहा कि मोरे जइसे मनई क आपन परान बचावइ क बरे मन्दिर मँ भाग जाइ चाही। तउ मइँ हुवाँ नाहीं जाबउँ।”

¹² मइँ जानत रहेउँ कि समायाह क परमेस्सर नाहीं पठएस ह। मइँ जानत रहेउँ कि मोरे खिलाफ उ एह बरे अइसी झूठ भविस्सबाणियन करत अहइ कि तोबियाह अउर सम्बल्लत ओका वइसा करइ बरे धन दिहस ह। ¹³ समायाह क मोका डेरावइ बरे भाड़े पइ रखा गवा रहा। उ पचे इ चाहत रहेन कि डरके छिपइ बरे मन्दिर मँ पराइके मइँ पाप करउँ ताकि मोका लज्जित करइ अउ बदनाम करइ क कउनो आधार होइ।

¹⁴ हे परमेस्सर! तोबियाह अउ सम्बल्लत क याद राखा। ओन बुरे कामन क याद राखा जउन उ पचे किहन ह। उ नबिया नोअद्याह अउ ओन नबियन क याद राखा जउन मोका भयभीत करइ क जतन करत अहइँ।

परकोटा पूरा होइ गवा

¹⁵ इ तरह एलूल नाउँ क महीने क पच्चीसवीं तारीख क यरूसलेम क परकोटा बनिके तइयार होइ गवा। देवार क बनिके पूरा होइ मँ बावन दिन लगेन। ¹⁶ फुन हमार सबहिं दुस्मनन सुनेन कि हम परकोटा बनाइके तइयार कइ लिहा ह। हमरे आस पास क सबहि देसन लखेन कि निर्माण कार्य पूरा होइ चुका ह। एहसे ओनकर हिम्मत टूट गइ काहेकि उ पचे जानत रहेन कि हम इ कार्य हमरे परमेस्सर क मदद स पूरा किहा ह।

¹⁷ एकरे अलावा ओन दिनन जब उ देवार बनिके पूरी होइ चुकी रही तउ यहूदा क धनी लोग तोबियाह क पत्र लिख-लिखके पत्र पठवइ लागेन, तोबियाह ओनके पत्रन क जवाब दिया करत। ¹⁸ उ पचे एन पत्रन क एह बरे पठवा करत रहेन कि यहूदा क बहोत स लोग ओकरे बरे वफादार बने रहइ क कसम उठाए भए रहेन। एकर कारण इ रहा कि तोबियाह सकम्याह क दामद रहा। जउन आरह क पूत रहा अउर तोबियाह क पूत यहोहानान बेरेक्याह क पूत मसुल्लाम क बिटिया स बियाह किहे रहे। ¹⁹ अउर उ सबइ लोग मोहसे कहत रहत रहेन कि तोबियाह केतना अच्छा अहइ अउर उधर उ पचे जउन काम मइँ किया करत रहेउँ, ओकरे बारे मँ तोबियाह क खबर देत रहेन। तोबियाह मोका डरावइ बरे पत्र पठवत रहत रहा।

तीमुथियुस क पौलुस अउर सीलास क संग जाब

16 पौलुस दिरबे अउर लुस्त्रा मँ भी आवा। हुवँइ तीमुथियुस नाउँ क एक चेला रहा। उ कउनो बिसवासी यहूदी स्त्री क बेटवा रहा मुला ओकर बाप यूनानी रहा। ² लुस्त्रा अउर इकुनियुम क सहर क भाइयन क संग ओकर अच्छा उठब बैठब रहा। ³ पौलुस तीमुथियुस क जात्रा प लइ जावा चाहत रहा। तउ उ ओका आपन संग लइ लिहेस अउर स्थानन प बसइया यहूदियन क कारण ओकर खतना किहेस; काहेकि उ पचे सबहिं जानत रहेन कि ओकर बाप एक यूनानी रहा।

⁴ सहरन स जात्रा करत भवा उ पचे हुवाँ क मनइयन क ओन नियम क बारे मँ बताएन जेनका यरुसलेम मँ प्रेरितन अउर बुजुर्गन तय कइ दिहे रहेन। ⁵ इ तरह हुवाँ क कलीसिया क बिसवास अउर मजबूत होत गोवा अउर रोज हर ओनकइ गनती बाढ़त गइ।

पौलुस क एसिया स बाहेर बोलावा जाब

⁶ तउ उ पचे फ्रूगिया अउर गलातिया क पहँटा स होइके निकरेन काहेकि पवित्तर आतिमा ओनका एसिया मँ पवित्तर बचन क प्रचार क मना कइ दिहे रही। ⁷ फिन उ पचे जब मूसिया क सरहदे प पहोंचन तउ उ पचे बितूनिया मँ प्रवेस किहेन। मुला ईसू क आतिमा ओनका हुवाँ भी जाइ नाहीं दिहेस। ⁸ तउ उ पचे मूसिया होत भए त्रोआस पहोंचेन।

⁹ राति क समइ पौलुस दिब्य दर्सन मँ निहारेस कि मैसीडोनिया क मनई ओसे पराथना करत भवा कहत अहइ, “मैसीडोनिया मँ आवा अउर हमार मदद करा!” ¹⁰ इ दिब्य दर्सन क लखे क पाछे तुरंतहि इ नतीजा निकारत भए कि परमेस्सर ओन मनइयन क बीच सुसमाचार क प्रचार करइ हमका बोलाए अहइ हम पचे मैसीडोनिया जाइ बरे ठान लीन्ह।

लुदिया क हिरदय बदलाव

¹¹ इ तरह हम त्रोआस स जल मार्ग क जरिए जाइ बरे आपन नाउ खोलि दीन्ह अउर सोझइ समोथ्राके जाइ पहोंचेन। फिन अगले दिन नियापुलिस चला गएन। ¹² हुवाँ स हम पचे एक रोमी उपनिवेस फिलिप्पी पहुँचेन जउ मैसीडोनिया क उ पहँटा क एक प्रमुख सहर रहा। इ सहर मँ हम कछू दिन बितावा।

¹³ फिन सबित क दिन इ बिचारत भए कि पराथना करइ बरे हुवाँ कउनो स्थान होइ हम सहर-दुआरे नदि क तीरे गए। हम पचे हुवाँ बइठे अउर बटुरी भइ स्त्रियन स बातचीत करइ लागे। ¹⁴ हुवँई लुदिया नाउँ क एक स्त्री रही। उ बैगनी रंग क ओढ़ना क बिक्री करत रही। उ परमेस्सर क आराधिका रही। उ बड़ा धियान स हमार बातन क सुनत रही। पर्भू ओकरे हिरदय क दुआर खोल दिहस ताकि, जउन कछू पौलुस कहत रहा, उ ओन बातन प धियान देइ सकइ। ¹⁵ आपन समूचइ परिवार क संग बपतिस्मा लेए क पाछे उ हम सबन स इ कहत भए बिनती किहेस, “जदि तू पचे मोका पर्भू ईसू क सच्चा भगत मानत ह तउ मोरे घरे आवा।” तउ उ हम पचन क जाइ बरे तइयार किहेस।

पौलुस अउर सीलास क बंदी बनावा जाब

¹⁶ फिन अइसा भवा कि जब हम पचे पराथना ठउर कइँति जात रहे, हम पचन क एक दासी मिली जेहमाँ एक सगुन बतावइ वाली आतिमा क सवारी रहीं। उ मनइयन क भाग्ग बताइके आपन मालिकन क ढेर धन कमाइके देत रही। ¹⁷ उ हमरे पौलुस क पाछे इ चिचियात भइ होइ गइ “इ पचे परम परमेस्सर क सेवक अहइँ। इ पचे तोहका मुक्ति क रस्ता क संदेसा सुनावत अहइँ।” ¹⁸ उ बहोत दिनाँ तलक अइसा ही करत रहाइ तउ पौलुस परेसान होइ गवा। उ मुड़िके उ आतिमा स कहेस, “मइँ ईसू मसीह क नाउँ प तोहका आदेस देत हउँ, ‘इ बिटिया मँ स बाहेर निकरि आवा!’” तउ उ फउरन ओहमाँ स बाहेर निकरि गइ।

¹⁹ फिन ओकर स्वामी लोगन जब लखेन कि ओनकइ कमाई क आसा स मन टूटि गवा अहइ तउ उ पचे पौलुस अउर सिलास क धइ दहबोचेन अउर ओऩका घेर्रावत भए बजार क बीच नगर क अधिकारियन क समन्वा लइ गएन। ²⁰ फिन न्यायकर्ता क लगे ओनका लइ जाइके बोलेन, “इ सबइ यहूदियन अहइँ अउर हमरे सहर मँ गड़बड़ी फइलावत बाटेन। ²¹ इ पचे अइसी रीति रिवाज क दोहाई देत हीं जेनका अपनाउब या जेन पइ चलब हम रोमी मनइयन बरे निआव क मुताबिक नाहीं बा।”

²² भीड़ भी खिलाफत मँ मनइयन क संग होइके हमला करइ आइ। दण्डनायक भी ओनकइ ओढ़ना फाड़िके उतरवाइ दिहेन अउर आग्या दिहेन कि ओनकइ कुटुम्मस होइ। ²³ ओन पइ बहोत मारि पड़ चुकइ क पाछे उ पचे ओनका जेल मँ डाइ दिहेन अउर जेल क अधिकारि क आदेस दिहेन कि ओनके बरे कर्रा पहरा बइठाइ दीन्ह जाइ। ²⁴ अइसा आदेस पाइके उ ओनका जेल क भितरी खोली मँ धाँध दिहेन। उ ओनकइ गोड़वा मँ कठघरा जड़ दिहेन।

²⁵ लगभग आधी राति बीते प पौलुस अउर सीलस परमेस्सर क भजन गावत भएन पराथना करत रहेन अउर दूसर कैदी ओनका अनकत रहेन। ²⁶ तब्बइ हुवाँ अचानक एक अइसा खौफनाक भूचाल आवा कि जेल क नींव हल गइ। अउर फउरन जेल क फटक्का खुल गवा। हर कउनो क बेड़ी ढ़ीली होइके फिसल गइ। ²⁷ जेलि क अधिकारी जागिके जब लखेस कि जेलि क फटक्का खुलि गवा अहइँ तउ उ आपन तरवार हींच लिहेस अउर इ सोचत भए कैदी पराइ गएन बाटेन। उ खुद क मार डावइ वाला रहा तबहिं ²⁸ पौलुस उँची अवाज मँ चिल्लाइके कहेस, “आपन क नस्कान जिन पहोंचावा काहेकि हम सब हियँइ अही।”

²⁹ ऍह पइ जेल क अधिकारी मसाल मँगवाएस अउर हल्बुली मँ भितरे गवा। अउर डर स काँपत भवा पौलुस अउर सीलास क समन्वा भहराइ पड़ा। ³⁰ फिन उ ओनका बाहेर लइ जाइके बोला, “साहेब लोगो, उद्धार पावइ बरे मोका का करइ चाही?”

³¹ उ पचे जवाब दिहेन, “पर्भू ईसू प बिसवास करा। ऍहसे तोहार उद्धार होइ-तोहार अउर तोहरे परिवार क।” ³² फिन ओकरे सारे परिवार क संग उ सबइ ओका पर्भू क बचन सुनाएन। ³³ ओकरे पाछे जेल क अधिकारी उहइ रात अउर उहइ घड़ी ओनका हुवाँ स लइ गवा। उ ओकर घाव धोएस अउर आपन सारे परिवार क संग बपतिस्मा लिहेस। ³⁴ फिन उ पौलुस अउर सीलास क आपन घर लइ गवा अउर ओनका खइया क खिलाएस। परमेस्सर मँ बिसवास क कारण उ आपन समूचइ परिवार क संग आनन्द मनाएस।

³⁵ जब भोर भवा तउ हाकिम इ कहइ बरे पिआदा क हुवाँ पठएन कि ओन पचन क छोड़ दीन्ह जाइ।

³⁶ फिन जेलि क अधिकारी इ बतियाँ पौलुस क बखानेस, “दण्डधिकारी तू पचन क छोड़ि देइ क कहवाइ पठएन ह। यह बरे अब तू बाहेर आवा अउर सांति क साथ चला जा।”

³⁷ मुला पौलुस ओन सिपाहियन स कहेस, “जद्यपि हम रोमी नागरिक अही, मुला उ पचे हमका बिना अपराधी होए बिना सब मनइयन क समन्वा मारेन पीटेन ह अउर जेलि मँ धाँध दिहेन। अउर अब चुप्पे चुप्पे उ पचे हमका बाहेर पठइ देत चाहत हीं, निहचय ही अइसी नाहीं होइ। होइ तउ इ चाही कि उ पचे खुद ही आइके हम पचन क बाहेर खदेरइँ।”

³⁸ सिपाही लोग न्याहाधीस क इ सब्द जाइके सुनाएन। न्याहाधीस क जब इ पता लाग कि पौलुस अउर सीलास रोमी आहइँ तउ उ सबइ बहोत ससाइ गएन। ³⁹ तउ उ पचे हुवाँ आएन अउर ओनसे छमा माँगिके ओनका बाहेर लइ गएन अउर ओनसे सहर क तजि देइ क कहेन। ⁴⁰ पौलुस अउर सीलास जेल स बाहेर निकरिके लुदिया क घर पहोंचेन। धर्म बंधुअन स मिलत भए उ पचे ओनकइ हौसला बढ़ाएन अउर फिन हुवाँ स चलि दिहेन।