M’Cheyne Bible Reading Plan

नई सुरुआत

9 परमेस्सर नूह अउ ओकर पूतन क असीसेस अउ ओनसे कहेस, “बहोत स बच्चा पइदा करा अउ आपन लोगन स भुइँया भरि द्या। ² भुइँया क सब जनावरन तोहरे डरे स थरथरइहीँ अउ अकासे क हर एक पंछी तोहसे डरिहीँ। भुइँया प रेंगइवाला हर एक जीउ अउ समुद्दर क हर एक मछरी तू मनइयन क अदब करी अउ तू पचन स डेराइ। तू इ सबहि क ऊपर हुकुम चलउब्या। ³ बीते भए समइ मँ तू पचन क मइँ हर एक ठु पेड़-पौधा खाइ बरे दिहेउँ रहेउँ। अब हर एक जनावर भी तोहार भोजन होइ। मँइ भुइँया क हर चीज तू पचन क देत हउँ-अब इ सबइ तोहार अहइँ। ⁴ किन्तु मँइ तू पचन क एक हुकुम देत अहउँ कि तू कउनो जनावरन क तब तलक न खाया जब तलक ओहमा ओनका रकत बाटइ। ⁵ मँइ तोहरी जिन्नगी क बदले तोहार रकत माँगब कहइ क अरथ अहइ मँइ उ जानवरे क जिन्नगी माँगब जउन कउनो मनई क मारी। अउर मँइ उ मनई क जिन्ननी माँगब जउन दूसरे मनई क मारी।

⁷ “नूह तोहका अउ तोहरे पूतन क ढेर लरिका होइ अउ धरती क मनइयन स भाँठि द्या।”

⁸ तब परमेस्सर नूह अउ ओकरे पूतन स कहेस, ⁹ “अब मइँ तोहका अउ तोहरे सन्ताने क बचन देत हउँ। ¹⁰ मइँ इ बचन तोहरे संग जहाजे स बाहेर आवइवालन सबहि पंछिन, सब गोरुअन सब जनावरन क देत हउँ। मइँ धरती पइ रहइवालन सबहि वस्तुअन क बचन देत हउँ। ¹¹ मइँ तोहका बचन देत हउँ, ‘पानी क बाढ़ स धरती क सब जिन्नगी बर्बाद होइ गइ मुला अब इ कबहु न होइ। अब बाढ़ फिन कबहुँ धरती क जिन्नगी क बर्बाद न करी।’”

¹² अउर परमेस्सर कहेस, “इ सिद्ध करइ बरे मइँ तोहका इ बचन दिहेउँ ह कि मइँ तोहका कछू देब। इ सबूत बताइ कि मइँ तोहसे अउ भुइँया क सबहि जिअत प्राणियन स एक ठु करार किहेउँ ह। इ करार भविस्स मँ सदा बनी रही जेकर सबूत इ अहइ। ¹³ कि मइँ बदरन मँ इन्द्र धनुख बनाएउँ ह। इन्द्र धनुख मोरे अउ भुइँया क बीच करार क सबूत अहइ। ¹⁴ जब मइँ भुइँया क ऊपर बदरे क लिआउब तउ तू बादरन मँ इन्द्र धनुख देखब्या। ¹⁵ जब मइँ इ इन्द्र धनुख क निहारब तबहिं मइँ तोहरे, भुइँया क सबहि जिअत प्राणियन अउ आपन बीच भई करार क सुमिरब। इ करार इ बात क बाटइ कि बाढ़ फुन कबहु भुइँया क प्राणियन क नास न करी। ¹⁶ जब मइँ धियान स बादरन मँ इन्द्र धनुख क निहारब तब मइँ सदा बनी रहइवाली करार क सुमिरब। मइँ आपन अउ भुइँया क सब जिअत प्राणियन क बीच भइ करार क सुमिरब।”

¹⁷ इ तरह यहोवा नूह स कहेस, “उ इन्द्र धनुख मोरे अउ भुइँया क सब जिअत प्राणियन क बीच भइ करार क सबूत बाटइ।”

समस्या फुन सुरु होत हीं

¹⁸ नूह क पूत लोग ओकरे संग जहाज स बाहेर आएन। ओनकइ नाउं सेम, हाम अउ येपेत रहेन। (हाम तउ कनान क बाप रहा।) ¹⁹ इ तीनउ नूह क पूतन रहेन अउ संसारे क सबहि मनई इ तीनउ स पइदा रहेन।

²⁰ नूह किसान बना। अंगूर क बगिया लगाएस। ²¹ नूह अंगूर क दाखरस बनाएस अउ पिएस। उ दाखरस पीके मस्त होइ गवा अउ तम्बू मँ लोटि गवा। उ कउनो ओढ़ना नाही पहिरे रहा। ²² कनान क बाप हाम अपने बाप क नंगा देखेस। उ तम्बू स बाहेर आपन भइयन क बताएस। ²³ तबहि सेम अउ येपेत एक ठु ओढ़ना लिहस। उ दुइनउँ ओढ़ना क पीठ प डाइके उलटे मुइँ तम्बू मँ गएन। उ पचे आपन बाप उ नंगापन क ढ़ाँक दिहस जबकि उ समइ ओकर मुहँ क रुख तम्बू क समन्वा रहा। इ तरह उ पचे आपन बाप क नंगापन नाहीं लखेन।

²⁴ पाछे नूह सोइके उठा। (उ दाखरस क नसा क कारण सोअत रहा।) तब ओका पता लाग कि ओकर सब त नान्ह पूत हाम ओकरे संग का किहे रहा। ²⁵ ऍह बरे नूह सराप दिहेस,

²⁶ नूह इ भी कहेस,

²⁸ बाढ़ क पाछे नूह साढ़े तीन सौ बरिस जिअत रहा। ²⁹ नूह पूरा साढ़े नौ सौ बरिस जिअत रहा, तब उ मरा।

रास्ट्र बाढ़इ अउ फइल जाइ

10 नूह क पूत सेम। हाम अउ येपेत रहेन। बाढ़ क पाछे इ तीनउँ बहोत स पूतन क बाप भएन। हिआँ सेम, हाम अउ येपेत स पइदा होइवालन पूतन क सूची दीन्ह जात अहइ:

येपेत क संतानन

⁵ भूमध्य सागर क चारिहुँ कइँती तटे प जउन मनई रहइ लागेन उ पचे येपेत क संतान ही रहेन। हर एक पूत क आपन अलग प्रदेस रहा। सब परिवार बाढ़ेन अउ अलग अलग रास्ट्र बन गएन। हर एक रास्ट्र क आपन आपन भाखा रही।

हाम क संतानन

⁸ कूस क एक पूत निम्रोद नाउं क भी रहा। निम्रोद भुइँया प बहोत बरिआर मनई भवा रहा। ⁹ यहोवा क समन्वा निम्रोद, एक बड़का सिकरी रहा। ऍह बरे लोग दूसर मनइयन क बराबरी निम्रोद स करत ही अउर कहत हीं, “इ मनई, यहोवा क समन्वा बड़का सिकारी निम्रोद क तरह अहइ।”

¹⁰ निम्रोद क राज्ज सिनार देस मँ बाबुल, एरेख, कलना अउ अक्कद प्रदेस स सुरु भवा। ¹¹ निम्रोद अस्सूर मँ भी गवा। हुवाँ उ नीनवे, रहोबोतीर, कालह अउ ¹² रेसेन नाउँ क नगरन क बसाएस। (रेसेन, नीनवे अउ बड़का सहर कालह, क बीच क सहर बाटइ।)

कनान क परिवार संसार क अलग अलग हीसा मँ फइला रहेन, ¹⁹ कनान लोगन क भुइँया उत्तर मँ सीदोन स दक्खिन मँ गरार तलक, पच्छिम मँ अज्जा स पूरब मँ सदोम अउ अमोरा तलक, अदमा अउ सबोयीम स लासा तलक रहा।

²⁰ इ सबइ लोग हाम क संतानन रहेन। उ पचे परिवारन, भाखान, देसन अउर रास्ट्रन क अनुसार व्यवस्थित रहेन।

सेम क संतानन

²¹ सेम येपेत क बड़का भाई रहा। सेम क एक संतानन एबेर हिब्रू लोगन क बाप रहा।

³¹ उ लोग सेम क परिवारे स रहेन। उ सबइ परिवार, परिवार क आधार पइ, भाखा क आधार पइ, देस क आधार पइ अउर रास्ट्र क आधार पइ बँटा भवा रहा।

³² नूह क पूतन स चलइ वाला परिवारन क इ सूची अहइ। उ पचे आपन आपन रास्ट्र मँ बँटा भवा रहत रहेन। बाढ़ क पाछे सारी भुइँया प फइलइवाला लोग भी एनही परिवारे स निकरि आएन।

लकुआ क मरीज क चंगा करब

(मरकुस 2:1-12; लूका 5:17-26)

9 फिन ईसू एक नाउ प चढ़ा अउर झिलिया क पार आपन सहर आइ गवा। ² मनइयन लकुआ क मरीजे क खटिया प ओलराइके ओकरे नगिचे लइ आएन। ईसू जबहि ओकरे बिसवास क देखेस तउ लकुआ क रोगी स कहेस, “हे बालक ढाढ़स रखा। तोहार पापन्क छमा कीन्ह गवा।”

³ तबहि कछू यहूदी धरम सास्तिरियन आपस मँ कहइ लागेन, “इ मनई (ईसू) अपने सब्दन स परमेस्सर क बेज्जत करत ह।”

⁴ ईसू जानत रहा कि उ पचे का सोचत विचारत अहइँ: ईसू ओनसे बोला, “तू सब आपन मन मँ काहे बुरा बिचार आवइ देत ह? ⁵ जिआदा सहल का बाटइ? इ कहब, ‘तोहार पापन्क छमा कीन्ह गवा।’ या इ कहब, ‘खड़ा ह्वा अउर चलि पड़ा?’ ⁶ काहेकि तू सब इ जान पावा कि धरती प पापन्क छमा करइ क सक्ती मनई क पूत मँ अहइ।” ईसू लकुआ क रोगी स कहेस, “खड़ा ह्वा, आपन बिछउना उठावा अउ घरे चला जा।”

⁷ उ लकुआ क मरीज खड़ा होइके आपन घर चला गवा। ⁸ जबहि भीड़े मँ मनइयन इ निहारेन कि तउ उ सबइ गहरी भक्ती स अचरजे मँ पड़ि गएन अउर परमेस्सर क गुन गावइ लागेन जउन मनई क अइसी सक्ती दिहेस।

ईसू क मत्ती क चुनब

(मरकुस 2:13-17; लूका 5:27-32)

⁹ ईसू जब हुआँ स जात रहा तउ उ महसूले क चुंगी क चौकी प बइठा भवा एक मनई क देखेस। ओकर नाउँ मत्ती रहा। ईसू ओसे कहेस, “मोरे पाछे चला आवा।” ऍह प मत्ती खड़ा भवा अउर ओकरे पाछे होइ गवा।

¹⁰ अइसा भवा कि जब ईसू मत्ती क घर बहोत स चुंगी उगहियन अउर पापी मनइयन क संग आपन मनवइयन क साथ लइके जेंवत रहा। ¹¹ तउ ओका फरीसियन देखेन अउर ओनके चेलन स पूछइ लागेन, “तोहार गुरु चुंगी क उगहिया अउर बुरा मनइयन क संग खइया के काहेखात ह?”

¹² इ सुनिके ईसू ओनसे कहेस, “हिट्ठ पुट्ठ मनई क नाहीं मुला बेरमियन क एक बैद्य (डाक्टर) क जरूरत होत ह। ¹³ एह बरे तू सबइ जा अउर समझा कि सास्तरे क बचन क अरथ का अहइ? ‘मइँ बलिदान नाहीं चाहत हउँ मुला द्या चाहता हउँ।’^(A) मइँ धर्मी क नाहीं मुला पापियन क बुलावइ आइ हउँ।”

ईसू दूसर यहूदी धर्म नेता स न्यारा

(मरकुस 2:18-22; लूका 5:33-39)

¹⁴ फिन बपतिस्मा क देवइया यूहन्ना क चेलन ईसू क लगे गएन अउर पूछेन, “हम सबइ अउर फरीसियन पुनि पुनि उपवास काहे करत हीं परन्तु तोहार चेलन काहे नाहीं करतेन?”

¹⁵ फिन ईसू ओनका समझाएस, “का दूल्हा क साथी जब ताईं दूल्हा ओनके संग अहइ, सोक मनाइ सकत हीं? मुला उ दिनन अइहीं जब दूल्हा ओनसे छीन लीन्ह जाई फिन उ समइया मँ उ सबइ दुखी होइहीं अउर उपवास करिहीं।

¹⁶ “बे सिकुड़ा भवा नवा कपरा क पइबंद पुरान पोसाके प कउनो लगावत नाहीं काहेकि इ पइबंद पोसाके क अउर जिआदा फाड़ देइ अउ कपरा क खोंच अउर बाढ़ जाई। ¹⁷ नई दाखरस पुरान मसकन मँ भरी नाहीं जात। नाहीं तउ मसकन क फोरि देइ अउर दाखरस बहिके फैलि जाई। एह बरे लोग नई दाखरस नई मसकन मँ भरत हीं जइसे दाखरस अउर मसकन दुइनउँ बचा रहइँ।”

मरी लरिकि क जिन्नगी देब अउर बेरमिया स्त्री क चंगा करब

(मरकुस 5:21-43; लूका 8:40-56)

¹⁸ ईसू ओन मनइयन क जब इ बतिया बतावत रहा, तबहि यहूदी आराधनालय क एक मुखिया ओकरे लगे आवा अउर ओकरे समन्वा निहुरिके बिनती करत भवा बोला, “अबहीं अबहीं मोर बिटिया मरी गइ अहइ। तू चलिके जदि ओह प आपन हाथ रख द्या तउ उ फिन जी जाई।”

¹⁹ ऍह प ईसू खड़ा होईके आपन चेलन क संग ओकरे साथ चल दिहेस।

²⁰ हुवाँ एक ठु स्त्री रही जेका बारह बरिस स खून बहत रहा। उ पाछे स ईसू क नगिचे आइ, ओकरे ओढ़ना क मुहरी छुइ लिहस। ²¹ उ आपन मनवा मँ सोचत रही, “जदि मइँ तनिकउ भी एकर ओढ़ना छुइ पावउँ, तउ नीक होबउँ।”

²² घूमिके निहारत भवा ईसू कहेस, “बिटिया, खुस रहा। तोहार बिसवास तोहका चंगा किहेस ह।” अउर उ स्त्री तुंरतहि उहइ छन चंगा होइ गइ।

²³ ओह कइँती ईसू जब आराधनालय क मुखिया क घरवा पहुँचा तउ उ देखेस कि सोक धुन बजावत बाँसुरी क बजवइया अउर हुवाँ ऍकट्ठा भए मनइयन लरकी क मउत प सोक करत रहेन। ²⁴ तबहि ईसू लोगन्स कहेस, “हियाँ स बाहेर जा। लरकी मरी नाहीं बा, उ तउ सोवति अहइ।” ऍह प मनई ओकर हँसी ठट्ठा करह लागेन। ²⁵ फिन जब भिरिया क मनइयन क बाहेर पठएस तउ ईसू लरकी क कोठरी मँ जाइके ओकर हथवा पकड़ेस अउर उ उठि गइ। ²⁶ ऍकर खबरिया उ समूचइ पहँटा मँ संचर गइ।

ईसू ढेर मनइयन क चंगा किहेस

²⁷ ईसू जब हुवाँ स जाइ लाग तउ दुइ आँधर ओकरे पाछे होइ गएन। उ दुइनउँ चिल्लात रहेन, “हे दाऊद क पूत, हम प दाया करा।”

²⁸ ईसू जइसे घरवा क भीतर पहुँच गवा तउ उ पचे आँधर ओकरे लगे आएन। तबहिं ईसू ओनसे कहेस, “का तोहका बिसवास अहइ कि मइँ, तोहका फिन आँखिन दइ सकत हउँ?” उ पचे जवाब दिहेन, “हाँ पर्भू।”

²⁹ ऍह पर ईसू ओनकइ आँखिन क छुअत कहेस, “तोहरे बरे वइसा होइ जइसा तोहार बिसवास अहइ।” ³⁰ अउर आँधरन क जोति मिल गइ। फिन ईसू ओनका चिताउनी देत कहेस, “ऍकरे बारे मँ कउनो क पता नाहीं लागइ चाहीं।” ³¹ मुला उ पचे हुवाँ स जाइके इ खबरिया क उ पहॅटा मँ चारिहुँ कइँती फैलाइ दिहन।

³² जब उ दुइनउँ हुवाँ स जात रहेन तउ कछू लोग ईसू क लगे एक ठु गूंगा क लइ आएन। गूंगा मँ दुस्ट आतिमा क सवारी रही अउर यह बरे उ कछू बोल नाहीं पावत रहा। ³³ जब उ दुस्ट आतिमा क निकारि दिहस तउ उ गूंगा, जउन पहिले कछू नाहीं बोल सकत रहा, बोलइ लाग। तबहि भिरिया क लोग अचरजे मँ कहेन, “इस्राएल मँ अइसी घटना कबहुँ नाहीं देखी गइ।”

³⁴ मुला फरीसियन कहत रहेन, “उ दुस्ट आतिमन क सइताने क मदद स बाहेर खदेरत ह।”

ईसू क मनइयन प दुःख

³⁵ ईसू यहूदी आराधनालय मँ उपदेस देत, परमेस्सर क राज्य क सुसमाचार क प्रचार करत, मनइयन क बेरामी अउर हर तरह क दारून दुःख हरत उ समूचइ पहँटा क गाउँ गाउँ अउर सहर सहर घूमत रहा। ³⁶ ईसू जब कउनो भिरिया क देखततउ ओनके बरे करुना स भरि जात काहेकि उ पचे सतावा भवा अउर बेसहारा रहेन, जइसें भेड़ रहिन अउ ओनकइ कउनो गड़रिया नाहीं रहा। ³⁷ तबहिं ईसू आपन चेलन स कहेस, “तइयार खेत तउ बहोत अहइँ मुला मजदूर कम बाटेन। ³⁸ यह बरे फसल क परमेस्सर स बिनती करा कि उ, आपन फसल काटइ बरे मजदूर पठवइ।”

विदेसी लोगन स बियाह क बारे मँ एज्रा क पराथना

9 जब हम लोग इ सब कइ चुके तब इस्राएल क प्रमुख मोरे लगे आएन। उ पचे कहेन, “एज्रा इस्राएल क लोगन अउ याजकन अउ लेवी बंसियन अपने चाहिहुँ कइँती रहइवाले लोगन स अपने क अलग नाहीं रखेस ह। इस्राएल क लोग कनानियन, हित्तियन, परिज्जियन, यबूसियन, अम्मोनियन, मोआबियन, मिस्र क लोगन अउ एमोरियन क जरिये कीन्ह जाइवालो बहोत स बुरी बातन स प्रभावित भए हँ। ² इस्राएल क लोग एन लोगन क बिटियन स बियाह किहेन ह। जउन कि इस्राएली नाहीं रहेन इस्राएल क लोग पवित्तर पीढ़ी^[a] अहइ। मुला अब उ पचे अपने चारिहुँ ओर रहइवाले दूसर लोगन स मिलिके दोगले अउर असुद्ध होइ गएन ह। इस्राएल क लोगन क नेतन अउर बड़के अधिकारियन इ अपराध क करइ मँ पहिले रहेन ह।” ³ जब मइँ इ बारे मँ सुनेउँ, मइँ अफ्ना लबादा अउ अंगरखा इ देखावइ बरे फार डाएउँ कि मइँ बहोत परेसान हउँ। मइँ अपने मूँड़ि अउर दाढ़ी क बार नोंच डाएउँ। मइँ दुःखी अउ अस्त-व्यस्त बइठ गएउँ। ⁴ तब हर एक मनई जउन इस्राएल क परमेस्सर क नेमन क आदर करत रहा, भय स काँप उठा। उ पचे डर गएन काहेकि जउन इस्राएल क लोग बन्धुवाई स लउटेन, उ पचे परमेस्सर क भक्त नाहीं रहेन। मोका धक्का लगा अउर मइँ घबराइ गएउँ। मइँ हुवाँ साँझ क बलि भेंट क समइ तलक बइठा रहेउँ अउर उ पचे लोग मोरे चारिहुँ कइँती एकट्ठा रहेन।

⁵ तब, जब साँझ क बलि भेंट क समइ भवा, मइँ आपन दुःख क अवस्था मँ ही उठेउँ। मइँ बहोत लजान रहेउँ। मोर लबादा अउ अंगरखा दुइनउँ फटे रहेन अउर मइँ घुटरुअन क बल बइठिके यहोवा अपने परमेस्सर कइँती हाथ फइलाएउँ। ⁶ तब मइँ पराथना किहेउँ:

“हे मोरे परमेस्सर, मइँ एतना लजान अउर संकोच मँ हँउ कि तोहरी कइँती मोर आँखिन नाहीं उठतिन, हे मोर परमेस्सर! मइँ लजान हउँ काहेकि हमरे पाप हमरे मूँड़े स ऊपर चले गए हँ। हमरे अपराधन क ढेरी एतनी होइ गइ ह कि उ अकासे तलक पहोंच चुकी ह। ⁷ हमरे पुरखन क समइ स अब तलक हम लोग बहोत जियादा पाप किहा ह। हम लोग पाप किहा, एह बरे हम, हमरे राजा अउर हमरे याजक दण्डित भएन। हम लोग बिदेसी राजा लोगन क जरिये तरवार स अउर बन्दीखाने मँ धाँधे जाइ तलक दण्डित भएन ह। उ पचे राजा हमार धन लइ गएन अउर हमका लज्जित किहन। इ स्थिति आजु भी वइसी अहइ।

⁸ “आखीर मँ अब तू हम पइ कृपालु भवा ह। तू हमरे बचा भवा लोगन क बन्धुआई स निकरि आवइ दिहा ह अउर आपन पवित्र जगह मँ पनाह दिहा ह। यहोवा, तू हम क नवा जीवन दिहा ह अउर हमरी गुलामी स अजाद किहा ह। ⁹ हाँ, हम दास रहे, मुला तू हम क सदा ही क बरे दास नाहीं रहइ देइ चाहत रहा। तू हम पइ कृपालू रहा। तू फारस क राजा लोगन क हम पइ कृपालु बनाया। तोहार मन्दिर नेस्त नाबूद होइ गवा रहा। मुला तू हम क नवी जिन्नगी दिहा जेहसे हम तोहरे मन्दिर क फुन बनाइ सकित ह अउर नवे क तरह पक्का कइ सकत हीं। ह परमेस्सर तू हम पचन्क यहूदिया अउर यरूसलेम मँ बेरा^[b] बनाइ दिहस।

¹⁰ “हमरे परमेस्सर, अब हम तोहसे का कहि सकित ह हम लोग तोहरी आग्या क पालन करब फुन तजि दीन्ह ह। ¹¹ हमरे परमेस्सर, तू अपने सेवकन अर्थात नबियन क उपयोग किहा अउर ओन आदेसन क हम क दिहा। तू कहे रह्या, ‘जउने देस मँ तू रहइ जात अहा अउर जेका आपन बनावइ जात रह्या ह, उ देस भ्रस्ट अहइ। इ ओन बहोत बुरे कामन स भ्रस्ट भवा ह जेनका हुवाँ रहइवालन किहेन ह। ओन लोग इ देस मँ हर जगह पइ बहोत जियादा बुरे काम किहेन ह। उ पचे इ देस क अपने पापन स गंदा कइ दिहेन ह। ¹² एह बरे इस्राएल क लोगो, अपने बच्चन क ओनके बच्चन स बियाह जिन करइ द्या। ओनके संग सम्बंध न रखा। अउर ओनकर चिजियन क लालसा न करा। मोरे आदेसन क पालन करा जेहसे तू सक्तीसाली होब्या अउर इ देस क अच्छी चिजियन क भोग करब्या। तब तू इ देस क बनाए रखब्या अउर अपने बच्चन क देब्या।’

¹³ “जउन बुरी घटनन हमरे संग घटिन उ सबइ हमार अपनी अपनी गलतियन स घटिन। हम लोग पाप क करम किहे अही अउर हम लोग बहोत अपराधी अही। मुला हमार परमेस्सर, तू हम क ओहसे बहोत, कम दण्ड दिहा ह जेतना हम मिलइ चाही। हम लोग बड़े भयानक करम किहे अही अउर हम लोगन क एहसे जियादा दण्ड मिलइ चाही। अइसा होत भए भी तू हमरे लोगन मँ स कछू क बन्धुवाई स अजाद होइ जाइ दिहा ह। ¹⁴ एह बरे हम जानित ह कि हम क तोहरे आदेसन क तोड़इ नाहीं चाही। हम क ओन लोगन क संग बियाह नाहीं करइ चाही। उ सबइ लोग बहोत बुरे काम करत हीं। परमेस्सर जदि हम लोग ओन बुरे लोगन क संग बियाह करत रही तउ हम जानित ह कि तू हम क नस्ट कइ देब्या। तब इस्राएल क लोगन मँ स कउनो भी जिअत नाहीं बचि पाइ।

¹⁵ “यहोवा, इस्राएल क परमेस्सर, तू अच्छा अहइ। अउर तू अब भी हम मँ स कछू क जिअत रहइ देब्या। हाँ, हम अपराधी अहइ। अउर अपने अपराध क कारण हम मँ कउनो क भी तोहरे समन्वा खड़े होइ नाहीं दीन्ह जाइ चाही।”

साऊल क हिरदय बदलब

9 साऊल अबहुँ पर्भू क चेलन क मारि डावइ क धमकी देत रहा। उ महायाजक क लगे गवा। ² अउर उ दमिस्क क आराधनालय क नाउँ इ मंसा क चिट्ठी लिहेस कि जेहसे ओका हुवाँ अगर कउनो इ पंथ क चेलन मिलइ, फिन चाहे उ स्त्रियन होइ, चाहे पुरुसन, तउ उ ओका बंदी बनाइ सकइ अउर फिन वापिस यरूसलेम लइ आवइ।

³ तउ जब चलत चलत उ दमिस्क क निचके पहोंचा, तउ एकाएक ओकरे चारिहुँ कइँती अकासे स रोसनी कउँधी ⁴ अउर उ भुइँया प जाइ गिरा। उ एक अवाज अनकेस जउन ओसे कहत रही, “साऊल, अरे ओ साऊल! तू मोका काहे सतावत अहा?”

⁵ साऊल कहेस, “पर्भू तू कउन अहा?”

उ कहेस, “मइँ ईसू अहउँ जेका तू सतावत बाट्या। ⁶ मुला अब तू खड़ा ह्वा अउर नगर मँ जा। हुवाँ तोहका बताइ दीन्ह जाइ कि तोहका का करइ चाही।”

⁷ जउन मनई ओकरे संग जात्रा करत रहेन, उ पचे चुपचाप रहि गएऩ। उ पचे अवाज तउ अनकेन मुला कउनो क लखेन नाहीं। ⁸ फिन साऊल भुइँया पइ स खड़ा भवा। मुला जब उ आपन आँखी खोलेस तउ उ कछू भी नाहीं निहारि सका। एह बरे उ पचे ओकर हाथ धइके दमिस्क लइ गएन। ⁹ तीन दिना तलक उ न तउ कछू निहारि पाएस, अउर न ही कछू खाएस या पीएस।

¹⁰ दमिस्क मँ हनन्याह नाउँ क ईसू क एक चेला रहा। पर्भू दर्सन दइके ओसे कहेस, “हनन्याह!”

तउ उ बोला, “पर्भू, मइँ इ हउँ।”

¹¹ पर्भू ओसे कहेस, “खड़ा ह्वा अउर उ गली मँ जेका सोझ कहवावइ वाली गली कहा जात ह। अउर हुवाँ यहूदी क घरे मँ जाइके तारसी क बसइया साऊल नाउँ क एक मनई क बारे मँ पूछताछ करा काहेकि उ पराथना करत बाटइ। ¹² उ एक दर्सन मँ लखेस ह कि हनन्याह नाउँ क एक मनई घरे मँ आइके ओह प हाथ रखेस ह ताकि उ फिन लखि सकइ।”

¹³ हनन्या जवाब दिहेस, “पर्भू, मइँ इ मनई क बारे मँ बहोतन स सुना ह। यरूसलेम मँ तोहरे संत लोगन क संग इ जउन बुरा काम किहेस ह, उ सब मइँ सुनेउँ ह। ¹⁴ अउर हियाँ भी इ मुख्ययाजक स तोहरे नाउँ मँ सबहिं बिसवासी मनइयन क बंदी बनावइ क हुकुम लइ आवा ह।”

¹⁵ मुला पर्भू ओसे कहेस, “तू जा काहेकि इ मनई क विधर्मी मनइयन, राजा लोगन अउर इस्राएल क मनइयन क समन्वा मोर नाउँ लेइ बरे, एक जरिया क रूप मँ मइँ चुनेउँ ह। ¹⁶ मइँ खुद ओका उ सब कछू बताउब, जउन ओका मोरे नाउँ बरे सहइ क होइ।”

¹⁷ तउ हनन्याह चला गवा अउर उ घरे क भितरे पहोंचा अउर साऊल प आपन हाथ रखि दिहेस अउर कहेस, “भाइ साऊल! पर्भू ईसू मोका पठएस ह जउन तोहरे राह मँ तोहरे समन्वा परगट भ रहा जेहसे तू फिन स लखि सका अउर पवित्तर आतिमा स भरि उठा।” ¹⁸ फिन तुरतहि बोकला जइसी कउनो चीज ओकरी आँखिन स टेघरी अउर ओका फिन देखॉइ देइ लाग। उ खड़ा भवा अउर उ बपतिस्मा लिहेस। ¹⁹ ओकरे पाछे फिन तनिक खइया खाए क बाद आपन ताकत पाइ गवा।

साऊल क दमिस्क मँ प्रचार काम

उ दमिस्क मँ चेलन क संग कछू समइ ठहरा। ²⁰ फिन इ सोझइ यहूदी आराधनालय मँ पहोंचा अउर ईसू क प्रचार करइ लाग। उ कहेस, “इ ईसू परमेस्सर क पूत अहइ।”

²¹ जउन कउनो भी ओका सुनेन, चकित रहि गएन अउर बोलेन, “का इ उहइ नाहीं अहइ, जउन यरूसलेम मँ ईसू क नाउँ मँ बिसवास करइया मनइयन क नास करइ क जतन नाहीं किहेस। अउर का इ ओनका धरवावइ अउर मुख्ययाजक क समन्वा लइ जाइ नाहीं आवा रहा?”

²² मुला साऊल जिआदा स जिआदा सक्तीसाली होत गवा अउर दमिस्क मँ बसइया यहूदियन क इ सिद्ध करत भवा कि इ ईसू ही मसीह अहइ, हरावइ लाग।

साऊल क यहूदियन स बच निकरब

²³ बहोत दिन बीति जाए क पाछे यहूदियन ओका मारि डावइ क षड़यन्त्र किहेन। ²⁴ मुला ओनकइ चाल क पता साऊल क होइ गवा। उ पचे सहर क दुआरन प घात लगाए रहत रहेन जेहसे ओका मारि डावइँ। ²⁵ मुला ओकर चेलन ओका राति मँ उठाइ लइ गएन अउर झउआ मँ बइठाइके सहर क चहरदीवार के छेदे स ओका खाले उतारि दिहेन।

यरूसलेम मँ साऊल क पहुँचब

²⁶ फिन जब उ यरूसलेम पहोंचा तउ उ चेलन क संग मिलइ क जतन करइ लाग। मुला उ पचे तउ ओसे ससान रहेन। ओनका इ बिसवास नाहीं रहा कि उ भी ईसू का एक चेलन अहइ। ²⁷ मुला बरनाबास ओका आपन संग प्रेरितन क लगे लइ गवा अउर उ ओनका बताएस कि साऊल पर्भू क राहे मँ कउने तरह लखेस अउर पर्भू ओसे कइसे बतियान ह। अउर दमिस्क मँ कउने तरह उ बेडर होइके ईसू क नाउँ क प्रचार करइ लाग।

²⁸ फिन साऊल ओनके संग यरुसलेम मँ अजादी स आवइ जाइ लाग। उ बेडर होइके पर्भू क नाउँ क प्रबचन करत रहा। ²⁹ उ यूनानी भाखा क बोलवइया क साथ तहत्तुक अउर धरम चर्चा करत रहा मुला उ सबइ तउ ओका मारि डावा चाहत रहेन। ³⁰ मुला जब भाई लोगन्क इ बात क पता लाग तउ उ पचे ओका कैसरिया लइ गएन अउर फुन ओका तरसुस पहोंचाइ दिहेन।

³¹ इ तरह समूचइ यहूदिया, गलील अउर सामरिया क कलीसिया क उ समइ सांति स बीति गवा। उ कलीसिया अउर जिआदा सक्तीसाली होइ लाग। काहेकि उ पर्भू स डेराइके आपन जिन्नगी काटत रही, अउर पवित्तर आतिमा ओका अउर जिआदा हिम्मत देत रही तउ ओकर गनती बाढ़इ लाग।

लुद्दा अउर याफा मँ पतरस

³² फिन उ समूचइ पहँटा मँ टहरत घूमत पतरस लुद्दा क संत लोगन स भंटइ पहोंचा। ³³ हुवाँ ओका एनियास नाउँ क एक मनई मिला जउन आठ बरिस स बिछउना प ओलरा रहा। ओका लकुआ मारि गवा रहा। ³⁴ पतरस ओसे कहेस, “एनियास, ईसू मसीह तोहका चंगा करत ह। खड़ा ह्वा अउर आपन बिछउना सोझ करा!” तउ उ तुरंत खड़ा होइ गवा। ³⁵ फिन लूद्दा अउर सारोन मँ बसइया सब मनइयन ओका लखेन अउर उ पचे पर्भू कइँती घूमि गएन।

³⁶ याफा मँ तबीता नाउँ क एक चेली रहत रही (जेकर यूनानी अनुवाद अहइ दोरकास अरथ अहइ “हिरनी”।) हमेसा नीक नीक काम करत अउर गरिबन क दान देत। ³⁷ ओनही दिनाँ उ बीमार भइ अउर मरि गइ। उ पचे ओकरे ल्हासे क नहवाइके सीढ़ी क ऊपर खोली मँ धइ दिहेन। ³⁸ लुद्दा याफा क लगे रहा, तउ चेलन जबहिं इ सुनेन कि पतरस लुद्दा मँ बाटइ तउ उ पचे ओकरे लगे दुइ मनई पठएन कि उ सबइ ओसे बिनती करइँ, “अनुग्रह कइके हाली स हाली हमरे लगे आइ जा!”

³⁹ तउ पतरस तइयार होइके ओनके संग चला गवा। जब पतरस हुवाँ पहोंचा तउ उ पचे ओका सीढ़ी क ऊपर खोली मँ लइ गएन। हुवाँ सबहिं विधवावन छाती पीटिके रोवत भइन अउर उ सबइ कुर्ती अउर ओढ़ना क, जेनका दोरकास बनाए रहा; जबहिं उ पचे ओकरे संग रहिन देखॅावत भइन खड़ी होइ गइन। ⁴⁰ पतरस हर कउनो क बाहेर पठएस अउर घुटना क बल निहुरिके ओसे पराथना किहेस। फिन ल्हास कइँती घूमत भवा बोला, “तबीता-खड़ी होइजा!” उ आपन आँखिन उघारेस अउर पतरस क लखतन भइ उठिके बइठी। ⁴¹ ओका आपन हाथ दइके पतरस खड़ा किहेस अउर फिन संत अउर विधवावन क बोलवाइ के ओनका ओका जिन्दा सौप दिहेस।

⁴² समूचइ याफा मँ हर कउनो क इ बात क पता लग गवा अउर बहोत स मनइयन पर्भू मँ बिसवास किहेन। ⁴³ फिन याफा मँ समौन नाउँ क एक चमार क हियाँ पतरस बहोत दिनाँ तक रूका रहा।