M’Cheyne Bible Reading Plan

जल प्रलय सुरु होत ह

7 तब यहोवा नूह स कहेस, “मइँ लखेउँ ह कि इ समइ क बुरे मनइयन मँ तू ही एक नीक मनई अहा। ऍह बरे तू आपन परिवार क बटोरा अउ तू पचे सबहि जहाजे मँ चला जा। ² हर एक सुद्ध जनावर क सात जोड़ा, (सात ठु नर अउ सात ठु मादा) संग मँ लइ ल्या अउ धरती क ऊपर दूसर असुद्ध जनावरन मँ स एक-एक जोड़ा नर अउ मादा लिआवा। इ सबहि जनावरन क आपन संग जहाजे मँ लइ आवा। ³ हवा मँ उड़इवाला सब पंछिन क सात ठु जोड़ा (सात ठु नर अउ सात ठु मादा) लिआवा। एहसे इ सबइ जनावरन भुइँया प जिअत रइही, जब कि दूसर जनावरन मिटि जइही। ⁴ अब स सतएँ दिन मइँ भुइँया प बहोतइ भारी बर्खा पठउब। इ बर्खा चालीस दिन अउ चालीस रात रही। पृथ्वी क सबहि जिअइवाले प्राणी मर बिलाइ जइही। मोर बनई सब चिजियन नस्ट होइ जइही।” ⁵ नूह ओन सबहि बतियन क मानेस जउन यहोवा हुकुम दिहे रहा।

⁶ बर्खा आवइ क टेँम नूह छ: सौ बरिस क रहा। ⁷ नूह अउ ओकर परिवार बाढ़ क पानी स बचइ बरे जहाजे मँ चला गवा। नूह क मेहरारु, ओकर पूतन अउ ओनकइ मेहररुअन ओकरे संग रहिन। ⁸ पृथ्वी क सब सुध्द जनावरन अउ असुध्द जनावरन, पंछियन अउ भुइँया प रेगंइवाला सब जीउ। नूह क संग जहाजे मँ चढ़ेन। ⁹ इ सबइ जनावरन क नर अउ मादा जोड़ा परमेस्सर क हुकुम स जहाजे मँ चढ़ेन। ¹⁰ सात दिना पाछे बाढ़ सुरु भइ। धरती प बर्खा होइ लाग।

^11-13 दूसर महीना क सतरहें दिन, जब नूह छ: सौ बरिस क रहा, धरती क नीचे क सब सोता फूट पड़ेन अउ धरती स पानी बहब सुरु होइ गवा। उहइ दिन धरती प भारी बर्खा होइ लाग। अइसा लाग माना कि अकासे क खिड़की खुल गइ होइ। चालीस दिन अउ चालीस रात तलक बर्खा धरती प होत रही। ठीक उहइ दिन नूह, ओकर मेहरारु, ओकर पूत, सेम, हाम, अउ येपेत अउर ओकर मेहररुअन जहाजे प चढ़ेन। ¹⁴ उ पचे अउ धरती प हर किसिम किसिम क जनावर जहाजे मँ रहेन। हर तरह क गोरु, धरती प रेगंइवाले हर किसिम क जीउ अउ हर तरह क पंछी जहाजे मँ रहेन। ¹⁵ इ सबइ जनावरन नूह क संग जहाजे मँ रहेन हर जाति क जिअत जनावरन क इ सबइ जोड़ा रहेन। ¹⁶ परमेस्सर क हुकुम क मुताबिक सबहिँ जनावरन जहाजे मँ चढ़ेन। ओकरे भीतर जाए क पाछे यहोवा दरवाजा बन्द कइ दिहस।

¹⁷ चालीस दिना तलक भुइँया प पानी क प्रलय होत रहा। पानी बाढ़ब सुरु भवा अउ उ जहाजे क धरती स ऊपर उठाइ दिहस। ¹⁸ पानी बाढ़त रहा अउ जहाज धरती स बहोतई ऊपर तैरत रहा। ¹⁹ पानी ऍतना ऊँच उठा कि ऊँचा त ऊँचा पहाड़ भी पानी मँ बूड़ गएन। ²⁰ पानी पहाड़े क ऊपर बहत रहा। पानी सब स ऊँच पहाड़े स पन्द्रह हाथ ऊँच रहा।

^21-22 धरती क सब जीउ मारा गएन। हर एक मेहरारु अउर मनई मरि गएन। सबहि पंछी अउ सबहि तरह क जनावर मर गएन। सबहिँ तरह क जनावरन अउर रेंगइवालन जनावरन मरि गएन। धरती क हर एक जीउ, सांस लेइवालन परानी मरि गएन। ²³ इ तरह परमेस्सर धरती क सब जिअत हर एक मनई, हर एक जनावर, हर एक रेगंइवाला जीउ अउ हर एक पंछी क नास कइ दिहस। इ सबइ धरती स खतम होइ गएन। सिरिफ नूह, ओकरे संग जहाजे मँ चढ़े मनइयन अउ जनावरन क जिन्नगी बची रही। ²⁴ अउर पानी एक सौ पचास दिना तलक भुइँया क बोरे रहा।

ईसू क वचन दूसर क दोखी ठहरावइ बरे

(लूका 6:37-38,41-42)

7 “दूसर प दोख लगावइ क आदत जिन डावा काहेकि तोहरे प दोख न लगावा जाइ। ² काहेकि तोहार निआव उहइ फैसला प टिका होई, जउन फैसला तू दूसर क निआव प दिहे रहा अउर परमेस्सर तोहका उहइ नपना स नापी जउने नपना स तू दूसर क नाप्या ह।

³ “तू आपन भाई बंद क आँखी क किरकरी तक क काहे लखत ह? जब कि तोहका आपन आँखी क लट्ठा तलक नाहीं देखाइ पड़त? ⁴ जबहिं तोहरे आँखी मँ लट्ठा बाटइ तब तू आपन भाई स कइसे कहि सकत ह, ‘तू मोका तोहरी आँखी क किरकिरी निकारइ द्या।’ ⁵ अरे कपटी! पहिले आपन आँखी क लट्ठा निकार, फिन तू नीक नीक देख पउब्या अउर आपन भाई क आँखी क किरकिरी निकार पउब्या।

⁶ “कूकुरन क पवित्तर चीज जिन द्या अउर सुअरन क अगवा मोती जिन बिखरावा। नाहीं तउ उ पचे आपन गोड़ी क तले रौदिहइँ अउर कूकुरन पलटि क तोहरे ऊपर चढ़ी बैठिहीं।

जउन तू चाहत ह परमेस्सर स पराथना करत रहा

(लूका 11:9-13)

⁷ “परमेस्सर स माँगत रहा, तोहका दीन्ह जाइ। खोजत रहा, तोहका मिली। खटखटावत रहा, तोहरे बरे दरवाजा खोलि दीन्ह जाई। ⁸ काहेकि हर कउनो जउन माँगत ह, पावत ह। जउन ढूँढत ह, पावत ह। जउन खटखटावत रहत ह ओकर बरे दरवाजा खोलि दीन्ह जाई।

⁹ “तू सबन मँ स अइसा बाप कउन सा अहइ जेकर बेटवा रोटी माँगइ अउर उ बेटवा क पाथर देइ? ¹⁰ या जब उ मछरी माँगइ तउ उ ओका साँप दइ देइ। बतावा का कउनो देई? अइसा कउनो न करी! ¹¹ एह बरे चाहे तू बुरा काहे न ह्वा, जानत ह कि आपन गदेलन क नीक भेंट कइसे दीन्ह जात ही। वइसे हीं सचमुच सरगे क बसइया तोहार परमपिता माँगइवालन क नीक नीक चीचन्क जरूर देइ।

नेम धरम क सबते बड़ी उपदेस

¹² “एह बरे जइसा बेवहार आपन बरे तू दूसर लोगन्स चाहत ह, वइसा बेवहार तू भी ओनसे करा। यही मूसा क व्यवस्था अउर नबियन दुआरा बतावा गवा बा।

सरग अउर नरक क राह

(लूका 13:24)

¹³ “सँकरे राह स घुसा! इ मइँ तोहका यह बरे कहत हउँ काहेकि चौड़ा दुआर अउर बड़की राह तउ बिनासे कइँती लइ जात ह। बहोत स मनई उ राहे प चलत हीं। ¹⁴ मुला केतॅना सँकरा अहइ उ दुआर अउर केतॅना छोटकी अहइ उ राह जउन जिन्नगी कइँती लइ जात ही अउर कठिन अहइँ उ सबइ मनइयन जउन ओका पावत अहइँ।

करम ही बतावत हीं कि कउन कइसा अहइ

(लूका 6:43-44; 13:25-27)

¹⁵ “झूठे नबियन स होसियार रहा। उ पचे तोहरे लगे निर्छल भेड़िन क भेस मँ आवत हीं मुला भीतर उ सबइ खूँखार बड़का कूकुर होत हीं। ¹⁶ तू ओनके करमन क फल स पहिचान लेब्या। कउनो कँटेहरी झाड़ी स न तउ अंगूर एकट्ठा कइ पावत ही अउ न गोखरु स अंजीर। ¹⁷ अइसे ही बड़िया बिरवा प नीक फल लागत हीं मुला बेकार बिरवा प बेकार फल लागत हीं। ¹⁸ एक नीक बिरवा बुरे फल नाहीं पइदा करत अउर न कउनो बेकार बिरवा नीक फल पइदा कइ सकत ह। ¹⁹ हर उ बिरवा जेह प नीक फल नाहीं लगतेन, ओका काटि के आगी मँ झोकि दीन्ह जात ह। ²⁰ एह बरे मइँ तू सबन क दुबारा कहत हउँ कि उ लोगन क तू ओनके करमन क फले स पहिचान लेब्या।

²¹ “पर्भू, पर्भू कहइवाला हर मनई सरगे क राज्य मँ घुस न पाई मुला उहइ सरग जउन सरगे मँ बसा अहइ मोरे परमपिता क इच्छा प चलत ह उहइ ओहमाँ घुसि पाई। ²² उ आखिरी दिना मँ बहोत स मनई मोसे पुछिहीं, ‘पर्भू! पर्भू! का हम तोहरे नाउँ स भविस्सबाणी नाहीं कीन्ह? का तोहरे नाउँ स हम सबन दुस्ट आतिमन क नाहीं निकारा अउर का हम पचे तोहरे नाउँ स अद्भुत कारजन नाहीं कीन्ह?’ ²³ तबहिं मइँ ओनसे साफ साफ कहियउँ कि मइँ तू सबन्क नाहीं जानत हउँ, ‘हे कुकरमी मनइयो! हियाँ स भागि जा।’

एक ठु बुद्धिमान अउर एक मूर्ख

(लूका 6:47-49)

²⁴ “यह बरे जउन मोर सब्दन क सुनत ह अउर उ एन प चलत ह ओकर तुलना उ बुद्धिमान स कीन्ह जाई जउन आपन घर चट्टाने प बनएस। ²⁵ बरखा भइ, बाढ़ आइ, आँधी चली अउइ सबई उ घरे स टक्कराइ गएन, मुला घर गिरा नाहीं। काहेकि ओकर नेंव चट्टाने प धरी गइ रही।

²⁶ “मुला उ जउन मोरे सब्दन क सुनत ह मुला ओन प चलत नाहीं, उ मूर्ख मनई क नाईं अहइ जउन आपन घर रेते प बनाएस। ²⁷ बरखा भइ, बाढ़ आइ अउर आँधी चली अउर उ घरे स टकराइ गएन, जेहसे उ घर आवाज कइके समूचइ गिर गवा।”

²⁸ नतीजा इ भवा कि जबहिं ईसू इ बतियन क कहिके पूरी किहेस, तउ ओकरे उपदेसन प भीड़ क लोगन क अचरज भवा। ²⁹ काहेकि उ धरम सास्तिरियन क नाईं नाहीं मुला एक अधिकारी क नाईं उपदेस देत रहा।

एज्रा यरूसलेम आवत ह

7 फारस क राजा अर्तछत्र क सासनकाल मँ एन सब बातन क होइ जाइ क पाछे एज्रा बाबेल स यरूसलेम आवा। एज्रा सरायाह क पूत रहा। सरायाह अजर्याह क पूत रहा। अजर्याह हिल्किय्याह क पूत रहा। ² हिल्किय्याह सल्लूम क पूत रहा। सल्लूम सादोक क पूत रहा। सादोक अहीतूब क पूत रहा। ³ अहीतूब अमर्याह क पूत रहा। अमर्याह अजर्याह क पूत रहा। अजर्याह मरार्थोत क पूत रहा। ⁴ मरायोत जरह्याह क पूत रहा। जरह्याह उज्जी क पूत रहा। उज्जी बुक्की क पूत रहा। ⁵ बुक्की अबीसू क पूत रहा। अबीसू पीनहास क पूत रहा। पीनहास एलीआज़र क पूत रहा। एलीआज़र महायाजक हारून क पूत रहा।

⁶ एज्रा बाबेल स यरूसलेम आवा। एज्रा एक लिपिक रहा। उ मूसा क नेमन क माहिर रहा। मूसा क नेम यहोवा इस्राएल क परमेस्सर क जरिये दीन्ह गवा रहा। राजा अर्तछत्र एज्रा क उ हर चीज़ दिहस जेका उ माँगेस काहेकि यहोवा परमेस्सर एज्रा क संग रहा। ⁷ इस्राएल क कछू लोग, अउर कछू याजकन, लेवियन, गायकन, दुआरपालन अउर मन्दिर क सेवकन एज्रा क संग आएन। उ पचे अर्तछत्र क सासनकाल क सतएँ बरिस यरूसलेम आएन। ⁸ एज्रा यरूसलेम मँ राजा अर्तछत्र क राज्जकाल क सतएँ बरिस क पाँचवें महीने मँ आवा। ⁹ एज्रा अउ ओकर समूह बाबेल क पहिले महीने क पहिले दिन यरूसलेम पहोंचा। यहोवा परमेस्सर एज्रा क संग रहा। ¹⁰ एज्रा आपन पूरा धियान यहोवा क नेमन क अध्ययन अउर ओनका पालन करइ मँ दिहस। एज्रा इस्राएल क लोगन क यहोवा क नेमन अउर आदेसन क सिच्छा देइ चाहत रहा।

राजा अर्तछत्र क एज्रा क पत्र

¹¹ एज्रा, एक ठु याजक अउर लिपिक रहा। इस्राएल क यहोवा क जरिये दीन्ह गए आदेसन अउर नेमन क बारे मँ उ काफी गियान रखत रहा। इ उ पत्र क प्रतिलिपि अहइ जेका राजा अर्तछत्र लिपिक एज्रा क दिहे रहा:

¹² राजा लोगन क राजा अर्तछत्र कइँती स याजक एज्रा क जउन सरग क परमेस्सर क नेमन क पिपिक अहइ:

सुभ-कामनाए!

¹³ मइँ इ आदेस देत हउँ: कउनो मनई जउन इस्राएल क अहइ, याजक अउर इस्राएल क लेवीबंसी जउन मोरे राज्ज मँ रहत ह अउर एज्रा क संग यरूसलेम जाइ चाहत ह, तोहार संग जाइ सकत ह।

¹⁴ एज्रा, मइँ अउर मोरे सात सलाहकार तू पचन्क पठवत हीं। तू पचन्क यहूदा अउर यरूसलेम क जाइ चाही। इ लखा कि तोहार लोग तोहरे परमेस्सर क नेमन क पालन कइसे करत अहइँ। तोहरे पचन्क लगे नेम अहइ।

¹⁵ मइँ अउ मोर सलाहकार इस्राएल क परमेस्सर क सोना चाँदी देत अहइँ। परमेस्सर क निवास यरूसलेम मँ अहइ। तू पचन्क इ सोना चाँदी अपने संग लइ जाइ चाही। ¹⁶ तू पचन्क बाबेल क सबहिं प्रान्तन स होइके जाइ चाही। लोगन अउर याजकन क स्वच्छा भेंट क संग सबइ सोना अउ चाँदी क बटोरा। इ सबइ भेंटन यरूसलेम मँ ओनके परमेस्सर क मन्दिर बरे अहइँ।

¹⁷ इ धने क उपयोग बर्धन, भेड़न अउ मेमनन बेसहइ मँ करा। ओन बलियन क संग जउन अन्न भेंट अउ पेय भेंट चढ़ाई जाब अहइँ, ओनका बेसहा। तब ओनका यरूसलेम मँ अपने परमेस्सर क मन्दिर क वेदी पइ बलि चढ़ावा। ¹⁸ ओकरे पाछे तू अउर दूसर यहूदी बचे भए सोने चाँदी क जइसा भी चाहा, खर्च कइ सकत ह। एकर उपयोग वइसे ही करा, जउन तोहरे परमेस्सर क खुस करइवाला होइ। ¹⁹ ओन सबहिं चिजियन क यरूसलेम क परमेस्सर क लगे लइ जा। उ सबइ चिजियन तोहरे परमेस्सर क मन्दिर मँ उपासना क बरे अहइँ। ²⁰ तू कउनो भी दूसर चिजियन लइ सकत ह जेनका तू अपने परमेस्सर क मन्दिर क बरे जरूरी समुझत अहा। राजा क खजाने क धन क उपयोग जउन कछू तू चाहत अहा ओकरे बेसहइ क बरे कइ सकत ह।

²¹ अब मइँ, राजा अर्तछत्र इ आदेस देत हउँ: मइँ ओन सबहिं लोगन क जउन फरात नदी क पच्छिमी पहँटा मँ राजा क कोसपाल अहइँ, आदेस देत हउँ कि उ पचे एज्रा क जउन कछू भी माँगइ देइँ। एज्रा सरग क परमेस्सर क नेमन क लिपिक अउर याजक अहइ। इ आदेस क हाली अउ पर्ण रूप स पालन करा। ²² एज्रा क एतना तलक दइ द्या: पौने चार टन चाँदी, छ: सौ बुसल गोहूँ, छ: सौ गैलन दाखरस, छ: सौ गैलन जइतून क तेल अउ ओतना नोन जेतना एज्रा चाहइ। ²³ सरग क परमेस्सर, एज्रा क जउने चीज क पावइ बरे आदेस द्या ओका तू पचन्क हाली अउर पूरी तरह स एज्रा क देइ चाही। सरग क परमेस्सर क मन्दिर क बरे इ सबइ सब चिजियन करा। हम नाहीं चाहित कि परमेस्सर मोरे राज्ज या मोरे पूतन पइ किरोधित होइ।

²⁴ मइँ चाहत हउँ कि तू लोगन क मालूम होइ कि याजकन, लेबियन, गायकन, दुआरपालन अउ परमेस्सर क मन्दिर क दूसर कर्मचारियन अउ सेवकन क कउनो भी तरह क कर देइ क बरे मजबूर करब, नेम क खिलाफत अहइ। ²⁵ एज्रा मइँ तोहका तोहरे परमेस्सर क जरिये प्राप्त बुद्धि क उपयोग अउ सरकारी अउर धार्मिक निआवअधीसन क चुनइ क अधिकार देत हउँ। इ सबइ लोग फरात नदी क पच्छिम मँ रहइवाले सबहिं लोगन क बरे निआवअधीस होइहीं। उ पचे ओन सबहिं लोगन क निआव करिहीं जउन तोहरे परमेस्सर क नेमन क जानत हीं। जदि कउनो मनई ओन नेमन क नाहीं जानत तउ उ पचे निआवअधीस ओका ओन नेमन क बतइहीं। ²⁶ जदि कउनो अइसा मनई जउन तोहरे परमेस्सर क नेमन या राजा क नेमन क पालन नाहीं करत होइ, तउ ओका जरूर दण्डित कीन्ह जाइ चाहीं। अपराध क अनुसार ओका मृत्य दण्ड, देस निकारी, ओकरी सम्पत्ति क जब्त करब या जेल मँ डावइ क सजा दीन्ह जाइ चाही।

एज्रा परमेस्सर क स्तुति करत ह

²⁷ हमरे पुरखन क परमेस्सर यहोवा क स्तुति करा। उ राजा क मन मँ इ सबइ बिचार डाएस कि उ यरूसलेम मँ यहोवा क मन्दिर क सम्मान करइ। ²⁸ यहोवा क राजा, ओकरे सलाहकारन अउर बड़के अधिकारियन क सामने मोह पइ आपन सच्चा पिरेम परगट किहा। यहोवा मोरे परमेस्सर मोरे संग रहा, एह बरे मइँ साहसी रहा अउर मइँ इस्राएल क प्रमुखन क अपने संग यरूसलेम जाइ बरे एकट्ठा किहेउँ।

स्तिफनुस क भाखन

7 फिन महायाजक कहेस, “का इ बात अइसे ही अहइ?” ² उ जवाब दिहस, “भाइयो, अउर बाप क समान बुजुर्गन, मोर बात सुना। हारान मँ बसइ स पहिले अबहिं जब हमार बाप इब्राहीम मेसोपोटामिया मँ रहा, तउ महिमा वाला परमेस्सर ओका दर्सन दिहेस ³ अउर कहेस, ‘आपन देस अउर आपन रिस्तेदारन क तजिके तू उ धरती प चला जा, जेका तोहॅका मइँ देखॅउब।’^(A)

⁴ “तउ उ कसदियन क धरती क तजिके हारान मँ बसि गवा जहाँ ते ओकरे पिता क मउत क पाछे परमेस्सर ओका इ देस मँ आवइ क न्योतेस जहाँ तू पचे अबहिं रहत बाट्या। ⁵ परमेस्सर हियाँ ओका हेबानामा मँ कछू नाहीं दिहस, डग भइ धरती भी नाहीं। तउ भी ओकरे कउनो पूत नाहीं रहा फिन परमेस्सर ओसे प्रतिग्या किहेस इ देस उ ओका अउर ओकरे बंसज क ओकरी दौलत क तरह देइ।

⁶ “परमेस्सर ओसे इ भी कहेस, ‘तोहार बंसज कहूँ विदेस मँ परदेसी होइके रइहीं अउर चार सौ बरिस ताई ओका नउकर बनइके, ओनके संग बहोत बुरा बर्ताव कीन्ह जाइ।’ ⁷ परमेस्सर कहेस, ‘दास बनइवइवाली उ राष्ट्र क मइँ सजा देब अउर ऍकरे पाछे उ पचे देस स बाहेर आइ जइहीं अउर इ स्थान प मोर सेवा करिहीं।’^(B)

⁸ “परमेस्सर इब्राहीम क खतना क चीन्हा स करार किहेस। अउर उ इ तरह इसहाक क पिता बना। ओकरे जनम क पाछे अठएँ दिन उ ओकर खतना किहेस। फिन इसहाक स याकूब अउर याकूब स बारहु कुल क पहिला मनई पइदा भएऩ।

⁹ “उ पचे पहिलउ मनइयन यूसुफ स जलन राखत रहेन। तउ उ पचे ओका मिस्र मँ दास बनवइ बरे बेंच दिहेन। मुला परमेस्सर ओनके संग रहा। ¹⁰ अउर उ ओका सबहिं मुसीबतन स बचाएस। परमेस्सर यूसुफ क गियान दिहेस अउर ओका इ जोग्ग बऩएस जेसे उ मिस्र क राजा फिरौन क अनुग्रह पात्र बन जाइ। फिरौन ओका मिस्र क राज्यपाल अउर आपन घर-बार क अधिकारी तैनात किहेस। ¹¹ फिन समूचइ मिस्र अउर कनान देस मँ अकाल पड़ा अउर बड़ा संकट छाइ गवा। हमार पूर्वजन खाइ क कछू नाहीं पाइ सकेन।

¹² “जब याकूब सुनेस कि मिस्र मँ अनाज अहइ, तउ उ हमरे पूर्वजन क हुवाँ पठएस इ पहिला मौका रहा। ¹³ ओनकइ दूसर जात्रा क मौका पइ यूसुक आपन भाइयन क बारे़ मँ बताएस अउर तब्बइ फिरौन क भी यूसुफ क परिवार क जानकारी मिली। ¹⁴ तउ यूसुक आपन पिता याकूब अउर परिवार क सबहि लोगन्क, जउन कुल मिलाइके पचहतन रहेन, बोलवाइ पठएस। ¹⁵ तब याकूब मिस्र आइ गवा अउर उ हुवाँ वइसे ही प्राण तजेस जइसेन हमार पूर्वजन हुवाँ प्राण तजे रहेन। ¹⁶ ओनकइ ल्हास हुवाँ स सेकम लइ जावा गएन जहाँ ओनका मकबरा मँ दफनाइ दीन्ह गवा। इ उहइ मकबरा रहा जेका इब्राहीम हमोर क बेटहनन स कछू चान्दी दइके खरीदे रहा।

¹⁷ “जब परमेस्सर क इब्राहीम क जउन बचन दिहे रहा, ओका पूरा होइ क समइ नगिचे आवा तउ मिस्र मँ हमरे मनइयन क गनती बहोत जिआदा होइ गइ। ¹⁸ आखिर मँ मिस्र प एक अइसे राजा क राज्य भवा जउऩ यूसुफ क नाहीं जानत रहा। ¹⁹ उ हमरे मनइयन क छलेस अउर उ हमरे पूर्वजन क निर्दय होइके मजबूर किहेस कि उ पचे आपन गदेलन क बाहेर मरइ क छोरि देइँ जेहसे उ सबइ जिन्दा न रहि पावइँ।

²⁰ “उहइ समइ मूसा क जन्म भवा। उ बहोत सुन्नर लरिका रहा। उ तीन महीना भर आपन पिता क घर मँ पलत भवा बाढ़त रहा। ²¹ फिन जब ओका बाहेर छोरि दीन्ह गवा तउ फिरौन क बिटिया ओका आपन बेटवा बनइके उठाइ लइ गइ। उ आपन बेटवा क नाई ओका पालेस पोसेस। ²² मूसा क पूरंपूर मिस्रयन क ग्यान क सिच्छा दीन्ह गइ। ओकर सामर्थ बोलइ अउर कामे मँ दुइनउँ मँ रहा।

²³ “जब उ चालीस बरिस क भवा तउ उ इस्राएल क बंसज, आपन भाइयन क निअरे जाइके ठान लिहेस। ²⁴ तउ जब उ एक दाई लखेस कि ओनमाँ स कउनो एक क संग बुरा व्यवहार कीन्ह जात अहइ तउ उ ओका बचाएस अउर मिस्री मनई क मारिके उ दलित मनई क कसर लिहेस। ²⁵ उ सोचेस कि ओकर भाई बंधु जान जइहीं कि ओनका छोड़ावइ बरे परमेस्सर ओका बइपरत अहइ। मुला उ पचे ओका नाहीं समझ पाएन।

²⁶ “दुसरे दिना ओहमाँ स (ओकरे आपन मनइयन मँ स) जब कछू मनई झगड़त रहेन तउ उ ओनकइ निअरे पहोंचा अउर इ कहत भवा ओनमाँ बीच-बचाव करइ लाग, ‘तू पचे आपुस मँ भाई-भाई अहा! एक दूसर क संग बुरा बर्ताव काहे करत अहा?’ ²⁷ मुला उ मनई जउन आपन पड़ोसी क संग झगड़त रहा, मूसा क धकियावत भवा कहेस, ‘तोहका हमार राजा अउर न्यायाधीस के बनएस? ²⁸ जइसे काल्ह तू उ मिस्रि क हत्या कइ दिहे रहा, का तू वइसे ही मोका मारि डावा चाहत ह?’^{(C) 29} मूसा जब इ सुनेस तउ उ हुवाँ स चला गवा अउर मिदयान मँ एक पड़ोसी क रूप मँ रहइ लाग। हुवाँ ओकरे दुइ बेटवा भएन।

³⁰ “चालीस बरिस बीते क पाछे सिनाई पहाड़े क लगे रेगिस्तान मँ एक बरत भइ झाड़ी क लपट क बीच ओकरे समन्वा एक सरगदूत परगट भवा। ³¹ मूसा जब इ लखेस तउ ओका अचरज भवा। जब अउर जिआदा नगिचे स लखइ बरे उ ओकरे लगे गवा तउ ओका पर्भू क बाणी सुनई पड़ी। ³² ‘मइँ तोहरे पूर्वजन क परमेस्सर हउँ इब्राहीम, इसहाक अउर याकूब क परमेस्सर हउँ।’^(D) डर स कँपकँपात भवा मूसा कछू निहारइ क हिम्मत नाहीं कइ पावत रहा।

³³ “तबहि पर्भू ओसे कहेस, ‘आपन गोड़वा क पनही उतार द्या काहेकि जउने ठउर प तू खड़ा अहा, उ पवित्तर भुइँया अहइ। ³⁴ मइँ मिस्र मँ आपन मनइयन क संग दुर्दसा क लखेउँ ह, परखेउँ ह। मइँ ओनका जोर स विलाप करत भवा सुनेउँ ह। ओनका अजाद करइ बरे नीचे उतरेउँ ह। आवा, अब मइँ तोहका मिस्र पठउब।’^(E)

³⁵ “इ उहइ मूसा अहइ जेका उ पचे इ कहत भवा नकारेन, ‘तोहका राजा अउर न्यायकर्ता कउन बनाएस ह?’ इ उहइ अहइ जेका परमेस्सर उ सरगदूत क जरिये, जउन ओकरे बरे झाड़ी मँ परगट भवा रहा, राजा अउर मुक्ति देइवाला होइ बरे पठएस। ³⁶ उ ओनका मिस्र क भुइँया अउर लाल सागर अउर रगिस्ताने मँ चालीस बरिस ताई बहुत अचरज कारजन करत भवा अउर अद्भुत चीन्हन दखॅावत भवा बाहेर निकारी लइ आवा।

³⁷ “इ उहइ मूसा अहइ जउन इस्राएल क लोगन स कहे रहा, ‘तोहरे भाइयन मँ स ही तोहरे बरे परमेस्सर एक मोरे जइसा नबी पठइ।’^{(F) 38} इ उहइ अहइ जउन वीरान जगह मँ सभा क बीच हमार पूर्वजन अउर उ सरगदूत क साथे मौजूद रहा जउन सीनै पहाड़े प ओसे बात किहेस। मूसा परमेस्सर स जीवित बचन पाएस जउन हमका जिन्नगी देत हीं।

³⁹ “मुला हमार पूर्वजन ओका मानइ स इनकार कइ दिहेन। ऍतना ही नाहीं, उ पचे ओका नकार दिहन अउर आपन मने मँ फिन उ पचे मिस्र लौटि गएन। ⁴⁰ उ पचे हारून स कहे रहेन, ‘हमरे बरे अइसे देवतन क बनावा जउन हम पचन्क राह सोझॉवइ। इ मूसा क बारे मँ जउऩ मिस्र स बाहेर निकारा गवा रहा, हम नाहीं जानित कि ओकरे संग का कछू घटा।’^{(G) 41} ओनही दिनन मँ उ पचे बछवा क तरह एक ठु मूरत गढ़ेन। उ मूरत प उ सबइ बलि चढ़ाएन। अउर जेका उ पचे आपन हाथे स चढ़ाएन, ओह पइ आनन्द मनावइ लागेन। ⁴² मुला परमेस्सर ओनसे मुँहना मोड़ि लिहस। उ सबन्क अकासे क ग्रह-नछत्र क आराधना करइ बरे छोड़ दीन्ह गवा। जइसा कि नबियन क किताबे मँ लिखा अहइ:

⁴⁴ “पवित्तर क तम्बू भी उ वीरान मँ हमरे पूर्वजन क संग रहा। इ तम्बू उहइ नमूने प भी बनवा ग रहा जइसा कि मूसा लखे रहा अउर जइसा कि मूसा स बात करवइया बनावइ बरे ओसे कहे रहा। ⁴⁵ हमार पूर्वजन ओका पाइके तबहिं हुवाँ स आए रहेन जब यहोसू क अगुअइ मँ उ पचे उ राष्ट्रन स धरती लइ लिहे रहेन जेनका हमरे पूर्वजन क समन्वा परमेस्सर निकारिके खदेरे रहा। दाऊद क समइ तलक हुवाँ उ रहा। ⁴⁶ दाऊद परमेस्सर क अहुग्रह क आनन्द उठाएस। उ चाहत रहा कि उ याकूब क परमेस्सर बरे एक ठु मंदिर बनवाइ सकइ। ⁴⁷ मुला उ सुलेमान ही रहा जउन ओकरे बरे मंदिर बनवाएस।

⁴⁸ “कछू भी होइ परम परमेस्सर हथवा स बना भवन मँ निवास नाहीं करत। जइसा कि नबी कहे अहइ:

⁵¹ “अरे हठीले लोग बिना खतना क मन अउर कान वाले जिद्दी मनइयन, तू पचे सदा पवित्तर आतिमा क खिलाफत किहे ह। तू सबइ आपन पूर्वजन जइसा ही अहा! ⁵² का कउनो भी अइसा नबी रहा, जेका तोहार पूर्वजन नाहीं सताएन? उ पचे तउ ओनका मारि डाए रह्या। जउन बहोत पहिले स ही उ धर्मी (मसीह) क अवाई क एलान कइ दिहे रहेन, जेका अब तू धोखा दइके पकड़वाइ दिहा अउर मरवाइ डाया। ⁵³ तू सबइ उहइ अहा जउन सरगदूतन क जरिये दीन्ह गवा व्यवस्था क तउ पाइ लिहा मुला ओह पइ चल्या नाहीं!”

स्तिफनुस क कतल

⁵⁴ जब उ सबइ इ सुनेन तउ उ पचे किरोध स पगलाइ गएन अउर स्तिफनुस पर दाँत पीसइ लागेन। ⁵⁵ मुला पवित्तर आतिमा स भरा स्तिफनुस सरगे कइँती लखत रहा। उ निहारेस परमेस्सर क महिमा क अउर परमेस्सर क दाहिन कइँती खड़ा भवा ईसू क। ⁵⁶ तउ उ कहेस, “लखा! मइँ लखत हउँ कि सरग खुला भवा अहइ अउर मनई क पूत परमेस्सर क दाहिन कइँती खड़ा बा!”

⁵⁷ एह पइ उ पचे चिचिआत भवा आपन कान ढाँपि लिहेन अउर फिन उ सबइ एक संग टूट पड़ेन। ⁵⁸ उ सबइ ओका घेरर्वत भए सहर स बाहेर लइ गएन अउर ओहॅ पइ पाथर बरसावइ लागेन। तबहिं गवाह लोग आपन ओढ़ना उतारि के साऊल नाउँ क एक ठु जवान क गोड़े प धइ दिहेन। ⁵⁹ स्तिफनुस प जब स उ पचे पाथर बरसाउब सुरू किहेन, उ इ कहत भवा पराथना करत रहा, “पर्भू ईसू, मोर आतिमा क ग्रहण करा।” ⁶⁰ फिन उ घुटना क बल भइराइ गवाँ अउर ऊँचि अवाजे मँ चिल्लान, “पर्भू, इ पाप क ओनकइ खिलाफ जिन ल्या!” ऍतना कहिके उ हमेसा क नींद मँ सोइ गवा।