M’Cheyne Bible Reading Plan

लोग पापी होइ गएन

6 ^1-4 भुइँया प मनइयन क गनती बाढ़इ लाग। इ मनइयन क बिटियन पइदा भइन। अब परमेस्सर क पूतन लखेन कि मनई क बिटियन सुन्नर अहइँ। ऍह बरे परमेस्सर क पूतन आपन आपन इच्छा क मुताबिक जेसे चाहेन ओसे बियाह किहेन।

तब यहोवा कहेस, “लोग सिरिफ मानव अहइ। मइँ हमेसा आपन आतिमा क इ सबन स दुःखी न होइ देब। मइँ ओनका एक सौ बीस बरिस क जिन्नगी देब।”

ओन दिनन अउर ओकर पाछे भी हुआँ नेफिलिम लोग^[a] उ धरती मँ रहत रहेन। जब परमेस्सर क पूतन मनइयन क बिटियन सादी किहेन तउ ओन स बच्चे पैदा भएन। उ पचे मसहूर लोग रहेन। उ पचे पुराने जमाने स बहादुर रहेन।

⁵ यहोवा लखेस कि भुइँया प मनई बहोत जिआदा पापी अहइँ। यहोवा लखेस कि मनई लगातार बुरी बात ही सोचत ह। ⁶ यहोवा क इ बात क दुःख भवा कि मइँ भुइँया प मनई क काहे बनाएउँ? यहोवा इ बात स बहोत दुःखी भवा। ⁷ ऍह बरे यहोवा कहेस, “मइँ आपन बनई भइ भुइँया क सब मनइयन क खतम कइ देब। मइँ हर एक मनई, जनावर अउ भुइँया प रेगंइवाला हर एक जिउ जन्तु क नास करब। मइँ अकासे क चिरइयन क भी खतम कइ देब। काहे? काहेकि मइँ इ बात स दुःखी अहउँ कि मइँ इ सबहि चीजन क बनएउँ।”

⁸ मुला भुइँया प यहोवा क खुस करइ वाला एक मनई रहा-नूह।

नूह अउ जल क प्रलय

⁹ इ नूह क जिन्नगी क कहानी बाटइ। उ आपन समइ मँ एक बहोत ही अच्छा मनइ रहा। अउर उ हमेसा परमेस्सर क अनुसरण किहेस। ¹⁰ नूह क तीन पूत रहेन, सेम, हाम अउ येपेत।

^11-12 परमेस्सर धरती प निगाह दउड़ाएस अउ उ निहारेस कि भुइँया क मनइयन बर्बाद कइ दिहे अहइँ। हर एक ठउरे प मारकाट फइला रहा। मनई पपियाइ ग रहेन अउ क्रूर होइ ग रहेन, अउर उ पचे धरती प आपन जिन्नगी बर्बाद कइ दिहे रहेन।

¹³ ऍह बरे परमेस्सर नूह स कहेस, “सब मनइयन धरती क किरोध अउ हिसा स पाट दिहे अहइँ। इ खातिर मइँ सबहि जिअत प्राणियन क नास कइ देब। मइँ ओनका भुइँया स हटाइ देब। ¹⁴ गोपेर क काठ बइपरा अउ आपन खातिर एक ठु जहाज बनावा। जहाज मँ कमरन बनावा अउ जहाज क राल स भीतरे अउ बाहेर लीपि द्या।

¹⁵ “जउन जहाज मइँ बनावइ चाहत हउँ ओकर नाप जोख तीन सौ हाथ लम्बा, पचास हाथ चौड़ा, तीस हाथ ऊँच अहइ। ¹⁶ जहाज बरे छत स करीब एक हाथ खाले खिरकी बनावा। जहाज क बगल मँ फातक बनावा। जहाजे मँ तीन मंजिल बनावा। ऊपर क मंजिल, बिचकउ मंजिल अउ तरखाले क मंजिल।

¹⁷ “तू पचन क जउन बतावइ चाहत हउँ ओका धियान स सुना। मइँ धरती प बड़वार भारी पानी क बाढ़ लिआउब। अकासे क नीचे सबहि जीउन क नास करब। धरती क सब जीउ मरि जइहीँ। ¹⁸ मुला मइँ तू सबन क बचाउब। तब मइँ तोहसे एक खास करार करब। तू, तोहार पूतन, तोहार मेहरारु अउ तोहार पतोहुअन सबहि जहाज मँ सवार होइहीँ। ¹⁹ संग मँ तोहका जिअत प्राणी क जोड़ा भी लइ आवइ क होइ। हर एक प्राणी क नर अउ मादा जोड़ा जहाजे मँ लिआवा। आपन संग ओनका जिअत राखा। ²⁰ धरती क हर किसिम क चिरइयन क जोड़ा भी हेरा। धरती क हर किसिम क जनावरन क जोड़ा हेरा। धरती प रेंगइवाला हर एक जीउ क जोड़ा क भी हेरा। धरती प हर किसिम क जनावरन क नर अउ मादा तोहरे संग होइहीं। जहाजे प ओनका जिअत राखा। ²¹ धरती प सब किसिम क भोजन भी लइ जहाजे प लइ आवा। इ भोजन तोहरे बरे अउ जनावरन बरे होइ।”

²² नूह इ सब कछू किहस। नूह परमेस्सर क सब हुकुम क मान लिहस।

ईसू दान उपदेस देत ह

6 “होसियार रहा! अउ परमेस्सर चाहत ह कि उ सब काम काजन्क मनई क समन्वा दिखावा जिन करा। नाहीं तउ तू आपन परमपिता स फल न पउब्या जउन सरगे मँ बाटइ।

² “एह बरे जब तू कउनो दीन दुखिया क दान दच्छिना देत ह तउ ओकर ढिंढ़ोरवा पीटा जिन। जइसा कि आराधनालयन मँ अउर गलियन मँ कपटी मनई औरन स बड़कइ पावई बरे करत हीं। मइँ तोसे सच कहत हउँ कि ओनका तउ ऍकर पूर-पूर फल पहिले ही दीन्ह जाइ गवा अहइ। ³ मुला जबहिं तू कउनो दीन दुखिया क देत ह तउ तोहार बावाँ हाथ न जान पावइ कि तोहार दाहिन हाथ का करत बाटइ? ⁴ काहेकि तोहार दान गुपुत रहइ। तोहार उ परमपिता जउन छिपाइ क करत ह, तोहका ओकरे बदले मँ फल देई।

पराथना क महत्व

(लूका 11:2-4)

⁵ “जब तू पराथना करा तउ कपटी क नाईं जिन करा। काहेकि उ पचे आराधनालयन मँ अउर गलियन क नुक्कड़ प खड़ा होइ क पराथना करइ चाहत हीं। जैसे मनइयन ओनका निहार सकइँ। मइँ तोसे सच सच कहत हउँ कि ओनका तउ ओकरे बदले मँ फल पहिले ही मिल चुका बाटइ। ⁶ मुला जब तू पराथना करा, आपन कोठरी मँ चला जा अउर फटकवा बंद कइके परमपिता स पराथना करा। फिन तोहार परमपिता जउन तोहार करम क छिपिके निहारत ह, तोहका ओनके बदले फल देई।

⁷ “जब तू पराथना करत रहा, तउ विधर्मी क नाईं फिजूल बातन क यों ही बार बार जिन दोहरावा। उ सबइ इ सोचत हीं कि ओनके बहोत बोले स ओनकइ सुनि लीन्ह जाइ। ⁸ यह बरे ओनके जइसा जिन होइ जा काहेकि तोहरे परमपिता तोहारे माँगइ स पहिले जानत ह कि तोहार का जरूरत अहइ। ⁹ यह बेर इ प्रकार पारथना करा:

¹⁴ यह बरे जदि तू लोगन्क अपराधे क छमा करब्या तउ तोहार सरगे क परमपिता भी तोहरे पाप छमा करी। ¹⁵ मुला अगर तू लोगन्क छमा न करब्या तउ तोहार सरगे क परमपिता भी तोहरे पापन्क छमा न करी।

उपवास क अरथ

¹⁶ “जब तू उपवास राखा तउ कपटी क नाईं दुःखी मुँह बनाइके जिन रहा। काहेकि उ पचे तरह स मुह्रँ बिसवत हीं ताकि लोगन्क इ मालूम होइ जाइ कि उ सबइ उपवास करत अहइँ। मइँ तोहसे सच कहत हउँ कि ओनका तउ बदले मँ फल मिलि चुका अहइ। ¹⁷ मुला जब तू उपवास राखा तउ आपन मूँड़ प जैतून क तेल लगावा अउर आपन मुँहना धोवा। ¹⁸ जेसे लोग इ न भाँप सकइँ कि तू उपवास करत अहा। मुला तोहार परमपिता जेका तू निहार नाहीं सकत्या देखइ कि तू उपवास करत अहा। तबहिं तोहार परमपिता जउन तोहरे छमा भवा कामे क देखत रहत ह, उ तोहका ओकरे बदले मँ फल देई।

परमेस्सर धने स बड़वार अहइ

(लूका 12:33-34; 11:34-36; 16:13)

¹⁹ “आपन बरे धरती प भंडारा जिन भरा। काहेकि ओका किरवा अउर जंग नास कइ देइहीं। चोर सेंध लगइहीं अउर चोराय लइ जइहीं। ²⁰ बजाए एँकरे सरग मँ भंडारा भरा। हुवाँ किरवा अउर जंग नास न कइ पइहीं। अउर चोर भी हुवाँ सेंधिया लगाइके नास न कइ पइहीं। ²¹ याद रखा जहाँ तोहार भंडार होई, हुँवई तोहार जिअरा लागी।

²² “देह बरे प्रकास क सोत आँखी अहइ। एह बरे तोहार आँखी नीक अहइ तउ तोहार देह प्रकास करत रही। ²³ मुला जदि तोहार आँखी खराब होइ जाइ तउ तोहार सब देह अँधियर होइ जाइ। यह बरे उ सिरिफ प्रकास जउन तोहरे भीतर अहइ जदि अँधियर होइ जाइ तउ उ केतना गहिर होई।

²⁴ “कउनो भी साथ साथ दुइ सुआमी क नउकर नाहीं होइ सकत काहेकि उ एक स तउ उ घिना करी अउर दूसर स पिरेम। या एक बरे उ न्यौछावर करी अउर दूसरे क धिक्कारी। तू धन अउर परमेस्सर दुइनउँ क सेवा नाहीं कइ पउब्या।

चिंता तजि द्या

(लूका 12:22-34)

²⁵ “यह बरे मइँ तोहसे सच कहत हउँ कि अपने जिअइ बरे खाइ पिअइ क चिंता तजि द्या। आपन तने क ओढ़ना क फिकिर जिन करा। सचमुच जिन्नगी खइया स अउर तने क ओढ़ना स जिआदा बड़कई क अहइ। ²⁶ लखा! अकासे क पंच्छी न तउ बोआँई करत हीं अउर न कटाई, न ही उ पचे कोठिला मँ अनाज भरि देत हीं मुला तोहार स्वर्गीय पिता ओनकइ भी पेटवा भरत ह। का तू ओनसे जिआदा बड़कवा नाहीं बाट्या? ²⁷ तू सबन मँ का कउनो अइसा अहइ कि फिकिर कइके आपन जिन्नगी मँ एक घड़ी भी अउ बढ़ाइ सकत ह?

²⁸ “अउ तू आपन ओढ़ना क बार मँ काहे सोचत ह? सोचा, जंगले क फूलन क बारे मँ कि उ सबइ कइसे खिल जात हीं? उ सबइ न कउनो काम करत हीं अउर न आपन बरे ओढ़ना बनावत हीं। ²⁹ यह बरे मइँ तोहसे कहत हउँ कि सुलैमान भी आपन समूची धन दौलत क संग ओहमा स कउनो एक नाईं नाहीं सज सका। ³⁰ तउ जउन जंगली पौधा जउन आज जिअत अहइँ मुला जेनका भियान भारे मँ झोंक दीन्ह जाब अहइ, परमेस्सर अइसा ओढ़ना पहिरावत ह तउ अल्प बिसवास क करवइया मनइयो! का उ तोहका अउर जिआदा बढ़िया ओढ़ना न पहिराई?

³¹ “यह बरे चिंता करत करत इ जिन कहा, ‘हम का खाबइ’ या ‘हम का पिअब’ या ‘का पहिरब?’ ³² मनई जउन परमेस्सर क नाहीं जनतेन इ सब चीजन्क पाछे दौड़त रहत हीं मुला सरग क बसइया तोहार परमपिता जानत ह कि तोहका इ सब चीजन्क जरूरत अहइ। ³³ यह बरे सब ते पहिले परमेस्सर क राज्य अउर तोहसे जउन धरम की खोज उ चाहत ह, ओकर फिकिर करा। इ सब चीजन तउ तोहका खुद ही घेलइया मँ दइ दीन्ह जइहीं। ³⁴ भियान क फिकिर जिन करा, काहेकि भियान क तउ अउर आपन चिंता होइहीं। हर दिन क आपन-आपन परेसानी होत रहत ह।

दारा क आदेस

6 एह बरे राजा दारा अपने पहिले क राजा लोगन क लेखन क जाँच करइ क आदेस दिहस। उ सबइ लेख बाबेल मँ हुवइँ रखे रहेन जहाँ खजाना धरा गवा रहा, ² अहमत्ता क किले मँ एक दण्ड मँ चिपका गोल पत्रक मिला। (एकवतन मादे प्रान्त मँ अहइ।) उ दण्ड मँ लिपटे गोल पत्रक पइ जउन लिखा रहा, उ इ अहइ:

सरकारी टिप्पणी: ³ उ कुस्रू क राजा होइ क पहिले बरिस मँ कुस्रू यरूसलेम मँ परमेस्सर क मन्दिर क बरे एक ठू आदेस दिहस। आदेस इ रहा:

परमेस्सर क मन्दिर फुन स बनइ द्या। इ बलि भेंट करइ क जगह होइ। एकरी नेंव क बनइ द्या। मन्दिर साठ हाथ उँच अउ साठ हाथ चौड़ा होइ चाही। ⁴ एकर परकोटन मँ बिसाल पाथरन क तीन ठु कतारन अउर बिसाल काठे क सहतीरन क एक ठू कतार होइ चाही। मन्दिर क बनावइ क खर्च राजा क खजाने स कीन्ह जाइ चाही। ⁵ साथ ही साथ, परमेस्सर क मन्दिर क सोना अउ चाँदी क चिजियन ओकरे जगह पइ वापस रखी जाइ चाही। नबूकदनेस्सर ओन चिजियन क यरूसलेम क मन्दिर स लिहे रहा अउर ओनका बाबेल लिआए रहा। उ सबइ परमेस्सर क मन्दिर मँ वापस रख दीन्ह जाइ चाही।

⁶ एह बरे अब, मइँ दारा, फरात नदी क पच्छिम क पहँटन क सासन अधिकारी तत्तनै अउ सतर्बोजनै अउ उ प्रान्त क रहइवाले सबहिं अधिकारियन, तू पचन्क आदेस देत हउँ कि तू लोग यरूसलेम स दूर रहा। ⁷ समिकन क परेसान जिन करा। परमेस्सर क उ मन्दिर क काम क बन्द करइ क जतन जिन करा। यहूदा क राज्यपाल अउर यहूदा क बुर्जुगन क एनका फुन स बनावइ द्या। ओनका परमेस्सर क मन्दिर क उहइ जगह पइ फुन स बनावइ द्या जहाँ पहिले रहा।

⁸ अब मइँ एक आदेस देत हउँ कि तू पचन्क परमेस्सर क मन्दिर क बनावइ वाले यहूदा क बुजुर्गन बरे का करइ चाही: इमारत क लागत क भुगतान राजा क खजाने स होइ चाही। इ धन फरात नदी क पच्छिम क छेत्र क प्रान्तन स कर क रूप मँ इकट्ठा कीन्ह गवा रहा। इ सबइ काम हाली स करा, जेहसे काम रुकइ नाहीं। ⁹ ओन लोगन क उ सब द्या जेकर ओनका जरूरत होइ। जदि ओनका सरग क परमेस्सर क बलि क बरे जवान बर्धन, भेड़न या मेमनन क जरूरत पड़इ तउ ओनका उ सब कछू द्या। जदि यरूसलेम क याजक गोहूँ, नोन, दाखरस अउ तेल माँगइ तउ बिना भूल चूक क हर रोज इ सबइ चिजियन ओनका द्या। ¹⁰ इन चिजियन क ओनका द्या जेहसे उ पचे सरग क परमेस्सर क खुस करइवाली बलियन भेंट करइँ अउर राजा अउ ओकरे पूतन क कल्यान बरे पराथना करइँ।

¹¹ मइँ इ आदेस भी देत हउँ कि जदि कउनो मनई इ आदेस क बदलत ह तउ उ मनई क मकान स एक ठु काठे क कड़ी क निकार लेइ चाही अउ उ काठे क कड़ी क उ मनई क तने पइ घँसाइ देइ चाही अउ ओकरे घरे क तब तलक नस्ट कीन्ह जाइ चाही जब तलक कि उ पाथरन क ढेर न बनि जाइ।

¹² परमेस्सर यरूसलेम पइ आपन नाउँ अंकित करइ अउर मोका आसा अहइ कि परमेस्सर कउनो भी उ राजा या मनई क पराजित करी जउन इ आदेस क बदलइ क जतन करत ह। जदि कउनो यरूसलेम मँ इ मन्दिर क नस्ट करइ चाहत ह तउ मोका आसा अहइ कि परमेस्सर ओका नस्ट कइ देइ।

मइँ, दारा, इ आदेस दिहेउँ ह। इ आदेस क पालन हाली अउर पूर्ण रूप स होइ चाही।

मन्दिर क पूर्ण अउर समर्पित होब

¹³ एह बरे फरात नदी क पच्छिम पहँटा क प्रसासक तत्तनै, सतर्बोजनै अउर ओकरे संग क लोग राजा दारा क आदेस क पालन किहन। ओन लोगन आग्या क पालन हाली अउर पूर्ण रूप स किहन, ¹⁴ एह बरे यहूदी अग्रजन (प्रमुखन) निर्माण कार्य जारी रखेन अउर उ पचे सफल भएन काहेकि हग्गै नबी अउ इद्दो क पूत जकर्याह ओनका प्रोत्साहित किहस। ओन लोग मन्दिर क निर्माण कार्य पूरा कइ लिहन। इ इस्राएल क परमेस्सर क आदेस पालन करइ क बरे कीन्ह गवा। इ फारस क राजा लोगन, कुस्रू, दारा अउर अर्तछत्र जउन आदेस दिहे रहेन ओनकर पालन करइ बरे कीन्ह गवा। ¹⁵ मन्दिर क निर्माण अदर महीने क तीसरे दिन भवा। इ राजा दारा क सासन क छठएँ बरिस मँ भवा।

¹⁶ तब इस्राएल क लोग बहोत उल्लास क संग परमेस्सर क मन्दिर क समर्पण उत्सव मनाएन। याजक, लेवीबंसी अउर बन्धुवाई स वापस आए दूसर सबहिं लोग इ उत्सव मँ सामिल भएन।

¹⁷ उ पचे परमेस्सर क मन्दिर क इ तरह समर्पित किहन: उ पचे एक सौ बर्धन, दुइ सौ भेड़न अउर चार सौ मेमनन भेंट किहन अउर उ पचे पूरे इस्राएल क बरे पाप भेंट क रूप मँ बारह बोकरन भेंट किहन अर्थात इस्राएल क बारह परिवार समूह मँ स हर एक क बरे एक बोकरा भेंट किहन। ¹⁸ तब उ पचे यरुसलेम मँ मन्दिर मँ सेवा करइ क बरे याजकन अउ लेवी बंसियन क समूह बनाएन। इ सब उ पचे उहइ प्रकार किहन जउने प्रकार मूसा क किताबे मँ बतावा गवा ह।

फसह त्यौहार

¹⁹ पहिले महीने क चौदहवें दिन ओन यहूदियन फसह क त्यौहार मनाएन जउन बन्धुवाई स वापस लउटे रहेन। ²⁰ याजकन अउर लेवीबंसियन अपने क सुद्ध किहन। ओन सबहिं फसह क त्यौहार मनावइ क बरे अपने क स्वच्छ अउ तइयार किहन। उ पचे बन्धुवाई स लउटइवाले सबहिं यहूदियन क बरे फसह क त्यौहार क मेमने क मारेन। उ पचे इ अपने बरे अउर अपने याजकन बंधुअन क बरे किहन। ²¹ एह बरे बन्धुवाई स लउटे इस्राएल क सबहिं लोग फसह क त्यौहार क बलि खाएस अउर उ प्रदेस मँ रहइवाले दूसर सबइ लोग जउन अपने आप क ओन असुद्ध चिजियन स अलग हटिके सुद्ध कइ रहेन अउर जउन ओन लोगन मँ सामिल होइ रहेन, ओन लोग भी फसह क त्यौहार क भोजन मँ हींसा लिहन। ओन लोग इ एह बरे किहन ताकि उ पचे भी यहोवा इस्राएल क परमेस्सर क उपासना करइ सकइँ। ²² उ पचे अखमीरी रोटी क उत्सव सात दिन तलक बहोत जियादा खुसी स मनाएन। यहोवा ओनका बहोत खुस किहस काहेकि उ अस्सूर क राजा क बेउहार क बदल दिहे रहा। अस्सूर क राजा इस्राएल क परमेस्सर क मन्दिर क बनावइ मँ ओनकर मदद किहे रहा।

खास काम बरे सात मनइयन क चुना जाब

6 उ दिनन जबहिं चेलन क गनती बाढ़त रही, तउ यूनानी बोलवइया अउर इब्रानी बोलवइया यहूदियन मँ एक झगड़ा होइ गवा काहेकि रोजाना विधवावन क चीज बाँटइ मँ ओनकइ सुधि नाहीं लीन्ह जात।

² तउ बारहुँ प्रेरिन क समूची मण्डली क एक साथे बोलाइके कहेन, “हम सबइ बरे परमेस्सर क बचन क सेवकइ तजिके खिलाने क इन्तजाम करब नीक नाहीं अहइ। ³ भाइयन, आपन मँ स सात नामी मनइयन क पवित्तर आतिमा अउर सूझबूझ स भरा भवा सात मनइयन क चुनिल्या। हम ओनका इ कामे क हकदार बनइ देइ। ⁴ अउर आपन आपका पराथना अउर बचन क सेवा क कामे मँ जिअरा लगाइ क राखब।”

⁵ इ सुझावे स समूचइ मण्डली बहोत खुस भइ। तउ उ पचे बिसवास अउर पवित्तर आतिमा स भरा भवा स्तिफनुस नाउँ क मनई क अउर फिलिप्पुस, प्रखुरुस, नीकानोर, तिमोन, परमिनास अउर अन्ताकिया क निकुलाऊस क यहूदी धरम क कबूले रहा, चुन लिहेस। ⁶ अउर इ मनइयन क फिन उ पचे प्रेरितन क समन्वा हाजिर कइ दिहन। प्रेरितन पराथना किहेन अउर ओन पइ हाथ धरेन।

⁷ इ तरह परमेस्सर क बचन संचरइ लाग अउर यरूसलेम मँ चलेन क गनती बहोत बाढ़इ लाग। याजकन क एक बहोत बड़ा गुट भी इ मत क मानइ लाग।

यहूदी स्तिफनुस क खिलाफ

⁸ स्तिफनुस एक अइसा मनई रहा जउन अनुग्रह अउर सामर्थ स भरपूर रहा। उ मनइयन क बीच बड़ा बड़ा अद्भुत कारजन अउर अद्भुत चीन्हन परगट करत रहा। ⁹ मुला अजाद कीन्ह भवा अइसा कहवावात मनइयन मँ स कछू लोग जउन कुरेनी अउर सिकन्दरिया, अउर किलिकिया अउर एसिया स आवा भएन यहूदी रहेन, उ पचे ओनकइ खिलाफ बहस करइ लागेन। ¹⁰ मुला उ जउन बुद्धिमानी अउर आतिमा स बोलत रहा, उ पचे ओकरे समन्वा नाहीं टिक पाएन।

¹¹ फिन उ पचे कछू क लालच दइके कहवाएऩ, “हम पचे मूसा अउर परमेस्सर क खिलाफ एँका बेज्जत स भरा सबद कहत सुना ह।” ¹² इ तरह उ पचे जनता क बुजुर्ग यहूदी नेतन क, अउर धरम सास्तिरियन लोगन्क हुस्काइ दिहेन। फिन उ पचे ओका आइके धइ लिहेन अउर सबन स सर्वोच्च यहूदी महासभा क समन्वा लइ आएन।

¹³ उ पचे उ सब लबार गवाह हाजिर किहेन जउन कहेन, “इ मनई इ पवित्तर ठउर अउर व्यवस्था क खिलाफ बोलत बालत कबहुँ रूकत नाहीं बा। ¹⁴ हम ऍका कहत सुना ह कि इ नासरी ईसू इ जगह क नास कइ देइ अउर मूसा जउन रीति-रिवाज क हमका दिहे अहइ ओका बदल देइ।” ¹⁵ फिन सबन स सर्वोच्च यहूदी महासभा मँ बइठा भए सबहिं मनइयन मँ ओका धियान स लखा तउ पावा कि ओकर मुहँना कउनो सरगदूत क नाई देखाई देत रहा।