M’Cheyne Bible Reading Plan

आदम क परिवारे क इतिहास

5 इ अध्याय मँ आदम क परिवार क बंसज क बारे मँ अहइ। परमेस्सर मनई क आपन सरुप मँ बनाएस।। ² परमेस्सर ओनका नर अउर मादा बनाएस। जउन दिन ओनका बनाएस उहइ दिन उ ओनका असीसेस अउर ओनका नाउँ “आदम” राखेस।

³ जब आदम एक सौ तीस बरिस क होइ गवा तब उ एक अउर बचवा क बाप भवा। इ पूत ठीक आदम क तरह देखाइ देत रहा। आदम आपन पूत क नाउँ सेत राखेस। ⁴ सेत क जन्म क पाछे आदम आठ सौ बरिस जिअत रहा। इ दिनन मँ आदम क दूसर बेटवन अउ बिटियन भइन। ⁵ इ तरह आदम पूरा नौ सौ तीस बरिस जिअत रहा, तब उ मरा।

⁶ जब सेत एक सौ पाँच बरिस क होइ गवा तब ओका एनोस नाउँ क पूत पइदा भवा। ⁷ एनोस क जन्म क पाछे सेत आठ सौ सात बरिस जिअत रहा। इहइ सेत क दूसर बेटवन अउ बिटियन पइदा भइन। ⁸ इ तरह सेत पूरा नौ सौ बारह बरिस जिअत रहा, तब उ मरा।

⁹ एनोस जब नब्बे बरिस क भवा, ओका केनान नाउँ क पूत पइदा भवा। ¹⁰ केनान क जन्म क पाछे एनोस आठ सौ पन्द्रह बरिस जिअत रहा। इ दिनन एकर दूसर बेटवन अउ बिटियन पइदा भइन। ¹¹ इ तरह एनोस पूरा नौ सौ पाँच बरिस जिअत रहा, तब उ मरा।

¹² जब केनान सत्तर बरिस क भवा, ओका महललेल नाउँ क पूत पइदा भवा। ¹³ महललेल क जन्म क पाछे केनान आठ सौ चालीस बरिस जिअत रहा। इ दिनन केनान क दूसर बेटवन अउ बिटियन पइदा भइन। ¹⁴ इ तरह केनान पूरा नौ सौ दस बरिस जिअत रहा, तब उ मरा।

¹⁵ जब महललेल पैसंठ बरिस क भवा, ओका येरेद नाउँ क पूत पइदा भवा। ¹⁶ येरेद क जन्म क पाछे महललेल आठ सौ तीस बरिस जिअत रहा। इ दिनन मँ ओका दूसर बेटवन अउ बिटियन पइदा भइन। ¹⁷ इ तरह महललेल पूरा आठ सौ पंचान्नबे बरिस जिअत रहा। तब उ मरा।

¹⁸ जब येरेद एक सौ बासठ बरिस क भवा तउ ओका हनोक नाउँ क पूत पइदा भवा। ¹⁹ हनोक क जनम क पाछे येरेद आठ सौ बरिस जिअत रहा। इ दिनन मँ ओका दूसर बेटवन अउ बिटियन पइदा भइन। ²⁰ इ तरह येरेद पूरा नौ सौ बासठ बरिस जिअत रहा, तब उ मरा।

²¹ जब हनोक पैंसठ बरिस क भवा, ओका मतूसेलह नाउँ क पूत पइदा भवा। ²² मतूसेलह क जन्म क पाछे हनोक परमेस्सर क संग तीन सौ बरिस रहा। इ दिनन ओकर दूसर बेटवन अउ बिटियन पइदा भइन। ²³ इ तरह हनोक पूरा तीन सौ पैंसठ बरिस जिअत रहा। ²⁴ एक दिना हनोक परमेस्सर क संग चलत^[a] रहा अउ अछन्न होइ गवा काहेकि परमेस्सर उठाइ लिहस।

²⁵ जब मतूसेलह एक सौ सत्तासी बरिस क भवा, ओका लेमेक नाउँ क पूत पइदा भवा। ²⁶ लेमेक क जन्म क पाछे मतूसेलह सात सौ बयासी बरिस जिअत रहा। इ दिना ओकरे दूसर बेटवन अउ बिटियन पइदा भइन। ²⁷ इ तरह मतूसेलह पूरा नौ सौ ओनहत्तर बरिस जिअत रहा, तब उ मरा।

²⁸ जब लेमेक एक सौ ब्यासी बरिस क भवा, उ एक ठु पूत क बाप बना। ²⁹ लेमेक आपन पूत क नाउँ नूह धरेस। लेमेक कहेस, “हम किसान लोग कठोर मेहनत करित ह काहेकि परमेस्सर भुइँया क सरापे अहइ। मुला नूह हम पचन क अराम देब।”

³⁰ नूह क जन्म क पाछे, लेमेक पाँच सौ पंचान्नबे बरिस जिअत रहा। इ दिनन ओकरे दूसर बेटवन अउ बिटियन पइदा भइन। ³¹ इ तरह लेमेक पूरा सात सौ सतहत्तर बरिस जिअत रहा, तब उ मरा।

³² जब नूह पाँच सौ बरिस क भवा, ओकरे सेम, हाम अउर येपत नाउँ क पूत पइदा भएन।

ईसू क उपदेस

(लूका 6:20-23)

5 ईसू जब भारी भीड़ देखेस उ एक पहाड़े प चला गवा। हुवाँ उ बैठि गवा अउर ओकर चेलन ओकरे नगिचे आएन। ² तबहिं ईसू उपदेस देत भवा कहेस:

¹¹ “अउर तू पचे धन्य अहा काहेकि जब लोग तोहका पचन्क बेज्जत करइँ, तोहका पचन्क सतावइँ अउर मोरे बरे तोहरे खिलाफ सब प्रकार क झूठी बातन कहइँ बस एह बरे तू सबइ मोर मनवइया अहा। ¹² तब तू सबइ खुस रह्या, आनन्द मँ रह्या, काहेकि सरगे मँ तोहका पचन्क एकरे बरे अच्छा होई। इ वइसे ही बाटइ जइसे तोहरे पहिले क नबियन क मनइयन सताएन ह।

तू नोन क नाईं अहा, तू प्रकास क नाईं अहा

(मरकुस 9:50; 4:21; लूका 14:34-35; 8:16)

¹³ “तू सबइ समुच्चइ मानवता बरे नमक अहा। मुला जदि नोन नोनखार न होइ तउ ओका फिन नोन कइसे बनाइ जाइ सकत ह। उ फिन कउनो कामे क न रही। सिरिफ एह बरे कि ओका मनई क गोड़वा तले फेंक दीन्ह जाइ।

¹⁴ “तू संसार क प्रकास अहा। एक ठु अइसा सहर जउन पहाड़े क चोटी प बसा अहइ, उ छिपाए स छिप नाहीं सकत। ¹⁵ लोग दिया बारि के ओका बाल्टी तले नाहीं रखतेन मुला ओका डीबट प धइ देत हीं। अउर उ घरे क सब मनइयन क प्रकास देत ह। ¹⁶ मनई क समन्वा तोहार प्रकास अइसा चमकइ कि उ पचे तोहरे नीक कामन्क निहारइँ अउर सरगे मँ बइठा भवा तोहरे परमपिता क महिमा बखानइ।”

ईसू अउर पवित्तर धरम सास्तर

¹⁷ “इ जिन सोचा कि मइँ मूसा क व्यवस्था या नबियन क लिखा भवा क नस्ट करइ आइ हउँ। मइँ ओन सबन्क नस्ट करइ नाहीं आइ हउँ मुला ओनके पूरा पूरा अरथ क समझावइ आइ अहउँ। ¹⁸ मइँ तोहसे सच कहत हउँ कि जब ताईं इ धरती अउर अकास नस्ट नाहीं होइ जातेन, व्यवस्था क एक एक सब्द अउर एक एक अच्छर बना रही, उ तब ताईं बना रही जब ताईं उ पूरा नाहीं होइ जात।

¹⁹ “एह बरे जउन एन हुकुमन स इ छोटवार स छोटवार हुकुमन क तोड़त ह अउर लोगन्क वइसा ही करइ सिखावत ह, उ सरगे क राज्य मँ कउनो का बड़कई न पाई। मुला जउन ओह पइ चलत ह अउ दूसरन मनइनयन क ओनपइ चलइ क उपदेस देत ह, उ सरगे क राज्य मँ बड़क्का समुझा जाई। ²⁰ मइँ तोहसे सच कहत हउँ कि जब ताईं तू पचे धरमसास्तिरयन अउर फरीसियन क धरम मानइ स अगवा जिन जा, कि तू सरगे क राज्य मँ घुसइ न पउब्या।

किरोध

²¹ “तू पचे सुन चुक्या ह कि हमरे पूर्वजन स कहा गवा रहा, ‘हत्या जिन करा^(A) अउर जदि कउनो हत्या करत ह तउ ओका अदालत मँ जवाब दिहे होई।’ ²² मुला मइँ तोहसे कहत हउँ कि जउन मनई आपन भाई प किरोध करी, ओहका भी अदालत मँ एकरे बरे जवाब दिहे होई। अउर जउन आपन भाई क बेज्जत करी ओका सबते ऊँच अदालत मँ जवाब दिहे होई। जदि कउनो आपन भाई स कहइ, ‘अरे जाहिल, मूर्ख’ तउ नरके क आगी क बीच ओह पइ एका जवाब दिहे होई।

²³ “एह बरे जदि तू वेदी प आपन भेंट चढ़ावत ह अउर हुवाँ तोहका याद आइ जाइ कि तोहरे मन मँ तोहरे भाई खातिर कउनो खिलाफ बात बाटइ ²⁴ तउ तू उपासना भेंट क वेदी के सामने छाँड़ि द्या अउर पहिले जाइके आपन भाई स सुलह कइ ल्या अउर फिन आइके भेंट चढ़ावा।

²⁵ “जब ताईं तू मुद्दई क संग रस्ता मँ रहा, झटपट ओसे मेल कइ ल्या। कहूँ अइसा न होइ कि उ तोहका हाकिम स सौंप देइ अउर हाकिम तोहका सिपाही क। फिन तू जेल मँ धाँध दीन्ह जा। ²⁶ मइँ तोहका सच सच बतावत हउँ कि जब तक तू पाई-पाई क हिसाब न कइ देब्या तब तलक तू जेल स न छूटि पउब्या।

व्यभिचार

²⁷ “तू सुनि लिहा कि इ कहा गवा अहइ, ‘व्यभिचार जिन करा।’^{(B) 28} मुला मइँ तोहसे कहत हउँ कि जदि कउनो स्त्री क बुरी निगाह स देखत ह तउ उ आपन मन मँ पहिले ही ओकरे संग संभोग कइ चुका अहइ। ²⁹ यह बरे जदि तोहार दाहिन आँख तोसे पाप करवावइ तउ ओका निकारि क फेंक द्या। काहेकि तेरे बरे इ नीक बाटइ कि तोहरे बदन क एक ठु अंग नस्ट होइ जाइ एकरे बजाय तोहार सारा बदन नरक मँ नाइ दीन्ह जाइ। ³⁰ अउ जदि तोहार दाहिन हाथ तोहसे पाप करवावइ तउ ओका काटिके फेंकि डारा। काहेकि तोहरे बरे इ नीक अहइ कि तोहरे बदन क एक अंग नस्ट होइ जाइ बजाए कि तोहार समूचा बदन नरक मँ जाइ।

तलाक

(मत्ती 19:9; मरकुस 10:11-12; लूका 16:18)

³¹ “कहा गवा अहइ, ‘जबहि कउनो आपन पत्नी क तलाक देत ह तउ आपन पत्नी क लिखिके तलाक देइ चाही।’^{(C) 32} मुला मइँ तोहसे कहत हउँ कि हर मनई जउन आपन पत्नी क तलाक देत ह, जदि उ तलाक ओकरे व्यभिचारी करइ क कारण नाहीं दिहेस तउ जब उ पत्नी दूसरा बियाह करत ह, तउ समुझ ल्या कि उ मनई ओसे व्यभिचार करत ह। अउर जउन कउनो उ छोड़ी भई स्त्री स बियाह करत ह तउ भी व्यभिचार करत ह।

सपथ

³³ “तू सबइ इहउ सुन्या ह क हमरे पूर्वजन स कहा गवा रहा, ‘तू सपथ जिन तोड़ा मुला पर्भू स कीन्ह सपथन पूरा करा।’^{[a] 34} मुला मइँ तू सबन स कहत हउँ सपथ जिन ल्या। सरगे क सपथ जिन खा काहेकि उ परमेस्सर क सिंहासन अहइ। ³⁵ धरती की सपथ जिन खा काहेकि उ ओकरे गोड़वा क चौकी बाटइ। यरूसलेम क सपथ जिन खा काहेकि इ महाराजाधिराजा क सहर बाटइ। ³⁶ आपन मूँड़ क सपथ जिन खा, काहेकि तू एक ठू बारे तक द सफेद या करिया नाहीं कइ सकत्या। ³⁷ जदि तू हाँ चाहत ह तउ सिरिफ ‘हाँ’ कहा अउर ना चाहत ह तउ सिरिफ ‘ना’। काहेकि जउन कछू ऍसे जिआदा होत अहइ उ दुस्ट (सइतान) स आवत अहइ।

बदला लेइ क भावना जिन रखा

(लूका 6:29-30)

³⁸ “तू पचे सुन्या ह कि कहा बाटइ, ‘आँखी क बदले आँखी अउर दाँत बदले दाँत’^{(D) 39} मुला मइँ तोहसे कहत हउँ कि कउनो बुरा मनई क विरोध जिन करा। मुला कउनो तोहरे दाहिन गाले प थप्पड़ लगावइ तउ दूसर गाले क ओकरे कइँती घुमाइ द्या। ⁴⁰ जदि कउनो तोह प मुकदमा चलाइ के तोहार कुर्ता उतरवावइ चाहइ तउ तू ओका आपन चोगा तलक दइ द्या। ⁴¹ जदि कउनो तोहका बेगार मँ एक मील चलावइ तउ तू ओकरे संग दुइ मील जा। ⁴² जदि कउनो तोसे कछू माँगइ तउ ओका उ दइ द्या। जउन तोसे उधार लेइ चाहइ, ओका मना जिन करा।

सबते पिरेम राखा

(लूका 6:27-28,32-36)

⁴³ “तू पचे सुन्या ह कि कहा गा बाटइ, ‘तू आपन पड़ोसी स पिरेम करा^(E) अउर दुस्मन स घिना कर।’ ⁴⁴ मुला मइँ कहत हउँ आपन दुस्मन स भी पिरेम करा। जउन तोहका सतावत हीं, ओनके बरे भी पराथना करा। ⁴⁵ काहेकि सरगे मँ बसइया आपन परमपिता क संतान होइ सका। उ सूरज क प्रकास बुरा अउर भला सब पइ चमकावत ह। उ पापी अउर धर्मी सब पइ बसकाला मँ पानी बरसावत ह। ⁴⁶ इ मइँ यह बरे कहत हउँ कि जदि तू ओनही स पिरेम करब्या जउन तोहसे पिरेम करत हीं तउ तोहका का फल मिली? का अइसा तउ चुंगी (टैक्स) क उगाहिया^[b] भी नाहीं करतेन? ⁴⁷ जदि तू आपन मीतन क बरे नीक बाट्या तउ दूसर मनई स नीक नाहीं बाट्या। का अइसा विधर्मी भी नाहीं करतेन? ⁴⁸ यह बरे आपन मँ परिपूर्ण बना जइसे तोहार सरगे क परमपिता परिपूर्ण बाटइ।

5 तब हाग्गै नबी अउ इद्दो क पूत नबी जकर्याह इस्राएल क परमेस्सर क नाउँ पइ यहूदा अउ यरूसलेम मँ यहूदियन स नबुवत करब सुरु किहन। ² एह बरे सालतीएल क पूत जरुब्बाबेल अउ योसादाक क पूत येसू फुन यरूसलेम मँ मन्दिर क निर्माण करब सुरु कइ दिहस। अउर परमेस्सर क नबी ओनके संग रहेन अउ कार्य मँ मदद करत रहेन। ³ उहइ समइ फरात नदी क पच्छिम क पहँटा क राज्जपाल तत्तनै रहा। तत्तनै, सतर्बोजनै अउ ओनके संग क लोग जरुब्बाबेल अउर येसूर अउ निर्माण करइवालन क लगे गएन। तत्तनै अउ ओकरे संग क लोग जरुब्बाबेल अउ ओकरे साथ क लोगन स पूछेस, “तू पचन्क इ मन्दिर क फुन स बनावइ अउ एका दिवारन क बनावइ क काम पूरा करइ क आदेस कउन दिहस?” ⁴ उ पचे जरुब्बाबेल स इ भी पूछेन, “जउन लोग इ इमारत क बनावइ क काम करत अहइँ ओनकर नाउँ क अहइ?”

⁵ मुला परमेस्सर यहूदा क प्रमुखन पइ दृस्टि रखत रहा। निर्माण करइ वालन क तब तलक काम नाहीं रोकब पड़ा जब तलक ओनकर विवरण राजा क जरिये न पठइ दीन्ह गवा। उ पचे तब तलक काम करत रहेन जब तलक राजा दारा आपन जवाब वापस नाहीं पठएस।

⁶ फरात क पच्छिम क छेत्रन क सासन अधिकारी तत्तनै, सतर्बोजनै अउर ओनके संग क महत्तवपूर्ण मनइयन राजा दारा क लगे पत्र पठएन। ⁷ इ उ पत्र क प्रतिलिपि अहइ:

राजा दारा का अभिवादन

⁸ राजा दारा, आप क मालूम होइ चाही कि हम लोग यहूदा प्रदेस मँ गएन। हम लोग महान परमेस्सर क मन्दिर क गए। यहूदा क लोग उ मन्दिर क बड़के पाथरन स बनावत अहइँ। उ पचे देवारन मँ काठे क बड़की बड़की सहतीरन डावत अहइ। काम बड़ी होसियारी स कीन्ह जात अहइ, अउर यहूदा क लोग बहोत मेहनत करत अहइँ।

⁹ हम लोग ओनके प्रमुखन स कछू सवाल ओनके निर्माण कार्य क बारे मँ पूछेन हम लोग ओनसे पूछेन, “तू पचन्क इ मन्दिर क फुन स बनावइ अउर एकरी छते क काम पूरा करइ क मंजूरी कउन दिहस ह?” ¹⁰ हम लोग ओनकर नाउँ भी पूछेन। हम लोग ओन लोगन क प्रमुखन क नाउँ लिखइ चाहेउँ जेहसे आप जान सकइँ कि उ पचे कउन लोग अहइँ।

¹¹ उ पचे हमक इ जवाब दिहन:

“हम लोग सरग अउ धरती क परमेस्सर क सेवक अही। हम लोग उहइ मन्दिर क बनावत अही जेका बहोत बरिस पहिले इस्राएल क एक महान राजा बनाएस अउर पूरा किहे रहा। ¹² मुला हमार पुरखन सरग क परमेस्सर क किरोधित किहन। एह बरे परमेस्सर हमरे पुरखन क बाबेल क राजा नबूकदनेस्सर क दिहस। नबूकदनेस्सर इ मन्दिर क नस्ट किहेस अउर उ लोगन क बन्दी क रूप मँ बाबेल जाइ क मजबूर किहस। ¹³ मुला बाबेल पइ कुस्रू क राजा होइ क पहिले बरिस मँ राजा कुस्रू परमेस्सर क मन्दिर क फुन स बनावइ क बरे बिसेस आदेस दिहस। ¹⁴ कुस्रू बाबेल मँ अपने लबार देवता क मन्दिर स ओन सोने चाँदी क चिजियन क निकारेस जउन भूतकाल मँ परमेस्सर क मन्दिर स चोरी कइ क लइ जाइ गइ रहिन। नबूकदनेस्सर ओन चिजियन क मन्दिर स लिहेस अउर ओनका बाबेल मँ लबार देवतन क मन्दिर मँ लइ आवा। तब राजा कुस्रू ओन सोने चाँदी क चिजियन क सेसबसार क दइ दिहस, कुस्रू सेसबस्सर क राज्यपाल मुकर्रर किहस।”

¹⁵ कुस्रू तब सेसबस्सर स कहेस रहा, “एन सोना चाँदी क चिजियन क ल्या अउर ओनका यरूसलेम क मन्दिर मँ वापस रखा। उ जगह पइ परमेस्सर क मन्दिर क बनावा जहाँ उ पहिले रहा”

¹⁶ एह बरे सेसबस्सर आवा अउर उ यरूसलेम मँ परमेस्सर क मन्दिर क नेंव क काम पूरा किहस। उ दिना स आजु तलक मन्दिर क निर्माण क कार्य चलत आवत अहइ। मुला इ अबहिं तलक पूरा नाहीं भवा ह।

¹⁷ अब जदि राजा चाहत हीं तउ कृपा कइके उ पचे राजा लोगन क लेखन क हेरइँ। इ लखइ बरे हेरइँ कि का कुस्रू राजा क जरिये यरूसलेम मँ परमेस्सर क मन्दिर क फुन स बनावइ क दीन्ह गवा आदेस फुरइ अहइ अउर तब, महामहिमा, कृपा कइके आप हम लोगन क पत्र पठवइँ जेहसे हम जान सकी कि आप इ विसय मँ का करइ क निर्णय लिहन ह।

हनन्याह अउर सफीरा

5 हनन्याह नाउँ क एक मनई अउर ओकर पतनी सफीरा मिलिके आपन दौलत क एक हींसा बेंच दिहेन। ² अउ आपन पतनी क जानकारी मँ एहमाँ स कछू धन जुरय लिहेन। अउर कछू धन प्रेरितन क गोड़वा प धइ दिहेन।

³ ऍह पइ पतरस कहेस, “अरे हनन्याह, सइतान क तू आपन मन मँ इ बात नाइ देइ दिहा कि तू पवित्तर आतिमा स झूठ बोल्या अउर धरती क बेंच स मिला धन मँ स तनिक बचाइके धइ लिहा? ⁴ ओका बेंचइ स पहिले का उ तोहार ही नाहीं रही? अउर जब तू ओका बेंच दिहा तउ उ धन का तोहरे कब्जा मँ नाहीं रहा? तू इ बात क काहे सोच्या? तू मनइयन स नाहीं, परमेस्सर स झूठ बोल्या ह।”

^5-6 हनन्याह जबहिं इ सब्दन क सुनेस तउ उ चकराइके गिरि गवा अउर दम तोड़ दिहस। जउन कउनो भी इ बारे मँ सुनेस, सबन प गहिर भय छाइ गवा। फिन जवान पुरूसन उठिके ओका कफन मँ लपेटेन अउर बाहेर लइ जाइके गाड़ दिहेन।

⁷ कउनो तीन घण्टा पाछे, जउन कछू भवा रहा, ओका न जानत भइ ओकर पतनी भितरे आइ ⁸ पतरस ओसे कहेस, “बतावा, तू आपन खेत क ऍतने मँ ही बेच्या ह?”

तउ उ कहेस, “हाँ, ऍतना मँ ही।”

⁹ तबहिं पतरस ओसे कहेस, “तू पचे दुइनउँ पर्भू क आतिमा क परीच्छा बरे काहे मान लिहा? लखा तोहरे भतारे क दफनावइवालन क गोड़ दुआरे ताई आइ ग अहइ अउर उ पचे तोहका भी ढोइ लइ जइहीं।” ¹⁰ तब उ ओकरे गोड़े प गिरि पड़ी अउर मरि गइ। फिन जवान परूसन भितरे आएन अउर ओका मरा पाएन। तउ उ पचे ओका ढोइके ओकरे पति क लगे ओका गाड़ दिहन। ¹¹ तउ समूचइ कलीसिया अउर जउन कउनो इ बात क सुनेस, ओन सब प गहिरा भय छाइ गवा।

प्रमाण

¹² प्रेरितन क जरिये मनइयन क बीच बहोत स अद्भुत कारजन परगट होत रहेन अउर अचरज कारजन कीन्ह जात रहेन। उ पचे सबहिं सुलैमान क ओसारे मँ बटुरा रहेन। ¹³ मुला ओनमाँ स कउनो क हिम्मत प्रेरितन मँ मिलइ बरे नाहीं होत रही। मुला मनइयन ओनकइ गुन खूब गावत रहेन। ¹⁴ ओहर पर्भू प बिसवास करइवालन स्त्रियन अउर पुरूसन जिआदा स जिआदा बाढ़त जात रहेन। ¹⁵ ऍकरे कारण मनइयन आपन कछू बीमार लोगन क लइके खटिया अउर बिछौना प गलियन मँ ओलारइ लागेन काहेकि तबहिं पतरस ओहर स निकरा तउ ओनमाँ स कछू प कमती स कमती छाया पड़ि सकइ। ¹⁶ यरूसलेम क आसपास क नगर स लोग आपन बेरमियन अउर दुस्ट आतिमा स सतावा गएन मनइयन क लइके आवइ लागेन। अउर सबहिं चंगा होइ जात रहेन।

यहूदियन क प्रेरितन क रोकइ क जतन

¹⁷ फिन महा याजक अउर ओकर संगी यानी सदूकियन क दल, ओनकइ खिलाफ खड़ा होइ गएन। उ पचे मने मँ कुढ़त रहेन। ¹⁸ एह बरे उ पचे प्रेरितन क बंदी बनाइ लिहन अउर ओनका कैदखाना मँ बन्द कइ दिहेन। ¹⁹ मुला राति क समइ पर्भू क एक दूत कैद क फाटक खोल दिहस। उ ओनका बाहेर लइ जाइके कहेस, ²⁰ “जा, मन्दिर मँ ठाड़ होइ जा अउर इ नई जिन्नगी क बारे मँ मनइयन क सब कछू बतावा।” ²¹ जबहिं उ पचे इ सुनेन तउ भोरहिं तड़के मन्दिर मँ घुसि गएन अउर उपदेस देइ लागेन।

फिन जब महायाजक अउर ओकर संगी हुवाँ पहोंचेन तउ उ पचे यहूदी संघ अउर इस्राएल क बुजुर्ग क पूरी सभा न्योतेन। उ पचे कैदखाना स प्रेरितन क बोलवावइ पठएन। ²² किन्तु जब अधिकारी कैदखाना मँ पहुँचेन तउ उ पचे प्रेरितन क हुवाँ नाहीं पाएन। उ पचे लौटिके ऍका बताएन अउर ²³ कहेन, “हम पचे कैदखाना मँ सुरच्छा क लगा भवा ताला अउर दुआरे प तैनात सुरच्छाकारियन क पावा। मुला जब हम दरवाजा खोला तउ हमका भितरे कउनो नाहीं मिला।” ²⁴ जइसेन मन्दिर क सुरच्छाकारी अउर मुख्य़याजकन इ सब्दन क सुनेन तउ उ पचे चकराइ गएन अउ सोचइ लागेन, “अब का होई।”

²⁵ ऍतने मँ कउनो दूसर मनई आवा अउर ओनका बताएस, “जेनका तू पचे जेल मँ धाँध दिहा ह, उ पचे मन्दिर मँ खड़ा होइके उपदेस देत बाटेन।” ²⁶ तउ सुरच्छाकारी आपन अधिकारी संग हुवाँ गवा अउर बिना ताकत क प्रयोग किए ओनका वापस धइ लिआवा काहेकि उ पचे डेरात रहेन कि कहूँ मनई ओनका (मन्दिर क सुरच्छा कर्मी) पाथर स न मारइँ।

²⁷ उ पचे ओनका भितरे लइ आएन अउर सबन त ऊँचकी यहूदी सभा क समन्वा खड़ा कइ दिहन। फिन महायाजक ओनसे फरियावत भवा पूछेस, ²⁸ “हम इ नाउँ स उपदेस न देइ बरे तोहका कर्रा हुकुम दिहे रहे। अउर तू पचे फिन भी समूचइ यरूसलेम क आपन उपदेस स भरि दिहा ह। अउर तू पचे इ मनई क मउत क अपराध हम पचे लइ लादइ चाहत बाट्या।”

²⁹ पतरस अउर दूसर प्रेरितन जवाब दिहेन, “हमका मनइयन क बनिस्बद परमेस्सर क आग्या मानइ चाही। ³⁰ उ ईसू क हमरे पूर्वन क परमेस्सर मउत स फिन जीवित कइके खड़ा कइ दिहेस ह जेका एक सूली प टाँगिके तू पचे मार डाया। ³¹ ओका ही प्रमुख अउर उद्धारकर्त्ता क रूप मँ बड़कइ देत भवा परमेस्सर आपन दाहिन हाथे कइँती बइठाएस काहेकि इस्राएलियन क मनफिराव अउर पाप क छमा दीन्ह जाइ सकइ। ³² ऍन सबन बातन क हम साच्छी अही अउर वइसे ही पवित्तर आतिमा भी बा उहइ परमेस्सर ओनका दिहेस ह जउन ओकरे आज्ञा क मानत हीं।”

³³ जब उ पचे इ सुनेन तउ उ पचे कोहाइ गएन अउर ओनका मारि डावइ चाहेन। ³⁴ मुला महासभा मँ स एक गमलिएल नाउँ क फरीसियन जउन धरमसास्तिरी अध्यापक रहा अउर जेकर सब लोग मान सम्मान करत रहेन, ठाड़ भवा अउर हुकुम दिहेस कि ऍनका तनिक देरी बरे बाहेर कइ दीन्ह जाइ। ³⁵ फिन उ ओनसे कहेस, “इस्राएल क पुरूसो, तू पचे इ मनइयन क संग जउन कछू करइ प उतारू अहा, ओका सोच बिचारिके किहा। ³⁶ कछू समइ पहिले आपन क बड़कवा एलान करत भवा थियूदास परगट भवा। ओर कउनो चार सौ मनई ओकरे पाछे भी होइ गएन, मुला उ मार डावा गवा अउर ओकर सबहिं मनइयन एहर ओहर छिटक गएन। ओकरे फल कछू नाहीं निकरा। ³⁷ ओकरे पाछे जनगणना क समइ गलीली क बसइया यहूदा परगट भवा। उ भी कछू मनइयन क आपन पाछे कइँती हैच लिहेस। उ भी मारि डावा गवा। ओकर भी सबहिं एहर ओहर होइ गएन। ³⁸ यह बरे अबहिं मइँ तू पचन्स कहत हउँ, इ मनइयन स अलग रहा, ऍनका अइसे ही अकेल्ँले छोरि द्या काहेकि ऍनकइ इ चाल या काम मनई कइँती स अहइ तउ खुद नास होइ जाइ। ³⁹ मुला जदि उ परमेस्सर स अहइ तउ तू पचे ओनका रोक न पउब्या। अउर तब होइ सकत ह तू आपन खुद क ही परमेस्सर क खिलाफ लड़त भिड़त पउब्या!”

उ पचे जइसा गेमलिएल कहेस मान लिहेन। ⁴⁰ अउर प्रेरितन क भितरे बोलाइके उ पचे कोड़ा लगवाएन अउर इ आज्ञा दइके कि उ पचे ईसू क नाउँ क कउनो चर्चा न करइँ, ओनका जाइ दिहेन। ⁴¹ तउ उ पचे प्रेरितन इ बात क मजा मारत भए कि ओनका ओकरे नाउँ बरे बेज्जत रहइ क जोग्ग गना गवा ह, यहूदी महासभा स बाहिर चला गएन। ⁴² फिन मन्दिर अउर घर-घर मँ हर रोज इ सुसमाचार कि ईसू मसीह अहइ उपदेस देब अउर प्रचार करब उ पचे कबहुँ नाहीं तजेन।