M’Cheyne Bible Reading Plan
सतवाँ दिन – आराम
2 इ तरह धरती, अकास अउ ओकर हर एक चीज क रचब पूर होइ गवा। 2 परमेस्सर आपन कीन्ह जात काम क पूरा कइ लिहेस। ऍह बरे सतएँ दिन परमेस्सर अपने काम मँ अराम किहेस। 3 परमेस्सर सतएँ दिन क असीसेस अउ ओका पवित्र दिन बनइ दिहेस। परमेस्सर उ दिना क पवित्र दिन ऍह बरे बनाएस कि संसार क बनवत समइ जउन उ काम करत रहा उ सबहि कामे स उ दिन उ अराम किहेस।
मनई जाति क सुरुआत
4 इ धरती अउ अकास क इतिहास अहइ। इ कथा उ चिजियन क अहइ, जउन परमेस्सर क जरिये धरती अउ अकास बनवत टेम प भइन, 5 तब धरती प कउनो बृच्छ पौधा नाही रहा। अउ खेतन मँ कछू भी नाही उगत रहा। काहेकि यहोवा तब तलक धरती प बरखा नाही पठए रहा अउ बृच्छ पौधन क देखइ भालइ वाला कउनो मनइँ भी नाही रहा।
6 मुला कुहिरा भुइँया स उठत रहा अउ पानी समूचइ धरती क सींचत रहा। 7 तब यहोवा परमेस्सर भुइँया स धूरि उठाएस अउ मनई क बनाएस। यहोवा मनई क नाके मँ जिन्नगी क साँस फूँकेस अउ मनई एक ठु जिअत परानी बन गवा। 8 फुन यहोवा परमेस्सर पूरब मँ अदन नाउँ क ठउरे मँ एक बाग लगाएस। यहोवा परमेस्सर आपन बनावा भवा मनई क इहइ बगिया मँ राखेस। 9 यहोवा परमेस्सर हर एक सुन्नर बृच्छ अउ खइया बरे सबहि किसिम क नीक बृच्छ क उ बगिया मँ उगाएस। बगिया क बिचउ बीच यहोवा परमेस्सर जिन्नगी क बृच्छ क धरेस अउ उ बृच्छ क भी राखेस जउन अच्छाई अउ बुराई क जानकारी देत रहा।
10 अदन स होइके एक ठु नदी बहत रही अउ उ बाग क सींचत रही। उ हुवाँ स अगवा जाइके चार ठु नान्ह नान्ह धारा मँ बदल गइ रही। 11 पहिली नदी क नाउँ पीसोन रहा। इ नदी हवीला पहटा क चारिहु कइँती बहत रही। 12 (उ पहटा मँ सोना अहइ अउ उ सोना नीक बाटइ। मोती अउर गोमेदक रतन उ पहटा मँ अहइँ।) 13 दूसरी नदी क नाउँ गीहोन अहइ जउन इथोपिया देस क चारो तरफ बहत ह। 14 तीसरी नदी क नाउँ दजला बा। इ नदी अस्सूर क पूरब मँ बहत ह। चउथी नदी फरात अहइ।
15 यहोवा परमेस्सर मनई क अदन क बाग मँ रखेस। मनई क काम पेड़-पौधा लगाउब अउ बगिया क रखवारी करब रहा। 16 यहोवा परमेस्सर मनई क हुकुम दिहेस। यहोवा परमेस्सर कहेस, “तू बगिया क कउनो भी बृच्छ स फल खाइ सकत ह। 17 मुला तू नीक अउ खोट क गियान देइवाला बृच्छ क फल नाही चख सकत ह। अगर तू उ बृच्छ क फल खाइ लेब्या तउ तू मरि जाब्या।”
पहिली मेहरारू
18 तब यहोवा परमेस्सर कहेस, “मनई क अकेले रहब नीक नाही। मइँ ओकरे तरह एक मनई ओका मदद बरे बनउब।”
19 यहोवा परमेस्सर धरती क हर एक जनावर अउ अकासे क हर पंछी क भुइँया क माटी स बनएस। यहोवा परमेस्सर इ सबहि जीउवन क मनई क समन्वा लइ आवा अउ मनई हर एक क नाउँ राखेस। 20 मनई पालतू गोरु, अकासे क सब पंछिन अउ जंगल क सबहिँ जनावर क नाउँ रखेस। मनई ढेर क जनावर अउ पंछिन क लखेस। मुला मनई कउनो अइसा मदद करइया नाही पाइ सका जउन ओकरे जोग्ग होइ। 21 ऍह बरे यहोवा परमेस्सर मनई क गहरी नींदे मँ सुवाइ दिहेस अउ जब उ सोवत रहा; यहोवा परमेस्सर मनई क तन स एक पसुली निकारी लिहस। तब यहोवा मनई क चाम क बन्द कइ दिहस जहाँ स उ पसुली निकारे रहा। 22 यहोवा परमेस्सर मनई क पसुली स मेहरारू क बनाएस। तब यहोवा परमेस्सर मेहरारू क मनई क लगे लिआवा। 23 अउर मनई कहेस,
“आखिर मँ! हमरे तरह एक मनई।
ऍकर हाड़ मोरे हाड़ मँ स आवा
ऍकर तन मोरे तन स आवा।
कोहेकि इ मनई स निकारी गइ,
ऐह बरे मइँ ऍका ‘मेहरारू’ कह्ब।”
24 इहइ कारण स मनई आपन महतारी-बाप क तजिके आपन मेहरारू क संग रही अउ उ दुइनउँ एक तन होइ जइहीं।
25 मनई अउ ओकर मेहरारू बगिया मँ नंगा रहेन: मुला उ पचे लजात नाहीं रहेन।
पूरब द बिद्वानन क आउब
2 यहूदिया क बैतलेहम मँ अब ईसू क जनम भवा तबहिं हेरेदेस राज्य करत रहा। कछू समइ बीत जाइ क पाछे कछू विद्वान जउन नछत्रन क बारे मँ पढ़त रहेन पूरब स यरूसलेम आएन। 2 उ पचे पूछेन, “नवा पइदा भवा बचवा कहाँ बाटइ जउन यहूदियन क राजा अहइ? हम ओकर नछत्र क अकासे मँ देखा ह। एह बरे हम पूछत अही। हम पचे ओकर आराधना करइ आइ अही।”
3 जबहिं राजा हेरोदेस इ सुनेस तउ उ बहोतइ बेचइन भवा। ओकरे साथे यरूसलेम क सब मनइयम फिकिर करइ लागेन। 4 तउ उ यहूदी समाज सब मुख्य याजकन अउर धरम सास्तिरियन क ऍकट्ठा कइके उ पचेन स पूछेस कि मसीह क जनम कहाँ होइ क अहइ? 5 उ पचे ओका बताएन, “यहूदीया क बैतलहम मँ काहेकि नबी पवित्तर सास्तरन मँ इ तरह लिखा बाटइ:
6 ‘ओ यहूदा क धरती प टिका अहा बैतलेम,
तू यहूदा क अधिकारियन मँ कउनो तरह स छोट नाहीं काहेकि
तोसे एक ठु राजा परगट होई जउन मोरे मनइनयम,
इस्राएल क देखभाल करी।’” (A)
7 तब हेरोदेस तारा गियान क पण्डितन क बोलाएस अउर ओनसे पूछेस, कि उ तारा ठीक समइ प कब देखॅाइ पड़ा? 8 फिन उ ओनका बैतलहम पठएस अउर कहेस, “जा, उ बचवा क बारे मँ नीक नीक पता लगावा अउर जब उ तू पचेन क मिलि जाइ तउ मोका बतावा जेहबरे मइँ भी आइके ओकर आराधना कइ सकउँ।”
9 फिन उ पचे राजा क बात सुनिके चल दिहेन। उ तारा जेका उ पचे अकासे मँ निकरा निहारे रहेन उ ओनके अगवा अगवा तब तलक गवा जब तलक उ ठउर पइ पहुँच नाहीं गएन जहाँ उ बचवा रहा। 10 जब उ पचे तारा क देखेन तउ उ सबइ आनंद स झूमि उठेन।
11 उ सबइ उ पचे घरवा क भीतर गएन अउर बचवा क अउर ओकरी महतारी मरियम क संग दरसन किहन। उ पचे सास्टांग दण्डवत करेन अउर ओकर आराधना करेन। फिन आपन कीमती चीजन्क पिटारी स सोना, लोहबान अउर इत्र क भेंट चढ़ाएन। 12 मुला परमेस्सर ओनका सपने मँ होसियार कइ दिहस कि उ पचे हेरोदेस क पास लौटि क न जाइँ। तउ उ सबइ एक दुसरे राहे स आपन देस लौट गएन।
ईसू क लइके माता-पिता क मिस्र जाब
13 जब उ पचे चल दिहन तउ यूसुफ क सपने मँ पर्भू क दूत परगट होइके कहेस, “उठा, बचवा क अउर ओकर महतारी क चुप्पे स लइके मिस्र भागि जा। जब ताई मइँ तोसे न कहउँ, हुवाँ ठहर्‌या। काहेकि हेरोदेस इ बचवा क जान स मरवावई बरे खोजी।”
14 तउ यूसुफ खड़ा भवा अउर बचवा अउर ओकर महतारी क रातोरात मिस्र क बरे चलि पड़ा। 15 फिन हुवाँ हेरोदेस क मउत तलक रुकि गवा। इ एह बरे भवा कि पर्भू जउन नबी स कहवाए रहा, उ पूरा होइ जाइ, “मइँ आपन पूत क मिस्र स बाहेर आवइ बरे कहेउँ।”(B)
बैतलहम क सब लरिकन क हेरोदेस जान स मरवाइ दिहस
16 हेरोदेस जबहिं इ देखेस कि तारा गियानी ओकरे संग इ चाल चलेन ह, तउ उ बहोत गुस्साइ गवा। जइसा तारा गियान क पण्डितन क बताइ भए क अनुसार उ हुकुम दिहस कि बैतलहम अउर ओकरे नगिचे क पहँटा मँ दुइ साल या एसे छोटवार लरिकन क जान स मरिवाइ दीन्ह जाइ। 17 नबी यिर्मयाह क कहा भवा बचन पूरा होइ ग:
18 “रामाह मँ दुःख भरा सब्द सुना गवा,
रोवइ अउर विलपइ क सुना।
राहेल रोवत रही आपन बचवन बरे
उ नाहीं चाहेस कि कउनो धीरा धखावइ
काहेकि ओकर सबइ बचवन मरि गवा रहेन।” (C)
ईसू क लइके यूसुफ अउर मरियम क मिस्र लउटब
19 फिन हेरोदेस क मउत क पाछे मिस्र मँ यूसुफ क सपन आवा ओहमाँ पर्भू क एक ठु दूत परगट भवा। 20 अउर सरगदूत ओसे कहेस, “उठि जा, बचवा अउर ओकर महतारी क लइके इस्राएल क धरती प जा काहेकि जउन बचवा क मार डावइ चाहत रहेन उ सबइ मर बिलाइ गएन।”
21 तब यूसुफ उठि गवा अउर बचवा अउर ओकर महतारी क लइके इस्राएल गवा। 22 मुला यूसुफ जब इ सुनेस कि यहूदिया प आपन बाप हेरोदेस क जगह प अरखिलाउस राज्य करत अहइ तउ उ हुवाँ जाइ स डेराइ गवा। किन्तु सपने मँ परमेस्सर स हुकुम मिले क पाछे उ गलील पहँटा बरे चल दिहस 23 अउर हुवाँ नासरत नाउँ क नगर मँ घर बनाइके रहइ लाग; एह बरे नबियन क कहा भवा बचन पूरा होइ जाइ, “उ नासरी” कहा जाइ।
छुटिके वापस आवइ वाले बन्दियन क सूची
2 इ सबइ राज्ज क उ सबइ मनई अहइँ जउन बंधुवाई स लउटिके आएन। बाबेल क राजा नबूकदनेस्सर ओन लोगन क बन्दी क रूप मँ बाबेल लिआवा रहा। इ सबइ लोग यरूसलेम अउ यहूदा क वापस आएन। हर एक मनई यहूदा मँ अपने-अपने नगर क वापस गवा। 2 इ सबइ उ सब लोग अहइँ जउन जरूब्बाबेल क संग वापस आएन: येसू, नहेम्याह, सरायाह, रेलायाह, मोर्दकै, बिलसान, मिस्पार, बिगवै, रहूम अउर बाना। इ इस्राएल क ओन लोगन क नाउँ अउर ओनकर गनती अहइ जउन वापस लउटेन:
| 3 परोस क संतान | 2,172 |
| 4 सपत्याह क संतान | 372 |
| 5 आरह क संतान | 775 |
| 6 येसू अउर योआब क परिवार क पहत्मोआब क संतान | 2,812 |
| 7 एलाम क संतान | 1,254 |
| 8 जत्तू क संतान | 945 |
| 9 जक्कै क संतान | 760 |
| 10 बानी क संतान | 642 |
| 11 बेबै क संतान | 623 |
| 12 अजगाद क संतान | 1,222 |
| 13 अदोनीकाम क संतान | 666 |
| 14 बिगवै क संतान | 2,056 |
| 15 आदीन क संतान | 454 |
| 16 आतेर क संतान (हिजकिय्याह क परिवारिक पीढ़ी स) | 98 |
| 17 बेसै क संतान | 323 |
| 18 योरा क संतान | 112 |
| 19 हासूम क संतान | 223 |
| 20 गिब्बार क संतान | 95 |
| 21 बेतलेहेम नगर क लोग | 123 |
| 22 नतोपा क नगर स | 56 |
| 23 अनातोत नगर स | 128 |
| 24 अजमावेत क नगर स | 42 |
| 25 किर्यतारीम, कपीरा अउर बेरोत नगरन स | 743 |
| 26 रामा अउ गेबा नगर स | 621 |
| 27 मिकमास नगर स | 122 |
| 28 बेतेल अउर ऐ नगर स | 223 |
| 29 नबो नगर स | 52 |
| 30 मगबीस नगर स | 156 |
| 31 एलाम नाउँ क दूसर नगर स | 1,254 |
| 32 हारीम नगर स | 320 |
| 33 लोद, हादीद अउ ओनो नगरन स | 725 |
| 34 यरीहो नगर स | 345 |
| 35 सना नगर स | 3,630 |
36 याजकन क नाउँ अउर ओनकर गनती क सूची इ अहइ:
| यदायाह क संतान (येसू क पारिवारिक पढ़ी स) | 973 |
| 37 इम्मेर क संतान | 1,052 |
| 38 पसहूर क संतान | 1,247 |
| 39 हारीम क संतान | 1,017 |
40 लेवीबंसी कहे जाइवाले लेवी क परिवार क गनती इ अहइ:
| येसू अउर कदमिएल (होदग्याह क पारिवारिक पढी स) | 74 |
41 गायकन क गनती इ अहइ:
| आसाप क संतान | 128 |
42 मन्दिर क दुआरपालन क गनती इ अहइ:
| सल्लूम, आतेर, तल्मोन, अक्कूब, हतीता अउर सोबै क संतान | 139 |
43 मन्दिर क खास सेवक क इ सबइ सन्तानन अहइँ:
सीहा क संतानन, हसूपा क संतानन, तब्बओत क संतानन,
44 केरोस क संतानन, सीअहा क संतानन, पादोन क संतानन,
45 लबाना क संतानन, हागाब क संतानन, अक्कूब क संतानन,
46 हागाब क संतानन, सल्मै क संतानन, हानान क संतानन,
47 गिद्दल क संतानन, गहर क संतानन, रायाह क संतानन,
48 रसीन क संतानन, नकोदा क संतानन, गज्जाम क संतानन,
49 उज्जा क संतानन, पासेह क संतानन, बेसै क संतानन,
50 अस्ना क संतानन, मूनीम क संतानन, नपीसीम क संतानन,
51 बकबूक क संतानन, हकूपा क संतानन, हर्हूर क संतानन,
52 बसलूत क संतानन, महीदा क संतानन, हर्सा क संतानन,
53 बर्कोस क संतानन, सीसरा क संतानन, तेमह क संतानन,
54 नसीह अउ हतीपा।
55 इ सबइ सुलैमान क सेवकन क संतानन अहइ:
सोतै क संतानन, हस्सोपेरेत क संतानन, परूदा क संतानन।
56 याला क संतानन, दर्कोन क संतानन, गिद्देल क संतानन,
57 सपत्याह क संतानन, हत्तील क संतानन, पोकरेत क संतानन, सबायीम क संतानन,
| 58 मन्दिर क सेवक अउ सुलैमान क सेवकन क कुल संतान | 392 |
59 कछू लोग एन नगरन स यरूसलेम आएन: तेल्मेलह, तेलहर्सा, करूब, अद्दान अउर इम्मोर। मुला इ सबइ लोग इ प्रमाणित नाहीं कइ सकेन कि ओनकर परिवार इस्राएल क परिवार स अहइँ। ओनकर नाउँ अउर ओनकर गनती इ अहइ:
| 60 दलायाह क संतानन, तोबिय्याह क संतानन अउर नकोदा क संतानन | 652 |
61 याजकन क परिवारन क नाउँ इ अहइँ:
हबायाह क संतानन, हक्कोस क संतानन अउ बर्जिल्लै क संतानन (एक मनई जउन गिलादी क बर्जिल्लै क बिटिया स बियाह किह रहा अउर बर्जिल्लै क पारिवारिक नाउँ स ही जान जाना रहा।)
62 एन लोग अपने पारिवारिक इतिहासन क खोज किहन, मुला ओका पाइ नाहीं सकेन। ओनकर नाउँ याजकन क सूची मँ नाहीं सामिल कीन्ह गए रहेन। उ सबइ इ प्रमाणित नाहीं कइ सकेन कि ओनकर पुरखा याजक रहेन। इहइ कारण उ पचे याजक नाहीं होइ सकत रहेन। 63 राज्यपाल एन लोगन क आदेस दिहेस कि इ सबइ लोग कउनो भी पवित्र भोजन न करइँ। उ पचे तब तलक इ पवित्र भोजन नाहीं खाइ सकतेन जब तलक ओन मँ स कउनो एक ऊरीम अउर तुम्मीम[a] क उपयोग न कइ ले।
64-65 सब मिलाइके 42,360 लोग उ समूह मँ रहेन जे वापस लउट आएन। ओनके अतिरिक्त एहमाँ 7,337 सेवक अउर सेविकन रहेन। ओनके संग 200 गायक अउ गायिकन भी रहिन। 66-67 ओनके लगे 736 घोड़न, 245 खच्चर, चार स पेंतीस उँट अउ 6,720 गदहन रहेन।
68 उ समूह यरूसलेम मँ यहोवा क मन्दिर क पहोंचा। तब परिवार क प्रमुखन यहोवा क मन्दिर क बनावइ क बरे आपन भेंट दिहेन। उ पचे जउन मन्दिर नस्ट होइ गवा रहा उहइ क जगह पइ नवा मन्दिर बनावइ चाहेन। 69 ओन लोग ओतना दिहन जेतना उ पचे दइ सकत रहेन। इ सबइ उ सब चिजियन अहइँ जेनका उ पचे मन्दिर बनावइ क बरे दिहेन: लगभग 500 किलो सोना, तीन टन चाँदी अउर याजकन क पहिरइ वाले 100 चोगन।
70 इ तरह याजक, लेवीवंसी अउर कछू दूसर लोग यरूसलेम अउर ओकरे चारिहुँ कइँती क पहँटा मँ बस गएन। इ समूह मँ मन्दिर क गायक, दुआरपाल अउर मन्दिर क सेवक सामिल रहेन। इस्राएल क दूसर लोग अपने निजी निवास जगहन मँ बस गएन।
पवित्तर आतिमा क अवाई
2 जब पिन्तेकुस्त क दिन आवा तउ उ पचे एक ठउर प बटुरा रहेन। 2 तब्बइ हुवाँ एकाएक आकासे स खउफनाक आँधी क सब्द आवा। अउर जउन घरे मँ उ पचे बइठा रहेन, ओहमाँ समाइ गवा। 3 अउर आगी क उठत लपट जइसी जीभ हुँवा समन्वा देखॉइ देइ लाग। अउर ओनका आगी क उठत लपट जइसी जिभिया देखॉइ लागिन। उ सबइ बँटी भइ जीभ एक क ऊपर आइ ठहरिन। 4 उ पचे पवित्तर आतिमा स भावित भएन। अउर आतिमा स दीन्ह गए सामर्थ क अनुसार उ सबइ दूसर भाखन मँ बोलइ लागेन।
5 हुवाँ यरूसलेम मँ अकास क तरे सबहिं देसन स आवा भएन यहूदी भगत रहत रहेन। 6 जबहिं इ सब्द क आवाज सुनि गई तैसहिं एक भीड़ बटुर गइ। उ पचे अचरज मँ पड़ा रहेन काहेकि हर कउनो ओनका आपन भाखा मँ बोलत सुनेस।
7 उ पचे अचम्भा मँ घबड़ियाइके बोलेन, “इ सबइ बोलवइया मनइयन गलीली नाहीं अहइँ। 8 फिन हम पचन मँ स हर कउनो ओनका आपन मातृभाखा मँ बोलत भवा कइसे सनत अहइ? 9 हुवाँ पारथी, मोदी अउर एलामी, मोसोपोटामिया क बसइया, यहूदिया अउर कप्पूदूकिया, पुन्तुस अउर एसिया। 10 फ्रूगिया अउर पंफलिया, मिस्त्र अउर कूरेने सहर क निअरे लिबिया क कछू पहँटा क मनइयन, रोम स आवा भएन सैलानी, 11 जेहमाँ जन्मा भवा यहूदी अउर यहूदी धरम क मनइयन, क्रेती अउर अरबी लोग हम सबइ परमेस्सर क अचरज कारजन क आपन आपन भाखा मँ सुनत अहइँ।”
12 उ पचे सबइ अचम्भा मँ पड़िके भउचक्का होइके आपुस मँ पूछइ लागेन, “इ का होत अहइ?” 13 मुला दूसर मनइयन प्रेरितन क मसखरी करत भए बोलेन, “इ सबइ कछू जिआदा दाखरस पिए बाटेन।”
पतरस क गोहराउब
14 फिन गियारह प्रेरितन क संग पतरस खड़ा भवा अउर ऊँची अवाज मँ मनइयन क गोहराइ क कहइ लाग, “यहूदी भाइयो अउर यरुसलेम क सबहिं बासिंदा, ऍकर अरथ मोका बतावइ द्या। मोरे बचन क धियान स सुना। 15 इ पचे पिए नाहीं अहइँ, जइसा की तू पचे बूझत अहा। काहेकि अबहिं तउ भिन्सारे क नौ बजा अहइ। 16 मुला इ बात अहइ जेकरे बारे मँ योएल नबी कहे रहा:
17 ‘परमेस्सर कहत ह: आखिरी दिना मँ अइसा होइ कि
मइँ सबहिं मनइयन प अपने आतिमा उड़ेल देब
फिन तोहार पूत अउर बिटिया भविस्सबाणी करइ लगिहीं।
अउर तोहार जवान मनई दर्सन पइहीं
अउर तोहार बुढ़वा लोग सपना देखिहीं।
18 हाँ उ दिना मइँ आपन नउकर अउर नउकरानी प
आपन आतिमा उडेर देब
अउर उ पचे भविस्सबाणी करिहीं।
19 मइँ ऊपर अकासे मँ अचरज कारजन
अउर तरखाले भुइयाँ प चीन्हा देखाउब,
खून, आगी अउर धुआँ क बादर।
20 सूरज अँधियारा मँ
अउर चाँद रकत मँ बदल जाइ,
अउर जब पर्भू क दिव्य अउर महान दिन आइ।
21 अउर तब हर उ कउनो क बचाव होइ जउन पर्भू क नाउँ पुकारी।’ (A)
22 “ओ इस्राएलियो! इ बचन क सुना: नासरी ईसू एक ठू अइसा मनई रहा जेका परमेस्सर तोहरे समन्वा अद्भुत कारज, अचरज कारजन अउर अद्भुत चीन्हन क साथ जेका परमेस्सर आपन खुद किहे रहा तोहरे बीच ओका परगट किहेस। जइसा कि तू खुद जानत ह। 23 ई मनई तोहका कउनो तय कीन्ह भइ जोजना अउर पहिले क गियान क अनुसार तोहरे हवाले कीन्ह गवा रहा अउर तू पचे ओका अधर्मियन क हाथे पकड़वाइके क्रूस प चढ़वाया अउर खीला ठोंकवाइके मरवाइ दिहा। 24 मुला परमेस्सर मउत क दुःखे स अजाद कराइके फिन जिआइ दिहेस। काहेकि ओकरे बरे इ होइवाला नाहीं रहा कि मउत ओका राखि पावत। 25 जइसा कि दाऊद ओकरे बारे मँ कहेस ह:
‘मइँ हमेसा पर्भू क आपन समन्वा देखेउँ ह।
उ मोरे दाहिन कइँती बिराजत अहइ, काहेकि मइँ डुग न पावउँ।
26 ऍहसे मोर हिरदय खुस अहइ
अउर मोर बाणी आनन्द मँ बा;
मोर देह भी आसा मँ जिई।
27 तू मोर आतिमा क अधोलोक मँ न छोड़ब्या।
तू आपन पवित्तर जन क नास क अनुभव न होइ देब्या।
28 तू ही मोरी जिन्नगी क राह क गियान कराइ दिहा ह।
अउर तू ही आपन हाजिरी स मोका आनन्द स पूरा कइ देब्या।’ (B)
29 “मोरे भाइयन, मइँ पतिआइके आदि मनई दाऊद क बारे मँ तू पचन्स कहि सकत हउँ कि ओकर मउत होइ गइ अउर ओका माटी दइ दीन्ह गइ। अउर ओकर कब्र हमरे हियाँ आजु तलक मौजूद बा। 30 मूला काहेकि उ एक नबी रहा अउर जानत रहा परमेस्सर सपथ खाइके ओका बचन दिहेस ह कि उ ओकरे वंस मँ स कउनो एक क सिंहासने प बइठाई। 31 यह बरे अगवा जउन होइ क बाटइ, ओका दाऊद लखत भए उ सब इ कहे रहा कि:
‘ओका अधोलोक मँ नाहीं छोरा गवा
अउर न ही ओकरे देह स सड़ब गलब क अंजाद लगाएस।’
तउ उ मसीह क पुनरूत्थान क बारे मँ ही कहे रहा। 32 इहइ ईसू क परमेस्सर पुनरूत्थान कइ दिहेस। इ सच्चाई क हम पचे साच्छी अही। 33 परमेस्सर क दाहिन हाथे कइँती सबन ते उँचका ओहदा पाइके ईसू पिता स सपथ क अनुसार पवित्तर आतिमा पाएस अउर फिन उ इ आतिमा क उड़ेरेस जेका अब तू लखत बाट्या अउर सुनत बाट्या। 34 दाऊद सरगे मँ नाहीं गवा तउ उ खुद कहत ह:
‘पर्भू (परमेस्सर) मोर पर्भू स कहेस:
मोरे दाहिने बइठा, जब ताई मइँ
35 तोहरे बैरिन क तोहरे गोड़वा तरे गोड़ धरइ क चउकी न बनइ देइ।’(C)
36 “यह बरे इस्त्राएल क समूचइ मनइयन ठीक तरह स समुझ लेइ कि परमेस्सर इ ईसू क जेका तू पचे क्रूस प चढ़ाइ दिहे रहा, पर्भू अउर मसीह दुइनउँ ठहरावा ग रहेन!”
37 मनइयन जब इ सुनेन तउ उ पचे घबराइ गएन अउर पतरस अउर दूसर प्रेरितन स कहेन, “तउ भाई, हम सबन क का करइ चाही?”
38 पतरस ओनसे कहेस, “मनफिराओ अउर आपन पापे क छमा पावइ बरे तू पचन मँ स हर एक क ईसू मसीह क नाउँ स बपतिस्मा लेइ चाही। फिन तू पवित्तर आतिमा क उपहार मँ पउब्या। 39 काहेकि इ सपथ तोहरे बरे, तोहरे संतान बरे अउर ओन सब कामे बरे अहइ जउन बहोत दूर बाटेन। इ सपथ ओन सब बरे अहइ जेनका हमार पर्भू परमेस्सर आपन लगे बोलावत ह।”
40 अउर बहोत स बचन स उ ओनका चिताउनी दिहेस अउर समझाय के ओनसे कहेस, “इ कुमार्गी पीढ़ी स आपन खुद क बचावा!” 41 तउ जउन ओकरे संदेसा क अंगीकार किहेन, ओनका बपतिस्मा दीन्ह गवा। इ तरह उ दिना उ बिसवासियन क झुण्ड मँ कउनो तीनजहार मनई अउर जुड़ गएन।
बिसवासी क मिली जुली जिन्नगी
42 उ पचे प्रेरितन क उपदेस, संगत, रोटी क तोड़इ अउर पराथना करइ मँ जिअरा लगाइ दिहन। 43 हर मनई प भय रहा अउर प्रेरितन क जरिये बहुत अचरज कारजन अउर अद्भुत चीन्हन परगट कीन्ह जात रहेन। 44 सबहिं बिसवासी एक संग बटुरत रहेन अउर ओनके लगे जउन कछू रहा, उ पचे आपुस मँ बाँट लेत रहेन। 45 उ पचे आपन सबहिं चीजन अउर धन-दौलत बेंचेन अउर ओन सब चिजन्क आपुस मँ बाँटि लिहन, जइसे जेका जरूरत रही। 46 अउर उ पचे हर दिन मन्दिर मँ एक उदेस्स स मिलि जात रहेन। उ पचे घरे मँ रोटी तोड़ लेतेन अउर आनन्द अउर निर्मल मन स खात रहेन। 47 उ पचे सब मनइयन क नीक बिचार क आनन्द लेत भए पर्भू क स्तुति गवात रहेन। अउर हर दिन परमेस्सर, जेनकइ उद्धार करत, ओनकइ दल मँ अउर जोरि दीन्ह जात।
Awadhi Bible: Easy-to-Read Version. Copyright © 2005 Bible League International.