M’Cheyne Bible Reading Plan

हिजकिय्याह फसह पर्व मनावत ह

30 हिजकिय्याह इस्राएल अउ यहूदा क सबहिं लोगन क सँदेसा पठएस। उ एप्रैम अउ मनस्से क लोगन क भी पत्तर लिखेस। हिजकिय्याह ओन सबहिं लोगन क यरूसलेम मँ यहोवा क मन्दिर मँ आवइ बरे न्यौतेस जेहसे उ सबइ सबहिं फसहपर्व यहोवा, इस्राएल क परमेस्सर बरे मनाइ सकइँ। ² हिजकिय्याह आपन सबहिं अधिकारियन अउ यरूसलेम क सभा क संग फसह पर्व दूसरे महीने मँ मनावइ बरे राज़ी होइ गएन। ³ उ सबइ फसह पर्व क नियमित समइ स न मनाइ सकइँ। काहे काहेकि प्रायाप्त संख्याँ मँ याजक पवित्तर सेवा बरे अपने आप क तइयार नाहीं किहे रहा अउर दूसर कारण इ रहा कि लोग यरूसलेम मँ एकट्ठे न होइ सके रहेन। ⁴ इ सुझाव राजा हिजकिय्याह अउर पूरी सभा क सन्तुट्ठ किहस। ⁵ एह बरे उ पचे इस्राएल मँ बेर्सेबा नगर स लइके लगातार दान तलक हर एक जगह पइ घोसणा किहन। उ पचे लोगन स कहेन कि उ पचे यरूसलेम मँ यहोवा, इस्राएल क परमेस्सर बरे फसह पर्व मनावइ आवइँ। इस्राएल क बहोत बड़का समूह बहोत समइ स फसह पर्व उ तहर नाहीं मनाए रहा, जउने तरह मूसा क नेमन एका मनावइ क कहे रहेन। ⁶ एह बरे दूत राजा क पत्तर पूरे इस्राएल अउर यहूदा मँ लइ गएन। ओन पत्रन मँ इ लिखा रहा:

“इस्राएल क सन्तानों, इब्राहीम, इसहाक अउर इस्राएल, जउन यहोवा, परमेस्सर क आग्या मानत रहेन ओकरे निअरे लोउटा। तब यहोवा तू लोगन क लगे वापस आइ जउन अस्सूर क राजा लोगन स बच गएन ह अउर अबहिं तलक जिअत अहइँ। ⁷ अपने पुरखन अउर भाइयन क तरह न बना। यहोवा ओनका परमेस्सर रहा, मुला उ पचे ओका धोखा दिहेन। ऍह बरे उ ओन लोगन क बर्बाद होइ दिहस। तू खुद अपनी आँखी स इ लखि सकत ह। ⁸ अपने पुरखन क तरह हठी जिन बना। अपितु सच्चे हिरदइ स यहोवा क आग्या माना। सब स जियादा पवित्तर जगह पइ आवा। यहोवा सब स जियादा पवित्तर जगह क सदा ही क बरे पवित्तर बनाएस ह। अपने यहोवा, परमेस्सर क सेवा करा। तब यहोवा क डरावना किरोध तोह पइ स हट जाइ। ⁹ जदि तू यहोवा क लगे लउटब्या अउर ओकरे आग्या मनब्या तब तोहार सम्बन्धी, भाइयन अउर बच्चन ओन लोगन क दाया पइहीं जउन ओनका बन्दी बनाएन ह अउर तोहार सम्बन्धी अउर बच्चन इ देस मँ लउटिहीं। यहोवा, तोहार परमेस्सर कृपालु अउ दयालु अहइ। जदि तू ओकरे लगे लउटब्या तउ उ तोहसे नाहीं मुरब्या।”

¹⁰ दूत एप्रैम अउ मनस्से क पहँटन क सबहिं नगरन मँ गएन। उ पचे लगातार पूरे जबूलून देस मँ गएन। किन्तु लोग दूतन क हँसी उड़ाएन अउर ओनकर मजाक उड़ाएन। ¹¹ मुला आसेर, मनस्से अउ जबूलून देस क कछू लोग आपन क बिनम्र बनाएन अउर यरूसलेम गएन। ¹² यहूदा मँ परमेस्सर क सक्ती लोगन क संगठित किहस ताकि उ पचे राजा हिजकिय्याह अउ ओकरे अधिकारियन क आग्या क पालन कइ सकत हीं। इ तरह उ पचे यहोवा क आग्या क पालन किहन।

¹³ बहोत स लोग एक संग यरूसलेम, दूसरे महीने मँ अखमोरी रोटी क उत्सव मनावइ आएन। इ बहोत बड़ी भीड़ रही। ¹⁴ ओन लोग यरूसलेम स लबार देवतन क वेदियन क हटाइ दिहन। उ पचे लबार देवतन क बरे सुगन्धि भेंट क वेदियन क भी हटाइ दिहन। उ पचे ओन वेदियन क किद्रोन क घाटी मँ लोकाइ दिहन। ¹⁵ तब उ पचे फसह पर्व क मेमने क दूसर महीने क चौदहवें दिन मारेन। याजक अउ लेवीबंसी लज्जित भएन। ऍह बरे उ पचे अपने क पवित्तर सेवा बरे तइयार किहन। याजक अउर लेवीबंसी होमबलि यहोवा क मन्दिर मँ लइ आएन। ¹⁶ मन्दिर मँ अपने बरे मुकर्रर जगह पइ उ पचे वइसे ही बइठेन जइसा परमेस्सर क मनई मूसा क नेम मँ कहा गवा रहा। लेवीबंसी लोग याजकन क रक्त दिहन। तब याजक लोग रक्त क वेदी पइ छिछकारेन। ¹⁷ उ समूह मँ बहोत स लोग अइसे रहेन जउन अपने क पवित्तर सेवा क बरे तइयार नाहीं किहे रहेन एह बरे उ पचे फसह पर्व क मेमने क मारइ क मँजूरी नाहीं पाइ सकेन। इहइ कारण रहा कि लेवीबंसी ओन सबहिं लोगन क बरे फसह पर्व क मेमने क मारइ क जिम्मेदार रहेन जउन सुद्ध नाहीं रहेन। लेवीबंसी हर एक मेमना क यहोवा क बरे पवित्तर बनाएन।

¹⁸ एप्रैम, मनस्से, इस्साकार अउर जबूलून क बहोत स लोग फसह पर्व उत्सव क बरे अपने क ठीक तरह स तइयार नाहीं किहे रहा। उ पचे फसह पर्व क मेमनन क खाएन जब कि उ पचे मूसा क नेम क अनुसार असुद्ध रहेन। मुला हिजकिय्याह ओन लोगन बरे पराथना किहस। एह बरे हिजकिय्याह इ पराथना किहस, “यहोवा, तू अच्छा अहा। ¹⁹ इ सबइ लोग तू यहोवा हम लोगन क पुरखन क परमेस्सर क सेवा करइ बरे आपन पूरे दिल स तइयार रहेन। किन्तु उ पचे अपने क पवित्तर सेवा मँ भाग लेइ बरे नेम क अनुसार सुद्ध न कइ सकेन। ऍह बरे कृपा कइके ओन लोगन बरे प्रायस्चित करा।” ²⁰ यहोवा राजा हिजकिय्याह क पराथना सुनेस। यहोवा लोगन क छिमा कइ दिहस। ²¹ इस्राएल क संतानन यरूसलेम मँ अखमीरी रोटी क उत्सव सात दिन तलक मनाएन। उ पचे बहोत खुस रहेन। लेवीबंसी अउ याजक लोग अपनी पूरी सक्ती स हर एक दिन यहोवा क स्तुति किहन। ²² राजा हिजकिय्याह ओन सबहिं लेवीबंसियन क उत्साहित किहस जउन अच्छी तरह समुझ गए रहेन कि यहोवा क सेवा कइसे कीन्ह जात ह। लोग सात दिन तलक पर्व मनाएन अउर मेलबलि च़ढ़ाएन। उ पचे अपने पुरखन क यहोवा परमेस्सर क धन्यवाद दिहन अउर ओकर स्तुति किहन।

²³ सबहिं लोग सात दिन अउर ठहरइ क सहमत होइ गएन। एह बरे उ पचे सात अउर दिना तलक बहोत खुसी स फसह पर्व मनाएन। ²⁴ यहूदा क राजा हिजकिय्याह उ सभा क एक हजार बर्धन अउ सात हजार भेड़िन मारइ अउर खाइ क बरे दिहेस। प्रमुखन सभा क एक हजार बर्धन अउ दस हजार भेड़िन दिहन। बहोत स याजक लोग पवित्तर सेवा बरे अपने क तइयार किहन। ²⁵ यहूदा क पूरी सभा, याजक, लेवीबंसी, इस्राएल स आवइवाली पूरी सभा अउर उ सबइ यात्री जउन इस्राएल स आए रहेन अउ यहूदा पहोंच गए रहेन, सबहिं लोग बहोत जियादा खुस रहेन। ²⁶ इ तरह यरूसलेम मँ बहोत आनन्द रहा। इ पर्व क समान कउनो भी पर्व इस्राएल क राजा, दाऊद क पूत सुलैमान क समइ क बाद स नाहीं भवा रहा। ²⁷ याजक अउ लेवीबंसी खड़े भएन अउर यहोवा स लोगन क आसीर्वाद देइ क कहेन। परमेस्सर ओनकर सुनेस। ओनकर पराथना सरग मँ यहोवा क पवित्तर निवास तलक पहोंची।

परमेस्सर क गुस्सा क कटोरा

16 फिन मइँ सुनेउँ कि मन्दिर मँ स एक जोर क आवाज़ ओन सात सरगदूतन स कहत अहइ, “जा अउर परमेस्सर क गुस्सा क सातउँ कटोरन क धरती प उड़ेर द्या।”

² इ बरे पहिला सरगदूतन गवा अउर उ धरती प आपन कटोरा उड़ेर दिहेस। एकइ नतीजा इ भवा कि उ मनई जेनके ऊपर जनावर क निसानी छपी रही अउर जउन ओकरी मूरती क पूजा करत रहेन, क ऊपर भयानक पीड़ा पइदा करइवाले छाला फूट आएन।

³ एकरे बाद दूसर सरगदूतन आपन कटोरा समुद्दर मँ उड़ेर दिहेस अउर समुद्दर क पानी मरे भए मनई क खून मँ बदल गवा अउर समुद्दर मँ रहइवाले सब जीवजन्तु मरि गएन।

⁴ फिन तीसरा सरगदूतन नदियन अउर पानी क झरनन पइ आपन कटोरा उड़ेर दिहेस अउर उ खून मँ बदल गएन। ⁵ उहइ समइ प मइँ पानी सरगदूतन क इ कहत सुनेउँ:

⁷ फिन मइँ वेदी स आवत आवाज़ सुनेउँ:

⁸ फिन चौथा सरगदूत आपन कटोरा सूरज क ऊपर उड़ेर दिहेस। इ तहर ओका मनइयन क आग स जलावइ क ताकत दइ दीन्ह गइ। ⁹ अउर मनई भयानक गरमी स झुलसइ लागेन। उ परमेस्सर क नाउँ क कोसइ लागेन काहे बरे कि इन जेका महमारी प क अधिकार अहइ। मुला उ पचे आपन मनफिरावा नाहीं किहेन अउर न जिन्नगी क बदलेन अउर परमेस्सर क महिमा किहेन।

¹⁰ एकरे बाद पाँचवा सरगदूत आपन कटोरा उ जनावर क सिंहासन प उड़ेरे दिहेस अउर ओकर राज अँधेरे मँ डूब गवा। सब मनई तकलीफ क आपन जीभ काट लिहेन। ¹¹ आपन आपन पीड़ा अउर छालन क कारण उ सरग क परमेस्सर क निन्दा तउ करइ लागेन मुला आपन मनफिरावा नाहीं किहेन।

¹² फिन छठवाँ सरगदूत आपन कटोरा फरात नाउँ क महानदी प उड़ेर दिहेस अउर ओकर पानी सूख गवा। एहसे पूरब दिसा क राजन क बरे रास्ता तइयार होइ गवा। ¹³ फिन मइँ देखेउँ कि उ भयंकर अजगर क मुँहे स, उ जनावर क मुँह स, अउर कपटी नबियन क मुँहसे तीन दुस्ट आतिमन निकलिन, जउन मेड़क क तरह दिखाई पड़त रहिन। ¹⁴ इ सब दुस्ट क आतिमन रहिन अउर ओनके मँ अदभुत कारजन करइ क ताकत रही। उ पूरी दुनिया क राजा लोगन मँ सबसे सर्वसक्तिमान परमेस्सर क महान दिन, जुद्ध करइ क बरे एकट्ठा करइ क निकल पड़ेन।

¹⁵ “सावधान! मइँ चोर क समान आवत हउँ। उ धन्य अहइ जउन जागत रहत ह अउर अपने क परन क अपने साथे रखत ह जइसेन कि उ नंगा न घूमइ अउर मनई ओका लज्जित होत न देइँ।”

¹⁶ इ तरह स उ दुस्ट आतिमन ओन राजन क एकट्ठा कइके उ जगह प लइ आएन जउने क इब्रानी भाखा मँ हर मगिदोन कहा जात ह।

¹⁷ एकरे बाद सातवाँ सरगदूत आपन कटोरा हवा मँ उड़ेर दिहेस! अउर सिंहासन स पइदा भवा एक भयंकर आवाज़ मन्दिर मँ स कहत तिकरी, “इ खतम होइ गवा!” ¹⁸ तबहि बिजली कउँधइ लाग, आवाज़ क अउर गरजन अउर एक ठू जर्बदस्त भूचाल आइ गवा। मनई क धरती प परगट होइ क बाद क इ सबसे भयानक भूचाल रहा। ¹⁹ उ बड़ा सहर तीन टुकड़न मँ बिखर गवा, अउर अधर्मियन क रास्ट्रन नगरन क नस्ट होइ गए। परमेस्सर महानगरी बाबुल क दण्ड़ देइ क बरे याद करे रहा। आपन भयंकर प्रकोप क काटोरा मँ स ओका दइ दिहेस। ²⁰ सब द्वीप गायब होई गएन। कउनो पहाड़ तक क पता नाहीं चल पावत रहा। ²¹ पचास पचास किलो क ओला, आसमान स मनइयन क ऊपर बरसइ लागेन। ओलन क भयंकर विपत्ति क कारण सब मनई परमेस्सर क कोसत रहेन, काहे बरे कि इ भयानक आफत रही।

यहूदा क चारिहुँ कइँती क रास्ट्रन क बारे मँ दर्सन

12 एक भविस्सबाणी: इ इस्राएल क बारे मँ यहोवा क सँदेसा अहइ: इ उहइ अहइ जउन यहोवा कहत ह, कउन आकसे क बनाएस, कउन धरती क स्थापना किहेस, कउन मनई क भीतर आतिमा क रचेस, ² “लखा, मइँ यरूसलेम क पिअइ क ज़हरीला पिआला बनाइ बरे जावत हउँ जउन कि ओकरे चारिहुँ कइँती क रास्ट्रन बरे मूसीबत झेलइ क कारण होइ। यहूदा क भी ओन रास्ट्रन क बीच जउन कि यरूसलेम क घेरत ह होवइ बरे मजबूर कीन्ह जाब्या। ³ उ दिना मइँ यरूसलेम क सबइ जातियन बरे भारी चट्टान क नाईं बनाउब। अउर जउन कउनो एका उठावइ क कोसिस करी जोर स चोट खाइ, अउर धरती क सारे रास्ट्रन यरूसलेम क खिलाफ होइहीं। ⁴ यहोवा कहत ह, उ दिना मँ, मइँ हरेक घोड़न क डराउब अउर हरेक घोड़सवार क पागल बनाइ देब; किन्तु मइँ यहूदा क लोगन पइ धियान देब, अउर मइँ जातियन क सबइ घोड़न आँधर कइ देब। ⁵ तब यहूदा क प्रमुखन आपन आप स कहिहीं, ‘यरूसलेम क निवासिन सर्वसक्तीमान यहोवा का करण मज़बूत अहइ अउर उ ओकर परमेस्सर अहइ।’ ⁶ उ दिना मँ, मइँ यहूदा क प्रमुखन क काठ मँ बरत भइ अंगठी, अउ बारत भवा अनाज क गुच्छा क नाईं बनाइ देब। उ पचे आपन चारिहुँ कइँती क जातियन क नस्ट कइ देब साथ ही जउन ओकर दाहिनी तरफ अउ जउन ओकर बाइ तरह होइ। किन्तु यरूसलेम क निवासी फुन यरूसलेम क जगह पइ होइहीं।”

⁷ पहिले यहोवा यहूदा क परिवार समूहन क विजय दिलाइ, एह बरे दाऊद क परिवार समूह क महिमा अउ यरूसलेम क निवासियन क महिमा यहूदा क बंसज स जियादा होइ। ⁸ उ दिना मँ, यहोवा यरूसलेम क निवासियन बरे ढाल होइहीं। जउन कउनो आदमी ओनकर बीच मँ दृढ़ता स रही उ दाऊद क समान बड़वार जोधा बन जाइ। लोगन क समन्वा, दाऊद क परिवार देवता क समान या यहोवा क आपन सरगदूतन क नाईं होइहीं।

⁹ “उ दिना मँ, मइँ ओन रास्ट्रन क नस्ट करइ बरे रवाना होब जउन यरूसलेम क खिलाफ जुद्ध करइ बरे आवत अइहीं। ¹⁰ मइँ दाऊद क परिवार पइ अउ यरूसलेम क निवासियन पइ महिमा क आतिमा अउ पराथना क उड़ेर देब। उ पचे मोर कइँती लखिहीं, जेनका उ पचे छेद डाए रहेन। उ पचे ओकरे बरे अइसा रोवइ जइसा उ अपने इकलौता पूत क मउत पइ रोवइवत ह। उ पचे अइसा गहिरा दुःख मँ होइ जइसा व्यक्ति आपन पहिलौटी पूत क मउत पइ रोवइवत होइ। ¹¹ उ दिना मँ, यरूसलेम मँ विलाप बहोत भयंकर होइहीं, इ उ समइ क नाईं होइ, जब मगिद्दो घाटी मँ हदद्मिन क मउते पइ विलाप होत रहेन। ¹² सम्पूर्ण भूइँया खुद ही विलाप करिहीं, अउर हरेक परिवार खुद ही विलाप करिहीं; दाऊद क परिवार खुद ही रोइहीं, अउर ओनकर पत्नियन खुद ही रइहीं। अउर ओनकर पत्नियन आपन आप ही विलाप करिहीं। ¹³ लेवी क परिवार खुद ही विलाप करिहीं, अउर ओनकर पत्नियन आपन आप ही विलाप करिहीं; सिमाइ क परिवार क खुद ही विलाप करिहीं, अउर ओनकर पत्नियन आपन आप ही विलाप करिहीं। ¹⁴ सबहिं परिवार समूहन क हर कउनो जउन जिअत ह खुद ही विलाप करिहीं, अउर पत्नियन आपन आप स विलाप करिहीं।”

13 उ दिना, दाऊद क परिवार अउ यरूसलेम मँ रहइवाला लोगन बरे एक ठु सोता ओकरे पापन बरे क धोइ देइ अउर लोगन क सुद्ध करइ बरे फूटब।

ईसू सच्ची दाखलता

15 ईसू कहेस, “मइँ दाखलता अहउँ अउर मोर परमपिता देख रेख करइवाला माली अहइ। ² मोरी उ साखा क पिता काट देत ह जउने मँ फर नाहीं लागत। जउने साखा मँ फर लागत ह, ओका उ छाँट लेत ह, जइसे कि ओहपे अउर जियादा फर लागइँ। ³ तू पचे मोरे उपदेस क सुने अहा, इ बरे पहिले स सुद्ध अहा। ⁴ तू मोरे मँ रहा अउर मइँ तोहरे मँ रहब। वइसेन जइसेन कि कउनो साखा जब तलक दाखलता मँ बनी नाहीं रहत, तब तलक अपने आप फरि नाहीं सकत, वइसेन, तू पचे तब तलक सफल नाहीं होइ सकत्या जब तलक मोरे मँ न रहब्या।

⁵ “उ दाखलता मइँ अहउँ अउर तू ओकर साखा अह्या। जे मोरे मँ रहत ह, अउर जेहमा मइँ रहित ह, उ बहुत फरत ह, काहेकि बिना मोरे तू कछू नाहीं कर सकत्या। ⁶ जदि कउनो मोरे मँ नाहीं रहत तउ उ टूटी साखा क तरह फेंक दीन्ह जात ह अउर सूख जात ह। फिन उ सूखी लकड़ियन क बटोररिके आगी मँ झोंक दीन्ह जात ह अउर ओनका जलाय दीन्ह जात ह। ⁷ जदि तू मोरे मँ रहब्या, अउर मोर उपदेस तोहरे मँ रही, तउ जउन कछू तू चाहत ह, ओका माँगा अउर उ तोहका मिल जाई। ⁸ इ मोरे परमपिता क महिमा होत ह कि तू बहुत सफल होइ जा अउर मोर चेलन बन जा।

⁹ “जइसे परमपिता मोसे पिरेम करे बाटइ, मइँ भी तोहसे बइसे पिरेम करे अही। मोरे पिरेम मँ बना रहा। ¹⁰ जदि तू मोरे आदेस क पालन करब्या तउ तू मोरे पिरेम मँ बना रहब्या। वइसे ही जइसे कि मइँ अपने पिता क आदेसन क पालन करत भए ओकरे पिरेम मँ बना रहित ह। ¹¹ मइँ इ सब बात तू पचे स इ बरे बतावत अहइ जइसे कि मोर आनन्द तोहरे मँ बना रहइ अउर तोहार आनन्द पूरा होइ जाइ। इ मोर आदेस अहइ। ¹² कि तू आपस मँ पिरेम करा, जइसे मइँ तू पचे स पिरेम करे अही। ¹³ बड़वार स बड़का पिरेम जउऩ कउनो मनई कइ सकत ह, उ अहइ अपने मीतन क बरे आपन प्रान निछावर कइ देब। ¹⁴ जउन आदेस तोहका मइँ देत अही, जदि तू ओन पइ चलत रहब्या तउ तू मोर मीत अह्या। ¹⁵ अबहिं स मइँ तू पचे क ‘दास’ न कहब, काहेकि कउनो दास इ नाहीं जानत कि ओकर मालिक क करत अहइ, मइँ तउ तोहका ‘मीत’ कहत अही। मइँ तू पचे क उ सब बात बताइ दीन्ह जउऩ मइँ अपने परमपिता स सुने रहेउँ।

¹⁶ “तू मोका नाहीं चुने रह्या, मइँ खुदइ तोहका चुने रहेउँ अउर इ निस्चय करे अही कि तू जा अउर सफल होइ जा। मइँ चाहित ह कि तोहका सफलता मिलइ, अउर मोरे नाउँ स जउन कछू तू चाहा परमपिता तोहका दई देइ। ¹⁷ मइँ तोहका इ आदेस देत अही कि तू एक दूसरे स पिरेम करा।

ईसू क चेतावनी

¹⁸ “जदि दुनिया तोहसे दूस्मनी करत ह तउ इ बात तू याद कइ ल्या कि तोहसे पहले हमसे दुस्मनी करत ह। ¹⁹ जदि तू दुनिया क होत्या तउ इ दुनिया तोहसे अपने क नाईं पिरेम करत मुला तू पचे दुनिया क न अह्या अउर इ बरे दुनिया तोहसे दुस्मनी करत ह।

²⁰ “मोर बचन याद रखा कि एक दास अपने मालिक स बड़ा नाहीं होत। इ बरे जदि उ सबेन्ह मोका कस्ट पहुँचाए अहइँ अउर सतावत अहइँ तउ उ पचे तोहका भी सतइहीं। अउर जदि उ मोर बातन मनिहइँ तउ तोहार बातन भी मनिहइँ। ²¹ मुला उ सबेन्ह मोरे कारण तोहरे सबेन्ह क साथ उ सब कछू करिहइँ, काहेकि उ ओका नाहीं जानत अहइ जे मोका भेजेस। ²² जदी मइँ न आइत अउर ओसे बात न करित, तउ उ सबेन्ह कउनो पाप क दोखी न होतेन। मुला अब ओनके पास अपने पाप स बचइ क कउनो बहाना नाहीं अहइ।

²³ “जउन मनई हमसे दुस्मनी ठान लेत ह, उ परमपिता स दुस्मनी करत ह। ²⁴ जदि मइँ ओनके बीच मँ काम न करित, जउऩ कि कबहूँ कउनो मनई नाहीं करे रहा, तउ उ सबेन्ह पाप क दोखी न रहतेन, मुला अब जब उ पचे देख चुका अहइँ, तबहूँ मोसे अउर परमपिता स दुस्मनी रखे अहइँ। ²⁵ मुला इ एह बरे भवा कि ओनके व्यवस्था मँ जउन लिखा अहइ, उ खरा उतरइ। ‘उ पचे बेकार मँ हमसे बैर करेन्ह।’^[a]

²⁶ “जब उ सहायक जउन सत्य क आतिमा बाटइ अउर पिता क तरफ स आइ बा, तोहरे पास आई, जेका मइँ परमपिता क तरफ स भेजब, उ हमरी तरफ स साच्छी देई। ²⁷ अउर तूहूँ साच्छी देब्या, काहेकि तू सुरूआतइ स मोरे साथ अहा।