M’Cheyne Bible Reading Plan

दाऊद इस्राएल क राजा होत ह

11 इस्राएल क सबहिं लोग हेब्रोन नगर मँ दाऊद क लगे गएन। उ पचे दाऊद स कहेन, “हम तोहार ही रक्त-माँस अही। ² बीते दिन मँ, जब साऊल राजा रहा तब भी हमार तू जुद्ध मँ सन्चालन किहा। हे दाऊद, यहोवा तोहसे केहस, ‘तू मोरे लोगन क गड़रिया रहब्या। तू मोरे लोगन क ऊपर सासक होब्या।’”

³ इस्राएल क सबहिं प्रमुखन दाऊद क लगे हेब्रोन नगर मँ आएन। दाऊद हेब्रोन मँ ओन प्रमुखन क संग यहोवा क सामने एक समझौता किहस। प्रमुखन दाऊद क अभिसेक किहन। इ तरह उ इस्राएल क राजा बन गवा। यहोवा समूएल दुआरा इ बचन दिहे रहा कि इ होइ।

दाऊद यरूसलेम क कब्जा किहस

⁴ दाऊद अउ इस्राएल क सबहिं लोग यरूसलेम नगर क गएन। यरूसलेम ओन दिनन यबूस कहा जात रहा। उ नगर मँ रहइवाले यबूसी कहे जात रहेन। ⁵ उ नगर क निवासी लोग दाऊद स कहेन, “तू हमारे नगर क प्रवेस नाहीं कइ सकत्या।” किन्तु दाऊद ओन लोगन क पराजित किहस। दाऊद सिय्योन क किले पइ कब्जा कइ लिहस। इ जगह “दाऊद नगर” बना।

⁶ दाऊद कहेस, “उ मनई जउन यबूसी लोगन पइ आक्रमण क संचालन करी, मोर पूरी फउज क सेनापति होइ।” एह बरे योआब आक्रमण क संचालन किहस। योआब सरूयाह क पूत रहा। योआब सेना क सेनापित होइ गवा।

⁷ तब दाऊद किला मँ आपन महल बनाएस। इहइ कारण अहइ ओकर नाउँ दाऊद नगर पड़ा। ⁸ दाऊद किले क चारिहुँ कइँती नगर बसाएस। उ एकॉ मिल्लो स नगर क चारिहुँ कइँती की दीवार तलक बसाएस। योआब नगर क दूसर भागन क मरम्मत किहेस। ⁹ दाऊद लगातार महान बनता गवा। सर्वसक्तीमान यहोवा ओकरे संग रहा।

दाऊद क विसिस्ठ बीर

¹⁰ दाऊद क बिसिस्ठ बीरन क ऊपर क प्रमुखन क इ सूची अहइ: इ सबइ बीर दाऊद क संग ओकरे राज्ज मँ बहोत सक्तीसाली बन गएन। उ पचे अउ इस्राएल क सबहिं लोग दाऊद क सहायता किहन अउर ओका राजा बनाएन। इ ठीक वइसा भवा जइसा परमेस्सर बचन दिहे रहा।

¹¹ इ दाऊद क बीर मनइयन क सूची अहइ:

यासोबाम हक्मोनी लोगन मँ स रहा। यसोबाम राजा क बिसिस्ठ फउज क प्रमुख रहा। यसोबाम अपने भाले क उपयोग तीन सौ मनइयन स जुद्ध करइ बरे किहस। उ एक ही दाईं ओन तीन सौ मनइयन क मार डाएस।

¹² एलीआज़ार दोदो क पूत, अदोही स रहा। एलीआज़ार तीन बीरन मँ स एक रहा। ¹³ एलीआज़ार पसदम्मीम मँ दाऊद क संग रहा। पलिस्ती लोग उ जगह पइ जुद्ध करइ आएन। उ जगह पइ एक जौ स भरा खेत रहा। उहइ जगह, जहाँ इस्राएली लोग पलिस्ती लोगन स भागे रहेन। ¹⁴ किन्तु उ सबइ तीन बीर उ खेत क बीच रुक गएन अउर पलिस्तियन स लड़ेन अउ ओनका हराइ डाएन अउर इ तरह यहोवा इस्राएलियन क बड़ी जीत दइ दिहस।

¹⁵ एक दाई, दाऊद, अदुल्लाम गुफा क लगे रहा अउर पलिस्ती फउज खाले रपाईम क घाटी मँ रही। तीस बीरन मँ स तीन बीरन उ गुफा तलक, लगातार रेंगत भए दाऊद क लगे पहोंचेन।

¹⁶ दूसर अवसर पइ, दाऊद किले मँ रहा, अउर पलिस्ती सेना क एक समूह बेतलेहेम मँ रही। ¹⁷ एक बार दाऊद कहेस, “कास कउनो मोका बेतलेहेम नगर क दुआर क लगे क कुआँ स थोड़ा पानी लाइके पिलातेन!” ¹⁸ तब तीन बीरन पलिस्ती सेना क बीच जुद्ध करत भए अपना रास्ता बनाएन अउर नगर-दुआर क निचके बेतलेहेम क कुएँ स पानी लिहन। तीनहुँ बीरन दाऊद क लगे पानी लइ गएन। दाऊद पानी पिअइ स इन्कार कइ दिहस। उ उ पानी क यहोवा बरे भेंट क रूप मँ बाहेर उड़ेर दिहस। ¹⁹ दाऊद कहेस, “परमेस्सर, मइँ इ पानी क नाहीं पी सकत। एन मनइयन मोरे बरे इ पानी क लिआवइ मँ अपनी जिन्नगी क खतरे मँ डाएन। एह बरे जदि मइँ इ पानी क पिअत हउँ तउ इ ओनकर खून पिअइ क समान होइ।” एह बरे दाऊद उ जल क पिअइ स इन्कार किहस। तीनहुँ बीर उ तरह क बहोत स बहादुरी क काम किहन।

दूसर बीर जोधा

²⁰ योआब क भाई, अबीसै, तीन बीरन क प्रमुख रहा। उ अपने भाले स तीन सौ मनईयन स लड़ा अउर ओनका मार डाएस। अबीसै तीन बीरन क तरह मसहूर होइ गवा। ²¹ अबीसै उ तीनहुँ बीरन स दुइगुना जियादा प्रसिद्ध रहा। उ ओनकर प्रमुख होइ गवा, जदपि उ तीनहुँ बीरन मँ स नाहीं रहा।

²² यहोयादा क पूत बनायाह, कबजेल क एक बीर जोधा रहा। उ एक सक्तीसाली मनइ क पूत रहा। बनायाह अनेक बीरता क काम किहेस। उ मोआब देस क दुइ सर्वोत्तम सिपाहियन क मार डाएस। एक दिन जब बर्फ गिरत रही, उ जमीन क अन्दर एक ठु माँदे मँ घुसा अउर हुवाँ एक सेर क मार डाएस। ²³ बनायाह मिस्र क एक मनई क मार डाएस। उ मनई लगभग साढ़े सात फिट ऊँचा रहा। उ मिस्र क मनई क लगे एक बहोत बड़का अउ भारी भाला रहा। इ बुनकर क करघे क बिसाल खम्भे क नाईं रहा अउर बनायाह क लगे सिरिफ एक ठु लाठी रही। किन्तु बनायाह मिस्री स भाला छोर लिहस। मुला बनायाह मिस्री स भाले क छीन लिहेस। बनायाह मिस्री मनई क भाले क उपयोग किहेस अउर ओका मार डाएस। ²⁴ इ सबइ कार्य रहेन जेनका योहयादा क पूत बनायाह किहस। बनायाह तीन बीरन क तरह प्रसिद्ध भवा। ²⁵ बनायाह तीस बीरन मँ सब स जियादा मसहूर रहा, मुला उ तीनहुँ बीरन मँ स नाहीं रहा। दाऊद बनायाह क अपने अंगरच्छकन क प्रमुख चुनेस।

तीस बीरन

²⁶ इ सबइ राजा क बिसिस्ठ फउज मँ स रहेन:

उ पचे बीर मनई जउन दाऊद क संग भएन

12 इ ओन मनईयन क सूची अहइ जउन दाऊद क लगे आएन जब दाऊद सिकलग नगर मँ रहा। दाऊद तब भी कीस क पूत साऊल स अपने क छुपाए रहत रहा। इ मनईयन दाऊद क जुद्ध मँ मदद दिहे रहेन। ² इ सबइ मनई अपने दाएँ या बाएँ हाथ स धनुस क बाण क जरिये बेध सकत रहेन। अपनी गुलेल स दाएँ या बाँए हाथ स पाथर लोकाइ सकत रहेन। उ पचे बिन्यामीन परिवार समूह क साऊल क सम्बंधी रहेन। ओनकर नाउँ इ सबइ रहेन:

गादी लोग

⁸ गाद क परिवार समूह क एक हींसा रेगिस्तान मँ दाऊद स ओकरे किले मँ आइ मिला। उ पचे जुद्ध बरे प्रसिच्छित फउजी रहेन। उ पचे भालन अउ ढाल क उपयोग मँ कुसल रहेन। उ पचे सेर क तहर खौफनाक देखात रहेन अउर उ पचे हिरइ क नाईं पहाड़न मँ दउड़ सकत रहेन।

⁹ गाद क परिवार समूह क सेना क प्रमुख एजेर रहा। ओबद्याह अधिकार मँ दूसर रहा। एलीआब अधिकार मँ तीसरा रहा। ¹⁰ मिसमन्ना अधिकार मँ चउथा रहा। यिर्मयाह अधिकार मँ पाँचवा रहा। ¹¹ अत्तै अधिकार मँ छठा रहा। एलीएल अधिकार मँ सातवाँ रहा। ¹² योहानान अधिकार मा आठवाँ रहा। एलजाबाद अधिकार मँ नवाँ रहा। ¹³ यिर्मयाह अधिकार मँ दसवाँ रहा। मकबन्नै अधिकार मँ गियारहवाँ रहा।

¹⁴ उ सबइ लोग गादी सेना क प्रमुख रहेन। उ समूह क सब स कमजोर फउजी भी दुस्मन क सौ फउजियन स जुद्ध कइ सकत रहा। उ समूह क सब स जियादा बलिस्ठ फउजी दुस्मन क एक हजार फउजियन स जुद्ध कइ सकत रहा। ¹⁵ गाद क परिवार समूह क उ सबइ फउजी रहेन जउन बरिस क पहिले महीने मँ यरदन नदी क उ पार गएन। इ बरिस क उ समइ रहा, जब यरदन नदी मँ बाढ़ आई रही। उ पचे घाटियन मँ रहइवाले सबहिं लोगन क पाछा कइके भगाएन। उ पचे ओन लगोन क पूरब अउ पच्छिम मँ पाछा कइके भगाएन।

दूसर जोधा दाऊद क संग आवत हीं

¹⁶ बिन्यामीन अउ यहूदा क परिवार समूह क दूसर लोगन भी दाऊद क लगे किला मँ आएन। ¹⁷ दाऊद ओनसे भेंटइ बाहेर निकरा। दाऊद ओनसे कहेस, “जदि तू लोग सान्ति क संग मोर सहायता करइ आए हो, तउ मइँ तू लोगन क सुआगत करत हउँ। मोरे संग राह। किन्तु जदि तू मोका मोर दुस्मनन क हाथ मँ देइ बरे आवा अहा, जब कि मइँ तोहार कछू भी बुरा नाहीं किहे अहउँ, तउ हमरे पुरखन क परमेस्सर लखी कि तू का किहा अउर तोहका दण्ड देइ।”

¹⁸ अमसै तीस बीरन क प्रमुख रहा। तब अमासै पइ आतिमा उतरी। अमासै कहेस,

तब दाऊद एन लोगन क सुआगत किहस। उ ओनका आपन सैनिकन क प्रमुखन बनाएस।

¹⁹ मनस्से क परिवार क समूह क कछू लोग भी दाऊद क संग होइ गएन। उ पचे दाऊद क संग तब होइ गएन जब ओका पलिस्तियन क संग साऊल क खिलाफ जुद्ध करइ बरे जाइ क रहा। मुला असल मँ दाऊद अउ ओकर लोग पलिस्तियन क मदद नाहीं किहन। एह बरे पलिस्तियन क प्रमुख सलाह क बाद दाऊद क बाहेर पठइ देइ क निर्णय लिहन। ओन सासकन कहेन, “जदि दाऊद अपने सुआमी साऊल क लगे जाइ, तउ हमार मूँड़ि काट डाइ जइहीं।” ²⁰ इ सबइ मन्ससे क लोग रहेन जउन दाऊद क संग उ समइ मिलेन जब उ सिकलग: अदना, योजाबाद, यदीएल, मीकाएल, योजाबाद, एलीहू अउर सिल्लतै नगर क गवा। उ पचे सबहिं मनस्से क परिवार समूह क सेनाध्यच्छ रहेन। ²¹ उ पचे दाऊद क मदद डाकूअन क गिरोह क खिलाफ जुद्ध करइ मँ करत रहेन। उ पचे मनस्से क बीर जोधन रहेन। उ पचे दाऊद क सेना क प्रमुख रहेन।

²² दाऊद क मदद बरे रोजाना जियादा स जियादा मनई आवत रहेन। इ तरह दाऊद क लगे बिसाल अउ ताकतवर फउज होइ गइ।

हेब्रोन मँ दूसर लोग दाऊद क संग आवत हीं

²³ हेब्रोन नगर मँ जउन लोग दाऊद क लगे आएन, ओनकर गनती इ अहइ। इ सबइ मनई जुद्ध बरे तइयार रहेन। उ पचे साऊल क राज्ज क, दाऊद क देइ आएन। इहइ उ बात रही जेका यहोवा कहे रहा कि होइ। इ ओनकर गनती अहइ:

³⁸ उ पचे सबहिं मनई बीर जोधा रहेन। उ पचे हेब्रोन नगर स दाऊद क सारे इस्राएल क राजा बनावइ क पूरी सलाह कइके आए रहेन। इस्राएल क दूसर लोग भी सलाह किहेन कि दाऊद राजा होइ। ³⁹ ओन लोग दाऊद क संग हेब्रोन मँ तीन दिन बिताएन। उ पचे खाएन अउ पीएन, काहेकि ओनकर सम्बन्धियन ओनके बरे भोजन बनाए रहेन। ⁴⁰ जहाँ इस्साकार, जबूलून अउर नप्ताली क समूह रहत रहेन, उ छेत्र स भी ओनकर पड़ोसी गदहन, ऊँट खच्चर अउर गइया पइ भोजन लइके आए रहेन। उ पचे बहोत सा आटा, अंजीर पूड़ा, रेसिन, दाखरस, तेल, गाय-बर्धा अउर भेड़िन लिआएन। इस्राएल मँ लोग बहोत खुस रहेन।

निस्कर्स

13 भाई क समान परस्पर पिरेम करत रहा। ² अतिथियन क सत्कार करब न भूला, काहे कि अइसेन करत भए कछू लोगन तउ अनजाना मँ ही सरगदूतन क स्वागत सत्कार किहे अहइँ। ³ बंदियन क इ रूप मँ याद करा जइसेन तूहऊँ ओनके साथी बन्दी रहा ह्वा। जेनके साथे बुरा व्यवहार भवा बा ओनकर एह तरह सुधि ल्या जइसेन माना तू खुद पीड़ित होत अहा।

⁴ बियाह क सबके आदर करइ चाही। बियाह क सेज क पवित्तर रखा। काहेकि परमेस्सर व्यभिचारियन अउर दुराचारियन क दण्ड देई। ⁵ अपने जीवन क धने क पिरेम स मुक्त रखा। जउन कछू तोहरे लगे बा, उही मँ सन्तोस करा काहेकि परमेस्सर तउ कहे बाटइ,

⁶ इही बरे हम बिसवास क साथे कहत हई,

⁷ अपने नेतन क याद रखा जे तोहे परमेस्सर क बचन सुनाये अहइ। ओनकर जीवन विधि क परिणाम पे बिचार करा अउर ओनके बिसवास क अनुसरण करा। ⁸ ईसू मसीह काल्हिउ ही रहा, आजउ वइसेनइ अहइ अउर युग-युगान्तर तलक वइसेन ही रही। ⁹ हर तरह क अपरिचित उपदेस स भरमावा न जा। तोहरे मने क बरे अच्छा बा कि उ अऩुग्रह क द्वारा मजबूत बन रहा न कि खाइ-पअइ सम्बन्धी नियमन क मानइ स, जेनसे ओनकर कबहुँ कउनउ भला न भवा होइ, जे ओन्हे मानेन।

¹⁰ हमरे लगे एक अइसेन बेदी अहइ जइसेन प स खाइ क अधिकार ओनका न होइ जउन रावटी मँ सेवा करत हीं। ¹¹ महाजायक परम पवित्तर स्थानन प पाप बलि क रूप मँ पसुवन क लहू त लइ जात हीं, मुला ओनकर सरीस डेरा स बाहेर जलाइ दीन्ह जात हीं। ¹² इही बरे ईसू तउ खुद अपने लहू स लोगन क पवित्तर करइ क बरे नगर दुवार क बाहेर यातना झेलेस। ¹³ तउ फिन आवा हमहूँ इही अपमान क झेलत भए जेका उ झेले रहा, डेरन क बाहेर ओनके लगे चली। ¹⁴ काहेकि इहाँ हमार कउनो स्थायी नगर नाहीं बा बल्कि हम तउ ओह नगरक बाट जोहत अही जउन आवइवाला अहइ। ¹⁵ अतः आवा हम ईसू क द्वारा परमेस्सर क स्तुति रूपी बलिदान करी जउन ओन ओठन क फल अहइ जे ओनके नाउँ क पहिचाने हयेन। ¹⁶ अउर नेकी करब अउर आपन चीजन क अउरन क साथे बाँटब न भूला। काहेकि परमेस्सर अइसेनइ बलिदान स खुस होत ह।

¹⁷ आपने नेतन क आज्ञा माना। ओनके अधीन रहा। उ पचे तोहेप अइसेन चउकसी रखत हीं जइसेन ओन्हन मनइयन प रखी जात ह जेका आपन लेखा-जोखा ओन्हे देइ क बा। ओनकर आज्ञिया मानअ, जेसे ओनकर करम आनन्द बनी जाइ। न कि एक बोझ बनइ। काहेकि ओसे तोहर कउनउ लाभ न होये।

¹⁸ हमरे बरे बिनती करत रहा। हमका निस्चय कि हमार भावना ठीक बा। अउर हम हर तरह स उहइ करइ चाहित ह जउन उचित बा। ¹⁹ मइँ बिसेस रूप स आग्रह करित ह कि तू पराथना करत रहा ताकि जल्दी ही मइँ तोहरे लगे आइ सकउँ।

^20-21 जे भेड़न क उ महान रखवाला हमार पर्भू ईसू क लहू द्वारा उ सनातन करार पे मोहर लगाइ क मरा भएन मँ स जियाइ उठायेस, उ सान्ति-दाता परमेस्सर आन्तरिक करार प्रभावित करे अहइ। तोहे सभन क अच्छी साधना स सम्पन्न करइ। जइसेन तू ओनकर इच्छा पूरी कइ सका। अउर ईसू मसीह क जरिये उ हमरे भित्तर उ सब कछू क सक्रिय करइ जउन ओनका भावत ह। जुग-जुगान्तर तलक ओनकर महिमा होत रहइ अउर जउन ओका अच्छा लागत रहइ। आमीन!

²² भाइयो तथा बहिनियो मोर आग्रह बा कि तू प्रेरणा देइवाला मोरे इ बचन क धारन करा। मइँ तोहे इ पत्र बहुत संछेप मँ लिखे हउँ। ²³ मइँ चाहत अहउँ कि तोहे जानकारी होइ कि हमार भाई तीमुथियुस रिहा कइ दीन्ह गवा अहइ। अगर उ जल्दी ही आइ पहुँचइ तउ मइँ उही क साथे तोहसे मिलइ अउबइ।

²⁴ अपने सभन अग्रणियन अउर परमेस्सर क लोगन क नमस्कार भेजत कहा। इतालियावाले स आवा सभी लोगन तोहे नमस्कार भेजत अहइँ।

²⁵ परमेस्सर क अनुग्रह तोहे सभन क साथे रहइ।

दर्सन मँ टिड्डियन

7 यहोवा मोका इ देखाएस: उ दूसर फसिल उगर क समइ टिडडी दलन क बनउब सुरू किहेस। राजा क जरिये पहिली फसल काट लीन्ह जाइके पाछे इ दूसर फसल रही। ² टिड्डियन देस क सारी घास खाइ डाएन। ओकरे पाछे मइँ कहेउँ, “मोर सुआमी यहोवा, मइँ पराथना करत हउँ, हम पचन क छिमा करा। याकूब जी नाहीं सकत, ओकर लगे बहोत सक्ति नाहीं अहइ।”

³ तब यहोवा एकरे बारे मँ विचार बदलेस। यहोवा कहेस, “अइसा नाहीं होइ।”

दर्सन मँ आगी

⁴ मोर सुआमी यहोवा मोका इ चिजियन देखाएस: मइँ लखेउँ कि यहोवा परमेस्सर आगी क नाई बरसइ बरे बोलावत बाटइ। आगी बिसाल गहिर समुद्दर क नस्ट कइ दिहस। आगी भुइयाँ क चट करइ लाग। ⁵ मुला मइँ कहेउँ, “हे परमेस्सर यहोवा, मइँ तोहसे पराथना करत हउँ, ठहरा। याकूब बच नाहीं सकत। उ बहोतइ नान्ह अहइ।”

⁶ तब यहोवा एकरे बारे मँ आपन विचार बदलेस। परमेस्सर यहोवा कहेस, “अइसा नाहीं होइ।”

दर्सन मँ साहुल

⁷ यहोवा मोका इ देखाएस: यहोवा एक ठु देवारे क सहारे एक साहुल हाथे मँ लइके खड़ा भवा रहा। (देवार साहुल स सोझ कीन्ह गइ रही।) ⁸ यहोवा मोसे कहेस, “आमोस, तू का लखत अहा?”

मइँ कहेउँ, “साहुल।”

तब मोर सुआमी कहेस, “लखा मइँ आपन इस्राएल क लोगन पइ साहुल क उपयोग करब। मइँ अब अउर अगवा ओनकर टेढ़ेपने क नजरन्दाज नाहीं करब। मइँ ओन ‘बुरे हींसन’ क काट लोकाउब। ⁹ इसहाक क ऊँच ठउर नस्ट कीन्ह जइहीं। इस्राएल क पवित्तर ठउर चट्टाने क ढेर मँ बदल दीन्ह जइहीं। मइँ हमला करब अउर यारोबाम क परिवारे क तरवारे क घाट उतारब।”

अमस्याह आमोस क भविस्सवाणी करइ स रोकइ क जतन करत ह

¹⁰ बेतेल क याजक अमस्याह इस्राएल क राजा यारोबाम क इ सँदेसा पठएस: “आमोस तोहरे खिलाफ सडयंत्र रचत अहइ। उ इस्राएल क लोगन क तोहरे खिलाफ जुद्ध बरे भड़कावत ह। उ एतना जियादा कहत अहइ कि ओकर सब्द पूरा देस मँ भी समाइ नाहीं सकतेन। ¹¹ आमोस कहेस ह, ‘यारोबाम तरवारे क घाट उतरी अउ इस्राएल क लोगन क बन्दी बनाइके आपन देस स बाहेर लइ जावा जइहीं।’”

¹² अमस्याह भी आमोस स कहेस, “हे दर्सी यहूदा जा अउर हुअँइ आपन भोजन करा। आपन उपदेस हुअँइ द्या। ¹³ मुला हिआँ बेतेल मँ अउर जियादा उपदेस जिन द्या। इ यारोबाम क पवित्तर ठउर अहइ। इ इस्राएल क मंदिर अहइ।”

¹⁴ तब आमोस अमस्याह क जवाब दिहस, “मइँ पेसेवर नबी नहीं हउँ अउर मइँ नबी क परिवार क नाहीं हउँ। मइँ गोरू पालत हउँ अउर गूलर क बृच्छन क देखरेख करत हउँ। ¹⁵ मइँ गड़रिया रहेउँ अउर यहोवा मोका भेड़िन क चरावइ स अजाद किहेस। यहोवा मोहसे कहेस, ‘जा मोर लोग इस्राएलियन मँ भविस्सवाणी करा।’ ¹⁶ एह बरे यहोवा क सँदेस क सुना। तू मोहसे कहत अहा, ‘इस्राएल क खिलाफ भविस्सवाणी जिन करा। इसहाक क परिवारे क खिलाफ उपदेस जिन द्या।’ ¹⁷ मुला यहोवा कहत ह, ‘तोहार पत्नी सहर मँ रण्डी होइ हीं। तोहार पूतन अउ बिटियन तरवारे स मारा जइहीं। दूसर लोग तोहार भुइँया क खिलाफ आइहीं अउर एका कब्जा कइ लेइहीं। अउर आपुस मँ बँटिहीं अउर तू बिदेस मँ मरब्या। इस्राएल क लोग निहचइ ही, इ देस स बन्दी क रूप मँ लइ लीन्ह जइहीं अउर देस स निस्कासित कीन्ह जाइ।’”

ईसू क जनम

(मत्ती 1:18-25)

2 उ दिना औगुस्तुस कैसर कइँती स एक हुकुम निकरा कि समूचइ रोम क राज्य मँ जनगणना दर्ज कीन्ह जाइ। ² इ पहली जनगणना रही। इ ओन दिनन भइ जब सीरिया क राज्यपाल विवरिनियुस रहा। ³ एह बरे जनगणना खारित हर कउनो आपन सहर आवा।

⁴ यूसुफ भी, गलील क नासरत सहर स यहूदिया मँ दाऊद क सहर बैतलहम क आवा काहेकि उ दाऊद क परिवार अउर बंस क सदस्य रहा। ⁵ उ हुवाँ आपन होइवाली स्त्री मरियम क संग जउन गर्भवती रही, आपन नाउँ लिखावावइ ग रहा। ⁶ अबहिं जब उ पचे हुवाँ रहेन, मरियम क बचवा पइदा करइ क समइ आइ गवा। ⁷ अउर उ आपन पहिलौटी पूत (ईसू) क जनम दिहस। काहेकि हुवाँ सराय क भीतरे उ पचन क कउनो ठउर नाहीं मिल पावा। ऍह बरे उ ओका ओढ़ना मँ लपेटिके चरही मँ लोटाएस।

ईसू क जनम क खबर

⁸ तबहीं हुवाँ उ पहँटा मँ बाहेर खेत मँ कछू गड़रियन रहेन जउन राति क समइ आपन आपन झूंड क रखवारी करत रहेन। ⁹ उहइ समइया पर्भू क एक दूत परगट भवा अउर ओनकइ चारिहुँ कइँती पर्भू क तेज फूटइ लाग। उ सबइ सहमि गएन। ¹⁰ तबहीं सरगदूत ओनसे कहेस, “डेराअ जिन, मइँ सुसमाचार लइ आवा हउँ, जेसे सबइ मनइयन क महान आनंद होई। ¹¹ काहेकि आज दाऊद क सहर मँ तोहार उद्धारकर्ता मसीह पर्भू क जनम भ अहइ। ¹² तोहका ओका पहिचानइ क चीन्ह होइ कि तू एक ठु बचवा क ओढ़ना मँ लपेटा भवा, चरही मँ ओलरा पउब्या।”

¹³ उहइ समइया एकाएक उ सरगदूते क संग ढेरि क अउर सरगदूतन हुवाँ हाजिर भएन। उ पचे इ कहत भए परमेस्सर क गुन गावत रहेन:

¹⁵ अउर जब सरगदूतन ओनका तजिके सरग लौटि गएन तउ उ सबइ गड़रियन आपुस मँ कहइ लागेन, “आवा हम बैतलहम चली अउर जउन घटना भइ अहइ अउर जेकॉ पर्भू हमका बताएन ह, ओका देखी।”

¹⁶ तउ उ पचे जल्दी गएन अउर हुवाँ मरियम अउर यूसुफ क पाएन अउर निहारेन कि बचवा चरही मँ लोटा बा। ¹⁷ गड़रियन जब ओका निहारेन तउ इ बचवा क बारे मँ जउन संदेसा ओनका दीन्ह ग रहा, उ पचे ओनका सबइ क बताइ दिहन। ¹⁸ जउन कउनो भी ओनका सुनेन, उ पचे गड़रियन क कही बातन प अचरज करइ लागेन। ¹⁹ मुला मरियम इ सबइ बातन क आपन मनवा मँ राखि लिहेस अउर उ ओन प सोचइ बिचारइ लाग। ²⁰ अउर ओहर उ सबइ गड़रियन जउन कछू सुनेन अउर देखे रहेन, ओके बरे परमेस्सर स्तुति अउर धन्यवाद देत अपने घरन क लौटि गएन। इ सब अइसेन घटा जइसेन कि ओनका बतावा गवा रहा।

²¹ अउर जब बचवा क खतने क खातिर अठवाँ दिन आइ तउ ओकर नाउँ ईसू रखेन। ओका इ नाउँ ओकरे गरभ मँ आवइ स पहिले सरगदूत दइ दिहन।

ईसू क मन्दिर मँ लइ जाब

²² अउर जब मूसा क व्यवस्था क मुताबिक पइदा भए बचवा क सूतक क दिन पूरा होइ गवा अउर सुद्ध होइ क समइ आइ तउ उ पचे ईसू क पर्भू क अरपन करइ बरे यरूसलेम लइ गएन। ²³ पर्भू क लिखे भइ व्यवस्था क मुताबिक, “हर पहिलौटी क बेटवा पर्भू क बरे ‘बिसेस मान जाई।’”^{(A) 24} अउर पर्भू क व्यवस्था कहत ह, “एक जोड़ी कबूतर या पड़ुँकी क दुइ नवा बचवा क बलिदान देइ चाही।”^(B) तउ उ पचे पर्भू क व्यवस्था क मुताबिक बलि चढ़ावइ लइ गएन।

समौन क ईसू क दर्सन

²⁵ यरूसलेम मँ समौन नाउँ क एक धर्मी अउर भगत रहा। उ इस्राएल क सुख चइन क बाट जोहत रहा। पवित्तर आतिमा ओकरे साथ रही। ²⁶ पवित्तर आतिमा ओका परगट किए रही कि जब तलक उ पर्भू क मसीह क दर्सन नाहीं कइ लेइ, मरी नाहीं। ²⁷ उ पवित्तर आतिमा क साथ मन्दिर मँ आवा अउर जब व्यवस्था क मुताविक कारज बरे बालक ईसू क ओकर महतारी बाप मन्दिर मँ लइ आएन। ²⁸ तउ समौन ईसू क आपन गोदी मँ उठाइके परमेस्सर क स्तुति करत बोला:

³³ ओकर महतारी बाप ईसू क बारे मँ कही गइ इ बातन स अचरजे मँ पड़ि गएन। ³⁴ फिन समौन ओनका आसीर्बाद दिहस अउर ओकर महतारी मरियम स कहेस, “इ बचवा इस्राएल मँ बहोतन क गिरावइ या उठावइ क कारण बनइ अउर एक अइसा चीन्ह ठहरावा जाइ बरे तय कीन्ह ग अहइ जेकर खिलाफत कीन्ह जाइ। ³⁵ अउर मनइयन जेका गूढ़ समझिहीं, उ लोगन क पता लगि जाई जेहसे तोहरे हिरदय क दुख होइ।”

हन्नाह ईसू क देखत ह

³⁶ हुवँइ हन्नाह नाउँ क एक ठु महिला नबिया रही। उ असेर कबीले क फनूएल क बिटिया रही। उ बहोत बुढ़िया रही। आपन बियाहे क सिरिफ सात बरिस पाछे तलक उ आपन भतारे क साथे रही। ³⁷ अउर फिन चौरासी बरिस तलक उ विधवा रही। उ मन्दिर कबहुँ नाहीं तजेस। उपवास अउर पराथना करत भइ उ रात-दिन आराधना करत रही। ³⁸ उहइ समइ उ उहाँ महतारी बाप क लगे आइ। उ परमेस्सर क धन्यवाद दिहस अउर जउन मनइयन यरूसलेम क छुटकारा क बाट जोहत रहेन, उ ओन सबन्क छोड़ावइ क बारे मँ बताएस।

यूसुफ अउर मरियम क घर लौटब

³⁹ अउर जब उ पचे पर्भू क व्यवस्था क मुताबिक सब कछू पूरा कइ लिहेन तउ उ सबइ गलील मँ आपन सहर नासरत लौटि आएन। ⁴⁰ अउर उ बालक बाढ़इ लाग अउर हिट्ठ पुट्ठ होइ लाग। उ बहोत बुद्धिमान रहा अउर ओह प परमेस्सर क अनुग्रह रही।

बालक ईसू

⁴¹ फसह क त्यौहार प हर बरिस ओकर महतारी बाप यरूसलेम जात रहेन। ⁴² जब उ बारह बरिस क रहा तउ सदा क नाई उ पचे त्यौहार प गएन। ⁴³ जब त्यौहार खतम भवा अउर उ सबइ घरवा लौटत रहेन तउ बालक ईसू यरूसलेम मँ रुकि गवा मुला महतारी बाप क ऍकर जानकारी नाहीं होइ पाइ। ⁴⁴ इ बिचारत भए कि उ दले मँ कहूँ होई, उ सबइ दिन भर जात्रा करत रहेन। फिन उ सबइ ओका आपन नातेदारन अउर नजदीकी मीतन मँ हेरइ लागेन। ⁴⁵ अउर जब उ ओनका नाहीं मिल पावा तउ उ सबइ हेरत हेरत उ पचे यरूसलेम लौटि आएन।

⁴⁶ अउर फिन भवा ई कि तीन दिना बाद उ ओहका मन्दिर मँ पाएन। उ उपदेस देइ वालेन क साथ बइठ के ओनका सुनत रहा अउर ओनसे सवाल पूछत रहा। ⁴⁷ उ सबहिं जउन ओसे सुने रहेन, ओकर समझ बूझ अउर ओकरे सवाले क जवाब स अचरजे मँ पड़ि गएन। ⁴⁸ जब ओकर महतारी बाप ओका निहारेन तउ दंग रहि गएन। ओकर महतारी ओसे पूछेस, “बेटवा, तू हमरे साथ अइसा काहे किहा? तोहार बाप अउर मइँ तोहका हेरत बहोतइ फिकिर मँ रहेन।”

⁴⁹ तब ईसू ओनसे कहेस, “तू मोका काहे हेरत रह्या? का तू नाहीं जनत्या कि मोका मोरे बाप क घरे मँ होइ चाही?” ⁵⁰ मुला ईसू ओनका जउन जबाव दिहस, उ पचे ओकरे बचन क न समुझ सकेन।

⁵¹ फिन उ ओनके संग नासरत लौटि आवा अउर ओनकइ हुकुम क मानत रहा। ओकर महतारी इ सब बतियन क आपन मने मँ राखत जात रही। ⁵² ओह कइँती ईसू बुद्धि मँ, डील डौल मँ अउर परमेस्सर अउर मनइयन क पिरेम मँ बाढ़इ लाग।