◀ All Reading Plans / M’Cheyne Bible Reading Plan / Family: 2 Kings 19; Hebrews 1. Secret: Hosea 12; Psalms 135–136. (Awadhi Bible: Easy-to-Read Version)

Prev Day

November 6, 2024

Next Day

Use the calendar to view readings from this devotional.

November 2024
Su	Mo	Tu	We	Th	Fr	Sa
					1	2
3	4	5	6	7	8	9
10	11	12	13	14	15	16
17	18	19	20	21	22	23
24	25	26	27	28	29	30

Return to today's reading

M’Cheyne Bible Reading Plan

The classic M'Cheyne plan--read the Old Testament, New Testament, and Psalms or Gospels every day.

Duration: 365 days

2 राजा 19

हिजकिय्याह यसायाह नबी क लगे अपने अधिकारियन क पठवत ह

19 राजा हिजकिय्याह उ सबइ सुनेस अउर इ देखाँवइ बरे कि उ बहोत दुःखी अहइ अउर घबरावा भवा अहइ, अपने ओढ़नन क फार डाएस अउर मोटे ओढ़नन पहिर लिहेस। तब उ यहोवा क मन्दिर मँ गवा।

²हिजकिय्याह एल्याकीम (एल्याकीम राजमहल क अधीच्छक रहा।) सेब्ना (सास्त्री) अउर याजकन क अग्रजन क आमोस क पूत यसायाह नबी क लगे पठएस। उ पचे मोटे ओढ़नन पहिरेन जेहसे पता चलत रहा कि उ पचे परेसान अउर दुःखी अहइँ। ³उ पचे यसायाह स कहेन, “हिजकिय्याह इ कहत ह, ‘इ हमरे बरे संकट, दण्ड अउर अपमान क दिन अहइ। इ बच्चन क जनम देइ क समइ अहइ, मुला ओनका जनम देइ बरे कउनो सक्ती नाहीं अहइ। ⁴अस्सूर क राजा जिअत परमेस्सर क निन्दा करइ बरे आपन प्रमुख सेनापति क हमरे लगे पठएस ह। होइ सकत ह कि यहोवा तोहर परमेस्सर ओन सबहिं बातन क सुन लेइ। इ होइ सकत ह कि यहोवा इ प्रमाणित कइ देइ कि दुस्मन गलती पइ अहइ। एह बरे एन लोगन बरे पराथना करा जउन सबहिं तलक जिअत बचा अहइँ।’”

⁵राजा हिजकिय्याह क अधिकारी यसायाह क लगे गएन। ⁶यसायाह ओनसे कहेस, “अपने सुआमी हिजकिय्याह क इ सँदेसा द्या: ‘यहोवा कहत ह। ओन बातन स डेराअ नाहीं जेनका अस्सूर क राजा क “अधिकारियन” मोर मसखरी उड़ावत भए कहेन ह। ⁷मइँ हाली ही ओकरे मने मँ अइसी भावना पइदा करब जेहसे उ एक अफवाह सुनिके अपने देस वापिस जाइ क मजबूर होइ अउर मइँ ओका ओकरे देस मँ एक ठु तरवार क घाट उतरवाइ देब।’”

हिजकिय्याह क अस्सूर क राजा क फुन चितउनी

⁸प्रमुख सेनापित सुनेस कि अस्सूर क राजा लाकीस स चल पड़ा अहइ। एह बरे उ गवा अउर इ पाएस कि ओकर सम्राट लिब्ना क खिलाफ जुद्ध करत बाटइ। ⁹अस्सूर क राजा एक ठु अफवाह कूस क राजा तिर्हाका क बारे मँ सुनेस। अफवाह इ रही “तिर्हाका तोहरे खिलाफ लड़इ आवा ह।”

एह बरे अस्सूर क राजा हिजकिय्याह क लगे सँदेसवाहक क एक संदेसा क संग पठएस। ¹⁰“यहूदा क राजा हिजकिय्याह स इ कहा:

‘जउने परमेस्सर मँ तू पतियात अहा ओका तू अपने क गुमराह करइ जिन द्या। उ कहत ह, “अस्सूर क राजा यरूसलेम क पराजित नाहीं करी।” ¹¹तू ओन बातन क सुन्या ह जउन अस्सूर क राजा लोग दूसर सबहिं देसन क संग घटित किहन ह। हम ओनका पूरी तहर स नस्ट कीन्ह। तू भी नाहीं बचि पउब्या। ¹²ओन रास्ट्रन क देवता अपने लोगन क रच्छा नाहीं कइ सकेन। मोर पुरखन गोजान, हारान, रेसेप अउ तलस्सार मँ एदेन क लोगन क नस्ट किहन। ¹³हमात अर्पाद, अउर सपवैम नगर क राजा कहाँ अहइँ? हेना अउ इला क राजा? उ पचे सबहिं समाप्त होइ गएन ह।’”

हिजकिय्याह यहोवा स पराथना करत ह

¹⁴हिजकिय्याह संदेसबाहकन स पत्र पाप्त किहेस अउ ओनका बाँचेस। तब हिजकिय्याह यहोवा क मन्दिर तलक गवा अउर यहोवा क समन्वा पत्रन क बिखरेस। ¹⁵हिजकिय्याह यहोवा क समन्वा पराथना किहेस अउर कहेस, “यहोवा इस्राएल क परमेस्सर। तू करूब सरगदूतन पइ सम्राट क तरह बइठत ह। तू ही सिरिफ सारी पृथ्वी क राज्जन क परमेस्सर अहा। तू पृथ्वी अउ अकासे क बनाया। ¹⁶यहोवा मोर पराथना सुना। यहोवा अपनी आँखिन खोला अउ इ पत्र क लखा। ओन सब्दन क सुना जेनका सन्हेरीब जीवित परमेस्सर क अपमान करइ बरे पठएस ह। ¹⁷यहोवा, इ फुरइ अहइ। अस्सूर क राजा लोग एन सबहिं रास्ट्रन क नस्ट किहन। ¹⁸उ पचे रास्ट्रन क देवतन क आगी मँ लोकाइ दिहन। किन्तु उ पचे सच्चे देवता नाहीं रहेन। उ पचे सिरिफ काठ अउ पाथर क मूरति रहेन जेनका मनइयन बनाइ रखे रहेन। इहइ कारण रहा कि अस्सूर क राजा ओनका नस्ट कइ सकेन। ¹⁹एह बरे यहोवा, हमार परमेस्सर, अब हमका अस्सूर क राजा स बचा। तब पृथ्वी क सारे राज्ज समुझिहीं कि यहोवा, सिरिफ तू ही परमेस्सर अहा।”

परमेस्सर हिजकिय्याह क जवाब दिहस

²⁰आमोस क पूत यसायाह हिजकिय्याह क इ सँदेस पठएस। उ कहेस, “यहोवा, इस्राएल क परमेस्सर इ कहत ह, ‘तू मोहसे अस्सूर क राजा सन्हेरीब क खिलाफ पराथना किहा ह। मइँ तोहार पराथना सुनि लिहेउँ ह।’

²¹“सन्हेरीब क बारे मँ यहोवा क इ सँदेसा अइसा अहइ:

‘सिय्योन क कुँबरी बिटिया तोहका तुच्छ समुझत ह,
    उ तोहार मजाक उड़ावत ह।
यरूसलेम बिटिया तोहरे पीठ क पाछे
    तोहार मज़ाक उड़ावत ह।
²²तू केकर अपमान किह्या? तू केकर मजाक उड़ाया?
    केकरे खिलाफ तू बातन किह्या?
तू अइसे बातन किहा जइसा कि
    तू इस्राएल क परम पवित्तर स महान अहइ।
²³तू अपने सँदेसवाहकन क यहोवा क अपमान करइ क पठया।
    तू कहया, “मइँ अपने अनेक रथन सहित ऊँचे पर्वतन तलक आया।
    मइँ लबानोन मँ भीतर तलक आएउँ।
मइँ लबानोन क उच्चतम देवदारू क बृच्छन, अउ लबानोन क उत्तिम चीड़ क बृच्छन क काटा।
    मइँ लबानोन क सब स ऊँच अउर सब स घने बने मँ घुसेउँ।
²⁴मइँ खुद कुअँन खोदेस अउ विदेसन क पानी पिएउँ।
    मइँ मिस्र क नदियन क झुराएउँ
    अउर उ देस क रउँदेउँ।”

²⁵मुला का तू नाहीं अनक्या?
    मइँ (परमेस्सर) बहोत पहिले इ जोजना बनाए रहेउँ,
पुराने जमाने स ही इ सबइ जोजनन बनाइ दिहे रहेउँ,
    अउर अब मइँ ओका ही पूरी होइ देत हउँ।
मइँ तू पचन्क मजबूत नगरन क
    ढेर बनावइ दिहेउँ।
²⁶नगर मँ रहइवाले मनई कउनो ताकत नाहीं रखतेन।
    उ सबइ लोग डरे भए अउर सरमिन्दा रहेन।
लोग खेतन क जंगली पौधन क तरह होइ गएन,
    जउन बढ़इ क पहिले ही मर जात हीं,
इ लोग उ घास क तरह अहइ जउन छत पइ उगत ह
    अउर जे बढ़इ स पहिले ही मुड़झा जात ह।
²⁷मइँ जानत हउँ तू कब उठत ह
अउर तू कब बइठत ह।
    बइठा, मइँ जानत हउँ कि
    तू कब जुद्ध करइ जात अहा अउर कब घरे आवत अहा,
मइँ जानन हउँ कि तू अपने क कब मोरे खिलाफ करत अहा।
²⁸तू मोरे खिलाफ गया
    मइँ तोहरे घमण्ड क सब्द सुनेउँ।
एह बरे मइँ आपन अंकुस तोहरे नाके मँ डाउब।
    अउर मइँ आपन लगाम तोहरे मुँहे मँ डाउब।
तब मइँ तोहका पाछे लउटाउब
    अउर उ राहे लउटाउब जेहसे तू आवा रह्या।’”

हिजकिय्याह क यहोवा क सँदेसा

²⁹“मइँ तोहार मदद करब, एकर सँदेसा इ होइ: इ बरिस तू उहइ अन्न खाब्या जउन अपने आप उगी अउर अगले बरिस तू उहइ अन्न खाब्या जउन उ बिआ स पइदा होइ। मुला तू बिआ बोउब्या अउर तीसरे बरिस मँ आपन फसल कटब्या। तू अंगूरे क बेलन खेतन मँ लगउब्या अउर ओनसे अंगूर खाब्या। ³⁰अउर यहूदा क परिवारे क जउन लोग बचि गवा अहइँ उ पचे फुन फूली फरिहीं ठीक वइसे ही जइसे पौधा अपनी जड़न मजबूत कइ लेइ पइ ही फरत ह ³¹काहेकि यरूसलेम मँ रहइवालन कछू लोग जिअत रहब्या। सिय्योन पर्वत पइ रहइवालन मँ स कछू लोग बच जाइँ। यहोवा क जोस इ सब करावाएब।”

³²“अस्सूर क सम्राट क बारे मँ यहोवा अइसा कहत ह:

‘उ इ नगर मँ नाहीं आई।
    उ इ नगर मँ एक ठु भी बाण नाहीं चलाइ।
उ इ नगर क खिलाफ ढाल क संग नाहीं आइ।
    उ इ नगर पइ आक्रमण क माटी क टीलन नाहीं बनाइ।
³³उ उहइ राहे स लउटी जेहसे उ आवा।
    उ इ नगर मँ नाहीं आई।
    इ यहोवा कहत ह।
³⁴मइँ अपने बरे अउर अपने सेवक दाऊद बरे
    इ नगर क रच्छा करब अउर बचाइ लेब।’”

अस्सूरी फउज बर्बाद होइ गइ

³⁵उ राति यहोवा क दूत अस्सूरी डेरा मँ गवा अउर एक लाख पचासी हजार लोगन क मार डाएस। भिन्सारे क जब लोग उठेन तउ उ पचे सारी ल्हासन लखेन।

³⁶एह बरे अस्सूर क राजा सन्हेरीब चला गवा अउर नीनवे वापस पहोंचा, अउर हुवइँ रुक गवा। ³⁷एक दिना सन्हेरीब मन्दिर मँ अपने देवता निसरोक क पूजा करत रहा। ओकरे पूतन अद्रेम्मेलेक अउर सरेसेर ओका तरवार स मार डाएन। तब उ पचे अरारात प्रदेस मँ पराइ निकरेन अउर सन्हेरीब क पूत एसर्हद्दोन ओकरे पाछे नवा राजा भवा।

इब्रनियन 1

परमेस्सर अपने पूत क माध्यम स बोलत ह

1 परमेस्सर त अतीत मँ नबियन क जरिये कइयउ अवसरन प कउनउ तरह स हमरे पूर्वजन स बातचीत किहेस। ²मुला इन आखिरी दिने मँ उ हमसे अपने पूत क जरिये बातचीत किहेस, जेका ओ सब कछू क उत्तराधिकारी नियुक्त किहेस अउर जेकरे द्वारा उ समूचे ब्रह्माण्ड क रचना किहेस। ³उ पूत परमेस्सर क महिमा क प्रभा-मण्डल अहइ अउर ओकरे प्रकृति क प्रतिलिपि अहइ। उ अपने समर्थ बचन क द्वारा सब चीजन क स्थिति बनाए रखत ह। सबके पापन क धोअइ क उ सरगे मँ ओह महामहिम क दहिने हाथे बइठि गवा। ⁴एह तरह उ सरगदूतन स एतना ही महान बनि गवा जेतॅना कि ओनके उ किहेन। उ सबइ नाउँ स उत्तिम नाउँ बाटइ जउन उ उत्तराधिकार मँ पाए अहइ।

⁵काहेकि परमेस्सर तउ कउनो सरगदूतन स कभी अइसेन नाहीं कहेसः

“पूत तू मोर,
आजू तोहार बनि गवा हउँ मइँ पिता।” ^(A)

अउर न ही कउनो सरगदूत स उ इ कहेस ह,

“पिता ओकर मइँ बनबइ,
अउर होइ पूत उ मोर।” ^(B)

⁶अउर फिन उ जब आपन पहिलौट क लड़का अउर महत्वपूर्ण क संसार मँ लावत ह तउ कहत ह,

“परमेस्सर क सरगदूतन सब ओकर नमन करइँ।”^[a]

⁷सरगदूतन क बारे मँ बतावत उ कहत ह,

“सरगदूतन उ अपने सब पवन बनावइ
अउर बनावइ आपन सेवक लपट आगी क।” ^(C)

⁸मुला अपने पूत क बारे मँ उ कहत हः

“हे परमेस्सर, सास्वत तोहर सिंहासन बा,
    तोहार राजदण्ड बाटइ नेकी;
⁹नेकी ही तोहका पिआरी बा, तोहका घृणा रही पापन स
    तउन परमेस्सर, तोहर परमेस्सर तउ चुना बा तोहका अउर ओह महान आनन्द दिहेस।
    तोहका कहूउँ जियादा तोहरे साथियन स।” ^(D)

¹⁰उ इहउ कहत ह,

“हे पर्भू सृस्टि क जब होत रहा जन्म मँ तुमने सरग तथा धरती क नींव राख्या
    यह तोहरे हाथ का ही कारज अहइँ।
¹¹अउर इ सब नस्ट होइ जइहीं
    मुला रहेगा तू चिरन्तर पुरान कपड़ा स फटि जइहीं इ सबइ
¹²अउर तू परिधान जइसेन ओनका लपेटब्या
    बदल उ जइहीं फिन कपड़ा जइसेन।
मुला तू तउ अहसेन, जैसा की चाह्या रहब्या
    तोहरे समइ का कबहुँ न अन्त होई।” ^(E)

¹³परमेस्सर त कबहूँ कउनो सरगदूत स अइसेन नाहीं कहेसः

“बइठा जा तू दहिने मोरे कि
ब जब तलक मइँ न तोहरे दस्मनन क चरन क चौकी बनाइ देउँ चरन तल तोहरे।” ^(F)

¹⁴का सबहिं सरगदूत उद्धार पावइवालन क सेवा क बरे पठई गईन सहायक आतिमा नाहीं अहइँ।

होसे 12

यहोवा इस्राएल क खिलाफ रहा

12 एप्रैम हवा पकड़इ क जतन करत ह। उ पचे सारे दिन पूर्वी हवा क पाछा करत रहत ह। सारा रास्ट्र बेईमानी अउर हिंसा मँ व्यस्थ अहइ, उ पचे अस्सूर क संग संधि किहेन। उहइ समइ नज़राना क रूप मँ मिस्र क तेल भेजत ह।

²यहोवा कहत ह, “इस्राएल क खिलाफत मँ मोर एक अभियोग अहइ। याकूब जउन करम किहेन ह, ओका ओनके बरे सजा दीन्ह जाइ चाही। आपन किए भए कुकरमन बरे ओका निहचइ ही सजा दीन्ह जाइ चाही। ³अबहीं याकूब आपन माता क गरभ मँ ही रहा कि उ आपन भाई क संग चालबाजी करब सुरू कइ दिहस। याकूब एक ठु सक्तीवाला युवक रहा अउर उ समइ उ परमेस्सर क संग कुस्ती लड़े रहा। ⁴याकूब परमेस्सर क सरगदूत स कुस्ती लड़ेस अउ ओका जीत लिहस। उ गोहराएस अउर कृपा करइ बरे बिनती किहस। इ बेतेल मँ भवा रहा। उ जगह पइ उ ओहसे बातचीत किहे रहा। ⁵हाँ, यहोवा फउजन क परमेस्सर अहइ। ओकर नाउँ यहोवा अहइ। ⁶तउ आपन परमेस्सर कइँती लउटि आवा। ओकरे बरे वफ़ादार रहा। निआव अउर दयालुता कायम रखा। हमेसा आसावादी रहा कि परमेस्सर आपन वाचा क पूरा करब्या।

⁷“याकूब अइसा व्यापारी क तरह अहइ जउन लोगन स छल करइ बरे गलत तराजू क उपयोग करत ह। ⁸एप्रैम कहेस, ‘मइँ धनवान हउँ। मइँ सच्ची सम्पत्ति पाइ लिहे अहउँ। मोरे अपराधन क कउनो मनई क पता ही नाहीं चली। मोरे पापन क कउनो मनई जान ही नाहीं पाई।’

⁹“मुला मइँ तउ तबहिं स तोहार परमेस्सर यहोवा हउँ जब तू मिस्र क धरती स आवा रहा, जब मइँ तोहका रेगिस्तान मँ तम्बुअन मँ राखे रहा, ठीक वइसा ही जइसा कि पनाह क त्यौहार क समइ मँ रहा करत रहेन। ¹⁰मइँ नबियन स बात किहेउँ। मइँ ओनका अनेक दर्सन दिहेउँ। मइँ नबियन क तू पचन्क आपन पाठ पढ़ावइ क बहोत स तरिका दिहेउँ। ¹¹मुला गिलाद मँ अबहुँ भी पाप अहइ। हुआँ बियर्थ देवतन अहइँ। गिलगाल मँ लोग बर्धन क बलियन क अर्पण करत हीं। हुवाँ बहुत स वेदियन मँ जोते भए खेते क कतारन क नाईं अहइँ।

¹²“याकूब आराम क भुइँया कइँती भाग गवा। उ पचे दास क नाईं काम किहेन जे आपन दुई ठू पत्नियन पावइ खातिर भेड़िन क निगरानी किहेस। ¹³तब यहोवा एक ठु नबी क जरिये इस्राएल क मिस्र स बाहेर लाएस, अउर पाछे दूसर नबी दुआरा इस्राएल क सुरच्छा किहेस। ¹⁴मुला एप्रैम यहोवा क बहोत जियादा गुस्साइ दिहस, एह बरे परमेस्सर यहोवा एका आपन अपराधन बरे भुगतवाएस। ओकर सुआमी (परमेस्सर) ओहसे ओकर लज्जा बरदास्त करइ देइ।”

भजन संहिता 135-136

¹यहोवा क बड़कई करा।
हे यहोवा क सेवको,
    यहोवा क नाउँ क बड़कई करा।
²तू लोग मन्दिर मँ खड़ा अहा।
    यहोवा क नाउँ क बड़कई करा।
तू लोग मन्दिर क आँगन मँ खड़ा ह्वा।
    ओकरे नाउँ क बड़कई करा।
³यहोवा क बड़कई करा काहेकि उ खरा अहइ।
    ओकरे नाउँ क गुण गावा काहेकि उ आन्नदायक अहइ।

⁴यहोवा याकूब क चुने रहा।
    इस्राएल परमेस्सर क अहइ।
⁵मइँ जानत हउँ, यहोवा महान अहइ।
    हमार सुआमी दूसर देवन स महान अहइ।
⁶यहोवा जउन कछू चाहत ह सरग मँ, अउर धरती पइ,
    समुद्दर मँ या गहिर महासागरन मँ, करत ह।
⁷यहोवा धरती पइ सब कहूँ बादरन क रचत ह।
    उ बिजुरी अउ बर्खा क रचत ह।
    उ हवा क ओकर जगह स निकारत ह।
⁸परमेस्सर मिस्र मँ मनइयन अउ गोरुअन क सबहिं पहिलउटी बच्चन क नास कइ दिहस।
⁹यहोवा मिस्र मँ बहोत स अद्भुत अउर अचरज भरे कामन किहस।
    उ फिरौन अउ ओकरे सब अधिकारियन क खिलाफ अद्भुत बातन क दिखाएस।
¹⁰परमेस्सर बहोत स देसन क हराएस।
    परमेस्सर बलवान राजा लोगन क मारेस।
¹¹यहोवा एमोरियन क राजा सीहोन क हराइ दिहस।
    उ बासान क राजा ओग क हराएस।
    उ कनान क सारी राज्जन क हराएस।
¹²यहोवा ओनका ओनकर धरती क अधिकार क रूप मँ दिहेस, उ इस्राएल क स्थाई रूप स लेइ बरे दिहेस।

¹³हे यहोवा, तू सदा बरे प्रसिद्ध होब्या।
    हे यहोवा, लोग तोहका सदा सर्वदा याद करत रइहीं।
¹⁴काहेकि यहोवा आपन लोगन बरे निआव लावत ह
    अउर उ आपन सेवकन प तरस खात ह।
¹⁵दूसर रास्ट्रन क लोग बस सोना अउर चाँदी क देवता बनावत रहेन।
    ओनकर देवता मात्र लोगन क जरिये बनाए भए पुतलन रहेन।
¹⁶पुतलन क मुँइ अहइँ, पर बोल नाहीं सकतेन।
    पुतलन क आँखी अहइँ, पर लखि नाहीं सकतेन।
¹⁷पुतलन क कान अहइँ, पर ओनका सुनाई नाहीं देत।
    पुतलन क नाक अहइँ, पर उ पचे साँस नाहीं लेइ सकतेन।
¹⁸उ सबइ लोग जउन ऍन पुतलन क बनाएन, ओन पुतलन क समान होइ जइहीं।
    काहेकि उ सबइ लोग ओन पइ बिस्सास किहेन ह।

¹⁹इस्राएल क संतानन, यहोवा क बड़कई करा।
    हारून क संतानन, यहोवा क बड़कई करा।
²⁰हे लेवी क संतानन, यहोवा क बड़कई करा।
    तू जउन यहोवा क सम्मान दिहा, यहोवा क बड़कई करा।
²¹यहोवा यरूसलेम मँ बास करत ह,
    सिय्योन स ओकर स्तुति होइ।

¹यहोवा क बड़कई करा, काहेकि उ उत्तिम अहइ।
    ओकर बिस्ससनीय पिरेम सदा ही बना रहत ह।
²देवतन क परमेस्सर क बड़कई करा।
    ओकर बिस्ससनीय पिरेम सदा बना रहत ह।
³पर्भुअन क पर्भू क बड़कई करा।
    ओकर बिस्ससनीय पिरेम सदा बना रहत ह।
⁴परमेस्सर क गुण गावा।
    बस उहइ एक अहइ, जउन बहोत अद्भुत करम करत ह।
    ओकर बिस्ससनीय पिरेम सदा बना रहत ह।
⁵ओकर बड़कई करा, जउन आपन बुद्धि स आकास क रचेस ह।
    ओकर बिस्ससनीय पिरेम सदा बना रहत ह।
⁶परमेस्सर सागर क बीच मँ झुरान धरती क कायम किहस।
    ओकर बिस्ससनीय पिरेम सदा बना रहत ह।
⁷परमेस्सर महान ज्योतियन क रचेस।
    ओकर बिस्ससनीय पिरेम सदा बना रहत ह।
⁸परमेस्सर सूरज क दिन पइ हुकूमत करइ बरे बनाएस।
    ओकर बिस्ससनीय पिरेम सदा बना रहत ह।
⁹परमेस्सर चाँद तारन क बनाएस कि उ पचे रात पइ हुकूमत करइँ।
    ओकर बिस्ससनीय पिरेम सदा बना रहत ह।
¹⁰उ मिस्र मँ पहिलउठी मनइयन अउर जनावरन क मारेस।
    ओकर बिस्ससनीय पिरेम सदा बना रहत ह।
¹¹परमेस्सर इस्राएल क मिस्र स बाहेर लइ आवा।
    ओकर बिस्ससनीय पिरेम सदा बना रहत ह।
¹²परमेस्सर आपन सामरथ अउ आपन महासक्ती क परगट किहेस।
    ओकर बिस्ससनीय पिरेम सदा ही बना रहत ह।
¹³परमेस्सर लाल सागर क दुइ हींसा मँ फाड़ेस।
    ओकर बिस्ससनीय पिरेम सदा ही बना रहत ह।
¹⁴परमेस्सर इस्राएल क सागर क बीच स पार उतारेस।
    ओकर बिस्ससनीय पिरेम सदा ही बना रहत ह।
¹⁵परमेस्सर फिरौन अउ ओकर फउज क लाल सागर मँ बोरि दिहस।
    ओकर बिस्ससनीय पिरेम सदा ही बना रहत ह।
¹⁶परमेस्सर आपन निज भगतन क रेगिस्तान मँ राह देखाँएस।
    ओकरे बिस्ससनीय पिरेम सदा ही बना रहत ह।
¹⁷परमेस्सर बलवान राजा क हराएस।
    ओकर बिस्ससनीय पिरेम सदा ही बना रहत ह।
¹⁸उ सदृढ़ राजा लोगन क मारेस।
    ओकर बिस्ससनीय पिरेम सदा ही बना रहत ह।
¹⁹परमेस्सर एमोरियन क राजा सीहोन क मारेस।
    ओकर बिस्ससनीय पिरेम सदा ही बना रहत ह।
²⁰परमेस्सर बासान क राजा ओग क मारेस।
    ओकर बिस्ससनीय पिरेम सदा ही बना रहत ह।
²¹उ आपन भुइँया क मीरास क रूप मँ दइ दिहस।
    ओकर बिस्ससनीय पिरेम सदा ही बना रहत ह।
²²उ उ भुइँया क आपन सेवक इस्राएल क अधिकार क रूप मँ दिहस।
    ओकर बिस्ससनीय पिरेम सदा ही बना रहत ह।
²³उ हमका याद राखेस, जब हम लोगन क हरा दीन्ह गवा रहेन।
    ओकर बिस्ससनीय पिरेम सदा ही बना रहत ह।
²⁴उ हमका हमरे दुस्मनन स मुक्त किहेस।
    ओकर बिस्ससनीय पिरेम सदा ही बना रहत ह।
²⁵परमेस्सर हर एक क खइया क देत ह।
    ओकर बिस्ससनीय पिरेम सदा ही बना रहत ह।
²⁶सरग क परमेस्सर क गुण गावा।
    ओकर बिस्ससनीय पिरेम सदा ही बना रहत ह।

Awadhi Bible: Easy-to-Read Version (ERV-AWA)

Prev Day

Top

Next Day

Use the calendar to view readings from this devotional.

M’Cheyne Bible Reading Plan

हिजकिय्याह यसायाह नबी क लगे अपने अधिकारियन क पठवत ह

हिजकिय्याह क अस्सूर क राजा क फुन चितउनी

हिजकिय्याह यहोवा स पराथना करत ह

परमेस्सर हिजकिय्याह क जवाब दिहस

हिजकिय्याह क यहोवा क सँदेसा

अस्सूरी फउज बर्बाद होइ गइ

परमेस्सर अपने पूत क माध्यम स बोलत ह

Footnotes

Cross references

यहोवा इस्राएल क खिलाफ रहा

Use the calendar to view readings from this devotional.

Log in to read this devotional and:

M’Cheyne Bible Reading Plan

हिजकिय्याह यसायाह नबी क लगे अपने अधिकारियन क पठवत ह

हिजकिय्याह क अस्सूर क राजा क फुन चितउनी

हिजकिय्याह यहोवा स पराथना करत ह

परमेस्सर हिजकिय्याह क जवाब दिहस

हिजकिय्याह क यहोवा क सँदेसा

अस्सूरी फउज बर्बाद होइ गइ

परमेस्सर अपने पूत क माध्यम स बोलत ह

Footnotes

Cross references

यहोवा इस्राएल क खिलाफ रहा