M’Cheyne Bible Reading Plan

दाऊद मोरे संग नाहीं आइ सकत

29 पलिस्तियन आपन सब सिपाहियन क आपुस मँ बटोरेन। इस्राएलियन सोता क पास यिज्रेल मँ डेरा डाएन। ² पलिस्ती अफसर लोगन आपन एक सौ अउर एक हजार फउज क टुकड़ी क संग आगे बढ़त रहेन। दाऊद अउ ओकर मनई आकीस क संग फउज क पाछे पाछे कदम बढ़ावत चलत रहेन।

³ पलिस्ती अफसरन पूछेस, “इ सबइ हिब्रू हिआँ का करत अहइँ।”

आकीस पलिस्ती अफसरन स कहेस, “इ दाऊद अहइ। दाऊद साऊल क अफसरन मँ स एक रहा। दाऊद मोरे लगे बहोत टेमॅ स बाटइ। मइँ दाऊद मँ कउनो दोख तब स नाहीं लखेउँ जब ते इ साऊल क तजेस अउ मोरे लगे आवा।”

⁴ मुला पलिस्ती अफसर लोग आकीस पइ कोहाइ गएन। उ पचे कहेन, “दाऊद क वापस पठवा। दाऊद क उ सहर मँ वापस जाइ चाही जेका तू ओका दिहा ह। उ हम पचन क संग जुद्ध मँ नाहीं जाइ सकत्या। जदि उ हिआँ बाटइ तउ हम पचे आपन डेरा मँ एक दुस्मन क धरे अही। उ हमार आपन मनइयन क मारिके आपन राजा साऊल क खुस करी। ⁵ दाऊद उहइ मनई अहइ जेकरे बरे इ गाना मँ इस्राएली मनई गावत अउ नाचत हीं:

⁶ ऍह बरे, आकीस दाऊद क बोलाएस। उ कहेस, “यहोवा सास्वत अहइ, तू हमार भगत अहा। मइँ खुस होत जदि तू हमरी फउज मँ सेवा करत्या। जउने दिना स तू मोरे लगे आया ह, मइँ तोहमाँ कउनो दोख नाहीं पाएउँ ह। मुला पलिस्ती अफसर लोगन तोहार बरे नीक नाहीं सोचत। ⁷ अब तू सान्तिपूर्वक जा। पलिस्ती अफसर लोगन क खिलाफ कछू न करा।”

⁸ दाऊद कहेस, “मइँ का गल्ती किहेउँ ह? जब ते मइँ तोहरे लगे आवा हउँ तू मोरे भीतर कउन तब स आजु तलक कउन बुराई लख्या ह। मोरे पर्भू, राजा क दुस्मनन क खिलाफ तू मोका काहे नाहीं लड़इ देत्या?”

⁹ आकीस उत्तर दिहस, “मइँ जानत हँउ कि मइँ तोहका पसन्द करत हँउ। तू परमेस्सर क हिआँ सरगदूत क समान अहा। मुला पलिस्ती अफसर अबहुँ कहत हीं, ‘दाऊद हम पचन क संग जुद्ध मँ नाहीं जाइ सकत।’ ¹⁰ तड़के भिन्सारे तू अउर तोहार लोग वापिस जइहीं। उ सहर क लउटि जा जेका मँइ तोहका दिहेउँ ह। ओन अफसर लोग पइ धियान जिन द्या जउन तोहरे बरे बुरी बात कहत हीं। ऍह बरे जइसे ही सूरज निकरइ चल द्या।”

¹¹ ऍह बरे दाऊद अउ ओकर लोग तड़के भिन्सार होत उठेन। उ पचे पलिस्तियन क देस मँ लौटि गएन। अउ पलिस्ती यिज्रेल क गएन।

अमालेकी सिकलग पइ हमला करत हीं

30 तिसरे दिना दाऊद अउ ओकर मनई सिकलग पहुँचि आएन। उ पचे लखेन कि अमालेकी सिकलग प हमला करत बाटइ। अमालेकी नेगव पहँटा प हमला किहे रहेन। उ पचे सिकलग प हमला किहन अउ सहर क बारि दिहन। ² उ पचे सिकलग क मेहररुअन क बन्दी बनाइके लइ गएन। उ सबइ जवान अउ बूढ़न सबहिं क लइ गएन। उ पचे कउनो मनइयन क मारेन नाहीं। उ पचे सिरिफ ओनकइ लइके चलि दिहन।

³ दाऊद अउ ओकर मनई सिकलग आएन। अउर उ पचे नगर क बरत पाएन। ओनकई मेहरारुअन, पूतन अउ बिटियन क बन्दी बना लेइ गवा रहा अमालेकी लोग ओनका लइ गएन। ⁴ दाऊद अउ ओकरी फउज क दूसर लोग तब तलक रोवत रहेन जब तलक उ सबइ थक जाइके कारण रोवइ क लायक नाहीं रहि पाएन। ⁵ अमालेकी दाऊद क दुइ मेहरारू यिज्रेल क अहीनोअम अउ कर्मेल क नाबाल क रँड़ अबीगैल क लइ गएन।

⁶ फउज क सब लोग दुःखी अउ गुस्सान रहेन काहेकि ओनकइ बेटवा-बिटिया कइदी बनइ लीन्ह ग रहिन। उ पचे दाऊद क पाथर स मारि डावइ क सलाह करत रहेन। ऍहसे दाऊद बहोतइ घबराइ गवा। मुला दाऊद आपन यहोवा परमेस्सर मँ सक्ती पाएस। ⁷ दाऊद याजक एब्यातार स कहेस, “एपोद लइ आवा।” ऍह बरे एब्यातार दाऊद बरे एपोद लइ आएस।

⁸ तब दाऊद यहोवा स पराथना किहस, “का मोका उ मनइयन क पाछा करइ चाही जउन हमरे परिवारे क उठाइ लइ ग बाटेन? का मइँ धइ लेइ?”

यहोवा जवाब दिहस, “ओनकइ पाछा करा। तू ओनका धइ लेब्या। तू आपन परिवार क बचाइ लेब्या।”

दाऊद अउ ओकर मनई मिस्री दास क धरत हीं

^9-10 दाऊद आपन छ: सौ मनइयन क संग लिहस अउ उ बसोर क घाटी मँ गवा। ओहमाँ स कछू लोग उहइ ठउर प ठहर गएन। लगभग दुई सौ मनई ठहर गएन काहेकी उ पचे बहोत जिआदा थक ग रहेन अउ दुर्बल होइ जाइ स नाहीं चल सकत रहेन। ऍह बरे दाऊद अउ चार सौ मनइयन अमालेकियन क पाछा किहन।

¹¹ दाऊद क मनइयन एक ठु मिस्री क खेत मँ लखेन। उ पचे मिस्री क दाऊद क लगे लइ गएन। उ पचे पिअइ क तनिक पानी अउ खाइ बरे भोजन दिहन। ¹² उ पचे मिस्री क अंजीर क टिकिया अउ झुरान अंगूरे क दुइ गुच्छन दिहन। खइया क खाए क पाछे उ चंगा भवा। उ तीन दिन अउ तीन राति स न कछू खाए रहा अउ न ही पानी पिए रहा।

¹³ दाऊद मिस्री स पूछेस, “तोहार सुआमी कउन अहइ? तू कहाँ आवा ह?”

मिस्री जवाब दिहस, “मइँ मिस्री अहउँ। मइँ एक ठु अमालेकी क दास अहउँ। तीन दिना पहिले मइँ बेराम पड़ि गवा रहेउँ अउ मोर सुआमी मोका तजि दिहस। ¹⁴ हम पचे नेगव प धावा बोलि दीन्ह जहाँ करथीत रहत हीं। हम पचे यहूदा पहँटा प धावा बोलेन अउ नेगव पहँटा प जहाँ कालेब लोग रहत हीं। हम पचे सिकलग क भी बार दीन्ह।”

¹⁵ दाऊद मिस्री स पूछेस, “का तू उ मनइयन क लगे मोका पहुँचउब्या जउन हमरे परिवारे क लइ गवा अहइँ?”

मिस्री जवाब दिहस, “तू परमेस्सर क समन्वा प्रण करा कि तू मोका न मरब्या न ही मोका मोर सुआमी क हाथ मँ देब्या! जदि तू अइसा करब्या तउ मइँ ओका धरवावइ मँ तोहार मदद करब।”

दाऊद अमालेकी क हरावत ह

¹⁶ मिस्री अमालेकियन क दाऊद क हिआँ पहोंचाएस। उ पचे चारिहुँ कइँती जमीन प मधु पीतेन अउ खइया क खात ओलरा रहतेन। उ पचे पलिस्ती अउ यहूदा क पहँटा स बहोत सी चीज जउन लइ आए रहेन, उहइ स जलसा मनावत रहेन। ¹⁷ दाऊद ओनका हराएस अउ ओनका मारि डाएस। उ पचे सूरज निकरइ स अगवा दिन तक जूझेन। अमालेकियन मँ स चार सौ जवानन क अलावा जउन ऊँटे प चढ़िके परानेन कउनो नाहीं बच पावा।

¹⁸ दाऊद क आपन दुइनउँ मेहरारु फुन मिल गइन। दाऊद उ सबहिं चीजन क पाएस जेनका अमालेकी लइ ग रहेन। ¹⁹ कउनो चीज खोइ नाहीं। उ पचे सब गदेलन अउ बुढ़वन क पाइ लिहन। उ पचे आपन सब पूत अउ बिटियन क पाएन। ओनका आपन कीमती चीज मिल गइ। उ पचे आपन हर एक चीज वापस पाएन जउन अमालेकी लइ ग रहेन। दाऊद हर चीज क फुन लौटाइ लिआइ। ²⁰ दाऊद हर भेड़ी अउ गोरु क लइ लिहस। दाऊद क मनइयन इ पसून क अगवा चलाएन। दाऊद क मनइयन कहेन, “इ सब दाऊद क ईनाम अहइँ।”

सब मनइयन क हींसा बराबर होइ

²¹ दाऊद हुवाँ आवा जहाँ दुई सौ मनई बेसोर क घाटी मँ ठहरा रहेन। उ उहइ मनई रहेन जउन बहोतइ थका अउ कमजोर रहेन। ऍह बरे दाऊद क संग नाहीं जाइ सकत रहेन। उ मनइयन दाऊद अउ उ सिपाहियन क सुआगत करइ बाहेर आएन जउन ओकरे संग गवा रहेन। बेसोर क घाटी मँ ठहरे भए मनइयन दाऊद अउ ओकरी फउज क बधाई दिहन जइसे ही उ निअरे आएन। ²² मुला जउन टुकड़ी दाऊद क संग गइ ओहमाँ कछू बुरा अउ परेसानी पइदा करइवाला मनई रहेन। उ परेसानी पइदा करइवालन कहेन, “इ दुई सौ मनई हम पचन क संग नाहीं गएन। ऍह बरे जउन चीज हम लइ आए अही ओहमाँ स कछू हम ऍनका न देब। इ मनइयन सिरिफ आपन मेहरारु अउ बचवन क लइ सकत हीं।”

²³ दाऊद जवाब दिहस, “नाहीं मोर भइया लोगो, अइसा जिन करा। इ बिसय मँ सोचा कि यहोवा हमका का दिहे अहइ। यहोवा हम पचन क उ दुस्मन क हरावइ दिहेस ह जउन हम पचन प हमला किहस ह। ²⁴ जउन तू कहत अहा ओका कउनो न मानी। उ मनइयन क हींसा भी, जउन बाँटइ वाली चीजन क संग ठहरा रहेन, ओतनँइ होइ जेतँना ओनका जउन जुद्ध मँ गवा रहेन। सब क हींसा बराबर होइ।” ²⁵ दाऊद ओका इस्राएल बरे हुकुम अउ नेम बनाइ दिहस। इ नेमँ अब तलक लागू होइके चला आवा बाटइ।

²⁶ दाऊद सिकलग मँ आवा। तब उ उ चीजन मँ स, जउन अमालेकियन स लइ लीन्ह ग रहिन, कछू चीजन क आपन मीत लोगन यहूदा क नेता लोगन क पठएस। दाऊद कहेस, “इ सब भेंट आप लोगन क उ चीजन मँ स अहइ जेनका हम पचे यहोवा क दुस्मनन स पावा ह।”

²⁷ दाऊद उ चीजन मँ स जउन अमालेकियन स मिली रहिन, कछू जउन बेतेल क प्रमुख लोग, नेगव क रमीथ, यत्तीर, ²⁸ अरोएर, सिपमोत, एस्तमो, ²⁹ रकल, यरहमेलियन अउ केनि क सहरन, ³⁰ होर्मा, बोरासान अउ अताक मँ, ³¹ अउ हेब्रान क पठएस। दाऊद उ चीजन मँ स कछू क ओन सबहिं ठउरन क प्रमुख लोगन क पठएस जहाँ दाऊद अउ ओकर लोग रहत रहेन।

यहूदियन जइसेन न बना

10 भाइयो तथा बहिनियो, मइँ चाहित हउँ कि तू जान ल्या हमरे पूर्वजन क का भवा रहा जउन मूसा क व्यवस्था क मानत रहेन। अउर उ सबहिं बादल क छत्र छाया मँ सुरच्छापूर्वक लाल सागर पार कइ ग रहेन। ² ओन्हन सब क बादल क नीचे अउर समुद्दर मँ मूसा क अनुयायी क रूप मँ बपतिस्मा दीन्ह गवा रहा। ³ ओन सभन क समान आत्मिक भोजन खाए रहेन। ⁴ अउर उ सबइ समान आत्मिक पेय पिए रहेन काहेकि उ अपने साथे चलत रही उ आत्मिक चट्टान स ही जल ग्रहण करत रहेन। अउर उ चट्टान रही मसीह। ⁵ मुला ओहमें स अधिकांस लोगन स परमेस्सर खुस नाहीं रहा, इही बरे उ पचे मरुभूमि मँ मरि गएन।

⁶ इ बातन अइसेन घटिन कि हमरे बरे उदाहरण सिद्ध होइ गइन। ऍहसे हम खराब बातन क कामना न करी जइसेन ओन्हन किहे रहेन। ⁷ मूर्ति पूजक न बना, जइसेन कि ओहमाँ स कछू रहेन। पवित्तर सास्तरन कहत ह: “मनई खाइ पिअइ क बरे बइठा अउर परस्पर आनन्द मनावइ क बरे उठा।”^{(A) 8} तउन आवा हम कभउँ व्यभिचार न करी जइसेन ओनमें स कछू किहे रहेन। इही नाते ओहमें स 23,000 मनई एक्कइ दिन मरि गएन। ⁹ आवा हम मसीह क परिच्छा न लेइ, जइसेन कि ओहमे स कछू जने लिहे रहेनन। परिणाम उ लोग साँप द्वारा मारा गएन। ¹⁰ सिकवा सिकायत न करा जइसेन कि ओनमें स कछू करत रहत रहेन अउर इही कारण विनास क सरगदूत क जरिये मार डावा गएन।

¹¹ इ बात ओनके साथे अइसेन घटी कि उदाहरण बन जाइ। अउर ओन्हे लिख दीन्हा गवा कि हमरे बरे जेह पर युगे क अंत उतरा भवा बा, चेतावनी रहइ। ¹² एह बरे जउन इ सोचत ह कि उ मजबूती स खड़ा अहइ, ओन्हे सावधान रहइ चाही कि उ गिर न पड़इ। ¹³ तू पचे कउनो अइसेन परिच्छा मँ नाहीं पड़ा अहा जउन, मनइयन क बरे सामान्य नाहीं बा। परमेस्सर बिसवासनीय अहइ। उ तोहार सक्ति स ज्यादा तोहे परीच्छा मँ न पड़इ देई। परीच्छा क साथे-साथे ओसे बचइ क रस्ताभी तोहे सबन क देइ ताकि तू परीच्छा क उत्तीर्ण कइ सका।

¹⁴ हमर पिआरा दोस्तन, अंत मँ मइँ कहत हउँ मूर्ति पूजा स दूर रहा। ¹⁵ तोहे समझदार समझिके मइँ अइसेन कहत हउँ। जउन मइँ कहत हउँ, ओका अपने आप परखा। ¹⁶ धन्यबाद क उ पियाला जेकरे बरे हम धन्यबाद देत हई, उ का मसीह क लहू (मृत्यु) मँ हमार साझेदारी नाहीं बा? उ रोटी जेका हम तोड़त त हई, का ईसू देह मँ महमार साझेदारी नाहीं बा? ¹⁷ रोटी क होब एक अइसा तथ्य अहइ, जेकर अर्थ बा कि हम सब एक्कइ सरीर स अही। काहेकि ओही रोटी मँ ही हम सब का साझेदारी बाटइ।

¹⁸ ओन्हन इस्राएलियन (यहूदियन) क बारे मँ सोचा, जउन बलि क चीज खात हीं। का ओनकर ओह वेदी मँ साझेदारी नाहीं अहइ? ¹⁹ इ बात क मोरे कहइ क प्रयोजन का बा? का मइँ इ कहई चाहित ह कि मूर्तियन पर चढ़ावा गवा भोजन कछू महत्व क बाटइ? या कि मूर्ति कछू भी नाहीं बाटइ। ²⁰ बल्कि मइँ इ कहत हउँ कि अधर्मी जउन बलि चढ़ावत हीं, उ पचे परमेस्सर क बरे नाहीं बल्कि दुस्ट आतिमन क बरे चढ़ावत हीं। मइँ नाहीं चाहत हउँ कि तू पचे दुस्ट आतिमन क बरे चढ़ावा। मइँ नाहीं चाहित्त कि तू दुस्ट आतिमन क साझेदार बना। ²¹ तू पर्भू क कटोरा अउर सइतान क कटोरा मँ स एक साथ नाहीं पी सकत्या। तू सबइ पर्भू क भोज क चौकी अउर दुस्ट आतिमन क खाना क चौकी, दुइनउँ मँ एक साथे हींसा नाहीं बटाइ सकत्या। ²² का हम पर्भू क चिढ़ावइ चाहित ह? का जेतना सक्तिसाली उ अहइ, हम ओसे जियादा सक्तिसाली हई?

आपन स्वतन्त्रता क प्रयोग परमेस्सर क महिमा क बरे करा

²³ जइसेन की कहा गवा बा कि, “हम कछू भी करइ क बरे स्वतन्त्र हई।” पर सब कछू हितकारी तउ नाहीं अहइँ। “हम कछू भी करइ क बरे स्वतन्त्र हई।” मुला हर कउनो बात स बिसवास मजबूत तउ नाहीं होत। ²⁴ केउ क भी मात्र सुवारथ क ही चिन्ता न करइ चाही बल्कि अउरन क भलाई क बारे मँ सोचइ चाही:

²⁵ बजार मँ जउन्न कछू बिकाइ, अपने अन्तरमने क अनुसार उ सब कछू खा। ओकरे बारे कउनउ प्रस्न न करा। ²⁶ काहेकि सास्तर कहत ह, “इ धरती अउर एह पर जउन कछू बा, सब पर्भू क अहइ।”^(B)

²⁷ अगर अबिसवासियन मँ स कउनउ मनई तोहे खाना पर बोलावइ अउर तू उहाँ जाइ चाहत अहा तउ तोहरे सामने जउनउ परोसा गवा बा, आपने अर्न्तमने क अनुसार सब खा। कउनउ प्रस्न न पूछा। ²⁸ मुला अगर केउ तोहे लोगन क इ बतावइ, “इ देवता पर चढ़ावा गवा चढ़ावा अहइ” तउ जे तोहे इ बतावइ, ओकरे कारण अउर अपने अर्न्तमने क कारण ओका न खा। ²⁹ मइँ जब अर्न्तमन कहत हउँ तउ हमार मतलब तोहरे अर्न्तमने स नाहीं बल्कि ओह दुसरे मनई क अर्न्तमने स बा। एकमात्र इहई कारण अहइ। काहेकि मोर स्वतन्त्रता भला दूसरे मनई क अर्न्तमने क जरिये लीन्ह गए निर्णय स सीमित काहे रहइ? ³⁰ अगर मइँ धन्यबाद दइके, खाना मँ हिस्सा लेइत ह तउ जेह चीज क बरे मइँ परमेस्सर क धन्यबाद देइत ह, ओकरे बरे मोर आलोचना नाहीं कीन्ह जाइ चाही।

³¹ इही बरे चाहे तउ खा, चाहे पिआ, चाहे कछू अउर करा, सब कछू परमेस्सर क महिमा क बरे करा। ³² यहूदियन क बरे रहा या गैर यहूदियन क बरे जउन परमेस्सर क कलीसिया क अहइँ, ओनके बरे कभउँ बाधा न बना ³³ जइसे मइँ खुद सब तरह स हर कउनो क खुस रखइ क जतन करत अहउँ, अउर बिना इ सोचे कि मोर सुवारथ का अहइ, परमार्थ क सोचत हउँ ताकि ओनकर उद्धार होइ।

8 एक दिना मइँ (यहेजकेल) अपने घरे मँ बइठा रहेउँ अउर यहूदा क अग्रज हुवाँ मोरे समन्वा बइठे रहेन। इ देस-निकारे क छठएँ बरिस क छठएँ महीने क पचँए दिन भवा। अचानक मोर सुआमी यहोवा क सक्ति मोहमाँ उतरी। ² मइँ कछू लखेउँ जउन आगी क नाई रहा। इ एक मनई क सरीर जइसा देखाइ पड़त रहा। करिहाउँ स खाले उ आगी जइसा रहा। करिहाउँ स ऊपर उ आगी मँ तपत धातु क तरह चमकत अउर कान्तिवाला रहा। ³ तब मइँ कछू अइसा लखेउँ जउन बाहु क तरह रहा। उ बाहु बाहेर बढ़ी अउर उ मोरे मुँड़ि क बारन स मोका धइ लिहस। तब आतिमा मोका हवा मँ उठाइ लिहस अउर परमेस्सर क दर्सन मँ उ मोका यरूसलेम क लइ गइ। उ मोका उत्तर कइँती भीतर फाटक पइ लइ गइ। उ देवमूर्ति, जेहसे परमेस्सर क ईर्स्या होत ह, उ फाटक क सहारे अहइ। ⁴ किन्तु इस्राएल क परमेस्सर क तेज हुवँइ रहा। उ तेज वइसा ही देखात रहा जइसा दर्सन मइँ घाटी क किनारे कबार नहर क लगे लखे रहेउँ।

⁵ परमेस्सर मोहसे कहेस। उ कहेस, “मनई क पूत, उत्तर कइँती लखा।” एह बरे मइँ उत्तर कइँती लखेउँ। अउर हुवाँ प्रवेस मार्ग क सहारे वेदी-दुआर क उत्तर मँ उ देवमूर्ति रही जेकरे बरे परमेस्सर क ईर्स्या होत रही।

⁶ तब परमेस्सर मोहसे कहेस, “मनई क पूत का तू लखत अहा कि इस्राएल क लोग कइसा भयंकर काम करत अहइँ? हिआँ उ पचे उ चीज क मोरे मन्दिर क ठीक बगल मँ मोका इ स दूर हटाइ बरे बनाएन ह। जदि तू मोरे संग अउब्या तउ तू अउर भी जियादा भयंकर चिजियन लखब्या।”

⁷ एह बरे मइँ अँगने क प्रवेस दुआर पइ गएउँ अउर मइँ देवार मँ एक ठु छेद लखेउँ। ⁸ परमेस्सर मोहसे कहेस, “हे मनई क पूत। उ देवारे क छेद क चारिहुँ कइँती खोदेन।” एह बरे मइँ देवार क उ छेद स होइके गएउँ अउर हुवाँ एक दरवाजा लखेउँ।

⁹ तब परमेस्सर मोहसे कहेस, “अन्दर जा, अउर ओन भयानक दुट्ठ चिजियन क लखा जेनका लोग हुवाँ करत अहइँ।” ¹⁰ एह बरे मइँ अन्दर गएउँ अउर मइँ लखेउँ। मइँ हर एक प्रकार क रेंगइवाले जन्तु अउर जनावरन क देवमूरतियन क लखेउँ जेनके बारे मँ सोचइ स तोहका घिना होत ह। उ सबइ देवमूरतियन अउ गन्दी मूरतियन रहिन जेनका इस्राएल क लोग पूजत रहेन। हुवाँ ओन जनावरन क तस्बीर हर देवारे पइ चारिहुँ कइँती खुदा भए रहेन।

¹¹ तब मइँ एह पइ धियान दिहेउँ कि सापान क पूत याजन्याह अउर इस्राएल क सत्तर अग्रज उ ठउर पइ पूजा करइवालन क साथ रहेन। हुवाँ पइ उ पचे, लोगन क ठीक समन्वा रहेन, अउर हर एक प्रमुख क हाथे मँ आपन सुगन्धि क थाल रहा। बरत सुगन्धि क धुवाँ हवा मँ उठत रहा। ¹² तब परमेस्सर मोहसे कहेस, “हे मनई क पूत का तू लखेस ह कि इस्राएल क नेता लोग अँधियारा मँ का करति आवत हीं? हरेक मनई क आपन लबार देवता बरे बिसेस कमरा अहइँ। उ पचे आपुस मँ इ बातन करत ह, ‘यहोवा हम लोगन क नाहीं लखइ सकब्या। यहोवा इ रास्ट्र क तजि दिहस ह।’” ¹³ तब परमेस्सर न मोह स कहेस, “यदि तुम मोरे संग आउब्या तउ तू ओन लोगन अउर भी जियादा भयानक काम करत भए लखब्या!”

¹⁴ तब उ मोका यहोवा क मन्दिर क प्रवेस-दुआर पइ लइ गवा। इ दुआर उत्तर कइँती रहा। हुवाँ मइँ मेहररूअन क बइठे अउर रोवत भए लखेउँ। उ पचे लबार देवता तम्मूज क बारे मँ सोक मनावत रहिन।

¹⁵ परमेस्सर मोहसे कहेस, “मनई क पूत, का तू एन भयंकर चिजियन क लखत अहा? मोरे संग आवा अउर तू एनसे भी बुरे करम लखब्या।” ¹⁶ तब उ मोका मन्दिरे क भीतरी अँगना मँ लइ गवा। उ ठउरे पइ मइँ पच्चीस मनइयन क खाले निहुरे भए अउर पूजा करत लखेउँ। उ पचे पवित्तर स्थान अउर वेदी क बीच रहेन, किन्तु उ पचे गलत दिसा मँ मुँह किए खड़े रहेन। ओनकर पीठ पवित्तर ठउरे कइँती रहिन। उ पचे सूरज क पूजा करइ बरे खाले निहुरा रहेन।

¹⁷ तब परमेस्सर कहेस, “मनई क पूत, का तू एका लखत अहा? यहूदा क लोग मोरे मन्दिर क एतना महत्वहीन समुझत हीं कि उ पचे मोरे मन्दिर मँ इ भयंकर करम करत हीं। इ देस हिंसा स भरा भवा अहइ। उ पचे लगातार मोका पागल करइवाला काम करत हीं। लखा, उ पचे आपन नाकन मँ लबार देवता क तरह चन्द्रमा क सम्मान करइ बरे बालियन पहिर रखिन ह। ¹⁸ मइँ ओन पइ आपन किरोध परगट करब। मइँ ओन पइ कउनो दाया नाहीं करब। मइँ ओनके बरे दुःख क अनुभव नाहीं करब। उ पचे मोका जोर स गोहरइहीं, किन्तु मइँ ओनका सुनइ स इन्कार कइ देब।”

अलामोथ क संगत पइ संगीत निर्देसक बरे कोरह परिवार क एक ठु पद।

संगीत निर्देसक बरे कोरह परिवार क एक ठू भजन।