M’Cheyne Bible Reading Plan
Nak quisacheˈ ru li tenamit Babilonia
18 Chirix aˈan quicuil jun chic li ángel quicube chak saˈ choxa. Kˈaxal nim xcuanquil ut chixjunil li ruchichˈochˈ quicutanoˈ xban lix lokˈal. 2 Quixjap re chi cau xya̱b xcux ut quixye: ―X‑osoˈ li tenamit Babilonia. Xsacheˈ xcuanquil li nimla tenamit Babilonia. Li tenamit aˈan xcana chokˈ xnaˈajeb laj tza ut eb li ma̱us aj musikˈej. Xcana chokˈ xnaˈajeb laj xicˈanel xul li kˈaxal yibeb ru li incˈaˈ nequeˈtiˈeˈ. 3 Xsacheˈ xcuanquil xban nak numtajenak li ma̱c nequeˈxba̱nu. Chixjunileb li rey li cuanqueb saˈ ruchichˈochˈ nequeˈcuulac Babilonia chixba̱nunquil li ma̱usilal riqˈuineb. Chanchan calajenakeb xban li ma̱usilal yo̱queb chixba̱nunquil. Ut eb laj cˈay queˈbiomoˈ aran xban nak nabal li cˈaˈak re ru queˈxcˈayi chi terto xtzˈak, chan. 4 Ut quicuabi jun chic yo̱ chak chi a̱tinac saˈ choxa ut quixye: ―Ex ralal xcˈajol li Dios, elenkex saˈ li tenamit aˈan re nak incˈaˈ textzˈako̱nk riqˈuin lix ma̱queb ut re nak incˈaˈ textzˈako̱nk riqˈuin li raylal li teˈxcˈul. 5 Xnumta lix ma̱queb. Chanchan xcuulac toj saˈ choxa lix qˈuial. Li Dios yo̱ chak chixqˈuebal retal lix ma̱usilaleb. 6 Cheˈqˈuehekˈ chixtoj li joˈ qˈuial li raylal xeˈxba̱nu reheb li jalaneb xtenamit. Chiqˈuehekˈ re̱kaj li queˈxba̱nu reheb. Caˈ sut xqˈuial li raylal ta̱ba̱nu̱k reheb chiru li queˈxba̱nu eb aˈan. 7 Cheˈrahobtesi̱k xban nak queˈxnimobresi ribeb ut queˈxba̱nu li ma̱usilal. Eb aˈan nequeˈxye, “La̱o chanchano li reina. Moco nebaˈo ta joˈ junak xma̱lcaˈan. La̱o ma̱ jun cua takacˈul rahil chˈo̱lej,” chanqueb. 8 Joˈcan nak chiru jun cutan talajeˈcha̱lk li raylal saˈ xbe̱n li tenamit aˈan. Ta̱cha̱lk ca̱mc, ut ya̱bac ut cueˈej saˈ xbe̱neb. Li tenamit ta̱sachekˈ ru riqˈuin xam xban nak kˈaxal nim xcuanquil li Ka̱cuaˈ li ta̱rakok a̱tin saˈ xbe̱neb, chan. 9 Eb li rey li cuanqueb saˈ ruchichˈochˈ li queˈcuulac aran Babilonia chixba̱nunquil li ma̱usilal rochbeneb ut queˈsahoˈ saˈ xchˈo̱leb riqˈuineb, ta̱rahokˈ saˈ xchˈo̱leb chirilbal nak yo̱k chi sachecˈ ru li tenamit. Teˈya̱bak xban xrahil xchˈo̱leb nak teˈril xsibel li tenamit nak yo̱k chi cˈatc. 10 Cˈajoˈ nak teˈxucuak chirilbal li cˈaˈru tixcˈul li tenamit. Teˈxakli̱k chi najt riqˈuin xban xxiuheb ut teˈxye: ―Tokˈob ru li tenamit Babilonia li nim xcuanquil nak quicuan. Tokˈob ru lix nimal ru tenamit. Chiru jun cˈamoc xrakeˈ a̱tin saˈ xbe̱neb.― 11 Eb laj cˈay ta̱rahokˈ saˈ xchˈo̱leb ut teˈya̱bak chirix li tenamit xban nak ma̱ ani chic ta̱lokˈok re lix cˈayeb. 12 Ma̱ ani chic ta̱lokˈok re li oro, chi moco li plata, chi moco li cha̱bil pec li terto xtzˈak, chi moco li perlas. Ma̱ ani chic ta̱lokˈok re li cha̱bil tˈicr lino, chi moco li púrpura, chi moco li seda, chi moco li escarlata. Ma̱ ani chic ta̱lokˈok re li qˈuila pa̱y ru chi sununquil cheˈ. Ut ma̱ ani chic ta̱lokˈok re li cˈaˈak re ru yi̱banbil riqˈuin marfil, chi moco riqˈuin li cha̱bil cheˈ, chi moco riqˈuin li chˈi̱chˈ hierro ut cobre, chi moco li yi̱banbil riqˈuin li pec mármol. 13 Ma̱ ani chic ta̱lokˈok re li canela, li sununquil ban, li incienso, li mirra ut li olíbano. Ma̱ ani chic ta̱lokˈok re li vino, li aceite, li trigo ut li cha̱bil cˈaj. Ut ma̱ ani chic ta̱lokˈok re li cuacax, li carner ut li cacua̱y, chi moco teˈxlokˈ li carruajes, chi moco teˈxlokˈ chic li rech cristianil chokˈ mo̱seb. 14 Eb laj cˈay teˈxye reheb li tenamit: ―Chixjunil li cha̱bil li quera ru, aˈan ac xsach che̱ru. Ma̱cˈaˈ chic le̱ biomal chi moco e̱chˈinaˈusal. Ma̱ jokˈe chic te̱tau li cˈaˈak re ru aˈan.― 15 Ut eb li nequeˈcˈayin li cˈaˈak re ru aˈin teˈxakli̱k chi najt riqˈuin li tenamit xban xxiuheb nak teˈril li raylal li yo̱keb chixcˈulbal li tenamit. Eb laj cˈay li queˈbiomoˈ xbaneb, teˈya̱bak ut teˈxye: 16 ―Tokˈobeb ru. Tokˈobeb ru li cuanqueb saˈ li nimla tenamit aˈan. Junxil queˈxtikib ribeb riqˈuin li cha̱bil tˈicr lino ut púrpura ut caki tˈicr. Ut queˈxqˈue chokˈ xsahob ru li oro, ut li terto̱quil pec ut li perla. 17 Ut yal chiru junpa̱t x‑osoˈ chixjunil lix biomaleb, chaˈakeb. Ut eb laj e̱chal jucub ut eb li nequeˈxberesi li jucub saˈ li palau ut chixjunileb li nequeˈtrabajic saˈ li ni̱nki jucub, joˈqueb laj cˈay li nequeˈxic saˈ li jucub, queˈxakli chi najt chi rilbal. 18 Ut queˈxjap re nak queˈril nak yo̱ chi cˈatc li tenamit ut queˈxye: ―Ma̱ jun chic tenamit juntakˈe̱t riqˈuin li tenamit aˈin nak quicuan, chanqueb. 19 Queˈxqˈue poks saˈ xjolomeb retalil lix rahil xchˈo̱leb ut queˈya̱bac ut queˈxjap reheb chixyebal: ―¡Tokˈobeb ru! ¡Tokˈobeb ru li cuanqueb saˈ li tenamit aˈan! Riqˈuin lix biomaleb li tenamit aˈan xobiomoˈ la̱o li nococˈanjelac saˈ jucub. Ut chiru junpa̱t quisacheˈ ru li tenamit, chanqueb. 20 ―Chisahokˈ saˈ e̱chˈo̱l la̱ex li cuanquex saˈ choxa. La̱ex laj pa̱banel, la̱ex profeta ut la̱ex apóstol, chisahokˈ taxak saˈ e̱chˈo̱l xban nak li Dios xrakoc a̱tin saˈ xbe̱neb saˈ e̱cˈabaˈ la̱ex, chan li yo̱ chak chi a̱tinac saˈ choxa. 21 Ut jun li ángel cau rib quixchap jun li nimla pec, chanchan li nimla pec li nequeˈrocsi re li molino, ut quixcut saˈ li palau ut quixye: ―Joˈ nak xsach li pec aˈin saˈ li palau, joˈcan ajcuiˈ nak ta̱sachekˈ ru li tenamit Babilonia. Incˈaˈ chic ta̱ilekˈ ru. 22 Incˈaˈ chic ta̱abi̱k saˈ li tenamit aˈan lix ya̱b li cuajb chi moco lix ya̱b li arpa, chi moco li xya̱b li xo̱lb ut li trompeta. Ut incˈaˈ chic teˈcua̱nk saˈ li tenamit aˈan li nequeˈxnau trabajic chi us riqˈuin li cˈaˈak re ru, ut incˈaˈ chic ta̱abi̱k xya̱b junak molino saˈ li tenamit aˈan. 23 Incˈaˈ chic ta̱ilma̱nk junak xam saˈ li tenamit aˈan. Ut incˈaˈ ajcuiˈ ta̱abi̱k xya̱b xcuxeb li nequeˈsahoˈ saˈ xchˈo̱leb saˈ junak sumla̱c. Teˈxcˈul chi joˈcan xban nak eb laj cˈay li queˈcuan saˈ li tenamit aˈan queˈxnimobresi ribeb, ut riqˈuin li tu̱lac queˈxba̱nu, queˈxbalakˈi chixjunileb li tenamit.― 24 Saˈ ajcuiˈ li tenamit aˈan queˈcamsi̱c li ralal xcˈajol li Dios ut eb li profeta. Li tenamit aˈan quicˈamoc be chiruheb li tenamit saˈ ruchichˈochˈ chixcamsinquileb laj pa̱banel yalak bar.
Li Jesús quitijoc chirixeb lix tzolom
17 Nak quirakeˈ xyebal li a̱tin aˈin, li Jesús quixtaksi li riloba̱l ut qui‑oc chi tijoc. Quixye: ―At inYucuaˈ, xcuulac xkˈehil nak tincamsi̱k. Ta̱qˈue taxak inlokˈal la̱in li Cˈajolbej re nak la̱in tinqˈue ajcuiˈ a̱lokˈal la̱at. 2 La̱at xatqˈuehoc incuanquil saˈ xbe̱n chixjunil re nak tinqˈue li junelic yuˈam reheb li xakˈaxtesiheb cue. 3 Li junelic yuˈam, aˈan nak teˈxnau a̱cuu la̱at li junajat chi tzˈakal Dios ut teˈxnau ajcuiˈ cuu la̱in li Jesucristo li quina̱takla chak. 4 La̱in xinqˈue a̱lokˈal arin saˈ ruchichˈochˈ xban nak xinchoy xba̱nunquil li cˈanjel li xaqˈue cue re tinba̱nu. 5 At inYucuaˈ, chaqˈue ta cuiˈchic lin lokˈal li quicuan nak toj cuanquin chak a̱cuiqˈuin nak toj ma̱jiˈ naticla chak li ruchichˈochˈ. 6 Eb li xasiqˈueb ru saˈ ruchichˈochˈ xakˈaxtesiheb cue. La̱in xincˈut chiruheb chi tzˈakal anihat la̱at ut xinchˈolob li xya̱lal chiruheb. Ut eb aˈan xeˈxba̱nu li cˈaˈru xaye reheb. 7 Anakcuan nequeˈxnau nak chixjunil li cˈaˈru xinba̱nu, la̱at xatqˈuehoc cue chixba̱nunquil. 8 La̱in xinye reheb li cˈaˈru xaye cue ut xeˈxcˈul li cua̱tin. Xeˈxqˈue retal nak relic chi ya̱l a̱cuiqˈuin xinchal chak ut xeˈxpa̱b nak la̱at xattaklan chak cue. 9 La̱in incˈaˈ yo̱quin chixtzˈa̱manquil a̱cue nak ta̱tenkˈaheb li incˈaˈ xineˈxpa̱b. Yo̱quin ban chixtzˈa̱manquil cha̱cuu nak ta̱tenkˈaheb lin tzolom li xakˈaxtesiheb cue xban nak aˈaneb la̱ cualal a̱cˈajol. 10 Chixjunileb li cualal incˈajol, a̱cualal a̱cˈajol ajcuiˈ la̱at. Ut chixjunileb la̱ cualal a̱cˈajol, cualal incˈajol ajcuiˈ la̱in. Ut eb aˈan nequeˈxnima inlokˈal. 11 Anakcuan la̱in tinxic a̱cuiqˈuin. Incˈaˈ chic tincua̱nk saˈ ruchichˈochˈ. Abanan eb aˈan toj teˈcua̱nk saˈ ruchichˈochˈ. At inYucuaˈ, la̱at Santo. Chacuileb taxak riqˈuin lix nimal la̱ cuanquilal li xakˈaxtesiheb cue re nak junajak ruheb joˈ la̱at ut la̱in junaj ku. 12 Nak cuanquin saˈ xya̱nkeb, riqˈuin xnimal la̱ cuanquil xincuileb lin tzolom li xakˈaxtesiheb cue ut ma̱ jun xsach chicuu. Caˈaj cuiˈ li jun xsach li ac qˈuebil chak re sachc. Aˈin xcˈulman re nak ta̱tzˈaklok ru li tzˈi̱banbil saˈ li Santil Hu. 13 Anakcuan xic cue a̱cuiqˈuin. Abanan yo̱quin chixyebal li cˈaˈak re ru aˈin nak toj cuanquin saˈ ruchichˈochˈ re nak ta̱cua̱nk xsahil xchˈo̱leb aˈan joˈ li xsahil inchˈo̱l la̱in. 14 La̱in xinchˈolob xya̱lal la̱ cua̱tin chiruheb. Joˈcan nak xicˈ nequeˈileˈ xbaneb li incˈaˈ nequeˈpa̱ban. Xicˈ nequeˈileˈ xban nak moco xcomoneb ta chic ut moco juntakˈe̱t ta chic lix naˈlebeb. Joˈcan ajcuiˈ la̱in. Moco la̱in ta xcomoneb li cuanqueb saˈ ruchichˈochˈ. 15 Incˈaˈ yo̱quin chixtzˈa̱manquil cha̱cuu nak ta̱cuisiheb lin tzolom saˈ ruchichˈochˈ. Caˈaj cuiˈ yo̱quin chixtzˈa̱manquil cha̱cuu nak ta̱coleb chiru laj tza. 16 La̱in ma̱cuaˈin xcomoneb li cuanqueb saˈ ruchichˈochˈ. Joˈcan ajcuiˈ eb aˈan. Ma̱cuaˈeb chic xcomoneb li incˈaˈ nequeˈpa̱ban. 17 Chasantobresiheb taxak riqˈuin la̱ cua̱tin, xban nak aˈan li tzˈakal ya̱l. 18 Joˈ nak xina̱takla chak la̱in saˈ ruchichˈochˈ chixchˈolobanquil li xya̱lal, joˈcan ajcuiˈ nak tintaklaheb chixchˈolobanquil li xya̱lal chiruheb li incˈaˈ nequeˈpa̱ban. 19 Saˈ xcˈabaˈ eb aˈan xinkˈaxtesi cuib la̱in chixba̱nunquil li cˈaˈru xaye cue. Ut saˈ xcˈabaˈ li ya̱l li xinye eb aˈan teˈxkˈaxtesi ajcuiˈ ribeb chixba̱nunquil li cˈaˈru nacacuaj. 20 Ma̱cuaˈ caˈaj cuiˈ chirixeb lin tzolom yo̱quin chi tzˈa̱ma̱nc cha̱cuu. Yo̱quin aj ban cuiˈ chi tzˈa̱ma̱nc cha̱cuu chirixeb li teˈpa̱ba̱nk mokon nak teˈxchˈolob li xya̱lal chiruheb. 21 At inYucuaˈ, li cˈaˈru nintzˈa̱ma cha̱cuu, aˈan nak junajak taxak ruheb. Cheˈcua̱nk kiqˈuin joˈ nak cuanquin la̱in a̱cuiqˈuin ut la̱at cuancat cuiqˈuin. Junajak taxak ruheb re nak li cuanqueb saˈ ruchichˈochˈ teˈxpa̱b nak la̱at xattaklan chak cue. 22 La̱in xinqˈueheb lix lokˈal joˈ nak xaqˈue inlokˈal la̱in re nak junajak ruheb joˈ nak junaj ku la̱o. 23 La̱in cua̱nkin riqˈuineb ut la̱at cua̱nkat cuiqˈuin re nak junajak chic ruheb chi tzˈakal kiqˈuin. Ut xban nak junajak chic ruheb kiqˈuin, eb li incˈaˈ nequeˈpa̱ban teˈxqˈue retal nak la̱at xattaklan chak cue ut teˈxqˈue ajcuiˈ retal nak la̱at nacaraheb joˈ nak niquina̱ra la̱in. 24 At inYucuaˈ, nintzˈa̱ma cha̱cuu nak chixjunileb li xakˈaxtesiheb cue teˈcua̱nk cuiqˈuin saˈ li naˈajej li tincua̱nk cuiˈ la̱in. Nacuaj nak teˈril lin lokˈal li caqˈue chak cue nak toj ma̱jiˈ quiyi̱ba̱c li ruchichˈochˈ xban nak niquina̱ra. 25 At inYucuaˈ, la̱at ti̱c a̱chˈo̱l. Eb li incˈaˈ nequeˈpa̱ban incˈaˈ nequeˈxnau a̱cuu. Abanan la̱in ninnau a̱cuu ut eb lin tzolom nequeˈxnau chic nak la̱at xattaklan chak cue. 26 La̱in xincˈut chiruheb anihat la̱at ut toj tinchˈolob cuiˈchic chiruheb re nak teˈrahok joˈ nak niquina̱ra la̱at, ut la̱in tincua̱nk riqˈuineb, chan li Jesús nak quitijoc.
Copyright © 2000 by Wycliffe Bible Translators International