M’Cheyne Bible Reading Plan

Li merto̱m li incˈaˈ us xnaˈleb

16  Li Jesús quixye reheb lix tzolom li jaljo̱quil ru a̱tin aˈin: Quicuan jun li cui̱nk kˈaxal biom ut quicuan jun xmerto̱m. Cuanqueb li queˈjitoc chirix li merto̱m chiru li patrón ut queˈxye re: ―La̱ merto̱m yo̱ chixsachbal la̱ biomal, chanqueb re. ² Joˈcan nak quixbok lix merto̱m ut quixye re: ―¿Cˈaˈru xya̱lal li yo̱quin chirabinquil cha̱cuix? Ta̱kˈaxtesi la̱ cue̱nt nak xatcuan chi cˈanjelac xban nak incˈaˈ chic tatcana̱k chokˈ inmerto̱m, chan re. ³ Ut li merto̱m quixye saˈ xchˈo̱l: ―¿Cˈaˈru tinba̱nu anakcuan xban nak lin patrón tinrisi saˈ lin cˈanjel? Incˈaˈ tincuy li cacuil cˈanjel ut tinxuta̱na̱k chi xic chixtzˈa̱manquil cˈaˈru cue chire cablal. ⁴ Anakcuan ninnau cˈaˈru tinba̱nu re nak cua̱nkeb li tineˈxcˈul saˈ rochocheb nak tin‑isi̱k chi merto̱mil, chan saˈ xchˈo̱l. ⁵ Quixbokeb chak chi xju̱nkaleb li cuanqueb xcˈas riqˈuin lix patrón. Ut quixye re li xbe̱n: ―¿Joˈ nimal la̱ cˈas riqˈuin lin patrón? chan. ⁶ Ut li cui̱nk quixye re: ―Oˈcˈa̱l (100) barril chi aceite, chan. Ut li merto̱m quixye re: ―Cueˈ li hu li tzˈi̱banbil cuiˈ retalil la̱ cˈas. Chunlan ut jal saˈ junpa̱t. Laje̱b roxcˈa̱l (50) aj chic ta̱tzˈi̱ba retalil chiru li hu aˈin, chan. ⁷ Ut quixye cuiˈchic re li jun chic: ―Ut la̱at, ¿joˈ nimal la̱ cˈas? chan. Ut li cui̱nk quixye: ―Oˈcˈa̱l (100) bisoc chi trigo, chan. Li merto̱m quixye re: ―Cueˈ li hu li tzˈi̱banbil cuiˈ retalil la̱ cˈas. Jal ut ca̱cˈa̱l (80) bisoc aj chic ta̱tzˈi̱ba retalil chiru li hu aˈin, chan. ⁸ Ut li patrón quisach xchˈo̱l chirilbal nak kˈaxal cuan xnaˈleb li merto̱m li incˈaˈ us xnaˈleb. Eb li incˈaˈ nequeˈxnau li xya̱lal kˈaxal se̱beb xchˈo̱l chixcˈoxlanquil chanru tixtenkˈa rib, usta incˈaˈ us tixba̱nu reheb li ras ri̱tzˈin. Kˈaxal se̱beb xchˈo̱l chiruheb li ralal xcˈajol li Dios. ⁹ Cuan li nequeˈxba̱nu li incˈaˈ us riqˈuin lix biomal. Abanan, la̱in ninye e̱re, cheba̱nu usilal reheb le̱ ras e̱ri̱tzˈin riqˈuin le̱ biomal saˈ ruchichˈochˈ. Ut nak ta̱lajk ta̱osokˈ le̱ biomal, texcˈulekˈ saˈ li naˈajej li ma̱cˈaˈ rosoˈjic. ¹⁰ Li ani ti̱c xchˈo̱l chixba̱nunquil li yal caˈchˈin, ti̱cak ajcuiˈ xchˈo̱l chixba̱nunquil li nabal. Ut li ani incˈaˈ ti̱c xchˈo̱l chixba̱nunquil li yal caˈchˈin, incˈaˈ ajcuiˈ ti̱cak xchˈo̱l chixba̱nunquil li nabal. ¹¹ Cui la̱ex incˈaˈ nequenau xra̱bal li biomal saˈ ruchichˈochˈ, ¿chan ta cuiˈ ru nak tixcˈojob xchˈo̱l li Dios chixqˈuebal e̱re li tzˈakal biomal? ¹² Ut cui incˈaˈ nequenau xra̱bal li cˈaˈru re jalan, ¿chan ta cuiˈ ru nak ta̱kˈaxtesi̱k e̱re la̱ex li cˈaˈru tzˈakal e̱re? ¹³ Ma̱ ani ta̱ru̱k ta̱cˈanjelak chiru cuib chi patrón. Ma̱re tixra li jun ut xicˈ ta̱ril li jun chic, malaj ut xicˈ ta̱ril li jun ut tixra li jun chic. Incˈaˈ naru texcˈanjelak chiru li Dios cui junes le̱ biomal nequecˈoxla. ¹⁴ Nak eb laj fariseo queˈrabi li quixye li Jesús, queˈoc chixseˈenquil xban nak nequeˈxra lix biomaleb. ¹⁵ Ut li Jesús quixye reheb: ―La̱ex nequeti̱cobresi e̱chˈo̱l e̱junes chiruheb li tenamit. Abanan li Dios naxnau chanru le̱ naˈleb. Li cˈaˈru kˈaxal lokˈ chiruheb li cui̱nk saˈ ruchichˈochˈ, aˈan tzˈekta̱nanbil xban li Dios.

Li chakˈrab ut lix nimajcual cuanquilal li Dios

¹⁶ Chixjunil li tijleb li queˈxcˈut eb li profeta junxil, joˈ ajcuiˈ lix chakˈrab laj Moisés, quirakeˈ xyebal nak laj Juan laj Cubsihom Haˈ quicˈulun chixchˈolobanquil resil nak cha̱lc re lix nimajcual cuanquilal li Dios. Ut nabaleb yo̱queb chixyalbal xkˈe chi oc rubel lix nimajcual cuanquilal li Dios. ¹⁷ Li choxa ut li ruchichˈochˈ, aˈan moco chˈaˈaj ta nak ta̱osokˈ. Abanan ma̱ jun li a̱tin li tzˈi̱banbil saˈ li chakˈrab, ta̱ru̱k ta̱isi̱k xcuanquil, usta kˈaxal caˈchˈin. ¹⁸ Li ani tixjach rib riqˈuin li rixakil ut ta̱sumla̱k riqˈuin jalan chic ixk, aˈan tixmux ru lix sumlajic. Ut li cui̱nk li ta̱sumla̱k riqˈuin junak ixk li ac xjach rib riqˈuin lix be̱lom, tixmux ru lix sumlajic.

Li cui̱nk biom ut laj Lázaro

¹⁹ Quicuan jun li cui̱nk biom. Naxtikib rib riqˈuin cha̱bil tˈicr kˈaxal terto xtzˈak ut rajlal cutan naninkˈei̱c. ²⁰ Quicuan ajcuiˈ jun li cui̱nk nebaˈ aj Lázaro xcˈabaˈ. Xox rix. Rajlal naxchunub rib chire li oqueba̱l re li rochoch li biom. ²¹ Naxra raj ru xtzacanquil xcˈaj li cua li natˈaneˈ saˈ xbe̱n xme̱x li biom. Eb li tzˈiˈ nequeˈchal riqˈuin ut nequeˈxrekˈ ru lix xox. ²² Quicuulac xkˈehil nak quicam li nebaˈ ut quicˈameˈ xbaneb li ángel toj saˈ choxa bar cuan cuiˈ laj Abraham. Ut quicam ajcuiˈ li biom ut quimukeˈ. ²³ Nak ac cuan saˈ xbalba, yo̱ chixcˈulbal li raylal aran. Qui‑iloc takecˈ ut quiril laj Abraham ut laj Lázaro cuan chixcˈatk. ²⁴ Quixjap re ut quixye: ―Ka̱cuaˈ Abraham, chacuil taxak xtokˈoba̱l cuu. Chatakla laj Lázaro chintenkˈanquil. Chixtˈakresi chak li ruˈuj rukˈ saˈ haˈ ut tolxquehobresi li ruˈuj cuakˈ xban nak cˈajoˈ li raylal yo̱quin chixcˈulbal saˈ li xam aˈin, chan. ²⁵ Ut laj Abraham quixye re: ―At cuas cui̱tzˈin, julticak a̱cue nak toj yoˈyo̱cat saˈ ruchichˈochˈ nabal a̱biomal ut kˈaxal sa nak xatcuan. Ut laj Lázaro cˈajoˈ li raylal quixcˈul. Anakcuan cˈojobanbil xchˈo̱l laj Lázaro arin ut la̱at kˈaxal ra cuancat. ²⁶ Ut cuan jun nimla chamal jul naramoc re li naˈajej cuanco cuiˈ. Ut ma̱ jun ke ta̱ru̱k ta̱numekˈ re ta̱xic e̱riqˈuin, chi moco la̱ex ta̱ru̱k texnumekˈ chak arin, chan laj Abraham re li biom. ²⁷ Tojoˈnak li biom quixye re: ―Tintzˈa̱ma cha̱cuu, at Ka̱cuaˈ Abraham, takla laj Lázaro saˈ rochoch lin yucuaˈ. ²⁸ Aran cuanqueb o̱b li cui̱tzˈin. Chatakla xchˈolobanquil xya̱lal chiruheb re nak eb aˈan incˈaˈ teˈcha̱lk saˈ li naˈajej aˈin chi cˈuluc raylal, chan. ²⁹ Laj Abraham quixye re: ―Cuan riqˈuineb li hu li tzˈi̱banbil xban laj Moisés, ut eb li profeta. Cheˈxqˈuehak retal li cˈaˈru tzˈi̱banbil saˈ li hu aˈan, chan. ³⁰ Quichakˈoc li biom ut quixye: ―Incˈaˈ tzˈakal aˈan, Ka̱cuaˈ Abraham. Abanan cui junak camenak ta̱cuacli̱k cuiˈchic chi yoˈyo ut ta̱xic riqˈuineb, teˈyotˈekˈ raj xchˈo̱l ut teˈxjal raj xcˈaˈuxeb, chan. ³¹ Aˈut laj Abraham quixye re: ―Cui incˈaˈ nequeˈrabi li quixye laj Moisés ut eb li profeta, incˈaˈ ajcuiˈ teˈpa̱ba̱nk usta ta̱cuacli̱k cuiˈchic chi yoˈyo junak saˈ xya̱nkeb li camenak, chan laj Abraham.

Li Xcab Hu li Quixtzˈi̱ba li San Pablo reheb laj Corinto

Xqˈuebal xsahileb xchˈo̱l

1  La̱in laj Pablo. Sicˈbil cuu xban li Dios chokˈ x‑apóstol li Jesucristo xban nak joˈcan quiraj li Dios. Cuochben laj Timoteo li kech aj pa̱banelil. Yo̱quin chixtzˈi̱banquil li hu aˈin e̱riqˈuin la̱ex aj pa̱banel li cuanquex saˈ li tenamit Corinto ut reheb ajcuiˈ chixjunileb laj pa̱banel li cuanqueb saˈ chixjunil li naˈajej Acaya. ² Chicua̱nk taxak e̱riqˈuin li usilal ut li tuktu̱quilal li nachal chak riqˈuin li Dios li kaYucuaˈ ut riqˈuin li Ka̱cuaˈ Jesucristo.

Laj Pablo nabantioxin chiru li Dios

³ Lokˈoninbil taxak li Dios lix Yucuaˈ li Ka̱cuaˈ Jesucristo. Li Dios, aˈan li kaYucuaˈ ut junelic naruxta̱na ku ut naxcˈojob kachˈo̱l. ⁴ Naxcˈojob kachˈo̱l saˈ chixjunil li karaylal re nak ta̱ru̱k takacˈojob xchˈo̱leb li cuanqueb saˈ raylal. Joˈ nak naxcˈojob kachˈo̱l li Dios la̱o, joˈcan ajcuiˈ nak takacˈojob xchˈo̱leb li cuanqueb saˈ raylal. ⁵ Joˈ nak nocotzˈakon riqˈuin li qˈuila raylal li quixcˈul li Cristo, joˈcan ajcuiˈ nak nacˈojoba̱c kachˈo̱l xban li Cristo, re nak naru takacˈojob xchˈo̱leb li kech aj pa̱banelil. ⁶ La̱o nocorahobtesi̱c re nak la̱ex texcolekˈ ut ta̱cˈojoba̱k e̱chˈo̱l. Naxcˈojob kachˈo̱l li Dios re nak la̱o takacˈojob e̱chˈo̱l la̱ex nak yo̱quex chixcuybal xnumsinquil li raylal joˈ li nakacuy la̱o. ⁷ La̱o nakanau nak cau e̱chˈo̱l saˈ le̱ pa̱ba̱l. Nakanau nak te̱cˈul li raylal joˈ yo̱co chixcˈulbal la̱o. Abanan nakanau ajcuiˈ nak ta̱cˈojoba̱k e̱chˈo̱l nak yo̱kex chixcˈulbal li raylal joˈ nak nacˈojoba̱c kachˈo̱l la̱o. ⁸ Ex inherma̱n, nacuaj nak te̱nau joˈ qˈuial li raylal xkacˈul saˈ li naˈajej Asia. Kˈaxal ra xkacˈul chak ut xkacˈoxla nak incˈaˈ chic takacuy xnumsinquil. La̱o xkacˈoxla nak incˈaˈ chic toeˈxcanab chi yoˈyo. ⁹ Xkacˈoxla nak ac tenebanbil ca̱mc saˈ kabe̱n. Us ajcuiˈ nak quikacˈul chi joˈcan re nak cua̱nk xcacuilal kachˈo̱l riqˈuin li Dios li nacuaclesin re li camenak chi yoˈyo ut incˈaˈ takacˈoxla nak cuan xcacuilal kachˈo̱l kajunes kib. ¹⁰ Li Dios, aˈan li quicoloc chak ke chiru li ca̱mc nak corahobtesi̱c. Ut nakanau chi tzˈakal nak aˈan ta̱colok ke chi junelic. ¹¹ Abanan nakatzˈa̱ma ajcuiˈ che̱ru nak junelic textijok chikix. Cui nabaleb li nequeˈtijoc chikix, nabaleb ajcuiˈ li teˈbantioxi̱nk chiru li Dios nak torosobtesi. ¹² Kˈaxal nasahoˈ kachˈo̱l xban nak nakanau nak saˈ ti̱quilal nococuan saˈ ruchichˈochˈ. Ut chi anchal kachˈo̱l xocuan saˈ ti̱quilal nak xocuan e̱riqˈuin la̱ex. Moco xban ta nak cuan kanaˈleb kajunes la̱o nak cuanco saˈ ti̱quilal. Li Dios ban natenkˈan ke riqˈuin lix nimal ruxta̱n. ¹³ Moco saˈ jaljo̱quil ru a̱tin ta nintzˈi̱bac e̱riqˈuin. Tzˈakal re ru li nintzˈi̱ba. Nacuaj nak te̱tau ru chi tzˈakal li nintzˈi̱ba e̱riqˈuin chicuix la̱in. ¹⁴ Cuan tana li xetau ru ut cuan tana incˈaˈ. Abanan nacuaj nak te̱tau ru chi tzˈakal nak la̱in x‑apóstol li Jesucristo re nak sahak saˈ e̱chˈo̱l cuiqˈuin nak tol‑e̱lk li Jesucristo ut sahak ajcuiˈ inchˈo̱l la̱in e̱riqˈuin la̱ex. ¹⁵ Caˈ sut raj xincˈoxla numecˈ e̱riqˈuin xban nak ninnau nak xine̱cˈul raj chi sa saˈ e̱chˈo̱l. Joˈcan nak xinnumeˈ raj e̱riqˈuin nak xinchal arin Macedonia. ¹⁶ Ut nincˈoxla numecˈ e̱riqˈuin nak tinsukˈi̱k. Ut ninnau nak tine̱tenkˈa la̱ex chi xic aran Judea. ¹⁷ ¿Cˈaˈru nequecˈoxla chirix aˈin? ¿Ma incˈaˈ ta biˈ nincˈoxla chi us li cˈaˈru ninye? ¿Ma yal xcab rix inchˈo̱l ta biˈ li cˈaˈru yo̱quin chixba̱nunquil? ¿Ma ho̱n ta biˈ ninye us ut junpa̱t chic tinye incˈaˈ joˈ nequeˈxba̱nu li ma̱jiˈ nequeˈxpa̱b li Cristo? ¹⁸ Li Dios naxnau nak incˈaˈ yo̱quin chix‑yebal e̱re us cui nacuecˈa nak incˈaˈ ta̱ru̱k tinba̱nu. ¹⁹ Li Jesucristo li Ralal li Dios ma̱ jun sut quixye us cui aˈan naxnau nak incˈaˈ tixba̱nu. Aˈan junelic ya̱l li cˈaˈru naxye. Ut la̱in cuochbeneb laj Silvano ut laj Timoteo nakachˈolob xya̱lal li Cristo che̱ru la̱ex. ²⁰ Chixjunil li yechiˈinbil ke xban li Dios, nakacˈul saˈ xcˈabaˈ li Jesucristo. Joˈcan nak saˈ xcˈabaˈ li Jesucristo nakaye “joˈcan taxak” re xqˈuebal xlokˈal li Dios. ²¹ Saˈ xcˈabaˈ li Jesucristo, li Dios naxqˈue xcacuilal kachˈo̱l saˈ li kapa̱ba̱l la̱o joˈ ajcuiˈ la̱ex. Ut aˈan ajcuiˈ quisicˈoc chak ku re nak tocˈanjelak chiru. ²² Ut li Dios quixtakla chak li Santil Musikˈej chi cua̱nc kiqˈuin chokˈ retalil nak reho chic. Xban nak li Santil Musikˈej cuan kiqˈuin, nakanau chi ya̱l nak takacˈul chixjunil li quixyechiˈi ke. ²³ La̱in incˈaˈ xcuaj e̱kˈusbal. Joˈcan nak incˈaˈ xco̱in e̱riqˈuin aran Corinto. Li Dios naxnau nak ya̱l li yo̱quin chixyebal. ²⁴ Moco yo̱co ta xminbal e̱ru saˈ le̱ pa̱ba̱l. Ac cau e̱chˈo̱l saˈ le̱ pa̱ba̱l. Yo̱co ban che̱tenkˈanquil re nak sahak e̱chˈo̱l saˈ le̱ pa̱ba̱l.