M’Cheyne Bible Reading Plan

Laj Juan laj Cubsihom Haˈ quixye resil lix cˈulunic li Jesucristo

3  Yo̱ oˈlaju chihab roquic chokˈ acuabej laj Tiberio César, nak cua̱nk laj Poncio Pilato chi takla̱nc saˈ li tenamit Judea. Laj Herodes aˈan cua̱nk chi takla̱nc saˈ li tenamit Galilea. Ut laj Felipe li ri̱tzˈin cua̱nk chi takla̱nc saˈ li tenamit Iturea ut saˈ li naˈajej Traconite, ut laj Lisanias cua̱nk chi takla̱nc saˈ li tenamit Abilinia. ² Ut cuanqueb chokˈ xbe̱nil aj tij laj Anás ut laj Caifás. Saˈ eb li cutan aˈan laj Juan li ralal laj Zacarías quia̱tina̱c xban li Dios nak cuan chak saˈ li chaki chˈochˈ. ³ Laj Juan co̱ saˈ li naˈajej cuan cuiˈ li nimaˈ Jordán ut qui‑oc chixchˈolobanquil li xya̱lal chiruheb li tenamit li cuanqueb aran. Quixye reheb nak tento teˈyotˈekˈ xchˈo̱l teˈxjal xcˈaˈux ut teˈxcˈul li cubi haˈ re nak li Dios tixcuy tixsach lix ma̱queb. ⁴ Li profeta Isaías quia̱tinac chirix laj Juan nak quixye chi joˈcaˈin:

⁷ Quiril nak nabaleb li yo̱queb chi cuulac yal re ta̱cubsi̱k xhaˈeb. Joˈcan nak quixye reheb: ―La̱ex chanchanex li ral li cˈambolay. ¿Ani xyehoc e̱re nak ta̱ru̱k te̱col e̱rib chiru lix joskˈil li Dios li ta̱cha̱lk saˈ e̱be̱n? ⁸ Cheba̱nuhak ban li us re nak ta̱cˈutu̱nk nak xyotˈeˈ e̱chˈo̱l ut xejal e̱cˈaˈux. Chanchanakex li cheˈ cha̱bil li ru naxqˈue. Me̱cˈoxla nak incˈaˈ te̱cˈul xjoskˈil li Dios yal xban nak la̱ex li ralal xcˈajol laj Abraham. La̱in tinye e̱re nak li Dios ta̱ru̱k tixyoˈobtesi li pec aˈin chokˈ ralal xcˈajol laj Abraham. ⁹ Qˈuehomak retal xban nak cha̱lc re li rakba a̱tin saˈ e̱be̱n joˈ nak ac cauresinbil li ma̱l re xyocˈbal lix xeˈ li cheˈ. Ut chixjunil li cheˈ incˈaˈ cha̱bil li ru naxqˈue, nayocˈman ut naqˈueman saˈ xam, chan laj Juan. ¹⁰ Ut eb li tenamit yo̱queb chixpatzˈbal re: ―¿Cˈaˈru tento takaba̱nu re nak incˈaˈ ta̱rakekˈ a̱tin saˈ kabe̱n? chanqueb. ¹¹ Quichakˈoc laj Juan ut quixye reheb: ―Li ani cuan cuibak sumal rakˈ chixqˈuehak jun sumalak re li ma̱cˈaˈ re. Ut li ani cuan xtzacae̱mk, chixqˈuehak re li ma̱cˈaˈ re, chan. ¹² Cuanqueb ajcuiˈ aj titzˈol toj queˈchal re teˈcubsi̱k xhaˈ xban laj Juan ut queˈxye re: ―¿Cˈaˈru takaba̱nu la̱o? chanqueb. ¹³ Ut aˈan quixye reheb: ―Me̱patzˈ xbe̱n li toj li ac yebil reheb nak teˈxqˈue, chan. ¹⁴ Ut cuanqueb ajcuiˈ soldado queˈpatzˈoc ut queˈxye re: ―Ut la̱o, ¿cˈaˈru takaba̱nu? chanqueb. Quixye reheb: ―Ma̱ ani te̱makˈ cˈaˈru re ut ma̱ ani te̱kˈaba chi ma̱cˈaˈ rajbal. Chicˈojla̱k ban e̱chˈo̱l riqˈuin li joˈ qˈuial nequextojeˈ cuiˈ, chan. ¹⁵ Chixjunileb li tenamit yo̱queb chixcˈoxlanquil ut queˈxye saˈ xchˈo̱leb: ―¿Ma ma̱cuaˈ ta cuiˈ aˈan li Cristo, laj Colonel li yo̱co chiroybeninquil? chanqueb. ¹⁶ Laj Juan quichakˈoc ut quixye reheb chixjunileb: ―Ya̱l nak la̱in nincubsin haˈ riqˈuin haˈ. Abanan cha̱lc re li kˈaxal nim xcuanquil. Xban nak kˈaxal nim xcuanquil chicuu la̱in, moco incˈulub ta nak tinhit xcˈa̱mal lix xa̱b. Aˈan tixcubsi e̱haˈ riqˈuin li Santil Musikˈej ut riqˈuin xam. ¹⁷ Aˈan chanchan jun aj acuinel ac cuan chak xcˈanjeleba̱l saˈ rukˈ. Ta̱rapu chi us li ru li trigo ut tixxoc lix trigo saˈ lix cˈu̱leba̱l ut li rix tixcˈat saˈ li xam. Joˈcan ajcuiˈ nak li Dios ta̱risiheb li incˈaˈ nequeˈpa̱ban saˈ xya̱nkeb li ralal xcˈajol ut tixtaklaheb saˈ li xam li incˈaˈ nachup. Li ralal xcˈajol ta̱cua̱nk xyuˈameb chi junelic, chan laj Juan. ¹⁸ Joˈcan nak yo̱ chixchˈolobanquil xnaˈlebeb li tenamit. Naxsicˈ chanru nak naxchˈolob chi tzˈakal li cha̱bil esilal chiruheb. ¹⁹ Ut laj Herodes, li nataklan saˈ li tenamit Galilea, quikˈuseˈ chi cau xban laj Juan xban nak quixcˈam chokˈ rixakil lix Herodías, li rixakil laj Felipe li ri̱tzˈin. Ut quikˈuseˈ ajcuiˈ riqˈuin chixjunil li ma̱usilal naxba̱nu. ²⁰ Ut kˈaxal cuiˈchic numtajenak li ma̱usilal quixba̱nu nak quixqˈue saˈ tzˈalam laj Juan.

Quicubsi̱c xhaˈ li Jesús xban laj Juan laj Cubsihom Haˈ

²¹ Saˈ jun li cutan nak toj ma̱jiˈ quiqˈueheˈ saˈ tzˈalam laj Juan, yo̱ chixcubsinquil xhaˈeb nabal li tenamit, ut quixcubsi ajcuiˈ xhaˈ li Jesús. Ut nak yo̱ chi tijoc li Jesús, quiril nak quiteli li choxa chiru. ²² Li Santil Musikˈej chanchan jun li paloma nak yo̱ chak chi cubec saˈ xbe̱n li Jesús ut qui‑abi̱c xya̱b xcux li Dios toj saˈ choxa nak quixye: ―La̱at li cualal raro̱cat inban. Nasahoˈ inchˈo̱l a̱cuiqˈuin, chan.

Aˈan eb aˈin lix xeˈto̱nil yucuaˈ li Jesús

²³ Ac cuan tana laje̱b xcaˈcˈa̱l (30) chihab re li Jesús nak quixtiquib lix cˈanjel. Chiruheb chixjunileb, li Jesús aˈan ralal laj José, li ralal laj Elí. ²⁴ Ut laj Elí, aˈan li ralal laj Matat. Laj Matat, aˈan li ralal laj Leví. Ut laj Leví, aˈan li ralal laj Melqui. Ut laj Melqui, aˈan li ralal laj Jana. Ut laj Jana, aˈan li ralal laj José. ²⁵ Laj José, aˈan li ralal laj Matatías. Ut laj Matatías, aˈan li ralal laj Amós. Ut laj Amós, aˈan li ralal laj Nahum. Ut laj Nahum, aˈan li ralal laj Esli. Ut laj Esli, aˈan li ralal laj Nagai. ²⁶ Ut laj Nagai, aˈan li ralal laj Maat. Ut laj Maat, aˈan li ralal laj Matatías. Ut laj Matatías, aˈan li ralal laj Semei. Ut laj Semei, aˈan li ralal laj José. Ut laj José, aˈan li ralal laj Judá. ²⁷ Laj Judá, aˈan li ralal laj Joana. Ut laj Joana, aˈan li ralal laj Resa. Ut laj Resa, aˈan li ralal laj Zorobabel. Ut laj Zorobabel, aˈan li ralal laj Salatiel. Ut laj Salatiel, aˈan li ralal laj Neri. ²⁸ Ut laj Neri, aˈan li ralal laj Melqui. Ut laj Melqui, aˈan li ralal laj Adi. Ut laj Adi, aˈan li ralal laj Cosam. Ut laj Cosam, aˈan li ralal laj Elmodam. Ut laj Elmodam, aˈan li ralal laj Er. ²⁹ Ut laj Er, aˈan li ralal laj Josué. Ut laj Josué, aˈan li ralal laj Eliezer. Ut laj Eliezer, aˈan li ralal laj Jorim. Ut laj Jorim, aˈan li ralal laj Matat. ³⁰ Ut laj Matat, aˈan li ralal laj Leví. Ut laj Leví, aˈan li ralal laj Simeón. Ut laj Simeón, aˈan li ralal laj Judá. Ut laj Judá, aˈan li ralal laj José. Ut laj José, aˈan li ralal laj Jonán. Ut laj Jonán, aˈan li ralal laj Eliaquim. ³¹ Ut laj Eliaquim, aˈan li ralal laj Melea. Ut laj Melea, aˈan li ralal laj Mainán. Ut laj Mainán, aˈan li ralal laj Matata. Ut laj Matata, aˈan li ralal laj Natán. ³² Ut laj Natán, aˈan li ralal laj David. Ut laj David, aˈan li ralal laj Isaí. Ut laj Isaí, aˈan li ralal laj Obed. Ut laj Obed, aˈan li ralal laj Booz. Ut laj Booz, aˈan li ralal laj Salmón. Ut laj Salmón, aˈan li ralal laj Naasón. ³³ Ut laj Naasón, aˈan li ralal laj Aminadab. Ut laj Aminadab, aˈan li ralal laj Aram. Ut laj Aram, aˈan li ralal laj Esrom. Ut laj Esrom, aˈan li ralal laj Fares. Ut laj Fares, aˈan li ralal laj Judá. ³⁴ Ut laj Judá, aˈan li ralal laj Jacob. Ut laj Jacob, aˈan li ralal laj Isaac. Ut laj Isaac, aˈan li ralal laj Abraham. Ut laj Abraham, aˈan li ralal laj Taré. Ut laj Taré, aˈan li ralal laj Nacor. ³⁵ Ut laj Nacor, aˈan li ralal laj Serug. Ut laj Serug, aˈan li ralal laj Ragau. Ut laj Ragau, aˈan li ralal laj Peleg. Ut laj Peleg, aˈan li ralal laj Heber. Ut laj Heber, aˈan li ralal laj Sala. ³⁶ Ut laj Sala, aˈan li ralal laj Cainán. Ut laj Cainán, aˈan li ralal laj Arfaxad. Ut laj Arfaxad, aˈan li ralal laj Sem. Ut laj Sem, aˈan li ralal laj Noé. Ut laj Noé, aˈan li ralal laj Lamec. ³⁷ Ut laj Lamec, aˈan li ralal laj Matusalén. Ut laj Matusalén, aˈan li ralal laj Enoc. Ut laj Enoc, aˈan li ralal laj Jared. Ut laj Jared, aˈan li ralal laj Mahalaleel. Ut laj Mahalaleel, aˈan li ralal laj Cainán. ³⁸ Ut laj Cainán, aˈan li ralal laj Enós. Ut laj Enós, aˈan li ralal laj Set. Ut laj Set, aˈan li ralal laj Adán. Ut laj Adán, aˈan li ralal li Dios.

Qˈuebilo chi cˈanjelac chiru li Ka̱cuaˈ

4  Joˈcan nak chenauhak nak la̱o yal aj cˈanjelo chiru li Cristo ut qˈuebil saˈ kabe̱n xchˈolobanquil lix ya̱lal li colba‑ib li quiqˈueheˈ ke xban li Dios. Li xya̱lal aˈin mukmu nak quicuan chak junxil. ² Li ani sicˈbil ru chixchˈolobanquil li xya̱lal tento nak ti̱cak xchˈo̱l. ³ La̱in ma̱cˈaˈ nacuaj re cui yo̱quex chixsicˈbal a̱tin chicuix ut ma̱cˈaˈ nacuaj re cui junak aj rakol a̱tin ta̱tzˈilok a̱tin chicuix. Chi moco la̱in naru tincuechˈ rix lin cˈanjel. ⁴ La̱in nacuecˈa nak ma̱cˈaˈ inma̱c. Abanan moco xban ta aˈan nak tinye nak ti̱c inchˈo̱l. Aˈ li ta̱rakok a̱tin saˈ inbe̱n aˈan li Ka̱cuaˈ, ut aˈan ta̱yehok re ma us xinba̱nu malaj incˈaˈ. ⁵ Joˈcan nak mexrakoc a̱tin chirix le̱ ras e̱ri̱tzˈin. Cheroybeni toj ta̱cuulak xkˈehil nak tol‑e̱lk cuiˈchic li Ka̱cuaˈ Jesucristo ut aˈan tixcˈutbesi li incˈaˈ nanauman anakcuan. Tixcˈutbesi li cˈaˈru nanumeˈ saˈ xchˈo̱l li junju̱nk. Ut li Dios tixqˈue xlokˈal li junju̱nk aˈ yal chanru lix yehom xba̱nuhom. ⁶ Ex herma̱n, chixjunil li xinye chirix laj Apolos ut chicuix re e̱tenkˈanquil nak xinye. Nacuaj nak te̱tau ru li cˈaˈru xinye. Chetzol e̱rib kiqˈuin re nak te̱ba̱nu joˈ tzˈi̱banbil saˈ li Santil Hu. Incˈaˈ naru te̱nimobresi e̱rib xban nak nequeta̱ke li jun ut nequetzˈekta̱na li jun chic. ⁷ ¿Ma jalanex ta biˈ la̱ex chiruheb li jun chˈo̱l chic nak nequerecˈa e̱rib? ¿Ma ma̱cuaˈ ta biˈ li Dios quiqˈuehoc e̱re li cˈaˈru cuan e̱re? ¿Cˈaˈut nak nequenimobresi e̱rib chixyebal nak cuan cˈaˈru e̱re? Incˈaˈ naru te̱nimobresi e̱rib xban nak yal xema̱tani li cˈaˈru cuan e̱re riqˈuin li Dios. ⁸ Ac xcˈojla e̱chˈo̱l xban nak saˈ e̱chˈo̱l la̱ex nak ac xetau e̱naˈleb. Chanchanex li biom saˈ le̱ pa̱ba̱l nak nequecˈoxla. ¿Ma la̱ex chic rey nak nequecˈoxla? Saˈ e̱chˈo̱l la̱ex nak ma̱cˈaˈ kacuanquil. Us raj ac ta cuan xetau e̱naˈaj chokˈ rey, re nak tocua̱nk ajcuiˈ raj la̱o chi takla̱nc e̱rochben. ⁹ Nak nincˈoxla la̱in li Dios xoxqˈue la̱o li apóstol chi ma̱cˈaˈ kacuanquil. Chanchano junak aj ma̱c li ac xteneba̱c ca̱mc saˈ xbe̱n ut qˈuebilo chiruheb li ángel ut chiruheb li cui̱nk re toeˈril. ¹⁰ La̱ex nequecˈoxla nak ma̱cˈaˈ kanaˈleb xban nak nakachˈolob resil li Cristo ut la̱ex cuan e̱naˈleb xban nak nequenau nabal chirix li Cristo nak nequecˈoxla. La̱o ma̱cˈaˈ kacuanquil ut la̱ex cuan e̱cuanquil nak nequecˈoxla. Saˈ e̱chˈo̱l la̱ex nak la̱ex nequex‑oxlokˈi̱c ut la̱o tzˈekta̱nanbilo. ¹¹ Toj chalen anakcuan yo̱co chixcuybal kasaˈ ut ta̱chakik ke. Ma̱cˈaˈ chic kakˈ. Sacˈbilo ut ma̱cˈaˈ kochoch. ¹² Cau nocotrabajic re xnumsinquil li cutan junju̱nk. Nak nequeˈxba̱nu ma̱usilal ke, la̱o nakaba̱nu usilal reheb. Ra nequeˈxba̱nu ke li xicˈ nequeˈiloc ke ut nakacuy xnumsinquil li raylal li nequeˈxba̱nu ke. ¹³ Nak nocohobeˈ incˈaˈ nakasume ru. Nequeˈka̱tina ban saˈ usilal. Chalen anakcuan tzˈekta̱nanbilo xbaneb chixjunileb. Ma̱cˈaˈ noco‑oc cuiˈ nak nocoeˈril. Chanchano li mul chiruheb. ¹⁴ Ma̱cuaˈ re xcˈutbal e̱xuta̱n nak yo̱quin chixyebal e̱re chi joˈcaˈin. Re ban xqˈuebal e̱naˈleb xban nak chanchanex li cualal incˈajol chicuu ut raro̱quex inban. ¹⁵ Usta cuan laje̱bak mil li nequeˈchˈoloban xya̱lal li Cristo che̱ru, abanan la̱in li xinyehoc e̱re resil li colba‑ib junxil nak xexpa̱ban. Joˈcan nak la̱in le̱ yucuaˈ saˈ xcˈabaˈ li Jesucristo. ¹⁶ Joˈcan ut nak nintzˈa̱ma che̱ru nak te̱tzol e̱rib cuiqˈuin ut te̱ba̱nu joˈ ninba̱nu la̱in. ¹⁷ Aˈan aj e nak xintakla e̱riqˈuin laj Timoteo. Aˈan tixjultica e̱re nak li cˈaˈru yo̱quin chixchˈolobanquil chirix li Cristo, aˈan ajcuiˈ li yo̱quin chixba̱nunquil. Ninchˈolob chi tzˈakal lix ya̱lal yalak bar chiruheb chixjunileb laj pa̱banel. Laj Timoteo chanchan li cualal ut raro inban. Tzˈakal re ru lix pa̱ba̱l saˈ xcˈabaˈ li Jesucristo. ¹⁸ Cuan li xeˈkˈetkˈetoˈ saˈ e̱ya̱nk. Eb aˈan nequeˈxye nak ninxucuac. Joˈcan nak incˈaˈ chic ninxic e̱riqˈuin. ¹⁹ Aˈan moco ya̱l ta. Cui li Dios naxqˈue cue, chi se̱b tincuulak e̱riqˈuin. Aran toxintau xya̱lal. Tincuil ma caˈaj cuiˈ a̱tinac nequeˈxnau li kˈetkˈeteb. Toj aran tincuil ma ya̱l na nak cuan xcuanquil li Dios riqˈuineb. ²⁰ Lix nimajcual cuanquilal li Dios, tento ta̱cˈutu̱nk saˈ li kayuˈam. Moco caˈaj cuiˈ ta riqˈuin ka̱tin ta̱cˈutu̱nk xcuanquil li Dios. ²¹ La̱in ninpatzˈ e̱re cˈaˈru te̱raj. ¿Ma te̱raj nak texinkˈus chi cau nak tincuulak e̱riqˈuin? ¿Malaj ut te̱yi̱b le̱ yuˈam re nak tincuulak riqˈuin rahoc ut tu̱lanil?