M’Cheyne Bible Reading Plan

Joˈcaˈin nak quiyoˈla li Jesús

2  Saˈ eb li cutan aˈan li acuabej César Augusto quixqˈue jun li chakˈrab re nak chixjunileb li tenamit teˈajla̱k ut teˈxqˈue xcˈabaˈeb chi tzˈi̱ba̱c. ² Aˈin li xbe̱n sut nak queˈxtzˈi̱ba xcˈabaˈeb li tenamit. Aˈan quicˈulman nak cua̱nk laj Cirenio chi takla̱nc saˈ li naˈajej Siria. ³ Chixjunileb queˈco̱eb xqˈuebaleb xcˈabaˈ chi tzˈi̱ba̱c. Ac saˈ xtenamiteb li junju̱nk queˈco̱eb chixtzˈi̱banquileb lix cˈabaˈ. ⁴ Laj José qui‑el saˈ li tenamit Nazaret li cuan saˈ xcue̱nt Galilea ut co̱ Belén li cuan xcue̱nt Judea. Aˈan xtenamit li rey David. Aran co̱ xban nak aˈan xcomoneb li ralal xcˈajol laj David. ⁵ Aran quixqˈue xcˈabaˈ chi tzˈi̱ba̱c rochben lix María li ac tzˈa̱manbil xban. Lix María ac yaj aj ixk. ⁶ Nak ac cuanqueb aran Belén quicuulac xkˈehil nak ta̱yoˈla̱k lix cˈulaˈal. ⁷ Ut quiyoˈla li xbe̱n xcˈulaˈal, quixlan saˈ tˈicr ut quixyocob saˈ xnaˈaj xcuaheb li cuacax xban nak ma̱cˈaˈ xnaˈajeb saˈ eb li ochoch.

Nak queˈrabi resil lix yoˈlajic li Jesús, eb laj ilol xul queˈco̱eb chixlokˈoninquil

⁸ Nachˈ riqˈuin li tenamit Belén cuanqueb aj ilol xul yo̱queb chixcˈacˈalenquil lix queto̱mk chi kˈek. ⁹ Ma̱cˈaˈ saˈ xchˈo̱leb nak xaka̱mil jun x‑ángel li Ka̱cuaˈ chiruheb. Ut quisakenoˈ chi xjun sutam li cuanqueb cuiˈ. Ut eb laj ilol xul cˈajoˈ nak queˈxucuac. ¹⁰ Abanan li ángel quixye reheb: ―Mexxucuac xban nak la̱in xinchal xyebal e̱re jun cha̱bil esilal. Aˈin jun sahil chˈo̱lej chokˈ reheb chixjunileb li tenamit. ¹¹ Anakcuan xyoˈla jun laj Colol e̱re saˈ lix tenamit laj David ut aˈan li Cristo li Ka̱cuaˈ li yechiˈinbil xban li Dios. ¹² Joˈcaˈin nak te̱tau. Li cˈulaˈal lanbil saˈ tˈicr ut yocyo saˈ xbe̱n li qˈuim saˈ xnaˈaj xcuaheb li cuacax. Aˈin li retalil nak aˈan li te̱tau, chan li ángel. ¹³ Ut saˈ junpa̱t queˈchal nabaleb chic li ángel saˈ choxa. Yo̱queb chixlokˈoninquil li Ka̱cuaˈ ut yo̱queb chixyebal: ¹⁴ ―Chinima̱k taxak xlokˈal li Ka̱cuaˈ Dios li cuan saˈ choxa ut chicua̱nk taxak li tuktu̱quilal saˈ xya̱nkeb li cristian li raro̱queb xban li Dios.― ¹⁵ Nak ac xco̱eb li ángel saˈ choxa, eb laj ilol xul queˈoc chixyebal chi ribileb rib: ―Yo̱keb Belén ut takil chak li cˈaˈru xcˈulman, li xtakla xyebal ke li Ka̱cuaˈ, chanqueb. ¹⁶ Co̱eb saˈ a̱nil ut queˈxtau lix María rochben laj José ut li cˈulaˈal yocyo saˈ xnaˈaj xcuaheb li xul. ¹⁷ Ut nak ac xeˈxtau, queˈxserakˈi reheb li cˈaˈru quiyeheˈ reheb chirix li cˈulaˈal. ¹⁸ Ut chixjunileb li queˈabin re li cˈaˈru queˈxye laj ilol xul, sachso̱queb xchˈo̱l queˈcana. ¹⁹ Ut lix María quixcˈu̱la saˈ xchˈo̱l chixjunil li cˈaˈru quicˈulman ut yo̱ chixcˈoxlanquil rix. ²⁰ Ut chirix chic aˈan eb laj ilol xul queˈsukˈi saˈ lix naˈajeb. Yo̱queb chixlokˈoninquil ut yo̱queb chixnimanquil ru li Ka̱cuaˈ riqˈuin li cˈaˈru queˈrabi ut queˈril xban nak chixjunil li queˈril, aˈan joˈ li quiyeheˈ reheb.

Li Jesús quikˈaxtesi̱c saˈ rukˈ li Dios saˈ li templo

²¹ Cuakxakib cutan cuan re li cˈulaˈal nak quixcˈul li circuncisión ut Jesús queˈxqˈue chokˈ xcˈabaˈ, joˈ quiyeheˈ re lix María xban li ángel nak toj ma̱jiˈ nacana chi yaj. ²² Lix María quixba̱nu joˈ naxye saˈ lix chakˈrab laj Moisés. Nak ac xnumeˈ caˈcˈa̱l cutan, lix María rochben laj José queˈxcˈam li cˈulaˈal Jerusalén ut queˈxkˈaxtesi chiru li Ka̱cuaˈ. ²³ Queˈxba̱nu chi joˈcan xban nak saˈ li chakˈrab li quiqˈueheˈ reheb xban li Ka̱cuaˈ naxye nak li xbe̱n alalbej tento ta̱kˈaxtesi̱k saˈ rukˈ li Ka̱cuaˈ. ²⁴ Ut teˈxqˈue chokˈ xmayejeb jun sumalak li mucuy malaj ut cuibak li paloma li toj sa̱jeb, joˈ naxye saˈ li chakˈrab.

Laj Simeón quixqˈue xlokˈal li Jesús ut quixye ajcuiˈ resil li raylal li tixcˈul

²⁵ Aran Jerusalén cuan jun li cui̱nk aj Simeón xcˈabaˈ. Li cui̱nk aˈan ti̱c xchˈo̱l ut naxqˈue xlokˈal li Dios. Yo̱ chiroybeninquil nak li Dios ta̱risiheb saˈ raylal laj Israel. Ut cuan li Santil Musikˈej riqˈuin. ²⁶ Li Santil Musikˈej quixcˈutbesi chiru laj Simeón nak aˈan incˈaˈ ta̱ca̱mk toj ta̱ril ru li Cristo li Colonel li quixyechiˈi li Ka̱cuaˈ Dios. ²⁷ Li Santil Musikˈej quixcˈut chiru laj Simeón nak ta̱xic saˈ li templo xban nak saˈ li ho̱nal aˈan quicˈameˈ li Jesús saˈ li templo xban laj José ut lix María re nak teˈxkˈaxtesi saˈ rukˈ li Dios joˈ naxye saˈ li chakˈrab. ²⁸ Ut laj Simeón quixkˈalu li Jesús, quixqˈue xlokˈal li Ka̱cuaˈ ut quixye:

³³ Laj José ut li naˈbej sachso̱queb xchˈo̱l queˈcana chirabinquil li yo̱ chixyebal laj Simeón chirix li Jesús. ³⁴ Ut laj Simeón quixtzˈa̱ma rusilal li Dios saˈ xbe̱neb ut quixye re lix María li naˈbej: ―Chacuabi li oc cue xyebal a̱cue. Saˈ xcˈabaˈ li cˈulaˈal aˈin, nabaleb laj Israel teˈcolekˈ ut saˈ xcˈabaˈ ajcuiˈ aˈan nabaleb li teˈsachk. Ut nabaleb li teˈtzˈekta̱na̱nk re. ³⁵ Riqˈuin li raylal teˈxba̱nu re, ta̱cˈutu̱nk chi tzˈakal li cˈaˈru cuan saˈ xchˈo̱leb li xicˈ nequeˈiloc re. Ut cˈajoˈ nak ta̱rahokˈ a̱chˈo̱l la̱at xban li raylal teˈxba̱nu re. Chanchan nak teˈxnumsi jun chˈi̱chˈ saˈ la̱ cua̱m, chan laj Simeón. ³⁶ Ut cuan ajcuiˈ jun li xma̱lcaˈan aran profeta, xAna xcˈabaˈ. Aˈan xrabin laj Fanuel xcomoneb li ralal xcˈajol laj Aser. Ac ti̱x chic. Toj sa̱j nak quisumla ut cuukub chihab ajcuiˈ quicuan rochben lix be̱lom. ³⁷ Ac cuan chic ca̱hib roˈcˈa̱l chihab (84) xcanajic xjunes. Aˈan cuan junelic saˈ li templo. Yo̱ chi cˈanjelac chiru li Ka̱cuaˈ chi kˈek chi cutan. Junelic yo̱ chi tijoc ut yo̱ chixba̱nunquil x‑ayu̱n. ³⁸ Saˈ li ho̱nal aˈan quicuulac cuan cuiˈ li Jesús. Yo̱ chixlokˈoninquil li Dios ut qui‑oc chi a̱tinac chirix li cˈulaˈal riqˈuineb laj Jerusalén li yo̱queb chiroybeninquil lix colbaleb. ³⁹ Nak ac queˈxba̱nu chixjunil li naxye saˈ li chakˈrab li quixqˈue li Ka̱cuaˈ, laj José ut lix María queˈsukˈi saˈ li tenamit Nazaret li cuan saˈ xcue̱nt Galilea. ⁴⁰ Ut li cˈulaˈal yo̱ chi qˈui̱c ut yo̱ chi cacuu̱c xchˈo̱l. Ut yo̱ chixtaubal xnaˈleb. Ut li rusilal li Ka̱cuaˈ cuan riqˈuin.

Li Jesús quicana saˈ li templo ut quia̱tinac riqˈuineb laj tzolol chakˈrab

⁴¹ Rajlal chihab nequeˈxic lix naˈ xyucuaˈ aran Jerusalén chixninkˈeinquil li reliqueb Egipto. Pascua nequeˈxye re li ninkˈe aˈan. ⁴² Nak ac cuan cablaju chihab re li Jesús, co̱eb aran Jerusalén saˈ li ninkˈe joˈ cˈaynakeb xba̱nunquil. ⁴³ Ut nak ac xrakeˈ li ninkˈe queˈsukˈi saˈ lix tenamiteb. Ut li Jesús quicana Jerusalén chi incˈaˈ naxnau laj José chi moco li naˈbej. ⁴⁴ Saˈ xchˈo̱leb aˈan nak cuan saˈ xya̱nkeb li rochben. Jun cutan ac xeˈbe̱c nak queˈxqˈue retal nak ma̱ ani. Ut queˈoc chixsicˈbal saˈ xya̱nkeb li rechˈalal ut saˈ xya̱nkeb li nequeˈnaˈoc ru. ⁴⁵ Queˈril nak incˈaˈ queˈxtau. Queˈsukˈi cuiˈchic Jerusalén chixsicˈbal. ⁴⁶ Nak ac xnumeˈ chic oxib cutan, queˈxtau aran saˈ li templo. Cˈojcˈo saˈ xya̱nkeb li nequeˈxnau chi us li cˈaˈru naxye saˈ li chakˈrab. Yo̱ chirabinquil li yo̱queb chixyebal ut yo̱ ajcuiˈ chi patzˈoc reheb. ⁴⁷ Ut chixjunileb li yo̱queb chi abi̱nc re sachso̱queb xchˈo̱l nequeˈcana xban nak cuan xnaˈleb ut naxnau xsumenquil li cˈaˈru nequeˈxpatzˈ re. ⁴⁸ Lix naˈ xyucuaˈ sachso̱queb xchˈo̱l queˈcana nak queˈril nak li Jesús yo̱ chi a̱tinac riqˈuineb. Ut lix naˈ quixye re: ―At inyum, ¿cˈaˈut nak xaba̱nu ke chi joˈcaˈin? Cˈajoˈ kacˈaˈux cha̱cuix. La̱ yucuaˈ ut la̱in yo̱co cha̱sicˈbal, chan lix María. ⁴⁹ Quichakˈoc li Jesús ut quixye re: ―¿Cˈaˈut nak yo̱quex chinsicˈbal? ¿Ma incˈaˈ ta biˈ nequenau nak tento tinba̱nu lix cˈanjel lin Yucuaˈ? chan li Jesús. ⁵⁰ Ut eb aˈan incˈaˈ queˈxtau ru cˈaˈut nak quixye reheb chi joˈcan. ⁵¹ Li Jesús quisukˈi Jerusalén rochbeneb lix naˈ xyucuaˈ ut na‑abin chiruheb. Ut lix naˈ quixcˈu̱la saˈ xchˈo̱l chixjunil li quicˈulman. ⁵² Li Jesús yo̱ chi qˈui̱c ut yo̱ ajcuiˈ chixtaubal xnaˈleb. Quiraheˈ xban li Dios ut quiraheˈ ajcuiˈ xbaneb li tenamit.

Yal aj cˈanjelo chiru li Dios

3  Ex inherma̱n, nak cuanquin e̱riqˈuin incˈaˈ quiru quina̱tinac e̱riqˈuin joˈ nina̱tinac riqˈuineb li ac cauheb xchˈo̱l saˈ lix pa̱ba̱leb. La̱ex chanchan ma̱cˈaˈ li Santil Musikˈej e̱riqˈuin. Joˈcan nak nina̱tinac e̱riqˈuin joˈ nak nina̱tinac riqˈuineb li toj kˈun xchˈo̱leb saˈ lix pa̱ba̱leb. ² Li xya̱lal xinchˈolob che̱ru chanchan nak leche xinqˈue cherucˈ. Moco cacuil tzacae̱mk ta xinqˈue e̱re xban nak la̱ex toj ma̱jiˈ nequexqˈui. Naraj naxye nak toj ma̱jiˈ ninchˈolob che̱ru li naˈleb li chˈaˈaj xtaubal ru xban nak toj ma̱jiˈ nequexqˈui saˈ le̱ pa̱ba̱l ut ma̱min te̱tau ru. ³ Incˈaˈ texru̱k xtaubal ru anakcuan xban nak toj nequeba̱nu li cˈaˈru naxrahi ru le̱ chˈo̱l. Nak toj cuan li cakali̱nc ib ut li cuechˈi̱nc ib saˈ e̱ya̱nk, ¿ma incˈaˈ ta biˈ yo̱quex chi xba̱nunquil li cˈaˈru naxrahi ru le̱ chˈo̱l? Ut la̱ex nequejuntakˈe̱ta e̱rib riqˈuineb li toj ma̱cˈaˈ li Santil Musikˈej riqˈuineb. ⁴ La̱ex toj ma̱jiˈ junaj le̱ chˈo̱l. Cuan li nequeˈxye, “la̱in ninta̱ke laj Pablo”. Ut cuan cuiˈchic li nequeˈxye, “la̱in ninta̱ke laj Apolos”. Cui joˈcan yo̱quex chixyebal, ¿ma incˈaˈ ta biˈ toj yo̱quex chixjuntakˈe̱tanquil e̱rib riqˈuineb li toj ma̱jiˈ nequeˈpa̱ban? ⁵ ¿Ani ta biˈ laj Apolos? Ut, ¿anihin ta biˈ la̱in? La̱o yal aj cˈanjelo chiru li Ka̱cuaˈ. Xkachˈolob xya̱lal che̱ru nak xepa̱b li Ka̱cuaˈ. Ut chi kacabichalo nococˈanjelac joˈ taklanbilo cuiˈ xban li Ka̱cuaˈ. ⁶ Chanchano aj acuinel nak nococˈanjelac chiru li Dios. Chanchan a̱uc xinba̱nu nak xinye resil li colba‑ib e̱re. Ut chanchan tˈakresi̱nc quixba̱nu laj Apolos nak quixchˈolob lix ya̱lal che̱ru. Abanan aˈ li Dios quiqˈuehoc lix mokic. ⁷ Joˈcan nak chi moco laj acuinel chi moco laj tˈakresinel cuan xcuanquil. Caˈaj cuiˈ li Dios li naqˈuehoc xmokic cuan xcuanquil. ⁸ Laj acuinel ut laj tˈakresinel juntakˈe̱teb xcuanquil chiru li Dios ut chi xju̱nkaleb teˈxcˈul xkˈajca̱munquil aˈ ya̱l chanru lix cˈanjeleb. ⁹ La̱o kech aj cˈanjelil kib chiru li Dios. Ut la̱ex chanchanex li chˈochˈ li nakacˈanjela ru. Ut li Dios aˈan laj e̱chal re li chˈochˈ. Ut chanchanex ajcuiˈ jun li cab yo̱co chixyi̱banquil ut li Dios, aˈan laj e̱chal re li cab aˈan. ¹⁰ Xban nak sicˈbil cuu xban li Dios chi cˈanjelac chiru joˈ jun aj tzˈac cha̱bil, joˈcan nak xinnau xjolominquil li cˈanjel. Chanchan nak xinyi̱b xcimiento li cab nak xinye resil li colba‑ib ut jalan chic teˈcablak saˈ xbe̱n nak teˈxchˈolob li xya̱lal che̱ru. Ut li junju̱nk chixqˈuehak retal nak tzˈakal re ru lix cˈanjel tixba̱nu. ¹¹ Tixqˈue retal chanru lix cˈanjel xban nak ac qˈuebil lix cimiento li cab. Ut ma̱ ani naru tixqˈue junak chic li cimiento chiru li ac qˈuebil. Ut aˈan li Ka̱cuaˈ Jesucristo. ¹² Cuan li teˈcablak saˈ xbe̱n li cimiento aˈan riqˈuin li cˈaˈak re ru najt naxcuy joˈ li oro, li plata ut li terto̱quil pec. Ut cuan li teˈcablak saˈ xbe̱n riqˈuin li incˈaˈ naxcuy joˈ li cheˈ, li cu̱c ut li qˈuim. Lix ya̱lal aˈan, aˈin: nak cuan li teˈcˈanjelak chi cha̱bil chiru li Dios ut cuan incˈaˈ. ¹³ Lix cˈanjel li junju̱nk ta̱cˈutu̱nk nak tol‑e̱lk cuiˈchic li Ka̱cuaˈ Jesucristo chi rakoc a̱tin. Chanchan nak ta̱numsi̱k saˈ xam lix cˈanjel naxba̱nu re rilbal ma ta̱osokˈ malaj incˈaˈ. ¹⁴ Cui lix cˈanjel incˈaˈ ta̱sachekˈ, nacˈutun nak us lix cˈanjel ut li jun aˈan tixcˈul lix kˈajca̱munquil. ¹⁵ Cui ut lix cˈanjel junak incˈaˈ tzˈakal re ru, lix cˈanjel ta̱sachk chanchan cˈatbil nak ta̱osokˈ. Ut li jun aˈan ta̱colekˈ, abanan chanchan ta̱numekˈ saˈ xam nak ta̱colekˈ. ¹⁶ ¿Ma incˈaˈ ta biˈ nequenau nak la̱ex rochochex li Dios? ¿Ma incˈaˈ ta biˈ nequenau nak li Santil Musikˈej cuan e̱riqˈuin? ¹⁷ Li rochoch li Dios aˈan santo. Cui ani naxtiquib li jachoc ib saˈ e̱ya̱nk, li jun aˈan yo̱ chixjucˈbal rochoch li Dios xban nak la̱ex aj pa̱banel rochochex chic li Dios. Ut li Dios tixsach li ani naxtiquib xjachbal ruheb laj pa̱banel. ¹⁸ Ma̱ ani taxak tixbalakˈi rib xjunes. Cui cuan junak saˈ e̱ya̱nk narecˈa nak cuan xnaˈleb saˈ li ruchichˈochˈ aˈin, chixcubsihak rib ut tixba̱nu joˈ li ma̱cˈaˈ naxnau re nak tixtau xnaˈleb chi tzˈakal. ¹⁹ Lix naˈleb li ruchichˈochˈ, aˈan to̱ntil naˈleb chiru li Dios. Joˈcaˈin tzˈi̱banbil saˈ li Santil Hu:

²¹ Joˈcan nak ma̱ ani tixnimobresi ru junak cui̱nk riqˈuin li cˈaˈru naxba̱nu xban nak chixjunil li cˈaˈak re ru qˈuebil e̱re xban li Dios re nak ta̱cˈanjelak che̱ru. ²² Usta laj Apolos, usta la̱in, usta laj Pedro, la̱o yal aj cˈanjelo che̱ru. Usta li ruchichˈochˈ, usta li yuˈam, usta li ca̱mc, e̱re ajcuiˈ re nak teˈcˈanjelak che̱ru. Chixjunil li cuan anakcuan e̱re la̱ex ut e̱re ajcuiˈ li toj cha̱lel chiku. ²³ Chixjunil li cˈaˈak re ru, e̱re la̱ex. Abanan la̱ex rehex li Cristo ut li Cristo, aˈan re li Dios.