M’Cheyne Bible Reading Plan

Li nim xcuanquil, aˈan aj cˈanjel chiru li ras ri̱tzˈin

18  Saˈ li cutan aˈan queˈcuulac lix tzolom riqˈuin li Jesús ut queˈxye re: ―¿Ani li kˈaxal nim xcuanquil saˈ lix nimajcual cuanquilal li Dios?― ² Ut li Jesús quixbok jun li chˈina al riqˈuin ut quixxakab chiruheb. ³ Ut quixye reheb: ―Relic chi ya̱l tinye e̱re cui incˈaˈ te̱jal e̱naˈleb ut cui incˈaˈ kˈunak e̱chˈo̱l joˈ li chˈina al aˈin, incˈaˈ tex‑oc saˈ lix nimajcual cuanquilal li Dios. ⁴ Joˈcan nak li ani narecˈa nak ma̱cˈaˈ xcuanquil joˈ li chˈina al aˈin, aˈan li kˈaxal nim xcuanquil saˈ lix nimajcual cuanquilal li Dios. ⁵ Ut li ani ta̱cˈuluk re junak chˈina al joˈ aˈin saˈ incˈabaˈ chanchan ajcuiˈ nak la̱in xinixcˈul. ⁶ Ut li ani ta̱poˈok xchˈo̱leb li toj kˈuneb xchˈo̱l li nequeˈpa̱ban cue, kˈaxal raj us chokˈ re aˈan nak ta̱cutekˈ saˈ xchamal li palau chi bacˈbo junak nimla pec chixcux. ⁷ Tokˈob ruheb li cuanqueb saˈ ruchichˈochˈ xban nak cuan cˈaˈ re ru napoˈoc re lix chˈo̱leb. Ac chˈolchˈo nak cuan li cˈaˈru napoˈoc chˈo̱lej. Abanan raylal cha̱lel saˈ xbe̱n li ani ta̱yoˈoba̱nk re li cˈaˈ re ru ta̱poˈok chˈo̱lej.

Chetzˈekta̱na li yibru naˈleb li naqˈuehoc e̱re chi ma̱cobc

⁸ Cui la̱ cuok malaj ut la̱ cuukˈ ta̱qˈuehok a̱cue chixba̱nunquil li cˈaˈru incˈaˈ us, us raj cui ta̱yocˈ ut ta̱tzˈek. Kˈaxal us chokˈ a̱cue nak cua̱nk la̱ yuˈam chi junelic riqˈuin jun ajcuiˈ la̱ cuok ut la̱ cuukˈ chiru nak tatxic chi cuib la̱ cuok chi cuib la̱ cuukˈ saˈ li xbalba bar cuiˈ incˈaˈ ta̱chupk li xam. ⁹ Cui li xnakˈ a̱cuu ta̱qˈuehok a̱cue chixba̱nunquil li incˈaˈ us, us raj cui ta̱cuisi ut ta̱tzˈek. Kˈaxal us nak ta̱cua̱nk la̱ yuˈam chi junelic riqˈuin jun ajcuiˈ li xnakˈ a̱cuu chiru nak tatxic riqˈuin cuib li xnakˈ a̱cuu saˈ li xam re li xbalba.

Li carner sachenak

¹⁰ La̱in ninye e̱re cheqˈuehak retal me̱tzˈekta̱na junak reheb li kˈuneb xchˈo̱l saˈ lix pa̱ba̱l xban nak eb aˈan cˈacˈalenbileb xbaneb li ángel, li cuanqueb riqˈuin lin Yucuaˈ cuan saˈ choxa. ¹¹ La̱in li Cˈajolbej quincˈulun arin saˈ ruchichˈochˈ chixcolbaleb li sachenakeb saˈ li ma̱c. ¹² ¿Cˈaˈru nequecˈoxla la̱ex chirix li naˈleb aˈin li oc cue xyebal e̱re? Cuan ta junak li cui̱nk cuan oˈcˈa̱lak (100) xcarner ut cui ta̱sachk junak reheb, ¿ma incˈaˈ raj tixcanabeb li bele̱laju roˈcˈa̱l (99) chic ut ta̱xic chiruheb li tzu̱l chixsicˈbal li jun li xsach? ¹³ Relic chi ya̱l tinye e̱re nak tixtau chak li sachenak, kˈaxal ta̱sahokˈ saˈ xchˈo̱l riqˈuin li jun aˈan chiruheb li bele̱laju roˈcˈa̱l li incˈaˈ queˈsach. ¹⁴ Joˈcan ajcuiˈ le̱ Yucuaˈ cuan saˈ choxa incˈaˈ naraj nak ta̱sachk junak reheb li toj kˈuneb xchˈo̱l saˈ lix pa̱ba̱l.

Tento takacuy xma̱queb li kas ki̱tzˈin

¹⁵ Cui junak la̱ cuech aj pa̱banelil ta̱ma̱cobk cha̱cuu, ayu riqˈuin ut nak cua̱nkex e̱junes, ta̱chˈolob chiru lix ma̱c. Ut cui ta̱rabi li xnaˈleb li ta̱qˈue, la̱at xatenkˈa la̱ cuech aj pa̱banelil re nak tixcˈam rib saˈ usilal a̱cuiqˈuin. ¹⁶ Cui ut incˈaˈ naraj nacatrabi, cˈam jun malaj cuib li herma̱n a̱cuochben re nak riqˈuin li ra̱tin cuib oxib chi testigo, ta̱chˈola̱k ru chixjunil li a̱tin. ¹⁷ Ut cui incˈaˈ naraj ta̱rabiheb aˈan, ta̱ye re li iglesia re nak li herma̱n teˈxchˈolob xya̱lal chiru. Ut cui incˈaˈ ajcuiˈ naraj abi̱nc chiruheb aˈan, aˈan chic ta̱cua̱nk che̱ru joˈ chanchan li ma̱cuaˈak aj pa̱banel ut chanchanak laj titzˈol toj li incˈaˈ us nequeˈxba̱nu. ¹⁸ Relic chi ya̱l tinye e̱re nak chixjunil li cˈaˈru te̱cˈu̱b ru saˈ xya̱lal saˈ ruchichˈochˈ, li Dios tixcˈu̱b ajcuiˈ ru saˈ choxa. Li cˈaˈru te̱ye us arin saˈ ruchichˈochˈ, li Dios tixye ajcuiˈ nak us. Ut li cˈaˈru te̱ye incˈaˈ us, li Dios tixye ajcuiˈ nak incˈaˈ us. ¹⁹ Tinye e̱re cui cuan cuibak saˈ e̱ya̱nk teˈxcˈu̱b ru saˈ cuibal chirix cˈaˈru teˈtijok cuiˈ, ut teˈxtzˈa̱ma chiru lin Yucuaˈ cuan saˈ choxa, li cˈaˈru teˈxtzˈa̱ma ta̱qˈuehekˈ reheb. ²⁰ Yalak bar cua̱nkeb cuib oxib chˈutchˈu̱keb saˈ incˈabaˈ, aran ajcuiˈ cua̱nkin la̱in saˈ xya̱nkeb aˈan, chan li Jesús. ²¹ Ut laj Pedro quia̱tinac ut quixye re li Jesús: ―Ka̱cuaˈ, ¿jarub sut ta̱ru̱k tincuy xma̱c li ta̱ma̱cobk chicuu? ¿Ma tento nak cuukub sut tincuy xma̱c?― ²² Ut li Jesús quixye re: ―Incˈaˈ ninye a̱cue nak caˈaj cuiˈ cuukub sut ta̱cuy xma̱c. Tinye ban a̱cue nak ta̱cuy xma̱c cuukub sut chi laje̱tk xca̱cˈa̱l sut (70), chan.

Li jaljo̱quil ru a̱tin chirix laj cˈanjel li incˈaˈ quiraj xcuybal xma̱c li rech aj cˈanjelil

²³ Lix nimajcual cuanquilal li Dios tinjuntakˈe̱ta riqˈuin jun li rey quixbir rix lix cˈaseb laj cˈanjel chiru. ²⁴ Nak quixtiquib xbirbal rix lix cˈaseb, quicˈameˈ chak chiru li rey jun li cui̱nk laje̱b mil chi tumin lix cˈas. ²⁵ Ut xban nak ma̱cˈaˈ cˈaˈru cuan re li cui̱nk aˈan re tixtoj cuiˈ lix cˈas, joˈcan nak li rey quixtakla xcˈayinquil aˈan rech xxiquic li rixakil, ut li ralal xcˈajol ut chixjunil li cˈaˈru cuan re, re xtojbal lix cˈas. ²⁶ Ut laj cˈanjel aˈan quixcuikˈib rib chiru li rey ut quixpatzˈ xcuybal chiru ut quixye re: ―Ka̱cuaˈ, china̱cuy cuan chic caˈchˈinak, ut la̱in tintoj chixjunil lin cˈas cha̱cuu.― ²⁷ Ut li rey quiril xtokˈoba̱l ru laj cˈanjel chiru. Quirachˈab ut quixsach li retalil lix cˈas. ²⁸ Ut nak qui‑el chak laj cˈanjel riqˈuin li rey, quixcˈul jun li rech aj cˈanjelil cuan junmay chi tumin lix cˈas riqˈuin li cui̱nk aˈan. Ut laj cˈanjel, li quicuyeˈ xma̱c, quixchap chi xcux li jun li cuan xcˈas riqˈuin ut qui‑oc chixyatzˈbal ut quixye re: ―Toj la̱ cˈas, chan. ²⁹ Ut li rech aj cˈanjelil quixcuikˈib rib chiru, quixpatzˈ xcuybal ut quixye re: ―China̱cuy cuan chic caˈchˈinak ut la̱in tintoj ajcuiˈ chixjunil lin cˈas, chan re. ³⁰ Abanan li jun incˈaˈ quiraj xcuybal xma̱c. Co̱ ban ut coxqˈue chak saˈ tzˈalam toj retal quixtoj rix lix cˈas. ³¹ Nak eb li rech aj cˈanjelil queˈril li cˈaˈru quixba̱nu, cˈajoˈ nak queˈrahoˈ saˈ xchˈo̱l. Ut queˈchal coleˈxchˈolob chiru li rey chixjunil li cˈaˈru quicˈulman. ³² Tojoˈnak quibokeˈ cuiˈchic laj cˈanjel li quicuyeˈ xma̱c xban li rey. Ut li rey quixye re: ―At tzˈekbe̱tal aj cˈanjel, chixjunil la̱ cˈas xinsach retalil xban nak xapatzˈ a̱cuybal chicuu. ³³ ¿Ma incˈaˈ raj xru xatokˈoba ru la̱ cuech aj cˈanjelil joˈ nak xintokˈoba a̱cuu la̱in? chan. ³⁴ Cˈajoˈ nak quipoˈ li rey ut quixkˈaxtesi saˈ rukˈeb laj ilol tzˈalam toj retal quixtoj chixjunil lix cˈas. ³⁵ Ut joˈcaˈin ajcuiˈ tixba̱nu e̱re la̱ex lin Yucuaˈ cuan saˈ choxa cui incˈaˈ te̱cuy xma̱queb le̱ ras e̱ri̱tzˈin chi anchal e̱chˈo̱l che̱junju̱nkalex, chan li Jesús.

Eb laj pa̱banel li cuanqueb Corinto queˈxtiquib xchˈutubanquil ribeb chi lokˈoni̱nc

18  Nak ac xcˈulman aˈin, laj Pablo qui‑el Atenas. Ut co̱ Corinto. ² Ut aran quixtau jun li cui̱nk aj judío. Aj Aquila xcˈabaˈ. Ponto xtenamit. Incˈaˈ najter xcˈulunic Italia rochben lix Priscila li rixakil. Queˈel aran Roma xban nak laj Claudio li Acuabej quixye nak chixjunileb laj judío teˈe̱lk saˈ li tenamit aˈan. Laj Pablo co̱ chirulaˈanquileb. ³ Ut quicana rochbeneb chi cˈanjelac xban nak juntakˈe̱t li cˈanjel nequeˈxba̱nu. Nequeˈyi̱ban tˈicr re muheba̱l. ⁴ Saˈ li hiloba̱l cutan rajlal naxic laj Pablo saˈ li cab li nequeˈxchˈutub cuiˈ ribeb laj Judío. Aran quia̱tinac riqˈuineb ut quixchˈolob xya̱lal chiruheb laj judío joˈqueb ajcuiˈ li ma̱cuaˈeb aj judío. ⁵ Nak ac xeˈsukˈi chak laj Silas ut laj Timoteo Macedonia, laj Pablo quixkˈaxtesi rib chi junaj cua chixchˈolobanquil lix ya̱lal reheb laj judío nak li Jesús, aˈan li Cristo, laj Colonel li yechiˈinbil xban li Dios. ⁶ Abanan eb aˈan incˈaˈ queˈcuulac chiru li yo̱ chixyebal laj Pablo. Queˈoc chi majecua̱nc. Joˈcan nak laj Pablo quixchikˈchikˈi li rakˈ ut quixye reheb: ―Cui la̱ex incˈaˈ texcolekˈ, aˈ yal e̱re. Saˈ e̱be̱n la̱ex cuan li ma̱c. La̱in ma̱cˈaˈ inma̱c xban nak ac xinye e̱re li xya̱lal. Chalen anakcuan la̱in tinchˈolob xya̱lal reheb li ma̱cuaˈeb aj judío, chan. ⁷ Joˈcan nak laj Pablo qui‑el saˈ xya̱nkeb ut co̱ chi cua̱nc saˈ rochoch jun li cui̱nk ma̱cuaˈ aj judío. Aj Justo xcˈabaˈ. Li cui̱nk aˈan naxlokˈoni li Dios. Li rochoch cuan chixcˈatk li cab li nequeˈxchˈutub cuiˈ ribeb laj judío. ⁸ Laj Crispo, li nacˈamoc be saˈ li cab li nequeˈxchˈutub cuiˈ ribeb, quixpa̱b Li Ka̱cuaˈ rochbeneb li cuanqueb saˈ li rochoch. Nabaleb aj Corinto queˈpa̱ban nak queˈrabi resil li colba‑ib. Ut queˈcubsi̱c xhaˈeb. ⁹ Saˈ jun li kˈojyi̱n li Ka̱cuaˈ quixcˈutbesi jun li visión chiru laj Pablo ut quixye re: ―Matxucuac chi a̱tinac. Chˈolob ban li xya̱lal chiruheb li tenamit. ¹⁰ La̱in cua̱nkin a̱cuiqˈuin. Ma̱ ani ta̱ba̱nu̱nk raylal a̱cue xban nak nabaleb li cualal incˈajol saˈ li tenamit aˈin, chan li Dios re laj Pablo saˈ li visión. ¹¹ Joˈcan nak laj Pablo quicana aran jun chihab riqˈuin cuakib po ut yo̱ chixchˈolobanquil xya̱lal li ra̱tin li Dios chiruheb.

Laj Galión li cuan chi takla̱nc aran Acaya quixye nak laj Pablo ma̱cˈaˈ xma̱c

¹² Nak laj Galión cua̱nk chi takla̱nc aran Acaya, eb laj judío queˈxcˈu̱b ru chi ribileb rib nak teˈxchap laj Pablo. Queˈxchap ut queˈxcˈam saˈ po̱pol re nak ta̱rakekˈ a̱tin saˈ xbe̱n. ¹³ Ut queˈxye: ―Li cui̱nk aˈin yo̱ chixyebal reheb li tenamit chanru nak teˈxlokˈoni li Dios. Li naˈleb li naxye aˈan, moco naxcˈu̱luban ta li chakˈrab, li qˈuebil ke xbaneb laj Roma, chanqueb. ¹⁴ Oc raj re chi a̱tinac laj Pablo nak quichakˈoc chak laj Galión ut quixye reheb laj judío: ―Ex aj judío, cui ta xkˈet xchakˈrabeb laj Roma malaj ut cui ta cuan junak incˈaˈ us xba̱nu, tento raj tinchˈiˈchˈiˈi cuib che̱rabinquil. ¹⁵ Abanan cui yal chirix a̱tinac ut cˈabaˈej ut chirix le̱ chakˈrab yo̱quex chi jitoc chirix, tento nak la̱ex te̱sicˈ xya̱lal. La̱in incˈaˈ nacuaj rakoc a̱tin chirix li cˈaˈak re ru aˈin, chan. ¹⁶ Ut quirisiheb saˈ li po̱pol. ¹⁷ Eb laj griego queˈxchap laj Sóstenes li nataklan saˈ li cab li nequeˈxchˈutub cuiˈ ribeb laj judío. Queˈxsacˈ ut queˈxtacuasi chiru li po̱pol ut laj Galión ma̱cˈaˈ quixye.

Laj Pablo quisukˈi cuiˈchic Antioquía ut co̱ cuiˈchic rox sut chirulaˈaninquileb laj pa̱banel

¹⁸ Aˈut laj Pablo toj quicana aran nabal cutan. Tojoˈnak quixchakˈrabiheb laj pa̱banel ut qui‑el. Co̱ chiru haˈ toj Siria rochbeneb lix Priscila ut laj Aquila. Aran saˈ li tenamit Cencrea quixbes li rismal. Aˈan retalil nak quixba̱nu li cˈaˈru quixyechiˈi re li Dios. ¹⁹ Nak queˈcuulac Efeso laj Pablo quixcanabeb lix Priscila ut laj Aquila ut co̱ saˈ li cab li nequeˈxchˈutub cuiˈ ribeb laj judío chixchˈolobanquil lix ya̱lal chiruheb laj judío. ²⁰ Ut eb aˈan queˈxtzˈa̱ma chiru nak toj ta̱cana̱k chic caˈchˈinak riqˈuineb. Abanan laj Pablo incˈaˈ quixsume cana̱c. ²¹ Quixchakˈrabiheb ban ut quixye reheb: ―Tento nak tinxic chixnumsinquil li ninkˈe Jerusalén xban nak cuulac re xkˈehil. La̱in tincha̱lk cuiˈchic e̱riqˈuin cui joˈcan naraj li Dios, chan. Ut qui‑el aran Efeso. ²² Nak quicuulac Cesarea, co̱ Jerusalén. Ut nak ac xqˈueheb xsahil xchˈo̱leb laj pa̱banel, co̱ Antioquía. ²³ Incˈaˈ najt quicuan aran nak co̱ ut quinumeˈ saˈ eb li naˈajej Galacia ut Frigia ut yo̱ chixqˈuebal xcacuilal xchˈo̱leb laj pa̱banel.

Laj Apolos quixchˈolob xya̱lal nak li Jesús, aˈan li Cristo

²⁴ Quicuulac Efeso jun li cui̱nk aj judío, aj Apolos xcˈabaˈ. Alejandría xtenamit. Kˈaxal naxnau a̱tinac chi cha̱bil ut naxnau chi us li tzˈi̱banbil saˈ li Santil Hu. ²⁵ Quixtzol rib chi us ut naxnau chanru xpa̱banquil li Ka̱cuaˈ. Ut quixqˈue xchˈo̱l chi a̱tinac chi tzˈakal xchˈolobanquil resil li Jesús, usta caˈaj cuiˈ quixnau chirix li cubi haˈ li quixba̱nu laj Juan. ²⁶ Qui‑oc chi a̱tinac chi cau xchˈo̱l saˈ li cab li nequeˈxchˈutub cuiˈ ribeb laj judío. Nak queˈrabi lix Priscila ut laj Aquila li yo̱ chixyebal, queˈrisi xjunes laj Apolos ut queˈxchˈolob li xya̱lal chi tzˈakal chiru. ²⁷ Nak ac yo̱ xcˈoxlanquil xic laj Apolos aran Acaya, eb laj pa̱banel queˈxqˈue xcacuil xchˈo̱l re ta̱xic. Ut queˈxtzˈi̱ba jun li hu ut queˈxtakla reheb laj pa̱banel li cuanqueb aran. Queˈxye reheb nak teˈxcˈul chi sa saˈ xchˈo̱l. Ut nak quicuulac aran, laj Apolos quixtenkˈaheb chi cha̱bil li ac xeˈpa̱ban xban rusilal li Dios. ²⁸ Ut quira̱tinaheb laj judío chi cau xchˈo̱l chiruheb chixjunileb li tenamit. Ut quixchˈolob xya̱lal chiruheb chi tzˈakal nak li Jesús, aˈan li Cristo, joˈ tzˈi̱banbil saˈ li Santil Hu.