M’Cheyne Bible Reading Plan

Li Jesús naxchˈolob xya̱lal saˈ xbe̱n li tzu̱l

5  Ut nak quirileb li qˈuila tenamit, li Jesús quitakeˈ saˈ xbe̱n jun li tzu̱l. Ut nak quicˈojla, eb li yo̱queb chixta̱kenquil queˈxchˈutub rib riqˈuin. ² Qui‑oc chixchˈolobanquil li xya̱lal chiruheb ut quixye: ³ ―Us xak reheb li nequeˈrecˈa nak cubenak xcuanquileb xban nak eb aˈan cua̱nkeb chic rubel lix nimajcual cuanquilal li Dios. ⁴ Us xak reheb li nequeˈya̱bac xban xrahileb xchˈo̱l xban nak eb aˈan ta̱cˈojoba̱k xchˈo̱leb. ⁵ Us xak reheb li tu̱laneb xban nak eb aˈan teˈe̱chani̱nk re li naˈajej li yechiˈinbil reheb xban li Dios. ⁶ Us xak reheb li teˈraj ru xba̱nunquil li ti̱quilal. Chanchan li teˈtzˈoca̱k ut teˈchakik re. Us xak reheb xban nak li Dios ta̱tenkˈa̱nk reheb chixba̱nunquil li us. ⁷ Us xak reheb li nequeˈuxta̱nan u xban nak eb aˈan teˈuxta̱na̱k ruheb xban li Dios. ⁸ Us xak reheb li ti̱queb xchˈo̱l xban nak eb aˈan teˈril ru li Dios. ⁹ Us xak reheb li nequeˈxtenkˈa ras ri̱tzˈin chi cua̱nc saˈ tuktu̱quil usilal xban nak eb aˈan ralal xcˈajol li Dios teˈyehekˈ reheb. ¹⁰ Us xak reheb li nequeˈrahobtesi̱c saˈ xcˈabaˈ li ti̱quilal, xban nak eb aˈan cua̱nkeb chic rubel lix cuanquilal li Dios. ¹¹ Us xak e̱re nak texhobekˈ ut texrahobtesi̱k saˈ incˈabaˈ ut ta̱yehekˈ e̱re cˈaˈak re ru chi ma̱usilal chi yal ticˈtiˈ. ¹² Mirahoˈ e̱chˈo̱l. Chisahokˈ ban e̱chˈo̱l riqˈuin li cˈaˈru ta̱uxk e̱re xban nak kˈaxal nim le̱ kˈajca̱munquil ta̱qˈuehekˈ e̱re saˈ choxa. Moco caˈaj cuiˈ ta la̱ex yo̱quex chi cˈuluc re li raylal. Joˈcan aj ban cuiˈ queˈxcˈul li profeta li queˈcuan junxil.

Li ratzˈamil li ruchichˈochˈ

¹³ La̱ex aj pa̱banel chanchanex li atzˈam li nacˈanjelac arin saˈ ruchichˈochˈ. Cui ta li atzˈam ta̱sachk xquiˈal, ¿cˈaˈ ta raj chic ru ta̱oc cuiˈ? Ma̱cˈaˈ chic ta̱oc cuiˈ. Yal re tzˈekecˈ aj chic ut re yekˈi̱c.

Lix saken li ruchichˈochˈ

¹⁴ La̱ex aj pa̱banel, la̱ex lix cutan saken li ruchichˈochˈ. Junak tenamit cuan saˈ xbe̱n junak tzu̱l ma̱ jaruj naru xmukbal. ¹⁵ Chi moco nalochman junak candil re xqˈuebal rubel junak chacach. Naqˈueman ban saˈ xbe̱n xnaˈaj candil re nak tixcutanobresi saˈ li cab li cuanqueb cuiˈ chixjunileb. ¹⁶ Joˈcan ajcuiˈ la̱ex. La̱ex lix cutan saken li ruchichˈochˈ. Chicˈutu̱nk biˈ le̱ cha̱bilal chiruheb le̱ ras e̱ri̱tzˈin re nak eb aˈan teˈxqˈue retal li us nequeba̱nu ut teˈxqˈue xlokˈal le̱ Yucuaˈ li cuan saˈ choxa.

Li Jesús naxchˈolob xya̱lal li chakˈrab

¹⁷ Me̱cˈoxla nak xinchal chixsachbal xcuanquil li chakˈrab li quiqˈueheˈ re laj Moisés chi moco li ac xoleˈxye li profeta. Incˈaˈ xinchal chixsachbal xcuanquil aˈan. Xinchal ban re nak ta̱tzˈaklok ru aˈan. ¹⁸ Relic chi ya̱l tinye e̱re nak ta̱osokˈ li choxa, ta̱osokˈ li ruchichˈochˈ, ut yal ta jun xle̱tril chi moco junak retalil li chakˈrab ta̱sachk xcuanquil. Toj retal talajeˈcˈulma̱nk chixjunil. ¹⁹ Li ani naxkˈet li chakˈrab, usta nacˈutun nak incˈaˈ nim xcuanquil chiru aˈan, ut cui naxcˈut chiru li ras ri̱tzˈin xba̱nunquil chi joˈcan, li jun aˈan kˈaxal caˈchˈin lix lokˈal ta̱qˈuehekˈ re saˈ lix nimajcual cuanquilal li Dios. Abanan li ani naxba̱nu chi tzˈakal li naxye li chakˈrab, ut tixcˈut chiru li ras ri̱tzˈin xba̱nunquil chi joˈcan, li jun aˈan kˈaxal nim lix lokˈal ta̱qˈuehekˈ re saˈ lix nimajcual cuanquilal li Dios. ²⁰ Tinye ajcuiˈ e̱re nak cui lix ti̱quilal le̱ chˈo̱l incˈaˈ tixkˈax ru xti̱quilal xchˈo̱leb laj tzˈi̱b ut eb laj fariseo, incˈaˈ tex‑oc rubel lix nimajcual cuanquilal li Dios.

Li Jesús naxchˈolob xya̱lal chirix li joskˈil

²¹ E̱rabiom resil li chakˈrab nak yebil reheb li kaxeˈ kato̱n: Ma̱camsi a̱cuas a̱cui̱tzˈin. Li ani ta̱camsi̱nk, toj tixtoj rix saˈ rakba a̱tin. ²² Aban la̱in tinye e̱re lix ya̱lal aˈan. Li ani ta̱joskˈok riqˈuin li ras ri̱tzˈin ta̱rakekˈ a̱tin saˈ xbe̱n. Ut li ani tixtzˈekta̱na li ras ri̱tzˈin cuan xma̱c chiru laj rakol a̱tin. Ut li ani tixye xyaj tiox re li ras ri̱tzˈin, ma̱re anchal ta̱xic saˈ xxamlel li xbalba. ²³ Joˈcan nak cui saˈ xqˈuebal la̱ mayej chiru li artal ta̱julticokˈ a̱cue nak ta̱recˈa saˈ xchˈo̱l la̱ cuas a̱cui̱tzˈin nak cuan a̱ma̱c chiru, ²⁴ canab aran la̱ mayej, ut ayu, cˈam chak a̱cuib saˈ usilal riqˈuin la̱ cuas a̱cui̱tzˈin, tojoˈnak toxa̱kˈaxtesi la̱ mayej. ²⁵ Cui cuan la̱ chˈaˈajquilal riqˈuin la̱ cuas a̱cui̱tzˈin, yi̱b ru chi junpa̱t. Cui incˈaˈ nacacˈam a̱cuib saˈ usilal chi junpa̱t, ma̱re anchal tatxcˈam riqˈuin laj rakol a̱tin ut aˈan tatxtakla saˈ tzˈalam. ²⁶ Ut incˈaˈ tat‑e̱lk aran cui incˈaˈ ta̱toj chixjunil li joˈ qˈuial teˈxpatzˈ a̱cue. Relic chi ya̱l ninye a̱cue nak tento ta̱cˈam a̱cuib saˈ usilal riqˈuin la̱ cuas a̱cui̱tzˈin.

Li Jesús naxchˈolob xya̱lal chirix li muxuc caxa̱r

²⁷ E̱rabiom resil nak quiyeman najter: Matmuxuc caxa̱r. ²⁸ Ut la̱in tinye e̱re nak yalak ani tixcaˈya junak ixk re xrahinquil ru, ac xmux ru lix sumlajic xban xrahinquil ru. ²⁹ Le̱ najter naˈleb tento te̱canab chi junaj cua. Li cˈaˈak re ru ta̱qˈuehok e̱re chi ma̱cobc, te̱tzˈekta̱na. Cui li xnakˈ la̱ cuu li cuan saˈ a̱nim naqˈuehoc a̱cue chi ma̱cobc, us raj nak ta̱cuisi ut ta̱tzˈek. Kˈaxal us nak ta̱sachk li xnakˈ a̱cuu chiru nak tatxic la̱at saˈ xbalba. ³⁰ Cui la̱ nim ukˈ naqˈuehoc a̱cue chi ma̱cobc, us raj cui ta̱yocˈ ut ta̱tzˈek. Kˈaxal us nak ta̱sachk la̱ cuukˈ chiru nak tatxic la̱at saˈ xbalba.

Li Jesús naxchˈolob xya̱lal chirix li jachoc ib

³¹ Ut yebil ajcuiˈ chi joˈcaˈin: Li ani tixjach rib riqˈuin li rixakil, tento nak tixyi̱b li hu re xjachbal rib ut tixqˈue re. ³² Abanan la̱in ninye e̱re li xya̱lal aˈan. Li ani naxjach rib riqˈuin li rixakil chi incˈaˈ xmux ru xsumlajic li ixakilbej, aˈ li be̱lomej cuan xma̱c nak li ixk aˈan tixmux ru xsumlajic. Ut li ani ta̱cˈamok re li ixk, li ac xcanaba̱c xban xbe̱lom, li cui̱nk aˈan naxmux ru li sumsu.

Li Jesús naxchˈolob xya̱lal chirix li juramento

³³ E̱rabiom resil nak quiyeheˈ reheb le̱ xeˈto̱nil yucuaˈ chi joˈcaˈin: Li cˈaˈak re ru te̱yechiˈi xba̱nunquil riqˈuin juramento, tento te̱ba̱nu. ³⁴ Abanan la̱in tinye e̱re tento te̱ba̱nu li cˈaˈru te̱yechiˈi ut me̱ba̱nu li juramento chi ma̱cˈaˈ rajbal. Me̱patzˈ xcˈabaˈ li choxa xban nak aˈan xnaˈaj li Dios. ³⁵ Ut me̱patzˈ xcˈabaˈ li ruchichˈochˈ xban nak aˈan xnaˈaj li rok. Ut me̱patzˈ xcˈabaˈ li tenamit Jerusalén xban nak aˈan xtenamit li nimajcual Dios, li tzˈakal Rey. ³⁶ Chi moco te̱ba̱nu li juramento saˈ xcˈabaˈ le̱ jolom xban nak la̱ex incˈaˈ naru te̱sakobresi le̱ rismal chi moco naru te̱kˈekobresi. ³⁷ Joˈcaˈin ban te̱ba̱nu. Cui te̱ye nak ya̱l, junes ya̱l te̱ye. Ut cui te̱ye nak incˈaˈ, junes incˈaˈ te̱ye. Cui te̱qˈue xtzˈakob li a̱tin aˈan, li naˈleb aˈan riqˈuin laj tza nachal.

Li xya̱lal chirix xra̱baleb li xicˈ nequeˈiloc ke

³⁸ E̱rabiom resil nak quiyeheˈ chi joˈcaˈin najter: Cui ani ta̱risi xnakˈ a̱cuu, ta̱isi̱k ajcuiˈ li xnakˈ ru aˈan. Cui ani ta̱risi li ruch a̱cue, ta̱isi̱k ajcuiˈ li re aˈan. ³⁹ Abanan la̱in tinye e̱re: Me̱sume ma̱usilal riqˈuin ma̱usilal. Cui junak tixqˈue junak rukˈ saˈ a̱cuu, qˈue cuiˈchic chixsacˈ li jun pacˈal. ⁴⁰ Li ani ta̱raj tatxcˈam riqˈuin laj rakol a̱tin ut ta̱raj xmakˈbal la̱ cami̱s, qˈue ajcuiˈ la̱ chaque̱t re. ⁴¹ Cui ani ta̱minok a̱cuu chixcˈambal li ri̱k jun kilómetro, cˈam cuibak kilómetro la̱at. ⁴² Li ani tixtzˈa̱ma cˈaˈru re a̱cue, qˈue re. Ut li ani ta̱ajok toˈoni̱nc a̱cuiqˈuin, ma̱kˈetkˈeti a̱cuib chiru. ⁴³ E̱rabiom resil nak te̱ra li ani narahoc e̱re ut xicˈ te̱ril li xicˈ na‑iloc e̱re. ⁴⁴ Abanan la̱in tinye e̱re, cherahak li xicˈ na‑iloc e̱re. Chetzˈa̱ma usilal saˈ xbe̱neb li nequeˈhoboc e̱re. Cheba̱nuhak li us reheb li xicˈ nequeˈiloc e̱re ut chextijok chirix li nequeˈba̱nun ma̱usilal e̱re ut nequeˈrahobtesin e̱re. ⁴⁵ Cui te̱ba̱nu chi joˈcan, la̱exak ralal xcˈajol le̱ Yucuaˈ cuan saˈ choxa. Aˈan naqˈuehoc chak li sakˈe saˈ xbe̱neb li useb xnaˈleb joˈ ajcuiˈ li incˈaˈ useb xnaˈleb. Ut aˈan ajcuiˈ naqˈuehoc chak li hab saˈ xbe̱neb li ti̱queb xchˈo̱l joˈ ajcuiˈ li incˈaˈ ti̱queb xchˈo̱l. ⁴⁶ Cui caˈaj cuiˈ li nequeˈrahoc e̱re nequera, ¿cˈaˈru le̱ kˈajca̱munquil te̱cˈul? ¿Ma incˈaˈ ta biˈ joˈcan ajcuiˈ nequeˈxba̱nu eb laj titzˈol toj, li nequeˈbalakˈin? ⁴⁷ Ut cui caˈaj cuiˈ le̱ rech tenamitil nequeqˈue xsahil xchˈo̱leb, ¿cˈaˈru rusil aˈan? ¿Ma incˈaˈ ta biˈ joˈcan ajcuiˈ nequeˈxba̱nu li incˈaˈ nequeˈxpa̱b li Dios? ⁴⁸ Ti̱cak biˈ e̱chˈo̱l joˈ le̱ Yucuaˈ li cuan saˈ li choxa ti̱c xchˈo̱l.

Li cˈaˈru queˈxcˈul laj Ananías ut lix Safira xban li ma̱c queˈxba̱nu

5  Quicuan jun li cui̱nk aj Ananías xcˈabaˈ. Quixcˈayi jun lix chˈochˈ rochben lix Safira li rixakil. ² Ut queˈxcˈu̱b ru chi ribileb rib nak yijach lix tzˈak li chˈochˈ ta̱cana̱k chokˈ reheb. Ut li yijach chic quixcˈam laj Ananías riqˈuineb li apóstol ut quixye reheb: ―Aˈan aˈin chixjunil lix tzˈak li kachˈochˈ li xkacˈayi, chan. ³ Laj Pedro quixye re: ―At Ananías, ¿cˈaˈut nak xaqˈue a̱cuib chira̱le laj tza? ¿Cˈaˈut nak yo̱cat chixbalakˈinquil li Santil Musikˈej riqˈuin nak yo̱cat chixcanabanquil yijach lix tzˈak li chˈochˈ chokˈ a̱cue? ⁴ ¿Cˈaˈut nak tat‑oc xmukbal xtzˈak la̱ chˈochˈ? ¿Ma ma̱cuaˈ ta biˈ a̱cue? Cui xacˈayi la̱ chˈochˈ, ¿ma incˈaˈ ta biˈ raj xru xcana chokˈ a̱cue lix tzˈak? Ma̱cuaˈ chiku la̱o yo̱cat chi ticˈtiˈic. Chiru ban li Dios, chan. ⁵ Nak quirabi li a̱tin li quixye laj Pedro, quitˈaneˈ laj Ananías ut camenak quicana. Ut cˈajoˈ nak qui‑oc xxiuheb chixjunileb li queˈiloc re joˈqueb ajcuiˈ li queˈabin resil. ⁶ Ut eb li cui̱nk li toj sa̱jeb li cuanqueb aran queˈxlan li camenak, queˈxpako ut queˈxcˈam re teˈxmuk. ⁷ Ac xnumeˈ na chic oxib o̱r nak quicuulac lix Safira li rixakil. Incˈaˈ naxnau cˈaˈru ac xcˈulman. ⁸ Laj Pedro quixye re: ―Ye cue. ¿Ma joˈ aˈin xecˈayi cuiˈ le̱ chˈochˈ?― Ut lix Safira quixye: ―Ya̱l, joˈcan xkacˈayi cuiˈ, chan. ⁹ Ut laj Pedro quixye cuiˈchic re: ―¿Cˈaˈut nak xecˈu̱b che̱ribil e̱rib xyalbal rix li Santil Musikˈej? Cueˈqueb chak li xeˈmukuc chak re la̱ be̱lom ut tateˈxcˈam ajcuiˈ la̱at, chan. ¹⁰ Ut saˈ ajcuiˈ li ho̱nal aˈan lix Safira quitˈaneˈ chi rok laj Pedro ut camenak quicana. Eb li cui̱nk queˈoc saˈ cab ut queˈril nak camenak chic. Queˈrisi ut coxeˈxmuk chak chixcˈatk lix be̱lom. ¹¹ Cˈajoˈ nak qui‑oc xxiuheb chixjunileb laj pa̱banel joˈqueb ajcuiˈ chixjunileb li queˈabin re li resil aˈin.

Nabal li milagro ut li sachba chˈo̱lej queˈxba̱nu li apóstol

¹² Rajlal nequeˈxchˈutub ribeb saˈ xmu li templo chixjunileb laj pa̱banel cuan cuiˈ li oqueba̱l Salomón xcˈabaˈ. Nabal li milagro queˈxba̱nu eb li apóstol ut nabal li sachba chˈo̱lej. ¹³ Usta eb li tenamit nequeˈxqˈue xlokˈaleb laj pa̱banel, abanan nequeˈxucuac chi xic saˈ xya̱nkeb. ¹⁴ Cˈajoˈ nak yo̱queb chi ta̱mc li yo̱queb chi pa̱ba̱nc re li Ka̱cuaˈ, joˈ cui̱nk joˈ ixk. ¹⁵ Ut nabaleb li queˈxcˈam chak lix yajeb ut queˈxyocob saˈ lix cuarib malaj chiru lix po̱p chire be. Queˈraj nak laj Pedro tixqˈuirtesiheb. Eb aˈan queˈxcˈoxla nak usta yal ta̱numekˈ chiruheb, teˈqˈuira̱k. ¹⁶ Nabaleb li queˈchal chak saˈ eb li tenamit li cuanqueb chi nachˈ riqˈuin Jerusalén. Queˈxcˈam chak li yaj ut eb li cuan ma̱us aj Musikˈej riqˈuineb. Ut chixjunileb quilajeˈqˈuirtesi̱c.

Eb li apóstol queˈcˈameˈ cuiˈchic chiruheb li nequeˈtaklan saˈ xbe̱neb laj judío

¹⁷ Ut li xyucuaˈil aj tij ut eb laj saduceo li cuanqueb rochben, cˈajoˈ nak queˈoc xcakalinquileb li apóstol. ¹⁸ Joˈcan nak queˈxtakla xchapbaleb ut queˈxqˈueheb saˈ li tzˈalam li nequeˈqˈueheˈ cuiˈ yalak ani. ¹⁹ Abanan chiru li kˈojyi̱n aˈan jun lix ángel li Ka̱cuaˈ quixte lix puertil li tzˈalam ut quirisiheb saˈ tzˈalam ut quixye reheb: ²⁰ ―Ayukex saˈ li templo ut te̱chˈolob xya̱lal chiruheb li tenamit chirix li acˈ yuˈam, chan reheb. ²¹ Cuulajak chic nak toj ekˈela queˈco̱eb saˈ li templo eb li apóstol ut queˈoc chixchˈolobanquil li xya̱lal chiruheb li tenamit joˈ quiyeheˈ reheb xban li ángel. Saˈ ajcuiˈ li ekˈela aˈan queˈcuulac li xbe̱nil aj tij rochbeneb chixjunileb li nequeˈtenkˈan re, ut queˈxbokeb li jun chˈol chic li nequeˈcˈamoc be chiruheb laj judío joˈqueb ajcuiˈ li nequeˈtaklan saˈ xbe̱neb. Ut queˈxtakla xyebal re laj ilol tzˈalam nak teˈcˈamekˈ li apóstol riqˈuineb. ²² Queˈcuulac li takl saˈ li tzˈalam ut incˈaˈ chic queˈtaˈeˈ li apóstol aran. Joˈcan nak queˈsukˈi chixyebal resil ut queˈxye: ²³ ―Relic chi ya̱l li tzˈalam tzˈaptzˈo chi us nak xkatau. Ut eb laj cˈacˈalenel cuanqueb chire li oqueba̱l. Nak xkate li tzˈalam, incˈaˈ chic xkatauheb li cui̱nk chi saˈ, chanqueb li takl. ²⁴ Nak queˈrabi aˈan, eb li xbe̱nil aj tij ut eb li nequeˈtaklan saˈ xbe̱neb li soldado li nequeˈcˈacˈalen saˈ li templo, queˈsach xchˈo̱leb ut queˈoc chixcˈoxlanquil cˈaˈru ta̱cana̱k cuiˈ li yo̱ chi cˈulma̱nc. ²⁵ Quichal jun ut quixye reheb: ―Eb li cui̱nk li queˈqˈueheˈ saˈ tzˈalam ecue̱r cuanqueb saˈ li templo ut yo̱queb chixchˈolobanquil li xya̱lal chiruheb li tenamit, chan. ²⁶ Co̱ ut li jun li nataklan saˈ xbe̱neb li soldado rochbeneb lix takl. Ut queˈxcˈameb chak li apóstol saˈ usilal xban nak queˈxucuac. Queˈxcˈoxla nak ma̱re teˈcutekˈ chi pec xbaneb li tenamit. ²⁷ Queˈcˈameˈ laj Pedro ut laj Juan ut queˈxakaba̱c chiru li xyucuaˈil aj tij ut chiruheb li cuanqueb rochben. Ut li xyucuaˈil aj tij quia̱tinac riqˈuineb ut quixye reheb: ²⁸ ―¿Ma incˈaˈ ta biˈ xkaye e̱re nak incˈaˈ chic te̱tzoleb li tenamit saˈ xcˈabaˈ li cui̱nk aˈan? La̱ex yo̱quex chixcˈutbal li tijleb aˈan saˈ chixjunil Jerusalén ut te̱raj xqˈuebal saˈ kabe̱n lix camic li cui̱nk aˈan, chanqueb. ²⁹ Laj Pedro, joˈqueb ajcuiˈ li rech apostolil, queˈchakˈoc ut queˈxye: ―¿Ma takakˈet li cˈaˈru naxye li Dios ut takapa̱b li cˈaˈru nequeˈxye li cui̱nk? Incˈaˈ. Tento takapa̱b li cˈaˈru naxye li Dios. ³⁰ Li Dios li queˈxlokˈoni chak li kaxeˈto̱nil yucuaˈ, aˈan li quicuaclesin cuiˈchic re li Jesús chi yoˈyo saˈ xya̱nkeb li camenak, li queqˈue chi camsi̱c chiru cruz la̱ex. ³¹ Li Jesús, aˈan li quiqˈueheˈ xlokˈal xban li Dios ut quiqˈueheˈ chi cˈojla̱c saˈ xnim ukˈ ut quiqˈueheˈ xcuanquil chi takla̱nc ut chi coloc, re nak laj Israel naru teˈyotˈekˈ xchˈo̱leb teˈxjal xcˈaˈux ut teˈcuyekˈ xma̱queb. ³² La̱o xkil aˈan riqˈuin ku. Joˈcan nak nakachˈolob xya̱lal aˈin ut li Santil Musikˈej li naxqˈue li Dios reheb li nequeˈpa̱ban, aˈan ajcuiˈ nacˈutuc re li xya̱lal aˈin, chanqueb. ³³ Li xyucuaˈil aj tij ut li cuanqueb rochben, cˈajoˈ nak queˈjoskˈoˈ nak queˈrabi li quixye laj Pedro ut queˈraj raj xcamsinquileb li apóstol. ³⁴ Abanan saˈ xya̱nkeb aˈan cuan jun aj fariseo aj Gamaliel xcˈabaˈ. Li cui̱nk aˈan aj tzolol chakˈrab ut naqˈueheˈ xcuanquil xbaneb li tenamit. Quixakli chiruheb ut quixtakla risinquileb li apóstol junpa̱t chirix cab. ³⁵ Ut quixye reheb: ―Ex cui̱nk aj Israel, cˈoxlahomak chi us cˈaˈru te̱ba̱nu riqˈuineb li cui̱nk aˈin. ³⁶ Qˈuehomak retal li cˈaˈru quixcˈul laj Teudas. Aˈan quixye nak kˈaxal nim xcuanquil. Cuan na ca̱hibak ciento chi cui̱nk li nequeˈta̱ken re. Aban li jun aˈan quicamsi̱c ut chixjunileb li queˈta̱ken re quilajeˈxchaˈchaˈi ribeb ut queˈosoˈ yal chi joˈcan. ³⁷ Ut joˈcan ajcuiˈ quixcˈul laj Judas, Galilea xtenamit, nak quicˈulun saˈ xkˈehil chixtzˈi̱banquil xcˈabaˈeb li tenamit. Quixbalakˈiheb nabaleb li tenamit. Quicam ajcuiˈ aˈan ut chixjunileb li queˈta̱ken re queˈchaˈchaˈi̱c. ³⁸ Anakcuan la̱in tinye e̱re: Canabomakeb li cui̱nk aˈin. Me̱chˈiˈchˈiˈiheb chic xban nak cui li cˈanjel aˈin yal xcˈaˈux cui̱nk, ta̱osokˈ. ³⁹ Abanan cui ut re li Dios, incˈaˈ texru̱k chixpoˈbal ru. Qˈuehomak retal chi us ma̱re anchal yo̱quex chi pletic riqˈuin li Dios, chan laj Gamaliel. ⁴⁰ Ut queˈxcˈul xchˈo̱l li quixye. Queˈxbokeb li apóstol ut queˈxqˈueheb chi saqˈuecˈ ut queˈxye reheb nak incˈaˈ chic teˈa̱tinak saˈ xcˈabaˈ li Jesús. Ut chirix aˈan, queˈachˈaba̱c. ⁴¹ Ut eb li apóstol queˈel chiruheb chi kˈaxal sa saˈ xchˈo̱leb xban nak chiruheb aˈan lokˈ xcˈulbal li raylal saˈ xcˈabaˈ li Jesús. ⁴² Ut incˈaˈ queˈxcanab xchˈolobanquil xya̱lal chiruheb li tenamit saˈ li templo ut saˈ eb li rochoch ut queˈxye resil nak li Jesucristo, aˈan laj Colonel li yechiˈinbil xban li Dios.